nigeria

messs.jpg
G. P.14:20 | 27/06/2018

Entuziazëm i jashtëzakonshëm në Argjentinë pas kualifikimit në Botëror. Tifozët dhe mediat lavdërojnë Messin dhe karakterin e ekipit, në fitoren ndaj Nigerisë.

Detyra u krye.

Lionel Messi dhe gjithë argjentinasit e tjerë, më në fund, u kthyen të qetë e të lumtur pas një ndeshjeje të Botërorit, të kualifikuar.

Grupet u kaluan dhe sfida rikthehet të shtunën me Francën, në të tetat e finaleve, por për momentin, mendohet vetëm për të mbledhur veten, por edhe për të festuar.

Tifozët e bënë këtë fare lirshëm, dhe është pikërisht kjo që kërkohej prej tyre.

Kombi i madh amerikanojugor ishte në prag të dëshpërimit, ndërsa tani është në qiellin e shtatë, me besim të plotë tek idhujt e tij, ashtu si edhe mediat.

Gazeta “Ole”: U shfaq raca argjentinase, asgjë e pamundur! Të shtunën ndaj Francës, tregoni karakterin!

“Klarin”: Argjentina pati zemër dhe Mesin, dhe tani përballë Francës!

“La Nasion”: Dramë dhe çlirim! Të vuajtur, por të kualifikuar, seleksioni është në të tetat!

“Pagina 12” bën lojë fjalësh, duke shkruar: Me Marcos Rojo, që është edhe emri i shënuesit të golit të kualifikimit, por edhe përkthehet “me shenjë të kuqe”!

“La Kapital”: Tani po, që fillon Botërori! Seleksioni fiton dhe kryqëzohet me Francën!

Mesi u shpall lojtari i ndeshjes ndaj Nigerisë.

Leo Messi: “Jo, vështirë të kem gëzuar ndonjëherë kaq shumë sa pas golit të Rojo, pasi vuajtëm shumë këto ditë. Ishte e pandershme që ne të ishim jashtë që në grup, pas aq shumë përpjekjeve që bëmë. Në pushim të ndeshjes, i thashë ekipit që të qarkullonim topin, pasi ata do të na sulmonin. Pasi pësuam gol, ishte shumë e vështirë, por ia dolëm”.

Trajneri Sampaoli doli në konferencë në krah të Mesit.

Jorge Sampaoli: “Lojtarët e mi luajtën me zemër një ndeshje shumë të vështirë dhe kjo do të thotë shumë për ne. Kjo na bën më të fortë dhe na rrit shanset për sukses në ndeshjen e ardhshme”.

Futbollisti i Nigerisë, Xhon Obi Mikel, u shpreh për Mesin se “Zoti ishte sërish në anën e tij, dhe ai pati fat përsëri duke u kualifikuar”.

Argjentina ia doli dhe festa ishte e ligjshme, por Franca do të jetë një pengesë tepër, tepër e vështirë./abcnews.al

Lionel-Messi-Argentina-World-Cup-2018-979476.jpg
G. P.13:59 | 26/06/2018

Argjentina ka sot ditën e së vërtetës në Botëror. I duhet të fitojë ndaj Nigerisë për të mos u eleminuar përpara kohe, dhe të gjithë i kanë sytë nga Lionel Messi.

Është kundërshtari i preferuar, por a do të jetë sërish?

Argjentina ka fituar katër në 4 ndeshje ndaj Nigerisë në Kupën e Botës, me Messin që shënoi 2 gola në 2014, por gjithsesi, sot luhet një sfidë e re. Argjentinasit u vendosën në Shën Peterburg të ndërgjegjshëm për trysninë e madhe që kanë mbi vete.

Për të krijuar sado pak atmosferë çliruese, ata dolën dhe takuan tifozët përpara hotelit. Përgatitjet u përpoqën të ishin ato të duhurat dhe pritet të ketë ndryshime në formacion, me Agueron që ndoshta e nis nga stoli.

Shpresat e gjithë kombit janë tek Lionel Messi, që ka premtuar të udhëheqë ekipin drejt suksesit. Për trajnerin Sampaoli u tha se ai pati rebelim nga lojtarët.

“Ishte një javë e vështirë për ne, pas humbjes me Kroacinë. Kjo na vuri me shpatulla pas murit, pasi duhet të fitojmë patjetër me Nigerinë që të kemi shans për kualifikim. Nuk dua të komentoj lajmet që dolën për ne, pasi detyra ime është që të përgatis skuadrën për ndeshjen. Jam i bindur se Argjentina do të japë maksimumin për të fituar”.

Trajneri i Nigerisë, Gernot Ror, është gjithashtu me shpresë, me ekipin e tij që mund të kualifikohet edhe me barazimin.

Gjermani 64-vjeçar pyetet për mënyrën sesi do ta kërkojë këtë.

 “Nuk mund t’iu jap planin tim të saktë të lojës. E vetmja gjë që mund të them është që ne do të luftojmë fort. Nuk do të jetë e lehtë ndaj Argjentinës, së cilës i duhet fitorja. Ndoshta një barazim na mjafton, por nuk ka siguri, ndaj edhe ne duam që të fitojmë”.

Kombinimet janë që Argjentina kualifikohet nëse fiton ndaj Nigerisë dhe nëse Kroacia mund apo barazon me Islandën. Po ashtu, nëse Argjentina fiton thellë, dhe Islanda arrin sukses më të vogël.

Barazimi në të dy ndeshjet, kualifikon Nigerinë, e cila kualifikohet edhe nëse fiton. Pra, rëndësi ka edhe ndeshja Kroaci-Islandë në Rostov. Trajneri i Kroacisë, Zllatko Daliç, premtoi se skuadra e tij do të luajë për fitore, për të bërë një Botëror të ndershëm.

Ai nuk deshi të bënte krahasime me Kroacinë e vitit 1998 që doli e treta në botë, duke thënë se dy breza të kohëve të ndryshme nuk mund të krahasohen. Gjithsesi, Daliç u shpreh me besim tek lojtarët e tij dhe shpreson të arrijë të njëjtin sukses si në 1998.

Shumë simpatik, ndërkaq, trajneri i Islandës, Heimir Halgrimson. Ai e krahasoi Kupën e Botës me festivalin europian ku Islanda kurrë nuk ka arritur në finale, por ku gjithnjë ka shpresë. Për të, islandezët do të jenë optimistë dhe do të përpiqen të kënaqen./abcnews.al

nigeria.jpg
G. P.20:17 | 22/06/2018

Nigeria i dha shpresë vetes për kualifikim në turin e dytë të Botërorit, duke mposhtur 2-0 Islandën. Suksesi i afrikanëve i jep mundësi edhe Argjentinës që të pretendojë.

Fitoi pa dyshim për veten, por indirekt bëri edhe një nder.

Nigeria mposhti 2-0 Islandën duke lënë pas humbjen me Kroacinë, duke i dhënë shpresë vetes për kualifikim, por duke mbajtur në pretendime edhe Argjentinën.

Në një sfidë me dy fytyra në stadiumin e Vollgogradit, afrikanët luajtën dobët në pjesën e parë, por ndryshuan krejtësisht pas pushimit.

Heroi i tyre ishte i njëjti, Ahmed Musa, autor i golave në minutat 49 e 75.

Sulmuesi shtatshkurtër ishte pak a shumë si në shtëpi, pasi aktivizohet në Premier Ligën ruse me CSKA-në e Moskës.

Nigeria e meritoi suksesin pasi, në tërësi, ishte më lart.

Mbajti topin 60 për qind, gjuajti gati dyfishin, dhe po ashtu bëri rreth 200 pasime më shumë sesa europianët e veriut.

Islanda u duk më e qartë në pjesën e parë, atëherë kur rezultati ishte 0-0 dhe kur pati mundësi të luante në kundërsulm.

Gjithsesi, nuk është se krijoi raste shumë të pastër, në një nga 45 minutat më të dobët të këtij Botërori.

Pjesa e dytë ishte tjetër gjë, pasi islandezëve u duhej të sulmonin, një mënyrë loje për të cilën nuk janë të përgatitur dhe nuk shkëlqejnë.

Kjo solli edhe humbjen, ndërsa tani do të duhet të synojnë fitoren me Kroacinë që të kenë mundësi të kualifikohen.

Nigeria, ndërkaq, mjafton të shmangë humbjen ndaj Argjentinës që të kalojë në turin tjetër.

Në grupin D, Kroacia kryeson me 6 pikë, Nigeria ka 3, ndërsa Argjentina e Islanda nga 1 pikë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono



TE FUNDIT