politika ne abcnews

POLITIKA-NE-ABC-NEWS-VJEDHJA-NE-AEROPORT-ASNJE-S’MERR-PERGJEGJESI-13.04.2019.mpg_snapshot_00.09-1280x720.jpg
ent ela14:11 | 13/04/2019

Grabitja e përsëritur e parave gjatë transportit në aeroportin e Rinasit shenjoi zhvillimet e javës politike që lamë pas. Ky cënim i ri i sigurisë kombëtare u bë shkaku për akuza të forta politike, ndërsa përgjegjësitë u deleguan, njëlloj si në grabitjen e dy viteve më herët. detajet i sjell Mimoza Koçiu me Politika në ABC News.

Një grabitje e përsëritur e parave të bankave në pistën e aeroportit të Rinasit, tregoi se sa e brishtë është siguria në aeroportin e vetëm ndërkombëtar të një vendi të NATO-s, e nga ana tjetër, ndërsa sesi pasohet përgjegjësia për një ngjarje të përsëritur, që bëri xhiron e mediave ndërkombëtare. Në vend të nxjerrjes së përgjegjësive, nisi automatikisht përplasja institucionale e politike, në një situatë ngërçi ekzistues, pasi opozita ka nisur një kauzë të re me djegien e mandateve parlamentare, por edhe njëherë javën politike që lamë pas, u heshtua sërish në aksionin e saj, këtë herë nga një zyrtar i departamentit amerikan të shtetit.

Po çfarë ndodhi javën politike që lamë pas?

Vizita e zv/Ndihmës sekretarit amerikan Metju Palmer në Tiranë, u pa si një mundësi për të ndjërmjetësuar në atë që artikulohet si krizë politike e institucionale. Kjo nuk ndodhi pasi ndalesa në Tiranë ishte pjesë e një turi në rajon, por nuk munguan mesazhet e forta. Takoi Kryeministrin, kreun e PD, kryetaren e LSI dhe Presidentin e Republikës. Secili aktor në njoftimet për shtyp foli me nota pozitive për bashkëbisedimin me zv.ndihmës sekretarin amerikan. Ndërsa mesazhet e Palmer u mësuan gjatë një komunikimi me disa gazetarë shqiptarë, pjesëmarrës në programet e shkëmbimit me DASH. Në transkriprin e bisedës publikuar nga ambasada amerikane, Palmer citohet të ketë thënë se nuk ka ardhur për të negociuar apo mbështetur një zgjidhje të caktuar.

Mesazhet ishin dekurajuese për aksionin e opozitës, protestat e të cilës tashmë janë pjesë e gjeografisë së ngjashme politike, edhe në vende të tjera të rajonit, një imazh jo fort interesant përballë BE të brishtë para forcimit të populistëve në europë e zgjedhjeve të majit për PE.

Ndërsa Palmer jepte ato mesazhe për gazetarët, tek zona e Bregut të Lumit po ndodhte për të dytën ditë rradhazi një përplasje me policinë e Inspektoriatin Vendor Ndërtimor, e banorëve që kundërshtonin prishjen e banesave për shkak të ndërtimit të segmentit të tretë të bulevardit të ri, pa u kompensuar më parë, edhe pse banesa të refuzuara nga legalizimi. Policia e INUV ishin rikthyer herët në mëngjes, duke nisur prishjen, pasi kishin bllokuar hyrjen në zonë të cdokujt, edhe mediave. Duke shpërndarë në media këtë video, PD akuzoi policinë për përdorim gazi lotsjellës ndaj banorëve, cka nuk u përgenjeshtrua, ndërsa kreu i shtetit kërkoi hetim nga prokuroria. “Presidenti vlerëson se përdorimi i gazit lotsjellës, duke detyruar banorët të dalin nga shtëpitë e tyre, është një akt i papranueshëm.” thuhet në deklaratën e zëdhënësit.

Por çka sfumoi këtë ngjarje, e sidomos mesazhet e Palmer, ishte një déjà vu e 30 qershorit 2016. Të martën e 9 Prillit, u përsërit grabitja nga një avion me pasagjerë në pistë, e parave të tre bankave të nivelit të dytë, që po transportoheshin jashtë vendit përmes Austria Airlines.

Në pak minuta grabitësit kanë marrë thasët me para nga barku i avionit, e ia kanë dalë t’I shpëtojnë edhe policisë, e cila pasi u njoftua u vu në ndjekje të tyre. Sipas informacionit paraprak zyrtar, ka patur një shkëmbim zjarri me policinë, nga i cili mbeti iI vrarë një prej grabitësve. Identifikimi i tij u bë brenda pak orësh nga mediat greke, ndërsa në Shqipëri konfirmimi erdhi vetëm të nesërmen, pasi familjarët e identifikuan në morg, si Admir Murataj, një personazh tepër i njohur për policinë si në Shqipëri ashtu edhe Greqi, e autor i dyshuar i vjedhjes së para dy viteve, me të njëjtën taktikë po në Rinas, si dhe grabitjeve të tjera.

Kur i gjithë opinioni po vinte në pikëpyetje punën e shtetit, në një ngjarje të përsëritur e në një objekt të sigurisë së lartë si aeroporti, një zë nga qeveria e orientoi përgjegjësinë nga koncesionari. Ministrja e Infrastrukturës, ish drejtore e ANTA tha se përgjegjës për sigurinë në aeroport ishte koncesionari kinez, dhe e vecoi shtetin shqiptar, si palën që tani duhej të vepronte sipas detyrimit për të garantuar sigurinë në aeroporin e vetëm ndërkombëtar të vendit.

Shqipëria u bë lajm në mediat e huaja, që edhe pse nuk kishte konfirmim zyrtar, flisnin se shuma e grabitur ishte 10 milionë euro, nga një avion me pasagjerë në bord, në pistën e aeroportit të vetëm ndërkombëtar në Shqipëri.

24 orë pas angazhimit pa rezultat nga toka e ajri, Kreu i Shtetit reagoi ashpër e kërkoi identifikimin e përgjegjësve.

Referenca ishte për mbledhjen e Këshillit të Sigurisë së 16 majit 2018, ku sipas Presidentit ishin lënë detyra për secilin institucion, për t’i dhënë zgjidhje përfundimtare problematikës së sigurisë në aeroportin Nënë Tereza. Ky aludim për përgjegjësi të shtetit nuk mori përgjigje nga qeveria. Shefi i saj vijoi me orientimin e nisur nga ministrja e tij Balluku, të përgjegjësisë tek kompania koncesionare.

Ministrja e Mbrojtjes njoftoi dislokimin e forcave speciale të ushtrisë e policisë ushtarake në perimetrin e jashtëm të aeroportit.

Më pas ishte radha e Policisë së Shtetit.

Ministri i brendshëm shkoi edhe më tej, e foli për sukses të policisë.

Për herë të parë reagoi koncesionari i aeroportit që foli për keqinformim të publikut njëlloj si në vjedhjen e 2016, e tha se ka përmbushur pjesën e vet të punës për sigurinë aeroportuale.

Opozita shënjestroi qeverinë.

Interesant është s’kryeministri nuk ka shqiptuar publikisht asnjë qëndrim për këtë ngjarje të rëndë, edhe pse daljet e posaçme për ngjarje të rëndësishme nuk i kanë munguar, së fundmi për protestën e 16 shkurtit të opozitës.

Ata që folën pas ministrave ishin deputetët socialistë, edhe pse jo njëlloj të koordinuar në etiketimin e ngjarjes.

Kompania austriake “Austrian Airlines” avioni i të cilës ra pre e grabitësve, e vetmja kompani që kryente transportin e vlerave monetare jashtë vendit, bëri të ditur se nuk do të ketë më transferta cash nga Tirana në Vienë, çka do të jetë një problem në vazhdim për bankat në vend.

Pikërisht ditën e grabitjes, Kryeministri kishte udhëtuar drejt Principatës së Monakos, i ftuar nga Princi Alberti II. Videon e postoi teksa në Tiranë grabitja spektakolare ishte kryetemë bisede kudo, të parat mediat.

Në mënyrë të pazakontë Kryeministri nuk tha asnjë fjalë për grabitjen në Rinas edhe pse mbajti një fjalë në Kuvend të enjten. Por paralelisht, në Rinas ishin dërguar dy ministre, e Infrastrukturës dhe e Mbrojtjes. E para tha se nuk do tolerohej më koncesionari, por nuk artikuloi asnjë masë ndaj tij.

Ministrja e dytë, ajo e Mbrojtes krijoi imazhin e sigurisë së rivendosur, përmes asistimit në vendosjen e policisë ushtarake e batalionit special të FA në perimetrin e jashtëm të aeroportit, me urdhër të saj. Komandanti i përgjithshëm i FA, Presidenti i Republikës, bëri të ditur se nuk ishte informuar, e për pasojë kërkoi nga Shefi i Shtabit të Përgjithshëm, se mbi cilin ligj bazohej ajo lëvizje e trupave ushtarake. Përgjigjen ia dha Ministrja e Mbrojtjes.

Një debat i ri u ndez nëse ishte shkelur apo jo Kushtetuta e ligji për pushtetet në FA, të cilët parashikojnë përdorimin e ushtrisë vetëm për gjendje të jashtëzakonshme dhe për parandalimin, ose mënjanimin e pasojave të një fatkeqësie natyrore. Në të dy rastet, parashikohet autorizim i Kuvendit. Përgjigja erdhi nga Kryeministri, jo me zë e figurë. Në instagram postoi foto nga një aeroporti jashtë vendit me prani ushtarake brenda tij. Në fakt të tilla pamje janë të zakonshme, si masa antiterrorizëm. Kryeministri bëri dallimin e njoftoi se në Shqipëri ushtria do jetë jashtë aeroportit.

Ky debat i ri sfumoi disi atë të përgjegjësve për grabitjen për herë të dytë, të cilën e riktheu Lulzim Basha

Qeveria vazhdoi të akuzonte koncesionarin, e ky i fundit policinë, në të vetmin reagim, por pikëpyetjet mbeten të forta. Sipas kontratës koncesionari ka pjesë të rëndësishme të përgjegjësisë në siguri, e për pasojë ka kontraktuar një kompani private sigurie, ICST Albania, e cila merr nga cdo udhëtar 3 euro për sigurinë, ndërsa dështoi plot dy herë në mënyrë spektakolare.

Po përse atëherë përse nuk merren masa ndaj koncesionarit? Një përgjigje gjendet në kontratën voluminoze prej 209 faqesh të vitit 2004, në të cilën thuhet se koncesionari përgjigjet për sigurinë brenda perimetrit, por me konfirmim shqiptar.

E nëse konrolli i sigurisë në perimetrin e koncesionit i takon koncesionarit, ka një program dhe procedura ndalimi të hyrjes së pautorizuar në zonën e koncesionarit, siç ka ndodhur dy herët e fundit, kanë si përgjegjës koncesionarin, policinë kufitare dhe DPAC, ndërsa për kontrollin e hyrjes, në vijën kufitare edhe MM.

Po sipas kësaj kontrate, qeveria ofron disa shërbime të rëndësishme, edhe sigurinë kur ajo nuk ndërmerret në nivelin e nevojshëm

Të jetë vallë kjo arsyeja se përse qeveria po ngurron të marrë masa ndaj koncesionarit, por i paraqet disa kërkesa për të përmbushur, e vetëm në rast mospërmbushje, atëherë mund të rishikojë marrëdhënien me të?

Të jetë vallë kjo arsyeja përse vetë Kryeministri nuk u prononcua fizikisht për këtë rast? Kjo mbetet ende për t’u vërtetuar. Koncesionarit kinez që mori koncesionin e aeroportit për vitet e mbetura, i është firmosur zgjatja e kontratës më 2 vjet, më 1 prill 2016. Në shtesën kontraktuale nuk ka asnjë kërkesë të re sigurie. Por koncesionari u shënjestrua si përgjegjës pak muaj pas zgjatjes së kontratës, më 30 qershor 2016, kur ndodhi grabitja e parë e parave në aeroport. Ministri i Brendshëm i kohës kërkoi marrje masash, përfshi rishikimin e kontratës me koncesionarin.

Në fakt akti i vetëm publik si reagim, i takon pasardhësit të Tahirit, Fatmir Xhafaj, që nxori një udhëzim në mars të 2018, që përfshin edhe shoqërimin nga policia të transportit të vlerave monetare

A mund të ishte parandaluar vallë grabitja për herë të dytë në aeroport, nëse do ishte respektuar ai udhëzim? Ky është një opsion retorik, por cka spikat është përsëritja e kësaj historie në mënyrë identike: grabitje në një institucion të sigurisë së lartë, asnjë i ndaluar në 24 orët e para të ngjarjes, shënjestrimi i koncesionarit si përgjegjës, e asnjë përgjegjës në policinë e shtetit e organe të tjera ligjzbatuese, që kanë detyrë parandalimin e kësaj ngjarje, që e ktheu Shqipërinë lajm në mediat ndërkombëtare në prag të sezonit turistik.

POLITKA-NE-ABC-NEWS-BASHA-RAMA-TAKTIKAT-E-NJE-KRIZE-POLITIKE-02.03.2019.mpg_snapshot_00.13-1280x720.jpg
ent ela17:16 | 02/03/2019

Opozita e mori në Tiranë mesazhin e Brukselit, se heqja dorë nga mandatet parlamentare, dëmton vendin në pritje të vendimit për hapjen e negociatave. Por nxitja ndërkombëtare për t’i zgjidhur problematikat me dialog të brendshëm, nuk po ngjit tek asnjëra palë, ndërsa taktikat diversive mund të sjellin efektin e kundërt në panoramën e tensionuar politike në vend. Detajet i sjell Mimoza Koçiu me Politika në ABC News. 

Opozita tashmë pa mandate e në protestë, është realiteti i ri politik, që po provokon kundërshti që në parim nga ndërkombëtarët, e lëvizje pas kuintave për ta trajtuar e zgjidhur si problem politik të brendshëm. Panorama është e njëjtë në Serbi, Mal të Zi e Bosnjë, por në asnjë nga këto vende ku protestohet kundër qeverisë, nuk ka një dorëzim mandatesh si në Tiranë. Në kushtet kur BE nuk do të përfshihet, në Tiranë një zgjidhje po përgatitet me zëvendësimin e vendeve të opozitës në kuvend. Ndryshe nga Lulzim Basha që vendosi papritur dorëzimin e mandateve, Edi Rama po i përgatit ndërkombëtarët për atë lëvizje.

Po çfarë ndodhi javën politike që lamë pas?

Opozita dominoi zhvillimin politik të javës që lamë pas, por taktikat reaguese të qeverisë, ishin zhvillimi jo i dukshëm i saj, e gjitha për të relativizuar arsyet që cuan në atë vendim. Edhe pse dorëzimi i mandateve u heq secilit prej opozitarëve imunitetin parlamentar para drejtësisë, Edi Rama edhe javën politike që lamë pas, e ricikloi akuzën e vjetër.

Narrativa që po ndërtohet me kujdes është ajo e një vendi me problematika të zakonshme, se krizë nuk ka vendi, por vetëm opozita.

Me ndërkombëtaret sic pritej kundër bojkotit, fokusi i parë i Kryeministrit janë vendet bosh në Kuvend, që ndikojnë edhe tek qytetarët në shesh. Zgjidhjen po e orienton në disa drejtime. Së pari u ndaloi të vetëve daljen në debate televizive me deputetët e larguar të opozitës. Kjo padyshim që sjell reduktim të riaktivizimit të akuzave.

Njërën prej arsyeve me ndjeshmëri të lartë publike, vjedhjen e zgjedhjeve, Lulzim Basha ia solli javën politike që lamë pas, përmes një paralajmërimi që tingëlloi si lajm.

Prokuroria reagoi disa orë më vonë.

Në fakt deklarata është një riciklim besnik i asaj që prokuroria lëshoi 4 muaj më parë, kur sapo u publikuan përgjimet e dosjes 339 të prokurorisë, pjesë e të cilave janë edhe komunikimet e dakos, me anëtarë të bandë së avdylajve.

Ndërsa pikëpyetje të forta mund të ngriheshin se përse organi i akuzës nuk ka gjë të re për të thënë, spikati reagimi i Kryeministrit për herë të parë për Vangjush Dakon, një reagim krejt komod për atë lloj akuze

Lulzim Basha ndërkohë jashtë kuvendit, pas koordinimit me strukturat, shpalli kalendarin e protestave të afërme.

Ambasadori i BE në Shqipëri përsëriti thirrjen e Brukselit për dialog.

Por planet duken krejt të tjera, e dialogu nuk është në axhendë. Reagimi i shumicës ishte një lëvizje akrobatike për të zhvendosur seancën plenare nga e enjtja tradicionale, ku ishte njoftuar edhe protesta e rradhës e opozitës, në dy ditë më herët. U njoftua papritur të martën e javës politike që lamë pas, 4 orë para mbajtjes së seancës. Dukshëm synimi ishte ç‘orientimi i protestës. Pas ç‘orientimit të parë, opozita njoftoi afrimin e protestës së saj, atë ditë.

Dukej e vështirë që një protestë të organizohej në 4 orë. Kënaqësia e Bashës për atë përgjigje numerike qytetare në pak orë ishte e dukshme.

Njëlloj si herën e fundit, protesta nisi me fjalime deri kur protestuesit e unazës së re, kryen aktin e parë.

Më pas erdhi ndeshja me kordonin e parë të policisë, por pa nevojën e ndërhyrjes aktive të forcave speciale.

E më pas, në në gjest të pahasur nga homologët e tij në Shqipëri, iu afrua rreshtit të parë të protestuesve që po ndeshej me policinë.

Kordoni i policisë u thye, e nisi hedhja e gazit lotsjellës, që solli tërheqjen e protestuesve.

Me një disiplinë të admirueshme, socialistët vijonin seancën parlamentare, edhe pse kryetari kryeministër kishte zgjedhur të ishte jo me ta, por diku tjetër.

Kryeministri ndodhej kilometra larg, në Divjakë, por vëmendja ishte tek ai aksion dhe kërkesa e opozitës për largimin e tij.

Të vetët e mbajtën seancën me tre orë diskutime, ndërsa motivimin e bënte kreu i grupit parlamentar.

72 deputetët në sallë votuan pro strukturën e dy institucioneve të reja të drejtësisë, Këshilli i Lartë i Gjyqësorit dhe Këshilli i Lartë i Prokurorisë. Ishte momenti që protesta të përfundonte, e Lulzim Basha të karikonte sërish të vetët për vazhdimin.

Ndryshe nga protestat e tjera, ishte OSBE zëri i vetëm që lexoi publikisht dhunë nga protestuesit, por kishte një frazë që u duk referencë për përdorimin e gazit lotsjellës e nxisim policinë të reagojë në mënyrë përpjestimore!”, -thuhej në reagim.

Në fakt opozita mori një shuplakë publike javën politike që lamë pas nga delegacioni faktmbledhës i komisionit të jashtëm të PE, në përbërje të të cilit një njohës i mirë  i vendit, raporteri për Shqipërinë, Knut Fleckenstein. Eurodeputetët kishin një vizitë të programuar në shqipëri e maqedoninë e veriut, dy vendet që janë në pritje të një vendimi për hapjen e negociatave. Pas takimit me ta bashkë me aleatët e vet, Lulzim Basha vlerësoi se ishin të painformuar, e se opozita nuk do tërhiqej.

Për takimin mbi një orësh që eurodeputetët me Kryeministrin nuk pati një komunikim zyrtar, por qëndrimi i mazhorancës mund të lexohet përmes takimit që eurodeputetët patën me kreun e Kuvendit Ruçi. Mes mesazheve nga ai takim i mbyllur, që Kuvendi shpërndau në media, e pastaj i tërhoqi, pati qëndrime interesante. Mes deklaratave të Ruçit se mazhoranca ka kryer reformat, i ka lënë hapësirë opozitës e ajo ka refuzuar të përdorë kontrollin parlamentar, spikatën qëndrimet e shprehura nga Fleckenstein e shigjetimi nominal për Monika Kryemadhin, jo si kryetare e LSI në opozitë, por si bashkëshortja e Presidentit.

Duhet thënë se mesazhet e raportuara nga kuvendi si të thëna në takimin me Rucin, u konfirmuan nga 7 eurodeputetët gjatë konferencës me gazetarët. Çka spikati ishte se pavarësisht prejardhjes nga PPE ku PD është anëtare apo PSE ku bën pjesë PS, u shfaqën të unifikuar se largimi i opozitës nga vendi, nuk zgjidh problematikat në vend, e se për ta ky është sherri i radhës, ku nuk duan të përfshihen.

Përgjigja e Bashës erdhi nga Shkodra, ku kishte shkuar për një takim me strukturat vendore partiake.

Po cfarë po ndodh pas kuintave është zëvendësimi i deputetëve të larguar. Mazhoranca po nxiton të plotësojë vendet bosh, duke i dërguar 57 vakanca në KQZ,  pa kaluar përmes këshillit të mandateve e seancës plenare siç e parashikon kodi zgjedhor.

Në fakt vendet bosh do ishin kujtesa e fortë për një parlament njëngjyrësh, si para viteve 90, e me vendimarrje të kufizuar vetëm për vitimet me shumicë të thjeshtë.

Përveç deklarimit publik për mosdorëzim mandati nga Lefter Koka i LSI e Myslim Murrizi i PD, me mandat është ende Rudina Hajdari. Deputetët rebelë kanë tërhequr vëmendjen edhe të Kryeministrit.

Të premten e javës politike që lamë pas, 4 kandidatë në listat e LSI dorëzuan në KQZ formularin e dekriminalizimit, hapi i parë për marrjen e mandatit, e të tjerë kanë shprehur gatishmërinë duke konfirmuar se janë nxitur nga ndërkombëtarët. Kujtim Gjuzi i Partisë Konservatore në listën e Bashës e konfirmoi për Top Channel.

Qeveria u kujdes ta paraqiste si akt me mbështetje ndërkombëtare. Ndërsa vetë Kryeministri e çoi më tej. Në samitin për Diasporën, premtoi një akt që në Kuvend kërkon 84 vota, ndryshimin e kodit zgjedhor për votën e emigrantëve.

Ndërsa thirrjes ndërkombëtare që si Kryeministër të nxisë dialog me opozitën, iu përgjigj duke e ftuar me batutën që u drejtonte studentëve dy muaj më herët.

Edhe këtë herë, ishte mbresuese aftësia olimpike e mazhorancës, që nën zhurmën e tensioneve politike, t’u jepte drejtim çështjeve, që në kushte normale do shkaktonin së paku debat publik. I tillë rasti i kandidimit të kryebashkiakëve me 3 mandate. Ligji i qeverisjes vendore, i ndryshuar në 2015, parashikon që pas tre mandateve rradhazi, një kryebashkiak nuk mund të rikandidojë.  Kjo i heq të drejtën të paktën katër emrave të spikatur nga dy kampet politike: Vangjush Dakos në Durrës, Qazim Sejdinit në Elbasan, Xhelal Mziut në Kamëz e Fiqiri Ismailit në Vorë. Edhe pse ligji është i qartë, socialistët i kërkuan një vendimmarrje të KQZ për të mos lejuar kandidimin e kryebashkiakëve me të paktën 3 mandate. Miratimi i kësaj kërkese kërkonte pesë vota nga KQZ, por u morën vetëm 4 pro, pasi kreu Klement Zguri votoi kundër. Në këtë nënyrë, pa shumë zhurmë, vendimi do legjitimojë kandidimet edhe pas tre mandateve radhazi. Në fakt, disa orë më vonë, në një intervistë për News 24, nr 2 i socialistëve deklaroi se kryebashkiaku i Durrësit Dako, e meritonte të rizgjidhej. Situata duket është e pëlqyeshme edhe për opozitën, që e kaloi në heshtje atë moment procedurial.

Lulzim Basha dëshmoi javën politike që lamë pas, se arrin të frymëzojë njerëz për të qenë në shesh kundër Kryeministrit, e vetë u kujdes të mohonte një komunikim me Ramën.

Tradita 28 vjeçare na ka treguar se palët arrijnë të merren vesh, kryesisht me ndihmën e ndërkombëtarëve.

Por këtë herë nuk është aq e thjeshtë. Parlamenti do rinovohet në zgjedhjet e 23-26 maj, e mund të ndryshojnë ekuilibrat politikë në BE, për pasojë vëmendja është modeste për vendet e Ballkanit Perëndimor. Por një prej eurodeputetëve që ishte në Tiranë, profesor i shkencave politike, tregon se sfida e korrupsionit është e ngjashme në vendet ish komuniste.

Ka një nxitje të dukshme që kjo krizë politike të zgjidhet brenda vendit, por edhe me zhvillimet e javës politike që lamë pas, në horizont nuk ka një iniciativë serioze, por protesta të tjera qytetare të paralajmëruara e taktika pas kuintave, të cilat i largojnë më shumë palët, e çojnë në thellim konflikti politik. /abcnews.al

 

 

POLITIKA-NE-ABC-NEWS-KUR-POLITIKA-HYN-MES-STUDENTEVE-1280x720.jpg
ent ela15:27 | 15/12/2018

Protesta e studentëve që nuk pranojnë të dialogojnë me Kryeministrin për 8 kërkesat që kanë shpallur, dominoi ngjarjet e javës politike që lamë pas. Mimoza Koçiu na sjell presionin e dukshëm e të padukshëm ndaj studentëve protestues, në funksion të llogarive politike.

E kaluan 10 ditëshin e parë në rrugë, e tashmë i ka poshtë zyrës së tij. Për dy ditë protestuan të ndarë, por prej të enjtes së javës politike që lamë pas, u bashkuan para kuvendit, e më pas para Kryeministrisë. Si kurrë më parë, nuk ka patur një mungesë kaq të theksuar publike mosbesimi mes një kryeministri e protestuesve. Thirrjet e Edi Ramës për dialog në këmbim të përmbushjes së 8 kërkesave të tyre, përsëriten çdo ditë, e disa herë në ditë, e çuditërisht studentët i refuzojnë. Tendencat për t’i orientuar majtas a djathtas nuk janë më aq të padukshme, por misioni duket i vështirë, pasi nuk kanë një përfaqësi. Megjithatë Kryeministri po merr gjithë kohën për t’u fokusuar tek ata, pasi ia ka dalë ta kompleksojë opozitën me akuzat se po ndikon studentët që të mos dialogojnë me të. Ndërkohë po e kalon pa kokëcarje e pa zhurmë skandalin e firmës fantazëm, që mori nga qeveria rreth 30 milionë euro për dy tendera.

Po çfarë ndodhi javën politike që lamë pas?

Kryeministri e nisi njëanshëm komunikimin me studentët, që të hënën, me atë që e quajti dialog për Universitetin. Për 1orë e 43 minuta iu drejtua studentëve përmes FB, duke iu përgjigjur pyetjeve që i dërgoheshin në profilin e tij. Monologu i gjatë i zbuloi ndjesitë për ta: herë i duken të pabindur, e herë si rivalët e tij politikë.

E nesërmja, dita e shtatë e protestës, por edhe e rifillimit të shkollave pas ditëve të pushimit, i gjeti më të shumtë në numër para Ministrisë së Arsimit, pasi kishin përcaktuar orën 16, si afat për përmbushjen e kërkesave të tyre. Në fakt prej të martës, protestat e studentëve vijuan edhe në Korçë, Shkodër, Vlorë, Gjirokastër dhe Elbasan, e një pjesë e tyre iu bashkuan studentëve në Tiranë. Në pritje Kryeministri u përsëriste ftesat për të vendosur një urë komunikimi me qeverinë, duke u sugjeruar si vendtakim sallën e parlamentit.

Por pas orës 16:00, skadimit të afatit, çka spikati mes studentëve ishte vetëm ndarja në qëndrim, se ku duhet të protestonin, para ministrisë apo km. Shefi i qeverisë ua lexoi si përcarje, e nxitur nga presioni i opozitës, e u përsëriti ftesën për dialog.

Duhet thënë se me akuzat që i bën PD e LSI, ia ka dalë t’i kompleksojë 2 partitë opozitare, të cilat janë tkurrur në komunikimin publik. Lulzim Basha i mbështet kujdesshëm.

Vetë Rama tha se Freshistët e tij nuk ia kishin dalë të ndikonin protestën. E megjithatë jo pak prej tyre, i kishte  përballë të martën në mbrëmje në Top Channel.

Po na akuzojnë si fresshistë, unë po jam koordinator”.

I prekur, si çdo i ri i moshës së tij ndaj komenteve në rrjetet sociale, padashur kishte zbuluar një realitet tjetër në atë dialog TV. Me nuhatjen e eksperiencën e gjatë, Km mori situatën në dorë, për të sfumuar deklaratën e të riut të Fressh, e mbyllur temën e hapur padashje, se sa Fresshistë kishte përballë në atë studio

Por shija e atij komunikimi vijoi në rrjetet sociale, ndërsa vetë Kryeministri, pas vendimit për anullimin e tarifave për provimet e mbartura, dëshmoi edhe njëherë fuqinë e tij, pavarësisht autonomisë universitare.

Për dy ditë studentët protestuan të ndarë, një pjesë tek Ministria e Arsimit e tjetra tek Kryeministria.

Vazhdon t’u bëjë disa ftesa në ditë, virtualisht për dialog, duke u konfirmuar cdo herë se i pranon 8 kërkesat e tyre. Por si përgjigje, dy grupet e studentëve u bashkuan të enjten e seancës plenare para parlamentit. Të shumtë në numër këmbëngulën se nuk do ketë dialog, pa u plotësuar më parë kërkesat e tyre.

Brenda u përball me dy kërkesa të ndara, nga 8 deputetë të opozitës. LSI paraqiti dy amendime shtesë në buxhetin për arsimin e lartë, në funksion të kërkesave të studenteve për ulje tarifash e rritje të buxhetit për arsimin. Ndërsa PD kërkoi abrogimin e ligjit të arsimit të lartë. Asnjëra nuk u pranua dhe Edi Rama ua bëri leximin e tij të protestës së studentëve.

Pas largimit të tyre e rimori prapë fjalën, tashmë me audiencën e bindur të të vetëve.

Por para të vetëve bëri edhe pohimin e fortë, duke zbuluar merakun politik. Studentët që protestojnë janë kontigjent votuesish, bashkë me prindërit e tyre, e tashmë Kryeministri bën llogaritë për vendoret e 30 qershorit, e këtë ia kujton publikisht opozitës.

Dushëm studentët i do në krah. Ua kishte thënë edhe 3 ditë më herët.

Për t’i bindur studentët, ka intensifikuar në mënyrë të pabesueshme mesazhet vituale në rrjetet sociale, më të aksesueshme prej të tyre. Në instagram hedh papushim foto me mesazhe atipike për një kryeministër të cilat shndërrohen shpejt në meme, që zbavisin përdoruesit e rrjeteve sociale, përfshi vetë Kryeministrin.

Sikleti disa ditor i Kryeministrit, që i refuzohen ftesat, lexohet me thirrjen për të patur këdo prej tyre, madje edhe pa një mandat përfaqësimi nga studentët protestues.

Por ende asnjë grup nuk po i përgjigjet, ndërsa prej të enjtes pasdite janë bashkuar në protestë para dritareve të zyrës së tij.

Një aleat të dukshëm studentët kanë mediat. Përveçse i ndjekin në kohë reale në protestën e kërkesat e tyre, çdo studio televizive u hap për ta gjatë javës politike që lamë pas. Rekord shënoi Blendi Fevziu që u ofroi studion e “Opinion”, për tre mbrëmje rradhazi, duke i dhënë një vizibilitet maksimal kauzës së tyre. Të enjten në mbrëmje aty ishte i vetëm Kryeministri, me ftesën për studentët, pa e fshehur kënaqësinë se ata nuk kishin kërkuar largimin e tij.

Duket se ka përgatitur zgjidhjet për ta, sepse i paraqet pjesërisht në studiot tv. A do gjenden vallë studentët, nëse pranojnë të ulen me të, në pozicionin e spektatorit, që do dëgjojnë e konfirmojnë çfarë Kryeministri ka përgatitur për ta?

Nëse Kryeministri po merr kohë për të bindur studentët që të ulen me të, spikat heshtja e Lulzim Bashës, për një siklet tjetër të qeverisë, pasi VOA konfirmoi hetimet e nisura në SHBA për firmën fantazëm Dunwell Haberman, e cila me përfaqësues 26 vjeçarin Avdjol Dobi, kishte përfituar dy kontrata nga qeveria shqiptare me vlerë afro 30 milionë euro, nga ARRSH dhe OST.

Duke konfirmuar mashtrimin nga firma fantazëm, Ministri i Infrastrukturës e Energjisë, u shpreh i gatshëm për t’u hetuar.

ARRSH edhe OST rihapën tenderat për kontratat që kishte fituar kompania fantazëm, e cila po hetohet tashmë në SHBA e në Shqipëri. Heshtjen e opozitës e theu Kryeministri, duke folur 7 ditë pas publikimit të skandalit.

Opozita duket se humbi mundësinë që ta merrte nga Komisioni i Venecias, miratimin për kauzën e saj kryesore, Vetingun në politikë. Në opinionin e miratuar të premten, Komisioni nënvizon rreziqet e keqpërdorimit të këtij procesi dhe fton palët të dakordësohen për modalitetet në kuvend. Natyrisht leximi i Ramës e Bashës ishte i ndryshëm, dhe nuk mungoi edhe përplasja virtuale mes tyre. Duhet thënë se vetë Basha ka shkëlqyer me mungesën e tij publike javën politike që lamë pas, edhe pranë banorëve të zonës së unazës së re, ndërsa protestat e përditshme në Shkodër, Kavajë e zona të tjera, për cmimin e karburantit e taksat, dukshëm kanë mbështetjen e partisë së tij.

Në Tiranë, studentët protestues u japin herë pas here prova para mediave, se nuk u interesojnë partitë politike. Duket e pamundur të orientosh një protestë pa përfaqësi. Të enjten e javës politike që lamë pas, Kryeministri zgjodhi t’u bënte një gjyq publik drejtuesve të universiteteve, që i mblodhi me urgjencë në mjediset e Ministrisë së Arsimit. Foli vetëm vetë, e në 45 minuta u përmendi publikisht disa raste abuzimi me fondet dhe u të mos u fshohen përgjegjësive për situatën e studentëve.

Të nesërmen rektori i UT Mynyr Koni dhe Kryeminsitri u përplasën virtualisht. Rektori zgjodhi të hidhte poshtë akuzat e Kryeministrit, duke i konsideruar presion e shantazh, jo në një dale publike, por përmes faqes FB të UT. Sipas tij në UT nuk ka patur asnjë bllokim, siç mundohet ta paraqesë Km, për të justifikuar e shtrembëruar arsyet e vërteta të protestës së studentëve. Ai madje thotë se pengimi normal i punës ka ardhur nga administratori i UT, një aktivist në fushatat e partisë së Kryeministrit.

Përgjigja e Kryeministrit nuk vonoi në Tëitter, therëse e fyese. Përmes eufemizmave të fortë, Rama shkruan se e mëshiron pafytyrësinë e rektorit dhe e fton të gjejë kurajon t’ia thotë gjërat në sy, shumë shpejt kur KM të shkojë nëpër auditoret universitare.

Senati akademik i UT kishte denoncuar me herët se shfuqizimi nga qeveria i nenit të VKM për heqjen e tarifave për provimet e mbartura, ishte bërë pa një kërkesë nga senati, siç e parashikon ligji. Madje Senati kishte vendosur të mbështeste kërkesat e studentëve për ulje tarifash, e kish nisur përllogaritjen e efekteve financiare për atë ulje. Në të njëjtën linjë u deklaruan publikisht këto ditë edhe senatet akademike të disa universiteteve të tjera. A është vallë kjo një përpjekje për ta zgjidhur situatën nga brenda universiteteve? Koha do e tregojë. Në pritje, e premtja pati disa zhvillime të pazakonta, që reflektonin presion për orientimin e studentëve. Numri i tyre në shesh ishte reduktuar ndjeshëm, e pas ftesës së radhës së Kryeministrit.për dialog, vëmendja e gazetarëve që ndiqnin protestën e studentëve para Kryeministrit. u tërhoq, për një njoftim të rëndësishëm. Një student i fakultetit juridik i kërkoi Kryeministrit. një seancë urgjente parlamentare, për kërkesat e tyre.

Për studentë të pranishëm, thirrja ishte e pakonsultuar me ta.

E megjithatë ai apel i vetmuar verbal e mori një përgjigje pozitive, jo nga Kryeministri, por nga nr. 2 i PS, që konfirmoi gatishmërinë që parlamenti të mblidhej të nesërmen me Kryeministrin e studentët.

Por të paktën ata studentë që qëndrojnë para Kryeministrit, paralajmëruan vetëm vijimin e protestës. /abcnews.al

 

WEB-POLITIKA-NE-ABC-NEWS-RAMA-E-BASHA-NE-PRITJE-TE-PROKURORISE-1280x720.jpg
ent ela16:47 | 02/06/2018

Opozita ishte disi e vetmuar këtë javë në aksionin e saj për largimin e ministrit të brendshëm. Qeveria nuk ushqeu debatin publik, në mungesë edhe të premtimit të munguar opozitar, për denoncime të reja. Politika në ABC News na sjell këto dritëhije, në pritje që prokuroria të thotë fjalën e saj për akuzat që rritën tensionin politik në vend. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono