ndeshje

islande.jpg
G. P.12:54 | 10/09/2019

Shqipëria do të luajë sonte në mbrëmje ndaj Islandës në duelin e vlefshëm për kualifikueset e Euro 2020. Trajneri Edi Reja do të bëjë disa ndryshime nga ndeshja e fundit me Francën.

Kombëtarja shqiptare sfidon Islandën në ndeshjen e radhës kualifikuese për Euro 2020. Kuqezinjtë nuk janë në momentin më të mirë për t’u përballur me islandezët, të cilët kanë grumbulluar 12 pikë po aq sa Franca dhe Turqia.

Fitorja do të rikthente qetësinë tek kuqezinjtë, të cilët janë kritikuar jo pak pas humbjes me Francën edhe pse ishte një disfatë e justifikueshme përballë kampionëve të botës.

Trajneri italian Edy Reja ka paralajmëruar disa ndryshime në organike për sfidën ndaj Islandës ndërkohë që skema taktike do të jetë 3-5-2. Në portë do të startojë Strakosha ndërkohë që në mbrojtje do të ulet në stol Mavraj dhe do të startojë nga minuta e parë Dermakun.

Në linjat anësore do të vendosen Hysaj dhe Lenjani, i cili do të zëvendësoje Roshin. Në mesin e fushës konfirmohet Keidi Bare, i cili do të luajë përkrah Gjasulës ndërkohë që ka balotazh mes Memushaj dhe Xhakës.

Sa i përket fazës sulmuese konfirmohet Sokol Cikalleshi, i cili do të luajë përkrah njërit mes Uzunit dhe Manaj. Tekniku italian është optimist për këtë duel madje zbuloi në konferencën për shtyp se do të kërkojë nga lojtarët një lojë sulmuese pasi skuadra nuk ka asgjë për të humbur.

Ndaj islandezëve nuk do të jetë aspak e lehtë pasi këta të fundit janë në garë për kualifikim dhe ndaj Shqipërisë do të luajnë vetëm për fitore. Shqipëria do të shfrytëzojë faktorin fushë dhe mbështetjen e tifozerisë që nuk ka munguar si brenda ashtu edhe në transfertë. Kuqezinjtë renditen në vendin e katërt në grupin H ne kuotën e 6 pikëve./ABC News Albania 24/7

edi-reja-1.jpg
G. P.13:35 | 08/09/2019

Trajneri i Shqipërisë, Edi Reja, pohoi gabimet e tij dhe të skuadrës në humbjen e rëndë pësuar në Paris. Italiani u duk si i dorëzuar për shkak të epërsisë së Francës.

Një analizë direkt “në të nxehtë” nuk është asnjëherë e lehtë. Gjithsesi, futbolli duhet t’u bindet rregullave të reja, atyre të televizionit dhe të publikut që i japin miliona, dhe kështu bëri edhe trajneri i Shqipërisë, Edi Reja.

Italiani provoi një disfatë të rëndë në Paris ndaj Francës, diçka që e shqetëson edhe një profesionist me 1 000 ndeshje të drejtuara në karrierë. Fillimisht, ai tregoi gabimet kryesore të ekipit, duke folur për Supersportin.

“Na goditën gabimet e fillimit, pasi nuk e mendoja që do të ishim aq shpejt me dy gola të pësuar. Pati mjaft gabime nga ana jonë në ato minuta, por nuk duhet të harrojmë se Franca ka lojtarë të një niveli shumë të lartë, shumë të shpejtë. Nëse do të kishim qenë pak më të vëmendshëm, sidomos taktikisht, golat e parë mund t’i kishim evituar”.

Më pas, pohoi atë që e quajti gabimin e tij personal.

“Për fat të keq, nuk mund ta luajmë sërish këtë ndeshje. I kërkova Roshit nëse mund ta bënte i vetëm gjithë krahun. U kuptua se pati vështirësi sepse Franca kishte dy lojtarë në ato pozicione. Roshi nuk është me tipare mbrojtëse dhe ishte faji im, dhe përgjegjësinë e marr unë, por meqë francezët ishin të shpejtë dhe teknikë, mendova për Roshin që ka shpejtësi dhe forcë fizike”.

Gjithsesi, kritika të veçanta pati për dy sulmuesit.

“Në pjesën e parë e mbajtëm shumë pak topin, edhe Bala, edhe Uzuni, dhe kjo do të na kishte lejuar që të merrnim pak frymë. Tentuam kundërsulmin, dhe disa herë e realizuam, por kur skuadra është në vështirësi, lojtarët e sulmit bëhen të rëndësishëm. Ata duhej ta mbanin më shumë topin, dhe të lehtësonin mbrojtjen dhe mesfushën”.

Reja gjykon, sidoqoftë, se Shqipëria fitoi diçka nga kjo ndeshje.

“Bare ishte shumë mirë. Luajti 90 minuta në nivel të lartë, hodhi në zonë shumë krosime. Është një lojtar me nivel edhe në aspektin teknik. Po ashtu edhe Gjasula. Shqipërisë i kanë ardhur dy lojtarë të rëndësishëm”./ABC News Albania 24/7

odise-roshi-dhe-klaus-gjasula.jpg
G. P.17:22 | 03/09/2019

Shqipëria mund të arrijë rezultat pozitiv ndaj Francës, siç ka bërë në ta kaluarën. Ky është mendimi i futbollistit të kombëtares, Odise Roshi, ndërsa debutuesi Gjasula është i lumtur për grumbullimin.

Nuk është e lehtë të bësh parashikime, sidomos kur luan ndaj një rivali të tillë. Ky është lajtmotivi i Odise Roshit, njërit prej lojtarëve vërtet simbol të kombëtares së Shqipërisë.

Futbollisti i krahut, prej 8 vitesh pjesë e përfaqësueses, nuk dëshiron të flasë para kohe, ndërsa afron e 7 shtatori i duelit ndaj Francës.

“Tani ndihem shumë mirë. Kam mbaruar fazën përgatitore. Kemi bërë tetë ndeshje. Kur futem në fushë jap maksimumin dhe kuer shënoj është kënaqësi shumë e madhe për mua. Fryma është shumë e mirë, pothuajse edhe kur kemi qenë me De Biasin, Panuçin, por edhe me trajnerin e re”, tha Roshi.

Në çfarë forme është vetë Roshi, por edhe kombëtarja në prag të duelit europian?

“Edhe ata që janë në stol luajnë në ekipe shumë të mëdha. Franca ka një ekip shumë të mirë edhe duhet t’ia lemë fushës të japë rezultatin. Nuk është mirë të flasim do fitojmë apo do humbim. Ajo dihet me kë luajmë ne dhe çfarë duhet të bëjmë. Edhe me Francën kemi fituar në shtëpi, kemi marrë barazim atje”, tha Roshi.

Një debutues në ekip është Klaus Gjasula, mesfushori me tipare mbrojtëse, vëllai i Jurgen Gjasulës, që po arrin majat e karrierës në moshën 29-vjeçare.

“Është një kënaqësi për mua që jam këtu dhe kam prit për këtë ditë shumë gjatë. Tani ka ardhur dhe do jap maksimumin për të fituar. Dy vitet e fundit në futboll më kanë ecur shumë mirë dhe tani luaj në Bundesligë”, tha Gjasula./ABC News Albania 24/7

tirana-2.jpg
G. P.15:59 | 26/08/2019

Superliga shqiptare fillon nesër ndeshjet e javës së dytë, për shkak të impenjimit të kombëtares në Euro 2020. Teuta e Tirana janë në pozita të pabarabarta në krahasim me rivalët e tjerë.

Superliga duhet të nxitojë për shkak të kombëtares. Ndeshjet e javës së dytë do të luhen pa mbërritur mirë mesjava, për shkak të fillimit të ciklit të eliminatoreve të Europianit.

Të martën, pra nesër në orën 19:00, do të dalin në fushë Teuta me Tiranën, dy nga skuadrat që e nisën kampionatin me fitore.

Kryeqytetasit dhe durrsakët luajtën të shtunën, pra do të kenë vetëm dy ditë të plota pushim për sfidën e radhës, diçka që i vendos në pozicion më të pabarabartë sesa Kukësi e Partizani, pretendentë të tjerë për titull.

Veriorët dhe të kuqtë luajtën mes tyre të premten në “Elbasan Arena”, ndërsa duelet e javës së dytë do t’i kenë të mërkurën, duke pasur plot 4 ditë pushim.

Kuksianët do të shkojnë në Vlorë, në fushën e Flamurtarit, ndërsa skuadra e trajnerit Lerda do të ketë një tjetër udhëtim jashtë fushe, këtë herë në Gjirokastër ndaj Luftëtarit.

Gjasat janë që kryeqytetasit të prishin mallkimin e fushës gjirokastrite ku kanë 22 vjet pa fituar, aq më tepër që vendasit duken të papërgatitur. Gjithsesi, sezonin e kaluar u eliminuan nga Kupa prej Luftëtarit dhe u mundën në Superligë brenda në “Selman Stërmasi”.

Një ndeshje e fortë pritet në Kurbin, mes Laçit e Skënderbeut, ndërsa Vllaznia shkon në Ballsh ndaj Bylisit, pas fitores së parë në “Loro Boriçi”./ABC News Albania 24/7

r1-2.jpg
Sej rie10:00 | 25/06/2019

Kryeministri Edi Rama kërkon që shkarkimit të Presidentit Ilir Meta t’i shkohet deri në fund, duke thënë se veprimet e tij janë një hata kushtetuese. Kryetari i Partisë Socialiste, tha se nga eksperienca e tij, bojkoti nuk ndihmon.

Mëngjesin me banorët e njësisë numër 2 në kryeqytet, e nisi me një lexim filxhani për fatet e politikës.

“Edhe këtu në fund mbetet një I mbrapa. Unë piktor jam, unë me zhgarravina merrem gjithë ditën. Puna është ta interpretosh, unë nuk di ta interpretoj kurse Monika e di”.

Kryeministri e porosit Vasilika Hysin që të mos neglizhohet puna parlamentare për shkarkimin e Metës.

“Vaso, si po shkon komisioni për presidentin? je ti aty? Je në komision? Duhet çuar deri në fund ai proces se kjo është një hata kushtetuese dhe institucionale”

Edi Rama i thërret eksperiencës së tij në opozitë, për t’i dhënë këshilla falas rivalit të tij, Lulzim Basha.

E rëndësishme për socialistët është procesi i rregullt zgjedhor.

“Gjëja më e rëndësishme për ne është që procesi të jetë sa më korrekt. mungesa e kundërshtarëve e bën të komplikuar fushatën në anën tjetër sepse një pjesë thonë s’ka kundërshtarë. programi i tyre është vetëm rrëmuja, konfuzioni, çorodia, mërzia, dëshpërimi, që njerëzit të neveriten ose të trishtohen e të thonë ik se nuk merremi me këtë punë fare”.

Kryeministri vijon takimet e tij të mërkurën në qarkun Elbasan, të enjten në Tiranë, dhe të premten fushata mbyllet në qarkun Vlorës./ABC News Albania 24/7

lirim-kastrati.jpg
G. P.13:28 | 18/06/2019

Një talent i Kosovës mund të kishte qenë pjesë e kombëtareve shqiptare. Sulmuesi Lirim Kastrati tregon historinë e tij me ekipin e Shqipërisë U17.

Është një nga lojtarët e rinj më të talentuar. Lirim Kastrati po shkëlqen në Kroaci me Lokomotivën e Zagrebit, dhe quhet shpresë e Kosovës, por ndoshta mund të kishte qenë edhe i Shqipërisë.

Sulmuesi 20-vjeçar, lindur në Dardanë, ka qenë pjesë e Shkëndisë së Tiranës për disa vjet, dhe është grumbulluar në Shqipërinë U17, veçse nuk mundi të vazhdonte më tej. Ai foli për historinë e tij me Shqipërinë, i ftuar në emisionin Interaktiv në televizionin KTV.

“Kam qenë tek Shqipëria U17, pak por kam pasur disa probleme dhe më kanë hequr. 10 ditë kam ndenjur në grumbullim dhe ditën e ndeshjes më kanë heq nga 18-shja. Nuk e di arsyen pse më kanë hequr, por që prej atëhere kam vendosur të luaj për Kosovën. Kemi pasur ndeshje në Durrës dhe kanë ardhur familjarë të mi, me 3-4 makina, 5 minuta para ndeshjes më kanë thënë “nuk je as  në 18-she”. E kam pa prej tribune ndeshjen”, tha Kastrati.

Kastrati u vlerësua lart edhe në Kroaci, për golat e shënuar, dhe ndihmën për Lokomotivën e Zagrebit, aq sa mediat informuan se mund të merrte ftesë edhe nga Federata për të qenë pjesë e kombëtareve kroate. Futbollisti tregoi për KTV-në se nga Shqipëria, pati sërish interesim, por ai e kishte marrë vendimin.

“Para se me vendos për të luajtur me Kombëtaren A më kanë kontaktuar, por e kam vendosur që do luaj për Kosovën gjthmonë se jam ndjerë më komod, se më kanë pritur më mirë Ramiz Krasniqi me U19, tash trajneri dhe të gjithë”, tha Kastrati.

Karriera e tij duket në rrugën e duhur, pasi shënoi 7 gola këtë sezon për Lokomotivën, në 21 ndeshje të luajtura në Ligën e Parë të Kroacisë, duke ndëshkuar edhe Dinamon e Zagrebit me dy gola, si dhe ekipe të tjerë si Istrën, Goricën apo Sllaven Belupon. Ai luajti pak ndeshje me ekipet zinxhir të Kosovës, ndërsa është sot pjesë e ekipit përfaqësues të të rriturve./ABC News Albania 24/7

duka.jpg
G. P.12:40 | 18/06/2019

Stadiumi i ri kombëtar mund të mos përfundojë as në shtator. Vetë presidenti i Federatës Shqiptare të Futbollit, Armand Duka, shprehu dyshime për mbylljen në kohë të punimeve.

Afatet janë shkelur, dhe fundi ende nuk dihet. “Arena Kombëtare”, stadiumi i ri dhe modern në Tiranë, mund të mos shijohet nga ekipi përfaqësues dhe nga tifozët as në muajin Shtator.

I menduar fillimisht për t’u bërë gati shumë muaj më parë, impianti nuk mundi të përfundonte as në fund të vitit të kaluar, dhe as në Qershor, siç e kërkoi me ngulm kryeministri Rama, në përpjekje për të pasur një sukses sportiv në fushatën zgjedhore.

Shtatori u dha si koha e re e mbylljes së punimeve, dhe këtë gjë e komentoi presidenti i Federatës Shqiptare të Futbollit, Armand Duka.

“Shumë kush e sheh gjysmë plot dhe gjysmë bosh për çka i përket termave kohorë për Shtatorin. Ne i kemi vënë objektiv kompanisë që duam të luajmë në Shtator dhe me të vërtetë e kemi shumë të domosdoshme të luajmë në Shtator në këtë stadium jo vetëm sepse duam ta shijojmë stadiumin e ri, duam të kemi kushte sa më të mira për spektatorin, por duam të arrijmë më shumë rezultat në praninë e më shumë spektatorëve dhe me një atmosferë akoma më të mirë. Kështu që do bëjmë të gjitha përpjekjet dhe kompania gjithashtu po bën të gjitha përpjekjet, por nuk mund të jemi shumë të sigurt për Shtatorin”, tha ai.

Nëse nuk arrihet shtatori, atëherë shpresohet që stadiumi të mund të presë ndeshjen kryesore të grupit tonë eliminator në Euro 2020, atë ndaj Francës. Duka vizitoi Arenën në krah të presidentit të Federatës Çeke të Futbollit, Martin Malik, i cili erdhi në Shqipëri me ftesë pikërisht të palës shqiptare. Së bashku, ata vizituan më pas edhe zyrat e reja të Federatës Shqiptare, që po ndërtohen në ish-kompleksin Dinamo./ABC News Albania 24/7

880x495_333033.jpg
nev ila17:41 | 08/06/2019

Kryeministri Rama në një postim të tij në rrjetet sociale ka përgëzuar kombëtaren shqiptare për ndeshjen me Islandën ditën e sotme. Sipas Kryeministrit ndeshja u rishfaq ditën e sotme si një kohë e mirë pas një stine të mërzitshme e cila patjetër do të sjellë rezultate.

“Gjynah ai gol se ndeshja ishte barazim i pastër, po sidoqoftë përgëzime kuqezinjve për shpirtin luftarak të kohëve të mira, që u rishfaq sot pas një stine të mërzitshme pa lidhje! Sot pamë një skuadër që nisi një rrugë të re ku patjetër do vijnë dhe rezultatet”, shkruan Rama./abcnews.al

trajner.jpg
G. P.14:10 | 08/06/2019

Mali i Zi shkarkon nga detyra trajnerin serb të kombëtares së futbollit. Ljubisha Tumbakoviç së bashku me dy lojtarë me origjinë serbe të kombëtares malazeze nuk pranuan të ishin në fushë përballë Kosovës, në kuadër të eliminatoreve për kampionatin europian.

Ljubisha Tumbakoviç nuk do të jetë më trajner i Malit të Zi! Lajmi vjen nga gazeta malazeze “Vijesti” e Podgoricës, pas mbledhjes-rrufe që mbajti kryesia e Federatës vendase e Futbollit. Presidenti Dejan Stankoviç dhe drejtuesit e tjerë, e quajtën jo të ndershme që 68-vjeçari të vazhdojë detyrën pasi refuzoi të drejtonte kombëtaren në ndeshjen ndaj Kosovës për eleminatoret e Europianit.

Tumbakoviç, trajner serb, ishte nën presion të madh nga Beogradi, për shkak të marrëdhënieve tepër të tensionuara mes Serbisë dhe Kosovës, madje sipas “Vijestit”, presioni ishte edhe mbi familjen e tij. Po për këtë shkak, ndeshjen e braktisën edhe dy futbollistët që luajnë me Crvena Zvezdën e Beogradit, Mirko Ivaniç dhe Filip Stojkoviç. Këta të dy janë malazezë, por me origjinë serbe, ndaj edhe trysnia mbi ta ishte tepër e madhe, aq më shumë që luajnë në Superligën e Serbisë.

Ndeshja në stadiumin e Buduçnostit përfundoi 1-1, pasi Milot Rashica kaloi në avantazh Kosovën në minutën e 25-të dhe Stefan Mugosha barazoi në të 69-ën. Përballja ishte shumë e fortë dhe e bukur, me raste për të dyja skuadrat, sidomos për shqiptarët e Kosovës, që mund të kishin shënuar gola të tjerë, ndërsa malazezët rrezikuan më shumë pas pushimit. Pas dy ndeshjeve, Kosova ka 2 pikë, po aq sa Bullgaria e Mali i Zi, ndërsa kryeson grupin A Anglia me 6 pikë, ndaj 3 të Çekisë./ABC News Albania 24/7

kosova-mali-i-zi.jpg
G. P.10:40 | 08/06/2019

Ndeshja e futbollit ndërmjet Kosovës dhe Malit të Zi, që përfundoi më rezultat të barabartë 1 me 1, u parapri me trysni politike. Ndeshja e vlefshme për eliminatorët për Kampionatin Evropian, u bojkotua nga përfaqësuesit e Malit të Zi me prejardhje serbe.

Mediet në Mal të Zi thanë se se trajneri i Malit të Zi, Lubisha Tumbakoviç, nuk do ta udhëheqë përfaqësuesen kundër Kosovës, pas trysnisë më të cilën është përballur nga Serbia për të mos luajtur kundër Kosovës. Në ekip nuk janë paraqitur as dy futbollistë tjerë që luajnë në ekipe të Serbisë.

Ministri i Jashtëm i Kosovës, Behgjet Pacolli, shkroi në rrjetet sociale se “Mali i Zi është mik dhe partner i Kosovës. Serbia nuk do ta pengojë këtë miqësi. Trysnia ndaj trajnerit dhe ndaj disa lojtarëve nga Beogradi dhe mediet serbe, e tregon fytyrën e vërtetë të Serbisë për të ndërhyrë në vendet fqinje. Kosova dhe Mali i Zi do t’i kapërcejnë këto pengesa nga Beogradi dhe të dyja vendet tona njohin taktikat e Serbisë”, shkroi zoti Pacolli.

Ndeshjet e futbollit në Ballkanin Perëndimor shpeshherë marrin ngjyrime politike, për shkak të marrëdhënieve të brishta ndërmjet vendeve të rajonit./VOA


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono