përgjime

zhvatja-1280x695.jpg
Sej rie15:45 | 10/08/2019

Gazeta italiane “La Verita’” ka publikuar videon e tretë të aferës “Zhvatja”, që ka tronditur opinionin publik në Maqedoninë e Veriut. Këtë herë, në bisedën mes të dyshuarit Bojan Jovanovski dhe biznesmenit Orçe Kamçev përmendet edhe emri i kryeministrit Zoran Zaev.

Edicioni i internetit i gazetës italiane “La Verita” edhe sot ka publikuar xhirime të bisedave mes të dyshuarve në rastin “Zhvatja”. Në xhirimet e sotme bisedohet për procedurat për lëndën ‘Perandoria” të Prokurorisë Speciale Publike ku është i dyshuar biznesmeni Orce Kamçev.

Në një bisedë kyçet edhe Prokurorja Speciale Katica Janeva, e cila në bisedë e sipër sqaron disa procedura gjyqësore. Bojan Jovanovski dhe biznesmeni Kamçev në një pjesë të xhirimit përmendin edhe Kryeministrin Zaev, kurse Jovanovski paralajmëron se do të takohet me të dhe do të provojë ta imponojë Kamçevin. Por, nuk ka detaje ku dhe kur do të organizohet ky takim.

Kryeministri Zoran Zaev ashpër i ka hedhur poshtë lidhjet me Bojan Jovanovskin, të dyshuarin në aferën “Zhvatja”. Siç thotë, në publikimin më të ri, disa nga të dyshuarit përmendin dhe keqpërdorin emrin e tij. Po thuhen gënjeshtra me qëllim që njëri bashkëbisedues ta përforcojë pozitën e tij të fuqisë dhe autoritetit para bashkëbiseduesit tjetër – thotë Kryeministri duke përgënjeshtruar informacionet përçfarëdo bashkëpunimi apo komunikimi me të dyshuarin Jovanovski. Duket se mediat serbe shfaqin interesim të shtuar për aferën më të re në Maqedoninë e Veriut.

Do të bien shumë politikanë, kam dëshmi për kreun shtetëror. Këtë në polici e ka thënë i dyshuari Bojan Jovanovski – shkruan në edicionin e sotëm gazeta serbe Kurir. Siç transmeton kjo gazetë, Jovanovski ka thënë se nëse i ndodh diçka në burg, ai ka dëshmi të sigurta tek nëna e tij dhe në adresë tjetër, me të cilët, siç thuhet, do të shkaktojë “tërmet politik” në Maqedoninë e Veriut, çka do të shkaktonte rënien e Qeverisë.

“Bombat” e reja vazhdojnë ta tronditin opinionin në Maqedoninë e Veriut, kurse pas publikimeve të mëparshme të bëra nga Ilija Gromovnik nga Rusia dhe El Cheka nga SHBA-të në opinionin e këtushëm imponohet pyetja nëse “bombat” janë rastësi apo gjithçka bëhet për ndonjë qëllim.

Simptomatike – siç thonë mediat e Shkupit është se këto përgjime publikohen në një gazetë italiane, që pretendohet se është e afërt me të djathtën, menjëherë pasi Qeveria e Maqedonisë së Veriut paralajmëroi luftë të hapur me mediat e vendit që shpërndajnë lajme të rrejshme. “Bombat” e fundit që shpërthyen në Maqedoni, disa prej tyre edhe nga Rusia, sipas vlerësimeve të ekspertëve kanë një mesazh të fshehtë dhe mund të interpretohen si përpjekje për t`i bërë obstruksione anëtarësimit të Maqedonisë së Veriut në NATO./ABC News Albania 24/7

prokurorja-1280x720.jpg
Sej rie12:30 | 09/08/2019

Ish-prokurorja speciale në Maqedoninë e Veriut, Katica Janeva ka deklaruar të premten se zëri që dëgjohet në përgjimet mbi rastin “Zhvatja” është i saji, por është keqpërdorur. Përmes një komunikate të publikuar në faqen zyrtare të Prokurorisë Speciale, Janeva është shprehur e tronditur se si zëri i saj është përdorur për këtë çështje. Ajo ka nënvizuar se si prokurore ka patur gjithmonë detyrimin të kontaktojë me të gjithë të dyshuarit, në bazë të procedurave penale që ndiqen nga prokuroria publike. “Kam biseduar për rritjen e shkallës së bashkëpunimit me të dyshuarit, për të zbuluar dëshmi të reja në favor të hetimeve, por në asnjë rast nuk jam angazhuar për ndonjë ndikim. Asnjëherë nuk e kam keqpërdorur funksionin tim dhe nuk kam vepruar në kundërshtim me ligjin”, ka nënvizuar Janeva. Ajo u ka bërë thirrje organeve hetimore që të përfundojnë sa më shpejt hetimet mbi rastin “Zhvatja”, me qëllim që të zbardhet e vërteta./ABC News Albania 24/7

 

ali-ahmetii.jpg
G. P.16:45 | 17/07/2019

“Bombat” e El Chekës që po publikohen nëpër rrjetet sociale në Maqedoninë e Veriut, janë komentuar edhe nga partnerët e koalicionit BDI dhe LSDM. Ahmeti shtroi pyetjen se përse “bombat” publikohen vetëm për BDI-në e jo për tjerët, ndërsa Kryeministri Zaev publikisht sfidoi El Chekën që të publikojë material edhe për të.

Lideri i BDI-së, Ali Ahmeti gjatë një aktiviteti paritak në Komunën e Sarajit, duke komentuar zhvillimet e fundit politike në vend, në veçanti publikimin e të ashtuquajturave “bomba” të El Chekës, ka theksuar se bisedat e përgjuara private që po publikohen nëpër rrjetet sociale janë propagandë që për synim kanë të njollosin imazhin e BDI-së. Duke bërë thirrje që të hetohet e gjithë veprimtaria e partisë tha se pas përgjimeve qëndrojnë shërbimet e huaja sekrete.

Ali Ahmeti, kryetar i BDI-së: Vetëm të BDI-së paskan folur biseda private? Ku janë bisedat e tjera? Unë mendoj që ky milet nuk han bar dhe bën krahasime, po mirë vetëm për këta paska folur? Të tjerët paskan qenë engjëj?

Lidhur me “bombat” është pyetur edhe Kryeministri Zoran Zaev. Lideri I BDI-së Ali Ahmeti imponoi çështjen se përse “bombat” publikohen vetëm për BDI-në e jo për partitë tjera në pushtet. Kryeministri tha se veprimet e El Chekës janë të jashtëligjshme dhe se do të ketë përgjegjësi. Zaev drejtpërsëdrejti sfidoi El Chekën që nëse ka ndonjë “bombë” për të menjëherë ta publikojë.

 Zoran Zaev: Nëse keni ndonjë telefon, jepjani Cheka, ti paraqitemi edhe ta pyesim, përse vetëm për Ahmetin publikon e jo edhe për mua. Ja publikisht e them. Le të publikojë edhe për mua. Unë jam transparent por besoj se serioziteti duhet të jetë këtu. Le të publikon për secilin, por duhet ta dijë se ka përgjegjësi. Ka ligj dhe ka përgjegjësi penale për këtë. Ky njeri nuk mban llogari për privatësinë dhe kurdoherë do të përgjigjet për këtë.

Ndaj këtyre prononcimeve ka reaguar përmes Facebooku-t edhe El Cheka, duke thënë se po dështon lufta ndaj krimit dhe puna e PSP-së. Ai me mesazh drejtuar Ahmetit dhe Zaevit se paska shkelur ligjet e një vendi që liron kriminelët dhe mban në burg shqiptarët./ABC News Albania 24/7

humoristet.jpg
G. P.20:27 | 10/07/2019

Humoristët rusë që u tallën me kryeministrin e Maqedonisë së Veriut, Zoran Zaev kanë deklaruar se gjithçka e kanë bërë për argëtim. Ata kanë deklaruar se nuk kanë interesa të tjera, aq më tepër të shkaktojnë probleme në Ballkan.

Kryeministri Zoran Zaev zgjoi interes tek praksterët rusë me deklaratat e tij për përzierjen ruse në çështjet e brendshme të shtetit, e pasi filloi tu jep informata që ata as që nuk i kërkonin, Alekseit dhe mikut të tij iu bënë të mërzitshme bisedat me kryeministrin e vendin, dhe vendosin ti publikojnë videot.

Përse e zgjodhët zotin Zaev?

Alexey Stolyarov, humorist rus:Ne e zgjodhëm atë sepse e dëgjuam deklaratën e tij se Rusia po tenton të përzihet në çështjet e brendshme të Maqedonisë dhe se po tenton ta parandalojë aderimin e Maqedonisë në NATO. E më pas dëgjuam se Rusia ka organizuar protesta vitin e kaluar, kështu vendosëm ta thërrasim, arritëm ta kontaktojmë dhe më pas e kuptuam se ai dëshiron të vazhdojë të flasë me ne”.

Përse vendosët që ta publikoni videon tani?

Alexey Stolyarov, humorist rus: “Menduam se nuk do të marrim asgjë interesante nga ai, dhe u lodhëm duke folur me të dhe ashtu…”

Aleksej thotë se “viktimat” i zgjedhin sipas rëndësisë së tyre dhe aktualitetit, e për Zoran Zaevin kanë dëgjuar për herë të parë në lajme. I pyetëm se a janë të shqetësuar se mund të shkaktojnë trazira me publikimin e këtyre talljeve, e ai u përgjigj kështu.

Ju talleni me zyrtarë të lartë që mund të thonë gjëra që mund të shkaktojnë probleme, e posaçërisht në rajone si Ballkani… Për shembull gjërat që kryeministri ynë i tha për marrëveshjen mes Kosovës dhe Serbisë. A jeni të shqetësuar për këtë gjë?

Alexey Stolyarov, humorist rus: “Ne nuk jemi specialist për çështjen e Ballkanit! Kemi udhëtuar në Ballkan dhe kemi dëgjuar shumë gjëra. Maqedonia e Veriut, Mali i Zi, Serbia, do të jenë dhe janë miqtë tanë sepse ashtu duan popujt tanë. Sa i përket problemeve… Ne nuk kemi shkaktuar probleme me asnjë shtet zyrtarët e të cilëve i kemi tallur. Kemi tallur kryeministrin e Kroacisë, të Kosovës dhe shumë persona tjerë”.

Njëri prej prankresterëve rus tha që nuk kanë video të politikanëve Ballkanik që nuk e kanë publikuar, por Ballkani mbetet interesant për ta dhe nuk përjashtojnë mundësinë që të thirrin edhe funksionarë të tjerë të lartë. Në kanalin e tyre në Youtube kanë rreth 92 mijë ndjekës, kurse mund të dëgjohen biseda telefonike edhe me funksionarë tjerë të lartë, si me Macron, Boris Johnson, Niki Haley, Dushan Markoviç e shumë tjerë./ABC News Albania 24/7

 

zoran-zaev.jpg
G. P.21:40 | 09/07/2019

“Jam viktimë e mashtruesve nga vende me orientim anti-NATO” – ka theksuar Kryeministri Zoran Zaev në konferencën e shtypit me rastin e incizimeve të publikuar nga dy komedianë rus, që ishin prezantuar si Petro Poroshenko dhe Jens Stoltenberg. Kryeministri Zaev ka thënë se nuk ka qenë i vetmi që është mashtruar dhe se në këtë listë gjenden edhe Presidenti i Francës Emanuel Macron, ish-Ministri i Jashtëm i Britanisë së Madhe Boris Xhonson, Presidenti turk Rexhep Taip Erdogan e të tjerë. Ai i ka kërkuar falje opinionit, por nuk do të dorëhiqet.

Zoran Zaev – kryeministër i RMV-së: Bëhet fjalë për struktura mirë të organizuara për të ndikuar për interesat e vendeve të treta. Kjo është lehtë të konstatohet për shkak se e gjithë kjo është shfaqur nga media me orientime anti-Nato. Kjo është një nga përpjekjet për të dëmtuar interesat tona strategjike kur jemi në përfundim të anëtarësimit tonë në NATO.

Në këtë bisedë telefonike, përveç çështjeve me Greqinë, diskutohet edhe për situatën në Kosovë e Serbi. Madje gjatë bisedës janë këmbyer numrat e telefonit të diplomatit amerikan Ves Miçel dhe të Kryeministrit të Kosovës Ramush Haradinaj.  Kryeministri Zaev thotë se nuk ka ndarë sekrete shtetërore gjatë bisedës dhe se kjo nuk do të ndikojë në raportet me Kosovën dhe Serbinë.

Zoran Zaev – kryeministër i RMV-së: Padyshim se shpreh keqardhje për keqpërdorimet dhe gjatë gjithë bisedës nuk shoh se kam dhënë secrete shtetërore. Këto janë qëndrime që ne i përsërisim çdo ditë e që kanë të bëjnë me Ballkanin dhe integrimet euroatlantike.

Por ndryshe mendon opozita. Ata vlerësojnë se bëhet fjalë për një skandal të madh diplomatil dhe se duhet të ketë përgjegjësi. Zaev të dorëhiqet dhe të formohet qeveri teknike – thonë nga opozita.

Hrsitijan Mickoski – kryetar i VMRO-DPMNE-së: Mendoj se kërkimfaljen e vetme që duhej Zaevi ta bënte në konferencën e shtypit, rrumbullaksohet në dy fjali; më vjen turp për atë që bëra dhe dorëhiqem nga funksioni i Kryeministrit. Propozoj që shumica parlamentare të mblidhet sa më shpejt, të formohet qeveri teknike dhe në kuadër të 100 ditëve nga kjo ditë të mbahet zgjedhje të jashtëzakonshme parlamentare”

Komedianët rus Vladimir Kuznecov – Vovan dhe Aleksej Stoljarov – Leksus u bënë të njohur në suaza globale përmes audio-incizimeve të bisedave telefonike me personalitete të njohura, para së gjithash politikanë, duke iu paraqitur dhe prezantuar si shefa të shteteve apo qeverive ose si njerëz të parë të organizatave ndërkombëtare./ABC News Albania 24/7

mimi-kodheli-1.jpg
G. P.20:49 | 25/06/2019

Mimi Kodheli ishte e ftuar këtë të martë në emisioni “Provokacija”. Ish-ministrja e Mbrojtjes u pyet në lidhje me përgjimet e publikuar nga Bild. Ajo theksoi se kjo mënyrë e abuzimit me votat është përdorur në këto 30 vite nga të gjitha palët. Kodheli rrëfeu gjithashtu se nuk ka dhënë asnjëherë as edhe një kafe për të marrë vota.

“Unë kam bërë një diskutim disa kohë më parë, kur opozita ishte akoma në parlament lidhur me votat, blerjen e tyre, abuzimin me to dhe kam thënë që nuk mundet asnjë të çohet këtu dhe të thotë se unë jam ai jo mëkatari se të tillë nuk ka në përgjithësi ndaj në qoftë se dikush në këto 30 vjet zgjat gishtin te tjetri dhe thotë shiko se unë këtë mënyrë të të bërit vota nuk e kam përdorur kurrë dhe vetëm ti e përdor ky është abuzim me naivitetin e njerëzve e dëgjojnë. Këtë gjë e thotë një grua që keni këtu përballë dhe që nuk ka dhënë asnjëherë një kafe për të marrë një votë.

E kam dhënë kafe me dashamirësinë për t’i dhënë kafe një miku, një votuesi, por nuk kam abuzuar asnjëherë me këtë gjë. Kur e them unë dhe e kam thënë kohë më përpara duke bërë një diskurs shumë të rëndësishëm në parlament ndaj askush nuk mund të thotë pse u përgjuan këta 3 individët ca muaj më përpara janë vetëm këta që bëjnë këtë punë. Kjo është një punë e keqe që daton herët. Nuk e kanë filluar socialistët. PS është parti e madhe nuk ka nevojë të blejë vota”, tha Kodheli./abcnews.al

lulzim-basha-5.jpg
G. P.21:23 | 22/06/2019

Lulzim Basha thotë se pas publikimit të audiopërgjimeve, që tregojnë sipas tij vjedhjen e votave nga qeveria, kjo e fundit po përpiqet të krijojë një situatë sikur asgjë nuk ka ndodhur.

Kreu demokrat tha në një deklaratë për mediat nga selia blu se të gjithë ata që janë kapur ne krim ndaj zgjedhjeve duhet te dalin para drejtësisë.

“Prej disa ditësh në hapësirën publike shqiptare po zhvillohet një fushatë agresive nga Edi Rama dhe makineria e tij prej miliona eurosh e propagandës për të shpërqendruar opinionin publik dhe mbuluar krimet e rënda që kanë ndodhur në bashkëpunim mes qeverisë dhe Partisë Socialiste, dhe krimit të organizuar. Kjo propagandë është një kopje e parimeve dhe metodave të propagandës naziste për të justifikuar krimet shtetërore. Qëllimi i parë i propagandës është mohimi në mënyrë flagrante se në Dibër dhe në Durrës kanë ndodhur krime, duke e paraqitur marrëdhënien dhe bashkëpunimin krim-politik si marrëdhënie të pafajshme, pa qëllime kriminale.

Me një arrogancë dhe shpërfillje ekstreme ndaj zgjuarsisë së njerëzve, bisedat për koordinimin e vjedhjes të zgjedhjeve mes kokave politike të vendit me vrasës e trafikantë e të tjerë po shiten si biseda të pafajshme të politikanëve me votues apo të drejtuesve të qeverisë dhe vartësve të tyre. Një linjë tjetër e propagandës kriminale qeveritare dhe mercenarëve të tyre është relativizimi i krimeve që kanë ndodhur. Përmes pretendimit se vjedhja e zgjedhjeve nuk është gjë në lidhje me krimet e tjera të politikës. Si pjesë e kësaj strategjie sulmohet opozita, deri edhe me akuza të montuara politike, që qytetarët të mendojnë se janë të gjithë njësoj dhe marrëdhënia mes vrasësve dhe trafikantëve me qeveritarët nuk është ndonjë tmerr i madh. Qëllimi tjetër i propagandës me frymëzim gëbelsian të qeverisë është paraqitja e situatës si normale. Ka një përpjekje për ta trajtuar vjedhjen e zgjedhjeve si dicka të zakonshme, si diçka normale, me shpresë që do kalojë dhe do harrohet. Këto teza i përhapin vetë njerëzit e përfshirë në krim dhe të gjitha levat e tyre në media dhe në jetën publike”, tha Basha./abcnews.al

damian-gjiknuri-1.jpg
G. P.12:15 | 19/06/2019

Ish-ministri i Infrastrukturës dhe Energjisë Damian Gjiknuri ka folur për herë të parë në publik, pas audio përgjimeve të publikuara nga gazeta gjermane Bild. Ai këmbënguli në një takim në Vlorë se Partia Socialiste as nuk blen e as nuk shet vota, por figurat kryesore politike të saj, po goditen për qëllime të pastra politike.

“Ne as blejmë vota e as gënjejmë njerëz”.

Është ky reagimi i ish-ministrit Damian Gjiknuri pas publikimit të audio përgjimit ku ai komunikon me një aktivist të Partisë Socialiste, Arben KEshi gjatë zgjedhjeve vendore në Dibër në vitin 2016.

Goditje me qëllime politike i konsideron ish ministri Gjiknuri këto publikime.

“Ata s’kanë përfaqësi fare në Vlorë, ata e mendojnë Vlorën në xhep pa qenë këtu. Pra, praktikisht këtë bëjnë në gjithë Shqipërinë dhe kjo është arsyeja pse goditem unë, pse goditet Edi Rama, pse goditen figurat kryesore të Partisë Socialiste”, tha Gjiknuri.

Për socialistin Gjiknuri opozita nuk kërkon zgjedhje por mjaftohet me hedhje shashkash të gatuara në kuzhinën e Partisë Demokratike dhe njëkohësisht duan të nxisin njerëz për dhunë.

“Ne nuk do t’i lejojmë”, tha ai.

Këto deklarata drejtuesi politik i socialistëve në Qarkun e Vlorës Damian Gjiknuri i bëri gjatë një takimi me banorët e Rajonit Nr.1 dhe të njësisë Novoselë ku prezantoi kandidatin për kryebashkiak Dritan Leli./ABC News Albania 24/7

gazment-bardhi.jpg
G. P.14:24 | 18/06/2019

Sipas Sekretarit të Përgjithshëm të Partisë Demokratike, Gazment Bardhi, përgjimet e publikuara nga Bild tregojnë se Durrësi dhe Dibra janë dy krime të rënda elektorale.

Gjatë një konference për mediat, pjesë e së cilës ishin edhe ish-deputeti Enkelejd Alibeaj dhe sekretari për çështjet ligjore në PD Çlirim Gjata, Bardhi tha se përgjimet faktojnë se vjedhja e zgjedhjeve në bashkëpunim me krimin është një skemë e ngritur nga kryeministri.

“Përgjimet e publikuara nga gazeta gjermane Bild janë radiografia e vjedhjes së zgjedhjeve, vepër për të cilat që nga Edi Rama, Damian Gjiknuri, Pjerin Ndreu, Vangjush Dako e me radhë duhet të ishin sot në burg. Durrësi dhe Dibra janë dy krime të rënda elektorale, që vërtetojnë se Edi Rama di vetëm të vjedhë, të kërcënojë, të shantazhojë e të blejë vota, duke përdorur krimin, policinë dhe administratën. Por Durrësi dhe Dibra nuk janë thjesht dy krime të shkëputura dhe rastësore. Përgjimet faktojnë se vjedhja e zgjedhjeve, në bashkëpunim me krimin, është një skemë e ngritur nga Edi Rama dhe e zbatuar nga bashkëpunëtorët e tij. Edi Rama, qeveria dhe Partia Socialiste kanë vepruar si një grup i strukturuar kriminal për të marrë dhe mbajtur pushtetin në mënyrë të paligjshme.

Damian Gjiknuri, Vangjush Dako, Pjerin Ndreu, Ulsi Manja, Saimir Tahiri, Taulant Balla, Arben Keshi, Drini Gjeçi, Artan Gaçi, Sali Skura, Bekim Krashi dhe çdo person tjetër që i garanton Edi Ramës funksionimin e skemës së tij kriminale për vjedhjen e zgjedhjeve janë sot e kësaj dite të pandëshkuar nga drejtësia. Të gjithë janë të shpërblyer me poste dhe detyra të larta shtetërore, nga vetë Edi Rama, i cili si autori dhe urdhëruesi dhe përfituesi kryesor i kësaj skemë, ka dal garant që politikanët dhe bandat që bashkëpunojnë për të vjedhur zgjedhjet, të jenë mbi ligjin e drejtësinë dhe të mos ndëshkohen. Në vend që Pjerin Ndreu të ishte para drejtësisë, për kërcënimet kriminale ndaj votuesve, ai sot është promovuar nga Edi Rama si kandidat për Bashkinë e Lezhës.

Në vend që Vangjush Dako, të ishte në burg për bashkëpunim me krimin dhe bandat, po gëzon pension të qetë politik, i pandëshkuar. Cdokush nga kupola e krimit, me të cilin Edi Rama ka blerë dhe kapur pushtetin në mënyrë të paligjshme, është i pandëshkuar nga drejtësia. Përgjimet tregojnë se vetë Edi Rama duhet të ishte para drejtësisë. Ai është arkitekti i vjedhjes së zgjedhjeve, krimineli gjakftohtë që është i gatshëm të sakrifikojë gjithçka për pushtetin dhe pasurinë e tij personale”, tha Bardhi.

Më tej, Sekretari i Përgjithshëm i PD-së nënvizoi se Rama e mori nën kontroll prokurorinë për të mos hetuar këto çështje.

“Kjo është arsyeja pse Edi Rama mori nën kontroll të plotë prokurorinë, pasi një prokurori e pavarur do të kishte hetuar këto qindra prova të gatshme dhe do ta kishte kërkuar dënimin me burg të Edi Ramës dhe çdo krimineli tjetër që ka marrë pjesë në zbatimin e skemës së tij për vjedhjen e zgjedhjeve. Prej tre vjetësh, prokuroria nuk bën asnjë hetim, nuk ka thirrur një herë të vetme një prej politikanëve që shqiptarët i kanë dëgjuar vetë sesi shesin, blejnë, kërcënojnë, shantazhojnë qytetarët në emër të pushtetit të vjedhur të Edi Ramës. Për shqiptarët tani është e qartë se nuk mund të ketë zgjedhje me Edi Ramën kryeministër dhe pa nxjerrë para drejtësisë ata që vodhën votat”, tha ai./abcnews.al

edi-ramaaa-1280x725.jpg
Sej rie16:15 | 17/06/2019

Tabloidi gjerman ka nisur publikimin e përgjimeve të reja të dosjeve të prokurorisë mbi hetimin e blerjes së zgjedhjeve në vitin 2017. Në njërin nga përgjimet është vetë kryeministri Edi Rama që i telefonon një drejtori të ministrisë së brendshme, pjesë sipas “Bild” e dosjes 184 të zgjedhjeve në Dibër.

Përgjimet zyrtare nuk kanë kursyer as Kryeministrin Edi Rama.

Gazeta gjermane “Bild” publikon një bisedë të përgjuar të kreut të qeverisë me një drejtor të lartë në Ministrinë e Brendshme, Arben Keshi gjatë procesit në zgjedhjet elektorale në Dibër.

Ky është audio përgjimi i parë që ka bërë publik gazeta gjermane “Bild” e cila ka paralajmëruar se janë disa. Në informacionin e publikuar nga gazetari gjerman thuhet se kjo pjesë e parë e përgjimeve zyrtare tregon se si një drejtor i lartë i Ministrisë së Brendshme, Arben Keshi ka ngritur një skemë të qartë dhe një strategji për blerjen e votave, pengimin dhe shantazh të votuesve. Ai nuk është i vetëm në skemën kriminale./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono