politika shqiptare

delegacioni-i-huaj-1280x699.jpg
nev ila12:00 | 18/11/2019

Stabiliteti politik është i rëndësishëm që të mos depërtojë terrorizmi dhe ekstremizmi fetar. Ky mesazh u dha në Konferencën me temë “Feja si instrument për paqen”, ku morën pjesë përfaqësues të lartë vendeve të rajonit dhe të departamentit amerikan të shtetit.

Bashkëjetesa shqiptare në Shqipëri është shembull për tu ndjekur në mbarë botën por jo qeverisja, në vecanti kjo e sotmja. Mbi këto pretendime presidenti Ilir Meta i drejton thirrjen e rradhës kabinetit të këshillit të ministrave që të hartojnë ligje për të ulur nivelin e varfërisë që është edhe ndikuesi kryesor i terrorizmit dhe ekstremizmit fetar.

Në konferencën me temë Feja si instrument për paqen, politikanët shqiptarë morën mesazhe edhe në gjuhë të huaj.Ambasadori amerikan për Liritë Fetare Ndërkombëtare, Sam Broënback i ftoi të bashkohen dhe të dialogojnë.

“Shpresoj të jetë dialog edhe mes politikës. Politika është larg fesë por duhet. Armiku është mosbesimi. Ne mund ta heqim qafe mosbesimin. Të heqin dorë nga gabimet. Dialogu kuptimplotë, mund të ndodhë, duhet të ndodhë. Të kthehen nga parajsa të shërojnë shpirtin e tyre. Armiku është dëshpërimi. Duhet t’i heqim qafe. Përfaqësuesit politikë dhe të fesë duhet ta përçojnë këtë. Dialogu mund të ndodh, kërkon përpjekje kërkon lutje”.

Kosova ka një tjetër këndvështrim. E ka parë fenë si shembull të bashkëjetesës por nuk ka lejuar të bëhet pjesë e politikës që nga koha e luftës.

“Në gjatë luftës nuk kemi lejuar të implikohet feja. Kemi vazhduar traditën e Kosovës kur asnjëherë nuk kemi pasur konflikt ndërfetar. Edhe në Kosovë jemi përballur me radikalizmin. Por kemi reaguar menjëherë. Sot Kosova do të vazhdojë të jetë pjesë aktive e luftës kundër terrorizimit. Po punojmë me kthimin e grave dhe fëmijëve. Jemi duke punuar me kujdes.”

Një apel ndryshe erdhi nga Sekretari i Përgjithshëm i Presidentit të Serbisë, Aleksandër Vuçiç, Nikola Selakoviç. Sipas tij injoranca e madhe ka rrezikuar paqen pasi nëse kultura do të mbizotëronte mes serbëve dhe shqiptarëve do të shihnin se kanë shenjtë të përbashkët.

 “Shumica e serbëve nuk e dinë sot që një nga shejtët e Serbisë, Anxhelina e Serbisë ishte një fisnike shqiptare. Ajo është e varrosur 50 kilometra në manastirin e Kushedolit në Beograd Ashtu edhe shumica e shqiptarëve, nuk e dinë që shejti i varrosur në Elbasan ishte serb, Xhon Vladimir ishte shenjti i parë ndërmjet serbëve. Përveç faktit që ne kemi jetuar pranë njëri-tjetrin për shekuj është se nuk e njohin njërin-tjetrin mjaftueshëm. Ndaj ne duhet të dialogojmë dhe parakusht për dialogun është liria e fesë”.

Kjo konferencë u organizua në Tiranë nga Presidenca shqiptare në koordinim me Departamentin Amerikan të Shtetit./abcnews.al

 

KRONIKE-POLITIKA-SHQIPTARE-PER-KOSOVEN.mpg_snapshot_00.05-1280x720.jpg
ent ela16:16 | 07/10/2019

Politika shqiptare ka përshëndetur procesin zgjedhor në Kosovë. Presidenti, kryeministri dhe opozita janë në të njëjtën mendje, kur i cilësojnë zgjedhjet e shtetit më të ri në Evropë, si një shembull demokracie dhe standardesh zgjedhore.

Politika shqiptare ka uruar Kosovën për zgjedhjet e së dielës, duke vlerësuar standardet e larta me të cilat u mbajtën ato. Presidenti Ilir Meta thotë se shteti i ri bëri diferencën në rajon.

 “I treguan mbarë botës se shteti i Kosovës është jo vetëm tërësisht funksional, por edhe një shembull i demokracisë në rritje, në një rajon që ende vuan nga autoritarizmi dhe pamundësimi i zgjedhjeve tërësisht të lira, si ato që e gjithë bota ndoqi dje në Kosovë!”.

Kryeministri Rama ka vlerësuar pranimin e rezultatit.

“Urime Kosovës për zgjedhjet e suksesshme parlamentare! Urime Vetëvendosjes e Albin Kurtit për rezultatin më të mire! Urime LDK e Vjosa Osmanit për rezultatin e dytë më të mire! Urime PDK e Kadri Veselit për pranimin shembullor të rezultatit”.

Kreu demokrat Lulzim Basha u përqëndrua tek pjesëmarrja e lartë dhe veprimi i shpejtë i prokurorisë për të ndalaur ata që fotografojnë votën.

 “Populli i Kosovës dha një shembull frymëzues me pjesmarrjen civile dhe masive në zgjedhje, Policia e Kosovës tregoi profesionalizëm të lartë në ndalimin e menjëhershëm të atyre që cënuan sekretin e votës së lirë duke e fotografuar atë.

Penguesin e zgjedhjeve të lira e të ndershme në Shqipëri, në emër të Partisë Demokratike e shpalli Oerd Bylykbashi.

Pas demokratëve, u shpreh dhe Monika Kryemadhi.

Pavarësisht këtyre deklarimeve, palët politike janë larg një konsensusi në tryezën e reformës zgjedhore që do të përmirësonte rregullat e lojës. /ABC News Albania 24/7

alizoti-mirela-1280x714.jpg
nev ila22:16 | 03/10/2019

I ftuar në Mbrëmje ABC me gazetaren Mirela Milori, ka qenë i ftuar Tomorr Alizoti. Alizoti bëri një analizë dhe komentoi kushtet gjermane për negociatat të vendosura ndaj Shqipërisë dhe krizën politike në vend. Alizoti u shpreh se Gjermania është e qartë për politikën shqiptare e cila sipas tij është “mizerabël”, “… por ata duan të ndihmojnë popullin shqiptar“, tha ai. Më tej Alizoti tha se Shqipëria ndodhet në një pozicion gjeo-politik të favorshëm për kufirin e Europës pasi BE nuk do të lejojë Shqipërinë nën influencat ruse.

Pjesë nga biseda në studio: 

Mirela Milori: Kemi një letër të përbashkët të zyrtarëve të lartë të bashkimit europian, duket se kërkojnë të hapet drita jeshile për negociatat me RMV dhe Shqipërinë, vjen përpara datave 17-18 tetor, duket si një shtysë që vjen drejt një vendimi, si e shihni këtë lëvizje të diplomacisë europiane?

Tomorr Alizoti: Gjermania ka dashur ti hapë negociatat. Këtu bëhet fjalë për Shqipërinë, ata duan që të mos e lënë Shqipërinë nën influencat ruse etj… pra duan që Shqipëria të jetë një paketë strategjike. Në lidhje me kushtet që kanë vendosur ato janë shumë dominante dhe vendimtare. Jam i mendimit që duke qenë në europë Shqipëria mund ti zbatojë më mirë kushtet se sa duke qenë jashtë saj.

Gjermanët janë të qartë që qeveria shqiptare dhe politika shqiptare aktuale është mizerabël, e inkriminuar, por nuk duhet të ndëshkohet populli. Ata e kanë thënë që duhet ndihmuar shqipëria. Fjalimi i Edi Ramës në kuvendin e sotëm mund të ketë qenë nga fjalimet më të shëmtuara dhe më banal.

Mirela Milori: Letra e mbasdites së sotme e nisur nga zyrtarët europian, heshtja e Francës që e shtyn me 1 javë vendimin, sforcoja e madhe e gjermanisë duke dhënë 2 kushte deri në pranverë, 7 të tjera etj, e gjithë kjo suazë a tregon se po bëhet një sforco që ne të marrim një po për hapjen e negociatave?

Tomorr Alizoti:  Ata duan ta ndihmojnë shqipërinë por shqipëria nuk ka plotësuar kushtet. Por si pozicion gjeo-politik dhe strategjik, për të mbyllur kufirin e Europës është dhe Ballkani ku gjendet dhe Shqipëria, gjë që është një fat i mirë për ne.

Mirela Milori:  Si e lexoni heshtjen e Francës?

Tomorr Alizoti:  Unë shpresoj për një po por kam frikë se Franca mund të shprehet kundër, sepse në të vërtetë europa ka krizën e saj të brendshme.

Mirela Milori:  Kryeministri kërkoi sot në parlament që reforma zgjedhore me rekomandimet e OSBE/ODIHR të miratohet brenda vitit me ose pa opozitën. Dialogun në distancë mes Bashës dhe Ramës në çfarë realiteti e shihni ju?

Tomorr Alizoti: Të negoxiosh me Ramën është shumë e vështirë. Opozita PD ka nxjerrë disa argumente për vjedhje votash, a mund të ulet opozita në një tryezë ku ka bërë një betejë për hir të moralit… unë mendoj që jo.

Mirela Milori:  Duket se ka trysni ndërkombëtare për tu futur opozita jashtë parlamentare në institucion, mendoni se do të ketë zgjedhje të parakoshme për të rifutur opozitën brenda institucioni?

Tomorr Alizoti: Unë mendoj se duhet të ndodhi, shqipëria do te këtë stabilizim ekonomik dhe politik. në momentin që krimi i organizuar merr krahë atëherë ndodh sepse nuk ka stabilitet politik./abcnews.al

hhhh.jpg
ent ela12:14 | 14/12/2018

Shenjë se Kosova është e aftë të marrë përgjegjësi të reja në ndërtimin e institucioneve demokratike dhe për të kontribuuar vendosmërisht për paqen, stabilitetin e rajonit dhe fqinjësinë e mirë. Të tillë e komenton kreu i shtetit shtiptar Ilir Meta vendimin historik të Kosovës për krijimin e Forcave të Armatosura. Përmes një postimi në rrjetin social Facebook presidenti Meta gjen frymën euro-atlantike në themel të këtij ndryshimi historik.

Edhe kreu i qeverisë Edi Rama ka shprehur urimet e tij ndaj shtetit të Kosovës duke shpërndarë në rrjetin social facebook një fotografi të kreut të shtetit Kosovar Hashim Thaçi.

Urime Kosovës për Ushtrinë i shprehu edhe kreu i demokratëve Lulzim Basha, i cili e quan ngritjen e Ushtrisë së Kosovës si ngjarjen e dytë të përmasave kombëtare dhe historike pas shpalljes së pavarësisë.  Me këtë votim – vijon Basha – Kosova do të jetë më e sigurtë, rajoni më në paqe dhe kombi shqiptar i integruar dhe më i fortë. /abcnews.al

European_Parliament_Strasbourg_CREDITEuropean-Parliament.jpg
ent ela17:14 | 13/09/2018

Vendimin e Parlamentit Europian për heqjen e vizave për Kosovën e ka përshëndetur edhe politika shqiptare. “Urime Kosovë”! – ka shkruar kreu i shtetit shqiptar Ilir Meta në një postim, ku përshëndeti vendimin për hapjen e dritës jeshile për liberalizimin e vizave për Kosovën. Shumë i gëzuar – është shprehur ai – për këtë lajm që shënon një arritje të madhe të këtij shteti i cili rritet dhe forcohet çdo ditë, si faktor paqeje dhe stabiliteti në rajon.

Përmes një postimi në rrjetin social Twitter, kryeministri Edi Rama e ka paralelizuar heqjen e vizave për qytetarët e Kosovës, me heqjen e njollës, me të cilën Europa për të ka kaq vite, që cënon flamurin e vet.

Po në një postim në Twitter, kreu i opozitës Lulzim Basha e quajti votimin e kësaj të drejte të qytetarëve të Kosovës, si mbështetje për perspektivën europiane të shtetit të Kosovës.  /abcnews.al

John-McCain-1280x672.jpg
ent ela12:51 | 26/08/2018

Për ndarjen nga jeta të senatorit amerikan Xhon Mekein ka reaguar dhe Tirana zyrtare. Nëpërmjet postimeve ne rrjetet sociale, kreu i shtetit, ai i qeverisë, kryediplomati dhe kreu i opozitës shqiptare përcollën ngushëllime për humbjen e mikut të Shqipërisë. Në mesazhin e tij Presidenti Ilir Meta thekson se Mekein i shërbeu lirisë dhe të drejtave të njeriut në botë e veçanërisht në Ballkan, duke qenë një nga mbështetësit e vendosur të çështjes së Kosovës dhe kauzës për lirinë dhe pavarësinë e saj. Ai u bë një ndër mbështetësit kryesorë të anëtarësimit të Shqipërisë dhe të rajonit tonë në NATO.

Ndërsa kryeministri Edi Rama thekson në mesazhin e tij se Senatori John McCain e jetoi jetën si një betejë të pandërprerë për vlerat e mishëruara në qënien e Shteteve të Bashkuara të Amerikës. Edhe Rama thekson se ai ishte dhe një mik i mirë i Shqipërisë me të cilin ka bashkëpunuar e ndarë mendime të njëjta. Të njëjtin vlerësim ka dhënë dhe ministri për Europën dhe punët e Jashtme Ditmir Bushati, i cili thekson se vdekja e senatorit Xhon Mekein ka sjellë humbjen e një heroi amerikan frymëzues që luftoi për liri dhe ishte shembull i vendosjes së interesit publik në radhë të parë dhe mbrojtës i tij.

Për ndarjen nga jeta të John McCain ka reaguar dhe kryedemokrati Lulzim Basha, i cili e cilësoi senatorin e ndjerë si një luftëtar të pamposhtur për kauzën e lirisë dhe një zë i fuqishëm në krah të betejave të shqiptarëve për liri, demokraci dhe integrim euro-atlantik. /abcnews.al

jordan-daci.jpg
ent ela21:44 | 15/08/2018

Përfaqësuesi i Qendrës Shqiptare për Shtetin e së Drejtës profesor doktor Jordan Daci thotë se është e nevojshme që politika në Shqipëri të arrijnë një konsensus edhe më të gjerë për të tejkaluar ngërçin e krijuar me zbatimin e reformës në drejtësi, sesa ai që u desh për miratimin e saj. Gjatë një interviste për “Zërin e Amerikës” eksperti i çështjeve ligjore bën një analizë të ecurisë së procesit deri më tani. Ai thotë se do të ishte iluzion po të mendohej se gjithçka do të shkonte në mënyrë perfekte. Vonesat sipas tij lidhen me mungesën e vullnetit të një pjesë të politikës për ta zbatuar reformën, nga frika e ndëshkimit:

“Përtej deklaratave që bën, në thelb politika nuk është e gjitha pro reformës. Arsyeja numër një është vetë risku që ata shohin, tashmë ata kanë një shembull që janë gjyqtarët dhe prokurorët dhe e shohin me rrezik qënien e tyre, me ngritjen sidomos të strukturave si SPAKU (Struktura e Posaçme Kundër Korrupsionit dhe Krimit të organizuar) dhe Prokuroria e Posaçme, të cilat do hetojnë dhe që besoj se do të çojnë në gjykimin edhe politikanë aktualë”, thotë ai.

2 vite më parë parlamenti shqiptar miratoi me unanimitet ndryshimet kushtetuese për një reformë të thellë në sistemin e drejtësisë. Dy vjet më vonë procesi ka rritur shqetësimet e ekspertëve të fushës lidhur me afatet e përfundimit të saj, që nënkupton jo vetëm përfundimin e procesit të rivlerësimit të prokurorëve dhe gjyqtarëve por dhe ngritjen e funksionimin e institucioneve të drejtësisë. Si pasojë e procesit të rivlerësimit Gjykata Kushtetuese dhe ajo e Lartë kanë dalë jashtë funksionit. Kjo për shkak të numrit të reduktuar të anëtarëve, por dhe mosmarrëveshjeve politike që e kanë bërë të pamundur deri më tani, plotësimin me anëtarë të rinj. Reforma parashikon dhe ngritjen e disa struktura të reja të rëndësishme, siç janë Këshilli i Lartë i Gjyqësorit dhe Këshilli i Lartë i Prokurorisë, përfshirë Strukturën e Posaçme Kundër Korrupsionit dhe Krimit të organizuar (SPAK-un) pjesë e së cilës do të jetë dhe Byroja Kombëtare e Hetimit, që në fokus do të ketë rastet e korrupsionit tek zyrtarët.

Lidhur me afatet e përfundimit të reformës zoti Daci thotë se “një përkrahje më e madhe financiare për strukturat e vetigut mund ta nxiste procesin. Nëse punohet me një ritëm 50 për qind më shumë sesa sot, reforma mund të mbyllej në 3 apo 4 vite”.

Por eksperti ligjor thotë se afatet nuk duhet të shqetësojnë askënd, pasi kjo është dëshmi e seriozitetit të insitucioneve të vetingut dhe nevojës për vazhdimin e frymës së reformës edhe pas përfundimit të tij.

Një nga çështjet e rëndësishme që sipas ekspertit duhet të marrë përgjigje është ajo se çfarë duhet të ndodhë me gjyqtarët dhe prokurorët të larguar nga sistemit për shkak të vetingut. Sipas ekspertit ndaj tyre “duhet të vijohet më tej me hetime pasi kalimi në veting” siç thotë ai “nuk i shmang ata nga veprat penale që mund të kenë kryer nëse gjithnjë janë autorë dhe do provohet bazuar në ligj”. /VOA


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono