paralajmërim

fatmir-xhafaj.jpg
ad min18:10 | 30/09/2019

Kuvendi i Republikës zhvilloi këtë të hënë seancën plenare ku u diskutuan çështjet e evidentuara nga zgjedhësit gjatë javës së gjelbër. Në fjalën e tij, ish-ministri i Brendshëm, Fatmir Xhafaj, u ndal tek tërmeti që goditi Shqipërinë më 21 Shtator.

Xhafaj tha se atë moment shqetësimi e lehtësoi solidariteti njerëzor, por edhe angazhimi i fortë i institucioneve shtetërore. Megjithatë sipas ish-ministrit, gjatë javës post tërmet pamë edhe marrëzinë politike, por edhe çmendurinë e një pjese të vogël të medias.

“Gjatë orëve dhe ditëve të tërmetit dhe në javët post tërmet na ndodhën shumë gjëra të çuditshme. Patëm momente kur ndjemë kufirin e jetës reale, frikën dhe shqetësimin e familjarëve, pamë frikën dhe shqetësimin e tyre që dëmi i shkaktuar ju prishi qetësinë e jetës së përditshme. E lehtësoi shumë këtë moment të natyrshëm shqetësimi njerëzor solidariteti i shfaqur, por edhe angazhimi i fortë dhe i përgjegjshëm i institucioneve tona shtetërore. Ishim origjinal si shqiptarë. Gjatë kësaj jave pamë të shfaqej edhe marrëzia e zakonshme politike për të bërë politikë me tërmetin, dhe ca më keq akoma, çmenduria e një pjese të vogël të medias për t’i shërbyer padronit politik apo edhe për të bërë pazar klikimesh në pazarin mediatik. Ka ardhur koha që nëpërmjet fuqisë së ligjit akte të tilla të ndëshkohen. Kjo është përgjegjësi ndaj njerëzve, por edhe mësim i mirë për përgjegjësinë ndaj të vërtetës si detyrim me interes publik”, tha Xhafaj.

Sipas Xhafajt, momenti pas tërmetit duhet të shërbejë për reflektim serioz dhe të përgjegjshëm të qeverisë, e cila duhet të bëjë publike një strategji për raste të tilla. Tërmetet nuk i parashikojmë dot, por dëmet e mëdha mund t’i parandalojmë, tha ish-ministri.

“Qeveria mund t’i bënte një shërbim të mirë vendit nëse në reflektim të kësaj çfarë përjetuam dhe nevojë për t’u përballur me to të përgatiste dhe të bënte sa më shpejt publike një strategji të qartë reflektimi të shoqëruar me një plan të qartë veprimi. Më së paku është domosdoshmëri nevoja për dokumentimin shkencor të dëmeve, azhurnimin e hartës sizmike të vendit, ndërmarrja e një analize shkencore për të përcaktuar zonat problematike etj. Kemi të domosdoshme për të ringritur apo fuqizuar institucionet e këtyre fushave. Ky tërmet na paralajmëroi, ne duhet tashmë të veprojmë, nesër mund të jetë vonë”, tha Xhafaj./abcnews.al

rhouani.jpg
ad min18:24 | 19/09/2019

Regjimi iranian ka paralajmëruar të enjten Shtetet e Bashkuara se çdo sulm ndaj Republikës Islamike do të çonte në një luftë të re në Lindjen e Mesme. Duke iu përgjigjur kërcënimeve të ardhura pas sulmeve ndaj rafinerive saudite të naftës, Teherani ka deklaruar se do të reagojë duke përdorur forcën.

Irani paralajmëroi të enjten presidentin Donald Trump që të mos përfshihet në aktivitete luftarake në Lindjen e Mesme, pas sulmeve ndaj impianteve saudite të naftës, për të cilat Uashingtoni dhe Riadi fajësojnë Teheranin.

Sekretari amerikan i Shtetit, Mike Pompeo i ka cilësuar sulmet e fundjavës së kaluar një “akt lufte” dhe ka diskutuar për një reagim të mundshëm me Arabinë Saudite dhe vende të tjera të Gjirit.

Të mërkurën, vetë presidenti Trump bëri një paralajmërim, duke thënë se ka në dispozicion shumë opsione për të reaguar ndaj Republikës Islamike, e cila mohon çdo përfshirje në sulmet e 14 Shtatorit.

Gjithashtu, shefi i Shtëpisë së Bardhë urdhëroi Departamentin e Thesarit për të vendosur më shumë sanksione ndaj Iranit. Nga ana tjetër, ministri i Jashtëm iranian është përgjigjur duke thënë për CNN se vendi i tij nuk do t’i injorojë kërcënimet dhe se do të veprojë nëse do t’i duhet të mbrohet nga ndonjë sulm amerikan, ose saudit, që sipas tij do të çonte në një luftë të hapur.

Mohammad Javad Zarif ka deklaruar se sekretari i Shtetit Mike Pompeo është pjesë e të ashtuquajturit “Grupi B”, ku sipas Teheranit bën pjesë edhe princi saudit i kurorës, të cilët po përpiqen të mashtrojnë presidentin Trump, duke e nxitur për opsionin e luftës.

Riadi zyrtar, që e cilësoi sulmin një “test të vullnetit global”, publikoi të mërkurën pjesët e mbetura të dronëve dhe raketave iraniane të përdorura në sulmet ndaj rafinerive, duke deklaruar se janë një provë e pakontestueshme e agresionit të Teheranit./ABC News Albania 24/7

gazment-bardhi.jpg
ad min15:29 | 14/09/2019

Në fillim të javës së ardhshme Partia Demokratike do të publikojë dokumentacionin që sipas demokratëve fakton të shkuarën e errët të kryebashkiakut të Vaut të Dejës, Mark Babani. Në një prononcim nga Shkodra sekretari i përgjithshëm Gazment Bardhi njoftoi se aksioni opozitar do të vijojë me një strategji të re që do të jetë gati në ditët në vazhdim.

Ngrenë një akuzë, presin reagimin e më pas publikojnë dokumente që zbardhin denoncimin e bërë më herët. Këtë skemë ka zbatuar Partia Demokratike me Valdrin Pjetrin kryebashkiakun e dorëhequr të Shkodrës, Agim Kajmakun, kryebashkiakun e Vorës ndaj të cilit ka nisur verifikimet Prokuroria e po kështu do të ndodhë me Mark Babanin, kryebashkiakun e Vaut të Dejës. Paralajmërimin ia bën i njëjti që ua ka drejtuar të gjithëve, Sekretari i Përgjithshëm i demokratëve Gazment Bardhi.

“Në fillim të javës që vjen çdo informacion i disponuar nga ne do i bëhet i ditur publikut. Do u prezantojmë qytetarëve dokumentacionin e plotë që kemi me këtë rast”.

Kryebashkiaku i Vaut të Dejës i kundërshtoi më herët akuzat, por numri dy i Partisë Demokratike i dërgon një mesazh nga Shkodra.

“Edhe Valdrin Pjetri e mohoi dënimin e tij në Itali, por më pas u detyrua ta pranonte. Në momentin që PD-ja bën një denoncim ka informacionin e nevojshëm që vërteton akuzën. Ne i jemi drejtuar prokurorisë për të kryer një proces ligjor, por nuk do të presim në pafundësi”.

Në Shkodër gjendej për të marrë pjesë në procesin e zgjedhjeve të sekretariateve në degën e PD Shkodër, por një përgjigje ia dha përsëri ambasadorit të delegacionit të Bashkimit Evropian që ftoi palët të dialogojnë për reformën zgjedhore.

“Shqiptarët nuk kanë nevojë për pazare, apo marrëveshje që zgjidhin kriza momentale , kanë nevoja për marrëveshje afatgjata që kriza të tilla mos të përsëriten më kurrë në Shqipëri”.

Javën e ardhshme do të vendoset edhe strategjia që do të përdoret për të vazhduar aksionin opozitar kundër qeverisë Rama./ABC News Albania 24/7

Johanes-Hahn-1280x709.jpg
nev ila18:48 | 30/08/2019

Prishtina duhet të heqë taksën ndaj produkteve serbe, ndërsa Beogradi duhet të ndalojë tërheqjen e njohjeve ndaj shtetit të Kosovës. Apeli vjen nga Komisioneri Europian për Zgjerim, Johanes Hahn, i cili paralajmëroi të dyja vendet se këto janë hapat e vetme që duhen ndjekur për të rifilluar dialogu.

Komisioneri Evropian për zgjerim Johannes Hahn bëri apel për vazhdimin e dialogut mes Kosovës dhe Serbisë duke thënë se është shumë i rëndësishëm për perspektivën evropiane të gjithë rajonit të Ballkanit Perëndimor.

Në takimin e ministrave të jashtëm të Bashkimit Europian dhe Ballkanit Perëndimor, Hahn u shpreh se është shuëm e rëndësishme që Kosova të heqë taksën ndaj produkteve serbe.

Zgjidhja, rrjedha pozitive e dialogut mes Serbisë dhe Kosovës, është element kyç për të ardhmen e perspektivës evropiane të gjithë rajonit”, shtoi ai.

Por, ai po ashtu i bëri thirrje Serbisë të ndalojë fushatën për tërheqjen e njohjeve të pavarësisë së Kosovës.

Sipas tij të dyja palët duhet të hedhin hapa drejt njëri tjetrit.

Hahn u shpreh i bindur se pas zgjedhjeve në Kosovë situata do të jetë më e qartë dhe së bashku me Bashkimin Europian shpresohet hyrja në finalizimin e bisedimeve./ABC News Albania 24/7

grace-1.jpg
ad min21:40 | 21/08/2019

Greqia duket se është dorëzuar përpara presioneve të Shteteve të Bashkuara sa i takon rastit të anijes-cisternë iraniane “Grace 1”, duke i mbyllur dyert ankorimit të saj në portet helene.

Greqia ka refuzuar të ndihmojë anijen-cisternë iraniane, që së fundmi u la e lirë nga autoritetet në Gjibraltar. Zëvendës ministri i Jashtëm grek bëri të ditur se vendi i tij nuk është i gatshëm të ndihmojë mjetin lundrues të arrijë në Siri, itinerar që ndalohet për shkak të sanksioneve ndërkombëtare.

Lëvizja e Athinës zyrtare vjen pasi sekretari amerikan i Shtetit, Mik Pompeo kërcënoi me sanksione çdo vend që do të ndihmonte cisternën të vijonte kursin e saj. Sipas mediave helene, numri dy i diplomacisë konfirmoi se Shtetet e Bashkuara kishin ushtruar presion që Greqia të mos e ndihmonte anijen.

Ai ka shtuar se, qeveria greke nga ana tjetër nuk ka qenë në kontakt me atë iraniane. Në çdo rast, autoritetet helene deklaruan se mjeti ishte shumë i madh për t’u akomoduar në një nga portet e Greqisë.

Anija u largua nga Gjibraltari ditën e diel dhe u drejtua për në portin grek të Kallamatës. Autoritetet në territorin britanik e ndaluan atë në korrik dhe pavarësisht një kërkese të minutës së fundit të Shteteve të Bashkuara e lanë të lirë atë.

Anija, e njohur me emrin “Grase 1”, mban në rezervat e saj 2 milion fuçi naftë. Më herët Teherani zyrtar kishte deklaruar se ishte i gatshëm të dërgonte njësitë e marinës së tij për ta shoqëruar anijen, që aktualisht ndodhet në veri të portit të Oranit, në Algjeri./ABC News Albania 24/7

kontrolli-tatimor.jpeg
nev ila13:19 | 29/07/2019

Vijojnë inspektimet nëpër biznese në kuadër të luftës kundër informalitetit. Sipas ministres Denaj ka përmirësime për shkak të rritjes së ndërgjegjësimit, por nuk mungojnë edhe abuzimet.

Inspektimet në kuadër të luftës kundër informalitetit vijojnë. Ministrja e Financave dhe Ekonomisë Anila Denaj vëren se ka një përmirësim të dukshëm të treguesve për shkak ët rritjes së ndërgjegjësimit të subjekteve për t’u përmirësuar, por nuk mungojnë rastet e shkeljeve.

“Janë konstatuar shkelje për herë të tretë të kuponit tatimor dhe bazuar në procedurat tatimore, përgjegjësit në këtë rast do të ndiqen penalisht. Është e rëndësishme të kuptohet se duhet të pritet kupon tatimor edhe në hyrje të lokaleve të natës për të shmangur penalizimet drastike. E kërkojmë këtë pasi nuk do të donim të ishim as në pozitat e vendosjes së shiritave dhe as të ndjekjes penale”, tha Denaj.

Denaj shoqërohej nga zv/drejtori i përgjithshëm i tatimeve Ervin Hoxha, sipas të cilit janë lokalet me xhiro të lartë ato që shmangin detyrimin për të prerë kuponin tatimor.

Ministrja e Financave u bën thirrje taksapaguesve që bazuar në ndryshimin e ligjit të procedurave tatimore, si pjesë e paketës “Moneyval” të hapin llogaritë bankare të biznesit të tyre, jo më vonë se 90 ditë nga hyrja në fuqi e ndryshimeve të miratuara më 26 korrik, ndërsa për tatimpaguesit e rinj, jo më vonë se 20 ditë nga e nesërmja e regjistrimit të tyre.

Gjatë verifikimeve të kryera nga strukturat e Hetimit Tatimor, në Tiranë, në orët me aktivitet më të lartë ekonomik është konstatuar se ka përmirësim të dukshëm të treguesve edhe për shkak të rritjes së ndërgjegjësimit të subjekteve për t’u vetëkorrigjuar. Megjithatë, nuk kanë munguar edhe raste të përsëritjes së vazhdueshme të shkeljeve.

“Janë konstatuar shkelje për herë të tretë të kuponit tatimor dhe bazuar në procedurat tatimore, përgjegjësit në këtë rast do të ndiqen penalisht. Është e rëndësishme të kuptohet se duhet të pritet kupon tatimor edhe në hyrje të lokaleve të natës për të shmangur penalizimet drastike. E kërkojmë këtë pasi nuk do të donim të ishim as në pozitat e vendosjes së shiritave dhe as të ndjekjes penale”, tha ministrja Denaj.

Zëvendësdrejtori i Përgjithshëm i Tatimeve, z.Ervin Hoxha, tha se gjatë kontrolleve të ushtruara janë konstatuar lokale me xhiro të lartë, që kanë shmangur detyrimin për të prerë kupon tatimor.

“Kemi vënë re tendenca për mosdeklarim dhe mos përmirësim të xhiros nga këto subjekte, që janë me risk të lartë. Ju bëjmë thirrje që të vetëpërmirësohen dhe vetëdeklarohen sepse kontrollet do të vazhdojnë në mënyrë që të përmirësojmë këtë situatë”, tha z.Hoxha.

Gjithashtu, një aspekt i rëndësishëm në luftën kundër informalitetit është edhe ndryshimi i ligjit të Procedurave Tatimore, si pjesë e paketës “Moneyval”, për të cilin znj. Denaj kërkoi bashkëpunim e tatimpaguesve për zbatimin e plotë të tij.

Ministrja e Financave dhe Ekonomisë i bëri apel tatimpaguesve të regjistruar pranë Qendrës Kombëtare të Biznesit dhe Administratës Tatimore të hapin llogari bankare të  biznesit të tyre, jo më vonë se 90 (nëntëdhjetë) ditë nga hyrja në fuqi e këtij ligji (data 26.07.2019) dhe ta deklarojnë atë në administratën tatimore. Ndërsa, tatimpaguesit e regjistruar rishtas janë të detyruar të hapin llogarinë bankare të biznesit/organizatës, jo më vonë se 20 (njëzet) ditë kalendarike nga e nesërmja e regjistrimit në QKB/Administratën Tatimore dhe ta deklarojnë atë në organet tatimore.

“Ju lutemi tatimpaguesve të hapin llogaritë bankare, të regjistrojnë biznesin sipas procedurave ligjore. Nëse respektojmë rregullat, respektojmë ligjet shqiptare, atëherë do të kemi më pak inspektime, një marrëdhënie korrekte dhe garantim të konkurrencës së ndershme në treg”, tha ministrja Denaj./ABC News Albania 24/7

NATO-albania-1280x650.jpg
ad min23:59 | 25/06/2019

Marrëdhëniet e krisura mes Perëndimit dhe Lindjes ka gjasa të përkeqësohen nëse Rusia nuk asgjëson sistemin e saj raketor me mbushje bërthamore. Paralajmërimi është bërë nga NATO, që i ka bërë thirrje Moskës të veprojë, në të kundërt do të përballet me pasoja.

NATO i bëri thirrje të martën Rusisë që të asgjësojë sistemin e raketave me mbushje bërthamore dhe bazë tokësore, përmes të cilave mund të godasë Europën. Në të kundërt, Aleanca ka paralajmëruar Kremlinin se do të përballet me një përgjigje të fortë të saj. Ministrat e Mbrojtjes të vendeve anëtare të NATO-s do të diskutojnë të mërkurën për hapat e ardhshëm që do të ndërmerren nëse Moska refuzon ta bëjë një gjë të tillë.

“I bëjmë thirrje Rusisë që të ndjekë rrugën e përgjegjshmërisë, edhe pse deri tani nuk kemi parë asnjë sinjal pozitiv”, deklaroi në një konferencë për shtyp sekretari i përgjithshëm i Aleancës, Jens Stoltenberg.

Ai theksoi se Europa duhet të jetë në gjendje të përgjigjet, por nuk dha detaje mbi mënyrën se si do të reagojë. Por diplomatë europianë, të cituar nga agjencia e lajmeve “Reuters” deklaruan se, masat e Europës parashikojnë lejimin e fluturimit të avionëve luftarakë amerikanë që mbajnë mbushje bërthamore, një ripozicionim të raketave bërthamore amerikane me bazë detare dhe intensifikimin e stërvitjeve ushtarake.

Shtetet e Bashkuara dhe aleatët europianë të NATO-s kërkojnë që Rusia të asgjësojë sistemin e saj me raketa “Kruis” me mbushje bërthamore, gjë që deri më sot Moska ka refuzuar ta bëjë. Përplasja ka bërë që të thellohet përçarja në marrëdhëniet mes Lindjes dhe Perëndimit, që u verifikua pas aneksimit të gadishullit të Krimesë dhe ndërhyrjes së Rusisë në Siri./ABC News Albania 24/7

ambasada-amerikane-ne-shqiperi-2.jpg
nev ila16:15 | 18/06/2019

Ambasada Amerikane në Shqipëri ka njoftuar për shtetsait e saj që ndodhen në Shqipëri se duhet të bëjnë kujdes në datën 21 qershor  ku pritet të zhvillohet një protestë e madhe. Ambasada paralajmëron qytetarët e saj se duhet të evitojnë grumbullimet ku zhvillohen demostratat.

Njoftimi i Ambasades Amerikane: 

“Një demonstrim i madh pritet të zhvillohet pranë Zyrës së Kryeministrit të premten, më 21 qershor 2019, duke filluar rreth orës 8:00. Grupi synon të demonstrojë kundër qeverisë shqiptare dhe mund të lëvizë në vende të ndryshme në Tiranë. Kohëzgjatja e demonstratës së pritshme është e panjohur. Demonstrimet e kohëve të fundit kanë përfshirë dhunën. Forcat e sigurisë kanë përdorur kanalet e ujit dhe gaz lotsjellës për të shpërndarë turmat.

Personeli i Ambasadës së SHBA-së dhe anëtarët e familjes janë drejtuar për të shmangur të gjitha pikat e grumbullimit dhe vendet ku demonstratat janë të pashmangshme ose në vazhdimësi.

Veprimet për të marrë:

-Shmangni grumbullimet e mëdha dhe fushat ku demonstratat janë të pashmangshme ose në vazhdimësi.
-Jini të vetëdijshëm për rrethinën tuaj.
-Monitoroni mediat lokale për përditësime.
-Mbani një profil të ulët“/abcnews.al

shkencetari.jpg
ad min11:59 | 03/05/2019

Një shkencëtar në Rusi denoncoi një televizion vendas pas transmetimit të një lajmi, sipas të cilit planeti tokë do të shkatërrohet në 3 Tetor të këtij viti. Sipas shkencëtarit, lajmi është i rremë dhe synon të përhapë panik.

Televizioni rus “REN TV” publikoi një video ku paralajmërohet fundi i botës për në datën 3 Tetor. Në atë datë duhet të ndodhë përplasja me tokën e një asteroid të gjatë 340 metra. Për të mbrojtur tezën e tij, gazetari rus citoi astronomë anonimë.

Vitalij Egorov, shkencëtar i cili studion hapësirën, denoncoi televizionin në fjalë për lajmin dhe për faktin se krijon gjendje alarmi. Sipas Egorov, lajmi është tërësisht i pabazuar dhe synon të krijojë gjendje alarmi dhe panik në popull.

Denoncimi është bërë duke u bazuar në një ligj rus, i miratuar së fundmi, për dënimin e atyre që konsiderohen gënjeshtra. Agjencitë e lajmeve online që publikojnë dhe shpërndajnë lajme false, rrezikojnë të mbyllen.

Ndërsa personat fizikë rrezikojnë një gjobë nga 400 deri në 20 mijë euro në bazë të pasojave dhe të rëndësisë së shpërndarjes së lajmeve false. Prokuroria ruse duhet të thotë fjalën e saj brenda 30 ditësh./ABC News Albania 24/7

s-400.jpg
ad min09:13 | 04/04/2019

Zv/Presidenti amerikan Mike Pence ka paralajmëruar Turqinë të mos avancojë me blerjen e planifikuar të sistemit të mbrojtjes raketore S-400 nga Rusia. Paralajmërimi erdhi pak orë pasi ministri turk i Punëve të Jashtme tha të mërkurën në SHBA se marrëveshja me Rusinë tashmë ishte e përfunduar.

Ne e kemi bërë të qartë se nuk do të qëndrojmë duarkryq teksa aleatët e NATO-s blejnë armatime nga kundërshtarët tanë, armatime që kërcënojnë kohezionin e kësaj aleance”, tha Pence të mërkurën, gjatë fjalimit në një samit të NATO-s në Uashington.

Pence tha se blerja e sistemit antiraketor rus nga Turqia për 2,5 miliardë dollarë, “përbën rrezik të madh për NATO dhe për forcën e kësaj aleance”. Ai paralajmëroi se Turqia do të përballet me pasojat nëse vazhdon me këtë plan.

Por vetëm pak orë më parë, ministri turk i Punëve të Jashtme, Mevlut Çavuşoglu tha se kjo ishte një marrëveshje e përfunduar. “Marrëveshja për S-400 është e përfunduar dhe ne nuk do të tërhiqemi nga kjo”, tha Çavuşoglu.

Turqia duhet të zgjedhë. Dëshiron të mbesë një partnere kritike e aleancës më të suksesshme ushtarake në historinë e botës, apo dëshiron të rrezikojë sigurinë e këtij partneriteti me vendime të pamatura që minojnë aleancën tonë?”, paraljmëroi Pence.

Zv/Presidentit amerikan iu përgjigj me të njëjtën monedhë homologu i tij turk, Fuat Oktay, i cili tha se SHBA-të duhet të vendosin nëse duan të qëndrojnë aleat i Turqisë, apo duan ta rrezikojnë këtë miqësi duke mbështetur grupet terroriste. /tvklan.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono