pandeli majko

majkoimami.jpg
Autor E17:11 | 09/12/2019

 Nga Luljeta Progni

Një dhomë me derë xhami, në katin e parë sa hyje në godinën nr.15 të Qytetit Studenti, u bë streha e studentëve që ishin ngritur kundër regjimit komunist më 8 dhjetor 1990.

Mesnatën e datës 8 dhjetor, aty u mblodhën për tu organizuar, studentët që pak orë më heret kishin nisur protestën e madhe për shëmbjen e regjimit komunist në Shqipëri.

Është vëndi ku u ngrit grupi i parë organizator, asambleja studentore që do të drejtonte lëvizjen përgjatë katër ditëve historike deri në rrëzimin e diktaturës dhe shpalljen e pluralizimit politik në Shqipëri.

Katër ditët që pasuan, kjo dhomë do të shërbente për mbledhjen e grupit të studentëve për takimin me Ramiz Alinë e më pas për mbledhjen e grupit të studentëve, pedagogëve dhe intelektualëve që themeluan po aty Partinë Demokratike të Shqipërisë.

Kjo godinë u shemb pikërisht më 8 dhjetor 2019, 29 vite pas ditës kur studentët nisën lëvizjen për rrëzimin e diktaturës komuniste.  Mund të jetë rastësi, e ndoshta tërmeti e ka dëmtuar shumë por nxitimi për ta shëmbur me urgjencë, lë shumë dyshime.

Pandeli Majko, djathtas lart, dhjetor 1990

Kjo godinë ishte banesa e parë politike e studentëve të dhjetorit dhe vendi ku u themelua Partia Demokratike, partia e parë opozitare pas 45 vitesh diktaturë komuniste në Shqipëri. Mbi rrënojat e kësaj godine mund të ngrihen të tjera edhe shumëkatëshe, por asnjëherë nuk mund të quhet ndërtesa ku zë fill lëvizja që rrëzoi diktaturën.

Themeluesi i Partisë Demokratike, Arben Imami, e sheh shëmbjen e godinës nr.15, si një përpjekje të Edi Ramës për të shkatërruar çdo simbolikë në të cilën ai nuk ka qënë pjesë, si përpjekje për të zhdukur çdo shënjë të demokracisë.

“Edi Rama po e shfrytëzon tërmetin për të arritur qëllimë të tjera që janë ndoshta edhe në kundërshtim me interesat e njerëzve, me interesat  e vëndit, me interesat e demokracisë.

Në se në Tiranë e në Durrës janë mijëra apartamente bosh, njerëzit janë të pastrehuar dhe qëllimi i Ramës nuk është strehimi dhe lëhtësimi i vuajtjeve të njerzve, por krijimi i qytezave të reja, e cila do të jetë gjithashtu një ngjarje korruptive e përmasave të mëdha të kësaj qeverie. Do të jetë një tërmet i dytë për ekonominë shqiptare.

Gramoz Pashko dhe Arben Imami

Nuk është puna ime të flas për çështje te kontruksionit të godinave por ende nuk ka një akt ekspertizë të qartë për gjendjen e godinës nr.15 dhe kjo krijon dyshime të mëdha. Në këto vite, një nga frontet kryesore të luftës së Edi Ramës ka qënë lufta ndaj simboleve të demokracisë dhe unë kam dyshime shumë të thella lidhur me mënyrën se si po vepron me këto dy godina, jo vetëm nr.15, por edhe godina nr.18,  sepse të dyja janë vënde që kanë një ngarkesë pozitive dhe të madhe historike.

Aty ka filluar dhe është realizuar e kurorëzuar me sukses lëvizja studentore dhe themelimi i të parës parti opozitare anti-komuniste pas 45 vjet regjim gjakatar komunist. Po të shihet me vëmendje, Rama ka bërë përpjekje të shkatërrojë çdo simbolikë në të cilën ai nuk ka qënë e nuk ka arritur të jetë pjesëmarrës ashtu sic tentoi të thoshte se kishte qënë themelues i PD. Nuk e di a do të flasë PD për këtë çështje por PD aktuale nuk ka lidhje me këtë frymëzim fillestar që e solli Partinë demokratike në jetë”, thotë Imami për abcnews.al

Tek godina nr.15 u ngjiz elita e re politike pas rrëzimit të diktaturës. Aty nis rrugëtimi politik i drejtuesve të Partisë Demokratike, Sali Berisha, Azem Hajdari, Gramoz Pashko, Arben Imami, Genc Ruli, Aleksandër Meksi e shumë të tjerë.

Por, tek ajo godinë dhe në atë histori të dhjetorit 1990 mungon Edi Rama.

Aty nis rrugëtimi politik i presidentit Ilir Meta, por edhe ministrit Pandeli Majko.

Me siguri ata ndjenë keqardhje për zhdukjen e shënjave të historisë ku ishin pjesë.

Pandeli Majko, asokohe ishte student i inxhinierisë, pjesë e dërgatës së studentëve për takimin me udhëheqësin komunist Ramiz Alia, atje ku ata do të kërkonin shpalljene pluralizimit politik.

Sot 29 vite më vonë, godina u shëmb dhe për Majkon shembja e saj i kujton se të gjithë dështojnë të jenë ata që duan!

“Godina nr.15 ishte një dëshmi për atë që ndodhi 29 vite më parë! Prishja e saj nuk më merziti… thjesht më dhëmbi njerëzisht!

Prishja saj më kujtoi se të gjithë dështojnë të jenë ata që duan! Godina 15 ishte banesa e parë politike e një brezi  i cili vrapoi pa mësuar të ecte!”, thotë Majko për abcnews.al.

Pak histori për banesën e parë politike 29 vite më parë

Protagonistë të dhjetorit 90 rrëfejnë mbledhjet e para të studentëve dhe ngritjen e asamblesë studentore në atë godinë e më pas shpalljen e themelimit të Partisë Demokratike, po në atë godinë.

Akli Fundo është një prej studentëve organizatorë të lëvizjes studentore të 8 dhjetorit 1990.

Në një intervistë për librin “Pardesytë e Bardha”, Akli Fundo rrëfen një prej episodeve interesante të orëve të para të lëvizjes, debatin dhe mosmarrëveshjen me Azem hajdarin, i cili do të kthehej pak orë më pas lideri i lëvizjes.

Gjithçka ka ndodhur tri ditët e para të protestës, vendosej tek ajo godine ku ishte ngritur asambleja studentore me të drejtë vendimarrje.

“Kur erdhi Azemi tek ne, pra te godina 15, na kërkoi që të vendosnim të shkonim në mësim. E kemi diskutuar në atë grup prej 50 vetash. Ka patur një rezistencë të fortë ndaj Azemit, pra u kundërshtua. E kundërshtuam, sepse ai po shkelte dy vendimet tona më të rëndësishme, e para që nuk do të pranonim në asnjë rast të takoheshim me asnjë zyrtar tjetër përveç Ramiz Alisë dhe e dyta, kërkesa për të shkuar në mësim, ndërkohë që ne e kishim vendosur, që nuk do të shkonim në mësim.

Me sa kuptova ishte vetëm pasojë e ndikimit që kishte patur nga ai takim. Azemi na tha, se kishte marrë informacon që pedagogët do të shkonin në mësim dhe se atje do të zgjidhej problemi ynë. Ne e kemi kundërshtuar këtë qëndrim të Azemit dhe ai është kthyer menjëherë tek qëndrimi ynë. Megjithatë, unë jam larguar nga ai grup organizator në shenjë proteste ndaj thyerjes së dy vendimeve, për të cilat ne ishim të prerë që nuk do t’i thyenim. Bashkë me dy shokët e mi Niko Kaçiroti dhe Abdyl Demirazi, jemi larguar, duke dhënë dorëheqje nga ai komision. Pas largimit tonë, grupi organizator ka shkruar kërkesat, por në mëngjes Azemi ka kërkuar që kërkesat të miratohehsin edhe prej nesh, pra ne të treve që u larguam. Këtu kam parë aftësitë prej lideri të Azem Hajdarit, i cili kishte prirjen që të përfshinte dhe jo të përjashtonte. Kemi shkuar dhe i kemi lexuar kërkesat”, rrëfen Akli Fundo.

Një tjetër protagonist i rëndësishëm i lëvizjes studentore, Arben Demeti, rrëfen momentet kur u vendos të shpallej themelimi i Partisë Demokratike, në godninën numër 15.

“Janë mbledhur të godina 15 një pjesë e organizatorëve të lëvisjes dhe një pjesë e intelektualëve të pranishëm. Në grupin thelemues ka qënë Gramoz Pashko, Azem Hajdari, Arben Imami, Leka Meksi, Genc Ruli, sigurisht Sali Berisha.  Leka dhe Genci ishin persona të lidhur me Gramoz Pashkon.  Kjo ndodhi në datë 11 në darkë. Të nesermen që ishte data 12 erdhi një mendim tjetër nga ky grup. Ishte mendimi që të krijohej një parti popullore, gjithpërfshirëse, konkuruese e denjë përballë PPSH. Pra jo vetëm një parti të studentëve që ishte artikuluar deri në atë kohë.

Ata kishin hedhur disa rreshta të programit minimal të partisë.   Atë ditë në 12 dhjetor u mblodhëm sërish te godina 15 ku ishte instaluar asambleja e studentëve, organi vendimarrës deri atëherë. U shtrua ky propozim u diskutua dhe u pranua vendimi për të krijuar partinë sipas kësaj specifike.

Diskutuam shumë për emrin. Nuk diksutohej që pjesa e dytë e emrit do të quhej Demokratike. Diskutimi ishte për pjesën e  parë, parti apo lidhje.  Emri parti, na krijontë një farë alergjie nga përdorimi I këtij termi nga Partia e Punës, termi Lidhje, na krijonte një farë dualiteti me Partinë Lidhja Demokratike e Kosovës.

Pas shumë diskutimesh e vendosëm ta quajmë Partia Demokratike. Po aty u vendos që në ora 4 të shpallej në një miting, themelimi i PD. Në atë kohë patëm një kërkesë nga përfaqsues të punëtorëve. U organizua një mbledhje në ora 2 me përfaqsues të studentëve dhe të klasës punëtore.

Ata bënë propozimet e  tyre dhe i unifikuam me tonat. Kjo parti që do krijohet do të kishte edhe kërkesat dhe sygjerimet e klasës punëtore. Rreth orës 4 pa një çerek kemi dalë nga salla dhe kemi deklaruar në miting themelimin e PD.  Beni e ka shpallur, Ben Imami”, ka rrëfyer Arben demeti, një prej themeluesve të Partisë Demokratike. /abcnews.al

 

 

debati.jpg
ad min14:45 | 12/09/2019

Opozita parlamentare u shpreh sot e shqetësuar në Parlament nga një marrëveshje e fshehtë mes Ramës e Bashës dhe kërcënoi se nuk do të votojë reformën zgjedhore. Socialistët ju kërkuan të rinjve të luajnë rolin e tyre, teksa saktësuan se pavarësisht të gjithave, PS do të respektojë PD-në për rolin historik të saj.

Sinjalet e hedhura nga Ilir Meta, se Edi Rama e Lulzim Basha po unifikojnë qëndrimet me njëri-tjetrin, kanë shqetësuar më së shumti, opozitën parlamentare. Deputetët e rinj, kërcënojnë se nuk do të votojnë reformën zgjedhore.

“Këta vazhdojnë dashuriçkat dhe flirtimet me njëri-tjetrin mazhoranca me rrugën. Sidomos ata në rrugë ta kenë të qartë si PD ashtu dhe LSI-ja, nuk ka deal me këtë mazhorancë për ndryshimin e sistemit zgjedhor pa votën tonë këtu në parlament. Ta kenë të qartë të gjithë. Të hidhen pupthi, juve me ata bashkë”, tha Ralf Gjoni.

Numri dy i socialistëve ju bëri të qartë, se demokratët dhe pse jashtë parlamentit, janë më të rëndësishëm se zëvendësuesit e tyre në Kuvend.

“Harroje ti se kam dashuri për Lulzim Bashën. Gjëja e fundit që mund të më akuzosh kjo është, por ama kam respekt për historinë politike të këtij vendi dhe për vijueshmërinë e komunikimit dhe dialogut politik gjithëpërfshirës. Në këtë këndvështrim në komisionin e reformës i është lënë edhe një karrige bosh PD-së për të ushtruar të drejtën e saj për të dhënë propozime”, tha Taulant Balla.

Por kjo lënie pas dore, nuk i pëlqen nënkryetarit të Kuvendit.

“Nga njëra anë thoni që ata që janë në rrugë nuk donin ë të votonin refugjatët, nga ana tjetër tre herë në ditë i bëni thirrje si hoxha në zë që “hajdeni se pa ju nuk e bëjmë dot”. Për çfarë e doni që të mos votojnë emigrantët se këtu i paskeni pasur gjashtë vjet dhe ata nuk paskan dashur që të votojnë emigrantët. Ju jeni hipokritë në kërkesën që bëni që kemi qejf të votojmë emigrantët”, tha Murrizi.

Me eksperiencën që ja konfirmojnë thinjat, Pandeli Majko preferoi t’i këshillojë opozitarët e rinj.

“Ajo që është e rëndësishme për ju është që çfarëdo marrëveshje të negociohet jashtë kësaj salle të parlamentit në fund fare politika është matematikë të votohet. Do duhet vota juaj. Pa votën tuaj nuk mund të ratifikojmë asnjë lloj marrëveshje. Mendoj që duhet të jemi racionalë me këtë që ndodh tek ne. Ka shumë skuadra të mëdha ku zëvendësuesit kanë bërë histori. Këta nuk e kanë bërë as me batuta, as me sharje, por me lojë të ndershme”, tha Pandeli Majko.

Opozita e re është pjesë e komisionit të reformës zgjedhore, nga ku, kërkon largimin e Damian Gjiknurit si bashkëkryetar, si dhe ndryshimin e sistemit zgjedhor. /ABC News Albania 24/7

65284406_401873243751010_1329276598402154496_n.jpg
ent ela11:18 | 30/06/2019

Të qetë dhe normale e ka konsideruar ditën e sotme Ministri i Shtetit Pandeli Majko. Një nga figurat kryesore të PS tha se nuk ka krahasim me votimet e para viteve ‘90 pasi atëherë ata që kundërshtonin zgjedhjet futeshin në burg.

“Ata që kundërshtonin zgjedhjet para 1990 futeshin në burg”.

Por Majko nënvizoi se pas këtij procesi, palët duhet të ulen me njëra-tjetrën.

“Shpresoj që pas kësaj date, duke nisur nga 1 korriku të gjithë të ulemi e të shikojmë një mënyrë tjetër për të vepruar përballë njëri tjetrit. Procesi më duket i qetë dhe normal”. /abcnews.al

pandeli-majko.jpg
ad min19:30 | 21/06/2019

I ftuar në ‘Mbrëmje Ide” Pandeli Majko është shprehur se “nëse kjo do të ishte një krizë që do të kishte protagoniste PS-në , sinqerisht do e kisha shumë të vështirë të vija sot këtu”.

Sipas tij vendi shumë shpejt do të këtë  një Gjykatë Kushtetuese dhe është ajo që do të caktojë nëse ka të drejtë PD-ja apo PS-ja.

“Ne shumë shpejt do të kemi një Gjykatë Kushtetuese. Kjo gjykatë jam i bindur që do të ndajë shapin nga sheqeri, nëse ka të drejtë PD-ja apo PS-ja. Nëse Gjykatë thotë se PS-ja ka shkelur ligjin, ka shkelur dekretin, ka shkelur Kushtetutën ne do të shkojmë përsëri në zgjedhje lokale. Por zgjedhjet lokale do të ribëhen me vendim të Gjykatës Kushtetuese. Pas Zotit, në Shqipëri vjen Gjykatë Kushtetuese! Nëse kjo Gjykatë Kushtetuese do të marrë këtë vendim ne do të jemi të gatshëm të shkojmë në zgjedhje. Por sot ne askush nuk mund të na ndalojë dhe të na thotë se ju nuk do të shkoni në votime”. 

Ai u ka bërë thirrje mendjeve të kthjellëta të opozitës që t’i drejtohen Gjykatës Kushtetuese.

“Këshilla ime është që të mos shkohet tek përplasja. Është e paimagjinueshme që partia që krijoi votën e lirë pas viteve ‘90 të nxjerri njerëzit në rrugë për t’i penguar ata që të votojnë. Është e paimagjinueshme. Prandaj mendoj se më qetësi dhe me dashuri ta mendojnë të shtruar dhe ka boll njerëz të mençur, të shkojnë nesër në Gjykatën Kushtetuese dhe të kërkojnë nëse janë të mendimit se dekreti i Presidentit është i ligjshëm dhe se ne jemi duke bërë zgjedhje të paligjshme të shkojnë në Gjykatën Kushtetuese dhe jo të djegin shkolla. Nëse kam ardhur sot këtu është se asnjë qytetar nuk i intereson të vërë jetën në rrezik të tij dhe të familjes së tij për politikanët shqiptarë, përfshirë edhe veten time. Nuk dua të dal unë si delja e bardhe midis të zezave sepse edhe unë kam kusuret e mia bashkë me të tjerët. Sot PS-së nuk ka asnjë mundësi që të kthehet pas. PD i ka të gjitha mundësit që të kërkojnë zerimin e procesit zgjedhor nëse ata mendojnë se ky proces është fals, i paligjshëm dhe anti-kushtetues, le të shkojnë në gjykatë. Të shkojnë në gjykatë dhe të mos nxjerri njerëzit dhe  gratë që të përplasen me policinë”./abcnews.al

ps123.jpg
ad min23:03 | 12/06/2019

Socialistët kanë festuar ditëlindjen e 28-të. Në ceremoni mungonte kryeministri dhe kryetari i PS, por figurat e tjera nënvizuan rrugëtimin e partisë më të madhe të majtë dhe modelin e suksesit që i ofrojnë vendit, kryebashkiakun e Tiranës Erion Veliaj.

U mblodhën për të festuar 28 vjetorin e Partisë Socialiste. Në eventin e organizuar tek amfiteatri I liqenit, një nga investimet e fundit të Bashkisë Tiranë, u kujtua historia e 28 viteve dhe rrugëtimi i nisur me Fatos Nanon e emra të tjerë të njohur një pjesë e të cilëve politikanë aktivë e shumë të rinj. Në këtë 28 vjetor bilancin e bën Taulant Balla, sekretari i përgjithshëm, duke evidentuar se socialistët ia kanë dalë të vetëm të bëhen forca udhëheqëse në vend.

“Sa herë që Partia Socialiste e Shqipërisë ka marrë detyrën për të qeverisur vendin e ka nisur nga një pikë tejet e vështirë. E ka marrë Shqipërinë e lënë në humnerë gjithmonë nga Saliu dhe e ka ngritur atë. Sot jemi në një prej momenteve më të rëndësishme! Brenda 5 vite e gjysmë të qeverisjes sonë jo vetëm që morëm statusin e vendit kandidat, por Partia Socialiste sot teksa qeveris e vetme është në momentin e fillimit të bisedimeve për anëtarësim në Bashkimin Europian”, tha ai.

Nuk mungoi një socialist i orëve të para. Pandeli Majko kujtoi sfidën e kalimit nga partia komuniste në atë socialiste, si dhe tiparin e pakënaqësisë mes socialistëve për të arritur më të mirën. Por këtë 28 vjetor, simboli është kryebashkiaku i Tiranës Erion Veliaj.

“Sot jemi mbledhur jo vetëm për të kthyer kokën mbrapa dhe për të parë punën e jashtëzakonshme të atij eksperimenti të pabesueshëm që ktheu partinë më konservatore të lindjes komuniste në partinë më liberale të lindjes evropiane. Duhet me se s’bën të vazhdojmë atë histori të vjetër të socialistëve, të qënit të pakënaqur. Gjithmonë të qenit të pakënaqur me veten, të qenit të pakënaqur me atë që kemi arritur, të etur për më shumë sepse historia na kërkon më shumë, ne socialistëve sidomos. Jam i bindur se ditë më të mira do të vijnë, pa diskutim. Edhe unë jam fans i Erion Velisë. Po jam fans edhe i Taulantit jo i Taulantit nga Librazhdit, por i Taulantit nga Laçi. Është ky këtu. E kërkove tani. Mbaje”, tha Majko.

Edi Rama nuk ishte i pranishëm në këtë 28 vjetor, por rolin e tij e kujton Erion Veliaj, që kërkon një mandat të dytë në krye të bashkisë së kryeqytetit

“Dua të përshëndes të gjithë skuadrën tonë, gjithë qeverinë qendrore, ministrat tonë, ata që drejtojnë me Edi Ramën qeverinë tonë, qeverinë më progresiste që ka parë ndonjëherë Shqipëria. Bashkë me Edi ramin ata janë çdo ditë duke u përpjekur që vizioni ynë, ambicia jonë, për këtë qytet të bëhet realitet dhe mund ta bëjë vetëm një forcë Partia Socialiste e Shqipërisë”, tha Veliaj.

Flamujt kuqezi kishin zëvendësuar ata partiakë edhe në këtë ditëlindje, imazhi simbolik që shoqëron socialistët në këtë fushatë zgjedhjesh vendore./ABC News Albania 24/7

pandeli-majko-1280x718.jpg
ad min21:57 | 28/02/2019

Tirana mirëpriti edhe këtë vit Samitin e Diasporës. Gjatë ceremonisë së  mirëseardhjes në Pallatin e Brigadave, ministri Pandeli Majko vlerësoi dhe falenderoi gjithë shqiptarët e ardhur edhe nga vendet më të largëta.

Pandeli Majko, ministër i Diasporës: Kjo është një shtëpi e veçantë. Është shtëpia e mbretit, por sot mbret jeni ju.

Kështu e çeli ministri i Diasporës, Pandeli Majko, Samitin e Diasporës në Tiranë, duke vlerësuar gjithë bashkëkombasit e ftuar. Majko theksoi se ky samit shërben për të diskutuar çështje në interes të përbashkët dhe mbi të gjitha për t’u dëgjuar.

Pandeli Majko: Për të gjithë bashkë, për të diskutuar çështje të cilat na lidhin me interesa  me ekonomi, por mbi të gjitha na bëjnë të pohojmë atë që jemi dhe mbi të gjitha atë që do të jemi. Kjo është një shtëpi, që i është dedikuar mbretit, por ne jemi sot për t’ju pohuar se në këtë shtëpi, qeveritë e Shqipërisë, Kosovës dhe të Maqedonisë, politikanët e të gjithë trevave shqiptare vijnë jo që ju të na dëgjoni, por që t’ju dëgjojmë.

Në fund të fjalës së tij në ceremoninë e hapjes së Samitit, ministri Majko kishte edhe një mesazh për të gjithë shqiptarët dhe mbi të gjitha për diasporën.

Pandeli Majko: Siç e kanë thënë të parët tanë në ditët më të vështira dhe të errëta të kombit, Shqipëria ka për t’u bërë dhe ajo pa diskutim nuk mund të bëhet pa vullnetin, pa ndihmë, pa interesimin, pa këmbënguljen e pjesës së vet, ndoshta më të mirë që është diaspora e Shqipërisë./abcnews.al

SEJKO-DHE-MAJKO_ABC-M2-T1.mpg_snapshot_00.34-1280x720.jpg
ad min16:56 | 14/12/2018

Për të lehtësuar transfertat e emigrantëve, Banka e Shqipërisë po shikon si mundësi që shërbimet bankare të shtrihen edhe në zonat rurale. Guvernatori Gent Sejko thotë se synimi është reduktimi i kostove për paratë që vijnë në formë remitancash.

Shërbimi bankar do të zgjerohet edhe në zonat rurale për të lehtësuar transkasionet financiare që kanë të bëjnë me remitancat. Guvernatori i Bankës së Shqipërisë, Gent Sejko tha se projektligji për shërbimet e pagesave pritet të ketë ndikim të drejtpërdrejtë në nxitjen e konkurrencës dhe reduktimin e kostove për paratë e dërguara nga emigratëntët.

Gent Sejko guvernator i BSH: “Projektligji vlerësohet të rrisë transparencën në shërbimet e ofruara nga tregu dhe në krijimin e një kuadri të konsoliduar për mbrojtjen e konsumatorit, një përbërës ky mjaft i rëndësishëm për tregun tonë. Së fundi, por jo më pak e rëndësishme, projektligji synon edhe zgjerimin e ofrimit të shërbimeve nga bankat në të gjithë territorin, përfshirë dhe zonat rurale. Gjithashtu, Banka e Shqipërisë dhe Komiteti Kombëtar i Sistemeve të Pagesave kanë miratuar dhe vënë në zbatim tashmë strategjinë kombëtare për tregun e pagesave me vlerë të vogël”.

I pranishëm takimin e zhvilluar në kuadër të memorandumit të mirëkuptimit për remitancat, nënshkruar vitin e kaluar, ministri i Shtetit për Disporën, Pandeli Majko tha se edhe pse krahasur me vitin 2007 ka një ulje me 27 % të remitancave që vijnë nga jashtë, sërish ato mbetet më të larta se invetsimet e huaja në vendin tonë.

Pandeli Majko ministri i Shtetit per Disporën: “Në Shqipëri shumat që hyjnë nga remitancat ëshët shumë më e lartë se ajo e invetsimeve të huaja. Ato mund të kthehen në histori suksesi për ekonominë e vendit”.

Sipas Majkos, kjo ulje e dërgesave pas 2007 ka ardhur si pasojë e krizës ekonomike që përfshiu rajonin si dhe liberalizimin e vizave./abcnews.al

MAJKO-NE-BRUKSEL.mpg_snapshot_00.41-1280x720.jpg
ad min12:19 | 27/11/2018

Ditët e kulinarisë shqiptare kanë mbërritur në një nga sheshet më të frekuentuara të kulinarisë europiane siç është sheshi para Parlamentit Euopian në Bruksel. I pranishëm në këtë aktivitet kulinarie ka qenë edhe ministri i Shtetit për Diasporën, Pandeli Majko i cili u kujtoi shqiptarëve që jetojnë në diasporë se atdheu i tyre nuk i ka lënë asnjë moment në harresë.

Kulinaria shqiptare ka trokitur në portat e institucioneve europiane përmes një aventure këmbëngulëse. Një autobuz jo si të tjerët e ka sjellë atë nga Tirana në Bruksel.
“Autobuzi i shijes” ka qëndruar para Parlamentit Europian, në një nga sheshet më të spikatura dhe të frekuentuara për kulinarinë europiane në Bruksel. Aventurë që nuk ka kaluar pa rënë në sy të eurodeputetëve dhe funksionarëve të insitucioneve europiane. Ata kanë mundur të shijojnë gatimet tradicionale shqiptare në kryeqytetin e Europës. Por “autobuzi i shijes” përçon mbi të gjitha një mesazh për shqiptarët e disaporës”

Pandeli Majko, ministër i shtetit për Diasporën: “Është falë ndihmës së kompanisë Neranxi dhe kokëfortësisë së pronarit. Duhet ta pranoj. Duhej një kokëfortë nga Himara që ta bënte këtë. Ky autobuz ka udhëtuar nga Tirana përmes Brukselit përballë Parlamentit Europian, që t’i kujtojë shqiptarëve të diasporës, që atdheu i tyre, megjithëse me pak vonesë, nuk i harron.

Për ministrin Majko, është e rëndësishme që të mbushet vakuumi i krijuar midis shtetit shqiptar dhe komuniteteve shqiptare jashtë vendit.

“Do të kemi të tilla edhe në kryeqytetet e tjera të Europës dhe kështu të mbushet ai vakuum dhe ajo vonesë që shteti shqiptar ka në marrëdhënie me komunitetet e tij jashtë Shqipërisë, pasi ato janë vërtet një pasuri e madhe dhe pjesë e pandashme e famijes shqiptare”.

Aktiviteti “Ditët e kulinarisë shqiptare” është zhvilluar në kuadrin e festave të nëntorit përgjatë datave 26 dhe 27 nëntor në Bruksel./abcnews.al

RAMA-MAJKO-ANETARESIMET.mpg_snapshot_00.39-1280x720.jpg
ent ela21:46 | 23/11/2018

Mbi 200 të rinj të kryeqytetit u anëtarësuan në PS. Gjatë aktivitetit nuk munguan batuta e kryetarit të selisë rozë, Edi Rama. Një grup të rinjsh të njesisë 5 në Tiranë po anëtarësohen në PS. Kryetari Rama ka zgjedhur të jetë vetë i pranishëm në dorëzimin e teserave. Në krah ka deputetin e zonës, por edhe një nga më të vjetrit e familjes socialiste, Pandeli Majkon. Është i bindur se Majko do të jetë shumë gjatë aty. Vitet kalojnë, por Edi Rama nuk i harron këshillat që i dha Majko kur mori drejtimin e PS. Të rinjtë qe marrin teseren duken të lumtur për këtë anëtarësim. Të tjerë mbyten nga emocionet. Kryetari u thotë se puna e partisë nuk është e lehtë dhe u tregon ku ta nisin./abcnews.al

SHERBIM-AFER-QYTETAREVE.mpg_snapshot_00.27-1280x720.jpg
ent ela16:21 | 14/11/2018

Afrimi i shërbimeve pranë qytetarëve është synimi i Bashkisë së Tiranës. Kryebashkiaku Erion Veliaj e bëri të ditur në çeljen e zyrave të reja në zonën e Selitës.

Banorët e lagjes që përfshin zonën jugore të Tiranës, Selitën, Kodrën e Diellit apo edhe Liqenin e Thatë, nuk u duhet të udhëtojnë më drejt Farkës apo Njësisë 5 për të marrë një shërbim. Tani mund t’i marrin në zyrat e reja të Lagjes 13, në afërsi të Selitës. Kryebashkiaku Erion Veliaj e inauguroi bashkë me Ministrin për Diasporën Pandeli Majko.

Erion Veliaj, kryetar i Bashkisë së Tiranës: “Jam dyfish i gëzuar: së pari, si kryetar i Bashkisë ka qenë ëndërr që të afronim shërbimin tek qytetarët dhe që ky shërbim të reflektonte realitetin e Tiranës sot. Që do të thotë: nëse Tirana është rritur përtej vijës së verdhë, tek Unaza e Re, Kodra e Diellit, Kopshti Zoologjik, Kopshti Botanik dhe Liqeni i Thatë dhe pjesa tjetër tek Fresku, midis Dajtit dhe Kinostudios, atëherë shërbimet tona duhet të reflektojnë këto realitete, ndaj fillojmë me promovimin e lagjes së parë. Njësia administrative 13 është këtu në Rr. ‘Rrapo Hekali’”.

Ndërkohë, kryetari i bashkisë i bëri thirrje qyetarëve të përfitojnë nga amnistia dhe të transferojnë adresën pranë njësisë administrative ku banojnë.

“Do jem i pari që do përfitoj nga lagjja e re, do transferoj Ajolën, Kajanin dhe veten time këtu, për disa arsye: Së pari, se qendrën e votimit do ta kem këtu dhe nuk ka nevojë të transferohem në pjesën tjetër të Tiranës; së dyti, shërbimet do t’i marr këtu.”

Çdo banor i Tiranës duhet të regjistrohet në zonën ku ai jeton theksoi kryebashkiaku Veliaj në mënyrë që edhe ndarja e buxhetit për çdo zonë të bëhet siç duhet./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono