Politika në ABC News

POLITIKA-NE-ABC-NEWS-STUDENTET-PERBALLE-QEVERISE-08.12.2018.mpg_snapshot_17.02-1280x720.jpg
G. P.16:35 | 08/12/2018

Me mijëra studentë të universiteteve publike kanë nisur protestat kundër tarifave, e kushteve në auditorë e konvikte. Në pak ditë, ia dolën të marrin ç’ka vetë opozita nuk ka fituar dot vitet e fundit: vëmendjen, por edhe ftesa për dialog nga vetë kryeministri. Por studentët duken halli më i vogël i Edi Ramës në këto ditë dhjetori. Këtë jave nga  Mimoza Koçiu me Politika në ABC News.

Lindita Nikolla: “Do të hiqet neni 4 dhe nuk do ketë kosto shtesë për studentët përsëritës që mbartin provimet nga një vit i mëparshëm.”

Edi Rama: “Jam gati t’i takoj kur të duan.”

Ia dolën për dy ditë protestë para Ministrisë së Arsimit, të bënin atë që nuk e bëri dot, as vetë opozita në afro 6 vjet. Tërhoqën vëmendje, mbështetje të gjerë publike, duke ilustruar se si një Kryeministër, qëndrimet cinike i shndërron në lëshime, në më pak se 24 orë, përpara një proteste kaq masive, ndërsa ka edhe një tjetër situatë të sikletshme përpara.

Çfarë ndodhi javën politike që lamë pas?
Kanë 4 vjet që ankohen për tarifat universitare, por aksioneve të tyre të izoluara, disa prej të cilave edhe me mbulim mediatik, nuk ua vuri veshin njeri.
Në (23) janar 2015 ankesa për tarifat e larta të studimeve, u artikulua për herë të parë nga studentë të universiteteve private, të transferuar në universitetet publike.
5 muaj më vonë, në maj 2015 (6 maj) studentët bllokuan qarkullimin për 1 orë para Kryeministrisë, kundër reformës së qeverisë në arsim, që sipas tyre u rrit tarifat vjetore, në krahasim me vitet e kaluara.
Në (21) janar 2016 studentët e Fakultetit të Shkencave Sociale bllokuan për 3 orë dyert e universitetit, duke kërkuar pagesën e tarifës me këste dhe uljen progresive të tarifave çdo vit.
Kurse 2018, ishte viti i intensifikimit të kërkesave. Protesta e parë ishte në janar para Kryeministrisë, për përgjysmimin e tarifave të studimit. Ministria e Arsimit iu tha se përgjegjësinë e kanë universitetet, e se tarifat nuk kanë ndryshuar në 4 vitet e fundit. Studentët thonë se e kanë tentuar ankimimin për tarifat vjetore pranë universiteteve por pa rezultat (maj 28).
5 javë më herët, me 22 tetor, një grup studentësh aktivistë nga Lëvizja Për Universitetin ndërprenë për pak momente fjalën e kryeministrit Edi Rama, për të evidentuar gjendjen reale të arsimit, me kushtet e tarifat, përkundër panoramës që po paraqiste Kryeministri në një takim me studentë.
Një muaj më vonë, (22 nëntor), protestuan para Kryeministrisë, duke përsëritur kërkesën e njohur për uljen e tarifave të studimit, e rritjen e buxhetit për arsimin.

“Unë jam viti i parë gazetari. Tarifa jonë është 300 mijë lekë në vit. Mua m’i paguajnë prindërit sepse vetë nuk punoj, plus shtëpia me qira, plus shpenzime të librave nuk na mjaftojnë. Mund të rritet shumë mirë buxheti sepse ka para të buxhetit që harxhohen kot”.

Kjo protestë, koinçidoi me atë para parlamentit të banorëve të Unazës së Re, shtëpitë e të cilëve prishen nga projekti i saj. Për pasojë protesta e studentëve, pati vetëm vëmendjen e mediave, as të Kryeministrit e as të opozitës. Duket se studentët vendosën të mos presin më. Më 4 dhjetor nisi bojkoti i mësimit te fakulteti i Inxhinierisë së Ndërtimit, Arkitekturës e Urbanistikës, në shenjë proteste kundër tarifave të arsimit. Kërkesa kryesore: heqja e tarifës për provimet e mbartura, një barrë më shumë sipas tyre, me tarifat e rritura që në 2014. Të nesërmen u bënë më shumë, e iu drejtuan Ministrisë së Arsimit ku protestuan për dy orë. Masiviteti i protestës ishte pika e fortë e studentëve. Këtë herë ministrja e Arsimit i ftoi për një takim në ambientet e ministrisë, por ata e ftuan të fliste me ta në shesh. Ministrja ua dha sqarimin nga foltorja e ministrisë. Përgjigja e ngjashme me të kaluarat, nuk i bindi e premtuan rikthim në protestë të nesërmen.

Qasje jo bashkëpunuese ndaj tyre pati Kryeministri. E derdhi cinizmin në një përgjigje në rrjetet sociale, duke i cilësuar “ngelësa” studentët që kërkonin heqje të tarifës.

“A jeni ju dakord qe t’i paguani ju, pra taksapaguesit, shpenzimet e universitetit për studentet ngelës? Unë për vete nuk jam dakord e para dhe e dyta, nuk ka asnjë rritje tarifash qysh prej vitit 2014”.

Disa orë më vonë, dha një përgjigje më të kujdesshme, por sërish shpërfillëse
“Thjesht e vërteta: 1.Tarifat s’i përcakton ministria po universiteti 2.Asnjë tarifë s’është rritur nga 2014 3.VKM për tarifën e mbetësve është kërkuar nga universitetet 4.Efekti i VKM nis vitin tjetër 5.Ministrja u ka sugjeruar sot universiteteve të konsiderojnë rishikimin e VKM.”
Një përgjigje i erdhi nga lëvizja për universitetin, po në rrjetet sociale.

“1. Nivelin e financimit të universiteteve publike dhe tarifën maksimale e vendos qeveria. Rrisni buxhetin dhe ulni tavanin! Pastaj universitetet mund të propozojnë uljen e tarifave.
2. Në vitin 2014 tarifat janë rritur sa për pesë vite të mëparshme rresht. Përveç kësaj, ne kërkojmë përgjysmimin e tyre deri në realizimin e parimit arsim publik falas. E kupton logjikën apo ke nevojë për një orë leksioni?!
3. Ne nuk jemi mbetës. Jemi mijëra studentë që punojmë dhe studiojmë fort. Prandaj shumë prej nesh zgjedhin t’i shtyjnë provimet, që të kemi mundësi të studiojmë më shumë.
4. Ne do të jemi gjallë edhe vitin tjetër. Siç do të futen në universitete dhjetëra mijëra studentë të tjerë. Ne luftojmë edhe për ta.
5. Rishikimin e v.k.m. e bën autoriteti që e ka hartuar, jo universitetet. Nuk ke një këshilltar që ka pak kulturë juridike?!”

Në fakt kjo replikë virtuale, është edhe thelbi i ndarjes së studentëve me qeverinë. Km ka të drejtë kur thotë se tarifat-tavan janë të njëjta prej vitit 2014. Ç’ka nuk thotë, është se ato janë rritur me firmën e tij, pikërisht në vitin 2014, në krahasim me tarifat e paraardhësit Berisha. Reagimi prej vitesh i studentëve, duket ka sjellë ngrirjen e tyre, por kjo për studentët nuk mjafton. E enjtja e 6 dhjetorit, dita e dytë e bojkotit të mësimit, i mblodhi para Ministrisë së Arsimit në Tiranë, ndërsa bojkot e protestë zhvilluan edhe studentët në Korçë, Elbasan, Durrës e pjesërisht në Shkodër.
Dukshëm situata nuk kalohej më me shpërfillje. Lindita Nikolla mblodhi rektorë e dekanë universitetesh. Tërheqja e parë erdhi, pikërisht për provimet e mbartura, për të cilën Kryeministri i kishte quajtur ngelës.

Qeveria e dëshmoi fuqinë e saj, kur pak minuta më vonë me një VKM qarkullues me firmën e Kryeministrit, anulloi pikën e tarifës për provimet e prapambetura.Vetë Kryeministri u shfaq në ceremoninë e zyrtarizimit të ardhjes në Shqipëri të rrjetit hotelerik Huyat, pa asnjë referencë për protestën. Në fakt ishte gjendur një dorë, që materializoi me shkrim kërkesat e studentëve për ministren Nikolla, një mundësi për dialog. Në më pak se dy orë, Ministrja bëri daljen e dytë publike. Por as kjo dalje e dytë, nuk I bindi studentët

Spontaniteti që kishte sjellë këtë lëvizje dy ditë më herët, u vërtetua nga mungesa e një përfaqësie të tyre, ç’ka pamundëson orientimin, të paktën në këtë fazë, të studentëve protestues. Këtë e ndjeu e para qeveria, e pas saj edhe opozita, ndërsa studentët kërkojnë që asnjë politikan të mos u afrohet.
Kryeministri replikoi indirekt me ta, jo për çështjen e tarifave për të cilën ankohen prej 4 vitesh, por për kushtet, teksa u tregoi në rrjetet sociale, ndryshimin e disa prej godinave të qytetit studenti, para e pas rikonstruksionit. Nga ana tjetër selia blu, i mbështeste moralisht, duke ndarë me mediat çdo moment të protestës së studentëve. Vetë Lulzim Basha të enjten pasdite, në vizitën pothuaj sistematike tek banorët e Unazës së Re, u kushtoi vëmendje të posaçme.

Ngjashmëria me dhjetorin ‘90, kur gjithçka nisi me kërkesa ekonomike, po elektrizon opinionin publik, po aq sa edhe opozitën.
Të premten e 7 dhjetorit ishin më të shumtë në numër, pasi iu bashkuan edhe studentë nga rrethet, e njëlloj përsëritën se nuk kishin ndërmend të tërhiqeshin. Tashmë kishin në krah të gjitha mediat informative, që injoruan aktivitetet e tjera të njoftuara të ditës, për të pasqyruar vetëm protestën e tyre.
Përveç banorëve që preken nga projekti i Unazës së Re, opozita mbështeti javën politike që lamë pas edhe banorët e Shkozës, shtëpitë e të cilëve prishen nga projekti i unazës lindore të Tiranës, e banorët e Bregut të Lumit të cilët kërkojnë dëmshpërmbimin e vonuar, për shtëpitë që iu prishën nga projekti i bulevardit të ri. Një lloj gare në distancë zhvillohej mes Ramës e Bashës. Paradite, Kryeministri përgëzonte prishjet vullnetare të banesave a bizneseve, që Bashkia e Tr i shpërndante në media, edhe pse nuk ka një VKM për ta. Ndërsa pasdite Lulzim Basha u ofronte mbështetje e u kërkonte rezistencë banorëve të zonës së Unazës.

Të enjtën në mbrëmje, “Të paekspozuarit” kishte zbuluar se Kompania Dunëell Haberman, fituese e lotit të parë prej 18 milionë euro për rindërtimin e Unazës së Madhe, kishte falsifikuar dokumentin e themelimit, të sekretarit të shtetit të Delaëare, vend ku kjo kompani ushtron aktivitet. Padyshim që kjo do përbënte një skandal të madh për një project të kushtueshëm, e që ka sjellë konflikt me banorët. Zbatuesi i projektit, Autoriteti rrugor shqiptar largoi përgjegjësinë nga vetja, duke thënë se nuk kishte patur asnjë indicje, por i kërkoi ministrisë përkatëse, të verifikonin kompaninë me autoritetet amerikane, e deri në një përgjigje, njoftoi ndërprerjen e punës në segmentin e kësaj kompanie, nga ura e Lanës tek sheshi Shqiponja.

Edi Rama ka heshtur qëkur ky lajm u bë publik. Pikëpyetjet për të shtohen, sidomos pas akuzave të përsëritura të opozitës, se projekti ka një vlerë korruptive. Por shefi i qeverisë, e kishte një rrugëdalje të përkohshme dhe e përdori: protestën e studentëve. I ftoi personalisht në takim, duke e orientuar vëmendjen tek protesta e tyre
Opinionit ia kujtoi Lulzim Basha, që i kërkoi të mos fshihej pas ARRSH.

“Tani është e qartë për të gjithë ju se projekti i Unazës së Re është një projekt vjedhjeje, dhe jo një projekt zhvillimi. Ai nuk bëhet për qytetin e Tiranës, nuk bëhet për njerëzit, porbëhet për xhepat e Edi Ramës. Ideatori planifikuesi përfituesi i vjedhjeve Edi Rama. Po e shohim të vërtetën: Edi Rama është hajdut. unë jam me ju. Askush sduhet të rrijë pa vepruar”.

E megjithatë vëmendja mbetet tek studentët. Njëlloj si një ditë më parë, edhe të premten, ministria iu përgjigj brenda afatit ultimativ studenëve, kërkesat e të cilëve tashmë kishin shkuar në 8, me shkrim dor e për ministren e arsimit, për të cilën e premtja ishte ditë impenjimi për kërkesat e tyre.

Vetë studentët sërish nuk duken të bindur. Pa një përfaqësi të zgjedhur, e kanë më të lehtë të imponohen dhe e kanë kuptuar këtë.
“Studentët duket nuk kanë ndërmend të tërhiqen, e po shtojnë kërkesat për reformim të universiteteve bashkë me pedagogët, por sikleti i Km me ta është më i vogli, në raport me skandalin e korrupsionit ku është përfshirë një prej kompanive fituese të tenderit të një segmenti të unazës së madhe. Zëri i Amerikës konfirmon se në Delaëare të SHBA, ka nisur hetimi për të përcaktuar nëse kompania Dunëell Haberman, ose ndonjë prej zyrtarëve të saj, është përfshirë në aktivitete të paligjshme, mashtrime ose falsifikime për të siguruar kontratën në Shqipëri, duke falsifikuar datën e krijimit dhe një certifikatë e Sekretarit të Shtetit se kjo firmë nuk i ka detyrime fiskale shtetit, dokument që është mohuar të jetë kërkuar e lëshuar në SHBA”./abcnews.al

POLITIKA-NE-ABC-NEWS-EDI-RMA-MES-KOSOVES-ARTIT-E-SHQIPERISE-01.12.2018.mpg_snapshot_02.29-1280x720.jpg
G. P.15:38 | 01/12/2018

Kryeministri Edi Rama tërhoqi vëmendje publike kur sfidoi nga Kosova, Bashkimin Europian dhe Serbinë. Ndërsa në shtëpinë e tij, opozita po mbështet protestat ndaj qeverisë të banorëve të Unazës së Re. Këtë dinamikë të ndryshme në dimensionin e festave na sjell Mimoza Koçiu me Politika në ABC News.

Kryeministri Rama, tërhoqi vëmendje ndërkombëtare, javën politike që lamë pas, kur artikuloi nga Peja tezën delicate të bashkimit kombëtar me Kosovën. U shfaq si protagonist në mbledhjen mes dy qeverive, duke sfiduar në emer të Shqipërisë e Kosovës, BE dhe Serbinë. Përkrah kryeministrit Haradinaj, u kujdes të mbronte presidentin Hashim Thaçi që ka kundër qeverinë e vendit të tij, për idenë e tij të rishikimit të kufijve. Në shtëpinë e tij, Kryeministri i Shqipërisë vazhdon të ketë një konflikt të hapur me banorë të unazës së re, ndërsa i vetmi komunikim me opozitën janë tiradat që i lëshon nga Twitteri.

Po cfarë ndodhi javën politike që lamë pas?

Ishte rradha e Kosovës për të mikpritur sipas traditës mbledhjen e qeverive të Kosovës e Shqipërisë. Takimi i pestë mes tyre u mbajt në Pejë, ndërsa protagonist ishte Kryeministri i Shqipërisë. Foli në emër të dy shteteve për bashkim, bazuar në një dokument strategjik që do përgatitet për gjendjen e të ardhmen e dy vendeve pas 2025, kohë kur Serbia hyn në BE. Po në emër të dy vendeve shprehu zhgënjimin ndaj BE.

Më 21 nëntor, një ditë pas Kosova dështoi të antarësohej për herë të tretë në Interpol, e Beogradi zyrtar mori meritat për këtë, qeveria Haradinaj e rriti në 100% tarifën për mallrat serbe, e moslejimin e produkteve, ku ajo emërtohej “Kosovë e Metohi”. Pakënaqësia serbe përveçse me deklarata u duk edhe tek lobimi tek institucionet ndërkombëtare, disa prej të cilave, përfshi shefja e diplomacisë së BE Mogherini, i kërkuan Kosovës anullimin e atij vendimi, Por Kryeministri Haradinaj u përgjigj se nuk kishte ndërmend të tërhiqej. Një natë më parë i ishte rrëfyer një histori presioni serb e ndërkombëtar ndaj Kosovës e tashmë Kryeministri u rendit në krah të Haradinajt.
Numri i marrëveshjeve të nënshkruara mes dy vendeve, ishte më i madh se në 4 mbledhjet e mëparshme. Pa përmirësime të dukshme nga marrëveshjet e mbledhjeve të kaluara, këtë herë palët rritën pritshmëritë.

Por marrëdhënia nuk dukej aq rozë. Konferenca e përbashkët për shtyp, përplasi këndvështrimet mes Ramës e Haradinajt, mbi propozimin e Thacit për rishikimin e kufijve me Serbinë, një çështje që ka ndarë institucionet më të larta në kosovë, presidentin e Kryeministrin. Padyshim që këtë dituatë e di mirë Edi Rama, që zgjodhi të etiketonte pa doreza kundërshtarët e idese së Thaçit, teksa njërin prej tyre e kishte në krah. E Haradinaj nuk ia përtoi përgjigjen.

Kosova duket se po e pranon taksën prej 5 euro për një kalim, vendosur nga qeveria Rama për të hyrë në Shqipëri. Por kërkesa për Edi Ramën ishte therëse: Shqipëria duhet të garantojë standardin rrugor, që justifikon atë tarifë që ka vendosur. Simbolika me flamurin dhe shqiponjën mbylli mbledhjen mes dy qeverive, duke sjellë pakënaqësinë tradicionale instinktive të Beogradit, e një reagim të vakët nga BE, ndryshe nga çështja e tarifës ndaj importeve serbe. A ka fituar vallë imunitet BE nga retorika të tilla, apo problemet brenda Unionit tashmë po dominojnë, ato të vendeve jashtë tij? Të dy hipotezat vlejnë. Por interesant është se në këtë tensionim edhe publik mes KS e Serbisë, pas vendimit për tarifat, rishikimi i kufijve mes tyre paraqitet si një proces drejt dakordësimit nga presidenti i vendit. Nuk ka një konsensus brenda vendit për këtë çështje, por kjo nuk e pengoi Thacin, që mbështetet publikisht nga Kryeministri Rama, zhvilloi takime në Uashington me sekretarin e shtetit mike pompeo e këshilltarin e presidentit Trump për sigurinë kombëtare Majkëll Bolton, sipas tij, për t’u koordinuar me administratën amerikane në hapat e fundit të negociatave me Serbinë.

Mungesa e konsensusit politik është tipik edhe në Shqipëri, e asnjëra palë nuk investohet për afrim, as vetë Kryeminsitri që dukshëm po investohet për konsensus në Kosovë. 106 vjetorin e pavarësisë e festuan të ndarë: mazhoranca e presidenti në Vlorë, kurse opozita në Tiranë. Në nderimet e atij që njihet si ati i pavarësisë, Ismail Qemalit, spikati veshja jo zyrtare e Kryeministrit Rama. Veshja ne stilin e stilistit të tij të preferuar, japonezit Johji Yamamoto, kontrastoi fort në formalitetin e ceremonisë e përkrah stilit zyrtar të presidentit e kreut të kuvendit.

Veshja iu rikthye stilit formal disa orë më vonë, në pritjen tradicionale shtetërore për 28 Nëntorin. Ilir Meta i kujtoi se në 106 vjetorin e shtetit, ka një sfidë të paadresuar
Edhe në pritjen shtetërore opozita nuk ishte aty. Lulzim Basha kishte zgjedhur ta festonte ditën e flamurit me shqiptarët në Milano, ndërsa në mëngjes, kishte nderuar 28 Nëntorin, jo vetëm si ditën e pavarësisë, por edhe çlirimit të vendit, një korrigjim në ceremonialin zyrtar i bërë nga Sali Berisha, pas debatit nëse vendi ishte cliruar me 28 apo 29 nëntor të 1944.

Lulzim Basha po mbështet prej disa javësh kauzën e banorëve të unazës së re, shtëpitë e bizneset e të cilëve do prishen nga zgjerimi i rrugës. Nga 12 të arrestuar pas protestës tek parlamenti, vetëm 2 janë në burg, ndërsa deputetë të opozitës ishin në gjykatë për t’i mbështetur. 2 protestues të tjerë janë arrestuar, e disa të tjerë proceduar penalisht, për shkatërrim prone publike gjatë protestave të mbrëmjes. Edhe Lulzim Basha me disa deputetë të PD e LSI, pjesëmarrës në protesta janë proceduar penalisht, për organizim dhe pjesëmarrje në grumbullime të paligjshme, prishje e qetësisë publike dhe pengim i qarkullimit të mjeteve.

Njëlloj si për teatrin kombëtar, edhe ky rast duket i është lënë Erion Veliajt për menaxhim. Kryebashkiaku furnizon mediat me pamje nga prishja e objekteve të para, e madje edhe të banorëve që kanë pranuar të zhvendosen në banesa sociale në Shkozë. Pikëpyetja e fortë mbetet se si ka nisur vallë ky proces, pa një vendim të Kryeministrit, i cili bazuar në vlerësimin në terren të grupeve të punës, liston banorët që do përfitojnë dëmshpërblim, bonus qeraje apo banesë sociale. Kjo mangësi ligjore, nuk e pengon Veliajn që cdo ditë t’i tregojë publikut një tjetër anë: banorë që pranojnë shembjen e shtëpive tek Unaza e Re, në këmbim të një banese sociale në Shkozë
Padyshim që rikthimi i opozitës në kuvend për miratimin e Kodit të ri zgjedhor, përveçse përbush një detyrim të BE, i shmang afatin e djegies së mandateve për pjesën dërrmuese të deputetëve të saj, për shkak të mungesës 6 mujore në kuvend. Duhet thënë se përkundër denoncimeve sistematike, opozita po përgatitet për zgjedhjet vendore.

Atmosfera e festive bën të vetën, e duket se të gjithë po marrin kohë, pasi takimi me zgjedhësit do jetë vetëm 7 muaj më vonë. I vetmi që nuk e fsheh se po punon fort për një mandat të dytë është Erion Veliaj.

Veliaj në FRESSH: “Të kemi një fitore spektakolare në Tiranë. Këtë herë nuk na duhet vetëm fitorja, por shumica absolute në këshill për të mos e kthyer bashkinë ne minitepsira”./abcnews.al

EDI-RAMA-KUNDER-TE-GJITHVE-1280x720.jpg
ent ela21:00 | 06/10/2018

Çështja e vajzës nga Fushë Kruja që akuzoi për dhunë djalin e deputetit socialist të zonës, dominoi javën politike që lamë pas me përplasje, akuza e kallëzime reciproke mes mazhorancës e opozitës. Por pati edhe një dimension që u luajt pas kuintave, për ta orientuar atë çështje. Detajet i sjell Mimoza Koçiu me Politika në ABC News.

Viti i gjashtë në pushtet po provohet rraskapitës për Kryeministrin. Sistematikisht njerëz pranë tij vihen në qendër të akuzave të forta publike.

Rasti i vajzës nga Fushë-Kruja që paditi djalin e deputetit socialist të zonës për dhunë ndaj saj, ndërsa një nënkomisar akuzoi për ndërhyrje e favorizim nga mazhoranca për këtë rast, nuk po rezulton çudia që zgjat tre ditë, pavarësisht një impenjimi të qartë, për ta sfumuar, e konsideruar si konspiracion të opozitës ndaj qeverisë.

E për të orientuar vëmendjen diku tjetër, në debat po hidhet edhe audiopërgjimi i Babales i publikuar 4 muaj më parë nga PD, e madje edhe paralajmërimi për një paketë antishpifje. Një operacion i gjerë spin-i politik e mediatik, për të kontrolluar debatin publik e orientuar atë.

Po çfarë ndodhi javën politike që lamë pas?

Rexhep Rraja, djali i deputetit socialist të Fushë Krujës Rrahman Rraja, u arrestua dy muaj pas denoncimit të Xhisiela Malokut. Urdhër arresti i prokurorisë u parapri nga dalje intensive publike të SHÇBA, e Policisë së Shtetit, ku përsëritej se policia e kishte bërë punën e vet, ndryshe nga sa deklaronte nënkomisar Nuhu.

PD e konsideroi arrestimin një akt të vonuar, sipas saj i ardhur vetëm pasi nënkomisar Emiljano Nuhu, tashmë në arrati, e bëri publik rastin.

Nga krahu i mazhorancës, peshën publike të reagimit mbrojtës për këtë rast po e mban Kryeministri dhe numri 2 i partisë së tij. Edi Rama e Taulant Balla në dy postime të njëpasnjëshme, akuzuan PD se po bën luftë politike me vajzën viktimë.

Deklaratat mohuese Xhisiela Malokut në studio televizive, të ardhura pas një denoncimi ndaj djalit të deputetit, e ekspertizës mjeko-ligjore të dhunës së konstatuar në trupin e saj, befasuan opinionin publik, që ishte dukshëm në anën e saj si viktimë, e madje një protestë ishte mbajtur para kryeministrisë, për të kërkuar drejtësi në emër të saj.

Në dosjen e prokurorisë ndodhet e dokumentuar me fjalët e saj, një nga rastet flagrante të dhunës që i takon datës 19 korrik.

“Sipas prokurorisë, pasi i ka thyer telefonin, Rexhep Rraja, e ka dërguar në dhomën e hotelit në rrugën e Rinasit. Pasi e ka goditur me shkelma i ka fikur cigaren në trup duke i thënë:  “trego ku do shkosh se do të të vras..ketu”. Referuar dosjes, këto kërcënime i hetuari Rraja i ka vazhduar për pesëmbëdhjetë minuta duke i thënë viktimës “nuk do të të vras, do të të plagos..dua të vuash e jo të vdesësh direkt..”

Edhe me këtë dëshmi në dosje, Gjykata e Krujës la në burg 24 vjecarin Rexhep Rraja për akuzën e përndjekjes, të cilën e mohoi në sallën e gjyqit, duke thënë se kishte patur vetëm një konflikt të momentit me ish të dashurën.

Kryeministri që ndiqte situatën me shumë vëmendje, nuk e vonoi replikën në Twitter. Për të përforcuar qëndrimin se ky rast është një abuzim i PD, paralajmëroi masa ligjore për shpifjen.

Rama ia del ta orientojë vëmendjen drejt mediave, duke i zhvendosur me sukses ndjesitë e publikut për ngjarjen, nga djali i deputetit i paditur për dhunë e i lirë, tek media që e përcjell intensivisht historinë e vajzës.

Por c’ka Rama nuk sqaroi, e bëri Presidenti Meta. Një ditë pas konfirmimit të masës arrest me burg për djalin e deputetit Rraja, konfirmoi se e kishte marrë letrën e nënkomisar Emiljano Nuhut, që denonconte ndërhyrjet e kërcënimet ndaj tij për çështjen ku përfshihej djali i deputetit.

Duhet thënë se çështja e vajzës viktimë të Fushë-Krujës po i reziston traditës së çudisë që zgjat tre ditë. Një tjetër çështje po tentohet të infiltrohet në debatin publik, për të zbehur të parën. Në mbi 4 muaj nga publikimi i atij që njihet si audiopërgjimi i Babales, që implikoi edhe vëllain e ministrit të Brendshëm, është raportuar një maratonë e pashpjeguar për publikun e përcjelljes së materialit për ekspertizë, fillimisht në Itali, e më pas në Britaninë e Madhe, edhe pse vetë Kryeministri, tha se e mori një rezultat brenda 24 orëve.

E kur pikëpyetjet publike rriteshin për mungesën e arrestimit të djalit të deputetit të akuzuar për dhunë, më 26 Shtator rodhi në media se përgjigja e audiopërgjimit nga Britania kishte mbërritur, e po përkthehej.

Përse vallë Km duhej të ishte në dijeni të asaj që do prodhonte ai hetim i prokurorisë së krimeve të rënda? Ky rast flagrant, i shpëtoi panelit që kishte përballë, edhe pse i njëjti kryeministër, pak minuta para asaj deklarate, kishte thënë se ai nuk mund të kishte dijeni për procedurat e prokurorisë së Krujës ku po hetohej djali i deputetit të tij.

Padyshim që ai paralajmërim i Kryeministri, rriti interesin kur prokuroria thirri të premten për të marrë në pyetje për çështjen e audiopërgjimit deputetin demokrat Salianji. U shfaq pa një avokat në krah dhe sqaroi mediat pas dy orësh seancë pyetjesh.

Informacioni hetimor i kryeministrit u vërtetua të shtunën pasdreke. Me kërkesë të Prokurorisë, Gjykata për Krimet e Rënda lëshoi një urdhër arresti për personin që realizoi audiopërgjimin, Albert Veliun, i njohur si “Babalja” për kallëzim të rremë. Kërkesa për masë erdhi pasi akt-ekspertiza britanike konstatoi se audio-përgjimi ishte i montuar, e se në të nuk identifikohet zëri i Geron Xhafajt.

Personi që pretendohej si Geron Xhafaj, dyshohet të jetë Fredi Alizoti, kunati i Albert Veliut. Edhe për të u lëshua një urdhërarresti. Prokuroria akuzon për kallëzim të rremë edhe gazetarin Jetmir Olldashi, e ndaj tij është dhënë masa për detyrim paraqitje. Me tone optimiste erdhi reagimi i Kryeministri, pasi u vërtetua ç’ka kishte paralajmëruar vetë, dy ditë më herët.

/abcnews.al

parlamentti.jpg
G. P.16:25 | 28/07/2018

Rama dhe Basha e mbyllën pa konsenus këtë sesion parlamentar, duke e shtyrë për në Shtator ngërçin në institucionet e drejtësisë. Opozita mori një satisfaksion me mosdekretimin e ligjit për teatrin nga Presidenti. Por paralajmërimi i mazhorancës për ta rivotuar sa më shpejt në Shtator, dëshmon se vjeshta do nisë më temperatura të larta politike, e Gushti do jetë muaji i hartimit të strategjive, po aq sa edhe i pushimeve. Ndjekim takimin e fundit për këtë sezon me Mimoza Koçiun e Politika në ABC News./abcnews.al

POLITIKA-NE-ABC-NEWS-AKROBACI-POLITIKE-VERORE-1280x720.jpg
ent ela15:07 | 14/07/2018

Politika në ABC News na sjell këtë javë lëvizjet e kursyera të aktorëve politikë, në fund të këtij sesioni parlamentar. Sidoqoftë, çështja e Teatrit Kombëtar mund të ketë zhvillime, me futjen në lojë të një aktori të heshtur deri tani, Presidenti Ilir Meta. Detajet na i sjell Mimoza Koçiu në emisionin “Politika në ABC News”. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono