nato

s-400.jpg
G. P.09:13 | 04/04/2019

Zv/Presidenti amerikan Mike Pence ka paralajmëruar Turqinë të mos avancojë me blerjen e planifikuar të sistemit të mbrojtjes raketore S-400 nga Rusia. Paralajmërimi erdhi pak orë pasi ministri turk i Punëve të Jashtme tha të mërkurën në SHBA se marrëveshja me Rusinë tashmë ishte e përfunduar.

Ne e kemi bërë të qartë se nuk do të qëndrojmë duarkryq teksa aleatët e NATO-s blejnë armatime nga kundërshtarët tanë, armatime që kërcënojnë kohezionin e kësaj aleance”, tha Pence të mërkurën, gjatë fjalimit në një samit të NATO-s në Uashington.

Pence tha se blerja e sistemit antiraketor rus nga Turqia për 2,5 miliardë dollarë, “përbën rrezik të madh për NATO dhe për forcën e kësaj aleance”. Ai paralajmëroi se Turqia do të përballet me pasojat nëse vazhdon me këtë plan.

Por vetëm pak orë më parë, ministri turk i Punëve të Jashtme, Mevlut Çavuşoglu tha se kjo ishte një marrëveshje e përfunduar. “Marrëveshja për S-400 është e përfunduar dhe ne nuk do të tërhiqemi nga kjo”, tha Çavuşoglu.

Turqia duhet të zgjedhë. Dëshiron të mbesë një partnere kritike e aleancës më të suksesshme ushtarake në historinë e botës, apo dëshiron të rrezikojë sigurinë e këtij partneriteti me vendime të pamatura që minojnë aleancën tonë?”, paraljmëroi Pence.

Zv/Presidentit amerikan iu përgjigj me të njëjtën monedhë homologu i tij turk, Fuat Oktay, i cili tha se SHBA-të duhet të vendosin nëse duan të qëndrojnë aleat i Turqisë, apo duan ta rrezikojnë këtë miqësi duke mbështetur grupet terroriste. /tvklan.al

nato-1-1.jpg
ent ela15:30 | 03/04/2019

Sekretari i përgjithshëm NATO-s Jens Stoltenberg është pritur në Shtëpinë e Bardhë nga presidenti amerikan Donald Trump. Ai do të flasë para kongresit amerikan me rastin e 70-vjetorit të aleancës

NATO feston 70-vjetorin në Uashington ku u firmos traktati nga 12 anëtarët themelues, dhe pas një 20-vjeçari luftërash kontroverse në Ballkan dhe Afganistan, aleanca mbetet ende në objektivin e armikut të vjetër dhe të përhershëm: Rusisë.

Sekretari i Përgjithshëm i NATO-s, Jens Stoltenberg u prit nga Presidenti Amerikan Donald Trump në Shtëpinë e Bardhë dhe mbrëmjen e së mërkurës do të flasë para Kongresit Amerikan.

Kjo është hera e parë për një Sekretar të Përgjithshëm të NATO-s, me një ftesë dy palëshe, një marrëdhënie që shpesh herë është vënë në dyshim nga kreu i shtëpisë së bardhë. Trump i cili sapo është çliruar nga çështja e Russiagate, bëri apel që Moska të mos kthehej në një kërcënim për sigurinë.

Ai shtoi se Shtetet e Bashkuara të Amerikës mund të shkojnë mirë me Rusinë, ndërsa më pas lavdëroi rritjen e shpenzimeve të shumë vendeve aleate për mbrojtjen, pas këmbënguljes së tij. Por në këtë rast përjashtohet Gjermania e cila nuk ka pranuar të rrisë buxhetin për NATO-n./abcnews.al

010.jpg
G. P.11:32 | 02/04/2019

Ushtarakët shqiptarë që shërbejnë në misionet ndërkombëtare iu bashkuan urimeve për 10-vjetorin e anëtarësimit të Shqipërisë në NATO. Nëpërmjet një video-komunikimi, ministrja e Mbrojtjes, Olta Xhaçka, u shprehu mirënjohjen për vlerësimet që Shqipëria merr si anëtare e NATO-s.

Janë ushtarakët shqiptarë që shërbejnë në misionet ndërkombëtare në “Resolute Support” në Herat dhe Kabul të Afganistanit, detin Egje, Letoni, KFOR Kosovë dhe Mali. Janë bërë bashkë virtualisht për të uruar 10-vjetorin e anëtarësimit të Shqipërisë në NATO.

Në video komunikimin me ushtarakët shqiptarë, ministrja e Mbrojtjes, Olta Xhaçka, i falenderoi që e kanë renditur vendin ndër aleatët më të besueshëm.

“Na keni bërë krenarë sot, edhe jam e bindur që do të na bëni krenarë çdo ditë që vazhdoni kontribuoni duke eksportuar siguri, jo vetëm për vendin tonë, por edhe në të gjitha misionet edhe operacionet e Aleancës apo të Bashkimit Evropian”.

I këshillon të kujdesen për njëri-tjetrin, ndërsa për familjet e tyre ofron mbështetjen që iu mungon.

“Kujdesuni për njëri – tjetrin dhe ardhshi shëndoshë e mirë pranë familjeve tuaja që u mungoni shumë. Çdo shqetësim, çdo merak, çdo problem që mund të keni, nevojë për familjet tuaja, ju lutemi ndajini me ne. Jemi një familje e madhe mund të bëjmë shumëçka për t’u kujdesur për ata për sa kohë nuk jeni këtu”.

Aktualisht në misionet jashtë vendit shërbejnë 210 ushtarakë shqiptarë, ndërkohë që, që prej vitit 2009, në misionet paqeruajtëse jashtë vendit kanë shërbyer rreth 5000 burra dhe gra në uniformë./abcnews.al

soreca-1280x743.jpg
G. P.15:30 | 01/04/2019

Ndërkaq, ambasadori i Bashkimit Evropian në Tiranë, Luigi Soreca ka kujtuar hyrjen e 10-vjetorit të Shqipërisë në NATO nëpërmjet një mesazhi në rrjetet sociale.

“Në këto dhjetë vjet, Shqipëria ka bërë përparim të dukshëm në shumë fusha. Ende ka shumë sfida, veçanërisht në fushën e sundimit të ligjit”, shkruan ambasadori Luigi Soreka.

Sipas tij, tani është koha që institucionet shtetërore, partitë politike, shoqëria civile, sektori privat, të gjithë njerëzit të punojnë së bashku për të nxitur më tej vendin, në prag të vendimit të ardhshëm të Qershorit./abcnews.al

BERISHA-PËR-10-VJETORIN-E-ANËTARËSIMIT-NË-NATO-PER-ABC.mpg_snapshot_01.07-1280x720.jpg
ent ela20:16 | 29/03/2019

10 vjet pas anëtarësimit të Shqipërisë në NATO, ish-Kryeministri Sali Berisha meritën ia njeh jo vetëm Partisë Demokratike e qeverisë së tij në përmbushjen e reformave, por edhe disa prej figurave kryesore nga radhët e socialistëve të kohës, që ai thotë se qenë promotorë të kësaj ëndrre në fushën e sigurisë.

“Është forca e parë politike në Europën ish komuniste që do kërkonte an anëtarësimin e vendit të saj në NATO. Falë një përpjekje të madhe të reformave të PD dhe koalicionit, PS në vitet ‘92 dhe ’96, votonte rezoluta anti- NATO. Por ka patur një pjesë, jo e gjithë opozita. Dua ti shpreh nderimin ti, sot Presidentit Meta dhe ish kryeministri Pandeli Majko, dhe ata promotor dhe ata në PS për anëtarësimin e  të Shqipërisë në NATO”.

Anëtarësimi në Aleancën e Atlantikut u shoqërua me një optimizëm se do të ndihmonte një tjetër proces, atë të rrugëtimit të Shqipërisë drejt BE-së. Por një dekadë më pas, ish-Kryeministri Berisha flet për regres në këtë drejtim.

“Shqipëria është vendi i rekordeve më të zeza, nuk plotëson asnjë nga standardet e kërkuara për hapjen e negociatave dhe vërteta është se ato këto vit janë më larg se çfarë ishin një vit më parë”.

Rreziku i ndikimit rus, kryesisht në vendet e Ballkanit Perëndimor është një ndër shqetësimet e Aleancës. Berisha nuk e mohon që edhe Shqipëria të jetë e ekspozuar ndaj këtij fenomeni, por për referencë merr një deklaratë të Ambasadorit rus në Tiranë.

“Kreu i ekzekutivit është i i biri i një njeriut emri i të që ka qarkulluar në dosjen Mitro Kin. Jo rastësisht e përmendi ambasadori rus Kristaq Raben, që kishte studiuar për vite të tëra në akademinë e arteve në Petërsburg. Trashëgimia e shërbime ruse është e tmerrshme mbi atë parti.

Por a rrezikon vendi të destabilizohet pas valës së protestave të opozitës, një dekadë pasi u anëtarësua në NATO?

“Destabilizimin më madhor e jep narkoshteti dhe kaktistokracia dhe jo protesta, ajo është për rivendosjen e vlerave dhe shqiptarët do të fitojnë. /abcnews.al

meta-rama-770x433.jpg
ent ela13:41 | 29/03/2019

Shqipëria prej 10 vitesh është anëtare me të drejta të plota në Aleancën e Atlantikut Verior. Ceremonia nisi me parakalimin e përfaqësuesve të vendeve anëtare.  Në fjalën e tij kryeministri Rama tha se anëtarësimi në NATO sjell siguri, ndërkohë që Shqipëria është zgjedhur për ngritjen e bazës ajrore të Kuçovës.

Avionë të tipit të fundit F16 fluturuan në qiellin e Tiranës gjatë ceremonisë së 10-vjetorin e pranimit të Shqipërisë në NATO. Një paradë ushtarake u zhvillua në sheshin “Nënë Tereza” ku morën pjesë krerët më të lartë të shtetit, si dhe ambasadorë të vendeve aleate.

Përfaqësues të 29 vendeve anëtare të NATO-s, parakaluan si edhe demonstruan armët më të fundit që disponon forca më e madhe ushtarake e botës. Në fjalën e tij, kreu i shtetit, Ilir Meta u shpreh Shqipëria do të vijojë që të kontribuojë në të gjitha misionet, ndërsa shtoi se bota po përballet me sfida të reja.

Ilir Meta: Shqipëria ka marrë përgjegjësitë që i takojnë, për reformimin dhe modernizimin e pandërprerë të Forcave të Armatosura, për plotësimin e angazhimeve buxhetore dhe pjesëmarrjen aktive në operacionet e përbashkëta, krah për krah vendeve aleate në misionet ndërkombëtare në Afganistan, Irak, Kosovë, Bosnje dhe Hercegovinë, Letoni, Mali, Deti Egje, dhe kudo ku i është kërkuar. Forcimi dhe fuqizimi i infrastrukturës së sigurisë tonë kombëtare mbetet një prioritet i padiskutueshëm.

Kryeministri Edi Rama loboi gjatë ceremonisë që anëtarësimi i Kosovës në NATO është një domosdoshmëri për të gjithë familjen Euroatlantike, ndërsa përmendi edhe rrezikun gjithnjë e në rritje të ndikimit rus në Ballkan.

Edi Rama: Duhet që Kosova të bëhet pjesë e integruar e Aleancës Antlantike. Shqipëria beson se integrimi i Kosovës në NATO është një domosdoshmëri, jo vetëm për Kosovën e Ballkanin, por për të gjithë familjen euro-atlantike. Është një vizion strategjik përfshirja e Kosovës në NATO dhe një vlerë e shtuar”, ishte apeli që shefi i qeverisë Shqiptare bëri për Kosovën. “NATO duhet të përballet edhe me doktrina agresiv, faktorësh të tretë; me ushtri në rritje dhe shpërfillje hapur të ligjeve ndërkombëtare.  Aneksimi i Krimesë, është vetëm  një nga dëshmitë aktuale të kësaj dukurie. Ndihemi mirë sot që integrimi i Malit të Zi dhe Maqedonisë së Veriut në NATO ka krijuar një hapësirë të gjerë në Ballkan për NATO-n dhe ka forcuar stabilitetin e Ballkanit, duke çuar drejt mbushjes së një vakumi të krijuar pas ndryshimeve tektonike që pësoi Gadishulli nga shpërbërja e Jugosllavisë.

Gjitashtu shefi i qeverisë pohoi se Shqipëria po përgatitet që ndërtojë në Kuçovë bazën ushtarake të NATO-s, më moderne dhe më të madhe në rajon.  Ministrja e Mbrojtjes, Olta Xhaçka, u shpreh anëtarësimi në NATO i hap rrugën Shqipëria do të vijojë edhe rrugëtimin drejt BE-së./abcnews.al

edi-rama-nato-1280x718.jpg
G. P.12:17 | 29/03/2019

Me rastin e 10-vjetorit të anëtarësimit të Shqipërisë në NATO, Ministria e Mbrojtjes organizoi një paradë ku parakaluan ushtarakët shqiptarë dhe mejtet luftarake. Gjatë fjalës së tij në këtë ceremoni, kryeministri Rama renditi disa nga sfidat që ka në të ardhmen Aleanca Euroatlantike.

“Ekstremizmi i dhunshëm, pavarësisht kapitullimit të Shtetit Islamik nuk është mposhtur. Doktrina fanatike e tij nuk mund të shfaroset vetëm me forcën e armëve , por mbi të gjitha me forcën e mendjes dhe shembullit që mishëron kjo aleancë e madhe. Nacionalizmi në rritje, kriza e refugjatëve sirianë, apo edhe emigrantëve në Mesdhe, si dhe lufta kibernetike që po merr përmasa gjithnjë e më kërcënuese janë rreziqe reale, të cilat kanë nevojë për një përgjigje të përbashkët, ku secili ka vendin dhe rolin e vet. E gjithashtu mos të harrojmë se NATO duhet të përballet edhe me doktrina agresive të faktorëve të tretë”, tha Rama.

Gjithashtu, Rama theksoi se integrimi i Kosovës në NATO do të ndihmojë që paqja në rajon të mos jetë ende e brishtë. Sipas tij, përfshirja e plotë e Ballkanit në NATO është vizion strategjik.

“Ne ndihemi mjaft mirë që integrimi i Malit të Zi më parë dhe Maqedonisë më pas në NATO ka krijuar një hapësirë të gjerë në Ballkan për NATO-n dhe ka forcuar stabilitetin e Ballkanit duke çuar drejt mbushjes së një vakumi të krijuar pas ndryshimeve tektonike që pësoi gadishulli nga shpërbërja e Jugosllavisë. Në mënyrë që paqja ende e brishtë në këtë rajon të mos sfidohet kurrë në të ardhme, dhe në mënyrë që Ballkani të mos jetë kurrë më, porta përmes së cilës influencat e vendeve të treta arrijnë të depërtojnë deri në zemër të Europës është e domosdoshme që edhe Kosova të bëhet më herët se vonë pjesë e integruar Aleancës Euroatlantike. Shqipëria beson shumë fort se integrimi i Kosovës, me ushtrinë e saj kombëtare në familjen euroatlantike është një domosdoshmëri, jo vetëm për Kosovën thjesht, as për Ballkanin, por për të gjithë familjen euroatlantike. Përfshirja e plotë e Ballkanit në NATO është padyshim një vizion strategjik dhe përfshirja e Kosovës në NATO do të ishte një kapital i shtuar përmes së cilës arkitektura e sigurisë evropiane dhe euroatlantike në kontinent të marrë  një trajtë të plotë dhe të sigurt”, tha kreu i qeverisë.

“10 vjetori i anëtarësimi është moment krenarie dhe reflektimi për ç’ka Shqipëria ka bërë në këto 10 vite dhe për çfarë duhet të bëjë më tutje. Jemi dhe do të mbetemi të përkushtuar për t’iu përgjigjet siç duhet, ku duhet dhe kur duhet çdo thirrjeje të Aleancës Euroatlantike”, tha më tej Kryeministri./abcnews.al

xhacka-1-1280x732.jpg
ent ela21:37 | 28/03/2019

Në vigjilje të festimeve për 10-vjetorin e anëtarësimit në Aleancën më të madhe ushtarake Ministria e Mbrojtjes ka zhvilluar ceremoninë e pritjes zyrtare të aleatëve dhe partnerëve nga 29 vende të NATO. Ministrja Olta Xhaçka në fjalimin e saj nënvizoi se sot Shqipëria është kthyer në një partner të besueshëm dhe aset strategjik në rajon./abcnews.al

Vucic-serv.jpg
G. P.11:47 | 25/03/2019

Në ceremoninë përkujtimore në 20 vjetorin e bombardimeve të NATO-s në Serbi, presidenti serb Aleksandër Vuçiç, në lot para të pranishmeve, u shpreh se kjo ngjarje nuk duhej harruar kurrë dhe ajo që ndodhi ishte një krim.

Kështu kishte qenë në të njëjtën orë 20 vjet më parë… kështu ka nisur edhe tubimi përkujtimor për dy dekada më vonë.

Fillimisht qirinj dhe lutje. Serbët duhet të falin, por të mos harrojnë. Patriarku serb Irinej, ka thënë se Zoti nuk i do ngjarjet e tilla. Krahas mesazheve për paqe ka thënë se duhet ruajtur objektet e shenjta në Kosovë.

Mirosllav Gavrillovic – Irinej, Patriark i Kishës Ortodokse Serbe: “Këto janë ditë që do të donim të mos i përsëriten kurrë popullit tonë dhe jo vetëm popullit tonë, por askund në botë”.

Performancë për rrezikun nga NATO dhe herë pas here kujtime për atë se si ka qenë gjatë 78 ditë fushatë. Për ta shënuar këtë ngjarje ka arritur edhe kabineti qeverisës nga Republika Serbe e Bosnjës. Porositë kanë qenë se, kurrë nuk duhet falur.

Millorad Dodik, anëtar i Presidencës së Bosnje e Hercegovinës: Në Kosovë shumë kanë qenë në anën e shqiptarëve, siç kanë qenë në vendet tjera kundër nesh. Bombat nuk e kanë zgjidhur problemin e Kosovës. Vitet e ardhshme janë tonat drejt bashkimit të serbëve.

Presidenti serb, Aleksandër Vuçiç, i cili ka marrë detyrë për zgjidhjen për Kosovën, tha se i drejtohet Serbisë së të ardhmes. Bombardimet për të gjithmonë do të ngelen krim.

Aleksandër Vuçiç: Gabim ka qenë ajo që kanë bërë të tjerët dhe jo vetëm gabim, por një krim dhe këtë duhet ta themi vazhdimisht pasi ka qenë krim kundër fëmijëve dhe popullit tonë. Kalimi nga politika në bomba është krim dhe Ballkani vazhdon të jetë një lëndë djegëse dhe askush nuk do të duhej të gaboj këtu. Ne duhet të fillojmë të përshëndetemi dhe jo të shikohemi përmes nishanit, të flasim me gjuhë dhe jo me plumba.

Vuçiç në fund shpërtheu në lot para publikut. E ardhmja nuk duket e lehtë pasi ende e vërteta e serbëve është larg asaj të shqiptarëve./abcnews.al

clinton-1280x720.jpg
G. P.10:11 | 25/03/2019

Me anë të publikimit të një fotografie qendra presidenciale Clinton ka përkujtuar 20-vjetorin e bombardimeve të NATO-s në Serbi. Në fotografinë e publikuar bashkë me shkrimin shihet ish-Presidenti Bill Clinton dhe ish-Sekretarja e Shtetit, Medeleine Albright.

Ndër të tjera, aty thuhet se presidenti amerikan në atë kohë Bill Clinton, udhëhoqi koalicionin e NATO-s, që ndaloi shtypjen ndaj njerëzve të pafajshëm dhe ndaloi konfliktin, duke kthyer stabilitetin dhe paqen e qëndrueshme në Evropën Jug-Lindore./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono