politika

gjestii.jpg
G. P.21:42 | 15/10/2019

Futbollistët duhet të merren me fushën e blertë dhe jo me politikën. Është ky mendimi i gazetarit Mustafa Nanos. Në monologun gjatë emisionit “Provokacija” në televizionin ABC News Nano renditi rastet ku sipas tij, sporti është përfshira nga gjeste politike.

Fillimisht, ai solli në kujtesë gjestin e Xhakës dhe Shaqirit, të cilët në një ndeshje ndaj Serbisë bënë me duar simbolin e shqiponjës. Më pas, kujtoi rastin e disa ditëve më parë në Breshia të Italisë, ku ndeshja u ndërpre pasi tifozët serbë mësynë në fushë pasi disa shqiptarë valëvisnin flamurin.

Në fund, vëmendjen e Nanos e kishte marrë gjesti i lojtarëve turq në nderim të ushtrisë, e cila po lufton në veri të vendit. Gjest, që sipas Nanos, e turpëron vendin.

Monologu i plotë:

Ju kujtohet gjesti i Xhakës dhe Shaqirit gjatë ndeshjes Serbi-Zvicër, ku ata pasi shënuan gol, bënë një gjest që tërhoqi vëmendjen e gjithë dynjasë. Gjesti është i famshëm, janë lojtarë të shkëlqyer, unë i admiroj, por gjesti i tyre ishte i gabuar. Unë e kam kritikuar qysh atëherë. E kritikova sepse nuk jam dakord me aq që bëhet nga ana e sportistëve për të përzierë sportin me politikën. Ai ishte një gjest i gabuar. Siç ishte i gabuar edhe një gjest i disa shqiptarëve në Breshia teksa po luhej një ndeshje miqësore mes Breshias, ku luan Balotelli dhe një skuadër serbe. Një apo dy shqiptarë kishin shkuar atje jo për të parë ndeshjen, por me kishin shkuar me qëllime politike. Kishin shkuar me flamur me vete dhe nisën t’i valëvisnin, duke tërhequr edhe vëmendjen e tifozëve serbë. Këta të fundit kaq duan në rrethana të tilla, morën zjarr, pushtuan fushën dhe ndeshja u prish, shqiptarët dhe serbët u bënë gazi i botës. Treguan që ata nuk druhen përpara ngasjes për të ngatërruar sportin me politikën dhe treguan që nuk e kanë për gjë që problemet e tyre, të lagjes së Ballkanit ti zhvendosin në vende të tjera të botës, në këtë rast në Itali.

Jemi përsëri te dukuria e përzierjes së sportit me politikën, e cila mori një përthyerje spektakolare dy tre ditë më parë me futbollistët turq të cilët me ndeshjen me Shqipërinë gjeti një minutë interesante për të festuar dhe për të gëzuar me tifozë. Ata u afruan tek ultrasit dhe nderuan në mënyrë militare. Ky ishte një homazh që u bëj ushtarëve turq që janë në një luftë. Nuk janë në luftë kundër pushtuesit se askush nuk i ka pushtuar turqit. Janë në një luftë në veri të Sirisë. Kjo ishte një shfaqje brutale që manifeston edhe njëherë përpjekjet e sportistëve të caktuar për të përzierë sportin me politikën. Unë prisja që këta të bënin mea culpa më pas sepse parashikoja një presion të madh nga ana e faktorit ndërkombëtar. Kjo trysni u bë, por nuk funksionoi. Mbrëmë ata kanë luajtur ndeshjen me Francës, arritën një barazim dhe në fund bënë të njëjtën gjë. Shkuan tek tifozët e tyre dhe nderuan në mënyrë militare.

Unë jam i sigurt që ata janë me idenë që duke bërë këtë gjë ata nderojnë kombin e tyre. Kam përshtypjen që në këtë mënyrë kombi turk, turpërohet. Gjeste të tilla e prishin imazhin ndërkombëtar të Turqisë. Zërat kundër janë shtuar. Një pjesë janë duke kërkuar penalizmin në terma sportivë të Turqisë dhe unë do isha shumë i lumtur që kjo do të ndodhte se do merrte dhe Shqipëria tre pikë. Nuk e meritonte në termat sportivë, por janë dënime që duhen dhënë. Shpresojmë që edhe në mungesë të një penaliteti, lojtarët turq ta kenë nxjerrë leksionin që politika nuk duhet të përzihet me sportin dhe ata janë vetëm futbollistë që duhet të luajnë në fushën e futbollit, asgjë më tepër./abcnews.al

frrok-cupi.jpg
G. P.18:10 | 11/10/2019

Çmimi Nobel për austriakun Peter Handke, ithtar i Sllobodan Millosheviçit ka krijuar polemika të mëdha në radhët e shkrimtarëve, por jo vetëm.

Analisti dhe gazetari i njohur Frrok Çupi ka mendimin se të gjitha armiqësitë që shfaqen ndaj Handke sot do të zhduken në të ardhmen. Sipas Çupit, politika ka futur dorë në këtë Çmim Nobel.

“Nuk do doja kurrsesi që një shkrimtar i cili mohon një luftë dhe një sens lufte mes kosovarëve të robtuar prej një pushtimi, prej një dhune Millosheviçiane dhe pjsesë së bombardimeve nuk do doja, por do doja një talent siç është Peter Handke dhe për të zhvilluar pak më tej po ju them se as ABC, as ABC në Amerikë, as kujtimi i Millosheviçit, as armiqësia midis Kosovës dhe Serbisë nuk do të ekzistojnë në kohën që do të ekzistojnë librat e Handke. Librat e Handke janë të pavdekshëm, Aarti është i pavdekshëm, gjithmonë. Kështu që në këtë moment më duket se ka dy çështje, duke bërë atë çfarë do thuhet pas 100 vjetësh.

Pas 100 vjetësh do përmendet Handke, nuk do përmendet pjesa e dytë. Duke shkuar tek kjo unë e shikoj se çfarë po ndodh rreth këtij çmimi Nobel, shikoj se ka futur dorë politika e cila ka mbetur bosh dhe tenton të marrë zvarrë popujt e tyre. Mua më duket se politika është kthyer në pikën më të keqe të Aristotelit. Aristoteli thotë se politika e keqe, që nuk do të mbaj përgjegjësira, i thotë popujve teksa duhet të ngasësh parmendën, duhet të mbash pushkën në krahë dhe vulën në xhep për çdo gjë që do ti duhet shtetit. Populli nuk zgjidh çështjet e artit. Populli zemërohet nëse ti i thua kjo gjë apo ajo gjëja tjetër”, thotë Frrok Çupi.

Së dyti, thotë Çupi, ka ndodhur neuroza e mbrojtjes. Sipas gazetarit, një pjesë e botës e ka pritur shumë mirë Peter Handke. Nga ana tjetër, Çupi thotë se sëbashku me politikanët janë renditur shkrimtarët periferikë dhe militantë të cilët nuk e mbështesin.

“Çështja e dytë që ka nxitur këtë çështje mendoj se është neuroza e mbrojtjes. Në kuptimin që shiko si janë rreshtuar. Bota është ndarë në dysh në raport me Handke. Në Gjermani është pritur me lavdi shumë të madhe. Në Austri është pritur me lavdi shumë të madhe. Ndërsa shkrimtarët periferikë, militantë në të gjithë botën janë vënë në radhën e politikanëve që po sulmojnë artin e këtij shkrimtari, duke shkuar deri tek Salman Rushdie. Ai thotë që nuk e pranon këtë shkrimtar. Salman Rushdie është shkrimtar i madh, por i dalë nga politika, i frustruar nga politika dhe këtu them pse shkojmë tek psikoza e mbrojtjes. Ai dhe shkrimtarë të tjerë të radhitur te politika padyshim që do mbrojnë veten”, tha Çupi./abcnews.al

george-frendo.jpg
G. P.15:14 | 11/10/2019

Kisha Katolike i bën thirrje politikës të mbrojë unitetin e familjes dhe të ruajë vlerat e shqiptarëve. Në një intervistë për ABC News, Arqipeshkvi i Metropolit të Tiranë-Durrësit, imzot George Frendo rrëfen arsyet që e detyruan të reagonte publikisht kundër letrës që 8 ministret e qeverisë Rama i dërguan Holandës për çeljen e negociata.

Sipas tij, të krishterët, por edhe myslimanët mbrojnë vlerat e familjes ndaj edhe janë kundër qëndrimeve mbështetëse që ministret e qeverisë kanë shprehur për Holandën për çështjen e abortit dhe martesave të të njëjtit seks.

Thirrjen për ruajtjen e vlerave njerëzore dhe unitetit të familjes vendosi ta bëjë publikisht. Me dëshirën që Shqipëria të vijojë rrugëtimin e saj europian për shkak të vlerave që mbart, Arqipeshkvi i Metropolit të Tiranë-Durrësit, imzot George Frendo nuk i fsheh dozat e pakënaqësisë ndaj letrës që 8 ministres e qeverisë Rama i dërguan qeverisë së Holandës.

Nuk ka pasur qëllim që të sulmojë qeverinë dhe ministret e saj, por politikës i kërkon të mbrojë vlerat e familjes.

Në 48 orët që pasuan reagimin e tij ka marrë mbështetje të forta. Për këdo që e ka sulmuar si të huaj, i kujton se shtetësinë e marrë nga Kreu i Shtetit.

Reagimin e tij e kishte të fortë, por dilemën vijon ta ketë ende të madhe./ABC News Albania 24/7

politikania-serbe.jpg
G. P.11:48 | 23/09/2019

Rada Trajkoviç është mjeke nga Kosova. Në politikë është futur pas luftës. Së fundmi është zënë keq me presidentin, Aleksandër Vuçiç, i cili nuk i ka ngelur borxh me akuza. Trajkoviç, në Serbi endet me mbrojtje policore.

Ka akuzuar pushtetin për strehimin e Millan Radojçiç, të dyshuar për lidhje me vrasjen e Oliver Ivanoviç. Akuzat e Trajkoviç bëjnë rresht të gjatë dhe plotë vrer flet: por mafia kontrollon gjithçka, beson ajo, kurse për serbët e Kosovës është bërë dëm i madh.

“Nëse Vuçiç mendon se Radojçiç është një personalitet i moralshëm, le ta mbështesë të dorëzohet në mënyrë që pafajësinë e tij ta vërtetojë në gjykatë dhe ta shpallin të pafajshëm”.

Trajkoviç thotë se në zgjedhjet e Kosovës me grupin e saj do të luftojë për të krijuar një hapësirë politike. Por, ndarja e serbëve nuk krijon mundësi të lehta. Njerëzit kanë frikë të shprehen lirshëm dhe ky është motivi i saj për të qëndruar në politikë. Thotë se politika nuk e ka të vështirë të krijojë incidente, por për veten nuk ka frikë.

“Ne në vazhdimësi përjetojmë indicente të inskenuara, të cilat sjellin me vete një vazhdimësi të antagonizmit mes serbëve dhe shqiptarëve dhe në asnjë mënyrë nuk po arrijmë tek pajtimi. Do të doja që ura mbi Ibër apo lumi të jetë thjesht një lumë dhe jo vend ku dëgjojmë rrahje mes të rinjve dhe incidente. Duhet të arrijmë deri tek diçka që quhet normalizim. Me ura të ndaluara nuk ka pajtim dhe kjo është e tmerrshme dhe na harxhon jetët e të rinjve, të cilët për shkak të korrupsionit dhe krimit po largohen nga vendi. Kush do të pajtohet në fund”?

Ajo ka qenë kundër ndarjes apo përkufizimit të Kosovës. Thotë se duhet të krijohet një atmosferë pozitive për të zgjidhur një problem madhor siç është Kosova.

“Në momentin kur situata të qetësohet dhe kur njerëzit të shkojnë në një institucion duke marrë shërbimin që kërkojnë, pa pasur rëndësi se ku ndodhen, kjo do të thotë se janë pjekur kushtet për zgjidhje të një problemi serioz siç është statusi. Nëse do ta zgjidhnim së pari marrëdhënien mes Kosovës dhe Serbisë, Vuçiç dhe të tjerët do të sillnin çështjen e Bosnjës. Kjo do të hapte sërish çështjen e Sanxhakut dhe ne sërish do të vinim tek një antagonizëm dhe konflikte të reja. Mendoj se Bosnja duhet të zgjidhet e para pasi atje duket sikur po bëhen skenarë të çuditshëm”.

Serbët, thotë Trajkoviç, kanë kontroll partiak dhe nga një pjesë e mafies emërohen njerëzit në vende të punës. Ata shfrytëzojnë tre nivele pushteti, lkal, qendror të Kosovës dhe një pjesë të institucioneve serbe. Trajkoviç luftën me Vuçiç duket se e ka gati të drejtpërdrejtë.

“Unë mundohem që të marr të paktën nivelin qendror në Prishtinë, në mënyrë që serbët në Kosovë të rifillojnë të marrin frymë”.

Trajkoviç ka qenë pjesë e Kuvendit të Kosovës me një lëvizje serbe që quhej “Povratak” ose “Kthimi”. Por, simbolika e këtij emri tani më vështirë arrihet pasi Lista Serbe ka patur mbështetje absolute dhe vetëm një grup politikanësh janë ndarë në vete./ABC News Albania 24/7

dashamir-shehi-1.jpg
G. P.20:30 | 19/09/2019

E respekton Presidentin Ilir Meta për pozicionin që ka marrë, por ka kundërshtitë e tij edhe për disa çështje të caktuara. Një ndër to është edhe deklarata e fundit e në Komisionin Hetimor Parlamentar se kishte informacion për djegien e Kuvendit në një protestë të opozitës.

Sipas kryetarit të LZHK-së, Dashamir Shehi, ky pozicion i ri i Metës nuk duket logjike. Ai tha gjatë rubrikës “Mbrëmje Ide” me gazetaren Mirela Milori se nuk kishte pasur më përpara një informacion të tillë.

Gjithashtu, Shehi tha se ka qenë pro pozicionit të Metës për t’i dhënë kohë politikës për të rinegociuar, por datën 13 Tetor për zgjedhjet e konsideron të pamjaftueshëm për të zgjidhur problemet që nxorrën opozitën jashtë Kuvendit.

“Nga e gjithë kjo histori do ju them që ka të vërteta, ka ekzagjerime. Ne respektojmë presidentin për një lloj pozicioni që ka marrë për t’u ndeshur me Ramën, i cili automatikisht përkthehet si një mbështetje ndaj opozitës. Mundet që në këtë mes të ketë edhe elementë të së vërtetës. Mos të harrojmë që Meta është një njeri politik. Shumë nga këto lëvizje i ka bërë me iniciativën e vet, jo me opozitën. E ka thirrur opozitën kur i është dashur për ta thërritur. Për shembull zoti President ka ngulur këmbë për zgjedhure më 13 Tetor. Ne e kemi çmuar pozicioni presidencial për të fituar kohë, për t’i dhënë shans edhe njëherë politikës shqiptare për të rinegociuar, por e konsiderojmë të pamjaftueshme datën 13 Tetor për të zgjidhur hallin e madh për të cilën opozita doli në rrugë. Këtu jemi kundër Presidentit.

Unë gjykoj që pozicioni i ri i Presidenti që po digjej parlamenti, do digjej parlamenti, domethënë që linja politike të kthehet në një linjë subversive me mua personalisht nuk takon. Pse? O duhej të na lajmëronin që brenda kësaj linjë ka edhe gjëra subversive, në qoftë se ka. Unë gjykoj që nga kampi opozitar nuk është hedhur kurrë në drejtim të Kuvendit edhe një shkrepëse.  Nuk kisha ndonjëherë informacion, por edhe kolegë të mi s’e kemi dëgjuar. Ne kemi dëgjuar nga presidenti vetë, i cili thotë që i shtyjmë zgjedhjet sepse kemi nevojë të gjithë për paqe, kohë dhe reflektim. Mrapsht nuk mund ta kthej analizën time. Mua nuk më duket logjike. Unë do ta kisha bërë dhe do ta quaja të pranueshme, justifikueshme dhe të moralshme që data është shtyrë për t’i dhënë shans palëve në Shqipëri të rimendojnë për një situatë politike.

Unë gjykoj që politika është një gjë që bëhet në sipërfaqe dhe duhet të jetë transparente. Lëvizje nga këto subversivet nuk jam në gjendje t’i interpretoj”, tha Shehi.

Ndërkohë Partia Socialiste do ta rrëzojë presidentin, sipas Shehit, të cilin e sheh atë si institucionin e fundit kundërshtar ndaj qeverisë, për të futur frikë si në kohën e komunizmit./abcnews.al

ilir-meta-gjermani.jpg
G. P.19:50 | 16/09/2019

Presidenti i Republikës, Ilir Meta priti në një takim Sekretarin Parlamentar të Shtetit në Ministrinë Federale të Drejtësisë dhe Mbrojtjes së Konsumatorit, njëkohësisht deputet i SPD në Bundestagun gjerman, Christian Lange.

“Meta shprehu besimin në mbështetjen e Gjermanisë për të ardhmen europiane të Shqipërisë dhe për forcimin e mëtejshëm të marrëdhënieve dypalëshe strategjike ndërmjet dy vendeve”, thuhet në një njoftim të zyrës së shtypit të Presidencës.

Duke inkurajuar një vendim pozitiv të Këshillit Europian të 17-18 Tetorit 2019 për çeljen e negociatave të anëtarësimit të Shqipërisë me BE, Meta theksoi se qasja antagoniste ndërmjet palëve duhet të marrë fund sa më shpejt, për t’u zëvendësuar nga dialogu konstruktiv dhe respektimi i ndërsjellë i Kushtetutës dhe shtetit të së drejtës./ABC News Albania 24/7

mark-babani-3.jpg
G. P.19:15 | 16/09/2019

Pas përgënjeshtrimit të akuzave të opozitës kryetari i Bashkisë së Vaut të Dejës deklaroi se do të kallëzojë në prokurori sekretarin e Partisë Demokratike Gazmend Bardhin. Menjëherë ka reaguar në Facebook, ky i fundit i cili thotë se Babanit do t’i duhen avokatë për fshehjen e arrestimit të tij për vjedhje makinash.

Pas deklaratës së kryetarit të Bashkisë së Vaut të Dejës se do padisë Sekretarin e Përgjithshëm të PD-së për shpifje, nuk ka vonuar përgjigja e Gazment Bardhit. Në një postim në Facebook, Bardhi thotë se avokatët Babanit do t’i duhen për të negociuar vitet e burgut për fshehje të arrestimit të tij në Sicili në prill 1994 për vjedhje makinash.

Në daljen për mediat kryetari i bashkisë së Vaut të Dejës Mark Babani deklaroi se nuk është ndaluar asnjëherë nga policia për vjedhje në Itali. Sipas tij, historia është e sajuar për të ulur imazhin e tij dhe për këtë arsye do të depozitojë një kallëzim për Bardhin.

“E gjithë kjo histori, është e sajume, është një histori që nuk ka lidhje me mua. Unë deklarimet dhe vetëdeklarimet i kam bërë të qarta. Ato në qoftë se kanë fakte mund të kishin shkuar në prokurori. Mua s’më bëjnë as Sajmir, as edhe një emër tjetër, se unë kam lindur Mark Babani dhe jam Mark Babani. Nuk ka lidhje me gjurmët e gishtërinjve të mi. Unë atë po pres që ata të bëjnë padi në prokurori. Mua s’më ka thirrur prokuroria. Unë po pres padinë e prokurorisë. Jam i gatshëm të jap deklarimet e mia. Në qoftë se e kanë bërë padinë pse dalin e flasin nëpër televizorë. Normalisht ata po sajojnë për të ulur imazhin tim. Kam autorizuar avokatët e mi dhe po shoh para se prokuroria të dalë me një vendim që t’i bëjmë një denoncim penal zotit Gazment Bardhi për shpifjet që ka bërë karshi figurës time”, tha Mark Babani.

Në modelin e denoncimeve të mëparshme për Pjetrin e Shkodrës e Kajmakun e Vorës, Bardhi pyet Mark Babanin.

“Në datën 24 Janar 1996 në cilin hotel ke bujtur?”, dhe paralajmëron prova të tjera në ditët e ardhshme./ABC News Albania 24/7

pakti-rama-basha.jpg
G. P.14:41 | 14/09/2019

Mundësia e një pakti të ri Rama-Basha, i nxitur nga ndërkombëtarët, trazoi jo pak politikën e brendshme këtë javë. Hapja e negociatave të anëtarësimit me kushte është opsioni që po artikulohet më qartë, e që mund të diktojë fort zhvillimet e ardhshme në vend. Ndjekim Mimoza Koçiun me Politika në ABC News./abcnews.al

bashkeqeverisja.jpg
G. P.16:05 | 11/09/2019

Kryeministri ka zhvilluar si çdo të mërkurë takimin me një grup qytetarësh që kanë gjetur zgjidhje duke u ankuar për administratën tek portali i bashkëqeverisjes. Edi Rama pranoi se disa zyrtarë parazitë po gërryejnë institucionet.

Ky qytetar shkodran kishte dështuar të merrte shërbim në zyrat e kadastrës së qytetit të tij, ndaj, siç kishte dëgjuar në media kryeministrin, ju drejtua portalitë të bashkëqeverisjes. E për t’i treguar Edi Ramës se zyrtarët parazitë mund t’i kalbin shtetin, i dha këtë shembull.

“Tek shtëpia që unë jetoj në Shkodër, në oborr kam një trung ahu ku unë ulesha aty. Kam vënë re se kalojnë shumë buburreca poshtë. Për kuriozitet vura re se këto buburreca  e kishin gërryer nga poshtë kështu që sado i fortë të jetë ky tra, në qoftë se këto buburreca nuk do të zhduken në një formë, ose në një tjetër, këto përsëri do të  mbeten njëlloj. Uroj që këto shushunja të jenë sa më të pakta dhe mund të shtypen”, tha ai.

Kryeministri i tregoi menjëherë se ai nuk po i toleronte parazitët e administratës së tij.

“Të jesh i sigurt se unë nuk kam patur nevojë të ulem në ndonjë stol për të parë se çfarë bëjnë buburrecat nga poshtë, se rri në këmbë dhe i shikoj buburrecat ulur që gërryejnë. Megjithatë kjo kërkon durim të madh, kërkon vullnet, kërkon kohë dhe sigurisht kërkon sisteme. Platforma është një nga ato sisteme që i mpin buburrecat dhe disa prej tyre edhe i shtyp. Unë e di që ju keni parasysh buburrecat e hipotekës së Shkodrës, kushedi se çfarë keni heq me ata. Por ne po vazhdojmë të luftojmë”, u shpreh Rama.

Së fundi në platformë është përfshirë një rubrikë e veçantë për biznesin, për t’i krijuar të gjithë atyre që merren me biznes në Shqipëri, të njëjtin akses të shpejtë në qeveri për çdo problem që hasin me administratën. Sipas kryeministrit, deri tani, portali ka pranuar 51 mijë ankesa./ABC News Albania 24/7

Capture-1.jpg
G. P.09:17 | 11/09/2019

Një i ri shqiptar u dënua  me 30 muaj burg pasi u kap në një fabrikë kanabisi në qendër të qytetit Galashiels në Skoci.

Mirjan K., 30 vjeç, pretendoi para autoriteteve se ishte viktimë e trafikut të qenieve njerëzore. I riu tha se ishte larguar nga vendi për shkak të frikës se do të vritej. Për të shkuar në Britani, ai mori borxh 16 mijë Paund.

E për ta paguar këtë borxh, ai u detyrua të kujdesej për kanabisin në një dyqan që dikur shërbente si librari. Por më 9 Prill, policia ushtroi kontroll në këtë ndërtesë dhe gjeti 700 rrënjë kanabis, vlera e të cilës arrinte deri në 200 mijë euro nëse dilte në treg.

30-vjeçari u kap duke fjetur në kuzhinë. Ai deklaroi se ka punuar aty si roje dhe nuk ishte patur kurrë rol në kultivimin e kanabisit. Ndërkohë prokurori i çështjes, Graham Fraser, solli në gjyq detaje të reja për sa i përket arsyeve të shkuarjes së Mirjanit në Britani.

“I akuzuari tha se ishte arratisur nga Shqipëria përpara 2018-s. Ai tregoi se si xhaxhai, i cili ishte një person i rëndësishëm në politikë, ishte vrarë. Pas mesazheve kërcënuese për veten dhe familjen ai ishte detyruar të ikte nga Shqipëria. Ai po punonte për një grup që të shlyente borxhin”, tha Fraser./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono