parlamenti europian

PARLAMENTI-EUROPIAN-PER-SHQIPERINE-1280x720.jpg
in a13:42 | 18/02/2020

Delegacioni i Lega Nord në Parlamentin Europian duhet të marrë nga 6 në 27 deputetë, duke u bërë delegacioni më i madh pas CDU gjermane. Është ky rezultati që del nga sondazhet e para të parlamentit europian në kuadër të zgjedhjeve europiane të muajit maj.

Lëvizja me pesë yje duhet të kalojë nga 14 në 22 deputetë. Rënie shënon Partia Demokratike dhe Forza Italia që mund të mbeten me 15 dhe 8 deputetë nga 31 dhe 13 që kanë aktualisht. Sondazhi projekton katër depuettë italianë për grupin e konservatorëve dhe reformistët europianë të cilëve iu përket Frateli d’Italia.

Fronti sovranist bazuar në sondazhet kombëtare, avancon në parlamentin europian, duke bërë të mundur që në parlament të ketë deri në 130 deputetë, nëse merren në konsideratë dhe 12 depuetët e Alternativës për Gjermaninë së bashku me parti të tjera të vogla.

Por çdo gjë mbetet ende në diskutim sepse nuk dihet ende se çfarë do të bëjnë partitë apo lëvizjet e tjera si lëvizja me pesë yje dhe Macron. Sipas po të njëjtit sondazh, Partia Popullore Europiane duhet të marrë 183 vende, duke humbur 34 deputetë nga 217 që ka aktualisht.

Grupi i socialistëve dhe demokratëve duhet të konfirmohet si forcë e dytë me 135 vende, me një humbje prej 51 deputetësh në krahasim 186 që ka momentalisht. Aleanca e Aliberalëve dhe Demokratëve duhet të konfirmohet si forcë e tretë me 75 vende. Por në këto sondazhe nuk janë përfshirë të zgjedhurit e listës së partisë së Emmanuel Macron në Francë me partinë e tij En Marsh.

Dy grupet kryesore të Parlamentit Europian, Partia Popullore Europiane dhe Socialdemokratët për herë të parë zbresin nën 50 për qind. Ndërsa në 2014-ën kishin 55 për qind të vendeve në Parlamentin Europian.

Këto rezultate bazohen në sondazhe kombëtare ekzistuese dhe që konsiderohen të besueshme, si dhe në numrin e vendeve në parlamentin europian pas Brexit, që do të kalojnë nga 751 aktualisht në 705 si pasojë e daljes së Mbretërisë së Bashkuar./abcnews.al

pe.jpg
in a19:03 | 28/01/2020

Parlamenti Europian bashkon forcat me Komisionin Europian për hapjen e negociatave të anëtarësimit me Shqipërinë dhe Maqedoninë e Veriut dhe çuarjen përpara të procesit të zgjerimit të Bashkimit Europian.

Presidenti i këtij institucioni, David Sassoli ftoi kryetarët e parlamenteve të Ballkanit në një samit për Ballkanin në Bruksel, ku morën pjesë edhe përfaqësues të presidencës kroate. Në deklaratën e përbashkët të Samitit, pika më e rëndësishme është thirrja drejtuar Këshillit Europian për një mesazh politik të qartë dhe pozitiv për hapjen e negociatave të anëtarësimit dhe dhënien e statusit të kandidatit për vendet e përfshira në proçesin e zgjerimit të BE-së.

“Në Parlament ka një vullnet shumë të madh për procesin e zgjerimit të BE-së. Ne jemi përballur me pengesa gjatë vlerësimit të 3 ndër 28 shteteve anëtare dhe një gatishmëri të madhe të Parlamentit dhe Komisionit Europian për të ecur përpara. Shpresoj që kjo vendosmëri të mund të kthehet në fillim të hapjes së negociatave të anëtarësimit me këto vende dhe bashkëpunim frytdhënës me të tjerë”, deklaroi presidenti i PE-së, David Sassoli.

Vetë presidenti Sassoli theksoi se kjo qartësi duhet të vijë së pari si një dritë jeshile për hapjen e negociatave të anëtarësimit me Shqipërinë dhe Maqedoninë e Veriut.

“Besoj se në muajt e ardhshëm ka një mundësi për hapjen e negociatave të anëtarësimit me Shqipërinë dhe Maqedoninë e Veriut”, tha ai.

Në deklaratën e përbashkët thuhet, se Samiti i Zagrebit mund të luajë një rol kryesor në rivendosjen e besueshmërisë së politikës së zgjerimit. Aty konfirmohet angazhimi i parlamenteve të Ballkanit për të marrë pjesë në reflektimet për një “qasje të përtërirë” për zgjerimin. Konkretisht, për ta bërë këtë proces më demokratik, më transparent dhe më të afërt me qytetarët dhe shoqërinë civile, ku sundimi i ligjit mbetet gur themel. Në deklaratë, thuhet, se parlamentet e Ballkanit përkushtohen të punojnë së bashku për të forcuar demokracinë parlamentare dhe dimensionin parlamentar të procesit të zgjerimit, si dhe për të thelluar kulturën parlamentare të bazuar në ndërtimin e konsensusit përmes një dialogu të hapur, gjithëpërfshirës dhe jo-konfrontues. Deklarata e përbashkët bën thirrje edhe për asocimin e plotë të 6 vendeve të Ballkanit në konferencën për të ardhmen e Evropës./abcnews.al

ori-1-1280x776.jpg
in a14:24 | 07/01/2020

Parlamenti Europian i njeh statusin e eurodeputetit liderit katalanas pro pavarësisë, Oriol Junkueras. Politikani aktualisht ndodhet në burg në Spanjë ku vuan dënimin prej 13 vitesh, dhe ku statusi i tij është ende i paqartë dhe në pritje të një resolute.

Parlamenti Europian konfirmoi gjithashtu se edhe Çarls Puixhdemon dhe Toni Komin, aktualisht në arrati në Belgjikë, janë deputetë europianë duke marrë një ditë më parë zyrtarisht, titujt përkatës.

Gjatë seancës parlamentare të ardhshme Parlamenti Europian do të mbajë shënim zyrtarisht statusin e tyre.
Vendimi i Parlamentit Europian vjen pas vendimit të Gjykatës Europiane që në muajin dhjetor të vitit që lamë pas vendosi se imuniteti parlamentar përfitohet pas shpalljes së rezultateve zyrtare të zgjedhjeve.

Me anë të një mesazhi në “Twiter”, Oriol Junkueras u shpreh se nuk kishte çfarë të shtonte tjetër, dhe pse nuk është e qartë se si do e mbulojë rolin e tij në Parlamentin Europian. Në Spanjë Këshilli Qendror Zgjedhor vendosi se Junkueras nuk mund të ushtrojë mandatin e tij./abcnews.al

media-2.jpg
nev ila17:32 | 19/12/2019

Vendimi i qeverisë për të miratuar paketën anti-shpifje është kundështuar nga Partitë Popullore Europiane. Raporteri për Shqipërinë në Parlamentin Europian, David Lega kujtoi se ligjet e miratuara janë në kundështim me ato që ndërkombëtarët sygjeruan. Edhe Koordinatori i PPE për Punët e Jashtme, Michael Gahler foli për kërcënim serioz të lirisë së medias pas ligjeve të miratuara nga maxhoranca në Kuvend.

David Lega paralajmëroi për atë që mund të ndodhë me median pas miratimit të ligjeve që rrisin sanksionet ndaj gazetarëve.

“ Liria e mediave dhe e drejta e informacionit janë liritë themelore në Europë dhe një pjesë e pazëvendësueshme e kritereve të Kopenhagenit për anëtarësimin në BE. Legjislacioni i miratuar kërcënon këto liri që janë fituar kohë më parë nga populli shqiptar. Media e lirë ka raportuar vazhdimisht për abuzimin me pushtetin dhe ka ekspozuar shumë skandale korruptive. Prandaj, miratimi duhet të shihet si një kthim serioz mbrapa për Shqipërinë në rrugën e saj drejt sundimit të ligjit dhe demokracisë”, tha ai.

Koordinatori i PPE-së për Punët e Jashtme, Michael Gahler kujtoi se ligjet e miratuar nga qeveria bien ndesh me praktikën ndërkombëtare për mediat.

“Ne vërejmë me shqetësim të thellë që shumica parlamentare e qeverisë shqiptare, e udhëhequr nga Kryeministri socialist Rama, miratoi dhe dy ligje për median në kundërshtim të hapur me rekomandimet specifike të bashkësisë ndërkombëtare. Komisioni Evropian, Këshilli i Europës, si dhe media dhe organizatat shqiptare dhe ndërkombëtare të shoqërisë civile kishin shprehur kundërshtime të forta kundër këtyre ligjeve”, u shpreh Gahler.

Organizatat ndërkombëtare të medias dolën të gjitha në mbështetje të shoqatave të gazetarëve në Shqipëri për paketën ligjore që qeveria maxhoranca kaloi në Kuvend mbrëmjen e të mëkurës. /abcnews.al

isabel-santos.jpg
nev ila18:35 | 07/12/2019

Në një intervistë për Abc News, raportuesja për Shqipërinë në Parlamentin Europian, Izabel Santos shprehet se Shqipëria duhet të vijojë reformat pasi edhe procesi i hapjes së negociatave me Bashkimin Europian nuk do të ndalet.

Pyetje: Zonja Santos, ju jeni raportuese për Shqipërinë në Parlamentin Europian. Në vijim të mosmarrjes së vendimit për hapjen e negociatave të anëtarësimit me Shqipërinë dhe Maqedoninë e Veriut në samitin e 17 dhe 18 tetorit, janë krijuar dy grupe shtetesh anëtare. Një grup që mbështet propozimin francez për reformimin e procesit të zgjerimit dhe një grup tjetër që e pranon këtë reformim, por kërkon paralelisht hapjen e negociatave të anëtarësimit me të dyja vendet. Cili është qëndrimi juaj ?

Isabel Santos, raportuese për Shqipërinë në PE: Metodologjia aktuale është shumë burokratike dhe nuk i përgjigjet nevojave të vërteta të vendeve kandidate dhe as të Bashkimit Europian. Vitet kalojnë, realiteti po ndryshon dhe ne mund ta përmirësojmë procesin. Nga ana tjetër kemi hapjen e negociatave të anëtarësimit të Shqipërisë dhe Maqedonisë së Veriut dhe të gjithë këtu në Parlamentin Europian konsiderojnë se duhet të ecim përpara me këtë proces. Ne nuk mund të ndalim hapjen e negociatave të anëtarësimit me Shqipërinë dhe Maqedoninë e Veriut. E vetmja gjë që ne i kërkojmë Shqipërisë është që të mos ndalë reformat. Mos e shihni mungesën e vendimit të shteteve anëtare të Bashkimit Europian si një sinjal që procesi i reformave duhet ndalur. Jo. Në jetën politike, ashtu si në jetën tonë të përditshme, kemi dy opsione: Ose të heqim dorë nga objektivi, ose të përpiqemi edhe më shumë për ta arritur atë. Është e vërtetë që kemi një moment i vështirë. Por ky moment i vështirë mund të na shërbejë si një impuls nëse duam ta kapërcejmë këtë krizë të vogël.

 Pyetje: A është Parlamenti Europian në sinkron me të gjitha institucionet europiane për reformat ?

Isabel Santos, raportuese për Shqipërinë në PE: Sigurisht, se ato nuk bëhen për shkak të një kërkese të Bashkimin Europian. Ato janë tê rëndësishme për Shqipërinë dhe qytetarët shqiptarë dhe rrjedhimisht, politikanët dhe shoqëria shqiptare duhet të vijojë me këto reforma. Procesi i anëtarësimit ka qenë shumë i rëndësishëm për transformimin e vendit tim Portugalisë, që para kësaj faze ishte shumë i varfër. Brezi im është dëshmitar i transformimit të rëndësishëm që procesi i anëtarësimit solli për forcimin e demokracisë, për mënyrën dhe standardet e jetesës, për rritjen ekonomike, punësimin, arsimin, shëndetësinë, apo bujqësinë. Gjithçka. Ndryshimi midis momentit kur vendi u bë anëtar dhe para anëtarësimit është kaq i madh, sa kjo tregon qartësisht se sa i rëndësishëm është kalimi përmes këtyre reformave. Sigurisht që disa prej reformave kërkojnë sakrifica të mëdha dhe përpjekje gjigande. Por Shqipëria duhet të lëvizë drejt kësaj rruge për të qenë pjesë e këtij projekti të demokracisë, paqes, stabilitetit, dhe prosperitetit, pasi ajo ka nevojë për rritje ekonomike, punësim dhe për t’ju përgjigjur pritshmërisë së brezit të ri . Prandaj duhet të punojmë fort muaj e ardhshëm. Unë si raportuese për Shqipërinë, do jem krah për krah Shqipërisë në muajt dhe vitet e ardhshme.

Pyetje: Për hapjen e negociatave, kërkohen përmbushja e dy kushteve: Funksionimi i Gjykatës Kushtetuese dhe Gjykatës së Lartë dhe reforma zgjedhore. A arrihet para marsit, duke qenë se komisioneri  për zgjerimin, Olver Varhelyi synon hapjen e negociatave me të dyja vendet në mars?

Isabel Santos, raportuese për Shqipërinë në PE: Është angazhimi i tij dhe ne jemi shumë të kënaqur me këtë angazhim. Ne jemi të gatshëm për mbështetje. Presim përgjigjen e Shqipërisë. Besoj, se do bëhet e mundur. Reforma elektorale duhet të bëhet sipas rekomandimeve të OSBE/ODHIR. E njoh shumë procesin e reformës elektorale, pasi kam qenë zëvendëspresidente e asamblesë parlamentare të OSBE-së dhe kryetare e komisionit të të drejtave të njeriut në këtë asamble. Kjo reformë është shumë e rëndësishme për demokracinë tuaj, për transparencën e sistemit tuaj elektoral, si dhe besimin e qytetarëve në procesin elektoral. Sigurisht që funksionimi i Gjykatës Kushtetuese dhe Gjykata e Lartë është një kërkesë më se e kuptueshme. Vendi duhet të sigurojë që këto dy struktura thelbësore të jenë funksionale dhe të ketë një proces elektoral transparent dhe në përputhje me standardet ndërkombëtare./abcnews.al

 

 

DAVID-SASSOLI-NE-TIRANE-1280x720.jpg
ad min13:57 | 30/10/2019

Pas refuzimit të negociatave nga Këshilli Europian për Shqipërinë dhe Maqedoninë e Veriut, Presidenti i Parlamentit Europian, David Sassoli do të vizitojë Tiranën dhe Shkupin. Sasoli është shprehur se kjo vizitë ka rëndësi të madhe, dhe se do të ketë në thelb inkurajimin e këtyre 2 vendeve për vijimin e reformave.

Presidenti i Parlamentit Europian, David Sassoli do të vizitojë Shkupin dhe Tiranën, për të përçuar një mesazh inkurajimi për qytetarët e Maqedonisë së Veriut dhe Shqipërisë pas mungesës së vendimit të Këshilit Europian për hapjen e negociatave të anëtarësimit me dy vendet.

“Vizita në Maqedoninë e Veriut, dhe shumë shpejt më pas edhe në Shqipëri, ka një rëndësi të lartë për mua personalisht në këtë moment. Ne e dimë që popullsia në të dy vendet është zhgënjyer shumë nga dështimi i Këshillit Europian për të rënë dakord për hapjen e negociatave për shkak të vetos së disa shteteve anëtare. Ne e kuptojmë dhe e ndajmë këtë zhgënjim. Shqipëria dhe Maqedonia e Veriut kanë zbatuar reformat që ne kërkuam prej tyre dhe tani meritojnë të shpërblehen për përpjekjet e tyre të jashtëzakonshme”, shprehet Sassoli në një komunikatë shtypi.

Presidenti Sassoli inkurajon qeverinë maqedonase dhe atë shqiptare për të vazhduar rrugët e tyre të reformave, pasi pavarësisht shtyrjes së vendimit, kjo kohë nuk do jetë kohë e harxhuar. Reformat e kryera në rrugën e anëtarësimit të plotë në BE janë në interesin më të mirë të vendeve dhe qytetarëve të tyre, dhe nga to përfitojnë para së gjithash brezi i ri që meriton një të ardhme më të mirë .Ai i bën thirrje qytetarëve dhe veçanërisht brezit të ri të mos humbin shpresën dhe të qëndrojnë në rrugën evropiane,

Me një shumicë të madhe votash, Parlamenti Evropian ka ritheksuar mbështetjen e tij të plotë për hapjen e negociatave të anëtarësimit me Maqedoninë e Veriut dhe Shqipërinë një javë më parë. “Ne nuk do të heshtim por do nxisim shtetet e BE të marrin një vendim unanim në favor të negociatave në takimin e ardhshëm” ka deklaruar ai.

Gjatë vizitës së tij në Shkup, presidenti David Sassoli do të takohet me Kryeministrin e Maqedonisë së Veriut, z. Zoran Zaev, si dhe presidentin Stevo Pendarovski. Ai gjithashtu do të zhvillojë bisedime me drejtuesit e partive politike parlamentare, kryetarin e Asamblesë së Maqedonisë së Veriut, Talat Xhaferi dhe do t’i drejtohet Parlamentit.  Presidenti i Parlamentit Evropian, David Sassoli, do të udhëtojë për në Maqedoninë e Veriut  në 4 dhe 5 nëntor, ndërkohë që udhëtim në Shqipëri është planifikuar për 2 dhe 3 Dhjetor./ABC News Albania

greminger.jpg
ad min13:21 | 25/10/2019

Sekretari i Përgjithshëm i OSBE-së, Thomas Greminger tha në një intervistë për shërbimin maqedonas të Zërit të Amerikës se OSBE dhe Shqipëria po përgatiten për kryesimin e organizatës nga Tirana në vitin 2020. Zoti Greminger tha se është “absolutisht i bindur” që kryesimi I saj do të jetë pozitiv si për OSBE-në, ashtu edhe për Shqipërinë.

Sekretari i Përgjithshëm i OSBE-së, Thomas Greminger theksoi se zgjidhja e çështjes Kosovë-Serbi është jetike për sigurinë e Ballkanit Perëndimor. Greminger theksoi se kjo do të sillte stabilitet dhe mirëqenie në rajon.

Megjithëse drejtimi i dialogut Prishtina-Beograd është një çështje e Bashkimit Evropian, ai tha se OSBE-ja mund të kontribuojë në një mënyrë neutrale. Greminger nënvizoi se ajo që mund të bëjë OSBE-ja, është të mbështesë dialogun, duke ndihmuar palët që të zbatojnë masat për të cilat është rënë dakord.

Sekretari i përgjithshëm i OSBE-së tha gjithashtu se e kupton zhgënjimin me moshapjen e bisedimeve për anëtarësim për Maqedoninë e Veriut dhe Shqipërinë. Ai theksoi se mbështetja e OSBE-së për Maqedoninë e Veriut do të vazhdojë në mënyrë që ky vend të zbatojë reformat, të forcojë shtetin ligjor dhe institucionet, dhe për t’u përballur me sfidat e sigurisë, me përballjen e luftëtarëve të huaj të kthyer dhe në parandalimin e ekstremizmit të dhunshëm.

Sekretari i Përgjithshëm i OSBE-së, Thomas Greminger tha në një intervistë për shërbimin maqedonas të Zërit të Amerikës se OSBE dhe Shqipëria po përgatiten për kryesimin e organizatës nga Tirana në vitin 2020. Zoti Greminger tha se është “absolutisht i bindur që kryesimi i saj do të jetë pozitiv si për OSBE-në, ashtu edhe për Shqipërinë./ABC News Albania

parlamenti-europian-1.jpg
nev ila11:11 | 22/10/2019

Parlamenti Europian ka nisur një seancë me debate mbi konkluzionet e samitit te Keshillit Europian 17-18 tetor. Bilanci i vendimmarrjeve të liderëve të BE është bërë nga Presidenti në largim i Këshillit Europian dhe presidenti në largim i Komisionit Europian.

Donald Tusk dhe Zhan Klod Junker janë ndalur tek vendimi i Këshillit Europian për mos hapjen e negociatave me Shqipërinë dhe Maqedoninë e Veriut. Të dy e kanë konsideruar vendim të gabuar.

Presidenti në largim i Këshillit Europian e ka quajtur një gabim nga ana e udhëheqësve të BE dhe ka thënë se shpreson që liderët të marrin vendimin e duhur para samitit të Zagrebit në maj 2020.

Zhan Klod Junker e ka quajtur gabim historik shumë të madh, duke deklaruar se nuk është normale t’u bëhen premtime vendeve të rajonit e të mos mbahen.

I ashpër në reagimin e tij ka qenë edhe kreu i grupit parlamentar të partive të djathta Manfred Veber. Në fjalën e tij ai tha se BE ka përgjegjësi për rajonin e Ballkanit.

Shqipëria e Maqedonia e Veriut kanë bërë përpjekjet e tyre, tha ai. Maqedonia e Veriut madje ndërroi edhe emrin, por Këshilli Europian nuk mori vendimin e duhur tha Veber duke përmendur presidentin Macron si frenues të hapjes së negociatave.

Ne po humbasim besueshmërinë tonë” tha Veber dhe duhet ta korrigjojmë këtë.

“Shumë gabim mos hapja e negociatave me Shqipërinë e Maqedoninë e Veriut. Natyrisht është një rrugë e gjatë me reforma, por vendimi do u jepte një dritë shprese të dy vendeve dhe do thotë stabilitet për rajonin edhe vetë BE-në“, tha Iratxe Garcia Perez, kryetare e grupit socialdemokrat. /abcnews.al

 

 

david-sassoli-1280x707.jpg
nev ila19:51 | 17/10/2019

Kryetari i Parlamentit Europian, David Sassoli ka deklaruar se mbështet hapjen e negociatave të anëtarësimit me Shqipërinë dhe Maqedoninë e Veriut.

“Ne mbështesim hapjen e menjëhershme të negociatave të anëtarësimit me të dyja vendet. Edhe Komisioni Europian e mbështet këtë dhe në këto kushte e kemi të vështirë t’u shpjegojmë qytetarëve të këtyre dy vendeve përse po ua vonojmë këtë proces”, ka thënë Sassoli.

Ai ka shtuar se, kur BE u kërkon vendeve fqinje të bëjnë përpjekje shtesë për të ndryshuar dhe ata i realizojnë ato, është detyra e tij t’i vlerësojë këto përpjekje.

Deklarata e kreut të Parlamentit Europian vjen një ditë pasi presidenti francez Emanuel Macron konfirmoi përgjigjen negative të Francës për hapjen e negociatave.

Përveç se insistoi mbi nevojën e reformimit të procesit të zgjerimit, Macron theksoi se një tjetër motiv për refuzimin është numri i lartë i azilkërkuesve nga Shqipëria, të cilët përfitojnë nga lëvizja e lirë./abcnews.al

 

 

parlamenti-europian-1280x854.jpg
nev ila15:47 | 08/10/2019

Socialistët dhe Demokratët emërojnë Raportuesit e rinj: Picula për Malin e Zi, Santos për Shqipërinë.

Eurodeputetja Tonino Picula nga Kroacia është kandidatja për Raportuesin e Parlamentit Evropian për Malin e Zi, ndërsa eurodeputetja Isabel Santos nga Portugalia, është kandidatja për Raportuesin për Shqipërinë.

Të dyja kandidatet janë anëtare të Aleancës Progresive të Socialistëve dhe Demokratëve (S&D).

Raportuesit e Parlamentit Evropian për vendet e Ballkanit Perëndimor janë përgjegjës, për hartimin e raporteve vjetore, të miratuara nga Komiteti i Punëve të Jashtme të PE. Më pas këto raporte diskutohen në seancat plenare. Raportimet e tyre janë me ndikim për BE-në, pasi dalin më në pah, çështjet me të cilat BE-ja shqetësohet më shumë, kur bëhet fjalë për vendet kandidate.

Gjatë mandatit të mëparshëm të PE, Raportuesit për Malin e Zi ishte Charles Tannock nga Mbretëria e Bashkuar, ndërsa Raportues për Shqipërinë ishte Knut Fleckenstein nga Gjermania./abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono