negociata

PETICJONI-IVANOV-MBULIM.mpg_snapshot_00.16-1280x737.jpg
G. P.22:28 | 24/09/2018

Presidenti i Maqedonisë Ivanov ka përsëritur qëndrimin e tij kundër referendumit të 30 shtatorit për emrin, duke thënë se asnjë politikan nuk ka mandat për të negociuar identitetin e një kombi.

“Asnjë politikan nuk ka mandat që të negociojë për identitetin e një kombi.” Me këtë deklaratë presidenti i Maqedonisë Ivanov theksoi se shumica e qytetarëve të Maqedonisë nuk kanë votuar për një program, në të cilin është parashikuar ndryshimi i Kushtetutës së Republikës së Maqedonisë për shkak të ndryshimit të emrit kushtetues të shtetit. Ai shtoi se as qeveria aktuale nuk ka marrë mandat nga populli, as nga votuesit, për ndryshimin e identitetit, për heqje dorë nga diaspora, për humbje të historisë dhe kujtesës.

Më tej ai tha se republika Maqedonisë, është përfituese e përhershme, por me marrëveshjen me Greqinë dhe referendumin e ardhshëm, ky përfitim i përhershëm tashmë relativizohet. “Me këtë marrëveshje përpiqen të na nënçmojnë, siç nuk është nënçmuar asnjë komb. Duan të na bëjnë të dështuar duke konsideruar se nuk e dimë se si quhemi”, theksoi Ivanov. Kreu i shtetit të maqedonisë dhe njëherë më shumë ka përsëritur qëndrimin e tij se nuk do të votojë në referendumin e 30 shtatorin për cështjen e emrit./abcnew.al

hashim-thaci.jpg
ent ela17:59 | 08/09/2018

Presidenti i Kosovës vijon të insistojë në idenë e korrigjimit të kufijve si pjesë e zgjidhjes së konfliktit me Serbinë. Ai kërkon që në dialogun me Beogradin të negociohet edhe bashkimi i Preshevës me Kosovën.

Presidenti i Kosovës, Hashim Thaçi, me anë të një mesazhi në facebook ka folur edhe njëherë për rishikime kufijsh. Kreu i Shtetit thekson se vullneti i shprehur i qytetarëve të Preshevës, Bujanocit dhe Medvegjës më 1 dhe 2 mars 1992 për bashkëngjitje me Kosovën është institucionalizuar tek organet shtetërore të Republikës së Kosovës. “Kjo kërkesë e tyre është ndërkombëtarizuar në pikën më kulminante botërore. Kjo çështje do të diskutohet në kuadër të demarkimit të kufirit prej 430 kilometrave ndërmjet Kosovës e Serbisë dhe mund të zgjidhet”, shkruan Thaçi.

Presidenti i Kosovës thekson se duhet të punohet për korrigjimin e historisë dhe rritjen e sigurisë për të ardhmen evropiane. “Rezultate të marrëveshjes eventuale paqësore ndërmjet Kosovës dhe Serbisë do të jenë njohja reciproke me Serbinë, njohja nga pesë vendet e Bashkimit Evropian, anëtarësimi në Këshillin e Evropës, anëtarësimi në OSBE dhe heqja e vetos ruse në Këshillin e Sigurimit, si parakusht për anëtarësimin e Kosovës edhe në OKB”, shprehet kreu i shtetit.

Në fund Thaçi pretendon se “kjo marrëveshje sjellë më tepër paqe dhe stabilitet në rajon, si dhe Kosovës i hap rrugë të sigurt dhe të shpejtë për në NATO dhe Bashkim Evropian”./ abcnews.al

kosova1.jpg
G. P.08:30 | 30/08/2018

Bildt, Ashdown,Schwarz-Schilling: Të braktisen propozimet për shkëmbimin e territoreve mes Kosovës e Serbisë.

Ish-përfaqësuesit e Lartë të OKB-së në Bosnjë dhe Hercegovinë, Carld Bildt, Paddy Ashdown dhe Christian Schwarz-Schiling i kanë drejtuar sot (29.08.) një letër të hapur Përfaqësueses së Lartë të BE për Politikën e Jashtme Federica Mogherini dhe ministrave të Jashtëm të BE për diskutimin për korrigjimin e kufijve midis Serbisë dhe Kosovës.

Në letër ata shprehin “shqetësim të thellë” për sugjerimet e bëra nga zyrtarë të lartë të BE se ata mund të mbështesin një marrëveshje midis Presidentëve Vuçiç dhe Thaçi, që parashikon shkëmbimin e territoreve mes Serbisë dhe Kosovës përmes “korrigjimit të kufijve”.

“Ne e njohim rajonin mjaft mirë, për të deklaruar se zhvendosja e kufijve në këtë mënyrë nuk do të zgjidhë ndarjet, por do t’i thellojë ato”, konstatojnë në letër Paddy Ashdown, Carl Bildt dhe Christian Schwarz-Schilling.

Përsa i përket Bosnjë dhe Hercegovinës ata shprehin shqetësimin se një veprim i tillë do t’u jepte “mbështetje atyre që do të preferonin ta shpërbënin vendin, që bëjnë tashmë thirrje për një kthim në statuskuonë para Daytonit”.

Më tej ata theksojnë se e njohin BE dhe Evropën mjaft mirë për të kujtuar “se parimet tona dhe historia jonë e përgjakshme na mësojnë që paqja e qendrueshme mund të vijë vetëm kur mësojmë të jetojmë në komunitete multietnike, në vend që të ricaktojmë kufijtë për të krijuar komunitete monoetnike”.

Paddy Ashdown, Carl Bildt dhe Christian Schwarz-Schilling theksojnë se “asnjë politikë nuk ka më shumë gjasa që të na kthejë pas në ndarje dhe konflikt në Ballkan se ajo që me sa duket po mbështesin disa.”

Ata nuk kanë dyshim se kjo “rrezikon të destabilizojë marrëveshjet aktuale si në Maqedoni, të minojë unitetin e shteteve si Bosnja” dhe të inkurajojë ata që dëshirojnë të shohin shkëmbime territoresh si në Ukrainë, “që ka gjasa të çojë në eksodin e minoriteteve nga komunitetet e tyre ekzistuese”.

Së fundi Bildt, Ashdown dhe Schwarz-Schilling, që qenë përfaqësues të OKB-së në Bosnjë e Hercegovinë midis viteve 1995 deri 2007, bëjnë thirrje që propozimet e mësipërme për ndryshimin e kufijve “të braktisen pa vonesë”./DW

brexit-1.jpg
G. P.16:54 | 22/07/2018

Qeveria britanike shprehet optimiste dhe njofton se deri në Tetor mund të arrijë një marrëveshje të kënaqshme me Bashkimin Europian për Brexit. Megjithatë tregon se është në gatishmëri edhe plani tjetër nëse nuk arrihet ndonjë marrëveshje.

Një marrëveshje me Bashkimin Europian mund të arrihet deri në Tetor, por Britania e Madhe po përgatitet për mundësinë e një rezultati pa marrëveshje. Kështu u shpreh sekretari i ri i Brexit, Dominic Raab. Ai tha se do të kthehej në Bruksel për bisedime të enjten dhe do të jepte “çdo sinjal” për të marrë “marrëveshjen më të mirë”.

“Por një qeveri përgjegjëse përgatit plane mbrojtëse në rast se bisedimet nuk përfundojnë mirë”, nënvizoi si për BBC.

Laburistët pretendojnë se një skenar pa marrëveshje do të ishte “katastrofik” për biznesin.

Raab vuri në dukje se 80% e marrëveshjes së largimit nga BE tashmë është zgjidhur. Ai tha se ishte “e dobishme” që negociatori i BE-së për Brexit Michel Barnier kishte ngritur pyetje rreth propozimit të kryeministres për marrëdhëniet tregtare të ardhshme të Mbretërisë së Bashkuar me Unionin.

Ministri britanik njoftoi se janë duke u bërë përgatitje të tilla si punësimi i stafit shtesë kufitar, sepse “çdo qeveri e përgjegjshme” do të siguronte që planet të ishin parapërgatitur “në rast se negociatat nuk arrijnë një rezultat pozitiv”.

“Mendoj se njerëzit duhet të dinë se ne jemi gati dhe që Britania mund të lulëzojë, çfarëdo që të ndodhë”, tha ai.

Njoftime teknike do të lëshohen për bizneset dhe qytetarët e prekur nga ndryshimet, në mënyrë që të jenë “shumë të qartë për atë që duhet të bëjnë dhe çfarë po bëjmë në emër të tyre”, shtoi Raab./abcnews.al

gent-cakaj.jpg
G. P.11:58 | 20/07/2018

I ftuar në Mbrëmje në ABC News, zëvendësministri i Punëve të Jashtme dhe Europës, Gent Cakaj.

Njëkohësisht edhe kryenegociator për fazën përgatitore për çeljen e negociatave me BE-në, Cakaj tha se pavarësisht se vendimi formal për hapjen e negociatave doptë hapet zyrtarisht në Qershor, Këshilli ka urdhëruar Komisionin që të kryejë fazën përgatitore, ose screening me Shqipërinë.

Cakaj tha se BE-ja për momentin nuk është në pozitën më të favorshme për hapjen e negociatave duke pasur parasysh euroskepticizmit, po përveç këtyre fakteve ai tha se Shqipëria ka marrë mbështetjen e vendeve anëtare./abcnews.al

qeveria.jpg
G. P.13:23 | 18/07/2018

Komisioneri për zgjerim në Bashkimin Evropian, Johanes Hahn, u largua nga Shqipëria duke lënë pas një sërë detyrash që duhet të realizohen deri pranverën e ardhshme. Qeveria shqiptare ka bërë publike strukturën, e cila do të merret me planifikimin dhe koordinimin e procesit “screening”.

Qeveria shqiptare duhet të rrisë ritmin e zbatimit të reformave, kjo është kërkesa kryesore e Bashkimit Evropian për procesin që do të aplikohet deri në Qershorin e ardhshëm, kur pretendohet të hapen zyrtarisht negociatat. Nga ana e saj, qeveria shqiptare ka publikuar strukturën që do të merret me planifikimin dhe koordinimin e procesit “screening”.

Kreu i delegacionit shtetëror për dialogun politik me Komisionin dhe vendet anëtare të Bashkimit Evropian do të jetë Ministri për Evropën dhe Punët e Jashtme, Ditmir Bushati.

Koordinimin teknik të procesit të screening dhe punës përgatitore për hapjen e negociatave, qeveria shqiptare cakton Zv/ministrin për Evropën dhe Punët e Jashtme, Genti Cakaj.

Njësia ekzistuese e koordinimit të procesit të integrimit evropian në Ministrinë për Evropën dhe Punët e Jashtme do të forcohet për t’u shndërruar në Sekretariatin e ardhshëm i cili do të sigurojë në kohë dhe cilësi ndërveprimin institucional dhe monitorimin e procesit.

Fuqizimi i strukturave koordinuese dhe përgjegjëse në Ministritë e Linjës, dhe veçanërisht në Ministrinë e Drejtësisë dhe Ministrinë e Brendshme, të cilat mbajnë dhe barrën më të madhe të procesit të screening për kapitujt 23-24, kapituj këto, të cilët përkojnë dhe me fushat prioritare të reformave tona të brendshme në drejtim të forcimit të shtetit të së drejtës.

Komisoneri për Zgjerim, Johanes Hahn, tha se duke nisur nga shtator do të zhvillohen takime në Bruksel, kapitull pas kapitulli, mes palëve ku në fokus do të jetë kapitulli 23 dhe 24. Hahn u shpreh se çdo ministri duhet të ketë një personel të mjaftueshëm dhe me përvojë. As paratë nuk do të kursehen në këtë proces, por ende nuk është bërë publike shuma e parave që do të paguajnë shqiptarët për hapjen e negociateve me Bashkimin Evropian./abcnews.al

DITMIR-BUSHATI.jpg
G. P.15:57 | 10/07/2018

Kryeministri  Rama dhe homologu i tij grek Aleksis Tsipras pritet të takohen sot në Londër, ku po marrin pjesë në takimin e pestë të procesit të Berlinit.

Ministri për Evropën dhe Punët e Jashtme, Ditmir Bushati, deklaroi nga Londra se ky takim është një mundësi e artë për të përcaktuar linjat e drejtimit që duhet të jepen në procesin e negociatave me Greqinë.

Sipas ministrit për Evropën dhe Punët e Jashtme procesi po ndesh rezistencë politike si në Shqipëri dhe në Greqi. Megjithatë Bushati beson se me vendosmëri dhe me vullnet politik, në një të ardhme të afërt do të ketë produkte konkrete, si për marrëveshjen edhe për elementë të tjerë të paketës që po diskutohet me shtetin fqinj.

Sipas tij është e rëndësishme zgjidhja cilësore e problemeve dhe jo afatet e përcaktuara për arritje të marrëveshjes./abcnews.al

NISIN-NEGOCIATAT-ME-GREQINE-1280x720.jpg
G. P.15:57 | 07/07/2018

Sipas të përditshmes greke Ekathimerini, bisedimet mes Athinës dhe Tiranës për çështjen e detit, janë ngrirë. Kjo deri në ratifikimin për marrëveshjen me Maqedoninë për emrin, në parlamentin grek dhe në atë maqedonas.

Situata e acaruar në vend pas marrëveshjes së arritur me Maqedoninë për çështjen e emrit ka detyruar qeverinë greke të shtyjë në kohë përpjekjet për të zgjidhur çështjet dy palëshe me Shqipërinë. E përditshmja greke Ekathimerini shkruan se zyra e kryeministrit grek Tsipras po pret për ratifikimin e marrëveshjes me Shkupin në parlamentin maqedonas dhe më pas në atë grek para se merret me çështjen e detit me Shqipërinë.

Por pavarësisht kësaj, negociatat mes Athinës dhe Tiranës do të vazhdojnë, në mënyrë të veçantë mes dy komiteteve për demarkacionin e zonave ekonomike ekskluzive të të dyja vendit, një hap që ka lënë varur dhe çështjet e tjera. Përpjekjet për demarkacionin e këtyre zonave është bllokuar disa herë në të kaluarën për shkak të mosmarrëveshjeve politike me Shqipërinë, shkruan më tej e përditshmja greke.

Presidenti i vendit, Ilir Meta, ka shfaqur hezitimin për të ratifikuar një marrëveshje të EEZ ndërsa kryeministri Edi Rama është shumë më i gatshëm. Përveç heqjes së statusit së luftës që ka mbetur në fuqi që në Luftën e Dytë Botërore, Greqia do të sigurojë të drejtat e grekëve etnikë në Shqipëri. Sipas deklaratave të mëparshme të ministrit të Jashtëm grek, janë bërë progrese për sa i përket çështjes së minoritetit grek në vendin tonë.

Qeveria greke ka mohuar kategorikisht se çështja e mprehtë e çamëve, të cilën Tirana e ka shtyrë me forcë, është ndër çështjet që duhen negociuar. Çamët pretendojnë të drejtën e pronës që kanë lënë në Greqi, kur ata u dëbuan gjatë Luftës së Dytë Botërore. Greqia hedh poshtë pretendimet, duke thënë se çamët ishin bashkëpunëtorë nazistë.

Deri më tani, të dyja palët kanë bërë përparim në të ashtuquajturat çështje me prioritet të ulët si p.sh. heqja e taksave konsullore për shqiptarët në Greqi dhe njohja e patentave shqiptare. Për më tepër, Shqipëria tashmë ka filluar procesin e zhvarrosjes të eshtrave të ushtarëve grekë që ranë në jug të Shqipërisë gjatë luftës greko-italiane në vitet 1940-41./abcnews.al

klajda-gjoshaaaa.jpg
G. P.21:16 | 03/07/2018

Sipas Klajda Gjoshës, janë vendosur dy kushte të reja nga vendimi i ministrave të Jashtëm të BE-së për hapjen e negociatave me Shqipërinë në Qershor të 2019-s me disa kushte të paracaktuara.

E ftuar në emisionin “Provokacija”, ajo tha se kushti i parë janë zgjedhjet lokale dhe reforma zgjedhore.

“E para, zgjedhjet lokale dhe do të shikohet dhe analizohet jo vetëm reforma zgjedhore, e cila duhet të ndërmerret tashmë sepse nuk ka më kohë për ta miratuar dhe zbatuar vitin e ardhshëm. Të gjitha vendet anëtare do të shikojnë me vëmendje se si do ta implementojmë atë që do të miratojmë, pra reforma”.

Kushti i dytë për ish-ministren Gjosha është çështja e azilkërkuesve.

“E dyta është çështja e azilkërkuesve. Po ta shikojmë vendoset për herë të parë në konluzionet e Këshillit si një kusht tashmë që nuk ka më negociim. Këshilli i kërkon Komisionit Europian një raport të posaçëm për numrin e azilkërkuesve shqiptarë në vendet e BE-së. Sidomos Franca që e ka shprehur një shqetësim të tillë”./abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono