përgjimet

SHBA-FBI.mpg_snapshot_00.02-1280x720.jpg
ent ela19:29 | 29/08/2019

Ish-drejtori i FBI-së në Shtetet e Bashkuara është kritikuar për shkelje të ligjit pasi ka publikuar informacione sekrete mbi kontaktet e tij me presidentin Donald Trump, kur ky i fundit i kërkonte të mbyllte një hetim mbi një nga këshilltarët e tij.

Ish-drejtori i FBI-së, Xhejms Komej është kritikuar nga Departamenti amerikan i Drejtësisë për rrjedhje të informacioneve mbi ndërveprimet e tij me presidentin Donald Trump. Nga një hetim i realizuar Departamenti i Drejtësisë ka arritur në përfundimin se Komej kishte dështuar në përmbushjen e detyrës së tij për ruajtjen e informacioneve të klasifikuara. Departamenti deklaroi se Komej kishte shkelur rregullat e FBI-së, duke ia dhënë informacionin një miku të tij, që më pas ia kishte përcjellë një gazetari të “Nju Jork Tajms”. Megjithatë, kryeinspektori i Departamentit tha se nuk do të rekomandojë procedimin e Komej për shkeljen e kryer. Xhejms Komej ka qenë një kritik i zëshëm i presidentit Trump, që përpara se ai ta pushonte nga puna në maj të vitit 2017. Një raport i hartuar nga Departamenti i Drejtësisë sugjeron se, Komej i shkeli rregullat pas shkarkimit, duke shpërndarë pjesë të klasifikuara të një memorandumi mbi bisedat e tij me Trump. Ai kishte mbajtur kopje të memorandumit në një kasafortë në shtëpinë e tij dhe nuk kishte informuar FBI-në se kishte bërë një gjë të tillë. Memorandumi thuhet se përmbante bisedën ku Trump i kërkonte Komej të mbyllte hetimet e FBI-së mbi këshilltarin e tij për sigurinë kombëtare, Majkëll Flin. Ky i fundit u shkarkua më vonë për shkak të rolit të tij në kontaktet me zyrtarët rusë dhe u vetëdeklarua fajtor se kishte gënjyer FBI-në për takimet e zhvilluara me ta. /ABC News Albania 24/7

PERGJIMET-VUCIC-ABCM2T1.mpg_snapshot_00.05-1280x720.jpg
ent ela15:38 | 02/08/2019

Një skandal përgjimesh ka përfshirë në ditët e fundit edhe Serbinë. Presidenti Aleksandar Vuçiç ka publikuar dokumente sekrete që tregojnë se ai është përgjuar kur ka qenë në opozitë. Lëvizja e kreut të shtetit është kritikuar nga ish-zyrtarë serbë, me argumentin se cënon sistemin e sigurisë së vendit.

Atë që ndodhë në fqinjësi, prite në shtëpi! Kjo thënie jona e moçme, pas skandaleve të përgjimeve në disa vende të rajonit, përfshirë këtu Maqedoninë e Veriut, Shqipërinë, por edhe Kosovën, është bërë aktuale edhe në Serbinë fqinje. Ka qenë presidenti Aleksandër Vuçiç ai i cili, në një televizion të afërt me regjimin e tij, ka shpalosur dokumente që dëshmojnë se ka qenë i përgjuar për mbi 20 vjet në kohën e veprimit të tij prej opozitari, nga viti 1995 e deri më 2012. Ai, si prove për këtë në televizionin Pink ka cituar raporte zyrtare të klasifikuara si sekret shtetëror, duke përmenduar edhe emra gjykatësish të cilët kishin autorizuar përgjimin, por edhe emra të diplomatëve të huaj, kryesisht nga Franca, Hungaria, Rusia e Shtetet e Bashkuara të Amerikës, me të cilët kishte kontaktuar.

Aleksandër Vuçiç, president i Serbisë: “Ata kanë marrë rusët, amerikanët, hungarezët dhe francezët në mënyrë që të shikojnë tërërsisht politikën time dhe politikën tone edhe ndaj evropianëve, edhe ndaj rajonit, edhe ndaj fuqive të mëdha, Rusisë dhe Amerikës”, vlerësoi Vuçiç duke shpalosur dokumente që në krye mbajnë togfjalëshin ‘Sekret shtetëror”.

Një veprim i këtillë i shefit të shtetit është kritikuar nga ish-zyrtarë, por edhe ekspertë të fushës, të cilët për televizionin N1 thonë se një veprim i këtillë është i palejueshëm, për shkak se, thonë ata, cënojnë sistemin e sigurisë së vendit. Boris Tadiç është ish president i Serbisë, në kohën e të cilit është bërë shumica e përgjimeve:

Boris Tadiç, ish-president i Serbisë: “Zbulon sekrete të shtetit, kryen vepra penale. Shkatërron shërbimin e sigurimit të shtetit dhe themelet e shtetit që janë shërbimet e sigurimit të shtetit, pa të cilat është i pamundur ekzistimi i shteteve”, vlerëson Boris Tadiç duke shtruar pyetje se kush do të mund të punojë në të ardhen në këtë shërbim kur presidenti i shtetit zbulon sekrete shtetërore.

Ekspertët e fushës në Beograd thonë se pëgjimi i diplomatëve të huaj bënë pjesë në atë që cilësohet si ‘përpunim statusor’, ndërkohë që analistët publikimin e dokumenteve me siglën ‘sekret shtetëror’ e shikojnë si përpjekje të presidentit Vuçiç dhe qeverisë së tij për të spostuar vëmendjen nga vala e protestave antiqeveritare që prej muajsh ka mbërthyer qytetet më të mëdha të Serbisë. /ABC News Albania 24/7

matthew-palmer-1280x720.jpg
nev ila19:07 | 28/06/2019

Zëvendës ndihmës sekretari amerikan i Shtetit për Europën, Matthew Palmer ka deklaruar se zgjedhjet lokale në Shqipëri duhet të zhvillohen më 30 qershor. Në një intervistë për VOA, ai u ka bërë thirrje liderëve të opozitës që të distancohen nga dhuna, ndërsa ka nënvizuar se përgjimet e publikuara në gjermanen “Bild” duhet të hetohen seriozisht.

Zëvendës ndihmës sekretari amerikan i Shtetit për Europën, Methju Palmer ka deklaruar se Shtetet e Bashkuara njohin 30 qershorin si datë legjitime për mbajtjen e zgjedhjeve vendore në Shqiperi. Në një intervistë për “Zërin e Amerikës”, Palmer ka theksuar se pas zgjedhjeve do të formohet Gjykata Kushtetuese dhe palët do të mund të adresojnë atje pakënaqësitë e tyre lidhur me procesin.

Ne presim që zgjedhjet të zhvillohen më 30 qershor. Shpresojmë që ato të zhvillohen në mënyrë të qetë e transparente. Pas zgjedhjeve do të formohet Gjykata Kushtetuese dhe shpresojmë që mosmarrëveshjet për kohën e zhvillimit të zgjedhjeve të zgjidhen përmes institucioneve të vendit”, tha Palmer.

Palmer ka theksuar se zgjedhjet do të konsiderohen legjitime nga faktori ndërkombëtar pavarësisht refuzimit të opozitës për të marrë pjesë në to.

“Është një situatë më pak se ideale, që zgjedhjet vendore të zhvillohen pa pjesmarrjen e opozitës, por kjo nuk do të thotë që zgjedhet në vetëvete nuk janë të vlefshme. Njerëzit do të kenë mundësi të dalin për të votuar, për të shprehur mendimin e tyre, askush nuk duhet t’i pengojë për këtë”, tha ai.

Në vijim Palmer ka shprehur shqetësimin e tij për verifikimin e akteve të dhunës gjatë ditës së zgjedhjeve dhe në emër të administratës amerikane i ka bërë thirrje opozitës që të distancohet nga akte të tilla.

“Absolutisht. Dhe u bëjmë thirrje udhëheqësve të opozitës t’ua bëjnë të qartë përkrahësve të tyre që më 30 qershor të mos ketë dhunë, që askush të mos pengojë të drejtën e atyre që dëshirojnë të marrin pjesë në zgjedhje” u shpreh zyrtari amerikan.

Sa u takon përgjimeve të publikuara në revistën gjermane “Bild”, zyrtari i Departamentit të Shtetit ka nënvizuar se ato duhet të hetohen me seriozitet nga institucionet shqiptare.

Këto janë akuza serioze që duhet të hetohen. Ne do të mbështesim një hetim nga institucionet dhe autoritetet shqiptare, një hetim që është profesional, transparent, që të çon drejt një përfundimi. Këto janë akuza shumë serioze, që kërkojnë hetime serioze”, deklaroi ai.

Matthew Palmer ka shtuar më tej se administrata amerikane shpreson që pas 1 korrikut situata në Shqipëri të ndryshojë. Ai ka theksuar se pret që qeveria dhe opozita të ulen në dialog për të realizuar reformën elektorale sipas rekomandimeve të ODIHR-it, gjë që sipas tij do të krijonte kushtet që në të ardhmen zgjedhjet të zhvillohen me mbështetjen e të gjitha palëve./ABC News Albania 24/7

edi-rama-peter-Tiede.jpeg
nev ila19:15 | 25/06/2019

Gazetari gjerman i gazetës Bild, Peter Tiede thotë se kryeministri Edi Rama ka kontraktuar një nga avokatët më të shtrenjtë në Gjermani.

Në fakt avokati i zgjedhur nga kryeministri, Matthias Prinz, për ta përfaqësuar në betejën ligjore kundër gazetarit, Peter Tiede, në një intervistë në vitin 2016 për të përditshmen welt.de, ka konfirmuar se pagesa për 1 orë pune, në studion e tij ligjore, kushton 750 euro/ora,  (kliko këtu për artikullin) një shifër goxha e majme për xhepat e shqiptarëve.

Matthias Prinz është një nga avokatët më me prestigj, bashkë me studion e tij ligjore në Hamburg të Gjermanisë.

Edhe vetë Tiede i është kundërpërgjigjur kryeministrit Rama në lidhje me padinë e ngritur. Me një status në rrjetet sociale, Tiede shkruan se:

Oh, zoti Rama … Çmenduri: Kryeministri i Shqipërisë Rama dëshiron të më padisë mua. Ai tashmë ka të paktën një avokat – në fund të fundit, një nga ato më të shtrenjtët në Gjermani … por ai nuk ka më shumë …”.

Kryeministri Rama ditën e sotme njoftoi se i ka dhënë prokurën avokatit gjerman Matthias Prinz, për nisjen e procesit gjyqësor mbi publikimet e BILD.

Ajo që nuk dihet ende është se, cili është objekti i padisë që ka inicuar kryeministri Rama kundër Peter Tiede gazetarit të BILD, i cili publikoi audio-përgjime nga dosjet “339” dhe “184”, të cilat janë ende nën hetim.

Mbetet për tu parë, nëse kjo është një betejë mes qeverisë shqiptare dhe gazetarit gjerman, apo një betejë personale e kryeministrit Rama kundër Peter Tiede./abcnews.al

protesta-tetove-1280x726.jpg
nev ila16:55 | 24/06/2019

Pas publikimit të bisedave të përgjuara nga El Cheka, janë zhvilluar protesta në Tetovë kundër drejtuesve të BDI-së. Marshi filloi nga Universiteti i Tetovës, por protestuesit nuk u lejuan nga policia që të protestojnë para selisë së BDI-së. Numrin e vogël të protestuesve, organizatorët e arysetuan me presionet.

Kështu u pritën protestuesit që ishin nisur për të selia e BDI-së për të shprehur revoltën e tyre ndaj regjimit, sic thonë ata diktatorial, të partive në pushtet, e sidomos BDI-së që në bombat e fundit të publikuara nga El Cheka, dëgjohen  funksionarë të kësaj partie.

Edhe pse tentuan të bindin policinë t`ju hapin rrugën, një gjë e tillë nuk ndodhi. Blerim Ahmedi, në cilësinë e organizatorit, njëherësh vëllai i Sheqerim Ahmedit i njohur si “El-Cheka”, i cili publikon përgjimet, tha se kjo revoltë erdhi si pasojë e shumë rasteve të montuara ndaj shqiptarëve, ndërsa kërkoi zbardhjen e tyre.

Protesta është përkrahur edhe nga shoqata “Agimi” e Shqipërisë.

Protesta perfundoi e qetë dhe nuk u regjistrua ndonjë incident. Ndërkaq kjo nuk do të jetë protesta e fundit u zotuan organizatorët. Para fillimit të protestës njëri nga organizatorët Blerim Ahmedi kishte thënë se është kërcënuar nga policia, ku siç shprehet, i është thënë që protesta të mbahet në Kërçovë e jo në Tetovë.

krimet-1.jpg
ent ela10:51 | 24/06/2019

Prokuroria për Krime të Rënda ka marrë në pyetje Drejtorin e Hekurudhave në Durrës, Ani Dyrmishi, në kuadër të dosjes 339 emri i të cilit u përmend në njërin nga përgjimet e publikuara nga e përditshmja gjermane Bild.

Në përgjimet e publikuara, Dyrmishi zbulohet teksa fliste me Astrit Avdylin, ish i dënuar për vrasje. Biseda me Astrit Avdylin është bërë në kohën kur Ani Dyrmishi mbante postin e Drejtorit të Hipotekës në qytetin e Durrësit.

Burime thanë për Abc News se Dyrmishi e ka mohuar të ketë lidhje me Avdylin. Po ashtu, prokurorët e dosjes 339 kanë marrë edhe dëshminë e deputetit të PS, Ilir Ndraxhi, emri i të cilit lakohet gjithashtu në përgjimet e publikuara nga Bild.

Deputeti Ndraxhi i pyetur nga Abc News u shpreh se ka shpjeguar pozicionin e tij, ndërsa shtoi se nuk është në dijeni të bisedave  që ka bërë Astrit Avdyli.

“I mohoj akuzat në mënyrë kategorike unë kam asnjë lidhje me këtë person”, është shprehur Ndraxhi ndërsa në përgjime rezulton se vëllai i deputetit flet në telefon me Astrit Avdylin, ku ky i fundit e siguron se Ilir Ndraxhi do të jetë pjesë e listave të PS.

Në pyetje janë marrë edhe zyrtarë të tjerë lokalë, emri i të cilëve përmendet në dosjen 339./ABC News Albania 24/7

politika-abcnews-1280x720.jpg
nev ila20:06 | 22/06/2019

Protesta e 9 kombëtare e opozitës ishte ngjarja që kulmoi zhvillimet politike të javës që lamë pas. Më numerikja e protestave 4 mujore, spikati simbolikat e mesazhet e forta, e pa asnjë incident. E mbyllur nga Basha pas dy orësh, mesazhet evidentonin 26 përgjimet e reja të publikuara nga gazeta gjermane Bild brenda tre ditësh javën politike që lamë pas, pjesë e dosjes 184 për dyshimet e shitblerjes së votave në Dibër.

Në përgjimet e publikuara edhe KM, ministra, deputetë, drejtues policie e arsimi e eksponentë lokalë, të angazhuar në funksion të rezultatit të PS. Reagimi i mazhorancës ishte mohues si çdo here, ndërsa prokuroria njoftoi hetimin e radhës për nxjerrje sekreti hetimor. Në terren pati përplasje në bashkitë që drejtohen nga opozita, që nuk lejojnë punën përgatitore të zgjedhjeve, pasi njohin dekretin e presidentit që anuloi 30 qershorin.

Mes të arrestuarve edhe ish deputeti i Shkodrës Bardh Spahia. Në këtë panoramë KM vijoi të insistojë se zgjedhjet do mbahen në 30 qershor.

Po çfarë ndodhi javën politike që lamë pas?

I pari nga 16 përgjimet e publikuara të hënën e 17 qershorit nga Bild, pjesë e dosjes 184 të prokurorisë për zgjedhjet në Dibër,i takonte vetë KM, në një komunikim me një drejtor në MB, Arben Keshi, rezultatin e impenjimit të socialistëve në Dibër.

Edi Rama, kryeministër: Po ata maskarenjtë, kishin bërë presione mbrëmë e?

Arben Keshi, drejtor në Ministrinë e Brendshme: Po deshën të më kapnin mua, punë dy minutash sa u futa tek shtabi sepse ishin duke më pritur tek hoteli ku fleja.

Edi Rama, kryeministër: Çfarë do të bënin ty ata?

Arben Keshi, drejtor në Ministrinë e Brendshme: Ishin 50 veta. Asgjë besoj, këtë pjesën e presionit mendoj, jo kështu jo ashtu. Ai është legen ai, Flamur Noka.

Edi Rama, kryeministër: Po ku ta del dot ty Flamur Noka mo!

Arben Keshi, drejtor në Ministrinë e Brendshme: Edhe djali sa doli më la mua, ata kujtuan se isha edhe unë në makinë. Rreth 50 veta. Jo se i bënë ndonjë gjë, sa e goditën. Ai iku dhe ata nuk e kapën dot.

Edi Rama, kryeministër: Më mirë mo, hajt se ç’i do sherret. Dëgjo, po ti mendon se e kemi realizuar objektivin?

Arben Keshi, drejtor në Ministrinë e Brendshme: Po këtu tek unë po. Mund të lëvizë me më pak më shumë. Nga ato që na kanë thënë komisionerët kemi pritshmëri të mëdha.

Edi Rama, kryeministër: Komisionerët i ke pasur top e?

Arben Keshi, drejtor në Ministrinë e Brendshme: Po po në rregull.

Edi Rama, kryeministër: Okay, mirë vllai, hajt ciao.

Drejtori i ministrisë së Brendshme shfaqet sipas përgjimeve, në rolin e koordinatorit që u kujton drejtuesve vendorë si të marrin votat për PS.

Arben Keshi, drejtor në MB: vallai merri në telefon një nga një. Ditën e hënë keni me shku për lesh. Merri të gjithë drejtorët në telefon një nga një, të të raportojnë një nga një, që kanë marrë në telefon. Merri njëherë se janë duke fjet gjumë, përveçse me Gëzimin dhe Arjanin me asnjë s’kam fol.

Drejtori rajonal i arsimit Drini Gjeci: Mirë, po ça të marrë unë ata, Haxhiqimes ca ti them unë…

Arben Keshi, drejtor në MB: Merri të gjithë me gra e me burra, ça të jenë. Do t’ja kujtoni një më një të gjithë mësuesve që keni pru atje. Nëse nuk duan, p*dh somës të shkojnë se po ja u q* robt…

Drejtori rajonal i arsimit Drini Gjeci: Çke ti se po i marr unë tani në telefon.

Nga ana e tij drejtori i arsimit e përcjell tek vartësit

Drejtori rajonal i arsimit Drini Gjeçi: Po pse more Lavdrim nuk ke votuar akoma?

Lavdrim Murati: Nuk kam votuar se të lirohet një herë radha.

Drejtori rajonal i arsimit Drini Gjeçi: Çfarë radhe?

Lavdrim Murati: Radha or ti.

Drejtori rajonal i arsimit Drini Gjeçi: Lavdrim të mos kemi llafe, votat i dua haptaz atje. Mos të kemi llafe më.

Lavdrim Murati: Ça flet o Drejtor?

Drejtori rajonal i arsimit Drini Gjeçi: Mos të pres më tej. Vota sa ke ti dua.

Lavdrim Murati: Më vjen keq.Të paskan sinjalizuar gabim.

Drejtori rajonal i arsimit Drini Gjeçi: Këtë llaf po të them.Ti e di vetë.

Lavdrim Murati: Në rregull.

Të njëjtën kujtesë paralajmëruese dëgjohet ta japë edhe deputeti i kohës Pjerin Ndreu, sot kandidat për kryetar bashkie në Lezhë, një drejtori shkolle.

Pjerin Ndreu, deputet i PS: Bëji një telefonon Drejtorit të Shkollës Reshat Elezi nga Reçi. Drejtorit të Shkollës thuaji të deklarojë votën hapur për PS-në se këto sms-të që çon lart e poshtë nuk janë fort të këndshme. Drejtorit thuaji të deklarojë votën, dhe thuaji se ku përfundon ditën e hënë.

Drejtori rajonal i arsimit Drini Gjeci: Reshat Elezaj?

Pjerin Ndreu, deputet i PS: Po

Drejtori rajonal i arsimit Drini Gjeci: Flas unë tani me të

Pjerin Ndreu, deputet i PS: Tregoi se ku fluturon të hënë. Deklaroje votën haur thuaji nëse se deklaron hapu, gjej vend dhe futu.

Drejtori rajonal i arsimit Drini Gjeci: Mos u mërzit se e rregulloj unë këtë punë.

Drejtori Arben Keshi dëgjohet në një tjetër audio-përgjim, t’i raportojë drejtuesit politik të PS, ministrit Damian Gjiknuri, që nga ana e tij thotë se do i dërgojë disa djem problematikë që t’i ketë për çdo rast.

Arben Keshi, drejtor në MB: Po duhet të vijnë këto deputetët tonë, se kanë ardh ato të PD

Ministri Damian Gjiknuri: Tani do vijnë ato se siç duket fjetën i cik se kanë qenë notën aty, tani do të vijnë

Arben Keshi, drejtor në MB: Unë skam fjet fare

Ministri Damian Gjiknuri: E di e di, tani janë zgjuar ata dhe do të vijnë

Arben Keshi, drejtor në MB: Po të vijnë të dalin nëpër qendra

Ministri Damian Gjiknuri: natyrisht

Arben Keshi, drejtor në MB: Tani vëzhguesit e atij janë të gjithë nga rrethet askush si njef

Ministri Damian Gjiknuri: E di e di, ashtu i kanë sjellë edhe atë, skanë besim te ata të vetët. Po të çoj edhe ca çuna ti kesh aty, një furgon ta kesh aty.

Arben Keshi, drejtor në MB: Mirë

Ministri Damian Gjiknuri: i çova unë ca që të rrijnë aty, të rrijnë te shtabi jot, ti kesh për çdo rast, por mos dalin se janë edhe tipa problematikë po gjithsesi të jenë aty për çdo rast.

Arben Keshi, drejtor në MB: Mirë

Drejtori i Ministrisë së Brendshme shfaqet në dy komunikime me shefin e komisariatit të Kamzës, i shqetësuar për qytetarët nga Kamza, që do shkojnë të votojnë në Dibër, 450 njerëz të nisur me fugon nga kryetari demokrat i bashkisë Kamëz.

Arben Keshi, drejtor në MB: A erdhët shumë kendej mo

Sali Skura, shef policie, Kamëz: Eh?

Arben Keshi, drejtor në MB: A erdhët shumë me autobusë mbrëmë.

Sali Skura, shef policie, Kamëz: Jo jo, Nja 7 autobusë i bllokuam

Arben Keshi, drejtor në MB: I bllokuat eh

Sali Skura, shef policie, Kamëz: Po i futëm në listë bllokimi . Të tjerët e anulluan me miqësi e kështu

Arben Keshi, drejtor në MB: Shumë mirë

Sali Skura, shef policie, Kamëz: Mirë vëlla, me kujdes vëlla. Hajd me fitore

Arben Keshi, drejtor në MB: Rrofsh. Faleminderit

Gjiknuri del edhe në një tjetër bisedë, teksa sipas Bild, i kërkon informacion një biznesmeni se kush po merret me transportin e parave në një komunë të Dibrës.

Biznesmeni Bekim Krashi: Po shef

Ministri Damian Gjiknuri: Bekim. Kush ka qenë dje tek komuna juaj që ka mbuluar atë pjesën e transportit (para). Ju edhe jeni shteti.

Biznesmeni Bekim Krashi: Në fakt ne nuk jemi shumë shtet atje. Por unë njoh ca zona që i kam lajmëruar

Ministri Damian Gjiknuri: Po mirë, merre listën, merr ato gjënat dhe kërko mbështetje

Biznesmeni Bekim Krashi: E mirë po marr listën edhe po vij atje….                                  

Në përgjime dëgjohet i njëjti biznesmen në biseda mbi çmimin që i vendoset votës

 0686795208: Tre vota ka Haliti, edhe dy vota ka Fiqiri Basha

Biznesmeni Bekim Krashi: 5

0686795208: Eeee

Biznesmeni Bekim Krashi: T’u japim ndonjë 40 mijë leksh, 50 mijë leksh?

0686795208: 50 mijë lekë për dy vota?

Biznesmeni Bekim Krashi: Jo mo jo, nga një 40 çe apo 30 çe për kokë

0686795208: 40 për votë ëëëë?

Biznesmeni Bekim Krashi: 100 mijë lekshin ia japim atij që ka tre

0686795208: Po, 100 mij ëlekë, po atij që ka dy vota?

Biznesmeni Bekim Krashi: Atij ti japim jnë 60-70 mijë leksh

0686795208: Naimi i ka thënë 50 më thotë, më thotë ai Fiqiriu, dmth ti japim edhe 20 të tjera plus

Biznesmeni Bekim Krashi: Ata e kanë pasur shumë, por nëse i ka dhënë 20 ti japë edh e20

0686795208: Po shihe se më duket janë duke abuzuar me punë leksh o Bekim

Biznesmeni Bekim Krashi: O zotni mos më thuj më në telefon, më çmene, se se përgjohet ooo

Drejtori Keshi vlerësohet për rolin e tij, e këtë ia thotë deputeti socialist i kohës Artan Gaci, bashkëshort i ministres Olta Xhacka

P2: Artan Gaçi, deputet: E ja qëndrova me shefin e madhi (Edi Ramën) dhe me superlativa për ty

Arben Keshi, drejtor në MB: Faleminderit

Artan Gaçi, deputet: Nga ai nga ai, unë po e po

Arben Keshi, drejtor në MB: Inshallah bëhen realitet se ngela kështu u bë 3 vjet.

Artan Gaçi, deputet: Jo jo, ka vlerësim të jashtëzakonshëm për të gjithë. Në të gjithë Maqellarën ai është personi. Është tha e ka kopsit, e ka bo tha, komplet gjithë gjërat. Edhe në 2011 fitojë tha po dolën para me 1 kuti.

Arben Keshi, drejtor në MB: Hajde mo, ashtu është

Artan Gaçi, deputet: Është merita e Benit komplet, i thashë

Arben Keshi, drejtor në MB: Rrofsh, faleminderit

Kryeministri njoftoi se do padiste gazetarin Peter Tiede në gjykatat gjermane, e ky i fundit replikoi në FB. Njëlloj si pas çdo publikim përgjimi, krimet e rënda njoftuan nisjen e hetimit tëri, i treti për nxjerrje të sekretit hetimor, e këtë herë edhe verifikim të autenticitetit të përgjimeve, e duke nënvizuar se kjo situatë e paprecedentë ka cenuar rëndë imazhin e organeve të hetimit.

Rama: unë ato biseda i bëj prapë e skam asnjë…biseda për fushatën komisionerët…

Lulzim Basha i sheh si provën se opozita ka marrë vendimin e duhur me braktisjen e Kuvendit

Basha: Ata që besonin se me këtë bandë grabitqare dhe kriminale në pushtet mund të dialogohej në Kuvend, mund të bëheshin reforma me konsensus, mund të përdoreshin rrugë institucionale, sot duhet të flakin tutje edhe iluzionin e fundit, që mund të kishin për metodën e bashkëbisedimit demokratik me Edi Ramën. Sot është e qartë se largimi nga parlamenti dhe braktisja e zgjedhjeve farsë ishin vendimet e duhura. Pa asnjë mëdyshje.

Me radhë reaguan në rrjetet sociale, ish ministri Damian Gjiknuri, deputeti i komisionit të sigurisë Xhemal Qefalia, ish deputeti Pjerin Ndreu e ish ministri Saimir Tahiri. I konsiderojnë bisedat jo në shkelje të ligjit, e inkurajojnë hetimin, duke kërkuar ndjesë për gjuhën, që u shfaq në publik.

Por kush u thirr nga prokuroria ishte Lulzim Basha, për çështjen e lobimit në SHBA. Pasi nuk u paraqit të hënën, me argumentin teknik se në fletëthirrje nuk ishin prezantuar faktet, L. Basha u paraqit dy ditë më vonë, pas thirrjes së re e paralajmërimit se do merrej me forcë. Pas 30 minuta komunikim me prokurorët, u tha mediave se nuk kishte prova për çështjen për të cilën hetohet, e se thirrjet e tij të përsëritura në prokurori janë për efekt politik

Basha: Herën e parë kam qenë kur plasi skandali i Sajmir Tahirit.Herën e dytë më thirrën, kur plasi skandali i Geron Xhafës.Herën e tretë më thirrën, kur plasi skandali i Rrahman Rrajes dhe i Taulant Ballës.Herën e katërt më thirrën, kur plasi skandali i Vangjush Dakos. Në mos gabohem, edhe për skandalin e “Toyota Yaris”Kjo është hera e pestë. Sa herë që plasin skandalet e kësaj qeverie të lidhur me krimin, këta riaktivizojnë një dosje ku nuk ka asnjë fakt, asnjë prove, për një arsye të thjeshtë, është montuar në zyrën e Edi Ramës për llogari të Edi Ramës.

Disa orë më vonë në të njëjtën ditë, gazeta gjermane Bild publikoi 10 përgjime të tjera, sërish pjesë e dosjes hetimore 184 tëzgjedhjeve të 2016 në bashkinë e Dibrës. Protagonistë sërish, eksponentë vendorë si dhe ministra e deputetë socialistë. I pari drejtuesi politik I fushatës socialiste, ministri i kohës Damian Gjinkuri, që vlerëson angazhimin e shefit lokal të policisë Robert Aga në rezultatin e PS në Dibër, e vetëkomisari teksa sigurohet me biznesmenin Bekim Krashi për arritjen e rezultatit të synuar.

Bekim Krashi, biznesmen: Ça keni bë, ça keni bë se e keni myt fare. Nuk keni lënë asgjë. Plus kudo jeni, vetëm tek ne jeni minus 10 (vota). Do t’i nxjerr të dhënat dhe do t’i dërgoj me letër pastaj.

Robert Aga, shef i policisë Dibër: Dua të kemi 1000 plus, poshtë 1000 nuk i pranoj.

Bekim Krashi, biznesmen: Aaaa ca llafos, ke filluar ke pretendime të mëdhaja

Robert Aga, shef i policisë Dibër: Ejjj

Bekim Krashi, biznesmen: Hë

Robert Aga, shef i policisë Dibër: O shpirt i vëllait , ti kujtoje se ata (opozita) ishin budallenj që bënin si të tillë

Bekim Krashi, biznesmen: Po prandaj deshin të bënin rrëmujë ata, se i dishin këto gjëra. Mos u lodhni fare. Janë të humbur këta.

Robert Aga, shef i policisë Dibër: O shpirt i vëllait, ajo strategjia ime funksionon

Bekim Krashi, biznesmen: E di mor e di që e deklaruar. Ti je një komisar politik or ti.

Robert Aga, shef i policisë Dibër: Hej. A e ke Damian Gjiknurin aty??

Bekim Krashi, biznesmen: Do të ta kaloj në telefon.

Robert Aga, shef i policisë Dibër: Jepja pak.

Robert Aga, shef i policisë Dibër: O shef (i flet ministrit Gjiknuri)

Damian Gjiknuri, ministër: Hë Berto

Robert Aga, shef i policisë Dibër: Mirëmbrëma

Damian Gjiknuri, ministër: Hë mo ça bën

Robert Aga, shef i policisë Dibër: Si je?

Damian Gjiknuri, ministër: Mirë! Tullë! Mirë fare.

Robert Aga, shef i policisë Dibër: Se nuk pate besim tek unë

Damian Gjiknuri, ministër: Tërmet! Tërmet! Je njësh. E the hahahah. Ik mos fol shumë.

Shefi i komisariatit të Dibrës shfaqet në përgjimet e publikuara nga Bild, edhe në komunikim me deputetë të tjerë socialistë e ministrin e vet, me vlerësime ndaj tij, por edhe ide se ku tjetër mund të përdoret në të ardhmen.

Robert Aga, shef i policisë Dibër: Unë jam pjesë e PS-së dhe nuk e ndërroj as për 1 milion vjet.

Xhemal Qefalia, deputet i PS: Nuk e vë në dyshim mo vlla, prandaj e thashë unë atë mbrëmë, ishin të gjithë grupi i PS, ’ë besonin më.

…..Xhemal Qefalia, deputet i PS: Ishte dhe Gramozi aty, ishte edhe Rama, ishin të gjithë dhe ra muhabeti jot, foli shumë mirë dhe Damiani në fakt dhe Blerina …u thashë që ai mund të bëjë shumë ty. I thashë edhe atij Ulsiut që ta përforconte, që të mos kishte kundërshtim. U thashë mu më bën punë edhe në Tiranë ai, puna është që kudo që është ai i jep drejtim. 

Xhemal Qefalia, deputet i PS: Jam në një tavolinë kështu…Ku ke qejf me shku ti, në Bulqizë?

Robert Aga, shef i komisariatit Dibër: Po.

Xhemal Qefalia, deputet i PS: Ok hajt ciao.

Robert Aga, shef i komisariatit Dibër: Kush thotë?

Xhemal Qefalia, deputet i PS: Jam këtu me Kryeministrin dhe me ministra.

Robert Aga, shef i komisariatit Dibër: Jo jo, unë të garantoj t’ju japë çfarë t’ju dojë qejfi.

Xhemal Qefalia, deputet i PS: Që mos biem atë Keshin aty, si thua?

Robert Aga, shef i komisariatit Dibër: Mirë.

Xhemal Qefalia, deputet i PS: Hajt se jemi këtu bashkë. Për kokë tate po. A do foto ta dërgoj?

Robert Aga, shef i komisariatit Dibër: Do jesh me ndonjë dashnore…

Xhemal Qefalia, deputet i PS: Ja ta qis çik ministrin, foli se më çave bythën, foli. Saimir foli çik këtij shefit të komisariatit .

Saimir Tahiri, Ministër i Brendshëm: Alo o Berto!

Robert Aga, shef i komisariatit Dibër: Mirëmbrëma.

Saimir Tahiri, Ministër i Brendshëm: Si je? Nuk shkon kjo punë që më jep Xhemali telefonin që të të falenderoj unë. Nuk shkon kjo.

Robert Aga, shef i komisariatit Dibër: Jo të lutem.

Saimir Tahiri, Ministër i Brendshëm: Nga pikëpamja institucionale nuk shkon.

Robert Aga, shef i komisariatit Dibër: Sinqerisht më ka gënjyer.

Saimir Tahiri, Ministër i Brendshëm: Megjithatë faleminderit shumë për angazhimin, je i madh.

Robert Aga, shef i komisariatit Dibër: E kam detyrim.

Saimir Tahiri, Ministër i Brendshëm: Je i madh. Edhe mos e rruj k** për atë që thanë ata se s’na ha trapi ne për ata legenat…

Robert Aga, shef i komisariatit Dibër: Unë jam ushtari jot…

Xhemal Qefalia, deputet i PS: Të fala edhe nga Ulsiu. Foli dhe çik Ulsiut.

Ulsi Manja, deputeti i PS: Ku je mo vlla.

Robert Aga, shef i komisariatit Dibër: Ç’bëni mo.

Ulsi Manja, deputeti i PS: Hiç ja me Kryeministrin.

Robert Aga, shef i komisariatit Dibër: Mua më duhet me shku pak atje..

Ulsi Manja, deputeti i PS: Ku more?

Robert Aga, shef i komisariatit Dibër: Në Bulqizë, po u ndërru.

Ulsi Manja, deputeti i PS: Ne themi të shkosh për më nalt o burrë…

Robert Aga, shef i komisariatit Dibër: Mirë mo mirë, ju e dini tashi, po..

Ulsi Manja, deputeti i PS: Tani a do më dëgjosh mu…Bisedo me Xhemalin se këtë e kam si shefin e Komisionit të Sigurisë. Ne e bëjmë llafin të vish për më nalt se na duhesh për ndonjë gjë më të madhe, se mua më duken gjëra të vogla ato o miku im.

…..Xhemal Qefalia, deputet i PS: Hajde se më çave trapin.

Robert Aga, shef i komisariatit Dibër: Po si o ma nxjerr ministri ashtu në telefon, o koqe.

Xhemal Qefalia, deputet i PS: Po je shoku im ti, mos më çaj k*** mu. A do të qis Ramën, ti folësh Ramës?

Robert Aga, shef i komisariatit Dibër: Po leje o vlla tashi.

Në përgjime del në komunikim me ministrin e kohës Gjiknuri edhe Ymer Lala, që gazeta Bild e cilëson si bos i krimit.

Ymer Lala: Hë mor zotëri.

Ministri Damian Gjiknuri: Tërmet, tërmet! Obob, Tërmet i q…nanën.

Ymer Lala: Çfarë kemi bërë ne të dy.

Ministri Damian Gjiknuri: Tërmet!

Ymer Lala: Po më shkruante ai robi. I thashë unë a po fle gjumë. Jo mor tha s’po më zë gjumi, jam habit me Selishtën dhe Luzninë (dy fshatra në Dibër). I thashë s’e paske njohur Damian Gjiknurin dhe mua nga afër.

Ministri Damian Gjiknuri: hahahha Tërmet, tërmet!

Ymer Lala: Hajde, se mbaroi.

Ministri Damian Gjiknuri: I q…robtë. Doli llafi jot. Doli llafi jot me 1 mijë vota plus.

Ymer Lala: Me gjithë mend nuk më paske njohur nga afër.

Ministri Damian Gjiknuri: Edhe ti mua, edhe unë ty. Hahaha. Hajde vëlla çiao

Në kohën mes e pas publikimit të dy blloqeve me audio-përgjime, tensioni politik në vend u rrit, kur bashkitë e drejtuara nga opozita i kërkuan zyrtarisht KQZ, lirimin e ambienteve të tyre nga materialet zgjedhore, bazuar në dekretin e presidentit që anulonte 30 qershorin. (efekt qytetet) Përplasja mes policisë së shtetit që mbronte ambientet zgjedhore vendore e policive bashkiake, që zbatonin urdhrin për lirimin e tyre, të mbështetur nga simpatizantë të opozitës, ishin pamjet që të gjithë i pamë nga shumë qytete të vendit, mes tyre edhe djegia e materialeve zgjedhore në Shkodër e Kukës. Arrestime e shpallje në kërkim, sic ishte paralajmëruar edhe nga ministri i brendshëm për përdorim force ndaj zgjedhjeve. Spikati mes zërave kundër dhunës, një nga emrat më influentë të historisë së PD, Jozefina Topalli.

“Djegia e shkolles nuk eshte historia e Shkodres.E kunderta eshte historia e ketij qyteti.Kjo nuk ka ndodhur kurre ne 3 dekada.Nje demokrat nuk djeg as mandate as shkolla. Nje democrat i vertete nuk hedh as molotov as ka frike nga zgjedhjet.Demokratet nuk kane patur frike ne ’97, kur gjysma e territorit kontrollohej nga bandat. Nuk largohet Rama duke refuzuar parimet e vlerat e democracise. Partia Demokratike lindi si enderr e lirise dhe e te drejtes me votu.Ai qe mendon se do pengoje te drejten e votes, nuk eshte demokrat.Shqiptaret duan paqe.3 milion shqiptare nuk mund te mbeten gjate peng te 4-5 veteve”.

PD heshti, qëndrimi i Topallit u bë objekt bisede, në strategjinë e re të komunikimit të Kryeministrit, kafen elektorale

Kryeministri nuk përmend Topallin, por ish deputetin e Shkodrës Bardh Spahia, që një ditë më parë ishte tek shkolla “Shejnaze Juka”, ku iu vu flaka materialeve të qendrës zgjedhore.

Rama: ….ai doktori i vogël i Shkodrës në kërkim

Ish deputeti u arrestua atë mbrëmje, teksa po shkonte në një intervistë në TCH Spahia u ndalua me dyshimet për nxitje dhune në KZAZ e shkollës Shejnaze Juka.

Kryeministri nuk e ka të vështirë orientimin e vëmendjes tek sjellja e opozitës, njëlloj si argumentin për përgjimet e publikuara nga Bild. Të enjten e seancës plenare të parët ishin deputetët socialistë

Pak më vonë, Rama e përforcoi nxjerrjen e përgjimeve, si aksion të opozitës ndaj mazhorancës.

Rama: Përgjime të pahetuara, por të mbyllura në kasafortë. Gjetja e vendit pikërisht në Gjermani, kalendari i daljes së përgjimeve aspak çuditërisht i përputhur me kalendarin e protestave flasin vetë. Çdo bisedë edhe ajo më e zakonshmja tingëllon ndryshe kur del nga konteksti dhe ekspozohet

Në të njëjtën seancë Arta Marku pohoi se në tre vjet nuk ka patur hetim, por pas caktimit të prokurorëve të tjerë një vit e gjysmë më parë, ka ardhur koha për konkluzione.

Marku: Janë regjistruar më 2016 të dyja, të vetmet veprime deri në fund të 2018 ishin përgjimet, ka pas vetë transkripte. Në fund të 2017 u përcaktuan prokurorë të tjerë…u transkriptuan të gjitha CD janë dërguar për gjykim…. Këto çështje duhen zgjidhur, ka ardhur momenti.

Fokusi i Kryeminisrit duket tek mbajtja e zgjedhjeve me çdo kusht në 30 qershor. Zgjodhi të shkonte në Shkodër, aty ku rezistenca duket më e forte, për shkak të marrëdhënies së njohur të tensionuar me kryebashkiaken Voltana Ademi. Kjo e fundit njoftoi se nuk i jepte leje PS e Kryeministrit, që të mbanin takim elektoral në ambient publik, bazuar në dekretin presidencial të anulimit të zgjedhjeve. Rama e ironizoi nga parlamenti bashkë me presidentin.

Rama: Mbase plani është për të përsëritur 2 prillin sot pasdite. Ky është edhe rezultati i përfshirjes skandaloze të atij që sot është në zyrën e Presidentit, por që e ka humbur të drejtën të jetë në atë zyrë. 30 qershori do të jetë dita e zgjedhjeve, duan apo s’duan.

Pasditen e të enjtes në Shkodër pati një takim elektoral të KM në pedonalen kryesore të qytetit, e një protestë të drejtuar nga kryebashkiakia Ademi. Forca të shumta policore mbajtën protestuesit larg vendit ku kryeministri mbante takimin, e nuk mungoi as gazi lotsjellës

Vetë Rama kujdesej të nënvizonte se ligji do vepronte ndaj kujtdo, që ndiqte kauzën e opozitës për të penguar zgjedhjet e 30 qershorit. Në Shkodër konfirmoi ambicien edhe për të thyer traditën 30 vjeçare, gjatë së cilës, socialistët nuk kanë fituar asnjëherë bashkinë

Rama: A ia vlen të mos flesh në shtëpi se janë o më budallenjtë o më të siqertët që shkojnë pas tyre…e pasi të dalësh nga brenda të mos dalësh jashtë shtetit…Shkodra misioni im i 4 viteve të ardhshme

Të nesërmen përmes kafes elektorale fajësoi Ilir Metën, aleatin e dikurshëm, që tani e quan personazh kompleks

Ndërkohë komisioni parlamentar i ligjeve miratoi ngritjen e komisionit hetimor për shkarkimin e presidentit, ndërsa Meta nënvizoi tre herë problematika publikisht. Kërkoi vëmendje pas paralajmërimit të euro-komisionerit Avramopulos për rikthimin e vizave nëse Shqipëria nuk kontrollon emigrimin e paligjshëm, foli për informacione për të burgosur problematikë që mund të dalin me leje në këtë situatë e më tej i drejtoi një tjetër kërkesë KQZ mënyrën se si është bërë zëvendësimi i deputetëve që dogjën mandatet, një aludim i ri për shpërndarje të parlamentit. Shigjetimeve virtuale ndaj deklaratave të Metës, të enjten u dha zë.

Një tjetër replikë pati të premten mes km që insiston të shkojë edhe i vetëm në zgjedhje, e presidentit që flet për cenim të pluralizmit politik: Madje Meta i shkroi edhe OSBE në Vjenë, kryesuesit të radhës Lajcak, duke e njoftuar se mosrespektimi i dekretit të tij përkeqëson krizën politike në vend.

Por një përgjigje erdhi nga OSBE në Shqipëri që dënon dhunën ndaj procesit zgjedhor në bashkitë e djathta e i bën thirrje organizatorëve të protestës së 21 qershorit të sigurojnë protestë paqësore. Në të njëjtën linjë edhe ambasada amerikane në Tiranë, që dënonte dhunën e ditëve të fundit në bashkitë e opozitës e pjesërisht dhe thirrjen për protestë paqësore e refuzim të dhunës. Në të njëjtën linjë edhe delegacioni i BE në Shqipëri që mes të tjerash përsërit thirrjen për dialog mes palëve.

Zërat e diplomatëve në Tiranë duken unanimë vetën në dënimin e dhunës, së fundmi në ambientet zgjedhore të bashkive të opozitës. I vetmi që foli për përgjimet e publikuara nga Bild, javën politike që lamë pas ishte ambasadori austriak, që kujtoi rastin e freskët të vendit të tij, ku pas një video-përgjimi, zv/kancelari dha dorëheqjen, e vendi shkoi në zgjedhje të parakohshme.

Ambasadori Satler thotë se situata nuk mund të shkojë si provë force deri në fund mes palëve.

Ilir Meta pati një qasje të njëjtë pak orë pas deklaratës së ambasadorit austriak.

Por kryeministri duket më komod me mesazhet e ndërkombëtarëve ndaj opozitës, se me nxitjen e tyre për dialog.

Rama: nuk bëjnë dot gjë edhe po t’i prishin…zgjedhjet një kuti mjafton.

Por opozita vijon të këmbëngulë se nuk do ketë zgjedhje me 30 qershor. Tregoi forcën e vet numerike në protestën e të premte së 21 qershorit, por indirekt edhe mesazhin se mund të kontrollojë plotësisht protestuesit e vet.

Basha :nuk ka paqe pa drejtësi…, nuk do ketë zgjedhje me Ramën…

I mblodhi qetësish në selinë blu me njoftimin se protestat do jenë të përditshme, deri në 30 qershor.

Basha: protesta do vazhdojë ditë për ditë orë për orë

Kriza politike në vend ka marrë formën e një matje të qartë forcash, mes mazhorancës në pushtet e opozitës në protesta, së pari në bashkitë që drejtohen prej saj, e 30 qershori duket një opsion i zbehur në horizont./ABC News Albania 24/7

MIRELA-ME-FELAJN.mpg_snapshot_16.24-1280x720.jpg
ent ela23:10 | 20/06/2019

“Një manipulim i tërë që kërkon t’i bëhet opinionit publik nëpërmjet përcjellejs së këtyre CD”. Kështu e cilëson deputetja socialiste Ermonela Felaj publikimin e përgjimeve të gazetës gjermane Bildt në lidhje me zgjedhjet në 2017-ën.

Sipas saj është abuzuar me përgjime, që kanë zgjatur për vite të tëra dhe që nuk është shoqëruar me asnjë lloj veprimi hetimor.

“Ligji ka disa kushte që të lejon përdorimin e përgjimeve se komunikimet private bëjnë pjesë te liritëe e të drejtat e njeriut. Është abuzuar me përgjime, që kanë zgjatur për vite të tëra dhe që nuk është shoqëruar me asnjë lloj veprimi hetimor. Kemi thjesht biseda që u jepet interpretim sipas dëshirës së atyre që i transmetojnë, ka raste kur nuk transkriptohet ajo që dëgjohet por një fjalë e ndryshme, nuk jepet ai kuptim”.

E pyetur se si ndjehet moralisht mahzoranca Felaj shprehet: “Nuk ka një përgjigje sesi ndjehemi ne moralisht. E gjithë situata e përgjimeve është një ndjenjë bezdisje dhe përshtjellimi dhe negative se jemi dhënë kaq shumë pas përgjimeve sa jemi duke menduar se kemi bërë dëm. Përgjimet nuk përdoren kaq lirshëm”.

Felaj thekson se nuk mund të bëhet drejtësi përmes padrejtësisë, por apelon që ngjarje të tilla shantazhues dhe me efekte të rënda në publik duhet t’iu jepet fund. Drejtësia shprehet ajo nuk mund të jetë ushtari i radhës i partisë në pushtet, por të qëndrojë brenda rolit e misionit që i ka dhënë ligji.

“Ne të gjithë duhet të mbajmë një qëndrim. I serviret publikut si një mjet për të bërë drejtësi kur ato janë marrë në mënyrë të ligjshme. Përpiqemi të bëjmë drejtësi përmes padrejtësisë.

Me gjyqtarë të korruptuar, që kanë shitur punë e tyre për t’u mbrojtur nga vetingu dhe ne nuk mund te jemi indiferentë dhe të mos e denoncojmë këtë paligjshmëri.

Ngjarje të tilla veprime të tilla shantazhues me efekte kaq të rënda në publike t’u jepet fund. Prokuroria e gjykata të qëndrojnë brenda rolit e misionit që i ka dhënë ligji dhe jo të bëhen ushtari i radhës për partinë politike. Kjo nuk duhet të ndodhë  në Shqipëri. Kemi bërë shumë përpjekje për ta shkëputur njëherë e mirë drejtësinë nga politika”.

Prokuroria nuk ka pasur qëllim që të hetojë, thotë Felaj, por të ndërtojë një material që ta përdorte për mbrojtjen e vet.

“Prokuroria nuk ka pasur qëllim që të hetojë, por të ndërtojë një material që ta përdorte për mbrojtjen e vet. Për t’u dukur si të ligjshme ato përgjime janë bërë duke u dhënë edhe një vendim i gjykatës ka shumë njerëz të përfshirë. Tani është bërë e qartë që nga fundi i 2018 hetimet mediatike janë marrë në duar nga grupe të tjera prokurorësh dhe OPGJ. Është bërë inventarizimi i CD dhe audiove dhe është kuptuar linja e hetimit.

Një nga ato hetime nuk ka qenë i lidhur me zgjedhjet, ka nisur në 2016 për trafikun narkotikëve enkas janë dhënë numra, janë selektuar CD për të bërë këtë që ka ndodhur sot.

CD e shfaqura në publik janë të selektuara dhe numrat e dhënë në përgjim janë vënë enkas dhe këtu qëndron shkelja e madhe e Prokurorisë, se kjo është e dukshme, qoftë në kohëzgjatje se asnjë përgjim nuk mund të zgjasë përtej një afati të caktuar. Edhe kur zgjatet duhet të ketë prova që dyshimi është i mbështetur .

Fakti që janë mbajtur 3 vjet dhe nuk janë shoqëruar me veprim tjetër, as transpirktime dhe këto transkripte janë bërë jashtë jo brenda, ka momente që janë fshirë komunikime hyrëse dhe hundore një manipulim i tërë që kërkon t’i bëhet opinionit publik nëpërmjet përcjelljes së këtyre CD”.

/abcnews.al

 

PRONONCIMET-DEPUTETEVE-PER-PERGJIMET-KR.mpg_snapshot_00.14-1280x720.jpg
ent ela18:10 | 20/06/2019

Protagonistët e përgjimeve të “Bild” gjatë zgjedhjeve në Dibër nuk flasin për mikrofonët e mediave aq lirshëm sa në bisedat telefonike të përgjuara.

Qefalia: “Pallavra se nuk janë, janë biseda shoqërore, të flasësh me një shokun e klasës të fëmijërisë çfarë problemi ka”

Manja: “Për çështje të drejtësisë, flet drejtësia”

Fjalë pak është edhe Olta Xhaçka, aktualisht drejtuese politikë në Dibër.

“Prokuroria duhet të bëjë punën e vet”.

Nga këto biseda distancohet dhe deputetja e Dibrës, Almira Xhembulla.

“Unë në 2016 isha qytetare e zakonshme dhe me shumë kënaqësi kam votuar Muharrem Ramën”.

Heshtjes së disa deputetëve, ju bashkohen dhe koordinatorët elektoralë.

Zëvendëskryeministri Braçe përjashton blerjen e votës.

“Nuk është gjetur nga këto përgjime që të jetë komunikuar për çështje parash, për secilin përfshirë këta të dy prokuroria të kryejë veprimet e saj”.

Numri dy i qeverisë bën një hap pas kur i përmendet biseda e Damian Gjiknurit që dërgon një furgon me djem problematikë në Dibër.

“Nuk është normale, në krahun tjetër ju duket normale që ish ministri të mbledhë një makinë me djem problematikë nëse provohet të hetohet deri në fund”.

Një ndër deputetët më të vjetër të parlamentit, Musa Ulqini i thërret eksperiencës së tij për të bërë diferencën.

“Kushdo që keqpërdor lekët për të blerë votat duhet të dënohet. Kjo parti që ka bërë Libofshën që ka bërë krimin më të tmerrshëm elektoral në ‘96, që ka bërë ’97, ’98, Gërdecin dhe ka vrarë 4 vetë në 21 janar nuk mund të bëjë ëngjëllin dhe të na tregojë me gisht ne për gjëra që nuk shkojnë mirë sot. Në këtë moment të gjithë kanë përgjegjësi, të gjithë duhet të tregohen të drejtë në raport me interesat e vendit dhe mos bëjnë gjëra si kjo e Ilir Metës që do jetë në librin Guinness që në ditën më të rëndësishme në vend të bëjë detyrën e vet dhe tu ulë gjakrat, por i hedh benzinë tensioneve në Shqipëri”.

Bashkim Fino pretendon se ka edhe video kompromentuese për PD.

“Duhet të vepronte prokuroria para 3 vjetësh, dosjet janë të mbyllura këto janë indicie dhe duhen hetuar nga prokuroria të gjitha përgjimet edhe për partinë e opozitës”.

Fluturimet nga puna si ndëshkim partiak i përjashton dhe Bujar Cela deptuet i Lushnjës.

“Unë nuk jam nga Dibra të gjithë kolegët kanë emër”. /ABC News Albania 24/7

0c6c689b-2c08-45f4-af8a-e6aefa8d15bb-1280x853.jpg
nev ila15:52 | 20/06/2019

Në një deklaratë për mediat nga selia e PD-së, Basha tha se nuk do të ketë asnjë normalizim politik në Shqipëri pa ndëshkuar autorët e vjedhjes së votave, ndërsa ftoi të gjithë qytetarët ti bashkohen protestës së nesërme që do të nisë në orën 20:00

Një gjeni qëndron pas të gjitha përgjimeve të gazetës gjermane Bild. Zbulimin e bën publik vetë kryetari i Partisë Demokratike.

“Ky është gjenialiteti kriminal i Edi Ramës”.

Këtë e argumenton me skemën që sipas kryedemokratit ka ndërtuar kryeministri për të bashkëpunuar ministrat, deputetët, administrata me njerëzit e lidhur me krimin.

“Nuk merren vesh njëri nga tjetri…

Të gjithë këta që përmendi kreu demokrat kanë timonierin e tyre.

Edi Rama është timonieri i vjedhjes së zgjedhjeve. Çdo gjë është bërë nën drejtimin e tij, me planifikimin, koordinimim, shtytjen dhe kontrollin e tij”.

Kryeministrin e akuzon se kërkon ta bëjë qesharak të gjitha publikimet e përgjimeve. Nuk është kjo mënyra për të dalë nga kriza që po kalon vendi e këshillon ai duke i dhënë edhe alternativën e zgjidhjes.

“Asnjë hap politik, asnjë zgjidhje politike në Shqipëri nuk do të bëhet pa patur në themel të saj ndëshkimin e të gjithë atyre që kanë vjedhur votat e shqiptarëve.

Asnjë marrëveshje politike për daljen nga kriza nuk do mund të arrihet, nëse pika numër 1 e saj nuk është ndëshkimi i vjedhësve të votave”.

Kush nuk e kupton është naiv thotë Lulzim Basha.  Mesazhin e radhës ia dërgon atyre që sipas tij po përndjekin opozitën.

“Edi Rama nuk do t’ju mbrojë dot më.

Nëse sot ai ju bën të ndjeheni të fortë dhe të paprekshëm, kur dhunoni njerëzit, nesër, do të provoni në palcë forcën e drejtësisë”.

Në veçanti i drejtohet ministrit të brendshëm.

“Sandër Lleshaj është sot vegla më e ftohtë dhe e pashpirt e Edi Ramës

Në misionin e tij për të dhunuar opozitën, për të luftuar popullin, për të nxitur vëllavrasje, shkëlqen Sandër Lleshaj, që duket i lumtur për shërbimin e tij”.

Jo vetëm ministri Lleshaj, por edhe drejtori i policisë Ardi Veliu e të gjithë ata që kanë dhunuar qytetarët do të jenë në burg shumë shpejt i paralajmëron shefi opozitës.

“Në qelinë ku sot është Bardh Spahia do të jetë njëri nga ju nesër. Në qelitë ku ndodhen burra dhe gra protestues, baballarë dhe nëna, të rinj e të reja, do të jeni ju”.

Kryetari i Partisë demokratike premton se do të realizojë me sukses operacionin për heqjen e këtij kanceri siç e emëron ai qeverisjen e kryeministrit Edi Rama./ABC News Albania 24/7

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono