pekini

KINA-USHTRIA-1280x720.jpg
ent ela21:39 | 22/09/2018

E acaruar nga sanksionet e Uashingtonit për shkak të bashkëpunimit ushtarak me Rusinë, qeveria kineze ka thirrur për sqarim ambasadorin amerikan në Pekin, duke shprehur qëndrimin se Shtetet e Bashkuara nuk kanë të drejtë të ndërhyjnë në operacionet mes dy vendeve sovrane.

Ministria e Jashtme kineze thirri të shtunën ambasadorin e Shteteve të Bashkuara në Pekin për të protestuar ndaj vendimit të Uashingtonit për të sanksionuar ushtrinë kineze për blerjen e armatimeve nga Rusia. Mediat ndërkombëtare bëjnë me dije se ka qenë zëvendës ministri i Jashtëm, Zheng Zeguang që ka thirrur diplomatin amerikan Terri Brensted për të shprehur indinjatën e qeverisë kineze ndaj sanksioneve. Më herët, zëdhënësi i Ministrisë kineze të Mbrojtjes kishte deklaruar se, blerja e avionëve luftarakë dhe sistemeve raketore nga Rusia ishte një akt bashkëpunimi mes dy vendeve sovrane dhe se Shtetet e Bashkuara nuk kishin të drejtë të ndërhynin. Ditën e enjte, Departamenti amerikan i Shtetit vendosi sanksione ndaj Agjencisë kineze për zhvillimin e pajiseve ushtarake dhe drejtorit të saj, për bashkëpunim me eksportuesin më të madh rus të armatimeve. Një zyrtar i departamentit ka deklaruar të shtunën se, Kina është i vetmi vend që zotëron sistemin e avancuar S-400 të raketave tokë-ajër, duke shkelur sanksionet e vendosura ndaj aktiviteteve dashakeqe të Rusisë. Duke folur për agjencinë e lajmeve “Reuters”, zyrtari, i cili ka ruajtur anonimatin, ka nënvizuar se sanksionet synojnë të dëmtojnë më shumë Moskën sesa Pekinin. Masat e Uashingtonit u vendosën në kuadër të Aktit të reagimit ndaj rivalëve të Amerikës, i kthyer në ligj në vitin 2017 për të ndëshkuar Rusinë për ndërhyrjen në zgjedhjet amerikane, agresionin në Ukrainë dhe përfshirjen në luftën në Siri. /abcnews.al

KINA-SHBA-1280x720.jpg
ent ela19:45 | 11/07/2018

Plani i ri tregtar i Shteteve të Bashkuara, që parashikon vendosjen e tarifave me vlerë 200 miliardë dollarë për produktet kineze është kritikuar ashpër nga Pekini. Qeveria kineze e ka cilësuar lëvizjen e Uashingtonit një sjellje tipike të gangsterizmit tregtar.

Kina është shprehur e tronditur nga plani i Shteteve të Bashkuara për të vendosur tarifa të reja, duke përshkallëzuar kështu luftën tregtare mes dy vendeve. Në lëvizjen e fundit, Uashingtoni ka hartuar një listë me një sërë produktesh që nëse taksohen arrijnë në kuotën e 200 miliardë dollarëve. Njoftimi i palës amerikane vjen vetëm pak ditë pasi dy vendet futën në fuqi tarifat me vlerë 34 miliardë dollarë për mallrat e njëra-tjetrës dhe ka gjasa që të konkretizohet në shtator. Nga ana e tij, Pekini zyrtar e ka cilësuar manovrën e Shteteve të Bashkuara tërësisht të papranueshme e që sipas tij do të dëmtojë të gjithë botën. “Kërcënimi i fundit i Amerikës për vendosjen e tarifave prej 200 miliardë dollarësh është sjellje tipike e gangsterizmit tregtar”, ka deklaruar zëdhënësja e Ministrisë së Jashtme kineze. Ajo ka nënvizuar se qeveria kineze do të marrrë gjithashtu kundër-masat e saj, për të mbrojtur interesat e saj legjitime. Lista e re e hartuar nga Uashingtoni përfshin mbi 6 mijë artikuj, përfshirë këtu kondicionerët, duhanin, mobiljet, mallrat ushqimore, mineralet, etj. Hartimi i saj ka ardhur në kuadër të reagimit të institucioneve amerikane, që akuzojnë Kinën për shkelje të pronësisë intelektuale dhe vjedhje të teknologjisë. /abcnews.al

trump-dhe-macron-1280x658.jpg
G. P.22:37 | 27/03/2018

Pas masave drastike kundër Rusisë, Perëndimi duket se po përgatitet të veprojë në mënyrë agresive edhe kundër Kinës. Presidenti Donald Trump ka zhvilluar biseda telefonike me presidentin Macron dhe Merkel, për të përcaktuar bashkarisht praktikat tregtare ndaj gjigantit aziatik.

Presidenti amerikan, Donald Trump, ka zhvilluar këtë të martë biseda të veçanta telefonike me kancelaren Merkel dhe homologun Macron, në lidhje me praktikat tregtare të Perëndimit me Kinën. Sipas një njoftimi të Shtëpisë së Bardhë, Trump dhe Merkel diskutuan se si të bashkojnë forcat për të frenuar praktikat ekonomike të Pekinit.

Presidenti amerikan ka kritikuar vazhdimisht praktikat tregtare të superfuqisë aziatike dhe disa herë i ka kërkuar qeverisë kineze që të reduktojë përpjesëtimin e zhdrejtë me Shtetet e Bashkuara. Nga ana e saj, Merkel ftoi Trump për dialog në lidhje me politikat tregtare mes Bashkimit Europian dhe Shteteve të Bashkuara.

Kancelarja kërkoi mbajtjen e një procesi bisedimesh mes BE-së dhe Amerikës, për të gjetur një zgjidhje duke u bazuar në rregullat e sistemit të tregtisë ndërkombëtare. Ndërsa në bisedën me Macron, Trump bëri thirrje për intensifikimin e bashkëpunimit me Turqinë me qëllim zgjidhjen e krizës në Siri.

Pika për të cilën tre liderët folën njëzëri ishte vendimi i së hënës i qeverive europiane për dëbimin e diplomatëve rusë. Dëbimi i tyre ishte një përgjigje ndaj Kremlinit për sulmin me agjent nervor ndaj ish-oficerit të shërbimeve sekrete ruse në Angli, ngjarje për të cilën fajësohet Moska./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono