NBA

toronto-1.jpg
G. P.14:16 | 08/06/2019

Toronto është në prag të titullit kampion në basketbollin amerikan. Skuadra kanadeze triumfoi sërish në fushën e kampionës në fuqi, Golden Stejtit, dhe kryeson 3-1.

Në prag është diçka krejtësisht e re. Një skuadër jo amerikane është vetëm një hap larg fitores së titullit në atë që quhet liga amerikane e basketbollit, pra në NBA.

Toronto Raptors arriti një tjetër fitore të madhe, sërish në fushën e kampionëve të Golden Stejtit duke marrë epërsinë 3-1 me ndeshje, ndërsa trofeu mund të shkojë për herë të parë në Veri, në Kanada.

Dueli i radhës luhet pikërisht në Toronto, pra gjasat janë të gjitha që mrekullia të realizohet. Fitorja e miqve ishte bindëse 105-92, madje me përmbysje, gjë që flet shumë për karakterin dhe talentin e mëtuesve të rinj.

Koui Leonard po bën realitet atë që nuk mundi ta arrinte tek San Antonio e famshme e Greg Popoviçit, dhe ishte sërish një udhëheqës. Ai shënoi 36 pikë dhe kapi 12 topa në tabela, duke shtuar vetëm 2 pasime për kosh, por 4 vjedhje topi dhe një bllokim gjuajtjeje.

Për fat, ai u mbështet fort nga Paskal Siakam, Kajl Louri e Serg Ibaka, ndërsa kontribut të rëndësishëm dha qendra spanjolle Mark Gasol, si dhe Fred Vanvlit.

Ç’po ndodh me kampionët?

Golden Stejti e pati në parket kapitenin Klej Tompson, të kthyer nga dëmtimi, dhe ai luajti shumë mirë duke shënuar 28 pikë, me 6 gjuajtje tripikëshe. Stefën Kërri nuk ishte keq, dhe pati 27 pikë, por gaboi shumë në gjuajtje, ndërsa vetëm Drejmond Grin ishte në lartësinë e detyrës, nga pjesa tjetër e skuadrës.

Ai ishte pranë një tripëll dabëlli, me 10 pikë, 9 tabela e 12 asistë. Vendasit ishin deri në 12 epërsi në pjesën e parë, por fitorja u shpëtoi nga duart. Shpresa e vetme ndoshta është kthimi më në fund i Kevin Durantit, për ta ndihmuar ekipin në momentin më të vështirë.

Siç theksuan pas ndeshjes Kërri e Grin, Golden Stejti ka qenë në fitore 3-1 në të kaluarën dhe ka humbur titullin, pra këtë herë mund të ndodhë e kundërta. Veçse, ai që ua mori atë titull quhej Lebron Xhejms, pra kampionët duhet të imitojnë Lebronin që t’ia dalin. Ndeshja e pestë luhet në Toronto mëngjesin e së martës./ABC News Albania 24/7

toronto.jpg
nev ila14:52 | 06/06/2019

Toronto fitoi ndeshjen e tretë finale në basketbollin amerikan, madje në fushën e Golden Stejtit. Kampionët vuajtën mungesën e dy prej yjeve të tyre kryesorë.

Justifikimet nuk vlejnë, por mungesa kaq të rëndësishme padyshim që ndikuan.

Toronto arriti një fitore të madhe në fushën e Golden Stejtit, duke kaluar në avantazh 2-1 në finalet e play off-it të NBA-së.

Suksesi ishte bindës, me shifrat 123-109, dhe me kanadezët që kurrë nuk patën më pak se 7 pikë epërsi. Gjithsesi, pati dy arsye tepër të mëdha që kampionët e NBA-së nuk patën shpresë këtë herë.

Kevin Durant vazhdoi të mungonte, dhe ai është lojtari më i mirë i dy finaleve të fundit të NBA-së. Jashtë edhe kapiteni Klej Tompson, që bashkë me Stef Kërrin formojnë dyshen e madhe në mungesë të Durantit.

Kjo e la Kërrin me detyrën thuajse të pamundur që ta fitonte ndeshjen i vetëm. Numri 30 realizoi rekordin e tij për play off-in, plot 47 pikë, duke kapur edhe 8 topa në tabela, e duke shërbyer 7 pasime për kosh, plus dy vjedhje topi.

As kjo nuk mjaftoi, dhe as loja shumë e mirë e Drejmond Grinit, me 17 pikë e 7 topa në tabela, dhe ajo e Andre Iguodalës.

Toronto, ashtu siç pritej, u udhëhoq nga basketbollisti i saj më i mirë, Koui Leonard që shënoi 30 pikë, por që nuk ishte vetëm.

Të pesë lojtarët e formacionit realizuan shumë pikë, Louri 23, Grin 18, Siakam po 18 dhe Mark Gasol 17.

Ndeshja e katër luhet sërish në fushën e Golden Stejtit, mëngjesin e 8 qershorit, dhe Toronto ka shansin e madh që të fitojë sërish, nëse nuk kthehet të paktën njëri nga kampionët, Tompson ose Durant.

golden-state-1280x720.jpg
G. P.11:44 | 03/06/2019

Golden State barazoi rezultatin në finalen e madhe të basketbollit amerikan. Fitorja në fushën e Torontos ishte e vështirë, ndërsa u dëmtua edhe kapiteni Thompson.

Nuk dorëzohen kurrë, por edhe hallet nuk u mbarojnë asnjëherë. Kampionët e NBA-së, basketbollistët e Golden State, barazuan rezultatin në finalen e madhe ndaj Torontos, duke fituar ndeshjen e dytë në Kanada, por edhe duke pësuar dëmtimin e kapitenit Clay Thompson.

Nuk dihet ende sesa i rëndë është lëndimi i tij, por mungesa e një lojtari të tillë, padyshim ia rrezikon mbrojtjen e titullit. Thompson shënoi 25 pikë në 32 minuta lojë, në fitoren 109-104, ndërsa Stephen Curry shtoi 23 pikë të tjera.

Draymond Green ishte në nivelin që kërkohej me 17 pikë, 10 topa në tabela, 9 asistë, 2 vjedhje topi e 1 bllokim gjuajtjeje, por një rikthim i rëndësishëm ishte ai i qendrës Demarcus Couzins, që pati 11 pikë, 10 topa në tabela e 6 asistë në 27 minuta në parket.

Gjithsesi, Kevin Durant nuk luajti, nuk dihet nëse do të luajë në ndeshjen e tretë, ashtu siç është në dyshim edhe kapiteni Thompson. Toronto luftoi fort dhe ishte në epërsi deri në 12 pikë gjatë gjysmës së parë të ndeshjes.

Në periodën e tretë, siç edhe mendohej, Uorriorsët reaguan dhe patën një rezultat të pjesshëm 18-0, duke kaluar në avantazh, e duke mos u arritur më. Koui Leonard ishte më i miri në fushë, duke realizuar 34 pikë për Toronton, plus edhe 14 topa në tabela, por mori më pak ndihmë nga shokët se zakonisht.

Ndeshja e tretë luhet në fushën e Golden State-t, në Arenën e Oakland-it, mëngjesin e 6 qershorit./ABC News Albania 24/7

nba-3-1280x724.jpg
Sej rie19:30 | 26/05/2019

Toronto arriti më në fund në finalen e madhe të basketbollit amerikan. Skuadra kanadeze, e udhëhequr nga Leonard,  eliminoi Miluokin, dhe tani do të sfidojë kampionen Golden Stejt

Nëse nuk do të ndodhte, nuk do të kishte shpresë, dhe njerëzimi nuk do të ecte përpara.

Suksesi, edhe pse shkon me më të fortët shumicën e kohës, nuk i përket vetëm dikujt, por mund ta arrijnë edhe të tjerët.

Toronto Raptors u kualifikua për herë të parë në histori në finalet e NBA-së, pasi fitoi përsëri ndaj Miluokit.

Ishte thuajse një mrekulli, pasi kanadezët nuk e kishin avantazhin e fushës, dhe pësuan humbje në dy ndeshjet e para në Miluoki.

Menjëherë pas kësaj, ata reaguan fuqishëm dhe fituan katër herë po radhazi, duke i dhënë fund me sukses finaleve të Konferencës, e duke u shpallur po për herë të parë kampionë në Lindje.

Koui Leonard shkëlqeu si një yll i madh, duke udhëhequr ekipin me 27 pikë, 17 topa në tabela e 7 asistë.

Edhe pse pjesërisht i dëmtuar, ai ishte më i miri në fushë, ndërsa shtoi edhe 2 vjedhje topi, e dy bllokime gjuajtjesh.

Pika e tij më e dobët ishte tek gjuajtjet për 3 pikë, duke realizuar vetëm 1 nga 8 prova.

Gjithsesi, Leonard e fitoi duelin me Janis Antetokumbon, i cili duket se nuk e ka ende përvojën e duhur.

Greko-afrikani sërish nuk luajti keq, me 21 pikë, 11 topa në tabela, 4 asistë, 2 vjedhje topi e 3 bllokime gjuajtjesh.

Torontos iu desh sërish të bënte një reagim të madh, pasi u ndodh në -15 pikë, pra shumë pranë humbjes.

Në pjesën e tretë dhe të katërt, kanadezët kthyen fatin e ndeshjes, falë edhe lojtarëve të tjerë në skuadër si Siakam (me 18 pikë), Louri (me 17) apo Vanvlit (me 14 pikë).

Tashmë, Raptorsët do të luajnë finalen e madhe të NBA-së ndaj Golden Stejtit, me ndeshjen e parë në mëngjes herët të 31 majit në Toronto./ABC News Albania 24/7

NBA-BARAZON-TORONTO_ABC-M1-T1-Copy.mpg_snapshot_00.01-1280x720.jpg
ent ela13:13 | 22/05/2019

Shumë i fortë dueli në në Konferencën Lindore në basketbollin amerikan. Edhe pse i cilësuar favorit, Miluoki u detyrua të pranonte humbjen në Kanada.

Është në barazim 2-2 finalja e Lindjes në NBA, dhe Toronto dha një mesazh. Edhe pse Koui Leonard luajti praktikisht “me një këmbë”, për shkak dëmtimi, sërish skuadra kanadeze e fitoi ndeshjen tepër të rëndësishme të katërt ndaj Miluokit.

Jo vetëm e fitoi, por edhe bindshëm me rezultatin 120-102. Kundërshtari ishte dukur i pandalshëm me një Janis Antetokumbo qiellor, por ja që gjërat shkuan ndryshe.

Toronto vuri në lëvizje “mekanizma” të tjerë, në radhë të parë lojtarët e stolit, që nuk është se kishin shkëlqyer shumë deri tani. Ata iu përgjigjën apelit duke realizuar një ndeshje të madhe.

Leonard e bëri të vetën, shënoi 19 pikë e kapi 7 topa në tabela, vodhi 4 topa e bllokoi 2 gjuajtje, aspak keq për një lojtar që luajti me dëmtim.

Gjithsesi, vendimtarë ishin Ibaka (17 pikë, 13 tabela), Pauell (18 pikë) e Vanvlit (13 pikë).

Padyshim, edhe lojtarët e formacionit bazë, ku Kajl Louri realizoi 25 pikë, pati 5 topa në tabela e 6 asistë, ndërsa Mark Gasol shtoi 17 pikë, 5 tabela e 7 asistë.

Antetokumbo u mbulua sërish fort, edhe pse shënoi 25 pikë, kapi 10 topa në tabela e dha 5 asistë. Midëllton dha një paraqitje të madhe me 30 pikë, por pjesa tjetër e skuadrës ishte dobët, me Bruk Lopezin që ia doli të realizonte vetëm 8 pikë.

Edhe pse ende Miluoki quhet favorit, sërish Toronto realizoi diçka të madhe, duke treguar se suksesi në basketboll nuk varet nga një yll i vetëm, ashtu siç e tregoi edhe Golden Stejti në Perëndim.

Ndeshja e pestë finale do të luhet mëngjesin e 24 majit në fushën e Miluokit. /ABC News Albania 24/7

golden-state.jpg
G. P.11:39 | 21/05/2019

Golden State do të luftojë sërish për titullin në basketbollin amerikan. Kampionia në fuqi eleminoi Portlandin, edhe pse i mungoi sërish Kevin Duranti.

Pesë finale të mëdha radhazi. Vetëm Boston Celtics ka arritur më shumë, ndaj Golden Sate Warriors duhet të jetë shumë krenare. Kampionia në fuqi e NBA-së do të luajë sërish për titull, pasi fitoi Konferencën Perëndimore.

U fitua edhe ndeshja e katërt, luajtur sërish në Portland, dhe u arrit ajo që në zhargonin amerikan quhet “fshesa”, apo “fshirja”, pra fitorja 4-0.

Golden State fitoi sërish respektin maksimal të basketbollit amerikan, të publikut dhe të analistëve, pasi nuk deshi të dinte nga mungesa e atij që mund të quhet ylli kryesor, Kevin Durant, të dëmtuar.

Suksesi ishte si në kohët e vjetra, mbështetur tek treshja Stephen Curry-Clay Thompson-Draymond Green, si dhe nga loja thellësisht kolektive. Fitorja e ndeshjes së katërt ishte 119-117, falë një tripëll dabëlli nga Stef Curry, me 37 pikë, 13 topa në tabela e 11 pasime për kosh.

Kapiteni Thompson pati 17 pikë, 6 topa në tabela, asiste e 2 vjedhje topi.

“Ne kemi qenë edhe më përpara në një pozitë të tillë, – u shpreh Curry, – kemi pasur 3 lojtarë kryesorë të dëmtuar, por secili prej nesh luajti edhe më fort deri në fund. Ne fare mirë mund të kishim pritur për ndeshjen e pestë, por nuk deshëm të prisnim kaq gjatë, ndaj vendosëm ta provonim”.

Curry vlerësoi lart lidhjen me Drejmond Green-in, duke theksuar besimin e ndërsjelltë që ata kanë tek njëri-tjetri. Green ishte gjithashtu vendimtar, duke realizuar edhe ai një tripëll dabëll, me 18 pikë, 14 topa në tabela e 11 pasime për kosh.

Jo vetëm kaq, por ai pati 3 vjedhje topi dhe dy bllokime gjuajtjesh, ndërsa është transformuar në mungesë të Durantit. Gjatë sezonit, Grin dhe Durant patën përplasje, dhe kjo mund të jetë një nga arsyet që ky i fundit thuhet se dëshiron të largohet nga Golden State, ndoshta tek Nju Jorku. Tashmë, kampionët presin finalistin nga Lindja, që do të përcaktohet nga dueli Toronto-Miluoki./ABC News Albania 24/7

Nba-basket.jpg
nev ila13:25 | 18/05/2019

Miluoki fitoi edhe finalen e dytë të Konferencës Lindore në basketbollin amerikan. Suksesi ndaj Torontos ishte i thellë dhe i merituar

Njerëzit pëlqejnë konkurrencën, por ndodh që kjo të mos ndodhë. Duken të njëanshme finalet e plej ofit të Konferencës Lindore në NBA, pasi Miluoki ka marrë komandën ndaj Torontos.

Jo thjesht sepse fitoi ndeshjen e dytë, duke udhëhequr 2-0 ndaj rivalit më të fortë lindor, por sidomos sepse duket se ka një marsh më shumë.

Dominimi ishte i dukshëm në duelin e fundit në Arenën e Miluokit, me shifrat 125-103, dhe me diferencë gjatë gjithë kohës. Janis Antetokumbo për momentin është figura kryesore e plej ofit në NBA, pavarësisht ndarjes gjeografike.

Basketbollisti me origjinë afrikane dhe pasaportë greke po bëhet dalë nga dalë lideri i ri, simboli i ligës më të fortë të botës, një pasardhës i denjë i legjendave Majkëll Xhordan, Kobi Brajant apo Lebron Xhejms.

As edhe yjet e Golden Stejtit, Kërri e Durant, apo Leonardi i Torontos, nuk të ngjajnë sot aq të mëdhenj sa Antetokumbo. Ai shënoi 30 pikë, kapi 17 topa në tabela, shërbeu 5 pasime për kosh, vodhi 1 top dhe bllokoi 2 gjuajtje.

Një paraqitje thuajse e përsosur, së cilës i duhet shtuar edhe frymëzimi në fushë për shokët e skuadrës, loja e fortë në mbrojtje, dhe hapësirat që krijoi në sulm për ta. A mund të thuhet se diferenca ndaj Leonardit dhe yjeve të tjerë të Torontos, u bë thjesht nga lideri?

Për fat, Antetokumbo ka në krah lojtarë të fortë, me Eljasovën që shënoi 17 pikë, Mirotiçin me 15 pikë, si dhe me mbështetje të fortë nga Brogdon, Hill, Midëllton apo Bledsou.

Miluoki duket një ekip i kompletuar, që shihet si favorit ndaj Torontos, dhe që madje mund të konkurrojë denjësisht me Golden Stejtin, në një finale të mundshme për titullin në NBA./ABC News Albania 24/7

NBA-milouki.jpg
nev ila13:59 | 16/05/2019

Miluoki fitoi finalen e parë të Konferencës Lindore në play off-in e basketbollit amerikan. Triumfi ndaj Torontos ishte shumë i vështirë, dhe u arrit vetëm në fund.

Ishin favoritë dhe i respektuan parashikimet. Basketbollistët e Miluoki Baksit fituan finalen e parë të Konferencës Lindore në NBA, pas një beteje të fortë ndaj Toronto Raptorsit.

Në duelin mes dy ekipeve të veriut, skuadra amerikane u tregua më e fortë se ajo kanadeze, me shifrat 108-100. Janis Antetokumbo dhe Bruk Lopez ishin më të mirët për vendasit, që patën mbështetjen e gati 20 000 spektatorëve në Arenën e Miluokit.

Antetokumbo shënoi 24, kapi 14 topa në tabela, shërbeu 6 pasime për kosh, vodhi dy topa dhe bllokoi tri gjuajtje të kundërshtarëve.

Lopez po ashtu ishte shumë lart me 29 pikë, 11 topa në tabela e 4 bllokime gjuajtjesh. Gjithsesi, Toronto kishte ardhur në Arenën kundërshtare me synimin për të fituar, dhe ishte në avantazh për një kohë të gjatë.

Falë yllit kryesor, Koui Leonard, kanadezët ishin 11 pikë përpara në fund të periudhës së parë, dhe 6 pikë në pushim. Jo vetëm, kaq por diferenca ishte +7 për Toronton në fund të periudhës së tretë, ndaj Miluoki rrezikoi të humbiste.

Leonard shënoi 31 pikë, më i miri në fushë, kapi 9 topa në tabela, dha vetëm 2 pasime për kosh, por bëri tri vjedhje topi. Vendasit realizuan përmbysjen vetëm në 2 minutat e fundit, duke krijuar një epërsi prej 8 pikësh.

Kjo, jo vetëm nga dy yjet kryesorë, por edhe nga mbështetja e skuadrës. Nikola Mirotiç pati 13 pikë dhe 6 topa në tabela, Kris Midëllton 11 pikë e 11 topa në tabela, ndërsa shumë mirë luajtën Brogdon apo Bledsou.

Finalja e dytë e Lindjes luhet mëngjesin e 18 majit, sërish në Arenën e Miluokit./ABC News Albania 24/7

nba-2-1280x714.jpg
Sej rie12:50 | 15/05/2019

Golden Stejti fitoi finalen e parë të Konferencës Perëndimore në basketbollin amerikan, duke mundur thellë Portlendin. Stefën Kërri triumfoi në duelin ndaj vëllait të tij binjak.

Nuk ishte e lehtë për prindërit të vendosin se kë do të mbështesnin.

Dell dhe Sonia Kërri e zgjidhën duke hedhur short me një monedhë, përpara finales së parë të Konferencës Perëndimore në NBA, mes Golden Stejtit e Portlendit, ndërsa përballë do të ishin dy djemtë e tyre binjakë.

Stefën Kërri i Golden Stejtit dhe Seth Kërri i Portlendit ishin rasti i parë në histori, kur dy binjakë bëheshin kundërshtarë në finalet e Perëndimit.

Siç edhe pritej, fitoi Stefi, vëllai më i madh vetëm për 5 minuta, në udhëheqje të kampionëve të fuqi, Uorriors, me shifrat e thella 116-94.

Në mungesë të Kevin Durantit dhe të yllit tjetër, Demarkus Kouzins, Kërri u kthye në versionin e dikurshëm, kur fitonte tituj në NBA në krah të Klej Tompsonit dhe Drejmond Grinit.

Shënoi 36 pikë, duke qenë më I miri në fushë, si dhe shtoi 6 topa në tabela e 7 pasime për kosh.

Numri 30 shkëlqeu në specialitetin e tij, gjuajtjet për tri pikë, duke realizuar 9 të tilla.

Kapiteni Tompson pati 26 pikë nga ana e tij, ndërsa Drejmond Grin ishte i gjithanshëm me 12 pikë, 10 topa në tabela, 5 pasime për kosh, 2 vjedhje topi e 3 bllokime gjuajtjesh.

Damien Lilard ishte më i miri për Portlendin, por u mbulua fort dhe arriti të shënonte vetëm 19 pikë, pak për standardet e tij.

Të tjerët, si Mekkallëm, Hud apo Kanter, u paraqitën edhe më dobët.

Finalja e dytë e Perëndimit luhet po në fushën e Golden Stejtit, në Oklend, të premten herët në mëngjes, ndërsa për në finalen e madhe të NBA-së kualifikohet ajo skuadër që fiton e para katër ndeshje./ABC News Albania 24/7

nba-1-1280x760.jpg
Sej rie17:30 | 13/05/2019

Një kosh në sekondën e fundit i dha kualifikimin Torontos për në finalen e Konferencës Lindore në basketbollin amerikan. Leonard shënoi 41 pikë dhe vendosi fatin në favor të skuadrës vendase.

Asnjëra nga skuadrat nuk donte të eliminohej.

Nuk kishte rëndësi fusha, por vetëm fakti se luhej ndeshja e fundit dhe përcaktuese për kualifikim, në gjysmëfinalen e Konferencës Lindore në NBA.

Toronto Raptors ndaj Filafelfia Siksërs në Arenën kanadeze u kthye në një duel historik, ku dy rivalët shkuan pikë më pikë, në kërkim të fitores.

Gjithsesi, pati një ndryshim në duelin e shtatë, ndërsa rezultati ishte I barabartë 3-3.

Filadelfia luajti si ekip, ku pesë lojtarët e formacionit ishin thuajse të barabartë në parket, ndërsa vendasit u mbështetën thjesht dhe vetëm tek ylli kryesor, Koui Leonard.

Basketbollisti me numrin 2 në fanellë, bëri diferencën duke shënuar 41 pikë, e duke pasur edhe 8 topa në tabela, 3 asistë dhe 3 vjedhje topi.

Ish-lojtari i San Antonios nuk është se nuk gaboi, përkundrazi shpesh nuk ishte i saktë në gjuajtjet e tij, por e nderoi këmbëngulja për t’i shkuar sfidës deri në fund.

Shokët e tij bënë më pak, edhe pse Siakam, Ibaka apo Mark Gasol u përpoqën mjaft.

Në krahun tjetër, Filadelfia mbajti ndeshjen në baraspeshë me pesëshen kryesore, të përbërë nga Embijd, Batler, Harris, Redik dhe Sajmëns.

Embijd ishte më I miri prej tyre me 21 pikë, 11 topa në tabela e 4 asistë.

Ndeshja po I drejtohej shtesës, në rezultatin 90-90, kur Leonard e provoi për herë të fundit.

Arena shpërtheu me entuziazëm kur topi hyri në kosh, pikërisht ndërsa binte sirena, me Toronton të kualifikuar.

Ishte hera e parë që një kosh shënohej në sirenë, gjatë një gjysmëfinaleje të konferencave në historinë e NBA-së.

Tashmë, u përcaktuan finalet, dhe në Lindje do të luajë Miluoki ndaj Torontos, e në Perëndim, Golden Stejti kundër Portlendit, që eliminoi Denverin po në ndeshjen e shtatë, madje jashtë fushe./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono