NBA

luka-doncic-0.jpg
Vladimir Prenga13:14 | 18/01/2020

Luka Doncic vendosi një rekord të ri të karrierës në basketbollin amerikan. Ylli nga Sllovenia realizoi plot 8 kosha për tri pikë në fitoren e Dallas Mavericsk ndaj Portland Trail Blazers

Mbërritja e legjendës Jason Kidd le të presë. Jo gjithnjë mund të realizohet një “triple double”, por Luka Doncic pati më shumë arsye për të qenë i lumtur sesa i dëshpëruar pas ndeshjes së Dallas Mavericks ndaj Portland Trail Blazers.

Në një sfidë kundër një rivali të fortë, fenomeni nga Sllovenia vendosi një tjetër rekord personal, atë të koshave trepikësh të shënuar në një ndeshje të vetme në NBA. Doncic u tregua i saktë në 8 prej gjuajtjeve nga largësia, madje pati një përqindje të shkëlqyer saktësie, pasi e provoi 12 herë dhe gaboi vetëm 4.

Arsyeja tjetër e kënaqësisë për 20-vjeçarin ishte se ndeshja u fitua me shifrat 120-112 dhe se renditja e Dallas Mavericks në Konferencën Perëndimore u bë edhe më e mirë. Doncic shënoi plot 35 pikë në 34 minuta, ndërsa kapi 8 topa në tabela e shërbeu 7 asiste, aspak gjë e vogël.

Në krah të tij ishte Tim Hardaway Jr, i cili realizoi 29 pikë. Slloveni mbetet një nga shënuesit më të mirë të sezonit në NBA, i distancuar vetëm nga James Harden, është i treti në renditjen e asistevei dhe është në vend të tretë të renditjes për çmimin e Lojtarit më të mirë të vitit.

Dallas Mavericks, ndërkaq, është në vend të 6-të në Perëndim me 27 fitore e 15 humbje, por pranë vendit të dytë që mbahet nga Denver Nuggets. /abcnews.al

luka-doncic.jpg
Vladimir Prenga10:58 | 16/01/2020

Luka Doncic vendosi rekordin e asisteve në një ndeshje në karrierën e tij në basketbollin amerikan. Ylli 20-vjeçar nga Sllovenia ndihmoi në fitoren e Dallas Mavericks, me plot 17 asiste.

U luajt jashtë fushe dhe në ekip nuk ishte Kristaps Porzingis. E qartë që Dallas Mavericks do ta kishte të vështirë në Arenën e Sacramento, por shpëtoi mirë për shkak të shkëlqimit të yllit të saj kryesor. Luka Doncic realizoi një tjetër “triple double”, të 12-in në karrierën e tij në NBA, duke u bërë një nga më të rinjtë që ia del.

Jo vetëm kaq, por ai vendosi edhe rekordin personal për numrin e asisteve në një ndeshje, me 17 të tillë, vetëm dy më pak sesa rekordi i LeBron James. Përveç asisteve, 20-vjeçari slloven pati 25 pikë e 15 topa në tabela, pra duke realizuar një “triple double” vërtetë të nivelit shumë të lartë.

Dallas Mavericks ia doli të fitonte me rezultatin 127-123 dhe ky ishte suksesi i tretë radhazi për skuadrën nga Teksasi, duke përmirësuar disi pozitën në renditjen e Konferencës Perëndimore, me një bilanc prej 26 fitoresh e 15 humbjesh.

Edhe pse mbetet në vend të 6-të, Dallasi ka shanse shumë të mira për fazën “play off”, madje mund të pretendojë të paktën deri në vendin e dytë në Konferencë. Për t’u kthyer te Doncic, slloveni ka mesatare të larta këtë sezon, me rreth 29 pikë për ndeshje, gati 10 topa në tabela për ndeshje dhe fiks 9 asiste për ndeshje. /abcnews.al

Kawhi-leonard.jpg
Vladimir Prenga11:17 | 15/01/2020

Kawhi Leonard vendosi një rekord të ri në karrierën e tij, ndërsa ndihmoi Los Angeles Clippers të fitonin ndaj Cleveland Cavaliers në basketbollin amerikan. Leonard shënoi plot 43 pikë.

Është që tani dy herë kampion, vetëm një herë më pak se LeBron James, por padyshim që kërkon më shumë. Kawhi Leonard, edhe pse jo i vlerësuar për të qenë më i miri yll i epokës, sërish nuk heq dorë dhe vendosi një rekord në ndeshjet e fundit në NBA.

Shënoi 43 pikë në vetëm 28 minuta, duke u bërë i pari lojtar në historinë e Los Angeles Clippers që arrin të realizojë më shumë se 40 pikë në më pak se 30 minuta. Jo vetëm kaq, pasi sipas statistikave në Shtetet e Bashkuara, Leonard u bë i treti lojtar për të gjitha kohët, që shënon të paktën 43 pikë në më pak se 29 minuta.

E gjitha kjo flet vetë për talentin dhe përgatitjen e basketbollistit nga Kalifornia. Clippers, falë tij e shpartalluan pa shumë problem Cleveland Cavaliers me rezultatin 128-103. Leonard nuk është se u lodh shumë me kontribut tjetër, duke kapur vetëm 3 topa në tabela e duke dhënë 4 asiste.

Gjithsesi kjo ishte normale, përderisa ai luajti pak. Shpesh Clippers e kanë kursyer yllin e tyre, për ta pasur në formë sa më të mirë për gjysmën e dytë të sezonit, sidomos për fazën “play off”, pasi synimi i vetëm i klubit është titulli në NBA.

Leonard u shpall fillimisht kampion me San Antonio Spurs, duke shkëlqyer në një ekip me yje si Tim Dankan apo Tony Parker. Po ashtu ai triumfoi vjet, kur në udhëheqje të Toronto Raptors shkaktoi të papriturën e madhe, duke mundur Golden State Warriors në finale.

Edhe pse, Clippers janë vetëm në vendin e katërt në Perëndim, me 6 humbje më shumë sesa Lakers-at e LeBron James, ata e dinë se me Leonardin mund të arrijnë gjithçka. /abcnews.al

Kanter.jpg
Igli Nikolli11:55 | 11/01/2020

Enes Kanter është një nga basketbollistët më të mirë të NBA. 27-vjeçari me origjinë turke por i lindur në Zyrih, është pjesë e Boston Celtics, teksa ka vendosur të ndërmarrë një nismë shumë të bukur.

Në bashkëpunim me një grup individësh me mendje qytetare, Kanter dëshiron të hapë një shkollë në zonën e metrosë së qytetit të Oklahomës, aty ku luajti gjatë viteve 2014-2017, që fokusohet në shërbimin ndaj studentëve minoritarë me të ardhura të ulëta dhe familjeve emigrante me aftësi të kufizuara në të folurën e gjuhës angleze.

Të martën do të dorëzohet kërkesa zyrtare dhe bordi i shkollave të qytetit të Oklahomës do ta shqyrtojnë kërkesën me votë. Shkolla do të projektohet kryesisht për studentët minoritarë dhe emigrantët nga klasa e katërt në atë të 12-të.

Programi do të bazohet në aftësitë e leximit, shkrimit, matematikës, shkencës, edukimit fizik dhe atij mental, teksa programet sportive dhe artistike do të jenë të shumta. Kanter nuk është i pari basketbollist që po provon të hapë një shkollë. Ylli Lebron James e hapi një të tillë në Ohio në vitin 2018. /abcnews.al

harden-Young.jpg
Vladimir Prenga16:15 | 09/01/2020

James Harden dhe Trae Young vendosën një rekord të ri në basketbollin amerikan. Ata u bënë të parët lojtarë që realizuan “triple-double” me 40 pikë, në një ndeshje të vetme.

Vetëm njëri doli fitues, por të dy hynë në histori. James Harden dhe Trae Young ishin basketbollistët e parë në të gjitha kohët që bënë diçka të tillë në NBA, që do të thotë secili arriti “triple double” me të paktën 40 pikë.

Kjo ndodhi në duelin Atlanta Hawks-Houston Rockets. Nga Harden pritej më shumë, për nivelet e tij të këtij sezoni, ndonëse edhe Young po bëhet gjithnjë e më i zoti. I mbiquajtur “E tashmja” e NBA-së, Harden shënoi 41 pikë, kapi 10 topa në tabela e shërbeu 10 asiste.

Si gjithnjë, ai pati shumë gabime në gjuajtje, por aftësia e “Mjekrës” është që të provojë me intensitet të lartë deri në fund. Young, nga ana tjetër, cilësohet e ardhmja, pasi është vetëm 21 vjeç. Ndonëse shtatshkurtër, vetëm 1.88 metra, është tepër i zoti edhe në kampionatin më të fortë të botës.

Basketbollisti i Atlanta Hawks shënoi 42 pikë, kapi 13 topa në tabela e shërbeu 10 asiste. Gjysma e parë e ndeshjes ishte thellësisht në favor të Houston, ndihmuar nga pikët e James Harden. Pas pushimit, niveli i lartë i Young dhe gabimet e Harden, i dhanë shpresë Atlanta Hawks, por miqtë fituan 122-115. /abcnews.al

 

Paul-George.jpg
Veronik Istrefaj09:20 | 07/01/2020

Paul George është padiskutim një ndër basketbollistët më të mirë në NBA në dekadën e fundit. 29 vjeçari ka qenë shpeshherë pjesë e NBA All-Star, si dhe është një ndër yjet më të njohur të basketbollit amerikan.

Në takimin e fundit kundër Neë York Knicks, PG13 tregoi të gjitha aftësitë e tij, madje realizoi dhe një kosh thuajse të pamundur. Ylli i LA Clippers dribloi dy kundërshtarë dhe me fushën që i mbaroi, u detyrua të gjuajë pas koshit.

George shënoi një kosh të shkëlqyer, si dhe fitoi të drejtën e një gjuajtje të lirë, duke i dhënë tre pikë ekipit të tij. I shkëlqyer!/abcnews.al

 

luka-doncic-0.jpg
Vladimir Prenga12:11 | 05/01/2020

Luka Doncic vendor një tjetër rekord në basketbollin amerikan, në ndeshjen ndaj Charlotte Hornets. Ylli i Dallas Mavericks hyri në historinë e klubit të tij, edhe pse është vetëm 21 vjeç

Përpara tij, numri 1 në këtë renditje ishte Jason Kidd. Ish-ylli amerikan i Dallas Mavericks kishte arritur më shumë “triple double” se kushdo tjetër në historinë e klubit, por tani do të duhet të përgëzojë Luka Doncic.

Basketbollisti 21-vjeçar e rriti edhe më tej legjendën e tij në NBA, duke arritur të realizojë për të dhjetën herë “triple double” këtë sezoni, një më shumë sesa Kidd, e duke qenë më i miri I Dallasit për të gjitha kohërat.

Nuk ishte një “triple double” i zakonshëm, pasi Doncic shënoi plot 39 pikë, ndërsa u mbajt në fushë për më shumë se 43 minuta në ndeshjen që përfundoi pas kohës shtesë, pra që zgjati 53 minuta gjithsej.

Lumturia e ish-lojtarit të Realit të Madridit nuk ishte e plotë, pasi Dallas Mavericks u mund në fushën e vet nga Charlotte Hornest me rezultatin 120-123. Doncic pati edhe 12 topa në tabela e 10 asiste, si dhe dy vjedhje topash.

Slloveni është një nga shënuesit më të mirë të sezoni, me 911 pikë gjithsej, duke lënë pas yje të tillë si LeBron James, Russell Westbrook apo Kaëhi Leonard. Ai është i treti në renditjen e shënuesve në NBA,  pas James Harden dhe Giannis Antetokounmpo, si dhe i treti në renditjen e asisteve, i lënë prapa vetëm nga LeBron Xhejms dhe spanjolli Riki Rubio.

Dallas Mavericks, ndërkaq, është në vend të 6-të në Perëndim, me 22 fitore e 13 humbje, shumë më mirë sesa vjet, por ende jo një skuadër që mund të pretendojë seriozisht titullin në NBA. /abcnews.al

Lebron-1280x720.jpg
Veronik Istrefaj22:22 | 31/12/2019

LeBron James është një nga basketbollistët më të mirë i të gjithë kohërave në NBA, por asnjëherë nuk është vlerësuar më lart se Kobe Bryant dhe Michael Jordan.

Megjithatë, ish-shoku i tij i skuadrës te LA Lakers, Lonzo Ball, mendon se LeBron është pa asnjë diskutim basketbollisti më i mirë që ka shkelur ndonjëherë në parket. Tashmë lojtar i Pelicans, Ball tha për James:

“Personi që më ka mësuar më shumë gjatë vitit të kaluar është padiskutim LeBron. Vetëm duke qenë me të gjatë gjithë vitit: i njëjti ekip, i njëjti autobus, i njëjti hotel. Unë isha gjithmonë me të dhe thjesht mësoja ato gjëra që mundesha nga basketbollisti më i madh i të gjitha kohërave”, u shpreh Lonzo Ball./abcnews.al

 

lebron-1280x720.jpg
Vladimir Prenga16:31 | 30/12/2019

LeBron James u bë i 9-ti lojtar në historinë e basketbollit amerikan që kalon numrin e 9 000 asisteve në karrierë. Legjenda e Lakers ndihmoi skuadrën e tij në fitoren ndaj një rivali si Dallas Mavericks.

Nuk ishte ndeshja e tij më e mirë, por shërbeu dyfish. Së pari, LeBron James ndihmoi Lakers që të fitonin përballjen e vështirë ndaj një rivali si Dallas Mavericks, dhe së dyti ngjiti një tjetër shkallë drejt madhështisë.

Ylli 34-vjeçar u bë i 9-ti në historinë e NBA-së që ka të paktën 9 000 asiste në karrierë, saktësisht 9 009. LeBron shërbeu 13 asiste në suksesin 108-95, duel në të cilin shënoi pak, vetëm 13 pikë. Nuk dihet nëse ai do të ketë aq vite të mbetura për të synuar shifrën e 10 000 asisteve, gjë që do ta afronte me legjendën tjetër të Lakers, Magic Johnson, që është në vendin e pestë.

I vlerësuar si basketbollisti më i kompletuar në histori, LeBron është i vetmi lojtar në basketbollin amerikan që ka mbi 30 000 pikë, mbi 9 000 topa në tabela, dhe mbi 9 000 asiste. As gjigantë të tillë, si Michael Jordan, Jabari Parker, Bill Russell apo Kobe Bryant nuk kanë shifra të tilla.

James është në vendin e katërt të renditjes së shënuesve më të mirë të të gjitha kohëve në NBA, madje duke qenë vetëm rreth 300 pikë prapa Bryant. Shpejt, ai do ta kalojë legjendën e mëparshme të Lakers, për të qenë në podium e për të synuar edhe dy më të mirët, Karl Malone dhe liderin Kareem Abdul-Jabbar. /abcnews.al

luka-doncic-0.jpg
Vladimir Prenga14:16 | 29/12/2019

Luka Doncic bëri një tjetër paraqitje të shkëlqyer në basketbollin amerikan, duke barazuar një rekord të legjendës Michael Jordan. Ylli nga Sllovenia ndihmoi Dallas Mavericks të fitonte në fushën e Golden State Warriors.

Përballë nuk kishte kampionët e dikurshëm, por kjo nuk ia ul vlerën asaj që bëri. Luka Doncic, tani vonë i kthyer nga dëmtimi, ndërpreu serinë prej 4 fitoresh radhazi të Golden State Warriors, duke u barazuar me një legjendë të madhe.

Ai u bë më i riu lojtar në historinë e NBA-së që realizon të paktën 30 pikë e 15 asiste, në më shumë se një ndeshje të sezonit. Doncic është 20 vjeç e 304 ditë dhe në fushën e Golden State shënoi 31 pikë, kapi 12 topa në tabela e shërbeu 15 asiste.

E gjitha kjo në vetëm 30 minuta në parket, ndërsa bëri edhe dy vjedhje topash. Rekordin më parë e mbante “Madhëria e tij”, Michael Jordan. Për sllovenin kjo ishte ndeshja e dytë pas rikthimit nga dëmtimi. Gjithçka e nisi aty ku e la, duke mos pasur nevojë për shumë kohë për të fituar ritmin.

Dallas Mavericks fitoi jashtë fushe me shifrat bindëse 141-121, ndërsa Doncic regjistroi për të nëntën herë këtë sezon “triple double”.  Skuadra e tij ka 12 fitore e 3 humbje jashtë fushe, duke qenë e treta më e mirë e sezonit pas Los Angeles Lakers, që kanë bilancin 15-3, dhe Milwaukee Bucks 13-3.

Slloveni u ndihmua nga Tim Hardaway Jr. me 25 pikë dhe letonezi Kristaps Porzingis me 18 pikë, 7 topa në tabela dhe 4 bllokime gjuajtjesh./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono