ndeshja

conte.png
G. P.22:23 | 18/10/2018

Antonio Konte mund të marrë drejtimin e Real Madridit. Klubi spanjoll kontaktoi sërish italianin, që duket më afër se kurrë pankinës së Los Blankos. Largimi në mënyrë jo korrekte nga kombëtarja spanjolle pak para se të niste botërori i Rusisë, për të marrë Real Madrid, mund të rezultojë vendimi më i gabuar i Julen Lopetegui në karrierën e tij sdi trainer futbolli. Klubi i Florentino Perez po mendon ta shkarkojë trainerin për mungesë rezultatesh. Jo vetëm kaq, duket se Los Blancos kanë gjetur edhe pasuesin e tij.

Mediat italiane raportojnë se Antonio Conte ka patur kontakte telefonike me madrilenët dhe ndryshe nga disa muaj më parë, kur nuk mundi të thoshte PO, kësaj herë duket se ish – traineri i chelsea ka dhënë pëlqimin e tij për tu ulur në pankinën e një prej klubeve më prestigjozë të futbollit. Priten më interes ndeshjet e ardhëshme të Realit që do të përcaktojë të ardhmen e Lopetegui. Nëse në transfertë ndaj Victoria Plzen, por mbi të gjitha në El Clasico me Barcelonën nuk do të merret suksesi i pretenduar, atëherë me shumë mundësi fati i trainerit është largimi./abcnews.al

BRAZIL-ARGJENTINE-NE-ARABI.mpg_snapshot_01.01-1280x673.jpg
G. P.23:40 | 17/10/2018

Brazili ia doli ta fitonte miqësoren ndaj Argjentinës luajtur në Arabinë Saudite. Gjithsesi, yjet e mëdhenj brazilianë nuk e patën aspak të lehtë ndaj një ekipi pa Lionel Mesin.

Nuk mund të presësh maksimumin kur një ndeshje luhet në Arabinë Saudite. Me gjithë kushtet e mrekullueshme të infrastrukturës në stadiumin “Qyteti Sportiv Mbreti Abdullah”, sërish loja la për të dëshiruar, edhe pse Brazili ishte i mbushur me yje. Argjentina jo edhe aq, me mungesa të mëdha, edhe pse dha maksimumin për të mos u turpëruar në Superklasiken botërore. Brazili, që pati në fushë lojtarë të mëdhenj, u desh të falej tek rrjeta e mbrojtësit Miranda në minutën e 90-të, pas goditjes nga këndi të Nejmarit.

Trajneri Tite hodhi një fushë një formacion me të vërtetë të madh, ku bënin pjesë Alison, Markinjos, Miranda, Kasemiro, Kutinjo, Gabriel Zhezus, Firmino apo Nejmar. Talente të mëdhenj edhe ata të stolit, ndonëse zëvendësime u bënë vetëm dy. Argjentina pati shumë më tepër mungesa. Mesi, Aguero, Higuain e Di Maria e refuzuan kombëtaren këtë herë, por gjithsesi talenti ishte me Dibalën dhe Ikardin në sulm.

Të mbiquajturit “Gauços” luftuan fort, madje ashpër dhe arbitri pati shumë punë, por përfundimisht, miqësoren në Xhedah, e vendosi Miranda. Kjo ishte fitorja e 39-të e brazilianëve ndaj rivalëve të tyre më të mëdhenj, ndonëse bilanci i tyre mbetet negativ, pasi kanë humbur plot 45 herë./abcnews.al

1479204038_933320_1479248298_noticia_normal.jpg
G. P.08:42 | 17/10/2018

Anglia habit gjithë botën me fitoren e arritur në fushën e Spanjës. Mediat dhe tifozët shpresojnë rikthim në lavdinë e dikurshme.

Kishte 31 vjet që asnjë lojtar i Anglisë nuk arrinte të shënonte në tokën spanjolle. I fundit kishte qenë Geri Lineker, me 4 rrjetat në mbrëmjen e tij të madhe në “Santiago Bernabeu”, kur Anglia fitoi 4-2 në 1987. Tashmë, Lineker është i treti lojtar nga fundi që shënoi ndaj Spanjës në Spanjë. Anglia e trajnerit Garet Sauthgejt u ngjit një hap më lart drejt madhështisë, kur pas barazimit në Kroaci, triumfoi 3-2 në Sevilje, në sfidën e tretë të Ligës së Kombeve. Rahim Stërling realizoi dy herë dhe Markush Rashford shënoi një rrjetë tjetër, ndërsa Sauthgejt ia doli me formacionin më të ri titullar të kombëtares angleze që nga viti 1959.

Nuk dihet nëse kjo fitore do të mjaftojë që Anglia të kualifikohet për në raundin e dytë, pasi barazimi në Rijekë ndaj Kroacisë mund ta dënojë, nëse Spanja ia del në vendin e vogël ballkanas.
Gjithsesi, në përballjen direkte, anglezët janë më mirë, por sidomos fituan një plus të madh psikologjik me suksesin e madh ndaj skuadrës që vlerësohet si favorite për Ligën e Kombeve. Trajneri Sauthgejt, heroi i momentit, mbetet në thjeshtësinë e tij. Mediat angleze, me të drejtë e quajtën këtë si fitorja më e madhe e “tre luanëve” që nga suksesi 5-1 në Mynih ndaj Gjermanisë.

“Dhë Tajms”: Kjo ishte po aq e bukur sa 5-1 ndaj Gjermanisë! Anglia mund të marrë frymëzim nga kjo ndeshje!
“Dhë Gardian”: Dygolëshi I Stërlingut frymëzon Anglinë në fitoren tronditëse ndaj Spanjës!
“Deili Meil”: Sensacionali Rahim Stërling udhëheq ekipin, ndërsa skuadra e re e Sauthgejtit arrin një fitore madhështore!
Lojtarët anglezë iu kthyen parullës “futbolli po kthehet në shtëpi”, siç shkruan “Deili Meil”: Liga e Kombeve po kthehet në shtëpi, Kajl Uolker udhëheq festimet pas fitores së madhe!
Ndërkaq, kjo mjaftoi që mediat spanjolle të kritikonin.
“AS”: Ishte penallti! Spanja dhuroi një pjesë loje, ndërsa reagimi I saj mbeti pa shpërblim!
“El Mundo Deportivo”: Katastrofë! Të kuqtë pësojnë 3 gola në 38 minuta nga një Angli e udhëhequr nga një Kejn I madh!
“Sport”: Magji e thyer! Përfundon seria e të kuqve të Luis Enrikes, që nuk ishin në nivelin e ndeshjeve të kaluara!
“Marka”: Kthim në realitet për Spanjën e Luis Enrikes! Sërish dyshime, si pas dështimit në Botëror!
Në një grup të vështirë, me Spanjën e Kroacinë, Anglia e Sauthgejtit po tregon se po bëhet skuadër e madhe./abcnews.al

ITALIA-BIND-NE-LIGEN-E-KOMBEVE.mpg_snapshot_00.41-1280x608.jpg
G. P.17:56 | 15/10/2018

Futbollit italian duket se po i kthehet një nga kombëtaret më të shquara. Italia fitoi në Poloni, për Ligën e Kombeve, por sidomos bindi me paraqitjen në fushë.

Edhe tifozët më besnikë e kishin humbur shpresën, por trajneri i tyre kishte të drejtë. Durimi është fjala e duhur për këtë Itali, e cila më në fund po nis kthesën nën drejtimin e Roberto Mançinit. Kjo thuajse nuk ndodhi as në Poloni, me ndeshjen e Ligës së Kombeve që po përfundonte pa gola, dhe me italianët pranë rënies nga kategoria. Sidoqoftë, goli i shënuar nga Biragi, I bëri drejtësi sfidës së stadiumin “Slask” të Horzhovit, pasi i tillë ishte dominimi i miqve. Të kaltrit e kishin detyrim që të reagonin pas zhgënjimeve në sfidat e para ndaj Portugalisë dhe pikërisht Polonisë, dhe pas dështimit të hidhur për të shkuar në finalet e Botërorit.

Mançini ishte i kënaqur, por sërish i kujdesshëm. “Ne dominuam, – tha trajneri në përfundim, – duhej të kishim shënuar më përpara dhe do të kishte qenë e padrejtë që të kishte përfunduar 0-0. Të gjithë lojtarët dhanë maksimumin. E di se do të duhet kohë të jemi aty ku duhet, por gjithsesi fitorja ishte e shkëlqyer. Mund të përmirësohemi shumë më tepër, por ju lutem bëni durim”. Falë golit të minutës së fundit, dhe falë lojës së mirë, kombëtarja këtë herë i pati mediat me vete. “La Gazeta delo Sport”: Kjo është Italia! Më në fund kombëtarja fiton dhe bind, 1-0 në Poloni! “Il Korriere delo Sport”: Shumë e bukur! Italia dominon në Ligën e Kombeve, godet dy herë shtyllën dhe feston në Poloni! “Tutosport”: Zemër e kaltër, Biragi! Lojtari vjollcë kthen Italinë tek suksesi në minutën e 92-të, shmang rënien nga kategoria në Ligën e Kombeve”.

Ekipi i Mançinit bëri për vete edhe tifozët, të cilët u shprehën të lumtur dhe me besim që kombëtarja do të dijë të jetë sërish e fortë, si dikur kur fitonte titujt botërorë. Të kaltrit vërtet zhmangën rënien në nivelin B të Ligës së Kombeve, por sërish pritet ta kenë të vështirë kualifikimin. Ata nuk e kanë fatin në duart e tyre, pasi mund të kenë sukses vetëm nëse gabon Portugalia./abcnews.al

PANUCI-FLET-PER-IZRAELIN.mpg_snapshot_00.27-1280x720.jpg
G. P.17:41 | 15/10/2018

Trajneri i Shqipërisë, Kristian Panuçi, duket i dorëzuar pas disfatës së radhës. Italiani nuk beson te kualifikimi, edhe pse ka fjalë të mëdha për lojtarët e tij.

Duket paradoksale, por është më i lehtësuar me një humbje të tillë. Kristian Panuçi ndoshta nuk është aspak i lumtur, por pozicioni i tij si trajner i Shqipërisë duket më pak i rrezikuar për shkak të mënyrës sesi luajti skuadra. Gjithsesi, italiani i mësuar me suksese të mëdha si lojtar, nuk deshi të fliste për fatin e tij.

Kristian Panuçi, trajner i Shqipërisë: “Më vjen keq për djemtë, bëmë një ndeshje të jashtëzakonshme. Morëm një gol nga goditja e portierit, dhe kjo është e rëndë. Edhe më pas morëm një tip autogoli. Të kthehesh me një humbje të tillë, të bën të ndihesh keq”.

Kombëtarja ende nuk është e eleminuar matematikisht nga Liga e Kombeve, por renditja është bërë tepër e vështirë. Vetë trajneri sikur është dorëzuar.

“Është e vështirë të fitosh 3-0, dhe pastaj që Skocia të mundë Izraelin, e më pas do jemi me pikë të barabarta. Ne ndërkohë, jemi jashtë. Natyrisht, nuk jemi dorëzuar, por duke humbur kështu, bëhet shumë e vështirë. Përsa i përket lojtarëve, nuk më pëlqen që përmendni emra, ka qenë një skuadër e madhe”./abcnews.al

LOJTARET-FLASIN-PAS-NDESHJES.mpg_snapshot_00.50.jpg
G. P.14:13 | 15/10/2018

Futbollistët e kombëtares, me ndjenja të dyfishta pas humbjes në Izrael. Hysaj, Balaj dhe Lilaj shprehen krenarë për lojën, por pranojnë edhe gabimet.

Tradita e 30 viteve të fundit u ruajt. Kombëtarja shqiptare nuk zhgënjeu me lojë, por nuk ia doli të merrte rezultat në sfidën e Izraelit, dhe futbollistët e saj patën ndjenja të dyfishta në përfundim të 90-minutëshit të vlefshëm për Ligën e Kombeve. Një nga lojtarët më të mirë, Elseid Hysaj, e shpreh shumë mirë këtë dyzim.

Elseid Hysaj, futbollist i Shqipërisë: “Thjesht duhet të marrim gjerat më të mira që kemi bërë, sepse siçu pa patëm shumë rastë për të realizuar gola, por nuk u bë gol. Thjesht duhet që edhe të kujdesemi shumë për golin e parë se është një gola që s’duhet ta marrim ne futbollistat që jemi aty në fushë. Duhet të vendosim më mirë në tru që të stërvitemi më shumë dhe të mos pësojmë këto gola pa lidhje.”

Bekim Balaj pati disa mundësi dhe luftoi fort për sa ishte në fushë.

Bekim Balaj, futbollist i Shqipërisë: “Sigurisht mënyra se si morëm golin eparë normalisht që të dhemb, por që mendoj se gjatë gjithë ndeshjes treguam karakter, kontrolluarm lojën, e ruajtëm qetësinë dhe kërkuam që të shënojmë nai gol. Por sa më shumë që kalonin minutat dhe rastet dhe s’po gjenim golat normalisht që ndikon tek ekipi.”

Lilaj, në të kundërt, u bë i rëndësishëm duke hyrë në ndeshje nga stoli.

Sabien Lilaj, futbollist i Shqipërisë: “Ishim duke luajtur mirë të themi të drejtën, keshtu që ishte pak më e thjeshtë të hyja në ritmin e lojës sepse ekipi po luante mirë. Vazhduam të luajmë mirë edhe kur unë u futa, por na mungoi fati për të shënuar golin dhe më vjen keq për këtë.”/abcnews.al

PRAG-IZRAEL-SHQIPERI.mpg_snapshot_01.10-1280x720.jpg
ent ela15:41 | 14/10/2018

Kombëtarja luan sot në Izrael, një ndeshje tepër të rëndësishme për Ligën e Kombeve. Trajneri Panuçi e kapiteni Mavraj kanë besim, ndërsa skuadra është e plotë.

Kualifikimi nuk sigurohet sot, por sërish jemi në moment vendimtar.

Kombëtarja shqiptare luan në fushën e Izraelit, në 20:45, sfidën e tretë në Ligën e Kombeve, dhe një rezultat pozitiv do të ndihmonte shumë për arritjen e objektivit, kalimit për në gjysmëfinale.

Kuqezinjtë pritet të mos kenë probleme për formacionin kur të dalin në fushën e stadiumit në Haifa, ndërsa ekziston shpresa se mund të përfitohet nga lodhja e Izraelit që luajti të enjten ndaj Skocisë.

“Jam optimist jo sepse kundërshtari mund të jetë i lodhur, por sepse pashë skuadrën sesi punoi në stërvitje. Djemtë punuan me shumë profesionalizëm, ndoshta ka qenë java më e bukur që kur kam ardhur në Shqipëri. Nuk di nëse Izraeli është i lodhur. Luajti 3 ditë më parë, por varet gjithçka nga ne. E kam vendosur formacionin dhe skemën me të cilën do të luajmë, por do ta shihni në fushë se kush do të jetë njëmbëdhjetëshja”.

Trajneri ynë ka një mendim të lartë për kundërshtarin.

“Izraeli bëri një ndeshje të jashtëzakonshme ndaj Skocisë. Ishte një skuadër krejtësisht e ndryshme nga ajo që luajti ndaj nesh. I vënë presion Skocisë duke mos e lënë të dilte në sulm. Izraeli është një skuadër me cilësi të madhe, me lojtarë shumë të zotë. Për ne, do të jetë një ndeshje e vështirë”.

Nuk mund të mos bëhej krahasimi me fitoren 3-0 të arritur në Izrael nga skuadra e De Biazit.

“Çdo ndeshje ka historinë e saj. Do të doja të ishte e njëjta histori si një vit e gjysmë më parë. Shpresojmë të luajmë një ndeshje të madhe dhe të fitojmë edhe këtë herë”.

Mavraj ndihet mirë për të luajtur, ndërsa ka këtë gjykim.

Besoj se mund të fitojmë, nuk ka rëndësi skema në mbrojtje, por loja në grup

Lajmet nga kombëtarja janë që Eros Grezda është I rikuperuar dhe pritet të jetë në formacion.

Për fat të keq, Balliu nuk do të jetë për shkak dëmtimi, ndërsa pritej të zëvendësonte Veselin e dëmtuar.

Shqipëria ka 3 pikë në grup, po aq sa Izraeli dhe Skocia.

KOMBETARJA-FLASIN-BASHA-DHE-HYSAJ.mpg_snapshot_00.30-1280x720.jpg
ent ela20:40 | 11/10/2018

Kombëtarja shqiptare ka nisur menjëherë punën për ndeshjen e radhës në Izrael. Dy lojtarë që pushuan ndaj Jordanisë, Basha e Hysaj, nuk ishin aspak pesimistë.

Futbolli ka një shprehje vërtet të bukur.

Një ndeshje apo një periudhë e keqe thjesht duhet të harrohet, dhe këtë duket se do të bëjnë lojtarët e kombëtares së Shqipërisë e trajneri I tyre Kristian Panuçi.

Krejt sipas filozofizë së këngës së Bitëllsave, “Let it bi”, edhe ata dolën sërish në fushën e stërvitjes në “Tropikal” të Durrësit, me mendjen të përqëndruar tashmë tek Izraeli.

Edhe mendimet e futbollistëve, dhe deklaratat e tyre, kanë në epiqendër pikërisht sfidën e Ligës së Kombeve.

Migjen Basha, ai që pushoi ndaj Jordanisë, nuk e quan dështim sfidën e fundit.

“Nuk është vetëm fitorja që ta ngre moralin, por edhe vitin e fundit që humbën ndaj Luksemburgut dhe ikëm në Izrael fituam. Ajo që ngre moralin jemi ne lojtarët, ne duhet ta përballim ndeshjen sikur të jetë finale dhe besoj që  kjo ndeshje”.

Konferenca pas Jordanisë u duk sikur ishte e atyre të lënë pushim pikërisht për Izraelin, si dhe Elseid Hysaj.

“Kemi pas shumë ndeshje në Napoli, por bëri mirë se kemi disa lojtarë të rinj që duhet t’i shohim më herët. Do hyj në fushë dhe do jap maksimumin tim, duhet t’ia dalim, duhet ta fitojmë këtë ndeshje që të jemi të qetë për kualifikimin”. /abcnews.al

DERBI-DEKLARATAT.mpg_snapshot_01.25-1280x720.jpg
G. P.15:16 | 29/09/2018

Kënaqësi e madhe tek Partizani për fitoren e derbit. Trajneri Gega u shpreh i kënaqur nga ekipi, por presidenti Demi lëshoi shigjeta ndaj Federatës Shqiptare të Futbollit.

Nuk janë engjëj, por spektaklin prej tyre e ke të garantuar. Flasim për tifozët, sërish protagonistët kryesorë të derbit, edhe pse pritej që heronjtë të ishin lojtarët në fushën e lojës. Sidomos të shumtë dhe të zjarrtë përkrahësit e Tiranës, që e luanin sfidën në fushën e tyre, dhe që u nisën nga qendra e kryeqytetit, si për të treguar se janë ata autoktonët në këto vise. Marshimi drejt “Selman Stërmasit” ishte mbresëlënës, dhe po ashtu mbërritja. Për fat, policia ishte gati dhe kishte marrë masat, ndërsa dy tifozeritë mbërritën në tempullin e vetëm të futbollit në Tiranë.

Nuk pati përplasje mes grupimeve bardheblu dhe të kuq. Skuadrat po ashtu mbërritën në stadium, veçse me më shumë tension dhe më pak entuziazëm sesa mbështetësit e tyre. Ndoshta, më i qetë Partizani, i pathyer prej 4 vitesh, me më shumë trysni tiranasit e trajnerit të rrezikuar Ze Maria. Përfundimi i duelit të javës së 6-të të Superligës, fatkeqësisht apo fatmirësisht, ishte ai që u parashikua.
Fitoi Partizani, dhe dalja e tifozëve nga “Selman Stërmasi”, pati diferencë në humor, ndryshe nga hyrja që ishte për të gjithë fantastike.
Mes atyre më të lumturve, padyshim edhe presidenti i Partizanit, Gazmend Demi, që sidoqoftë, nuk la pa lëshuar një shigjetë ndaj Federatës Shqiptare të Futbollit.

Gazmend Demi, president i Partizanit: “Është fillimi. Nuk ka lidhje titulli, atë e kanë këta të mëdhenjtë Korça-Skënderbeu. Ju uroj respekte.”

Trajneri partizanas, Gega, u pyet për derbin dhe për mungesën çerekshekullore të titullit.

Skënder Gega, trajner i Partizanit: “Ndoshta nuk qe një spektakël me gola, megjithatë lotarët u përgjigjën. Fitorja ndaj Tiranës na rrith moralin dhe na jep qetësi për ndeshjen tjetër. Esoj se javët e fundit jemi në rritje. Jemi munduar ti mbajmë lojtarët me këmbë në tokë. 25 vjet nuk mund ti kompesojmë për një vit , për mua shumë e rëndësishmë është të jetë një bazë bërthamë për klubin, për të ardhmen, nëse jo këtë vit atëhere vitin tjetër.Duhet të kemi durim.”

E kundërt atmosfera tek Tirana. Presidenti Halili, konfirmoi atë që raportoi ABC News, pra që trajneri Ze Maria rrezikon postin.
Numri 1 i klubit deklaroi se ekipi është i kompletuar, duke ia lënë fajin teknikut, por duke theksuar se është ende herët për të folur për shkarkim. Po përgjigja e brazilianit cila ishte?

Ze Maria, trajner i Tiranës: “Një derbi është gjithmonë një derbi, një ndëshje e veçantë me shumë emocion. Nëse nuk je në gjendje ta përballosh këtë presion kjo të dëmton. Kështu ndodhi me skuancrën tonë sot. Me një rezultat pozitiv do të kishim pasur një stysë të fortë për të ecur përpara. Por për këtë që ndodhi nuk duhet ta dramatizojmë më shumë se sa duhet, ndryshe prish punë. Përsa i përket fatit tim, unë bëj punën time. Ndërsa këtë nuk e kam unë në dorë.”

Përfundoi pra një tjetër derbi, dhe kënaqësia ishte tërësisht e të kuqve, që nuk patën ndalesë në synimet e tyre drejt titullit./abcnews.al

PL-CHELSEA-VS-WESH-HAM-UNITED--1280x720.jpg
G. P.22:20 | 23/09/2018

Çelsi i Londrës mbeti prapa Liverpulit, në kreun e Premier Ligës angleze. Skuadra e trajnerit italian, Sarri, nuk mundi të fitonte në fushën e Uest Hemit.

Ndoshta, kanë të drejtë parashikuesit e basteve. Për ta, pretendentët kryesorë të Premier Ligës janë dy, dhe mes tyre nuk bën pjesë Çelsi.
Liverpuli e Mançester Siti bindin më shumë sesa skuadra e trajnerit Mauricio Sarri, dhe kjo fundjavë sikur dha një provë për këtë. Blutë e Londrës nuk mundën të thyenin mbrojtjen e ashpër të Uest Hemit, dhe u mjaftuan me një barazim pa gola në fushën e rivalëve. Në një ndeshje të fortë, Çelsi ishte skuadra që sulmoi vazhdimisht, por pa arritur të gjejë hapësira në zonën kundërshtare në “Stadiumin e Londrës”.

Jo vetëm kaq, por të mbiquajturit “çekiçët”, patën të paktën dy raste të mirë për shënim, të cilët u humbën nga sulmuesit Majkëll Antonio dhe Andrij Jarmolenko. Skuadra e Sarrit nuk përfitoi dot as nga fakti, se Uest Hemi ishte këtë herë pa sulmuesin kryesor, Marko Arnautoviç.
Tashmë, Çelsi mbeti prapa Liverpulit, duke pasur 16 pikë, po aq sa kampionia në fuqi, Mançester Siti. Besohet se trajnerit italian do t’i duhet të paktën një vit për të krijuar skuadrën që dëshiron, dhe ndoshta sezonin tjetër do të luftojë në kushte më të barabarta me kolegët e tij, Jurgen Klop e Pep Guardiola./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono