përgjime

khashoggi-1.png
G. P.22:35 | 10/11/2018

Turqia u ka ofruar vendeve europiane materialet audio që zotëron Ankaraja në lidhje me vrasjen e gazetarit Xhamal Kashogi. presidenti Erdogan ka deklaruar se, tani të gjithë e dinë se çfarë ka ndodhur.

Turqia u ka dhënë Gjermanisë, Francës dhe Britanisë regjistrimet në lidhje me vrasjen e gazetarit saudit Xhamal Kashogi. Lajmin e ka bërë të ditur të shtunën presidenti Recep Taip Erdogan, i cili ka deklaruar se në këtë mënyrë mund të ruhet presioni ndërkombëtar mbi Rijadin.

Vrasja e Kashogit shkaktoi indinjatë në mbarë botën, por reagimi i fuqive botërore ndaj Arabisë Saudite, eksportuesi më i madh i naftës në botë dhe mbështetës i politikës anti-iraniane të Shteteve të Bashkuara, ka qenë i vakët. Në një deklaratë para nisjes për në Francë, për të marrë pjesë në ceremoninë përkujtimore të fundit të Luftës së Parë Botërore, Erdogan bëri me dije se kjo është hera e parë që tre shtete europiane njihen me regjistrimet.

“Ne ua dhamë ato gjermanëve, francezëve dhe britanikëve. Natyrisht, ua kemi dhënë edhe Shteteve të Bashkuara dhe Arabisë Saudite dhe të gjithë ata e dinë se ç’ka ndodhur”, tha Erdogan.

Erdogan nuk dha detaje të përmbajtjes së regjistrimit, por dy burime të informuara mbi hetimet thanë për agjencinë e lajmeve “Reuters” se pala turke ka disa materiale audio. Ato përmbajnë vrasjen e gazetarit dhe bisedat që i paraprinë operacionit për ekzekutimin e tij, të cilin autoritetet në Ankara e zbuluan. Kjo ka shtyrë qeverinë turke të arrijë në përfundimin se vrasja e Kashogit ishte e organizuar dhe e urdhëruar nga nivelet e larta të qeverisë saudite./abcnews.al

ervin-salianji-2.png
G. P.14:30 | 31/10/2018

Sulmin frontal ndaj kreut të bashkisë Durrës, Partia Demokratike e vijoi nga foltorja e selisë ku deputeti Ervin Salianji iu referua sërisht dosjes, tashmë të famshme, 339, pjesët publike të së cilës demokratët i kanë quajtur vetëm majën e ajsbergut.

“Për Vangjush Dakon, tani e kemi të provuar se i lutet kreut të bandës së Avdylajve për takim falenderues pas zgjedhjeve, ushtarët me të cilët Dako komunikon  refuzojnë ta shqetësojnë bosin”. 

Për Salianjin, janë përgjimet e prokurorisë ato që vërtetojnë akuzat e demokratëve dhe veç plazhit privat të Avdylajve në Durrës, të provuar me fakte sipas selisë blu, Dako ka shpërblyer edhe të tjerë, ndaj shpjegimet ia kërkon me emra nominal.

“A e ka takuar Gjushi Cinën, një nga anëtar e bandës, për t’i siguruar ndërtimin e Avdylajve në det?  Vangjush Dako duhet të thotë mbi çfarë kriteresh Peposhët e Durrësit, që terrorizuan zonën e shkozetit gjatë zgjedhjeve, kanë marrë parkimin tek sheshi i Stacionit të Trenit, mbi çfarë kriteresh emëroi administrator në Sukth Bert Hoxhën person me precedentë të rëndë kriminale… Rud Taullai me linjat e transportit urban ka përfituar privilegjet e pushtetit të Vangjush Dakos dhe Edi Ramës? Kep Arapi me ndërtime në mijëra metra katrorë tek Gjiri i Lalzit? Ron Shqopa, Drejtor i rëndësishëm në Durrës”?

Kriteri i vetëm sipas Partisë Demokratike, që lidh gjithë të sipërpërmendurit është shërbimi ndaj Dakos dhe Ramës përmes krimit elektoral që i solli në pushtet, kriter mbi të cilin kreu i bashkisë Durrës duhet të prangoset, përfundon deklarata e selisë blu./abcnews.al

KRONIKE-ARBEN-CUKU.mpg_snapshot_02.07-1280x720.jpg
G. P.17:19 | 24/10/2018

Arben Çuko, ish-Drejtori i Përgjithshëm i Burgjeve dyshohet nga prokuroria se ka marrë 3 mijë euro si dhe një makinë në pronësi, vetëm për të transferuar një të dënuar nga burgu i Burrelit në atë të Peqinit. Sekseri, sipas përgjimeve, ka qenë shoferi i Çukos.

3 mijë euro dhë një makinë. Kaq dyshohet se i është ofruar ish-drejtorit të përgjithshëm të burgjeve Arben Çuku për të bërë një transferim nga burgu i sigurise së lartë të Burrelit në atë të Peqinit.
Çdo gjë është zbardhur në përgjimet e bëra nga Prokuroria në kuadër të hetimit për grupet e përfshira në tregtimin e narkotikëve brenda e jashtë Shqipërisë. Personat nën hetim gjatë përgjimeve ka rezultuar se kanë ndikuar në mënyrë të paligjshme tek zyrtarë të lartë. Sipas përgjimeve rezulton se Astrit Avdyli, Denis Llaftiu, Fatos Llaftiu kane kryer ndërhyrje në veprimtarinë e zyrtarëve shtetërorë. Gjatë përgjimeve ka rezultuar se i dënuari Olsi Karagjozi, i cili vuante dënimin në burgun e Burrelit, ka hyrë në kontakt me Denis Llaftiun, duke i kërkuar atij që nëpërmjet lidhjeve që kishte të ndërhynte tek Drejtori i Përgjithshëm i Burgjeve për tu transferuar.

Transferimi sipas përgjimeve do të bëhej kundrejt pagesës së 3 mijë eurove dhe i dënuari ka premtuar dhe kalimin e një automjeti në pronësi. Denis Llaftiu sipas përgjimeve është vënë në kontakt me shoferin e Çukos, të cilit i ka bërë ofertën. Paratë dhe makina, sipas përgjimeve i janë dorëzuar shoferit Qerim Mushës, i cilësuar si interlokutori i Arben Çukos. Pasi është bërë pagesa, transferimi nuk ka ndodhur menjëherë, gjë që ka sjellë reagimin e të dënuarit Karagjozi, i cili ka kërkuar kthimin e parave. Në përgjime lidhur me këtë rast del edhe një bisedë e bërë nga drejtori i burgut të Burrelit me eprorin e tij të asaj kohe Arben Cuko, i cili i ngre dyshimin se mund të ketë ndonjë pisllëk në këtë histori, duke iu referuar ndonjë dekonspirimi të mundshëm.

A: Alo, përshëndetje.
B: Përshëndetje, Fatjoni jam.
A: Kush Fatjon o burr?
B: Fatjoni, drejtori i Burrelit.
A: Hë Fatjon, më thuaj.
B: Nuk kemi ndonjë problem, situata është e qetë. A mund të vij nesër në mëngjes të bisedojmë për nja dy çështje të vogla?
A: Nuk e di, nuk mi thua dot në telefon?
B: Ti them edhe në telefon, por doja t’ju takoja tu uroja… Mirë drejtor, doja të flisja edhe për këtë për një transferim të një të burgosuri që të kishin bisedu.
A: Ça është?
B: Është ky Karagjozi, për arsye sigurie më shumë.
A: Po, Olsi Karagjozi, ma ke dërgu. Prit ta vendos unë se kam dëgju llafe të tjera për këto lloje. Ata që më kanë ndërhy mua më duhet se ma kanë bërë me pisllëqe. Prit ta vërtetoj unë.

Sipas përgjimeve pavarësisht dyshimeve, Drejtori i Përgjithshëm i Burgjeve e ka nxjerrë urdhërin e transferimit të të dënuarit Karagjozi në 9 korrik të këtij viti nga burgu i Burrelit në atë të Fierit. Mbi Arben Çukon po vijojnë ndërkohë hetimet për korrupsion pasiv të zyrtarëve të lartë./abcnews.al

facebook.jpg
G. P.09:57 | 27/07/2018

Facebook duket se nuk po e merr dot veten pas skandalit të rrjedhjes së të dhënave personale, me qëllim favorizimin e Donald Trump në zgjedhjet presidenciale. Në bursat amerikane, rrjeti social më i madh në botë ka pësuar një humbje prej 100 miliardë dollarë.

Facebook ka pësuar një rënie historike ditën e enjte në bursat amerikane, duke humbur më shumë se 100 miliardë dollarë. Sipas mediave amerikane, aksionet e rrjetit social në tregjet financiare kanë rënë me 20 për qind, vetëm pak kohë pasi kompania kishte paralajmëruar investitorët për një rënie të të ardhurave dhe rritjes së shpenzimeve.

Parashikimet pesimiste për Facebook kishin ardhur pas përfshirjes së tij në hetimet për rrjedhjen e të dhënave personale të përdoruesve, për të ndikuar në favor të Donald Trump në zgjedhjet presidenciale. Gjithashtu, bordi drejtues i kompanisë njoftoi rritjen e shpenzimeve me 50 për qind, në përpjekje për të përmirësuar metodat e monitorimit të materialeve të postuara dhe garantimin e sigurisë për të dhënat e përdoruesve.

Sa i takon paralajmërimit të investitorëve për një rënie të të ardhurave, ajo do të vijë si pasojë e opsioneve të reja për të promovuar reklamat. Facebook, që zotëron gjithashtu Instagram dhe WhatsApp, ka deklaruar se kapacitetet e tij do të tkurren me rreth 30 për qind. Pasiguria që ka prekur grupin e drejtuar nga Mark Zuckerberg ka ndikuar edhe tek rrjetet e tjera sociale. Twitter, që është përballur me të njëjtat kritika, pësoi një rënie me 3 për qind, së bashku me Snap dhe WhatsApp./abcnews.al

topi-1280x720.jpg
G. P.17:42 | 26/07/2018

Sipas asaj që raporton Bloomberg, topi i futbollit të cilin presidenti rus Vladimir Putin i dhuroi homologut amerikan gjatë konferencës së përbashkët për shtyp në Helsinki mund të përmbajë nëj mikroçip. Kaq ka mjaftuar që në Shtetet e Bashkuara të Amerikës të shpërthejnë polemikat përsa i përket masave të sigurisë.

Një top spiun në Shtëpinë e Bardhë. Është kjo tema e polemikave të fundit në Shtetet e Bashkuara të Amerikës rreth dhuratës që Vladimir Putin i ka bërë Donald Trump gjatë konferencës së përbashkët për shtyp në Helsinki: topin zyrtar të Botërorit më Rusi.

Firma prodhuese, Adidas, ka prodhuar dhe një version hi-tech, i cili përmban në brendësi një mikroçip që mund të dialogojë dhe të dërgojë informacione në aparatet e celularëve, tablet apo dhe kompjuter personal. Lajmi është publikuar nga Bloomberg, me pamje që tregojnë topin Adidas që iu dhurua kreut të Shtëpisë së Bardhë me logon e kompanisë së komunikimeve Pranë Fushës. Topi i cili shitet online, më parë kushtonte 165 dollarë ndërsa tani 83.

Por kaq u desh që të përhapet sindroma e kalit të Trojës, thënë ndryshe, ideja që një objekt të cilin presidenti amerikan mund ta vendosë në një vend ku merren vendime të rëndësishme, të shërbejë si transmetues për rusët.

Dhe pse nuk ka të dhëna të qara, as Adidas nuk ka pranuar të komentojë, në Shtetet e bashkuara të Amerikës kanë shpërthyer polemikat përsa i përket sigurisë. Edhe për topin e futbollit ashtu si dhe për të gjitha dhuratat e shkëmbyera mes liderëve është ndjekur një protokoll kontrollesh, por nga Shtëpia e Bardhë nuk ka pasur asnjë konfirmim për praninë apo jo të një mikroçipi dhe as nëse topi do të qëndrojë në ambientet e presidencës amerikane./abcnews.al

trump.jpg
G. P.10:45 | 26/07/2018

CNN ka publikuar bisedën që Donald Trump dhe avokati i tij bënë dy muaj para zgjedhjeve presidenciale, për të blerë heshtjen e një modeleje që pretendonte se kishte patur një aferë me Trump. Në bisedë Trump dëgjohet të përmendë shifrën e 150 mijë dollarëve.

Regjistrimi i bisedës në të cilën Donald Trump dhe avokati i tij bisedonin për të paguar një modele që kishte pasur një aferë me presidentin është publikuar nga CNN. Trump dhe avokati i tij personal Michael Cohen diskutojnë për blerjen e heshtjes së ish-modeles së “Playboy”, Karen Mekdugall.

Regjistrimi është bërë në Shtator të 2016-s, dy muaj përpara zgjedhjeve presidenciale, ndërsa afera e përfolur daton në vitin 2006. Biseda sorrollatet dhe herë pas here veç dy protagonistëve kryesorë dëgjohen edhe zëra të tjerë. Trump dhe ish-avokati i tij diskutojnë mundësitë që të drejtat e historisë së modeles t’i blejë revista

Michael Cohen: “Më duhet të hap një kompani për mikun tonë”.

“National Inquirer”. “Më duhet të hap një kompani për të bërë transfertën në lidhje me mikun tonë David”, thotë Cohen. Ky emër, sipas CNN, mund të jetë ai i David Pecker, miku i Donald Trump dhe president i “American Media Incorporation”, që është kompania mëmë e “National Enquirer”. “Atëherë sa duhet të paguajmë për këtë? 150?”, thotë më pas Trump.

Donald Trump: “Sa duhet të paguajmë”?

150 në të vërtetë i bie të jetë 150 mijë dollarë, shuma që Mekdugall mori nga revista të cilës i shiti historinë e saj. Duke reaguar ndaj publikimit të regjistrimit, Trump ka kritikuar ashpër ish-përfaqësuesin e tij ligjor.

“Ç’lloj avokati është ai që përgjon klientin e tij? Kjo është hera e parë që ndodh, apo jo? Unë nuk kam dëgjuar të jetë bërë ndonjëherë”, është shprehur Trump.

Por avokati i zotit Cohen, Lanny Davis ka reaguar po në Twitter, duke i kujtuar presidentit të Shteteve të Bashkuara një precedent të rëndësishëm.

“Sikurse e mësoi dhe Richard Nixon, regjistrimet nuk gënjejnë”, ka thënë Davis, duke iu referuar skandalit “Watergate”.

Pajisja që përmban përgjimin u konfiskua nga agjentët e FBI-së kur bastisën zyrën e avokatit Cohen më herët gjatë vitit në Nju Jork./abcnews.al

prokurori.jpg
G. P.17:52 | 11/07/2018

Hetimet për efektivin e policisë Haki Dyli, të përfshirë në akte korrupsioni, kishin nisur që në janar të këtij viti. Përgjimet e bisedave telefonike tregojnë shumë komunikime të tij me persona të tjerë, ku bëhen pazare, në këmbim të favoreve nga gjyqtarë të Gjykatës së Durrësit.

Efektivi i policisë Haki Dyli me detyrë trupë shërbimi në Gjykatën e Durrësit, i cili u prangos të martën nga uniformat blu, ishte nën hetim prej disa muajsh. Ai premtonte të ndërmjetësonte në emër të gjyqtarëve dhe prokurorëve për zgjidhjen e proceseve gjyqësore.

Shkak për fillimin e përgjimeve për Dylin ishte bërë një sinjalizim në polici i vetë kryetares së Gjykatës së Durrësit, Joana Qeleshi, më 30 Janar të këtij viti. Informacionet që kishin mbërritur tek ajo për implikimin e këtij efektive në këtë veprimtari korruptive, iu referuan policisë e më pas Prokurorisë së Durrësit që nisi hetimin.

Numri i telefonit të punonjësit të policisë u vu në përgjim si person në rolin e sekserit të mbetur në tentativë, ku sipas prokurorisë së Durrësit, doli edhe avokati Devis Qana.

Organi i akuzës thekson se Devis Qana dhe Haki Dyli zhvillojnë komunikime të shkurta e më pas takohen fizikisht për shkak së zyra e avokatit është pranë Gjykatës. Gjatë bisedës së regjistruar më datë 14 Prill 2018, pretendohet se një prokurore i ka kërkuar 2 mijë euro për të mbyllur një çështje.

B- Po Haki!

A- Hajde se kam një punë tepër urgjente!

B- Erdha erdha…

B- …ai ishte avokat apo sekser?!!

A- …mua më tha që do ja pushoj çështjen patjetër.

B- Mua më tha kështu…unë do ta mbyll çështjen brenda 2-3 vleftësim-ndalimi dhe caktimi masë sigurimi. Djalin do ta nxjerr të pafajshëm. Do t’u jap dhe një dokument që djali është i pafajshëm.

A – Kështu me tha dhe mua…

B- Donte 600 mijë lekë për vete dhe 2 mije euro Prokurorja…

Më herët më datë 7 Mars rreth orës 10 e 30 minuta, Haki Dyli zhvillon një bisedë telefonike me një person. Polici Dyli i kërkon bashkëfolësit 1 mijë euro, të cilat siç thotë ia kishte kërkuar djali i punonjësit të Gjykatës së Durrësit.

A – …erdhi sot urgjent ai zotëria.. tha pasnesër ke 1000 euro. Mirë i thashë dakord!

B – Erdhi sot urgjent eee?!

A – Po, ai i biri.

B – I biri?

A – E pra, nga Vlora.

B – Aaaa ku është aty?

A – Po erdhi e unë nuk e njofta fare i vajta i thash lëviz makinën që ktej, kur ai më tha mua nuk po më njeh!!…eee do vij pasnesër.

B – Ashtu tha?

A – Po…do vij vetë tha pasnesër e do të sjell tha gjysmat e lekëve, do ma bësh hallall tha se nuk kam pas mundësi e kam pas lakun në grykë tha…

Por në një rast tjetër, Haki Dyli tregohet më i kujdesshëm dhe flet me kode.

A – Përshëndetje

B – Përshëndetje, si je Haki mirë? Me kërkon ndonjëri aty te gjykata?

A – Jo të mora unë vete…..?

B – Po…

A – Tashi dëgjo mua se ndërmjetesit i kanë këto, kur bëhesh ndërmjetës…

B – Më thuaj….

A – I thuaj babit do t’i sjellë 150 unë dhe do t’ja vonoj një cikë atë qindëshen.

B – po mirë pa problem i them unë…”

Punonjësi i policisë Haki Dyli dhe avokati Devis Qana do të dalin të enjten për njohjen me masën e sigurisë në Gjykatën e Durrësit për veprën penale “Ushtrimi i ndikimit të paligjshëm ndaj personave që ushtrojnë funksione publike e kryer në bashkëpunim”./abcnews.al

taulant-balla.jpg
G. P.21:24 | 05/07/2018

Akuzat e ndërsjella midis kryetarit të Partisë Demokratike, Lulzim Basha dhe kreut të grupit parlamentar socialist, Taulant Balla, kanë vazhduar edhe në seancën plenare të së enjtes. Deputeti socialist e ka njoftuar se të martën e pret në gjykatë, ndërsa kreu demokrat e ka paralajmëruar se shumë shpejt një tjetër aferë korruptive do të zbulohet, ku i përfshirë pretendon se është edhe Taulant Balla.

E ka fjalën për kryetarin e grupit socialist Taulant Balla.

Por fjalimin e përgatitur nuk e kishte dedikuar për deputetin Balla kryetari i Partisë Demokratike Lulzim Basha. Ai kërkoi t’i tregonte shqiptarëve se në 10 muaj u provua se pushteti i Edi Ramës është degraduar, kalbëzuar dhe ka falimentuar plotësisht.

“Në 10 muaj Shqipëria ka prodhuar kronika të krimit politik më shumë se e gjithë Evropa në 10 vjet”, tha Basha.

Edhe mos hapja e negociatave ishte rezultat i zgjedhjes së vetëdijshme të Edi Ramës për të mbrojtur Saimir Tahirin, Fatmir Xhafajn, Gjiknurin, Dakon, Habilajt, Balilët dhe të gjithë kokat e krimit dhe politikanët e korruptuar dhe të lidhur me krimin deklaroi Lulzim Basha, sipas të cilit, këta janë peshqit e mëdhenj që kërkojnë ambasadorët.

“Oqean? Mos gënjeni veten tuaj zotërinj ambasadorë, se shqiptarët nuk gënjehen më! Peshqit e mëdhenj janë në krahun tuaj në çdo pritje zyrtare dhe në podiumin e qeverisë këtu në parlament”, tha Basha.

Përgjigjen ia jep numri dy i Partisë Socialiste, i cili i kujton se nga vjen e kush e strehoi dhe promovoi politikisht peshkun Balili.

I rikujton edhe personazhe të tjerë të lidhur me botën e krimit dhe trafiqeve që Taulant Balla thotë se përgjigjen e Lulzim Bashës e pret në gjykatë.

I sigurtë duket socialisti Balla për vendimin e gjykatës në favor të tij dhe këtë e shpreh me tonet këmbëngulëse nga foltorja e parlamentit.

“Çoje kokën! Të martën të pres në gjykatë dhe mos merr raporte si për Rrugën e Kombit apo të ikësh në Holandë”.

Të njëtën kërkesë ia përsërit, ndërsa shkembehen në korridorin që i ndan, por kryedemokrati vendos t’i përgjigjet publikisht akuzës.

“Derrkuci i Yaris-it harron diçka. Më akuzon mua se kam dalë me vëllain e personave që u dyshonkan se janë pas parave të Toyota-s. E para punës, n.q.s ai qenka i dyshuar pse nuk e keni arrestuar deri më sot. E dyta, po ju keni vëllain e dënuar të ministrit të Brendshëm. Hanit, pinit nga mëngjesi deri në darkë me të. Çfarë standardi keni ju”?

Ministri i Brendshëm, Fatmir Xhafaj, reagon pa mikrofon ndaj akuzave. Në fund zgjedh vetëm të dëgjojë vazhdimin e fjalës së kryetarit të Partisë Demokratike që në të vërtetë është një tjetër paralajmërim.

“Derrkuci i Toyota Yaris-it, garanti i parave të pista të drogës dhe disa të tjerë që nuk janë këtu, jeni të përgjuar nga shërbimet e huaja, duke folur me Bacën në Selanik. Ah sa keq! Se shërbimet tona flenë gjumë. Jeni përgjuar duke dhënë garanci. Jua kanë vënë kryqin nga Uashingtoni në Bruksel, nga Belgjika në Romë. Së shpejti kryqin do t’ua venë shqiptarët”.

Kaq detaje dha Lulzim Basha për përgjimin e radhës, duke lënë të hapur se koha do ta vërtetojë vërtetësinë e deklaratës së tij./abcnews.al

toyota-1.jpg
G. P.15:14 | 25/06/2018

Mbajtja në përgjime e disa personave të dyshuar për trafik droge nga Krimet e Rënda ka zbuluar dërgesën prej 3.4 milionë euro me dy “Toyota” në Durrës.

Përgjimet telefonike për llogari të një hetimi të Prokurorisë për Krimet e Rënda kundër një grupi të dyshuar për trafik droge ka zbuluar dërgesën prej 3.4 milionë euro cash të bllokuara të dielën në portin e Durrësit. Burime të rezervuara bënë me dije për ABC News se gjatë veprimeve hetimore proaktive përmes metodave speciale gjatë këtij hetimi autoritetet kanë dëgjuar biseda mbi përpjekjen e trasnportit të një shume cash drejt Shqipërisë.

Transkiptimi i përgjimeve ka bërë më të qartë tablonë dhe faktin se paratë do vinin në bordin e një mjeti të porositur për tregun shqiptar. Pas mbërritjes së kësaj ngarkese në portin e Ankonas në kushte të konfidencialitetit të plotë janë sinjalizuar autoritetet policore portuale të Durrësit, të cilët kanë pritur trailerin, ku ndodheshin mjetet e dyshuara.

Kontrolli fizik zbuloi shumën prej 3.4 milionë euro në brendinë e dy automjeteve “Toyota” të ngarkuara në trailerin që shërben për transportin e automjeteve. Ato ishin pjesë e një ngarkese prej 9 automjeteve në total, nga të cilat shtatë “Toyota”, një “Opel” dhe një “Alfa Romeo”.

Sipas burimeve, sasia e parave ishte voluminoze për shkak të prerjeve të vogla dhe ishin vendosur në të gjithë xhepat anësore të mjeteve, në kroskot dhe poshtë sediljve. Burime të ABC News konfirmuan se porositësi i mjeteve është një biznesmen shqiptar, pronar i një servisi automjetesh në kryeqytet.

Pas kryerjes së veprimeve të para prokuroira e Durrësit ka regjistruar procedim penal për veprën penale të “pastrimit të produkteve të veprës penale”. Ndërkohë që pritet që dosja të merret në dorë nga Prokuroria për Krimet e Rënda. Aktualisht, policia ka ndaluar dy shoferët e trailerit dhe administratorin e shoqërisë së transportit./abcnews.al

KRONIKE-PD-NE-KOMISIONE-NOKA-1280x720.jpg
ent ela14:56 | 21/05/2018

Opozita demokrate ka vijuar pjesëmarrjen në komisionet parlamentare edhe ditën e hënë ku ka marrë vijuar me të njëjtën axhendë si ajo e javës së kaluar, denoncimin e çështjes Xhafaj si më të rëndësishmen për vendin. Lidhur me këtë çështje deputeti Flamur Noka njoftoi edhe ekzistencën e përgjimeve të tjera të cilat pritet të bëhen publike në vijim.

Edhe këtë fillim jave Partia Demokratike duket se po vijon strategjinë e zbatuar ditët e fundit, kthimin e debatit në komisionet parlamentare tek ajo që quajnë “çështja më me rëndësi e momentit”, çështja “Xhafaj” për të cilën deklarojnë se të rejat nuk kanë mbaruar ende.

“Është e paparanueshme të poshtërohet kaq rëndë Shqipëria. T’i thuash Europës që unë nuk kam asnjë individ normal ta përzgjedh si ministër të brendshëm, sepse sipas kryeministrit këtu të gjithë u merrkan me drogë dhe pikërisht në institucionin që duhet të jetë siç ia jep tagrin ligji e kushtetuta, në ballë të luftës kundër krimit e trafikut. Kjo nuk ndodh në asnjë vend të botës së tretë, jo në një vend të Europës ku ne po shkojmë çdo ditë e po trokasim pavarësisht se shkojme me atlete apo me këpucë. Ai përgjim ambiental dhe një tjetër që do dalë shumë shpejt do vërtetojë se përveç faktin që ka qenë dikur i përfshirë në trafik droge vëllai i Ministrit të Brendshëm ka vijuar të jetë aktiv duke pasur mbrojtje Ministrin e Brendshëm”.

Ashtu si në komisionin e ekonomisë edhe kolegët demokrat të paraqitur në komisionin e ligjeve  debatuan kauzën e tyre dhe përsëritën thirrjen për dorëheqjen e ministrit Fatmir Xhafaj, gjë për të cilën kanë thirrur qytetarët në protestë të shtunën e 26 majit. /abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono