Pep Guardiola

GUARDIOLA-ARGJENTINE-1280x720.jpg
G. P.21:21 | 05/09/2018

Gjoba dhe ndalim të celularëve në stërvitje. Këto janë rregullat e reja që Pep Guardiola ka vendosur për lojtarët e Manchester City.

Të fitosh kampionatin nuk është e lehtë, por të ruash titullin kampion është shumë e vështirë, aq më tepër në Premierleague kur pretendentët për trofeun janë disa. Për këtë arsye trajneri i Manchester City, Pep Guardiola, kërkon që këtë sezon ekipi i tij të tregohet më i fortë dhe lojtarët më të përqëndruar.

Tekniku spanjoll ka njoftuar një sistem gjobash për të ulur euforinë e mundshme të futbollistëve. Mediat britanike raportojnë se trajneri ka ndaluar mbajtjen e celularëve në ato që në klub quhen ambiente pune, në fushat e stërvitjes, në dhomën e analizës dhe në sallën e ngrënies.

Guardiola ka nisur edhe të gjobisë lojtarët për vonesa në stërvitje apo mbledhjet e ekipit. I fundit me këtë masë ishte Benjamin Mendy. Sezonin e shkuar, Manchester City e përfundoi sezonin me rekordin e 100 pikëve të plota, ndërsa kërkon që të fitojë titullin për herë të dytë një kufi i pashkelur prej një dekade në Premier League.

Thuhet se masat e reja nuk janë pritur fort mirë nga skuadra që mësoi se Leroy Sané u la jashtë formacionit për ndeshjen me Newcastle pasi Guardiola e vlerësoi si të dobët performancën e tij gjatë seancave stërvitore./abcnews.al

GUARDIOLA-ME-25-TROFE-1280x720.jpg
ent ela13:53 | 06/08/2018

Pep Guardiola vazhdoi sukseset e tij në karrierën e madhe si trajner. Fitorja e Superkupës së Anglisë, ishte trofeu i 25-të për teknikun katalanas.

Një tjetër fitore dhe një tjetër trofe. Pep Guardiola ishte sërish fitues me Mançester Sitin e tij që mposhti 2-0 Çelsin në finalen e Superkupës së Anglisë, të quajtur ndryshe “Çeriti Shild”.

Suksesi 2-0 në “Uembli”, me golat shënuar nga Kun Aguero, i dhuroi trajnerit 47-vjeçar, suksesin e radhës, titullin e 25-ët në karrierën e tij të lavdishme. E gjitha kjo në vetëm 11 vjet në stol.

Përballë kampionëve në fuqi të Anglisë, edhe Çelsi i Mauricio Sarrit  u duk i vogël, një provë më shumë e aftësisë profesionale të Guardiolës.

“Dua t’i bëj komplimentet më të mëdha lojtarëve të mi, – tha katalanasi pas finales. Ishte shumë nxehtë, disa prej tyre nuk ishin stërvitur sa duhet, por sërish ata treguan se janë kampionë, se janë fitues dhe se ata janë krenaria ime”.

Ky ishte trofeu i tretë i Pepit në stolin e të mbiquajturve “Qytetarët e Mançesterit”, pas titullit kampion dhe Kupës së Ligës fituar edicionin e kaluar.

Ai nisi sukseset me Barcelonën, ku mori 14 kupa të ndryshme, përfshirë 3 La Liga e dy Champions, ndërsa pati një trofe me Barcelonën C, në kategorinë e tretë

Nuk zhgënjeu me Bajernin, edhe pse nuk e mori dot Ligën e Kampionëve, ndërsa u detyrua të kënaqej me 7 tituj, mes të cilëve 3 Bundesliga.

Pak trajnerë mund të mburren se kanë fituar më shumë se ai, dhe ëndrra e tij është të barazojë Sër Aleks Fergusonin që ka fituar plot 49 tituj me Aberdinin e Mançester Junajtidin.

Guardiola ka qenë edhe një lojtar i madh, dhe ka fituar 14 trofe në karrierën, me Barcelonën si dhe titullin olimpik me Spanjën në 1992. /abcnews.al

city.jpg
G. P.15:20 | 26/02/2018

Pep Guardiola ia doli më në fund të fitonte një trofe të Angli. Trajneri katalanas mori Kupën e Ligës, pas fitores së thellë të Mançester Sitit ndaj Arsenalit.

Nuk ishte hera e parë për këtë klub, por ishte për trajnerin e tij.

Pep Guardiola, edhe pse ka fituar gjithçka me Barcelonën, dhe thuajse çdo gjë me Bajernin, sërish ishte rishtar në Angli.

Katalanasi e mori një kupë angleze, pikërisht atë të Ligës, ndërsa shpreson që trofetë e tjerë të vijnë dhe të jenë edhe më të rëndësishëm.

Mançester Siti triumfoi 3-0 në finalen e luajtur në “Uembli” të Londrës ndaj Arsenalit, rezultat që tregon një epërsi të thellë, edhe pse nuk ishte aspak e lehtë në pjesën e parë.

Kun Aguero kaloi Sitin në epërsi përpara pushimit, ndërsa kapiteni Vinsent Kompani dhe spanjolli David Silva realizuan në pjesën e dytë.

Pep Guardiola: “Padyshim që jam i lumtur sepse ne fituam titullin. Pjesa e parë nuk ishte e mirë, nuk luajtëm siç duhet pasi ndjemë presionin pas asaj që ndodhi vjet, por unë fola me lojtarët në pushim. U kërkova të tregonin veten se çfarë mund të bënin dhe ata patën një reagim të madh. Dua të falenderoj këdo tek Mançester Siti, që nga presidenti, e deri tek tifozi më i thjeshtë, dhe shpresoj që ky sukses të na ndihmojë edhe më shumë për të fituar Premier Ligën”.

Guardiola u ngacmua për kordelen e verdhë të vendosur për pavarësinë e Katalonjës dhe për lirimin e politikanëve katalanas të burgosur në Spanjë, diçka që Federata Angleze mund ta ndëshkojë.

Pep Guardiola: “E pranoj që nëse kam shkelur rregullat, duhet të gjobitem. Pranoj gjithçka, por unë jam qenie njerëzore dhe kjo ka të bëjë me çështje njerëzore. Në Katalonjë janë katër njerëz në burg, është edhe një tjetër që mund të burgoset nëse kthehet, pasi akuzohet për rebelim. Që ta bësh këtë duhen armë, ndërsa ne nuk kemi armë”.

Një nga lojtarët më të mirë të skuadrës, Kevin De Brujn, e vlerëson kështu suksesin.

Kevin De Brujn: “Kur fiton titullin e parë të sezonit mund të jesht thjesht i lumtur. Kjo pritet të na japë moral për vazhdimin e edicionit. Jemi paraqitur shumë mirë deri tani, ndërsa ia dolëm të fitonim trofeun e parë. Nuk ishte një nga ndeshjet tona më të mira të vitit, sidomos në pjesën e parë, por pas pushimit luajtëm krejt ndryshe dhe mendoj se e merituam”.

Mançester Siti ka provuar vetëm një dështim këtë sezon, pikërisht eleminimin e papritur në Kupën e Anglisë, nga Uigani i kategorisë së tretë, por mbetet në pretendime për të fituar gjithçka tjetër.

Titulli kampion është shumë pranë me kryesimin me shkëputje në Premier, ndërsa kalimi në çerekfinalen e Championsit është praktikisht i siguruar./abcnews.al

manchester-city.jpg
G. P.15:54 | 13/02/2018

Mançester Siti ka skuadrën më të shtrenjë të futbollit në botë. Anglezët shpresojnë që këtë dominim ta kenë edhe në fushën e lojës dhe ta fitojnë më në fund Ligën e Kampionëve

Forma është e mrekullueshme.

Mançester Siti po fluturon me të gjithë kuptimin e kësaj fjale në Premier Ligën, ndërsa skuadra angleze shpreson shumë që ky nivel ta ndihmojë në turneun që deri tani ka qenë i mallkuar për të.

A do të arrijë kryesuesja e kampionatit anglez të shkëlqejë po kaq në Europë, me pengesën e parë që është Bazeli zviceran? Besimi i tifozëve është i madh që me yje të tillë si Aguero, De Brujn, Sane, Fernandinjo apo Bernardo Silva, si dhe me trajnerin ekspert në stol, Pep Guardiola, do të mbërrijë dita e madhe.

Kapiteni me shumë përvojë, Vinsent Kompani, ka provuar zhgënjime për vite me radhë, dhe mos ndoshta është krijuar një kompleks inferioriteti?

Vinsent Kompani: “Nuk do ta quaja kompleks inferioriteti, por padyshim mungesë përvoje. Ky ka qenë faktori kryesor që na ka penguar për disa vjet me radhë, kur mund të kishim dalë më mirë. Veçse, tani kohët kanë ndryshuar. Kohët e fundit, skuadra është forcuar shumë, ka më shumë lojtarë dhe më shumë përvojë, ndaj ndihemi si në shtëpinë tonë në Champions. Ne duam të shkatërrojmë hegjemoninë e Barcelonës, Bajernit apo Realit. Kemi besim se do ta fitojmë këtë trofe, në mos këtë vit, vitin e ardhshëm apo një herë tjetër”.

Guardiola e ka fituar Championsin dy herë me Barcelonën. Trajnerin katalanas e pyetën nëse Mançester Siti mund ta fitojë gjithashtu, këtë sezon?

Pep Guardiola: “Unë nuk e di, me të vërtetë që nuk e di. Nuk mund ta dish nëse je gati apo jo. Padyshim që unë kam besim të plotë tek futbollistët e mi, por ky kompeticion është i veçantë. Mendoj se objektivi ynë është të paraqitemi më mirë sesa vjet, pra të dalim në çerekfinale. Në çdo ndeshje ne duam që të imponojmë lojën tonë dhe këtë do të përpiqemi të bëjmë sërish, por Championsi është krejtësisht i veçantë në krahasim me Premier Ligën, pasi disa nga kundërshtarët janë më të fortë. Po ashtu, janë vetëm dy ndeshje me eleminim, pra çdo gabim ndëshkohet”.

Siti u paraqit shkëlqyeshëm në fazën e grupeve, ndërsa rekordmeni i golave, Kun Aguero, e ka zëvendësuar më së miri sulmuesin e dëmtuar brazilian, Gabriel Zhezus.

Anglezët kanë skuadrën më të shtrenjtë në botë, me vlerë afërsisht 900 milionë euro dhe duan që këtë dominim financiar, ta kenë edhe në fushë.

Përballë tyre do të jetë Bazeli, në radhët e të cilit luan lojtari i kombëtares shqiptare, Taulant Xhaka, por edhe sulmuesi shqiptar, Albian Ajeti./abcnews.al

vlcsnap-error335-2-1280x720.jpg
us er19:58 | 09/01/2018

Mançester Siti është pranë marrjes së një tjetër futbollisti të rëndësishëm. Trajneri Pep Guardiola ka bërë një ofertë për sulmuesin e Arsenalit, Aleksis Sançez.

Një tjetër telenovelë pritet të përfundojë.
Pas asaj të Filip Kutinjos, edhe ajo e Aleksis Sançezit, me sulmuesin nga Kili që është shumë pranë largimit nga Arsenali.
I cilësuar si një nga lojtarët ofensivë më të mirë në botë, 29-vjeçari me shumë gjasa do të ketë destinacion të ri Mançester Sitin, pra për të mbetur po në Angli.
Trajneri i Sitit, Pep Guardiola, kërkon ta forcojë edhe më shumë skuadrën, pavarësisht se ka shpenzuar pa fund dhe ka bërë disa nga blerjet më të shtrenjta të botës.

Dëmtimi i sulmuesit brazilian, Gabriel Zhezus, bëri që Guardiola të ketë vetëm Kun Agueron si qendërsulmues tipik, ndaj nuk dëshiron të rrezikojë në një sezon shumë të ngarkuar.
Siti do të luajë shumë ndeshje në Premier Ligë, në Champions, në Kupën e Anglisë dhe në Kupën e Ligës, ndaj për të fituar kaq shumë trofe duhen mjaft lojtarë.
Arsenali e vlerëson kartonin e Sançezit në gati 40 milionë euro, por koha punon kundër londinezëve, pasi kontrata e kilenit përfundon në verë.
Për më tepër, futbollisti nuk ka pasur marrëdhënie edhe aq të mira me trajnerin e tij, Arsen Venger.

Kjo I jep mundësi Guardiolës të mos nxitohet dhe oferta e trajnerit katalanas mësohet se është më pak se 25 milionë euro.
Të shohim sesi do të përfundojë kjo histori, por më e mundshmja është që Sançez të ikë nga Londra.
Me Arsenalin fitoi Kupën e Anglisë dhe Superkupën, por me Sitin mund të fitojë shumë më tepër./abcnews.al

vlcsnap-error243-1280x720.jpg
us er16:11 | 03/01/2018

Mançester Siti u rikthye tek fitorja në Premier Ligë, menjëherë pas një barazimi të papritur. Në Angli, ndërkaq, vazhdon dueli mes Pep Guardiolës dhe Zhoze Murinjos.

Ky ekip mund të bëjë gjithçka.
Kjo ishte deklarata me besim të patundur e shkruar në reklamat elektronike në tribunat e stadiumit “Etihad” dhe Mançester Siti, bëri vërtet gjithçka edhe këtë herë.
Skuadra më e mirë e Premier Ligës dhe për momentin edhe e Europës, triumfoi 3-1 ndaj Uatfordit, duke pasur sërish në radhët e veta Kevin De Brujnin, që la pas dëmtimin, dhe David Silvën, që u kthye nga Spanja.

Pep Guardiola mund të vazhdojë të jetë krenar.
Deklarata u tha që në minutën e parë kur Rahim Stërling kaloi vendasit në epërsi, ndërsa dominimi vazhdoi gjatë.
Pa kaluar shumë kohë, Siti dyfishoi epërsinë falë një autogoli, por së pari falë lojës së tij të rrjedhshme kolektive.
Guardiola, gjithsesi, nuk mbeti shumë i kënaqur me pjesën e parë, por nuk mund të thoshte veçse fjalë lavdëruese për të dytën.
Kun Aguero shënoi golin e tretë, ndërsa shkëlqyeshëm luajtën Sane, Silva, Stërling, Fernandinjo, Otamendi apo Stouns.
Reagimi i Sitit ishte i menjëhershëm pasi humbi dy pikë në fushën e Kristël Palasit, të parat në vazhdim të 18 fitoreve radhazi.

“Ne folëm për këtë. Ishte hera e parë që humbisnim pikë pas 18 fitoreve dhe reagimin ju e patë që të gjithë. Sidomos ishim shumë mirë në pjesën e dytë, kur luajtëm një futboll fantastik. Gjithsesi, unë jam i shqetësuar për numrin e madh të ndeshjeve që po luajmë në këtë periudhë. Ne po i vrasim lojtarët, thjesht mendoni sesa shumë prej tyre janë dëmtuar në javët e fundit. E di se spektakli duhet të vazhdojë, por kjo nuk është normale. Ky është një gabim i madh në Angli, pasi ju duhet të synoni cilësinë, jo vetëm sasinë”.

Siti është i shkëputur, por jo pa asnjë rival.
Siç mund të pritej, një nga kundërshtarët kryesorë është Mançester Junajtid.
Skuadra tjetër e qytetit mbetet shumë prapa, por suksesi në fushën e Evertonit tregoi se të besuarit e Zhoze Murinjos nuk do të heqin dorë asnjëherë nga pretendimi për titull.
Jo vetëm kaq, por fitorja me golat e Marsialit dhe Lingardit, i dha mundësi Murinjos që të kalonte menjëherë në kundërsulm, pas kritikave të Pol Skoulsit për Pol Pogbanë.

“Mendoj se Skouls di vetëm të kritikojë. Ai nuk bën komente, por vetëm kritikon. Skouls ka qenë një lojtar fenomenal, një nga më të mirët që unë kam parë ndonjëherë në mesfushë, por do të mbahet mend edhe si një analist i keq. Pol Pogba nuk meriton të kritikohet kaq shumë. Shpesh ai luan shumë mirë, ndonjëherë nuk luan edhe aq mirë, diçka normale. Nuk është faji i Pogbasë që fiton më shumë para sesa ka fituar Skoulsi, por kështu e ka futbolli. Përsa i përket rezultateve, unë mendoj se skuadra ime ka një kalendar të keq. Mesa duket unë nuk kaq aq miq sa klubet e tjerë për një kalendar më të mirë”./abcnews.al

vlcsnap-error438-1-1280x720.jpg
us er16:15 | 27/11/2017

Futbolli ka humbur një talent të vërtetë me origjinë shqiptare. Sinan Bytyqi, i përzgjedhuri i Pep Guardiolës, u detyra të braktiste karrierën.

Gjithçka nisi më së miri.
Sinan Bytyqi ishte një tjetër shqiptar i Kosovës, i destinuar për të bërë emër në futbollin europian, veçse kjo histori nuk pati fund të lumtur.
I lindur në Prizren, 22 vjet më parë, i rritur si lojtar në Austri, ai gjeti ekipin e ëndrrës, Mançester Sitin, një fantazi e prerë në mes nga një sëmundje e papritur.
Bytyqi u diagnostikua me kardiomiopati hipertrofike dhe mjekët deklaruan prerë se do të rrezikonte jetën nëse vazhdonte futbollin profesionist.
Një mëkat i vërtetë dhe një dhimbje e madhe për një djalë tepër të talentuar.
Siti e mori në shtator të 2014-s, si një shpresë e madhe ende 18-vjeçare, shpejt pasi Bersant Celina ishte bërë shqiptari i parë me kontratë profesioniste në klubin anglez.
Bytyqi e tregoi menjëherë veten me ekipet e moshave duke shënuar gola e duke ndihmuar për të arritur fitore.
Në një moment, ai u mbiquajt Dejvid Bekami i ri, këtë herë jo për Mançester Junajtidin, por për Mançester Sitin.
Për të fituar përvojë, ai u huazua në Holandë tek Kamburi ku luajti për herë të parë si profesionist, si dhe tek Go Whed Igëllsi.
Jo vetëm kaq, por ai shkëlqeu edhe për ekipet kombëtare të moshave të Austrisë, duke luajtur 19 ndeshje e duke shënuar 10 gola në nivelet U17, U18, U19 e U21.
Në 2 tetor 2016, Bytyqi u bë pjesë e ekipit përfaqësues të Kosovës, duke qenë në stol në dy ndeshjet eleminatore të Botërorit ndaj Kroacisë dhe Ukrainës.
Trajneri i Sitit, Pep Guardiola, po e ndiqte Sinanin dhe e kishte marrë shënim emrin e tij.
Katalanasi madje shkoi në Holandë ku e takoi Bytyqin duke e inkurajuar të vazhdonte në ato nivele, pasi shpejt do të ishte pjesë e skuadrës së parë të Sitit.
Kjo nuk ishte e thënë të ndodhte.
Gjithsesi, klubi anglez nuk e braktisi shqiptarin e Kosovës, duke e caktuar në rolin e gjahtarit të talenteve.
Ende jo 23 vjeç, ai do të gjejë yje të rinj dhe do t’i ndihmojë që të realizojnë atë ëndërr që për të u bë e pamundur./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono