osbe

ramaaa.png
R D14:50 | 20/01/2020

Kryeministri shqiptar Edi Rama zhvilloi vizitën e parë zyrtare si kryesues i OSBE-së. Ai ishte në Ukrainë, ku konfliti i Krimesë ka prodhuar mijëra viktima. Rama u shpreh se synimi i presidencës shqiptare të OSBE-së, është të ndalë konfliktin e dhunshëm. Një armëpushim i nënshkruar mes palëve në vitin 2015, nuk u respektua asnjëherë nga palët.

Qysh kur Rusia aneksoi Krimenë në vitin 2014, Ukraina ka qenë stacioni i parë i çdo kryesuesi të OSBE-së. Edi Rama nuk bëri përjashtim. Ai po zhvillon një vizitë dy ditore në Kiev, ku u takua me të gjithë palët në vend.

Në një konferencë shtypi me ministrin e Jashtëm të Ukrainës, Rama tha se synimi i OSBE-së dhe Presidencës shqiptare, është vendosja e një armëpushimi të vërtetë në terren.

“Nuk jemi këtu për të premtuar ndonjë mrekulli, e dimë shumë mirë që kjo është një krizë shumë e ndërlikuar dhe jemi këtu sepse e dimë edhe që ka diçka që mund ta bëjmë më mirë se të tjerët për të ndihmuar të lehtësojmë sa më shumë të jetë e mundur jetët e atyre që janë në terren dhe janë plotësisht të pafajshëm e nuk e meritojnë të vuajnë pasojat dhe brutalitetin e këtij konflikti. Ky është prioriteti ynë kryesor, të ndryshojmë sa mundemi gjendjen në terren, ndërkohë që formulat dhe kontaktet dhe fjalët e mëdha sillen rrotull dhe mundësisht arrijnë rezultate më të mëdha”, tha Rama.

Konflikti në Krime është ndër më të përgjashmit që pas shpërbërjes së Bashkimmti Sovjetik. Sipas Kombeve të bashkuara, qysh prej vitit 2014, e deri më tani, rreth 9,500 persona kanë vdekur, ndërsa 22 mijë të tjerë janë plagosur. Fuqitë e mëdha nuk e njohin aneksimin e Krimesë nga Rusia, por kjo e fundit është anëtare e OSBE-së, ndaj Rama, asaj që për shumëkënd është luftë, i referohet si krizë. /abcnews.al

0202be50-925b-4b46-8fda-c76bd90071d8.jpg
R D11:50 | 20/01/2020

Kryeministri Rama nuk do jetë i pranishëm në seancën e parë plenare për vitin 2020, për shkak të axhendës si kryesues i radhës i OSBE. Shefi i qeverise shqiptare është sot ne nje vizite zyrtare në Ukrainë.

Me anë të një video të shpërndarë në rrjetet sociale, Rama njofton se është takuar me Kryeministrin e Ukrainës, Oleksiy Honcharuk. Në video Rama përshëndetet me homologun dhe më pas largohet për të vijuar axhendën e mëtejshme.

Me herët kryeministri Rama kishte zhvilluar nje takim me ministrin e punëve të Jashtme, Vadym Prystaiko. Temë e takimit, mësohet se ka qenë situata e sigurisë në Ukrainë dhe përreth saj. Gjithashtu, në axhendë parashikohen bisedime me presidentin e Ukrainës Volodimir Zelenski dhe kryetarin e parlamentit.

Kjo është vizita e parë e Ramës si kryesues i OSBE, në vendin që përbën sfidë për anëtarët e organizatës, e cila ka një mision të posacëm monitorimi aty. Në ditën e dytë, axhenda e kryeministrit Rama do vijojë me një vizitë në Ukrainën Lindore për të patur një panoramë më të qartë të situatës në zonat e prekura nga konflikti, e ku armëpushimi ende nuk është zbatuar. Situata e Ukrainës konsiderohet si sfida më e ngutshme për sigurinë dhe stabilitetin në Europë. /abcnews.al

rama-in-bratislava.png
nev ila17:42 | 19/01/2020

Në cilësinë e Kryetarit të Përgjithshëm të OSBE-së, Kryeministri i Shqipërisë dhe Ministri për Evropën dhe Punët e Jashtme Edi Rama, nesër do të vizitojnë Ukrainën.

Rama do të zhvillojë bisedime me zyrtarë të nivelit të lartë ukrainas në Kiev.

Në cilësinë e Kryetarit të Zyrës së OSBE-së për vitin 2020, gjatë vizitës në ukrainë Rama do të zhvillojë bisedime me Presidentin e Ukrainës Volodymyr Zelensky, Kryeministrin Oleksiy Honcharuk, Ministrin e Jashtëm Vadym Prystaiko dhe Kryetarin e Parlamentit Dmytro Razumkov.

Një konferencë për shtyp në Ministrinë e Punëve të Jashtme të Ukrainës, është planifikuar të mbahet në përfundim të takimit me Ministrin e Jashtëm Prystaiko.

Bisedimet me zyrtarët e lartë në Ukrainë do të përqendrohen në forcimin e bashkëpunimit midis OSBE-së dhe Ukrainës, në punën e Misionit të posaçëm të monitorimit të OSBE-së (SMM) në Ukrainë, dhe në përpjekjet për një zgjidhje paqësore.

Në Kiev, Rama do të takohet gjithashtu me stafin e SMM, Koordinatorin e Projektit në Ukrainë, dhe Përfaqësuesin e tij Special në Ukrainë dhe në Grupin e Kontaktit Trilateral.

Është planifikuar që të nesërmen e vizitës (21 janar) ai do të vizitojë Ukrainën lindore për të pasur një panoramë më të qartë të situatës në zonat e prekura nga konflikti dhe punën e SMM.

Zyra e OSBE-së ka theksuar se kjo vizitë e parë zyrtare, si Kryetar i Zyrës së OSBE-së nga Rama, pasqyron rëndësinë e madhe që ai i kushton përpjekjeve të OSBE-së për të adresuar krizën rreth Ukrainës, sfida më e ngutshme për sigurinë dhe stabilitetin në Evropë sot./abcnews.al

E02C237B-0EFD-4AB1-AF7A-ADB25F9F37FC_w1597_n_r1_st-1280x720.jpg
R D19:23 | 13/01/2020

Përfaqësuesi i OSBE-së për median, Harlem Desir reagoi sërish sot për ligjin antishpifje pasi Presidenti vendosi ta kthejë ligjin në Parlament. Ndryshe nga hera e kaluar kur u shpreh se “kemi bashkëpunuar me Kryeministrin”, Desir thotë se ” është i gatshëm të punojë me autoritetet shqiptare për përmirësimin e ligjit të medias online, veçanërisht atyre pjesëve që lidhen me gjobat dhe parimin e proporcionalitetit siç parashikohet në ligjin ndërkombëtar”.

Zyra e OSBE-së për shtypin e bëri këtë deklaratë pas marrjes së dokumentave shpjeguese nga Presidenti i Shqipërisë, Ilir Meta për arsye të mosdekretimit të ligjit për shtypin në Shqipëri.

“Përfaqësuesi i medias përsërit se asnjë pjesë e legjislacionit të ri nuk duhet të pengojë lirinë e shprehjes dhe lirinë e shtypit. Ai shpreson se rivotimi i ligjit do t’u hapë rrugën sqarimeve dhe përmirësimeve të mëtejshme të këtij ligji në mënyrë që të jetë në përputhje me standardet ndërkombëtare”, thuhet në deklaratën e zyrës së OSBE-së për lirinë e medias.

Presidenti Ilir Meta ktheu për rishqyrtim në parlament ndryshimet në dy ligje “Për mediat audiovizive” dhe “Për komunikimet elektronike”. Sa i takon ligjit të parë, Presidenti Meta vlerëson se ai bie në kundërshtim me parimet themelore kushtetuese të ndërtimit të një shteti demokratik, sigurisë juridike dhe të proporcionalitetit.

Ndërsa lidhur me ndryshimet në ligjin “Për komunikimet elektronike” Presidenti Meta shprehu shqetësim për fuqinë e tepërt ndëshkimore që merr AKEP ndaj mediave. /abcnews.al

rama-bushati-cakaj.jpeg
nev ila16:35 | 12/01/2020

Në janar të 2019 Kuvendi me propozim të kryeministrit Rama shkarkoi nga detyra e Ministrit të Jashtëm, Ditmir Bushatin post që “de juro” e mori përsipër vetë kreu i qeverisë.

Por pas një viti mes përplasjesh dhe qëndrimesh të kundërta mes tyre, kryeministri Rama ka treguar se nuk e ka humbur konsideratën për ish-ministrin e tij të Jashtëm kur e ka caktuar si të dërguarin e tij të posaçëm në OSBE.

Drejtimi i Presidencës nga Shqipëria do të jetë impenjativ dhe në çdo takim ku kryeministri Rama do të mungojë, vendin e tij në krye të tryezës do ta ketë Ditmir Bushati.

Pozicioni i të dërguarit të posaçëm nuk është një post ekzistues në hierarkinë e OSBE-së, por me pëlqim të kryeministrit do të jetë pikërisht Ditmir Bushati ai që do të përcjellë qëndrimet e drejtuesit të organizates dhe reflekton qëndrimet e Shqipërisë në çdo takim ku Rama do të mungojë.

Ministri i Jashtëm në detyrë, Gent Cakaj do të vijojë punën e tij si ministër i jashtëm, ndërkohë që axhenda e OSBE-së i është besuar e gjitha ish-ministrit Bushati dhe ambasadorit të OSBE-së për Shqipërinë, Igli Hasani.

Emri i Bushatit është postuar edhe në faqen zyrtare të organizatës, duke kryesuar ekipin i cili do të drejtojë Presidencën shqiptare në të gjitha fushat ku do të përfshihet kryesimi i Shqipërisë.

Ky rikthim i besimit në drejtim të Ditmir Bushatit shënon edhe kthesën e parë të marrëdhënieve të tij politike me Edi Ramën. /abcnews.al

 

26_03_2018_2210548_23_02_2018_1713925_k_01-1280x853.jpg
So Nila18:08 | 09/01/2020

Presidenti i vendit, Hashim Thaçi, ka uruar Shqipërinë pas marrjes zyrtare të kryesimit të Organizatës për Siguri dhe Bashkëpunim në Evropë (OSBE).

Thaçi ndër të tjera në urimin e tij është shprehur se shpreson që të punojë me kryeministrin shqiptar Rama për të çuar përpara misionin e përbashkët për forcimin e demokracisë dhe të drejtave të njeriut.

“Urime Shqipërisë për marrjen e kryesisë së OSBE-së për vitin 2020. Ne shpresojmë që të punojmë me kryeministrin Edi Rama për të çuar përpara misionin tonë të përbashkët për forcimin e demokracisë dhe të drejtave të njeriut. I lumtur për të parë një listë gjithëpërfshirëse të përparësive që i japin përparësi paqes dhe pajtimit”./abcnews.al

edi-rama-osbe-1.jpg
ger ta16:02 | 09/01/2020

Shqipëria prej kësaj të enjteje do drejtojë presidencën e OSBE. Në fjalën e parë si kreu i kësaj presidence, kryeministri Edi Rama tha se prioritet do të jetë dialogu me vendet e BE.

Ndërsa në një konferencë për gazetarët, Rama tha se vendi nuk është i kërcënuar nga konflikti SHBA-Iran, edhe pse pranoi që Shqipëria ka ndërmarrë një rrisk me strehimin e muxhahedinëve./abcnews.al

raa.jpg
in a10:32 | 09/01/2020

Shqipëria ka marrë zyrtarisht kryesimin e OSBE ndërkohë kryeministri Edi Rama tha se është shumë krenar sot, pasi kjo është një ditë shumë e rëndësishme për të dhe vendin e tij.

“OSBE ka qenë një prej pranimeve kyçe, kur partia ime ishte në qeveri më dukej shumë e ashpër, ndërsa me opozitën më dukej më e butë. Nëse eci pas dhe mendoj ndryshimin e Shqipërisë pa OSBE-në me duket e pamundur. Rruga për paqen e qëndrueshme mbetet ende e gjatë. Përpjekjet për zgjidhjen e konflitkeve do të jenë në krye te agjendës tonë. Shqipëria e di mbështetjen që mund te sjellë një mision i OSBE-së”, tha Rama.

Më tej kryeministri Rama u shpreh se nxitja e lirisë së shprehjes dhe lufta e dhunës ndaj grave është një tjetër sfidë.

“Le të udhëheqim nëpërmjet shembullit. Synojmë të përcaktojmë si përparësi luftën kundër korrupsionit. Ndërkohë që Evropa shënjohet nga konfliktet dhe bota nuk është në situatë të mirë roli jonë për paqe dhe demokraci janë fjalë kyçe dhe do jenë objektiva të përbashkëta. Parimet bazë të Helsinkit, mbrojtja e të drejtave të njeriut, integriteti territorial mbeten një recetë dhe të pathyeshme si në të shkuarën. Kjo shprehje përmban tri elemnte kryesore, së pari rëndësinë për të nderuar angazhimet dhe detyrime tona pasi s’mund të marrim angazhime të reja pa respektuar ato ekzistuese. Të fokusohemi tek instrumentet që zotërojmë dhe e treta përgjegjësia të ndahet mes 57 shteteve dhe të kemi një vizion dhe vullnet të përbashkët. Jemi të vendosur ta nisim nga bazat. Të bëjmë dallimin në terren. OSBE mund të dislokohet në mjedise konflikti dhe diskonflikti aty ku askush s’mund të shkojë. Kriza në Ukrainë mbetet sfida më e madhe e sigurisë në Europë. Misioni i OSBE është i përfshirë në sigurimin e paqes dhe sigurisë. Ka pasur sinjale pozitive nga aty por rruga drejt paqes mbetet e gjatë”, theksoi Rama./abcnews.al

rama-Putin-1280x720.jpeg
nev ila17:29 | 08/01/2020

Në bashkëbisedimin e tij me gazetarët në Vjenë kryeministri Rama  u shpreh se shumë shpejt do të vizitojë dhe Rusinë përveç Ukrainës dhe SHBA-së.

Kjo vizitë do të zhvillohet në cilësinë e kreut të OSBE-së tha Kryeministri si pjesë e axhendës së detyrës që ka kryesimi i OSBE.

“Vizita në Rusi është pjesë e axhendës së drejtuesit të OSBE dhe është pjesë e angazhimeve që kam marrë ndërkohë që gjatë gjithë vitit kemi bërë dhe harmonizimin e angazhimeve me ministrin në detyrë për të balancuar obligimet e OSBE, dhe obligimet e brendshme. Janë disa vizita që do të bëhen shumë shpejt, praktikisht më të shpejtat janë vizitat në Ukrainë, Në SHBA dhe Rusi. Për datat presim konfirmime nga të gjitha palët”, tha Rama për gazetarët./abcnews.al

rama-ne-OSBE-zyrat-1280x699.jpg
nev ila16:15 | 08/01/2020

Kryeministri Edi Rama vizitoi sot zyrat e OSBE në Vjenë, ku Shqipëria do të marrë nesër zyrtarisht  kryesinë dhe do ta drejtojë atë përgjatë vitit 2020.

Rama vizitoi disa prej zyrave, ku u prezantua me stafin q do të punojë nën drejtimin e Shqipërisë.

Nga koordinatori kryesor i kësaj zyre, Kryeministrit iu njoftua se një pjesë e janë shqiptarë ndërsa kolegë të tjerë i janë bashkuar skuadrës shqiptare të cilët janë nga gjermanë, italianë, norvegjezë, zviceranë dhe austriak.

“Qenkeni skuadër mikse këtu. Më falni, unë flas mirë shqip dhe italisht, gjermanisht nuk flas dot. Por zyrat janë shumë mirë. Kjo është më e rëndësishmja, apo jo...”,  tha Rama.

Kurse në zyrën për të Drejtat e Njeriut Rama u befasua nga prania e shtetasve norvegjezë.

‘‘Kaq shumë norvegjezë jeni këtu? Erdha të sigurohem që gjithçka po shkon mirë dhe se do të kemi një kohë pune të mirë bashkë’’, tha kryeministri.

Ndërkohë kryeministri e ka njoftuar vizitën e tij në Vjenë edhe në rrejtin e tij social:

“Vjenë – Në zyrat e ekipit që do të mundësojë drejtimin e suksesshëm të OSBE, të cilin Shqipëria e merr zyrtarisht nesër”, shkruan Rama./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono