nato

thaci.jpg
ent ela11:12 | 25/04/2018

Presidenti Hashim Thaçi, gjatë Konferencës Rajonale “Dekada e Ardhshme e Kosovës: Bashkëpunimi rajonal dhe integrimi në BE”, nënvizoi se politika kosovare ka nevojë për reformë të thellë, por që sipas tij kjo ju takon partive politike që ta bëjnë. Kreu I shteti bën dhe një parashikim sa I përket 10-vjeçarit të dytë të pavarësisë së Kosovës.

Hashim Thaci, President i Kosovës:  “Dekada e dytë e shtetit do të sjellë anëtarësimin e Kosovës në NATO dhe OKB. Gjithashtu shpresoj që anëtarësimi në BE është i mundshëm nëse ne punojmë. Edhe shoqërinë civile e falënderoj shumë për mbështetje ndaj proceseve. Roli i mediave do të vazhdojë të mbetet kyç. Është fat që mediat i kemi më mirë se në Serbi, edhe se në rajon. Kjo është e vërtetë”.

Më tej, Thaçi nënvizoi se i mirëpret platformat e prezantuara nga kryeparlamentari Kadri Veseli për konsensus të përgjithshëm politik, si dhe të qeverisë për finalizimin e dialogut me Serbinë.

Hashim Thaci, President i Kosovës:  “Unë i mirëpres platformat që po prezantohen nga liderët politik. Në veçanti për arritjen e një konsensusi për fazën finale të dialogut Kosovë-Serbi. Marrëveshja obligative është në favor të të dyja vendeve. E lehtëson rrugëtimin drejt BE-së. E di se dialogu me Serbinë është shumë i vështirë dhe po ashtu përkushtimi për pajtim, por kjo është rruga e vetme për të ecur përpara”.

Ndër të tjera komentoi edhe ngjarjet e ndodhura në kuvendin e Kosovës. Thaçi u shpreh se përdorimi i gazit lotësjellës ka treguar një pamje jo reale të vendit në botë. /abcnews.al

rusiaa.jpg
gra moz22:41 | 23/04/2018

Rusia ka shprehur edhe njëherë shqetësimin nga zgjerimi i NATO-s me vendet e Ballkanit. Moska ka paralajmëruar se anëtarësimi i Maqedonisë është një eksperiment i rrezikshëm, që kërcënon sigurinë e rajonit dhe Europës.

Zgjerimi i NATO-s me vendet e Ballkanit përbën kërcënim për sigurinë dhe stabilitetin në rajon, ka paralajmëruar të hënën një deputete e vjetër ruse. Duke folur në Dhomën e Lartë të Parlamentit të Bosnjes, Valentina Matvijenko e ka vënë theksin tek anëtarësimi i Malit të Zi dhe prirjet e Maqedonisë për t’iu bashkuar aleancës ushtarake.

“Anëtarësimi i Malit të Zi në NATO, duke shpërfillur vullnetin e gjysmës së popullsisë, është shkelja më e rëndë që i bëhet parimeve bazë të demokracisë”, ka thënë Matvijenko, kryetare e Dhomës së Lartë të Dumës ruse.

Sipas saj, Maqedonia po përpiqet të realizojë të njëjtin eksperiment të rrezikshëm.

“Dhe ky hap do të çojë drejt destabilizimit të mëtejshëm të situatës në rajon dhe do të minojë sistemin e sigurisë në Europë”, ka vijuar Matvijenko.

Qeveritë perëndimore e shohin anëtarësimin e Ballkanit në BE dhe NATO si të vetmen rrugë për të garantuar paqe dhe siguri në rajonin e trazuar. Mali i Zi iu bashkua aleancës ushtarake vitin e kaluar dhe shpreson të anëtarësohet në BE në vitin 2025, në të njëjtën kohë me Serbinë.

Kroacia, një tjetër vend që dikur i përkiste Federatës Jugosllave, u anëtarësua në NATO në vitin 2009 dhe 4 vjet më pas në BE. Bosnja shpreson të arrijë anëtarësimin në një të ardhme të afërt, por përpjekjet e saj pengohen nga Republika Serbe, që sheh Rusinë si aleatin kryesor./abcnews.al

Kotzias-Parliament.jpg
gra moz15:24 | 18/04/2018

Ministri i Jashtëm i Greqisë bëri të ditur se Maqedonia nuk do të jetë pjesë e NATO-s në samitin e ardhshëm pasi dëshiron të mbajë një referendum për zgjidhjen e kontestit të emrit. Gjithashtu për këtë çështje përsëriti se duhen ndryshime kushtetuese.

Maqedonia në samtin e ardhshëm nuk do të jetë pjesë e NATO-s, sepse nuk ka shumë kohë. Kështu ka deklaruar ministri i Punëve të Jashtme të Greqisë, Nikos Kotzias, në një prononcim për mediat greke. Ai ka shtuar se edhe nëse arrihet një marrëveshje për kontestin e emrit, ajo duhet të ratifikohet në më shumë mënyra.

“Ata dëshirojnë të zhvillojnë referendum. Për referendum në vendin fqinj verior janë të nevojshëm dy muaj. Pasi të mbaroj referendumi, marrëveshja duhet të arrij në Kuvend, ndërsa për këtë nevojiten gjysmë muaji ose një muaj. Pasi të arrij në Kuvend do të duhet të bëhen ndryshime në Kushtetutë. Që të kemi marrëveshje duhet të pajtohemi për ndryshime në Kushtetutë”, thotë kryediplomati i Athinës, duke nënvizuar se këto procedura zgjasin deri në vjeshtë.

Sa i përket bisedimeve dhe pikave që negociohen, Ministri theksoi se identiteti është çështje që vendoset nga secili shtet, por për kombësinë duhet të përdoret emri i ri. Kotzias nënvizon gjithashtu se “në pasaporta do të shënohet shtetas i emrit të ri të për të cilin do të dakordësphen dy vendet”.

Ai përsëriti qëndrimin e Athinës zyrtare se emri përfundimtar i dakorduar me një përcaktues gjeografik të përbërë duhet të përdoret edhe brenda Maqedonisë.

“Pa rishikimin e Kushtetutës nuk mund të arrihet një marrëveshje”, theksoi Kotzias.

Sipas tij, nëse emri i ri nuk përdoret në vend, atëherë edhe në shekullin tjetër, të dy vendet do të kenë grindje dhe mosmarrëveshje./abcnews.al

mediat-serbe.jpg
gra moz15:22 | 09/04/2018

Sipas mediave serbe, gjatë arrestimit të Marko Gjuriç në veri të Mitrovicës, nga forcat speciale të Kosovës, NATO mbante nën vëzhgim ushtrinë serbe, për të shmangur një përshkallëzim të situatës.

Gjatë kohës, kur Marko Gjuriç, drejtori i ashtuquajturës Zyra për Kosovën, u arrestua në Kosovë më 26 Mars, ndërsa në Serbi diskutohej dhe mundësia e dërgimit të avionit luftarak në Kosovë, në Serbi është vënë re prania e disa avionëve pa pilot të ardhur nga Rumania. Kështu shkruan e përditshmja serbe Kurir.rs, e cila shton se qëllimi i tyre ishte monitorimi i lëvizjeve të ushtrisë serbe.

Sipas burimeve të kësaj gazete, avionë pa pilot të NATO-s, në ditën kur u arrestua Gjuriç në veri të Mitrovicës dhe katër ditë më vonë, janë sinjalizuar në mënyrë të përsëritur në territorin e Serbisë qendrore.

“Fluturimi ishte i ulët dhe sipas shërbimeve sekrete serbe, qëllimi ishte monitorimi i lëvizjes së Forcave të Armatosura Serbe”, shkruhet në këtë artikull.

“Kur Forcat Speciale të ROSU-së arrestuan Gjuriç në Mitrovicë, si dhe disa ditë më vonë, u zhvillua një dramë e vërtetë në qiellin e Serbisë. Kjo pasi mendonin se ushtria serbe do reagonte për këtë arrestim”, përfundon shkrimi./abcnews.al

sheshel-1280x854.jpg
gra moz14:45 | 07/04/2018

Vojisllav Sheshel, i njohur për deklaratat e tij të forta, kësaj here ka akuzuar NATO-n, bombardimet e së cilës sipas tij, dhe sot e kësaj dite kanë pasoja shkatërruese në shëndetin e pollsisë në Serbi dhe Kosovë.

Lideri i partisë radikale serbe, Vojoslav Sheshel, gjatë një interviste për televizionin serb HAPPY TV, foli për pasojat e bombardimeve të NATO-s, mbi shëndetin në popullsinë e Serbisë dhe të Kosovës. Ai mori si shembull rastin e prekjes nga kanceri të një ushtari italian që ka shërbyer në rradhët e KFOR në Kosovë.

Sheshel ka dhënë dhe raste të tjera të ushtarëve italianë, të cilët kanë shërbyer në Kosovë dhe që janë sëmurë nga kanceri duke shtuar se shumë prej tyre kanë vdekur dhe ata që janë gjallë apo dhe familjet e të ndjerëve, kanë hedhur në gjyq autoritetet për dëmshpërblim. Lideri radikal serb u shpreh se në Serbi në 20 vitet e fundit, janë shtuar rastet e kancerit në formën e një epidemie ku mjaft prej të prekurve, janë mosha të reja.

Për Sheshel, NATO nuk e bombardoi Serbinë vetëm me uraniumin të varfëruar, por edhe me lëndë të tjera kimike ende të panjohura. Si shembull Sheshel solli tharjen e drurëve në oborrin e tij në Batajnicë. Të njëjtin rast solli në vëmendje edhe drejtuesi i emisionit “Cirilica” po në Happy TV, Milomir Mariç.

Sheshel tha se në Kosovë kanë lindur shumë foshnja me dy kokë apo me një apo shumë gjymtyrë të deformuar. Ai u shpreh se qeveria e mëparshme ka shkaktuar katastrofë të rëndë ekologjike në Bariç dhe se kimikate nga më të rrezikshmet gjenden në një vend të sigurtë dhe ruhen në mënyrë të fshehtë nga shteti.

Duke iu referuar skenës politike, lideri radikal serb tha se Serbia ka përballë disa fuqi armike dhe këto janë SHBA dhe BE. Ai tha se kishte jetuar 12 vjet në Bashkimin Europian dhe nuk kishte parë asgjë të bukur përveç disa rojeve të burgut./abcnews.al

grushko.jpg
gra moz14:59 | 03/04/2018

“NATO ka kaluar vijën e kuqe me zgjerimin e saj ushtarak në afërsi të kufirit me Rusinë”.

Kjo është bërë e ditur nga zëvendësministri i Jashtëm rus, Aleksandër Grushko. Sipas zyrtarit të Moskës, Aleanca e Atlantikut të Veriut nuk ka asnjë motiv që justifikon një zgjerim të tillë.

“Për vite, siguria e Europës është bazuar në elemente moderimi. Nuk ka pasur kurrë një aspekt ushtarak në marrëdhëniet tona me fqinjët, që tani kanë marrë qëndrime radikale kundër Rusisë”, u shpreh ai./abcnews.al

stoltenbergq-1280x654.jpg
gra moz18:45 | 27/03/2018

NATO ka vendosur këtë të martë dëbimin e 7 diplomatëve rusë dhe reduktimin e misionit të Moskës pranë Aleancës. Sekretari Jens Stoltenberg ka deklaruar se ky është një mesazh i qartë për Rusinë, se veprimet e saj nuk do kalojnë pa u ndëshkuar.

NATO ka deklaruar se do të dëbojë 7 diplomatë rusë, si përgjigje ndaj sulmit me agjent nervor ndaj ish-agjentit Sergei Skripal në Britaninë e Madhe. Sekretari i Përgjithshëm i Aleancës së Atlantikut të Veriut, Jens Stoltenberg ka thënë në një konferencë shtypi se kjo lëvizje është një mesazh i qartë për Rusinë, se veprimet e saj kanë “kosto dhe pasoja”.

“Kjo është një përgjigje ndërkombëtare e gjerë dhe e koordinuar dhe në kuadër të saj NATO është i unifikuar për të marrë veprime të tjera”, ka deklaruar Stoltenberg.

Në vijim numri një i organizatës ndërkombëtare të sigurisë ka saktësuar se këtë të martë ka anuluar qëndrimin e 5 zyrtarëve rusë në NATO dhe se do të ndalojë akreditimin për tre të tjerë.

“Gjithashtu Këshilli i Aleancës do të reduktojë numrin e diplomatëve rusë në NATO me 10 njësi, duke e çuar atë në 20. Ky është një mesazh i qartë për Rusinë se ka kosto dhe pasoja për sjelljen e saj të rrezikshme e të papranueshme”, ka thënë Stoltenberg.

Të 25 vendet anëtare të NATO-s kanë dëbuar diplomatë rusë në ditët e fundit, përfshirë Shqipërinë që dëboi dy ditën e hënë, duke treguar solidaritet ndaj Mbretërisë së Bashkuar. Ish-oficeri i shërbimeve sekrete ruse Sergei Skripal dhe e bija, Julia, u helmuan më 4 mars në Salisburi, në jug të Anglisë, me një agjent nervor.

Autoritetet britanike akuzuan Rusinë, e cila nga ana e saj ka mohuar çdo përgjegjësi dhe më herët gjatë së martës akuzoi Shtetet e Bashkuara se po ushtrojnë presion ndaj Bashkimit Europian për të dëbuar diplomatët rusë./abcnews.al

ballkan-1280x680.jpg
gra moz16:31 | 24/03/2018

19 vjet më parë në 24 Mars, NATO nisi bombardimet ajrore në Serbi për të ndaluar spastrimit etnik ndaj shqiptarëve të Kosovës me urdhër të ish-Presidentit serb Milosheviç. Por ende sot, situata në Ballkan mbetet e tensionuar dhe mes tre udhëkryeqve: Bashkimit Europian, NATO-s dhe Rusisë.

Zhurma e sirenave, në 24 Mars të 1999-s tregonte se avionët e NATO-s nisën të bombardonin Beogradin për t’i dhënë fund spastrimit etnik të urdhëruar nga Presidenti serb Milosheviç kundër popullsisë shqiptare të Kosovës. Sulmet ajrore zgjatën 78 ditë, dhe provokuan viktima e dëme të shumta materiale.

Po dhe sot e kësaj dite pas 19 vitesh Serbia vazhdon të mos e njohë Kosovën shtet, pavarësisht se ajo shpalli pavarësinë në vitin 2008.

Ballkani Perëndimor, prej kohësh, gjendet në qendër të përplasjeve mes Shteteve të Bashkuara të Amerikës, Rusisë dhe Europës, ku secila palë akuzon tjetrën se po tërheq rajonin nga ana njërës në dëm të tjetrës.

Mali i Zi është pjesë integrale, por dhe shumë delikate e ksaj përplasjeje, ashtu si dëshmon dhe arrestimi i bujshëm ditën e zgjedhjeve të përgjithshme në Tetor të 2016-ës të një grupi serbësh dhe malazezës me akuzën e organizimit të një grushti shteti dhe ndoshta për të vrarë dhe Milo Gjukanoviç, çdo gjë për të ndaluar anëtarësimin e vendit në NATO. Aktualisht janë 14 personat, që po gjykohen përfshirë dhe dy shtetas rusë, që arritën të largoheshin nga vendi.

Që tensionet janë të larta e tregojnë dhe qëndrimet e liderëve të ndryshme. Në vizitën e tij të fundit në Slloveni, ministri i Jashtëm rus, Sergei Lavrov, theksoi se të qënurit vend anëtar në NATO apo BE, jo domosdoshmërisht nënkupton shmangien e marrëdhënieve me shtete që nuk janë të përfshira në këto organizat ndërkombëtare duke iu referuar qartë Rusisë. Më tej, ai shtoi se është absolutisht e dëmshme që t’i bëhet presion një vendi për të zgjedhur perëndimin apo lindjen.

Fatkeqësisht, vazhdoi ai, disa kolegë në perëndim përdorin këtë logjikë kur komunikojnë me Ballkanin Perëndimor.

Fjalë këto që mund të lidhen me ato të zëvendëspresidentit, Mike Pence, i cili një vit më parë ndaloi në Mal të Zi për një samit me liderët e vendeve të Ballkanit. Pence atje u shpreh se e ardhmja e Ballkanit Perëndimor është në perëndim dhe kurajoja e këtyre vendeve veçanërisht përballë presioneve ruse, frymëzon botën dhe meriton vlerësim./abcnews.al

boris-johnson-1280x660.jpg
gra moz15:46 | 16/03/2018

Ministri i jashtëm i Mbretërisë së Bashkuar ka akuzuar drejtëpërdrejtë presidentin e Rusisë, Vladimir Putin, se qëndron pas sulmit kundër ish spiunit rus. Ndërkohë, hetuesit njoftuan se agjenti kimik i është vendosur të bijës së Sergej Skripal në valixhen e saj gjatë udhëtimit nga Moska për në Britani.

Nuk ka ulje tensionesh mes Moskës dhe Londrës. “Presidenti i Rusisë, Vladimir Putin me shumë mundësi ka urdhëruar sulmin me agjent nervor kundër një ish spiuni dhe vajzës së tij”. Akuza e rëndë dhe e drejtpërdrejtë është bërë nga ministri i Jashtëm i Mbretërisë së Bashkuar, Boris Johnson. Zyrtari i qeverisë britanikë ka saktësuar se zemërimin e ka me Kremlinin dhe presidentin rus dhe jo me popullin rus. I menjëhershëm ishte dhe reagimi i Moskës: “Londra ka kryer një shkelje të pafalshme të ngrirjes diplomatike”, shkruhet në një deklaratë të Kremlinit.

Ndërkohë, gjurmë të agjentit nervor, që ka çuar në gjendje të rëndë ish spiunin rus dhe të bijën, janë gjetur pikërisht në valixhen Yulia Skripal. Hetuesit britanikë mendojnë se substanca kimike i është vendosur asaj në bagazhe përpara se të nisej nga Moska. Kjo është raportuar nga “The Telegraph” që citon burime të inteligjencës së Mbretërisë së Bashkuar. Tashmë po hetohet rreth mundësisë së intosikimit të një veshje të 33-vjeçares me substancë helmuese ose për një dhuratë, të cilën e ka marrë nga Moska, e që më pas e ka hapur në shtëpinë e babait të saj në qytetin Salisbury.

Më herët për këtë çështje ndërhyri dhe shefi i NATO-s që nënvizoi se “Rusia ka nënvlerësuar “përgjigjen dhe unitetin” e aleatëve të Mbretërisë së Bashkuar”. Sekretari i Përgjithshëm i Aleancës së Atlantikut të Veriut, Jens Stoltenberg tha se NATO po zhvillon fuqizimin e mbrojtjes kolektive më të madhe që nga përfundimi i Luftës së Ftohtë.

Mbështetja për Londrën erdhi pasi kryeministrja Theresa May urdhëroi dëbimin e 23 diplomatëve të Rusisë si dhe vendosi sanksione kundër disa zyrtarëve të Kremlinit dhe biznesmenëve që janë të afërt me Vladimir Putin. Nga ana tjetër reagimi i Moskës ishte i njëjtë. Rusia pretendon pafajsinë dhe pavarësisht kësaj, ministri i Jashtëm, Sergej Lavrov, njoftoi se shumë shpejt do të dëbohen zyrtarë Britanikë nga vendi./abcnews.al

scaparroti.jpg
gra moz21:55 | 08/03/2018

Shtetet e Bashkuara nuk po koordinojnë veprimet e tyre me Europën për t’i bërë kontrast agresionit kibernetik rus. Denoncimi është bërë nga një zyrtar i lartë i NATO-s, i cili ka raportuar me tone pesimiste në Senatin amerikan.

Komandanti suprem i NATO-s në Europë ka deklaruar të enjten se qeveria amerikane nuk po vepron në mënyrë efikase për t’i bërë ballë kërcënimit kibernetik rus.

“Jam i mendimit se nuk ka një ndërveprim të koordinuar për të arritur rezultate konkrete”, ka deklaruar gjenerali Curtis Scaparrotti.

Deklaratën e tij ushtaraku i lartë e ka bërë gjatë një raportimi në komisionin për Forcat e Armatosura të Senatit amerikan, ku është pyetur posaçërisht për përpjekjet e Uashingtonit në frenimin e agresionit kibernetik rus. Scaparrotti u ka thënë ligjvënësve se qëndrimi i Shteteve të Bashkuara ndaj këtij problemi është apatik.

“Në këndvështrimin tim perspektiva në situatën aktuale nuk është aspak pozitive. Personalisht nuk jam aspak i kënaqur”, ka thënë gjenerali.

Muaj më parë, agjencitë amerikane të inteligjencës dolën në përfundimin se Rusia ishte përpjekur përmes infrastrukturës së saj kibernetike të ndërhynte në zgjedhjet presidenciale për të nxitur fitoren e Trump. Nga ana e saj Moska zyrtare mohon çdo ndërhyrje, ndërsa Trump mohon bashkëpunimin e stafit të tij me rusët.

Ligjvënësit amerikanë, kryesisht demokratët, e kanë akuzuar disa herë administratën e presidentit se nuk po bën sa duhet për të luftuar krimin kibernetik./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono