Patozi

astrit-patozii.jpg
R D14:04 | 24/12/2019

Qeveria e Kosovës nuk po krijohet edhe pse fituesit e zgjedhjeve të 6 tetorit dolën shpejt. Marrë shkas nga këto negociata të vështira mes Albin Kurtit dhe Isa Mustafës, ka reaguar kreu i BD-së Astrit Patozi. Ai heq një paralele mes zhvillimeve mes dy shteteve shqiptare dhe shkruan: “Kur kjo ndodh në Kosovë, pas një palë zgjedhjesh çliruese, përfytyro çfarë bëhet në këtë Shqipërinë tonë të lodhur, ku nuk ndjehet të fryjë as edhe një fllad i lehtë për të konsumuar qoftë edhe aktin e parë të ndryshimit”.

Statusi i plotë i Patozit

SHIKO KOSOVËN SOT, PËR TË KUPTUAR SHQIPËRINË NESËR

Kosova votoi qartësisht për ndryshimin, por zgjedhjet po harrohen që kur u mbajtën dhe vendi ende nuk po e ka qeverinë e re. Tashmë euforia triumfaliste e çasteve të para, plot me patos patriotik dhe entuziazëm futurist, i ka lënë vendin kalkulimeve të rëndomta pragmatiste, por edhe shndërrimi gradual i poezisë në prozë nuk duket se po ndihmon shumë.

Uroj shumë që zgjidhja të gjendet sa më shpejt, mundësisht në ditët e mbetura të këtij viti, ndonëse shenjat nuk janë shumë të mira. Ndërkohë, edhe me kaq sa po ndodh, ne të gjithë e kemi marrë të plotë mesazhin.
Është shembulli më elokuent për të parë dhe kuptuar se e keqja ka shkuar shumë larg në këto viset tona arbnore. Ku, me sa duket, edhe vullneti i shprehur pastër i sovranit, është i pamjaftueshëm për ta shkundur nga rrënjët statuskuonë. Që do të thotë se ai mund të plotësohet vetëm atëherë, kur nuk bie ndesh me interesat dhe me llogaritë e politikës së vjetër ballkanike.

Në Kosovë sot gati sa nuk po thonë që nuk duhet të ndryshojë politika nga vota e popullit, por vullneti i këtij të fundit duhet korrigjuar që të përshtatet me hallet e udhëheqësve të vet. Aq e fortë dhe këmbëngulëse është rezistenca për të mos lëshuar asnjë centimetër nga llogoret e politikës arkaike, edhe pse ajo është përgjegjëse për të gjitha dështimet dhe mossukseset e shtetit më të ri të Europës.

E pra, e gjitha kjo po ndodh në Kosovë, pas një palë zgjedhjesh çliruese, të cilat u panë gjerësisht që mund të shërbenin si frymëzim edhe për të tjerët. Përfytyro çfarë bëhet në këtë Shqipërinë tonë të lodhur, ku nuk ndjehet të fryjë as edhe një fllad i lehtë për të konsumuar qoftë edhe aktin e parë të ndryshimit: për të pasur zgjedhje normale dhe të pakontestuara, që prodhojnë një rezultat ndëshkues për politikanët e korruptuar.

Në Tiranë sot flitet për gjithçka tjetër, përveçse për një reformë të thellë zgjedhore, e cila ishte, jo vetëm një nga kushtet e forta të Bundestagut për Shqipërinë, por do të ishte edhe parakushti themelor për të shpresuar realisht se mund të kishim zgjedhje normale në vitin 2021 (sepse këtë gjoja kërkesën e ndonjë opozitari për zgjedhje të parakohshme nuk e besoj fare).

Qofsha i gabuar, por nuk kam as më të voglën pritshmëri për një reformë apo marrëveshje të qenësishme, që do të hapte një kapitull të ri për shtetin e së drejtës dhe të rendit demokratik në këtë vend. Sepse e shikoj dhe ndjej që nuk ka asnjë grimë vullneti për të prishur qetësinë e sistemit të kalbur të kryetarokracisë, i cili shërben si gjenerator për korrupsionin, arrogancën, padrejtësinë dhe abuzimin e frikshëm me pushtetin në Shqipëri.
Sot ka më shumë vlerë dhe merr më shumë vëmendje debati për fituesen e Festivalit të Këngës në RTSH apo rrahjen e Laert Vasilit, sesa perspektiva tmerrësisht e zymtë e Republikës sonë, e cila edhe kështu siç është, mezi po mbahet në këmbë.

Të më falin patriotët e xhindosur në të dy anët e kufirit nga Mini-Shengeni Ballkanik, por edhe nëse ai është realisht një problem, jam i bindur se do të kishte qenë gabimi më i vogël i Edi Ramës dhe i kësaj qeverie në këtë kohë qameti dhe tërmeti për Shqipërinë.

Ndaj edhe më vjen të qesh kur dëgjoj dhe lexoj optimistë romantikë, të cilët i tregojnë publikut ëndrrat e tyre me një Shqipëri të lulëzuar, që po lind gërmadhash, herë duke e lidhur këtë me mrekullitë që do të ndodhin pas ngritjes së SPAK-ut, e herë me vendime që janë marrë në kancelaritë më të fuqishme të botës për të shpëtuar shqiptarët nga pengmarrësit e tyre.

Shihni Kosovën sot për ta kuptuar më mirë Shqipërinë nesër! Atje, edhe pse e kanë bërë gjysmën e rrugës, çfarë nuk po heqin për të dalë në breg (gjithmonë nëse do t’ia dalin). Ndërkohë ne jemi ende shumë larg hallit të tyre, sepse nuk kemi bërë as hapin e parë, të paktën për të shpresuar në zgjedhje të pranueshme, që mund të sillnin ndryshimin.

/abcnews.al

patoziii.png
R D00:19 | 21/12/2019

Kreu i Bindjes Demokratike, Astrit Patozi duke folur në intervistën me Mustafa Nanon në “Provokacija” u shpreh me ironi se tre dinozaurët e politikës u gëzuan shumë për krijimin e SPAK-ut, duke nënkuptuar partitë e mëdha.

“Kjo është në një shoqëri që ka humbur ekuilibrin dhe ndaj kemi një politike që vegjeton sipër kënetës. Ditën që u ngrit SPAK-u u krijua ideja se ishte ditë e madhe dhe 3 dinozaurët e politikës nxituan të bënin falenderime. Një mik i imi më tha se më duken si delet kur takojnë për herë të parë ujkun. Ka një hipkrizi të madhe. Janë të njëjtët faktorë që kanë vonuar SPAK-un dhe tani gëzohen sikur SPAK-u do të hetojë viktimat e termetit dhe jo politikanët e lartë”, tha Patozi.

I pyetur nga Mustafa Nano nëse ka filluar të funksionojë reforma në drejtësi, pasi tashmë janë dënuar Tahiri dhe Salianji, Astrit Patozi u shpreh se “këto janë disa sinjale, por unë pres të ketë dënime ekzemplare dhe jo si ato të Nexhmije Hoxhës”.

Më pas Patozi iu përgjigj disa pyetjeve për veten.

Mustafa Nano: Je ai që ke qenë?

Patozi: Jam përpjekur të jem i vertete. Koncesioni më i madh i imi në politikë është: Heshtja! Pra kam heshtur edhe kur mund të flisja. Por ama kur kam vendosur të flas kam thënë atë që kam besuar.

“Unë pretendoj të jem atipik dhe jo patetitk siç janë shumica e politikanëve” tha ai.

Ndërsa për kundështarët në politike, ai tha se “sot kemi një qeveri të keqe dhe një opozitë të vogël dhe kjo mund të zgjasë nëse nuk do ketë ndonjë gjysmë revolucioni”./abcnews.al

astrit-patozi-2-1280x711.jpg
ad min18:00 | 20/05/2019

Koordinatori i Partisë Bindja Demokratike Astrit Patozi duke folur për situatën politike në vend është shprehur se nuk do dëshironte që PD-ja të kthehej në një krah refraktar në shoqërinë shqiptare. Ndër të tjera ai beson se zgjedhje vendore do mbahem më 30 Qershor. Ndërsa ka bindje që pas një viti vendi mund të shkojë në zgjedhje të parakohshme.

Mirela Milori: Ka mundësi që PD të shndërrohet pas këtyre zgjedhjeve nëse nuk hyn, në një krah refraktar të shoqërisë shqiptare?

Astrit Patozi: Jo unë nuk dua të besoj gjëra ekstreme sepse kjo është një gjë ekstreme dhe nuk e dëshiroj këtë as për Shqipërinë dhe as për ish-kolegët e mi ku tani na ndan një det i tërë bindjesh politike edhe pse me disa prej tyre ruaj komunikimin. Në se do shkohet drejt kësaj linje të gjitha gjasat janë dhe asgjë nuk përjashtohet.

Mirela Milori: Si e shikoni 30 Qershorin?

Astrit Patozi: Po qe për shërbimin sinoptik nuk e di, por uroj dhe shpresoj të jetë një ditë normale zgjedhjesh. Pas kësaj Shqipëria do njohë kryetarët e bashkive dhe këshilltarët bashkiakë në të gjithë territorin.

Mirela Milori: Më çfarë pritshmërie doni të dilni nga zgjedhjet?

Astrit Patozi: Unë i urrej sondazhet dhe them që do shkoj drejt 30 qershorit me të gjitha bateritë e nderuara.

Mirela Milori: Edhe nëse do ketë zgjedhje në 30 qershor, mendoni se do këtë zgjedhje të përgjithshme? Ky vit e gjen vendin me zgjedhje të përgjithshme parlamentare?

Astrit Patozi: Unë mendoj se do ketë zgjedhje të parakohshme dhe ka më shumë gjasa të ketë zgjedhje të parakohshme pas zgjedhjeve lokale, por të cilat mund të bëhen ndoshta pas një viti. E them këtë sepse Shqipëria cilido qoftë rezultati i cili pak a shumë dihet, por edhe vetë qeveria do ketë nevojë për zgjedhje të parakohshme sepse duhet të njohë dhe masë një faktor që është defaktorizuar, por që t’i nuk mund ta ç’bësh. Sepse pavarësisht gabimit të tyre ata sot janë zero mandate parlamentare dhe të gjitha gjasat janë që të jenë zero mandate lokale. Por ti nuk mund të thuash se ata nuk ekzistojnë. Për ta bërë të matshme edhe qeveria do të njohë se sa është pesha e opozitës dhe do t’i thërrasë shqiptarët për të votuar./abcnews.al

59747305_2348609481865608_3690188557298696192_o-1280x960.jpg
ent ela13:53 | 09/05/2019

Kolegji zgjedhor ka hedhur poshtë padinë e Partisë “Bashkimi Demokrat Shqiptar” që ka kërkuar cregjistrimin e Partisë “Bindja Demokratike” me argumentin se është shkelur ligji me urdhër politik.

Nëpërmjet një statusi koordinatori i kësaj partie Astrit Patozi e ka cilësuar si fitoren e betejës së parë politike. Për Kolegjin Zgjedhor regjistrimi i Partisë Bindja Demokratike është në përputhje me ligjin duke lënë në fuqi vendimin e Komisionit Qendror të Zgjedhjeve. /ABC news Albania 24/7

astrit-1280x730.jpg
ent ela21:44 | 08/04/2019

Demokrati Astrit Patozi është shprehur se nëse lind një alternativë e re politike në këtë moment krize, atëherë ajo do jetë e mirëpritur dhe do ketë sukses të garantuar. Këto deklarata ai i bëri në emision “Byro Politike”, ku foli edhe për analizën e Elez Biberajt që ka shkaktuar debate mes palëve në vend.

Juli Xhokaxhi: Zoti Patozi a është ky momenti kur mund të lindin alternativa të reja politike?

Astrit Patozi: Ky është një moment shumë i mirë dhe unë them që çdo alternativë e re është e mirëpritur. Unë kam lexuar me shumë kureshtje një analizë të zotit Elez Biberaj, i cili bënte një panoramë të gjendjes në Shqipëri. E çuditshme ishte, madje dhe qesharake do thoja debati që u hap për analizën e Elez Biberaj. Të dy palët akuzonin njëra-tjetrën. Por pash këta palët ndërluftuese që kanë secili mediat e tyre dhe sulmonin njëri-tjetrin për censurë të Elez Biberajt. Në fakt analiza e tij ishte brilante sipas meje dhe ishte një analizë shumë e qartë e një shqiptaro-amerikani. Edi Rama ishte vizatuar siç është tek analiza e Biberajt, po ashtu dhe Lulzim Basha, por edhe i gjithë klasa politike shqiptare në këto 30-vjet përfshirë edhe mua po të duash. Kjo klasë politike ka përgjegjësit e saj të cilat nuk i mban, ku të mbash përgjegjësi do të thotë të ikësh, të ikësh dhe fare kur duhet dhe të hysh edhe në burg nëse e ke bërë veten për burg.  E nëse nuk bëjnë këta të trija të paktën të kërkojnë ndjesë për atë që ka ndodhur, por as këtë nuk e bëjnë. Dhe tani mërziten pse ka shkruan Elez Biberaj, i cili arrin në përfundim që këta dinozaurët që ne po flasim i kanë ezauruar idetë e tyre për Shqipërinë. Këta nuk ka çfarë të japin më dhe duhet të ua lënë vendin të tjerëve, më të rinjve nëse kjo shoqëri do t’i pjellë. Dhe unë them që është momenti më oportun që çdo alternativë e re që del është e mirëpritur dhe them se ka edhe suksesin me vete./abcnews.al

patozi-2-1280x705.jpg
ent ela21:21 | 08/04/2019

Ish-deputeti i PD-së Astrit Patozi i ftuar në “Byro Politike” është shprehur se opozita duhet të hyjë në zgjedhjet vendore për të mirën e vendit.

Sipas tij, nëse Basha nuk hyn në zgjedhje atëherë ai do të hyjë në histori si njeriu që i ka dhuruar Ramës një minierë ari.

“Unë nuk dua të bëj Kasandrën, por parashikoj vështirësi shumë të mëdha për opozitën shqiptare nëse nuk do arrijë dot të futet në zgjedhje. Unë mendoj se Lulzim Basha nuk ka këllqe, nuk ka shpatulla të mbajë barrën e rëndë të nxjerrjes së PD-së nga i gjithë sistemi politik. Do mbajë barrën e rëndë të përgjegjësisë së heqjes së përfaqësimit politik të PD-së në të gjitha nivelet.

E di ç’do të thotë të mos hysh në zgjedhjet lokale, se në zgjedhje të përgjithshme edhe mund të mos hysh. Ose futesh me shpresën që mund të ketë zgjedhje të parakohshme. Por zgjedhje lokale të parakohshme nuk ka kurrë. Duhet të ishte një kambanë për Lulzim Bashën dhe për këdo tjetër se është e frikshme mospjesëmarrja në zgjedhjet lokale. Do të hyjë në histori si njeriu që i ka dhuruar Edi Ramës një minierë floriri. Në sensin që do t’i ketë kryetarët e bashkive sikundër ka drejtorët.   Nëse opozita nuk merr pjesë në zgjedhje dhe nëse nuk merr pjesë asnjë forcë tjetër relevante, sigurisht që Rama mund t’i fitojë të gjitha bashkitë. Kjo do ishte një gjë shumë e rëndë dhe e pandreqshme”, tha Patozi./abcnews.al

patozi-1-1280x661.jpg
ent ela19:48 | 25/02/2019

Për ish nënkryetarin e Partisë Demokratike Astrit Patozi, shpresa e vetme për Shqipërinë është faktori ndërkombëtar. Duke shpreshur mosbesimin e tij  për kreun e opozitës akuzon Ramën dhe Bashën që i kanë vënë zjarrin Shqipërisë dhe i vetmi arbitër mbeten ndërkombëtarët.

“I vetmi çelës që mund ta shpëtojë Shqipërinë nga një zjarr është faktori ndërkombëtar se këta të dy zjarrin e kanë vënë dhe ne thjesht do presin që mbase do qetësohen pak dhe këtë vend do marrin mendje të ftohta dhe jo të nxehta. Faktori ndërkombëtar janë shpresa e vetme, ata janë arbitri”.

Mosbesimin ndaj Bashës e sheh te pazari që bëri me Ramën, ndërsa theksoi se ai duhet të godiste sistemin dhe jo Ramën.

“Nuk i besoj Bashës edhe kur bëri pazarin edhe kur kërcënoi për luftë se është i njëjti person. Basha nuk duhet të bënte pazar me Ramën. Të lejohet gara, respekti për kiundërshtari po jo pazari. Bahsa bëri Pazar. Të ëkkrojë falje pë rherën e parë. Nuk mund të jesh hero edhe kur bëre pazarin dhe tani që ke dalë nga sistemi.

Këta që duan të gjejnë një rast të ngjashëm e kanë gjetur në Italinë e viteve ‘20 në kohën e Musolinit. Po krahasohemi me 100 vjet përpara. Ky vendim duhej të merrej me përulësi. Këtu u bë garë se kush të firmoste i pari. Basha duhet të godiste sistemin dhe jo Edi Ramën, se problemi është sistemi. Ndryshimin e bën koshienca politike”.

Djegien e mandateve e konsideron vetëvrasje ndërsa shton se PD dhe PS duhet të largojë nga sfera skifterat dhe të mendojë për një lidership të ri.

“I vetmi rast në botë ku vetëvrasja konsiderohet akt heroik. Në rast se do marrë përgjegjësitë e veta duhet të largojë nga sfera skifterat, Rama të largojë Spiropalin dhe këta të largojnë këta të rinjtë që thonë Edi Rama s’ka ku shkon. Të dy palët duhet të mendojnë për një udhëheqje. PD duhet të mendojë për një lidership tjetër po ashtu dhe PS. Se nuk mundet njëkohëshisht që dy njerëz konfliktualë të dalin nesër si dy shëptimtarë, se nuk ka sens”./abcnews.al

patoz-1280x733.jpg
ent ela19:28 | 25/02/2019

I çliruar nga emocionet partiake ish nënkryetari i PD-së Astrit Patozi ka folur në studion e Mbrëmje në ABC News për djegien e mandateve të opozitës. Sipas tij sistemi politik në Shqipëri ka mbërritur në finishin e vet dhe Shqipëria duhet ta rindërtojë atë.

“Shqipëria ka hyrë në një hulli të papreçedentë në rrafsh botëror dhe e vetmja që gjë e sigurt është pasiguria. Kushdo që thotë se e di çdo ndodhë sot nesër, pasnesër i përket dy grupeve ose është naiv, ose zjarrvënës

Situata është shumë e nderë dhe është përgjëgjësi e të dy palëve. Jam i çliruar nga emocionet partiake dhe flas si qytetar, është zgjedhja ime, por kjo nëse duam të gjejmë një gjë të mirë është se sistemi politik është në llambë të kuqe, sistemi politik ka mbërritur në finishin e vet dhe Shqipëria duhet ta rindërtojë sistemin, Shqipëria ka nevojë për marrëveshje të re, kontratë të re, që të rindërtojë sistemin se ky sistem na çoi në këtë pikë”.

Për këtë situatë ku ndodhet vendi ynë, Patozi bën përgjegjës Ramën dhe Bashën që me marrëveshjen e majit e thelluan edhe më tej krizën politike.

“Është përgjegjësi e të dy palëve se para dy vjetësh tentuan ta fusnin Shqipërinë në një spirale dhe kjo me një manovër të çastit të fundit, u evitua përmes një pazari të pistë politik që e thelloi më tej krizën dhe sot opozita është jashtë sistemit. Rama e Basha sot duhet të kishin dorëzuar pafuqinë e tyre për ditën si e kanë katandisur Shqipërinë”. /abcnews.al

patozi-astrit-1280x690.jpg
ent ela20:46 | 25/01/2019

Politikani Astrit Patozi është shprehur se dëshiron që protesta e opozitës të jetë e suksesshme. Nga ana tjetër tha se opozita nuk ka pse të presë një muaj për t’u ngritur në protestë.

“Nëse Shqipqria sot ka një situatë revolte kundër qeverisë dhe unë mendoj që mund të presësh një muaj për ta shpalosur këtë zemërim.

Unë uroj që ajo protestë të jetë e sukseshme, por ajo që unë shikoj dhe që është probmemi më i madh që ka sot lidershipi i Bashës, njerëve nuk u thuhet se çfarë përmban kjo protestë. Njerëve u thuhet se do rrëzojmë qeverinë dhe çdo opozitë kërkon rrëzimin e qeverisë. Kjo protestë duhet të ketë një oblektiv dhe njerëzit nuk duhet të gënjehen dhe zhgënjehen. Këtu ka pasur një histori gati identike me para dy vitesh kur Basha u fut në çadër.

Sa herë opozita të thotë do hyj apo jo në zgjedhjet aq më shumë do zbresi pritshmëritë tek militantët e vet në radhë të parë, te zgjedhësit shqiptarë në radhë të dytë. Votuesit sigurisht që do demotivohen sepse nuk janë të qartë nëse do hyjnë apo jo në zgjedhje. Sepse atyre u thuhet se ne nuk hyjmë në zgjedhje me Edi Ramën duke u kujtuar atë që ndodhi para dy vitesh. Unë po të isha do thoja se në zgjedhje do hyja qoftë edhe me Hitlerin. Nëse Rama do ishte Hitleri unë do hyja dhe do thoja do i fitoj zgjedhjet, sepse nuk mund të gjesh një qeveri më të rënë moralisht sesa është kjo e Edi Ramës sot. Nëse opozita do kishte bërë opozitën e saj jo vetëm për të denoncuar ajo do duhej të kishte rrezatuar shpresë do kishte fituar besimin e gjërat do ndryshonin me ardhjen e saj dhe jo të ndryshohen dy njerëz”./abcnews.al

patozi-1280x678.jpg
ent ela20:29 | 25/01/2019

Demokrati Astrit Patozi i ftuar në “Provokacija” është shprehur se pakënaqësia e shqiptarëve ndaj politikës të kthehet në një lëvizje politike, e cila t’i japë vendit alternativë të re. Duke folur për protestën e studentëve ai tha se ishte një sinjal i keq për opozitën dhe një grusht për qeverinë.

“Ky është sinjali i keq e para për opozitën. Për qeverinë ku Edi Rama thotë se ishte shuplakë, unë do të thoja grusht hundëve ishte sepse rrëzoi treçerekun e qeverisë në njëfarë mënyre. Studentët janë sipas meje prerja më e mirë e stadit e situatës në të cilën ndodhet qeveria shqiptare. Revolta ekziston dhe ajo është edhe me qeverinë edhe me opozitën. Kjo është një revoltë e dobishme sesa të ishte kundër njërës. 

Kjo është një revoltë e cila shpresoj të ketë frute. Kjo lloj pakënaqësie duhet të përkthete në një lëzizje politikie e cila duhet t’i japë vendit një alternativë tjetër. Ne sot jemi kthyer në një vend ku nuk ke mundësi të zgjedhësh. Në Shqipëri sot duhet të jesh ose me Ramën ose me Bashën. Nuk lejohet të jesh i distancuar nga të dy. Ka shqiptarë që nuk e pranojnë këtë lloj mungese lirie për të zgjedhur. Këta shqiptarë nuk mund të rrinë. Shqipëria nuk mund të rrijë peng”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono