plazh

kune-4-1280x716.jpg
ent ela15:50 | 10/06/2019

Ndotja në Kune të Shëngjinit u ka kushtuar shumë bizneseve dhe gjithë zonës. Aktualisht aty nuk ka pushues, ndërsa ende nuk janë marrë masa për pastrimin.

Mund të jetë nga plazhet e vetme ku s’ka shkelur ende një pushues. Bëhet fjalë për Kunen në Shëngjin. Aroma e rëndë e algave që erdhën këtu disa ditë më parë nga ujërat e Lagunës vazhdon. Kurse në rërë ka mbetje të ndryshme që ka sjellë deti.

Asnjë biznes privat i zonës nuk është hapur. Ata presin ndryshimin e situatës. Problematika përshkon thuajse të gjithë bregdetin e Kunës, rreth 2 km vijë bregdetare.

Autoritetet e Bashkisë thonë se për Kunen duhet të interesohen të gjitha instiutcionet.

Kune ashtu si në sezonin e kaluar u ndot disa ditë më parë. Dyshimet janë se kjo ndodh nga hidrovoret. Ata derdhin në lagune ujërat e grumbulluara prej tyre. Ministria e Turizmit është angazhuar për parandalimin, por vendorët thonë se Ministria e Bujqësisë nuk ka marrë masat e duhura për shmangien e kësaj ngjarje.

Gazetar i ABC News, Lezhë:  Gjergj Figuri

radhe-morine.jpg
G. P.11:26 | 08/06/2019

Me qindra automjete e autobusë të organizuar nga Kosova janë drejtuar për bregdet për të kaluar fundjavat. Lëvizjet e shumta kanë nisur që në orët e para të ditës, ndërsa rreth orës 7:00 është shënuar dhe piku i fluksit të lartë.  Policia Kufitare në Morinë ka punuar me procedurë të përshpejtuar madje në disa raste është shmangur edhe kontrolli rutinë për të mos krijuar radhë e pengesa.

“Duke shfrytëzuar përmirësimin e menjëhershëm të kushteve të motit, qytetarët e Kosovës, nuk kanë denjuar për t’u drejtuar pikës doganore të Morinës dhe pastaj drejt bregdetit të Shqipërisë për të kaluar këtë fundjavë”, raportoi gazetari i ABC News, Bujar Muçmata./ABC News Albania 24/7

vloraa.jpg
G. P.18:27 | 12/05/2019

Vlora ka çelur jo zyrtarisht sezonin turistik për vitin 2019. Me këtë rast ka nisur edhe edicioni i 11-te i “Aulona Fol Festival”. Rreth tetë grupe nga SHBA, Anglia, e vende të tjera janë pjesëmarrëse në këtë edicion.

Bëhet fjalë për më shumë se 85 grupe folklorike nga 25 shtete të ndryshme të botës. Ky koncert dhe aktivitete të tjera festive dhe sportive kanë për qëllim të joshin turistët për të frekuentuar bregdetin e Vlorës.

Pavarësisht se këtë muaj ka patur mot të paqëndrueshëm, vendorët megjithatë kanë nisur të marrin masa për një seson turistik të suksesshëm. Hapja zyrtare e sezonit turistik do të bëhet javën e ardhshme./ABC News Albania 24/7

plazhi-dimer.jpg
G. P.16:58 | 12/05/2019

Bregdeti i Durrësit nuk po frekuentohet as nga vizitorët ditorë. Paqëndrueshmëria e motit ka bërë që plazhi të duket i braktisur njësoj si në dimër.

Ngjashëm me ditë dimri, plazhi i Durrësit është zbrazur nga pushuesit. Maji me mot të paqëndrueshëm ka bërë që bregdetit t’i mungojnë vizitorët prej ditësh. Në plazh vështirë të shohësh pushues. Të vetmit që e shfrytëzojnë për ndonjë shëtitje duket se janë vetë banorët e zonës.

Edhe këta numërohen me gishtat e dorës. Një situatë e pazakontë për muajin që ndodhemi. Ndikuar nga moti i paqëndrueshëm shoqëruar me ulje temperaturash, pushimi në bregdet nuk po shihet si alternativa më e pëlqyeshme.

Krahas vizitorëve plazhit, këtë muaj i kanë munguar edhe investimet. Vija bregdetare nuk është pastruar nga leshterikët. Ndërsa plugimi dhe dezinsektimi i brezit të rërës ende nuk është bërë.

Kjo për shkak të motit të pafavorshëm. Kjo gjendje vonon përgatitjet, duke ndikuar në mbarëvajtjen e sezonit turistik, i cili në këtë periudhë duhet të ishte gati për të pritur pushuesit e parë./ABC News Albania 24/7

vaini.jpg
G. P.15:59 | 18/04/2019

Plazhi i Vainit në Lezhë është nga plazhet më të pastra në vend. Por, aktualisht ai nuk gjendet në hartën turistike të plazheve dhe deri tani frekuentohet nga pushues të rastit.

Mes rrjedhës së Drinit dhe Matit, Vaini është një plazh i virgjër. Me peizazh fantastik dhe ujë të pastër 3 kilometra vijë bregdetare aktualisht nuk shfrytëzohen. E rrethuar nga lagunat Kune, Vain e Tale afron mundësinë për të eksploruar natyrën.

Por t’i referohemi kushteve ambientale  është një plazh elitar. Jo larg zonës ndodhen edhe disa lokale shërbimesh. Për turistet e huaj, Vaini mund të jetë një destinacion krejt ndryshe.

“Është e vërtetë që plazhi i Vainit është një ndër plazhet më të mira në Shqipëri dhe më i pashfrytëzuari që do edhe vëmendjen për tu mirëmbajtur”, tha Pjetër Toni, Drejtor Rajonal i Zonave të Mbrojtura Lezhë.

“Theksoj se këtu numri i pushuesve nuk ëhstë maksimal për faktin që kjo është një zonë e mbrojtur dhe ka një vegjetacion karakteristik dhe i shërben folenizimit të shpendëve”, tha Ardian Laçi, Drejtor i Arsimit, Turizmit, Kulturës e Sportit në bashki.

Çdo kush mund të vendosë një çadër pa u shqetësuar për pronar. Kjo ndërtesë e vjetër është dëshmi për plazhistë të mëhershëm.

Dimri ka ndikuar edhe në këtë plazh. Mbetje të sjella nga deti duhen larguar. Rruga drejt tij është pengesa kryesore për ata që duan të udhëtojnë drejt Vainit. Por ajo nuk mund të asfaltohet. Megjithatë edhe për mirëmbajtje vendorët janë të vonuar.

“Kemi bërë propozimet tona për ta riparuar”, tha Pjetër Toni.

“Në projektet e bashkisë është për t’u mirëmbajtur ajo rrugë dhe për t’u sistemuar në fillim të çdo sezoni turistik me materiale inerte që mundësojnë lëvizjen e lirë të njerëzve, por asnjëherë nuk është menduar asfaltimi sepse është një zonë e mbrojtur”, tha Laçi.

Aktualisht në Lezhë njihen vetëm plazhi i Shëngjinit dhe ai i Tales. Vaini mungon, por vendasit kanë akoma më shumë për të treguar./abcnews.al

shengjin.jpg
G. P.19:14 | 25/03/2019

Në Shëngjin po bëhen përgatitjet e para për sezonin turistik. Aktualisht ka nisur puna për gjelbërimin dhe pastrimin e rërës përgjatë bregdetit. Ndërsa në Durrës, ka shumë pushues që shijojnë diellin dhe temperaturat e larta, në këtë fund Marsi.

Shëngjini do të jetë i gjelbëruar gjatë verës. Në shëtitoren kryesore dhe qendrën e qytetit po mbillen pemë të përshtatshme për zona të tilla. Vëmendje do t’i kushtohet edhe pastrimit të brezit të rërës përgjatë bregdetit. Kryetari i Bashkisë Lezhë garanton se infrastruktura do jetë gati para fillimit të sezonit.

“Ne po bëjmë maksimumin që bashkia të jetë në maksimumin e duhur për përgatitjen e gjithë infrastrukturës për një funksionim sa më të mirë të shërbimeve që duan njerëzit”.

Ndryshime priten edhe në shërbimet që do t’u ofrohen vizitorëve në verë. Ndërsa në Durrës ka nisur plazhi para çeljes së sezonit turistik. Të lahesh në det sa herë moti është me diell për këtë ish sportist mbetet mënyra më e mirë për të mbajtur fizikun në formë.

“Që nga muaji Mars këtu në Durrës e deri në Dhjetor 10 muaj bëhet plazh”.

Fëmijët janë ata që i gëzohen më shumë detit. Ndërsa të rriturit rrezeve të diellit apo shëtitjeve buzë detit./abcnews.al

porto-romano.jpg
G. P.12:43 | 10/03/2019

Një nga plazhet e bukura të Durrësit rrezikon të zhduket për shkak të erozionit. Brenda pak viteve deti ka hyrë rreth 15 metra në brendësi të tokës.

Ky plazh mund të mos ekzistojë më. Dhe Durrësi rrezikon të ketë një hapësirë më pak. Zona turistike e Porto Romanos po shkon drejt degradimit. Erozioni detar ka avancuar drejt tokës disa metra, duke mbuluar nga uji sipërfaqe të madhe toke.

Këtu deti po përparon frikshëm. Në më pak se një dekadë uji ka avancuar drejt tokës me të paktën 15 metra. Gurët e hedhura masivisht në anë rrugës frenojnë dallgët për të mos gërryer më tokë. Por edhe kjo përkohësisht.

Erozioni detar po shkatërron një zonë turistike mjaft të dashur për vendasit. Sipërfaqe të mëdha toke po kthehen në zona ujore. Gjurmët e gërryerjes detare janë të dukshme. Brezi i parë i bunkerëve të ndërtuar në mesin e viteve ‘70 janë zhytur në ujë. Ndërsa i dyti herë pas here mes dallgëve.

Ndryshimet klimatike dhe zhvillimi urban i pa studiuar mbeten disa prej faktorëve që po zhdukin një nga plazhet kryesore të Durrësit./abcnews.al

bregdet-durres.png
G. P.18:05 | 11/11/2018

Shumë pushues në këtë fundjavë kanë shfrytëzuar temperaturat e larta për t’u larë në det. Bregdeti i Durrësit është frekuentuar jo vetëm nga vendasit, por edhe nga të ardhur të tjerë të rretheve dhe të huaj.

Për këta pushues të lahesh në mesin e nëntorit nuk është e pazakontë. Përsa kohë temperaturat e larta të motit për stinën do të zgjasin, ata nuk do t’i ndahen detit dhe notit.

“Ne jemi durrsakë edhe lahemi vazhdimisht. Nuk e di, por sot me 11 Nëntor shumë bukur është, kënaqësi”, tha një pushues.

“Vij me kalamajtë këtu dhe ata futen se janë mësuar, nuk e kanë problem”, u shpreh një tjetër.

Frekuentuesit thonë se janë ditë ideale për t’u futur në det dhe për të marrë rreze dielli.

“Shëtisim në breg të detit. Na duket shumë kohë e bukur dimër që na ka ardhur”, një qytetar.

“Çdo fundjavë dal, pasi kam shtëpinë këtu. Nxjerr gocat edhe vetë argëtohem bashkë me to”, u shpreh një banore e Durrësit.

Durrësi ofron mundësi të shumta për të kaluar një ditë ndryshe. Ndaj dhe fundjava e dytë e nentorit e ka mbipopulluar të gjithë bregdetit. Përgjatë gjithë plazhit vihet re prania pushuesve jo vetëm vendas, por edhe të ardhur nga rrethet e tjera e të huaj./abcnews.al

frekuentues.jpg
G. P.19:11 | 23/09/2018

Plazhi i Divjakës ka joshur më shumë pushues nga qytetet afër tij për të kaluar këto ditë të nxehta. Grupe të organizuara zbarkuan këtë fundjavë në këtë pjesë të bregdetit.

Ditët e plazhit në Shtator për Divjakën janë të rralla, por moti i nxehtë ka rezervuar edhe vjeshtën për pushuesit.

Ata kanë ardhur kryesisht nga Shqipëria e Mesme, Tirana apo Elbasani. Po shfrytëzojnë rrezet e forta të diellit , i cili këtë fundjavë ka ngrohur edhe ujin e detin.

Të gjithë në det për fundjavë. Të organizuar kanë ardhur grupe njerëzish nga qytete të ndryshme të vendit.

Termometri shënon mbi 32 gradë dhe bregdeti është mundësia më e mirë për t’i shpëtuar vapës.

Plazhistët kanë hapësira më të mëdha për të shfrytëzuar në bregdet, rëra dhe uji është më i pastër dhe shërbimet më të lira.

Edhe peshkimi këto ditë po argëton amatorët e këtij sporti. Ujërat në këtë periudhë janë më të pastra dhe hapësirat më të mëdha për të ushtruar peshkimin. /abcnews.al

plazhh.jpg
G. P.14:35 | 21/09/2018

Muaji Shtator është në ditët e fundit të tij, por nga Kosova fluksi i frekuentuesve të bregdetit nuk ka rënë. Edhe këtë të premte mijëra shqiptarë të Kosovës kanë udhëtuar për ta kaluar fundjavën drejt brigjeve.

Moti ka nisur të freskohet në verilindje, por në bregdet është nxehtë. Kjo i ka joshur banorët e Kosovës që edhe këtë të premte kanë udhëtuar drejt Shqipërisë. Shëngjini mbetet një nga destinacionet më komode për ta.

Në doganën e Morinës është po ai fluks i ditëve më të nxehta të sezonit. Orëve të para të ditës pa ka patur radhë, por më pas situata është normalizuar.

“Unë po udhëtoj për në Shëngjin”, tha një udhëtar.

“Pa shkojmë në Banjë në Elbasan”, u shpreh një tjetër.

“Po ikim në Velipojë”, tregoi një pushues.

Tarifa në Rrugën e Kombit nuk e ka kushtëzuar lëvizjen e qytetarëve në dy anët e kufirit. Sipas shifrave në kufi është po ai numër mjetesh që ka qarkulluar para se ajo të vendosej.

Mesatarja e automjeteve që lëvizin nga Kosova drejt Shqipërisë përmes doganës së Morinës është 4000 automjete në ditë. Tashme kjo rrugë është kthyer në domosdoshmëri dhe jo vetëm për të kaluar pushimet, por edhe për pune, tregti,biznes, studime dhe shëndetësi./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono