nxenesit

PROTESTA-SHKOLLA-PEQIN_ABC-M2-T1.mpg_snapshot_00.13-1280x720.jpg
ent ela15:11 | 19/09/2019

Nxënësit e një shkolle 9-vjeçare në fshatin Shezë të Peqinit kanë protestuar për dëmtimin që godina e saj ka pësuar nga tërmeti. Ata kërkojnë rindërtimin e shkollës duke refuzuar të shkojnë në fshatin fqinj për mësim.

Nuk mund të futen në godinën e shkollës, sepse rrezikojnë jetën. Por nxënës prindër në fshatin Shezë të Peqinit protestuan. Ata duan që godina të rregullohet dhe jo të shkojnë në shkollë tjetër.

Për të dytin vit radhazi, shkolla 9-vjeçare në fshatin Shezë, pjesë e bashkisë së Peqinit nuk ka hapur dyert për nxënësit e saj. Shkak për këtë është bërë dëmtimi i godinës nga tërmeti i vitit 2014-të. Por që nga ajo kohë nuk është bërë asnjë ndërhyrje, ndërkohë që grupi i specialistëve gjatë inspektimi të shkollës ka vendosur mbylljen e saj dhe dërgimin e fëmijëve në shkollën e fshatit Pekisht për të kryer mësim pasdite.

Edhe fëmijët që prej dy ditësh nuk shkojnë më në shkollën e fshatit fqinj. Ata refuzojnë që të shkojnë me autobus në shkollën e fshatit fqinj.

Edhe administratori i njësisë administrative Shezë Alban Çullhaj është solizariduar me komunitetin dhe protestën e tyre. Pavarësisht se zyra vendore i dërgoi shkresë bashkisë Peqin dhe Ministrisë së Arsimit, kjo e fundit nuk ka lëvruar asnjë fond.

Në shkollën 9-vjeçare në Shezë të Peqinit ndjekin mësim edhe fëmijët e fshatrave Karthnek, Trash, Grykshtë cilët duhet të përshkojnë disa kilometra për të mbërritur në shkollë. /ABC News Albania 24/7

 

BIE-NUMRI-I-NXENESVE-NE-SHKOLLA.mpg_snapshot_00.29-1280x720.jpg
ent ela13:32 | 17/09/2019

Rënia e numrit të lindjeve, por dhe emigracioni apo braktisja e arsimit ka reduktuar numrin e nxënësve në shkolla. Sipas  ministres së Arsimit Sportit dhe Rinisë, Besa Shahini, këtë vit do të ndjekin arsimin parauniversitar 10 mijë nxënës më pak se vitin e shkuar.

10 mijë nxënës më pak se vitin e shkuar janë ulur këtë vit në bankat e shkollës. Shifra bëhet e ditur nga vetë ministrja e Arsimit Sportit dhe Rinisë, Besa Shahini, një ditë pas nisjes së vitit të ri mësimor.

“Në total, sivjet nga regjistrimet që kemi deri tani, rreth 455,000 nxënës, pa përfshirë arsimin profesional apo 480,000 nxënës në arsimin parauniversitar, përfshirë arsimin profesional, të dhënat për të cilët mbledh MFE. Dhe supozojmë se do ketë rreth 10,000 nxënës më pak se vitin që shkoi.”

Fenomeni nuk është i ri thotë ministrja e Arsimit Sportit dhe Rinisë. Trendi i rënies ka filluar nga viti 1992, ka vazhduar me të njëjtin intensitet në kohën e qeverisjes së PD (2005-2013) dhe po vazhdon dhe sot. Shqipëria sipas Shahinit po ndjek të njëjtën tendencë si gjithë Europa Juglindore.

“Në Kosovë, nga viti 2016 në 2018 janë mbi 25,000 nxënës me pak; në Serbi: 32,000; në Bosnje Hercegovinë: 34,000. Trend i njëjtë vërehet edhe në Kroaci dhe në Maqedoninë e Veriut”.

Në vendin tonë sipas ministres Shahini vitet e fundit nxënësit që braktisin shkollën kanë rënë në mënyrë të ndjeshme.

Nëse nga viti 2012 deri në 2013 mbi 4 mijë nxënës që mbaruan shkollën nëntë vjeçare nuk e vijuan shkollën e mesme, në vitin 2018 numri i tyre ra në 1300. /ABC News Albania 24/7

 

71041089_534761534006721_7326923330315878400_n-1280x960.jpg
ent ela11:50 | 17/09/2019

Sikurse është bërë tashmë traditë, kryebashkiaku Erion Veliaj u ka dërguar dje nga një letër të gjithë nxënësve të kryeqytetit për t’i uruar për vitin e ri arsimor. Në letrën frymëzuese e plot këshilla për nxënësit e kryeqytetit, Veliaj u kërkon atyre që të jenë mendjehapur ndaj së resë dhe të marrin me pozitivitet dhe entuziazëm çdo sfidë bashkë me familjarët e miqtë si një skuadër. Duke i cilësuar ata si motivin e punës së tij dhe aleatët më të mirë që ka në sfidën e madhe për ndryshimin e qytetit, Veliaj liston një sërë projektesh të rëndësishme që priten të realizohen në Tiranë.

Letra emocionuese e Veliajt për nxënësit e Tiranës:

Përshëndetje! Urime dhe suksese në këtë vit të ri shkollor! Këshilla ime e vetme ndaj të gjithëve ju është: “Jini mendjehapur”, pasi, siç e thotë një shprehje e njohur, “Mendja është si parashuta, funksionon më mirë kur hapet”! Merreni me pozitivitet dhe entuziazëm çdo sfidë; mos ngurroni ta doni atë me shokët e familjarët, pasi në skuadër sfidat janë më të lehta se sukseset më të ëmbla. Doja t’ju folenderoja nga zemra! Jeni ju motivi i punës sime dhe aleatët e mi më të mirë, në sfidën e madhe për ndryshimin e qytetit! Jam i lumtur që këtë vit kam patur mundësinë të takoj kaq shumë të rinj të zgjuar dhe entuziastë, apo të njihem me projektet e tyre fantastike. Jam kaq krenar për Arlën, Dean dhe Jonadën, që fituan çmimin e parë në konkursin ndërkombëtar në SHBA me aplikacionin “GjejZa”, po aq edhe për Denin e Arkidin, që fituan medaljet e bronzit në Kimi dhe Informatikë, në Olimpiadën e Metropoleve, Moskë.

Shkollat janë vendet ku ju edukoheni dhe formoheni si qytetarët e së ardhmes dhe si të tilla, ato duhet të ofrojnë kushtet më të mira. Palestrat, fushat sportive, laboratorët dhe hapësirat rikrijuese do të jenë në dispozicionin tuaj edhe pas përfundimit të shkollës, në mënyrë që të hapni dyert e imagjinatës dhe të zhvilloni më tej aftësitë tuaja.

Do të vijojmë intensivisht punën për projektin e Piramidës, për ta kthyer në qendrën më të madhe të zhvillimit të Teknologjisë së Informacionit në Ballkan. Aty do të keni mundësi të mësoni e të njiheni me shumë shokë e shoqe, të cilët ndajnë të njëjtin pasion me ju. Por, që të kemi mundësi të zhvillojmë më tej të ardhmen, ju mirëpres në nismat e mbjelljes së pemëve, pastrimit të qytetit apo riciklimit të mbeturinave. Gjatë shtatorit do të nisim një fushatë të quajtur STEPtember, dhe zotohemi të përdorim më pak makinat, duke ecur e pedaluar më shumë. Kështu, bëhemi gati edhe për maratonën në 13 Tetor. Më e mira na pret! Le të ndërtojmë së bashku qytetin që Ju ëndërroni, hap pas hapi, sfidë pas sfide, sukses pas suksesi. Jemi një skuadër e madhe pune për Tiranën, të cilën kemi fuqinë dhe mundësinë ta projektojmë ashtu siç ne dëshirojmë. Forca dhe suksese! Gjithmonë fansi juaj më i madh, Erion VELIAJ. /abcnews.al

SORECA_ABC-1280x720.jpg
ent ela12:16 | 16/09/2019

Ambasadori i BE Luixhi Soreka u ka drejtuar sot një mesazh në shqip nxënësve shqiptarë nga shkolla e mesme “Petro Nini” në Tiranë. Soreka u bëri apel të rinjve të shpresojnë dhe të kenë besim se Shqipëria do të jetë pjesë e BE dhe një vend më i mirë.

“Kini besim te Shqipëria ashtu siç kam unë. Shqipëria do të bëhet një vend më i mirë, kini besim. Së shpejti, shpresoj që shumë së shpejti do të hapim negociatat me Shqipërinë në mënyrë që Shqipëria të bëhet vend anëtar i BE dhe të rikthehet në gjirin e BE, aty ku ky vend i përket gjithmonë. Ju jeni e ardhmja e BE. Duhet të jeni qytetarë më të mirë të Shqipërisë dhe të më pas të BE. Urime për vitin e ri shkollor. Gëzuar. Delegacioni i BE do të jetë pranë jush. Faleminderit të gjithëve”.

/ABC News Albania 24/7

70891698_2487769471269311_4227514989235142656_n.jpg
ent ela08:40 | 16/09/2019

Presidenti i Republikës Ilir Meta ka uruar të gjithë nxënësit në nisje të vitit të ri shkollor. Përmes një postimi në facebook, kreu i shtetit shprehu bindjen se ky do jetë brezi i ditur që  që do t’ja ndriçojë edhe më shumë emrin Shqipërisë.

Ai u bëri thirrje të gjithë fëmijëve që kanë braktisur shkollën t’i rikthehen asaj, ndërsa shtoi se prioriteti kryesor i një shoqërie, që ka besim tek e ardhmja është vetëm duke investuar në dije dhe arsim tek gjenerata më e re, sepse ky është investimi më i sigurtë për të ardhmen europiane.

Mesazi i Presidentit Meta:

Të dashur vogëlushë që uleni sot për herë të parë në bankat e shkollës, ju u uroj me zemër shumë suksese dhe një vit të mbarë shkollor, në nisjen e rrugëtimin tuaj drejt dijes dhe ndërtimit të një të ardhmeje të ndritur, plot me ngjyra si ëndrrat tuaja!

Sot ju hidhni hapin më të madh e më të rëndësishëm, suksesi i të cilit, do ju ndihmojë të fitoni garat e tjera të jetës. Me mësuesit, si udhërrëfyes e bashkëudhëtarë, jam i bindur se do të jeni një brez i ditur që do t’ja ndriçojë edhe më shumë emrin Shqipërisë.

Uroj gjithashtu shumë suksese edhe për të gjithë nxënësit në këtë vit të ri shkollor, në përpjekjet e tyre për nxënien e dijeve të reja, aq të domosdoshme në përballimin e dallgëve të jetës.

Mirënjohjen më të thellë për të gjithë mësuesit, që me punë të palodhur, përkushtim e sakrifica arsimojnë denjësisht brezat e rinj. Përmbushje me sukses të misionit tuaj fisnik të edukimit!

Gjithashtu sot është dita për t’ju bërë një thirrje edhe të gjithë familjarëve dhe fëmijëve, të cilët me apo pa arsye kanë braktisur shkollën, t’i rikthehen asaj sa më parë.

Prioriteti kryesor i një shoqërie, që ka besim tek e ardhmja plot sfida, është vetëm duke investuar në dije dhe arsim tek gjenerata më e re. Ky është investimi më i sigurtë për të ardhmen tonë europiane.

Vetëm kështu ne mund të rrisim shpresën dhe besimin se do t’i kapërcejmë me sukses sfidat e së ardhmes, në radhë të parë në interesin e fëmijëve tanë, të cilët janë drita e syve, shpirti dhe zemra e çdo familjeje shqiptare, dhe e shoqërisë sonë. /abcnews.al

1_EDUCATION-GCSEs-Albania-134303.jpg
Sej rie17:10 | 19/06/2019

Një peticion për të parandaluar deportimin e një nxënësi shqiptar ka mbledhur më shumë se 6,000 nënshkrime. Stiven Bregu, 18 vjeç, u trafikua nga Shqipëria për në Britani të Madhe në vitin 2015 me qëllim që t’i shpëtonte një jete të dhunshme, dhe u la nga trafikantë në Keynsham pranë Bristolit.

Kur arriti për herë të parë në Britani ishte vetëm 13-vjeç dhe nuk dinte të fliste farë anglisht. Ai u dërgua në një qendër për të mitur dhe aty filloi të mësonte gjuhën ku arriti rezultate të jashtëzakonshme. Adoleshenti shqiptar kushte bërë kërkesë për azil, por i është mohuar.

Stiven tha: “Kam studiuar shumë dhe dua të ndërtoj të ardhmen time këtu. Gjithçka që dua është të më jepet shansi të qëndroj, për të kontribuar diçka në Bristol, ku e ndej veten si në shtëpinë time”.

Mësuesi kujdestar i Stivenit, Rob Shaw i cili lançoi peticionin të martën, e përshkroi situatën si “të frustruar”.

“Ne kemi investuar aq shumë në Stiven. Shkolla ka të bëjë me përgatitjen e nxënësve për të ardhmen e tyre dhe tani nuk do t’i jepet kjo mundësi. Si qytetar britanik, nuk është një moment krenar”, tha ai.

‘Pasuri e madhe’

Shaw tha gjithashtu se Stiven ka aftësi të jashtëzakonshme në Biologji, Kimi dhe Matematikë, raporton BBC.

Mësuesja Elisabeth Gilpin shtoi se Stiven është një “student i shkëlqyer dhe një pasuri e madhe për shkollën”.

Stiven ka marrë edhe vëmendjen e kryebashkiakut të Bristolit, Marvin Rees, pasi nxënësi shqiptar u përzgjodh si më i mirë dhe u ndihmua financiarisht nga bashkia.

Rees tha: “Duke pasur parasysh të gjitha arritjet e tij, duhet thënë se janë të jashtëzakonshme. Ideja që ta detyrojë atë të largohet nga vendi është absurde”.

Një seancë dëgjimore kundër dëbimit të tij do të mbahet më 15 Korrik. Ndërsa ende nuk ka një reagim zyrtar për rastin në fjalë./abcnews.al

RAMA-LEXON-KADARENE-NE-DITEN-E-LIBRIT.mpg_snapshot_00.08-1280x720.jpg
ent ela16:01 | 23/04/2019

Në ditën ndërkombëtare të librit Kryeministri Edi Rama ka këshilluar të rinjtë që të mos lënë mënjanë librin sepse është i vetmi që bën dallimin e njeriut nga njeriu dhe nga të gjitha speciet e tjera.

Me mëndje është rikthyer në Francë.

“Do të shkrihem

Të venitem,

Si kandili kur s’ka vaj,

Balt’ e pluhur

Do të bëhem,

Të më shkelnjë këmb’ e saj;

E të prehem

Duke puthur

Atë këmbë pasandaj”.

Është pjesë nga libri i Ismail Kadaresë “Mëngjese në kafe Rostad” që kryeministri Edi Rama e ndan me nxënësit e shkollës Faik Konica.

“Do të më pëlqente ta lexonit pastaj nga fillimi në fund duke u nisur nga ky fragment”.

Ishte kryeministri Rama ai që nisi “LEXO ME MUA”  Maratonën e leximit në qendrën për hapje dhe dialog në Ditën Ndërkombëtare të Librit”.

Edhe pse është një ndjekës i rregullt i rrjeteve sociale, libri bën dallimin e njeriut nga njeriu dhe nga speciet e tjera i këshilloi ai të rinjtë.

“Jemi në kushtet kur jetojmë në një botë që e kërcënon librin me instrumentat e tjerë të komunikimit që janë shumë të vlefshëm, të shpejtë dhe tërheqës, por që nuk e zëvendësojnë dot kurrë librin te njeriu dhe nuk e bëjnë dot kurrë njeriun ashtu siç e bën libri”.

Qendra për Hapje dhe Dialog është e hapur për audiencën e moshës nga 7-18 vjeç, ku do të zhvillohen lexime, takime diskutime për librin. Kësaj nisme i janë bashkuar emra të njohur të fushave të ndryshme. /abcnews.al

klosi-1-1280x741.jpg
ent ela17:15 | 13/03/2019

Shqipëria po rrit kapacitetet ne sektorin e turizmit, por profesionistët e fushës nuk i plotësojnë ato. Profesione me pagesa më të mira se në sektorin publik, garantojnë punë për 7 muaj të vitet. Ministri Klosi i fton prindërit t’i orientojnë fëmijët e tyre drejt arsimimit profesional.

Ministri i Turizmit, Blendi Klosi, u bën thirrje të rinjve të drejtohen drejt profesioneve të hotelerisë dhe turizmit gjatë një vizite në shkollat profesionale të Durrësit, “Beqir Cela” dhe “Hysni Cela”.

 “Që të gjithë hotelierët kanë një shqetësim, sezonin që vjen, një sezon që do të jetë shumë më shumë impenjativ, një sezon që nuk shtrohet më vetëm në 45 ditë, po kontratat në hotelet tona tashmë kanë shkuar në 180 ditë, ka edhe 210 ditë, pra 6 muaj, 7 muaj biznes kërkojnë njerëz të kualifikuar si ju”.

Drejtuesi i Ministrisë së Turizmit, e vë theksin në të ardhurat e larta që kanë të punësuarit në këtë fushë.

“Të gjithë hotelet kanë nevojë për staf të kualifikuar, kanë nevojë për staf të kualifikuar, kanë nevojë për njerëz që shërbejnë, kanë nevojë për njerëz që paguhen shumë më mirë se qoftë edhe po të shkosh në administratë dhe të shërbesh si jurist apo ekonomist në institucionet që drejton ministria e mjedisit apo institucionet e tjera”.

Ministri e mbylli fjalën duke vlerësuar përgatitjen e nxënësve që dalin nga dy shkollat profesionale të Durrësit.

“Të dy shkollat, edhe shkolla “Beqir Çela” edhe shkolla “Hysni Çela” janë shkolla reale, janë shkolla ku djem dhe vajza të reja vijnë dhe marrin një profesion, janë shkolla të cilat prodhojnë njerëz të gatshëm për tregun e punës”./abcnews.al

Veliaj-gjate-mbjelljes-me-pemeve-me-nxenesit-e-shkollave-1-1280x854.jpg
ent ela13:12 | 07/03/2019

“Mbill një pemë për mësuesin”, është nisma më e re e bashkisë së Tiranës, të cilën kryetari Erion Veliaj  thotë se do ta kthejë në traditë.  Keëtë shtatë mars bashkisë iu bashkuan nxënësit e gjimnazeve “Ismail Qemali” dhe “Asim Vokshi”.

Nxënësit e gjimnazeve “Ismail Qemali” dhe “Asim Vokshi” ne Tirane zgjodhën t’ia urojnë ndryshe festën e 7 Marsit mësuesve të tyre. Bashkë me kryebashkiakun Erion Veliaj  mbollën pemë. Drejtoresha e shkollës “Ismail Qemali” u shpreh se kjo nismë synon edhe rritjen e ndërgjegjësimit tek të rinjtë për të qenë pranë natyrës.

“I bashkohemi bashkisë për pyllëzimin dhe gjelbërimin e mjedisit ku jetojmë. Sigurisht, kjo ka të bëjë me një ekologjizëm shpirtëror, me një ndjesi ndërgjegjësimi e përgjegjësie, por më shumë me një ndjeshmëri që këta të rinj i shprehin mjedisit sot, për ta pasur edhe nesër”.

Bashkia e Tiranës synon që një nismë të tille ta kthejë në traditë.

“Një festim i 7 Marsit ndryshe: me lule që ndoshta zgjasin 24 orë apo pemë që zgjasin 24 apo 48 vite? Jam shumë i lumtur që jo vetëm “Ismail Qemali”, por shumë shkolla në Tiranë na janë bashkuar në fushatën e mbjelljes së pemëve. Hera e parë që 7-8 marsin ia kushtojmë me një pemë mësuesve dhe nënave tona dhe besoj që do kemi filluar një traditë që do ta mbajmë çdo vit”

Ndërkohë Veliaj përsëriti apelin e tij drejtuar banorëve të Tiranës të kontribuojnë për të shtuar hapësirat e gjelbra në kryeqytet. /abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono