ndeshje

880x495_333033.jpg
nev ila17:41 | 08/06/2019

Kryeministri Rama në një postim të tij në rrjetet sociale ka përgëzuar kombëtaren shqiptare për ndeshjen me Islandën ditën e sotme. Sipas Kryeministrit ndeshja u rishfaq ditën e sotme si një kohë e mirë pas një stine të mërzitshme e cila patjetër do të sjellë rezultate.

“Gjynah ai gol se ndeshja ishte barazim i pastër, po sidoqoftë përgëzime kuqezinjve për shpirtin luftarak të kohëve të mira, që u rishfaq sot pas një stine të mërzitshme pa lidhje! Sot pamë një skuadër që nisi një rrugë të re ku patjetër do vijnë dhe rezultatet”, shkruan Rama./abcnews.al

trajner.jpg
G. P.14:10 | 08/06/2019

Mali i Zi shkarkon nga detyra trajnerin serb të kombëtares së futbollit. Ljubisha Tumbakoviç së bashku me dy lojtarë me origjinë serbe të kombëtares malazeze nuk pranuan të ishin në fushë përballë Kosovës, në kuadër të eliminatoreve për kampionatin europian.

Ljubisha Tumbakoviç nuk do të jetë më trajner i Malit të Zi! Lajmi vjen nga gazeta malazeze “Vijesti” e Podgoricës, pas mbledhjes-rrufe që mbajti kryesia e Federatës vendase e Futbollit. Presidenti Dejan Stankoviç dhe drejtuesit e tjerë, e quajtën jo të ndershme që 68-vjeçari të vazhdojë detyrën pasi refuzoi të drejtonte kombëtaren në ndeshjen ndaj Kosovës për eleminatoret e Europianit.

Tumbakoviç, trajner serb, ishte nën presion të madh nga Beogradi, për shkak të marrëdhënieve tepër të tensionuara mes Serbisë dhe Kosovës, madje sipas “Vijestit”, presioni ishte edhe mbi familjen e tij. Po për këtë shkak, ndeshjen e braktisën edhe dy futbollistët që luajnë me Crvena Zvezdën e Beogradit, Mirko Ivaniç dhe Filip Stojkoviç. Këta të dy janë malazezë, por me origjinë serbe, ndaj edhe trysnia mbi ta ishte tepër e madhe, aq më shumë që luajnë në Superligën e Serbisë.

Ndeshja në stadiumin e Buduçnostit përfundoi 1-1, pasi Milot Rashica kaloi në avantazh Kosovën në minutën e 25-të dhe Stefan Mugosha barazoi në të 69-ën. Përballja ishte shumë e fortë dhe e bukur, me raste për të dyja skuadrat, sidomos për shqiptarët e Kosovës, që mund të kishin shënuar gola të tjerë, ndërsa malazezët rrezikuan më shumë pas pushimit. Pas dy ndeshjeve, Kosova ka 2 pikë, po aq sa Bullgaria e Mali i Zi, ndërsa kryeson grupin A Anglia me 6 pikë, ndaj 3 të Çekisë./ABC News Albania 24/7

kosova-mali-i-zi.jpg
G. P.10:40 | 08/06/2019

Ndeshja e futbollit ndërmjet Kosovës dhe Malit të Zi, që përfundoi më rezultat të barabartë 1 me 1, u parapri me trysni politike. Ndeshja e vlefshme për eliminatorët për Kampionatin Evropian, u bojkotua nga përfaqësuesit e Malit të Zi me prejardhje serbe.

Mediet në Mal të Zi thanë se se trajneri i Malit të Zi, Lubisha Tumbakoviç, nuk do ta udhëheqë përfaqësuesen kundër Kosovës, pas trysnisë më të cilën është përballur nga Serbia për të mos luajtur kundër Kosovës. Në ekip nuk janë paraqitur as dy futbollistë tjerë që luajnë në ekipe të Serbisë.

Ministri i Jashtëm i Kosovës, Behgjet Pacolli, shkroi në rrjetet sociale se “Mali i Zi është mik dhe partner i Kosovës. Serbia nuk do ta pengojë këtë miqësi. Trysnia ndaj trajnerit dhe ndaj disa lojtarëve nga Beogradi dhe mediet serbe, e tregon fytyrën e vërtetë të Serbisë për të ndërhyrë në vendet fqinje. Kosova dhe Mali i Zi do t’i kapërcejnë këto pengesa nga Beogradi dhe të dyja vendet tona njohin taktikat e Serbisë”, shkroi zoti Pacolli.

Ndeshjet e futbollit në Ballkanin Perëndimor shpeshherë marrin ngjyrime politike, për shkak të marrëdhënieve të brishta ndërmjet vendeve të rajonit./VOA

kosoco.jpg
G. P.13:31 | 07/06/2019

Përfaqësuesja e Kosovës do të luajë sonte përballë Malit të Zi për eliminatoret e Kampionatit Europian. Tre pikët janë jetike për dardanët, të cilët kanë si objektiv kryesor vendin e dytë në grupin A.

Përfaqësuesja e futbollit të Kosovës do të luajë sonte në mbrëmje në fushën e Malit të Zi. Kosova ka objektivn e qartë, vendin e dytë në grupin A. Tre pikët ndaj Malit të Zi janë jetike për Kosovën në rrugëtimin e këtyre eleminatoreve. Ndeshja do të luhet në Podgoricë dhe pa tifozë pasi vendasit janë dënuar për koret raciste në ndeshjen ndaj Anglisë.

Në grupin e lojtarëve të Kosovës ka mungesa të shumta si Valon Berisha, Herolind Shala dhe Hekuran Kryeziu.  Kapiten i përfaqësueses konfirmohet sulmuesi Vedat Muriqi.

Sa i përket Ibrahimajt dhe Dresheviç, FIFA nuk ka dhënë ende konfirmimin për të mbajtur veshur fanellën e Kosovës dhe nuk do të jenë gati për ndeshjet e radhës.

Sfida do të jetë tepër e veçantë për portierin Muriç, i cili ka luajtur më parë për grupmoshat e Malit të Zi ndërkohë që sonte do të mbajë veshur fanellën e dardanëve. Në fushë nga minuta e pare konfirmohet Floren Hadergjonaj, i cili pritet të rrisë cilësinë në përfaqësuesen e Kosovës./ABC News Albania 24/7

la-liga.jpg
G. P.13:45 | 04/06/2019

Rriten përmasat e skandalit të trukimit në futbollin spanjoll. Plot 7 lojtarë të Vajadolidit besohet se janë përfshirë në manipulimin e ndeshjes ndaj Valencias.

Tronditja në Spanjë është e madhe. Një ndeshje e elitës, e njërës prej ligave më të mëdha të Europës dhe të gjithë botës, dyshohet fuqimisht si e trukuar nga katër persona.

Vajadolid-Valencia, që përfundoi 0-2 dhe që siguroi përfundimisht kualifikimin në Champions të skuadrës mike, mendohet se u manipulua me ndihmën e disa lojtarëve vendas, ndërsa hetimi i bujshëm po vazhdon.

Policia fillimisht ndaloi ish-lojtarin e Realit, Raul Bravo, dhe ish-lojtarin tjetër, Karlos Aranda, të cilët më pas u vendos të hetoheshin në gjendje të lirë. Mes të arrestuarve ishte edhe presidenti i klubit të Hueskës, Aguson Lasaosa, i cili tashmë ka dhënë dorëheqjen.

Edhe Hueska është mes skuadrave të dyshuara për trukim rezultatesh, sidomos për ndeshjen e humbur 2-6 në fushën e vet ndaj Valencias. Gazeta “El Mundo” titullon: Përgjimet që provojnë fajin: “Shtatë lojtarë të Vajadolidit janë të blerë”!

Sipas gazetës, hetuesit kanë 6 muaj që përgjojnë telefonatat e njerëzve të përfshirë në këtë skandal. Informacioni është që trukimi do të ishte që Valencia të fitonte pjesën e parë dhe krejt ndeshjen, ashtu siç edhe ndodhi.

Në bisedat mes tyre, manipuluesit deklaronin se trukimi do të kryhej me ndihmën e kapitenit të Vajadolidit, Borha Fernandezit, dy mbrojtësve të qendrës dhe portierit.

Sipas tyre, këta lojtarë në role kyçe mjaftonin për t’ia arritur qëllimit. Kapiteni i Vajadolidit duhej të merrte të paktën 50.000 euro për të ndihmuar trukimin, ndërsa lojtarët e tjerë më pak.

Borha Fernandez gjithashtu u arrestua nga policia dhe pastaj gjykata vendosi të hetohej gjithashtu në gjendje të lirë. Ai pohoi për mediat se nuk ishte fajtor. Kaq të sigurt ishin trukuesit për rezultatin, saqë Karlos Aranda ftoi klientë të sallonit të tij në Malaga për të vënë 10.000 euro bast, e për të fituar 20.000.

Shqetësimi në Spanjë nga skandali është tepër i madh, pasi tregon se trukimet mund të ndodhin edhe në ekipe ku paguhen miliona euro. Edhe pse Vajadolidi ka rrogat më të ulëta në La Liga, sërish klubi paguan gati 24 milionë euro në vit, që do të thotë mesatarisht më shumë se 1 milionë euro në vit për çdo futbollist.

Siç ndodh në mjaft vende të Mesdheut, duket se kjo ka të bëjë më shumë me kulturën sesa me nevojën për jetë më të mirë./ABC News Albania 24/7

bravo.jpg
G. P.23:33 | 29/05/2019

Autoritetet spanjolle kanë zbardhur skemën se si operonte grupi i strukturuar kriminal nën drejtimin e ish-futbollistit të Real Madrid, Raul Bravo. Grupi përzgjidhte ndeshjet për t’u trukuar në fillim ose fund të sezonit.

Pas arrestimeve të fundit për fiksime dhe trukime rezultatesh, Policia e Spanjës ka zbardhur edhe skemën se si operonte ky grup i strukturuar kriminal me në krye Raul Bravon, ish-futbollistin e Realit.

Gjithsesi 5 ishin hapat që duhet të ezauroheshin deri në fitimin e shumave marramendëse. Sipas autoriteteve spanjolle Bravo me shokë kishin ndërtuar një skemë të qartë dhe të pakuptueshme, deri te detajet se si do të luheshin ndeshjet në kompanitë e basteve. Pëlqehej kombinimi i koeficienteve, në mënyrë që fitimi të ishte sa më i madh.

Së pari, bëhej përzgjedhja e ndeshjeve që do të luheshin në baste. Grupi preferonte më shumë ato në fillimin e sezonit, ose në fund për ta bërë më të lehtë trukimin e tyre. Më tej vendosej bashkërisht se si do të luheshin këto takime në baste. Preferoheshin më shumë rezultatet e kombinuara (rezultat i pjesës së parë dhe ai final, korne, etj). Hapi i radhës kishte të bënte me vendosjen e kontakteve, me procesin e ndërlidhjes me aktorët që do ta trukonin përballjen.

Vendoseshin kontaktet e para me pjesëtarët e klubeve që do të trukonin ndeshjet. Jo vetëm lojtarë, por edhe anëtarë të stafit teknik. Dhe sapo arrihej marrëveshja, duhet që grupi i strukturuar të paguante lojtarin që kishte marrë përsipër të trukonte ndeshjen (vetëm, ose në bashkëpunim me pjesën tjetër të skuadrës). Pagesa bëhej në dorë dhe në dy këste.

Kësti i parë përpara zhvillimit të ndeshjes dhe i dyti pasi gjërat të ishin bërë ashtu siç duhej dhe rezultati të dilte siç kërkohej. Grupi i organizuar merrte përsipër që të paguante të gjithë ata që do të përfshiheshin në trukim, të përzgjedhur nga kapiteni ose nga drejtuesit e klubit. Në fund pas realizimit të fiksimit të rezultatit, operohej me kompanitë për tërheqjen e lekëve dhe ndarjen sipas kontributeve./ABC News Albania 24/7

partizani-13-770x470-1.jpg
nev ila20:59 | 06/05/2019

Titulli kampion mund të vendoset në derbin e kryeqytetit Partizani-Tirana. Në rast se të kuqtë fitojnë do të shpallen zyrtarisht kampion ndërkohë që mungesat do të jenë të shumta.

Afron derbi kryeqytetas në një kohë që Partizani ka mundësinë e parë, “Match Point-in” e parë për të qenë kampion kombëtar pas kaq vitesh. Përballë Tirana. Edhe kjo e fundit me një domosdoshmëri të rrëmbejë pikët që i duhen për qetësi mbijetese, por këtë radhë derbi luhet në pozita të atilla që vendos shumë.

Partizani del kampion edhe nëse Luftëtari fiton në Gjirokastër me Kukësin, por nëse fiton vetë derbin atëherë çdo gjë është mbyllur. Sidoqoftë suksesi ndaj Flamurtarit ka lënë pasoja, pasi thellohet numri i mungesave për derbin e kësaj jave.

Përveç Telushit që është i pezulluar nga Disiplina, ndaj Tiranës do të mungojnë edhe Asani me Mensah, për shkak se kanë plotësuar numrin katër të kartonëve të verdhë. Nga ana tjetër Bardhi ka shfaqur probleme së fundmi, si dhe a do të jetë Belica në gjendje të kthehet në fushë, formacioni për derbin mbetet një rebus për t’u zgjidhur.

Prej disa javësh, trajneri Gega ka qenë i detyruar të bëjë modifikime në formacionin që përdori zakonisht në pjesën e parë të sezonit, por kjo me Tiranën mbetet një ekuacion më vete.

Tirana ka më shumë arsye që të fitojë, por Partizani kërkon të mbyllë çështjen e titullit që këtë javë, dhe me një favor me shumë, atë të freskisë fizike, pasi Tirana luan të mërkurën me Luftëtarin në “Selman Stërmasi” për gjysmëfinalen e kthimit të Kupës./ABC News Albania 24/7

DEKLARATAT-PAS-ANDORRES.mpg_snapshot_00.38-1280x720.jpg
ent ela13:00 | 26/03/2019

Suksesi ndaj Andorrës u arrit falë karakterit dhe mobilizimit të gjithë ekipit.

Trajneri i Kombëtares, Ervin Bulku, dhe lojtarët e tij, komentojnë rezultatin 3-0 në eleminatoret e Europianit.

Në një prononcim për shtypin, Trajneri i Kombëtares, Ervin Bulku, tha se:

“Kanë ndryshuar çunat në fushë, dhanë maksimumin, treguan kualitetin që kanë të gjithë bashkë. Duhet ta kishim zhbllokuar më shpejt rezultatin që ta kishim më të lehtë”

Kapiteni Elseid Hysaj tregoi se çfarë vendosi në favor të Shqipërisë.

“Besoj se ishte e rëndësishme fitorja e kësaj ndeshje, për moralin e çunave dhe për moralin e gjithë tifozëve. Shpresoj që me këtë fitore të jemi akoma në lojë dhe të mendojmë për lojrat e tjera”

Gjithashtu edhe golashënuesi Armando Sadiku në ndeshjen me Andorrën deklaroi se:

Jam shumë i gëzuar që arrita të shënoja, ishte ndeshje e vështirë brenda fushës. Jam shumë i gëzuar gjithashtu që u riktheva në kombëtare pas 1 viti dhe i lumtur për 3 pikët”

Migjen Basha nuk e ka harruar aq shpejt ish-trajnerin Panuçi.

“Nuk e kam kuptuar se cfarë mendimi ka patur ai, a ka qenë negativ apo pozitiv, nga deklaratat e fundit më janë dukur negative, nuk ka pasur respekt, por disa lojtarë këtu bënë historinë.

Ndërsa Bekim Balaj u duk tepër i çliruar pas golit të shënuar.

“Do bëj maksimumin, normalisht jam sulmues, detyra ime është të shënojë sa më shumë. Sigurisht që golat e mi kthehen në ndihmë dhe pikë për ekipin kombëtar. E doja shumë golin sepse në ca ndeshje më ka munguar dhe shpresoj të shënoj sa më  shumë në të ardhmen. Golin e përjetoj shumë. E doja një gol

Kombëtarja u ndje pikërisht kështu në dhomën e zhveshjes së “Stadiumit Kombëtar” të Andorrës, e çliruar pas një periudhe të gjatë negative, pikërisht nga rezultati 3-0 ndaj Andorrës, në ndeshjen e dytë në grupin eleminator të Europianit.

Pas shtatë humbjeve e vetëm dy fitoreve minimale 1-0 me Kristian Panuçin, i qelloi fati, si edhe merita, ish-ndihmësit të tij, Ervin Bulku, që të ishte në stol./abcnews.al

atmosfera.jpg
G. P.16:10 | 22/03/2019

Shkodra po bëhet gati për ndeshjen e sotme të kombëtares sonë me Turqinë në “Loro Boriçi”. Në stadium do të jenë rreth 10 mijë tifozë.

Kombëtarja shqiptare e futbollit do të ketë një mbështetje të madhe sonte në mbrëmje ndaj Turqisë edhe pse atmosfera nuk ka qenë shumë elektrizuese në qytetin  e Shkodrës si në ndeshjet e kaluara. Për këtë duel janë shitur rreth 10 mijë bileta, ku 1 mijë prej tyre i përkasin tifozerisë mike, asaj të Turqisë.

Ashtu si në çdo takim ku luan kombëtarja shqiptare, prezent në stadium do të jetë edhe tifogrupi “Tifozat Kuqezi”, të cilët do të qëndrojnë tek tribuna C5. Tifozët kanë ardhur nga të gjitha trojet shqiptare, por edhe nga diaspora. Nuk do të mungojnë në këtë përballje as plisat e Prishtinës, të cilët janë të kudondodhur ku luan kombëtarja.

Në stadium do të jenë edhe tifogrupe të tjera mbështetëse të ngjyrave kuqezi, të cilët do të përgatisin një atmosfere të ngrohtë për skuadren kombëtare. Shqipëria e ka patur gjithmonë me vete lojtarin e saj të 12, tifozët. E sonte në mbrëmje duhet ta shpërblejnë me fitore sakrificën e tyre./abcnews.al

KOMBETARJA-GAVAZAJ-ABAZAJ-1280x720.jpg
G. P.13:15 | 14/03/2019

Dy lojtarë të rëndësishëm do të jenë sërish pjesë e kombëtares për ndeshjet e radhës në Europian. Sadiku dhe Abrashi lanë pas dëmtimet, ndërsa trajneri Panuçi bëri të ditur listën e futbollistëve për Turqinë dhe Andorrën.

Sërish me mungesa, por edhe me rikthime të mëdha. Kristian Panuçi mund të ndihet i lumtur përgjysmë, ndërsa lajmëron listën e lojtarëve për dy ndeshje zyrtare, ato ndaj Turqisë dhe Andorrës në Euro 2020. Në skuadër do të jenë pas shumë muajsh dy prej lojtarëve më të rëndësishëm, sulmuesi kryesor Armando Sadiku, dhe mesfushori i fortë Amir Abrashi.

I pari kaloi dëmtimin e pësuar në Spanjë dhe gjeti formën me Luganon në Zvicër. Shqiptari i Kosovës vuajti shumë nga dëmtimi në Gjermani, por tashmë është kthyer në formacion tek Freiburg në Bundesligë. Mungojnë, gjithsesi, Odise Roshi ende i pariaftësuar, apo Sokol Cikalleshi i dëmtuar, ndërsa Panuçi ka lënë jashtë lojtarë si Lenjani e Ndoji, për zgjedhje personale teknike.

Kuqezinjve u kthehet edhe sulmuesi Kristal Abazaj që ka fituar formën pas huazimit tek Osijeku në Ligën e Parë të Kroacisë, ku ka shënuar edhe gol. Në mesfushë, është ftuar Kristi Qose, lojtar i elitës në Sllovaki, që po zhvillon sezon shumë të mirë me Ruzomberokun.

Në listë janë 24 lojtarë, ku nuk mungojnë emrat e zakonshëm në portë, mbrojtje apo mesfushë, ndërsa kombëtarja luan në 22 mars ndaj Turqisë në “Loro Boriçi” dhe në 25 mars në fushën e Andorrës.

Panuçi do të dalë para mediave të dielën në orën 11:00 në Kompleksin “Tropikal” në plazhin e Durrësit, të njëjtën ditë kur nis edhe grumbullimi, me seancën e parë në orën 15:00./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono