Partizani

KUKESI-PARTIZANI-FITORJA.mpg_snapshot_00.06-1280x720.jpg
ent ela15:00 | 24/08/2019

Kukësi bindi trajnerin e tij Shpëtim Duro, duke mundur Partizanin në startin e Superligës. Trajneri i kryeqytetasve, Franko Lerda, pranoi gabimet e ekipit të tij.

Superkupa iku e shkoi dhe hareja duhej të kishte zgjatur diçka më pak tek fituesit.

Partizani doli për herë të dytë në pak ditë në fushën e “Elbasan Arenës”, duke pasur përballë sërish Kukësin, tashmë në ndeshjen e parë të kampionatit, dhe kuptoi se nuk do ta ketë të lehtë për të mbrojtur titullin.

U mund nga nënkampionët dhe nga ata që shihen si rivalët kryesorë të kampionëve (të shohim si do të jetë Tirana), të cilët bënë gjoja sikur luajtën në fushën e tyre, për t’u gjendur përsëri në Elbasan.

Kur një ekip mund kundërshtarin kryesor duke luajtur në fushë asnjanëse, kjo është shenjë se ai e ka seriozisht me pretendimet për trofeun.

Kjo duhet thënë për kuksianët, që u drejtuan nga Shpëtim Duro, partizanas 24-karatësh, por që profesioni “me valixhe” në dorë, e ka bërë që të falë besnikërinë aty ku punon.

Ndryshe nga Superkupa, Kukësi e nisi ndeshjen mirë, duke përballuar Partizanin në fushë të hapur e duke e mbyllur në avantazh pjesën e parë.

E pati më të vështirë pas pushimit, duke u ndërruar rolet në krahasim me finalen, por ia doli ndihmuar edhe nga shtylla.

Vendosi goli i Shkurtajt, ndërsa të kuqtë e patën në tribunë një nga lojtarët kryesorë, Jasir Asanin, që duket se do të transferohet jashtë vendit.

Trajneri i kryeqytetasve, Franko Lerda, pranoi gabimet e ekipit të tij.

Për Duron, Kukësi ka nevojë ende për përforcime, por presidenti Gjici mendon se ekipi i ka të gjitha për të dalë kampion, edhe pse nuk luan ende në fushën e tij. /ABC News Albania 24/7

partizani-3.jpg
G. P.21:04 | 19/08/2019

Pas një ndeshje me shumë ritëm e gola, trajneri i Kukësit konstaton që skuadra duhet të ishte më e vëmendshme në mbrojtje. Ndërsa homologu i tij mendon se ky start shërben shumë për një kampionat të gjatë dhe ku do të ketë shumë rivalitet.

Partizani e Kukësi prodhuan një finale superkupe me ritëm gola dhe emocione. Pavarësisht faktit që kishte një fitues, dhe kampionët morën një tjetër trofe, sërish të dyja formacionet dhanë sinjalet që do të shkojnë gjatë në betejën rivalizuese me njeri-tjetrin në këtë edicion.

Do të takohen për pak ditë bashkë sërish në “Elbasan Arena”, aty ku është e vështirë të sjellësh njerëz në stadium. Kampionët dhe nënkampionët e vjetshëm do të ngrenë siparin e kampionatit të 81-të kombëtar ditën e premte.

Megjithatë, si Duro ashtu edhe Lerda e njohin disi më mirë tashmë jo vetëm njeri-tjetrin, por edhe lojën. Pas sfidës së ditës së djelë, Duro është I bindur që ia dhuroi më shumë Kukësi trofeun se sa vetë e fitoi Partizani.

Nga ana e tij, trajneri mendon se kjo ndeshje vuri në vështirësi skuadrën që drejton në disa momente, por shërben shumë për një start kampionati me moral të lartë. Për trajnerin e të kuqve, 3-4 skuadra do të provojnë deri në fund të rivalizojnë.

Superkupa u arshivua, tashmë skuadrat ritakohen bashkë të premten. Gara ka nisur. Nuk mungojnë golat, as rivalët, as loja, as merkato, por tifozët. Të dielën nuk ishin, efekti i të nxehtit, që mund të jetë po i tillë të premten. Sidoqoftë pjesa e tifozerisë në stadium, përveç derbit, mbetet pjesa më e painvestuar dhe më e pasensibilizuar e klubeve./ABC News Albania 24/7

partizani-2.jpg
G. P.14:53 | 19/08/2019

Përcaktohet axhenda e javës së parë të kampionatit kombëtar të futbollit. Edicioni i ri i Kategorisë Superiore starton këtë të premten. Pas superkupës kalendari risjell sërish sfidën Kukësi-Partizani, ndeshjen që do të ngrejë siparin e sezonit 2019-2020.

Si për ironi të fatit, dhe koincidencë të kalendarit sërish Kukësi e Partizani kthehen të luajnë bashkë të premten, në “Elbasan Arena”në sfidën e parë hapëse të kampionatit të 81-të kombëtar të futbollit.

Edhe për disa kohë do të duhet që Kukësi të luajë në fushë neutral deri në përfundim të stadiumit të ri, punimet e të cilit kanë nisur. Kështu, kampionati do të çelë siparin ditën e premte në orën 19:00, në “Elbasan Arena”. Katër sfidat e tjera të javës së parë janë planifikuar të zhvillohen ditën e shtunë.

Në orën 16:00 do të zhvillohen përballjet mes Vllaznisë dhe Laçit dhe Skënderbeu-Flamurtari. Ndërsa në orën 19:00, nën dritën e projektorëve do të zhvillohen edhe 2 sfidat e tjera, Tirana-Luftëtari dhe Teuta-Bylis.

Ky edicion la sërish në fuqi skuadrat që vjet luajtën duke rikthyer në elitën e futbollit shqiptar Vllazninë dhe Bylisin, teksa Kastrioti ra në Kategorinë e parë ndërsa Kamza u përjashtua.

Ndërkaq, sipas rregullores merkato do të vijojë deri në datën 31 Gusht, ndërkohë që skuadrat tashmë janë në etapën e fundit të përforcimeve të tyre. Kukësi-Partizani prodhoi rivalitet shumë të madh në Superkupë ditën e dielë në një kohë që parashikohet si një sfidë rivalësh për titull deri në fund.

Ndërkaq, edhe Tirana shikohet si një pretendente e fortë për titullin, në një kohë që ka qenë shumë aktive me prurjet e saj në këtë merkato vere. Ky kampionat u përfol shumë gjatë ditëve të Korrikut që mund të kishte një shtyrje për shkak të problemeve me disa klube, por definitivisht nis sipas datave të caktuara./ABC News Albania 24/7

franko-lerda-2.jpg
Sej rie18:45 | 17/08/2019

Trajneri i Partizanit, Franko Lerda, shpreson që skuadra e tij të nisë sezonin me një fitore në Superkupë, për të dhënë sinjalin e parë të edicionit. Sipas tij, jo të gjithë elementët e skuadrës janë në kushtet optimale, fizike dhe teknike. Ai shmang të komentojë mbi deklaratat e Duros, në një kohë që konfirmon që ka ardhur në këtë klub të punojë vetëm për fushën, jo për merkaton.

Edhe lojë dinjitoze, por natyrisht duam që trofeu të shkojë në klub. Do të jetë prova dhe Shansi i parë I trajnerit Lerda që të mund të marrë një trofe. Në daljen publike të tij, një ditë përpara sfidës me Kukësin, tekniku Italian i skuadrës kampione beson se skuadra mund ta nisë mirë edicionin. Sidoqoftë vetë trajneri ka bërë të qartë se ende ekipi nuk është në maksimumin e duhur.

 “Ne jemi gati për ta nisur mirë këtë sezon, kemi dëshirën të bëjmë tonin këtë trofe për ta nisur mirë sezonin. Skuadra po punon shumë mirë, ende nuk kemi të gjithë efektivët në kushtet optimale se kemi pasur përgatitje me emra që janë afruar më vonë. Por po punojmë që të gjithë të jenë sa më gati edhe në aspektin fizik, edhe atë teknik. Ne jemi përgatitur se e parashikon rregulloja, ndaj kemi bërë stërvitje edhe pjesën e penalltive”.

Në lidhje me merkaton dhe largimin e Mensah në një farë mënyre trajneri Lerda theksoi se për këtë çështje duhet të merrni përgjigje nga klubi. Sipas tij, merret klubi, pasi vetë ai përgjigjet vetëm për fushën e lojës.

 “Kam ardhur në një vend të huaj, në një kampionat që nuk njoh, me një skuadër që ka fituar titullin, me drejtues që kanë ndërtuar një ekip që funksionon se ndrysh nuk do të fitonte. Nga trajnerët jam si natyre prej atyre që i besojnë klubit, ka edhe teknikë-menaxherë por unë i besoj kësaj skeme”,- përfundoi Lerda./ABC News Albania

duro-1280x729.jpg
Sej rie16:45 | 17/08/2019

Në vigjilje të ndeshjes finale të Superkupës së Shqipërisë, mes Partizanit dhe Kukësit, trajneri i ri I skuadrës së Kukësit Shpëtim Duro mendon se skuadra është gati të përballë kampionët. Sipas Duros, disa ardhje të fundit në skuadër duan kohën e tyre që të harmonizohen me ekipin. Trajneri nuk mendon penalltitë për finalen e nesërme, por  do të tentojë të bllokojë Partizanin, me gjithë ndryshimet e bëra nga Lerda.

E diela e 18 Gushtit hap zyrtarisht edhe sezonin e ri të futbollit. Partizani përballë Kukësit, në sfidën për trofeun e Superkupës. Duro, trajneri I ri i veriorëve në provën e tij të parë përballë ish-skuadrës që e njeh dhe e ka ndjekur jo pak, Partizanit, që pas Gegës kampion ka marrë filtër Italian. Për trajnerin e Kukësit, Shpëtim Duro penalltitë nuk janë menduar pasi kërkohet të arrihet suksesi në 90 minuta, edhe pse kjo nuk varet nga Shpëtimi, pavarësisht dëshirës. Për ish-trajnerin e Partizanit, kjo skuadër ka më pak avancë në përgatitje, pasi luajti edhe në Evropë.

“Partizani, duke iu referuar ndeshjeve të fundit në Evropë, është më para. Kukësi ka ndryshime, sepse janë larguar tre lojtarë bazë, si Çuçuli, Rrumbullaku dhe Rama. Janë linja e krahut të majtë. Kemi punuar gjithë javën, për t’i zëvendësuar, dhe për ta përgatitur këtë takim. Ne jemi përgatitur, Partizani atë fizionomi ka. Më shumë ka qenë ekip racional, por me rendiment. Edhe ndaj Sherifit, ajo skuadër ka qenë. Ka ndryshuar pak vendosjen për sa i përket skemës. Ne kemi punuar, që të përgjigjemi me atë skemë që ka Partizani”.

E ndërkaq, në aspektin përgatitor vetë trajneri do të donte që kampionati të shtyhej me dy javë, kjo për të patur më shumë hapësirë për të punuar.

Superkupa vendoset nesër por shumë shpejt do të nisë kampionati. Tekniku që ka objektivin të rishpallë Kukësin kampion, mendon që asgjë nuk është e pamundur, pasi me disa lëvizje të vogla, ekipi do të jetë tërësisht gati:

“Ndonjëherë ato skuadra që kanë pretendime, kanë përgjegjësi më të mëdha se ato që formohen në fund. E mbani mend Danimarkën, që u shpall kampione Evrope? Pasi erdhën nga plazhi. Futbolli është i çuditshëm, duhet përqendrim. Këtë vit, ekipet kanë qenë të kujdesshme, dhe e shoh që do jetë një kampionat i niveli të mirë. Vjet, nuk ka pasur rivalitet. Ka qenë vetëm Partizani dhe Kukësi. Të tjerat kanë qenë në disnivel”.

Partizani-Kukësi në finalen e Superkupës do të çelë edhe sezonin e këtij viti në futbollin shqiptar, për ti lënë më pas vendin startit të kampionatit që u vendos të niste me të njëjtat skuadra, edhe pse gjërat pritet të rregullohen rrugës./ABC News Albania 24/7

tirana-partizani-1.jpg
Sej rie17:00 | 09/08/2019

Skuadra e Partizanit ka vendosur të huazoje për një sezon tek skuadra e Dritës futbollistin Lukas Ferreira Kardoso. Futbollisti në fjalë nuk ishte në planet e trajnerit Italian Franko Lerda çka solli dhe lëvizjen drejt kampionatit të Kosovës.

Klubi zyrtarizon transferimin e Lukas Ferreira Kardoso tek skuadra e Dritës. Sulmuesi 25 – vjeçar i cili iu bashkua kampionëve në Janarin e 2018 nga Pelisteri, do të kalojë me formulën e huazimit në radhët e ekipit kosovar Drita. Marrëveshja është arritur sot me pëlqimin e të 3 palëve dhe Kardoso do të jetë lojtar i Dritës deri në përfundim të sezonit futbollistik 2019 – 2020, njofton skuadra e Partizanit. Levizje edhe tek Tirana. Klubi kryeqytetas ka zyrtarizuar mbrojtësin Kristi Vangjeli nga radhët e skuadrës së Skënderbeut. Klubi bardheblu njofton se futbollisti ka nënshkruar kontrate një vjeçare me Tiranën.

“Mbrojtësi korçar ka nënshkruar marrëveshjen që e bën pjesë të Tiranës për një sezon. Vangjeli vjen si një përforcim me shume vlera për skuadrën bardheblu. Ish futbollisti i Skënderbeut do ti bashkohet Tiranës në ditët e fundit të muajit Gusht”, njofton skuadra e Tiranës./ABC News Albania 24/7

TIRANA-DHE-PARTIZANI-DEKLARATAT.mpg_snapshot_00.00-1-1280x720.jpg
Sej rie15:15 | 09/08/2019

Juljan Ahmataj dhe Bledar Devolli janë zyrtarisht pjesë e Tiranës. Dy trajnerët shqiptarë do të jenë pjesë e strukturave të klubit ndërkohë që lajmi është konfirmuar nga vetë skuadra kryeqytetase. Ahmataj do të drejtoje skuadrën e 17-vjeçareve ndërkohë që Devolli ka marrë drejtimin e 19 – vjeçarëve. Skuadra e Tiranës Ben me dije se prioritet për edicionin e ardhshëm është Akademia dhe Infrastruktura.

“Julian Ahmataj është zyrtarisht pjesë e KF Tiranë në rolin e Scoutit dhe atë të trajnerit të ekipit U-17. Klubi ka zgjedhur të investoje këtë sezon jo vetëm në përforcimin e skuadrës me emra të rëndësishëm, por dhe në strukturë me afrimin dy trajnerëve të afirmuar që më parë kanë qenë dhe pjesë e Tiranës. Bledar Devolli do të marrë drejtimin e Tiranës U19, Ahmataj drejtimin e Tiranës U17. Akademia këtë vit do të jetë një nga prioritetet e klubit ku do të investohet shumë në infrastrukturë dhe burime njerëzore. Hedhim poshtë kështu, të gjithë spekulimet në lidhje me zhvillimet e fundit në klubin bardheblu”, njofton skuadra e Tiranës.

Asani-Partizani.jpg
Sej rie22:00 | 03/08/2019

Jasir Asani është shumë pranë largimit nga Partizani. Klubi kryeqytetas kërkon 400 000 euro për kartonin e futbollistit që shënoi gol në Moldavi, në Ligën e Evropës.

Në Moldavi ishte i ndjekur special.

Jasir Asani nuk i nxorri huq menaxherët që kishin mbërritur në stadiumin e Tiraspolit, duke shënuar golin e Partizanit në Ligën e Evropës, e duke fituar betejën personale.

Pavarësisht eleminimit të kampionëve të Shqipërisë, sulmuesi 24-vjeçar e bëri të vetën, dhe me shumë gjasë transferimi për në një ligë tjetër është shumë pranë.

Në Turqi apo diku tjetër, kjo pritet të shihet, ndërsa ai ishte në vëzhgim të menaxherëve të dy klubeve turq.

Partizani i ka vendosur një klauzolë 400 000 euro kartonit të tij, ndërsa Asani mbetet në kontratë.

Shqiptari i Maqedonisë së Veriut ishte padyshim një nga futbollistët më të rëndësishëm në sezonin që solli titullin e parë në 26 vjet për Partizanin.

Ai shënoi mjaft gola vendimtarë, si ndaj Kukësit, Teutës apo Kamzës, si dhe shërbeu pasime goli.

Mjaft i talentuar, i shpejtë e me vizion loje, si dhe mjaft punëtor, Asani ishte ndër lojtarët kryesorë të trajnerit Skënder Gega.

Bashkë me të, Partizani pret të transferojë edhe dy lojtarë të tjerë të rëndësishëm si Esat Malën dhe Lorenc Trashin./ABC News Albania 24/7

partizani-1.jpg
G. P.14:48 | 02/08/2019

Partizani është skuadra e fundit shqiptare që përfundon aventurën në Europë. Në 10 takime, skuadrat e superiores kanë fituar vetëm 1 ndeshje ndërkohë që kanë shënuar 4 gola dhe kanë pësuar plot 13.

Aventura e klubeve shqiptare në Kupat e Europës këtë edicion ka rezultuar një dështim. Katër skuadrat shqiptare Partizani, Kukësi, Teuta dhe Laçi nuk kaluan asnjë tur.

Kampionët e Shqipërisë u eliminuan në turin e parë të Champions ndaj Karabag dhe kaluan automatikisht në turin e dytë të Europa League ku dështuan sërish për të vijuar rrugëtimin në Europë.

Ne 10 takimet, skuadrat shqiptare regjistrojnë 5 humbje, 4 barazime dhe vetëm një fitore ndërkohë që kanë shënuar 4 gola dhe kanë pësuar plot 13. Statistika vërtetë shqetësuese duke analizuar edhe kundërshtarët të cilët janë emra të vegjël në arenën europiane.

Nënkampionët e Shqipërisë, Kukësi humbën ndeshjen e parë ndaj Debrecen me shifrat 3-0 ndërkohë që në sfidën e kthimit barazuan me rezultatin 1-1 në “Elbasan Arena”.

Teuta e trajnerit Bledi Shkëmbi është skuadra e vetme shqiptare që regjistroi një fitore në aventurën europiane. Ndaj Ventspils humbën 3-0 në takimin e parë ndërkohë që në sfidën e kthimit në Durrës fituan minimalisht 1-0. Sa i përket skuadrës së Laçit, kurbinasit barazuan në shtëpi përballë Hapoel Bersheva me shifrat 1-1 ndërkohë që një javë më pas në Izrael u mundën minimalisht 1-0.

Edhe merkatoja intensive e klubeve shqiptare para startit të aventurës europiane nuk rezultoi e suksesshme. Tashmë nuk ka mbetur gjë tjetër veçse përgatitjeve për sezonin e ardhshëm në kategorinë superiore./ABC News Albania 24/7

partizaniii.jpg
G. P.13:37 | 02/08/2019

Eliminimi i Partizanit nga Europa League pas një goli nga pozicioni jashtë loje ka lënë një shije të hidhur tek trajneri Franko Lerda. Italiani theksoi pas ndeshjes se padrejtësitë ndodhin pasi jemi një vend i vogël.

Eliminimi i Partizani nga Europa League pas një goli dukshëm në pozicion jashtë loje ka irrituar jo pak trajnerin e të kuqve Franko Lerda. Tekniku italian ka theksuar se jemi vend i vogël ndaj dhe ndodhin të tilla raste. Ndër të tjera, Lerda përgëzon futbollistët e Partizanit për ndeshjen e zhvilluar.

“Kjo është gjëja më negative absolutisht në futboll. Mund të humbësh e fitosh ndeshje, por në këtë mënyrë të shqetëson shumë. Jemi vend i vogël dhe ndodhin këto raste të dyshimta. Gjyqtari o duhet të ngrejë flamurin ose jo, nuk ka asgjë për të ndryshuar vendimin. Është e kotë të flasim për rezultat. Komplimente djemve, edhe atyre në pankinë e në tribunë se kanë bërë gjithçka si duhet. Kemi qenë bashkë, kemi dhënë maksimumin dhe mund të merrnim diçka më shumë. Djemve nuk mund t’u them gjë tjetër, kemi bërë tre ndeshje ne lartësinë e duhur, kanë mbajtur lart figurën e Partizanit. Nuk mund ta quaj katastrofë ndeshjen e parë ndaj Sherif në Tiranë, të gjithë kanë bërë mirë. Të jenë krenarë, shumë krenarë se kemi dalë me kokën lart. Kemi luajtur me personaliet duke u munduar te bëjmë lojën, kjo është rruga e duhur. Dalim ne kokën lart, nuk e meritonim këtë eliminim”.

Skuadra e Partizanit tashme do të përgatitet për startin e kampionatit ku synimi kryesor është mbrojtja e titullit kampion./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono