NBA

NBA-KLIVLENDI-1280x720.jpg
ent ela15:45 | 20/05/2018

Klivlendi ia doli të ngushtonte shifrat në finalen e Lindjes në basketbollin amerikan. Lebron Xhejms këtë herë nuk ishte vetëm, pasi në fitoren ndaj Bostonit u ndihmua edhe nga shokët e skuadrës.

Reagimi ishte ai që pritej dhe fitorja e madhe.

Klivlend Kavaliers nuk mund të mos e tregonte anën e tij të fortë, të paktën në njërën nga ndeshjet finale të Konferencës Lindore, aq më shumë i vënë me shpatulla pas murit.

Lebron Xhejms ishte sërish i madh, edhe pse nuk pati nevojë të tregohej madhështor, dhe Boston Sëlltiksi u mund thellë, 86-116 në Arenën e Klivlendit.

Nënkampionët e NBA-së tani janë në humbje në këtë seri vetëm me shifrat 1-2 dhe ndeshja e katërt do të luhet duke u gdhirë e marta, sërish në fushën e tyre.

Lebron shënoi 27 pikë e dha 12 asistë, por po ashtu kapi 5 topa në tabela, bllokoi 2 gjuajtje, vodhi dy topa).

Ndryshimi këtë herë ishte se edhe shokët e tjerë të skuadrës më në fund iu përgjigjën ritmit të tij.

Kevin Lov pati 13 pikë e 14 topa në tabela, Tompson 10 pikë, Smith 11, Hill 13 dhe Kajl Korver 14 pikë, duke realizuar të 4 gjuajtjet për tri pikë.

A thua prania e gati 20 000 tifozëve të tyre ndikoi kaq shumë tek forma e tyre?

Xhejms nuk pati nevojë të shënonte 41 apo 42 pikë siç ka bërë në ndeshjet e kaluara në plej of, disa prej të cilave Kavaliersët i kanë humbur.

Nëse ky është versioni i saktë, atëherë skuadra e trajnerit Tajron Lu mbetet pretendente për titullin në NBA. /abcnews.al

golden-state.jpg
gra moz14:25 | 17/05/2018

Barazohet rezultati në finalen e Perëndimit në basketbollin amerikan. Hjuston mposht thellë kampionen Golden Stejt, pavarësisht paraqitjes së madhe të Kevin Durantit.

Shumëkush ishte bërë gati për t’i shkruar nekrologjinë.

Hjuston Rokits i provoi krejtësisht të gabuar duke reaguar pas humbjes së rëndë në finalen e parë të Konferencës Perëndimore në NBA, e duke arritur një fitore madhështore.

Stili i skuadrës më të mirë të sezonit të rregullt u vu masivisht në dyshim, por vetë basketbollistët e Hjustonit dhe trajneri i tyre, Majk D’Antoni, ishin plotësisht të bindur në vetvete.

Ata patën të drejtë siç e tregoi rezultati 127-105 ndaj kampiones në fuqi, Golden Stejt.

Kapiteni Xhejms Harden këtë herë e pati ndihmën e duhur nga shokët e ekipit, sidomos nga Erik Gordon.

Basketbollisti me numrin 10 shënoi po aq pikë sa Hardeni, plot 27, duke qenë vazhdimisht i saktë, sidomos për tri pikë.

Gjithsesi, vendasit nuk patën vetëm këtë dyshe, pasi Taker realizoi 22 pikë, Ariza 19 e Kris Pol shtoi 16 pikë.

Formacioni nga Teksasi jo vetëm përmirësoi shumë lojën në sulm, por ishte tepër lart edhe në mbrojtje, duke mos lejuar yjet miq që të shfaqnin klasin e tyre.

Golden Stejti bëri shumë pak këtë herë, dhe i vetmi që nuk u dorëzua deri në fund ishte Kevin Durant.

I ardhuri nga Oklahoma dha paraqitjen e dytë të madhe radhazi, duke shënuar 38 pikë e duke gabuar shumë pak në gjuajtjet e tij.

Sidoqoftë, avantazhin dhe morali kanë kaluar nga ana e Hjustonit, edhe pse epërsia e faktorit fushë mbetet sërish për Golden Stejtit.

Ndeshja e tretë, dhe më pas ajo e katërt, do të luhen në Arenën e kampionëve në Oklend, të cilët do të përpiqen të marrin një avantazh vendimtar për t’u kualifikuar për në finalen e madhe të NBA-së./abcnews.al

golden-state.jpg
gra moz13:55 | 15/05/2018

Golden State fitoi finalen e parë të Konferencës Lindore në basketbollin amerikan. Kampionët në fuqi ia dolën në fushën e Hjustonit, pavarësisht shkëlqimit të yllit të vendasve, James Harden.

Një duel i madh në Arenën e Hustonit.

Dy nga lojtarët më të mëdhenj të gjallë ishin përballë, James Harden e Kevin Durant, dhe dy skuadrat më të forta të NBA-së këtë sezon patën sfidën e parë finale të Konferencës Perëndimore.

Golden State Ëarriors, kampion në fuqi, bëri një deklaratë të vërtetë force, duke triumfuar në fushën e ekipit më të mirë të sezonit të rregullt, Hjuston Rokitsit, madje me diferencë, 119-106.

Edhe pse Hardenm ylli kryesor i vendasve, luajti një nga ndeshjet më të mira të karrierës, kjo nuk mjaftoi.

I mbiquajtri “Mjekra” shënoi 41 pikë, përveçse kapi 4 topa në tabela e shërbeu 7 asistë, veçse Durant ishte thuajse në të njëjtin nivel.

Numri 35 i Golden State realizoi 37 pikë, duke qenë i papërmbajtshëm, e duke ndihmuar ekipin në momentet më të vështira.

Shpesh herë, Hjustoni e izoloi nga shokët, në një mbrojtje të fortë, por thuajse gjithnjë ai arriti të shënonte pikë në çdo pozicion.

Kampionët në fuqi të NBA-së përballuan fillimin më të mirë të kundërshtarit dhe u mbajtën në barazpeshë deri në pushim, për t’u shkëputur në gjysmën e dytë të ndeshjes.

Durant pati ndihmë edhe nga yjet e tjerë të ekipit, me kapitenin Klej Tompson që shënoi 28 pikë, Stefën Kërrin që pati 18 pikë, 6 topa në tabela e 8 asistë, dhe me Drejmond Grinin që shënoi 5 pikë, kapi 9 topa në tabela, pasoi 9 topa për kosh, vodhi dy topa e bllokoi dy gjuajtje të kundërshtarëve.

Kjo sfidë ishte ajo më shumë e pritura në plej ofin e basketbollit amerikan, pasi dy ekipet ishin më lart se kushdo tjetër.

Pavarësisht se Hjustoni është forcuar shumë, duke pasur edhe organiatorin Kris Pol, që këtë herë shënoi 23 pikë e kapi 11 topa në tabela, sërish kjo ishte më pak sesa talenti i madh i kundërshtarit.

Golden State fitoi epërsinë e faktorit fushë duke qenë tani favorit për finalen e madhe të NBA, ndonëse ndeshja e dytë do të luhet sërish në Hjuston, duke u gdhirë e enjtja./abcnews.al

NBA-HJUSTON-XHEJMS-HARDEN-1280x720.jpg
ent ela14:35 | 24/04/2018

Xhejms Harden udhëhoqi Hjustonin në një fitore të madhe në basketbollin amerikan. Lojtari më i mirë i sezonit shmangu një tjetër të papritur në plej of

Sado që NBA ka ndryshuar shumë këto vite, diçka ka mbetur e njëjtë.

Ylli më i mirë i sezonit luan në nivelin e tij të zakonshëm në plej of dhe ndihmon skuadrën që të fitojë.

Këtë bëri edhe Xhejms Hardeni, udhëheqësi i Hjustonit, duke e nxjerrë nga vështirësitë skuadrën më të mirë të edicionit.

Pas gjysmës së parë të ndeshjes ndaj Minesotës, jo në maksimum, publiku nisi të shqetësohej, por në pjesën e tretë dhe të parafundit, gjithçka ndryshoi.

Harden shënoi 22 pikë në 12 minuta, më shumë sesa gjithë skuadra kundërshtare, ndërsa Hjustoni vendosi një rekord të plej ofit, me duke realizuar plot 50 pikë.

Vetëm një skuadër tjetër ka arritur të shënojë kaq shumë në 12 minuta në NBA, Los Anxhelos Lejkërsi më shumë se gjysmë shekulli më parë.

Që nga ky moment, nuk mund të kishte më konkurrim, dhe përfundimisht, ekipi numër i Konferencës së Perëndimit ia doli me shifrat 119-100.

Hjuston Rokits kryeson raundin e parë të plej ofit ndaj Minesotës me 3 fitore dhe vetëm 1 humbje, duke qenë një sukses larg kualifikimit.

Harden shënoi gjithsej 36 pikë, kapi 4 topa në tabela, shërbeu 3 asistë, vodhi 4 topa nga kundërshtari dhe bllokoi një gjuajtje.

Kris Pol u përgjigj me 25 pikë, 6 topa në tabela, 6 asistë e 5 vjedhje topi, ndërsa shumë mirë ishin Erik Gordon, Trevor Ariza e Klint Kapela. /abcnews.al

san-antonio.jpg
gra moz13:00 | 17/04/2018

Golden State mbylli me sukses edhe ndeshjen e dytë të plej ofit ndaj San Antonios në basketbollin amerikan. Kampionët në fuqi u udhëhoqën nga lojtari i tyre kryesor, Kevin Durant.

Ylli vendas e fitoi sërish duelin.

Kevin Durantit nuk iu drodh dora për të dytën ndeshje me radhë, dhe Golden State arriti në epërsinë 2-0 në raundin e parë të plej ofit ndaj San Antonios.

Përballë tij, Lamarkus Olldrixh bëri gjithçka dhe mund të thuhet se nuk ishte aspak më poshtë, por doli nga fusha i mundur.

Durant shënoi 32 pikë, kapi 6 topa në tabela e shërbeu 6 asistë, si dhe bllokoi një gjuajtje.

Olldrixh realizoi 34 pikë, kapi 12 topa në tabela dhe shërbeu 3 asistë.

Sfida e madhe e NBA-së, dikur një finale e Konferencës Perëndimore, përfundoi 116-101 për kampionët në fuqi, ndërsa të dyja skuadrat kishin nga një yll mangut.

Stephen Curry pritet të kthehet vetëm në raundin e dytë për kalifornianët, ndërsa San Antonio nuk ka shpresë për ta pasur Leonardin, i cili madje është në prag të largimit.

Përballja në “Orikëll Arena” të Oklendit ishte e fortë të paktën deri në pjesën e tretë, me San Antonion që ishte në avantazh në pushim të ndeshjes.

Sidoqoftë, Golden Stejti pati më shumë talent sesa ekipi i trajnerit Greg Popoviç, ndaj edhe bëri diferencën në fund.

Duranti u mbështet shumë nga kapiteni Klej Tompson që realizoi 31 pikë, ndërsa plot 9 lojtarë vendas arritën të shënonin kosha.

Kampionët në fuqi të basketbollit amerikan janë favoritë për të kaluar raundin, e pritet të arrijnë pa probleme në finalen e Konferencës Perëndimore, ku besohet se do të kalojnë provën më të vështirë, përballë Hjustonit./abcnews.al

james.jpg
gra moz16:13 | 22/03/2018

Lebron Xhejms dhe Duajt Hauard ishin heronjtë e mbrëmjes së fundit në basketbollin amerikan. Ata vendosën një rekord dhe treguan një nivel shumë të lartë.

Kur përfundoi beteja mes Klivlendit dhe Torontos, hodhi sytë tek tabela e statistikave.
Sipas zakonit, Lebron Xhejms shikoi në fillim për numrin e topave të humbur nga skuadra e tij, dhe pastaj për topat e humbur nga ai vetë.
Dalloi numrin 8 tek skuadra, dhe numrin 0 personal.

Pra, ai nuk kishte humbur asnjë top në një ndeshje të ashpër që përfundoi 132-129, dhe kjo gjë padyshim që kishte qenë vendimtare për një fitore tepër të vështirë, dhe tepër të rëndësishme.

Jo vetëm kaq, pasi Lebron shënoi 35 pikë dhe shërbeu 17 asistë në përballjen me kanadezët.
Asnjë lojtar nuk ia kishte dalë që nga viti 1977 (kur NBA nisi të llogariste topat e humbur) që të shënonte 35 pikë, të jepte 17 asiste dhe të mos humbiste asnjë top.

Besohet se këtë mund ta ketë bërë, në të kaluarën, vetëm Oskar Robertson, në një nga 5 ndeshjet në të cilat shënoi të paktën 35 pikë dhe kapi të paktën 17 asistë.

Edhe më shumë sesa rekordi personal, për Xhejmsin ishte me rëndësi fitorja, pasi u arrit ndaj një rivali direkt për finalen e Konferencës.
Toronto kryeson në Lindje dhe duket se nuk do ta humbasë vendin e parë, ndërsa Klivlend vështirë të ngjitet më lart se vendi i tretë, ndaj një sukses i tillë jep moral.

Të mos harrojmë se në janar, Toronto e mundi Klivlendin 133-99!
Përveç Lebronit, ishte edhe një yll tjetër që shkëlqeu fort.

Duajt Hauard jo vetëm ndihmoi ekipin e tij, Sharlotën, që të fitonte një përballje shumë të vështirë, por edhe bëri diçka që nuk ndodh shpesh në NBA.

Ai ishte lojtari më i mirë i takimit me 32 pikë dhe me 30 topa të kapur në tabela.
Kishte 8 vjet që kjo nuk ishte parë në basketbollin amerikan, që kur Kevin Lov shënoi 31 pikë dhe kapi 31 topa në tabela, ndërsa luante për Minesotën.

Që nga 1973-shi, pra prej 45 vjetësh, vetëm pesë lojtarë ia kanë dalë kësaj dhe këta janë Elvin Hajes, Suin Nejtër, Mozes Malouni, si dhe Kevin Lov e Duajt Hauard.

Me ndihmën e Hauardit, Sharlota tejkaloi deficitin prej 23 pikësh për të triumfuar 115-105 ndaj Bruklin Netsit./abcnews.al

westbruk-1280x660.jpg
gra moz16:33 | 14/03/2018

Rasëll Uestbruk vazhdon ta tregojë veten si një nga lojtarët më të mirë të basketbollit amerikan. Në fitoren e Oklahomës në fushën e Feniksit, ai realizoi një arritje të rëndësishme në karrierë

Ndër lojtarët që ende luajnë, është numri 1 në këtë statistikë.

Jo vetëm kaq, por Rasëll Uestbruk arriti shifrën simbolike 100 për tripëll dabëllat e realizuar në karrierë.
Ylli i Oklahomës e pati këtë shkëlqim të fundit në fitoren e arritur në fushën e Feniksit, pasi shënoi 32 pikë, kapi 10 topa në tabela dhe shërbeu 12 asistë.

Basketbollisti me numrin 0 është vetëm i katërti që arrin në 100 tripëll dabëlla, ndërsa më parë këtë e kanë bërë Oskar Robertson, Mexhik Xhonson e Xhejzën Kid.

Në moshën 29-vjeçare, ai i ka të gjitha mundësitë që të kalojë Kidin dhe Xhonsonin, ndërsa 181 tripëll dabëllat e Robertsonit janë diçka më e vështirë për t’u arritur.

Uestbruk u bë vjet i dyti lojtar në historinë NBA-së që përfundon një sezon me mesatare tripëll dabëlli, ndërsa theu rekordin e Robertsonit duke realizuar 42 të tillë në një edicion.

Kapitenit iu deshën 736 ndeshje për të mbërritur në 100, dhe vetëm Roberton e Xhonson ia kanë dalë më shpejt sesa ai.
Falë paraqitjes së shkëlqyer të yllit të saj kryesor, Oklahoma fitoi jashtë fushe me rezultatin 119-107, duke përmbysur dizavantazhin në pjesën e katërt.

Kjo edhe pse lojtari qendër Stiven Adams nuk luajti fare, ndërsa Pol Xhorxh u dëmtua dhe nuk ishte në fushë në 12 minutat e fundit.
Oklahoma mbetet në vendin e katërt në Konferencën Perëndimore, duke qenë në pozita të mira për plej ofin që fillon menjëherë pas sezonit të rregullt./abcnews.al

hjuston-1280x660.jpg
gra moz15:06 | 12/03/2018

Hjuston tregoi edhe një herë tjetër se përse është skuadra më e mirë e sezonit në basketbollin amerikan. Ekipi i udhëhequr nga kapiteni Xhejms Harden vendosi një rekord të ri.

Këtë modë e filloi Golden Stejti.

Kampionët në fuqi të NBA-së siguruan dy tituj dhe tri finale radhazi duke u mbështetur te koshat nga largësia, por tashmë stafetën e ka marrë në dorë një ekip tjetër.

Hjuston Rokits u bë skuadra që arrin më shpejt në kuotën 1000 kosha tripikësh në një sezon, në gjithë historinë e NBA-së. Kjo ndodhi në humbjen e pësuar në fushën e Torontos, veçse tendenca vazhdoi dhe e nxorri Hjustonin faqebardhë.

Formacionit të udhëhequr nga kapiteni Xhejms Harden iu deshën 65 ndeshje për të arritur shifrën 1 000, diçka që nuk e kishte bërë as Golden Stejti dhe asnjë ekip tjetër i madh i basketbollit amerikan.

Pasi vendosën këtë rekord, Harden dhe shokët e tij vazhduan festivalin e gjuajtjeve nga largësia në fitoren në fushën e Dallasit, duke realizuar edhe 17 tripikësha të tjerë.

Përveç Hardenit, dorë të saktë nga larg kanë edhe Erik Gordon, Kris Pol, Xherald Grin apo Pi Xhej Taker.

Tashmë, Hjustoni do të synojë të thyejë rekordin e një sezoni të rregullt në NBA, rekord që e vendosi vetë edicionin e kaluar me 1181 kosha të realizuar në 82 ndeshje.

Do të ketë në dispozicion edhe 16 ndeshje, dhe me mesataren që po tregon, nuk do ta ketë problem që të vendosë një rekord të ri.
Gjithsesi, synimi kryesor i skuadrës më të mirë të NBA-së këtë vit është fitorja e titullit kampion./abcnews.al

vlcsnap-error188-1-1280x720.jpg
gra moz22:42 | 28/02/2018

Lebron Xhejms u bë dy herë lajm kryesor brenda një dite. Ylli I basketbollit amerikan vendosi një rekord të ri, si dhe bëri akuza të rënda për korrupsion në kampionatin e kolegjeve.

Asnjë basketbollist më parë nuk e kishte arritur këtë.

Lebron Xhejms u bë i pari “absolut” në NBA që ka të paktën 30 000 pikë, 8 000 topa në tabela dhe 8 000 asiste në karrierë, shifra që ai do të vazhdojë t’i rrisë.

Nëse nuk do t’ia dalë të shpallet më i miri i të gjitha kohëve, e ka të sigurt se do të jetë më i kompletuari në histori.

Lebron e mbërriti rekordin e ri me tripëll dabëllin që realizoi në fitoren e vështirë të Klivlendit ndaj Bruklin Netsit, me shifrat 129-123.

Xhejms shënoi 31 pikë, kapi 12 topa në tabela dhe shërbeu 11 asistë, duke pasur 67 tripëll dabëlla në karrierë, i dyti ndër lojtarët që luajnë ende, pas Rasëll Uestbrukut.

Po ashtu, ai ka një mesatare tripëll dabëlli gjatë muajit shkurt me 27 pikë, 10.5 topa në tabela e 10.5 asistë.
Vetëm 3 basketbollistë të tjerë mund të mburren se ia kanë dalë gjatë gjithë historisë së NBA-së dhe këta janë Oskar Robertson Uilti Çembërlen dhe Rasëll Uestbruk.

Gjithsesi, synimi më i madh i Lebronit është që të udhëheqë Klivlendin drejt finales së madhe të NBA-së dhe mundësisht të fitojë titullin, që do të ishte i katërti në karrierën e tij.

Gjithsesi, edhe ky rekord i madh sikur u la në hije nga akuzat e rënda që superylli bëri për kampionatin e kolegjeve në Shtetet e Bashkuara.
Ditët e fundit kanë shpërthyer skandale në ligën universitare të basketbollit, pasi janë ofruar shpërblime të paligjshme për studentë të ndryshëm që të zgjedhin një skuadër të caktuar të NBA-së.
“Nuk e di nëse do të gjejnë ndonjë mënyrë për ta rregulluar këtë punë, – u shpreh Lebroni, – Kjo gjë po ndodh për kaq shumë vite me radhë. Unë nuk kam qenë ndonjëherë pjesë e saj, nuk i njoh rregullat e atij kampionati, por unë e di sesa shumë para fitojnë trajnerët e kolegjeve, sesa shumë fitojnë nga sportistët e rinj. Kampionati amerikan i kolegjeve është i korruptuar. Më vjen keq, se ky do të jetë lajm I madh, por është i korruptuar”.
Lebron kërkon nga NBA që të secila skuadër të krijojë akademinë e saj, siç ndodh me sportet në Europë, dhe të krijojë kampionatin e vet të të rinjve./abcnews.al

lebron-james-1280x720.jpg
gra moz15:39 | 19/02/2018

Lebron Xhejms ishte protagonisti kryesor i ndeshjes së yjeve në basketbollin amerikan. Jo vetëm doli fitues, por edhe u shpall lojtari më i mirë i saj.

Formati ishte i ndryshëm, por jo shfaqja.

Ndeshja e yjeve nderoi traditat më të mira të basketbollit amerikan, duke u mbyllur pas një spektakli me sulm e pa mbrojtje, dhe me një ndeshje që pati jashtëzakonisht shumë pikë.
Këtë herë nuk luajti Lindja ndaj Perëndimit, apo anasjelltas, por Skuadra Lebron Xhejms ndaj Skuadrës Stefën Kërri, një shpikje për të larguar mërzinë e traditës e për të krijuar diçka të re.

Secili nga dy kapitenët, që kishin marrë më shumë vota nga tifozët në Konferencat e tyre, zgjodhi lojtarët e preferuar, ndërsa më pas u vunë përballë.
Fitoi Lebron dhe skuadra e tij, ku ishin përzier yjet nga të katër anët e NBA-së, ndërsa rezultati ishte 148-145.

Xhejms jo vetëm fitoi ndeshjen, por bëri diçka më shumë, u shpall Lojtari më i mirë i saj dhe e meritoi plotësisht.
Ishte shënuesi më i mirë me 29 pikë në 31 minuta, kapi 10 topa në tabela dhe shërbeu 8 asist, përveçse vodhi një top nga kundërshtarët.

Bashkë me të shkëlqeu edhe Kevin Durant, rival i Lebronit në kampionat, duke shënuar 19 pikë.
Skuadra e kapitenit Xhejms pati edhe protagonistë të tjerë të mëdhenj si Rasëll Uestbruk, Kajri Irving apo Entoni Dejvis.

Ekipi i kapitenit Stefën Kërri pati heronj jo të zakonshëm.

Shënuesit më të mirë ishin DeRozan e Lilard me nga 21 pikë, ndërsa pas tyre Xhoel Embajd, Karl-Entëni Tauns, Janis Antetokumpo e Klej Tompson.
Yjet kryesorë, që priteshin me më shumë padurim, si Hardën apo Kërri, nuk dhanë atë që mendohej.

Skuadra e Kërrit kryesoi në pjesën më të madhe të ndeshjes, por gjithçka u përmbys në fund.
Gjithsesi, më shumë sesa rezultati, pati rëndësi që 20.000 spektatorët në “Stejpëlls Sentër” në Los Anxhelos, dhe dhjetëra milionë para televizorit, ndoqën një shfaqje të madhe basketbolli./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono