Moska

kremlin.jpg
G. P.22:32 | 24/01/2019

Rusia ka dënuar ndërhyrjet e fuqive të huaja në punët e brendshme të Venezuelës, duke i cilësuar përpjekje për të uzurpuar pushtetin. Zëdhënësi i Kremlinit ka kritikuar mbështetjen që disa vende i kanë ofruar liderit të opozitës, duke deklaruar se një gjë e tillë çon në gjakderdhje.

Rusia ka dënuar ndërhyrjen e fuqive të huaja në Venezuelë, të cilat shprehën mbështetjen për liderin e opozitës. Përmes një deklarate për shtyp, Kremlini deklaroi se lëvizja është një përpjekje për të uzurpuar pushtetin, që shkel ligjin ndërkombëtar dhe çon vendin latin drejt gjakderdhjes.

Moska e sheh Venezuelën si një prej aleatëve më të ngushtë të saj në Amerikën Latine dhe përveç se i ka dhënë hua miliarda dollarë ka mbështetur edhe industrinë e saj të naftës dhe atë ushtarake. Gjithashtu, ajo ka marrë pjesë në stërvitje të përbashkëta ushtarake.

“Ne konsiderojmë se përpjekja për të uzurpuar sovranitetin e Venezuelës bie ndesh me ligjet dhe parimet ndërkombëtare”, deklaroi zëdhënësi i Kremlinit, Dmitri Peskov, duke shtuar se Maduro është lideri legjitim.

Në të njëjtën linjë, Ministria e Jashtme ruse deklaroi se vetëshpallja president e liderit të opozitës Huan Guaido’ e çon vendin drejt paligjshmërisë dhe gjakderdhjes.

“Vetëm venezuelianët kanë të drejtë të vendosin për të ardhmen e tyre. Ndërhyrja destruktive nga jashtë në këto momente tensioni është e papranueshme”, nënvizoi Ministria e Jashtme.

Moska zyrtare gjithashtu paralajmëroi se çdo nismë ushtarake nga Shtetet e Bashkuara do të ishte një aventurizëm që do të ndiqej nga pasoja katastrofike. Reagimi i Rusisë erdhi pasi presidenti amerikan Donald Trump njohu liderin venezuelian të opozitës, Huan Guaido’ si presidentin e ri të vendit. Ai ftoi vendet e tjera të bënin të njëjtën gjë, por thirrja e tij ka krijuar përçarje në komunitetin ndërkombëtar.

Kanadaja, Britania dhe 7 vende të Amerikës së Jugut i janë përgjigjur pro thirrjes, ndërsa BE ka ngurruar. Ndërkohë, Meksika, Bolivia dhe Kuba shprehën mbështetjen për Maduro. Presidenti turk Erdogan iu drejtua atij me një mesazh: “Vëllai im Maduro! Qëndro me kokën lartë, ne jemi pranë teje”. Edhe Kina, një investitor i rëndësishëm në Venezuelë, deklaroi se kundërshton çdo ndërhyrje të huaj./abcnews.al

MOSKE-ATHINE-MARREDHENIA-1280x632.jpg
ent ela19:26 | 15/01/2019

Tensionohen sërish marrëdhëniet mes Moskës dhe Athinës. Pas miratimit të ndryshimeve kushtetuese në parlamentin e Shkupit, Moska zyrtare i konsideron si të imponuara nga jashtë. Kjo ka sjellë reagimin e palës greke.

Moska ka bërë një tjetër ndërhyrje të ashpër pas zhvillimeve të fundit rreth marrëveshjes së Prespës. Një deklaratë e ministrisë së jashtme ruse, “godet” njëkohësisht Shkupin dhe Athinën. Deklarata nënvizon se ndryshimet kushtetuese të votuara në parlamentin maqedonas “janë imponuar nga jashtë dhe nuk shprehin  vullnetin e popullit”.

Po ashtu, edhe Athina kritikohet se ka injoruar opinionin e popullit grek që e kundërshton këtë marrëveshje. Deklarata i referohet edhe largimit të Panos Kammenos nga koalicioni qeveritar dhe procesit të votëbesimit për qeverinë Tsipras. Me tone gjithashtu të ashpra ka qenë përgjigjja e ministrisë së jashtme greke. Në reagimin e Athinës shprehet “shqetësimi i përligjur” që deklarata ruse nuk merr parasysh funksionimin demokratik të institucioneve në Greqi, i cili funksionim “nuk përbën terren të përshtatshëm për komente nga palë të treta”.

Gjithashtu Athina nënvizon se deklarata e ministrisë së jashtme ruse “nuk i shkon për shtat nivelit që karakterizon marrëdhëniet Greqi-Rusi dhe lidhjeve shekullore të miqësisë midis të dy popujve”.

Ky është tensionimi i dytë në raportet Athinë – Moskë, që nga vera e kaluar. Atëherë Greqia dëboi dy diplomatë rusë, të cilët u akuzuan se po përpiqeshin të korruptonin zyrtarë lokalë, klerikë ortodoksë dhe qytetarë, me qëllim që ata të zhvillonin protesta kundër marrëveshjes së Prespës. /abcnews.al

izrael.jpg
G. P.15:25 | 26/12/2018

Ministria ruse e Mbrojtjes pretendon se sulmi i Izraelit një ditë më parë në Siri ka vënë në rrezik dy fluturime civile në Damask dhe Bejrut. Në deklaratën për shtyp shtohet se mbrojtja ajrore siriane ka gjurmuar 14 nga 16 raketat izraelite.

Ky lajm  është konfirmuar dhe nga radio shtetërore izraelite. Por Izraeli nuk e komenton këtë si një sulm në Siri. Ndërsa zëdhënësi ushtarak theksoi se mbrojtja ajrore e Izraelit u aktivizua për të gjurmuar një raketë siriane./abcnews.al

jens-stoltenberg.jpg
ent ela18:13 | 05/12/2018

NATO është bashkuar me Shtetet e Bashkuara në akuzat e ngritura kundër Rusisë se ka shkelur traktatin e vitit 1987 për armët bërthamore. Aleanca ka akuzuar Kremlinin se ka prodhuar një sistem të ri raketash që përbën rrezik të menjëhershëm për vendet e saj anëtare.

Aleanca e Atlantikut të Veriut ka akuzuar zyrtarisht Rusinë se ka shkelur traktatin e vitit 1987 për armët bërthamore. Pas një takimi të mbajtur të martën, ministrat e Jashtëm të vendeve anëtare të NATO-s dolën me një deklaratë të përbashkët ku mbështesnin akuzat e Shteteve të Bashkuara ndaj Rusisë.

Uashingtoni ka kërcënuar Moskën se do të tërhiqet nga traktati i nënshkruar nga presidentët Regan dhe Gorbaçov për shkak të veprimeve të Kremlinit. Traktati ndalon vendosjen e raketave bërthamore me rreze të mesme veprimi të qëlluara nga toka në një distancë që varion nga 500 në 5.500 kilometra.

“Aleatët kanë arritur në përfundimin se Rusia ka zhvilluar sistemin raketor “9 M 729”, që përbën shkelje të traktatit dhe një rrezik të madh për sigurinë Euro-Atlantike”, thuhet në deklaratën zyrtare.

Duke shprehur mbështetje të fuqishme për konstatimet e Shteteve të Bashkuara, ministrat i bënë thirrje Moskës që të ndryshojë menjëherë kurs. Raketat e reja me rreze të mesme veprimi për të cilat Amerika dhe tani edhe NATO akuzojnë Rusinë, i mundësojnë kësaj të fundit të kryejë një sulm bërthamor ndaj çdo vendi anëtar të Aleancës në një kohë shumë të shkurtër. Rusia nuk ka bërë shumë komente lidhur me këtë çështje, përveç se ka mohuar devijimin nga detyrimet e saj./abcnews.al

kremlini.jpg
G. P.23:36 | 04/12/2018

Ndasitë Ballkanin Perëndimor, por edhe problemet e brendshme në Bashkimin Evropian, vlerësohet se janë ndër arsyet kryesore që po i ndihmojnë Moskës zyrtare të shtrijë dhe konsolidojë influencën në rajon. Në vazhdim ju sjellim një analizës të radios Evropa e Lirë për ndikim rus në rajon.

Sipas një analize të Radios Evropa e Lirë, që iu referohet dokumenteve të shërbimeve sekrete në Maqedoni, Mal të Të Zi, Kosovë e Bosnjë e Hercegovinë, si mbështetës dhe zbatues më të zellshëm të direktivave moskovite në rajon, veçohen dhjetra persona, shtetas të vendeve të Ballkanit Perendimor, por edhe emisarë direkt nga Rusia. Fjala është për spiunë të dikurshëm ose aktual, liderë të partive politike, diplomatë, konsuj nderi, drejtues të organizatave joqeveritare, filozofë. Qëllimi i tyre i përbashkët, si dhe i agjentëve rusë, thotë analiza, është minimi i demokracive perendimore dhe ndërprerja e marrëdhënieve të tyre me vendet aspirante për në NATO dhe Bashkimin Evropian. Për këtë qëllim, sikurse thotë shefi i shërbimit sekret britanik MI5, Endrju Parker, ata shërbehen me një doktrine të posaçme:

“Tani Rusia e praktikon mirë doktrinën e përzierjes në manipulimin mediatik dhe dezinformimet nëpër rrjetet sociale, së bashku me format e vjetra e të reja të spiunazhit, nivelit të lartë të sulmeve sajber, forcës ushtarake dhe sjelljes së dhunshme penale, kjo është ajo që këto ditë nënkuptohet me nocionin e luftës hibride”,- thotë kreu i shërbimit sekret britanik.

Radioja prestigjioze ndërkombëtare, duke u mbështetur në raportet e qendrave kërkimore, të gazetarëve investigativ, por edhe të shërbimeve sekrete të vendeve të rajonit, ofron edhe listën e personave që përçojnë drejtpërsëdrejti ndikimin rus në Ballkanin Perendimor.

Në krye të piramidës ballkanike të Putinit është Nikolaj Patrushev, një agjent ky karriere dhe koleg i dikurshëm i presidentit rus. Patrushev aktualisht drejton Këshillin e Sigurimit Kombëtar të Rusisë dhe llogaritet ndër bashkëpunëtorët më të afërt të Putinit, kur është fjala për influencën ruse në mesin e vendeve kandidate për në NATO dhe BE.

Për të besohet se ishte në qendër të rrëfimit për ‘tentim grushtshteti në Mal të Zi dhe të përpjekjes për atentat kundër presidentit Milo Gjukanoviq’. Sipas po këtyre burimeve, pa mbikqyrqen e tij nuk mund të kalojë as edhe veprimi më i vogël në Maqedoni, Mal të Zi, Bosnjë e Hercegovinë dhe në Kosovë.

Në listën e agjentëve ndodhet edhe Goran Zhivaleviq, një nëpunës i lartë i Agjencisë Informative serbe të Sigurimit dhe ish-oficer ndërlidhjeje në amabasadën e Serbisë në Shkup. Për të Drejtoria e Sigurisë dhe Kundërzbulimit e Maqedonisë ka thënë se “ka indikacione se merret me veprimtari agjenturore që bie ndesh me veprimtarinë diplomatike”. Në fakt, ky agjent serb u bë i njohur për shkak të pjesëmarrjes në mjediset e Kuvendit të Maqedonisë në momentin kur po zhvilloheshin ngjarjet e dhunshme, më 27 prill të vitit të kaluar, por atëherë e sot nuk u shpjegua se në çfarë cilësie u gjet atje.
Në analizën e Radios Evropa e Lirë, që iu refereohet dokumenteve të shërbimeve sekrete, përmendet Sergej Samsonenko, biznesmeni më i njohur rus në Maqedoni. Për të pohohet se përmes kishës dhe fesë, saktësisht ndërtimit të kishave ruse, ka tentuar të përhapë ndikimin e Moskës. Kabineti i Samsonenkos, ndërkaq ka përgënjeshtruar këto pretendime.

Në listë janë gjetur edhe emri i Janko Baçevit, një ish-agjent, sot kryetar i një partie të vogël pro- ruse që botërisht kundërshton aderimin e Maqedonisë në NATO dhe Bashkimin Evropian si dhe Stefan Vlahov Micov i cili u shpërfaq në një polemikë publike me Baçevin për shkak të shpërdorimit të parave ruse.

Krejtësisht në fund, radio Evropa e Lirë, duke iu referuar dokumenteve të shërbimeve sekrete në Maqedoni, Mal të Zi, Kosovë e Bosnjë e Hercegovinë, përmend rusin Andrej Radionov themeluesin dhe liderin e lëvizjes “Bashkimi ruso-sllav dhe rilindja” një forcë kjo që angazhohet për bashkimin e të gjithë sllavëve në një “aleancë të vetme të shteteve të pavarura sllave rreth popullit rus, Rusisë së madhe dhe traditave shpirtërore të Rusisë së vjetër”./Klan Macedonia& ReL/

MOSKA-ARTILERIA-ABCM3T1.mpg_snapshot_00.06-1280x639.jpg
G. P.09:23 | 29/11/2018

Përshkallëzohet tensioni mes Moskës dhe Kievit. Rusia do të vendosë brenda këtij viti një njësi të re anti raketore në Krime në gjendje për të rrëzuar avionë në një rreze prej 400 kilometrash.

Rusia do të vendosë në Krime një njësi të re sistemesh anti raketë, në gjendje për të rrëzuar avionë deri në një rreze prej 400 kilometrash, përveç objektivash të tjerë, si raketa balistike. Lajmi është konfirmuar nga ministria ruse e mbrojtjes. Në Krime janë vendosur dhe tre njësi të tjera anti raketë. Ndërsa njësia e fundit do të jetë aktive deri në fund të këtij viti.

Vendimi i fundit tensionon dhe më shumë krizën e Kersh si pasojë e sekuestrimit nga pala ruse të tre anijeve ukrainase të dielën e kaluar. Shërbimi i sigurisë federale ruse publikoi në mediat vendase dokumentet e sekuestruara në bordin e anijeve. Informacionet e mbledhura sipas Moskës, konfirmojnë se ukrainasit janë përpjekur të afrohen në mënyrë secrete për të hyrë në detin Azov.

Një ditë më parë Kremlini reagoi ndaj shpalljes së ligjit të luftës në Ukrainë, duke thënë se një vendim i tillë mund të shkaktojë një përshkallëzim të situatës. Zëdhënsi i presidentit rus Dimitri Peskov u shpreh se vendosja e ligjit ushtarak përbën një kërcënim për konflikt në zonën e konfliktit, pra në juglindje. Nga ana e tij presidenti i Ukrainës Petro Poroshenko deklaroi se ligji ushtarak u vendos në tetë rajone të Ukrainës, si dhe në zonën e brigjeve të Azov dhe Detit të Zi. Por ly ligj do të shtrihet dhe në rajonet e Zaporozhie dhe Donjetsk./abcnews.al

LAVROV-SPIUNET-1280x720.jpg
G. P.22:37 | 08/10/2018

Rusia ka hedhur poshtë pretendimet e Holandës ndaj katër shtetasve rusë, të cilët u arrestuan dhe u dëbuan nga vendi nën akuzën e spiunazhit. Ngjashëm me raste të tjera, Kremlini është justifikuar duke thënë rusët kishin udhëtuar në Hagë për një vizitë rutinë.

Ministri i Jashtëm rus, Sergei Lavrov ka deklaruar se dëbimi i katër agjentëve rusë javën e kaluar nga Holanda është një keqkuptim. Duke reaguar për herë të parë lidhur me ngjarjen, Lavrov ka nënvizuar se në aktivitetin e agjentëve nuk kishte asgjë të fshehtë. “Bëhej fjalë për një udhëtim rutinë.

Ata nuk u fshehën as kur mbërritën në aeroport, as kur hynë në hotel dhe as kur vizituan ambasadën tonë”, ka thënë Lavrov. Shefi i diplomacisë ruse ka bërë me dije se të hënën i ka dërguar një notë proteste ambasadorit holandez në Moskë, ku e cilëson burgimin dhe më pas dëbimin e shtetasve rusë një provokim. Javën e kaluar autoritetet holandeze deklaruan se në muajin prill kishin asgjësuar një rrjet spiunazhi rus, pasi kishin kapur katër agjentët në zotërim të pajisjeve të përgjimit në një hotel pranë selisë së Organizatës për Ndalimin e Armëve Kimike. Por reagimit të palës ruse zor se mund t’i zihet besë.

Në të njëjtën mënyrë Kremlini reagoi pas arrestimit të agjentes Maria Butina në Shtetet e Bashkuara, e cila synonte të depërtonte në politikën amerikane duke u bërë fillimisht aktiviste e shoqatës për lobimin e armëve. Gjithashtu, Rusia mohoi që dy agjentët rusë të identifikuar nga autoritetet angleze si përgjegjës për helmimin e Sergei Skripal të ishin funksionarë të aparateve shtetërore, duke thënë se ata kishin shkuar në Angli për arsye turistike. /abcnews.al

 

nato-933x445.jpg
ent ela08:29 | 06/10/2018

Vendet perëndimore po paralajmërojnë Rusinë që të ndalë sjelljen agresive, përfshi shkeljen e një traktati për kontrollin e armëve, sulmet kibernetike të përhapura dhe përpjekjet për të vrarë qytetarë në vende të tjera. Gjatë një takimi të Natos në Belgjikë Sekretari amerikan i Mbrojtjes James Mattis tha se Rusia po shkel Traktatin e Forcës Bërthamore me Rreze të Mesme Veprimi. Holanda bëri të ditur se kishte parandaluar një sulm kibernetik rus ndaj një organizate ndërkombëtare që po heton përdorimin e armëve kimike. Siç na njeh edhe maeriali në vazhdim, reagimi i kordinuar ndaj sjelljes së pamatur ruse është i pashembullt.

Uashingtoni beson se Rusia po ndërton një armë bërthamore në kundërshtim me një traktat të Luftës së Ftohtë, të njohur me inicialet INF. Ky program mund t’i mundësonte Moskës që të kryejë një goditje bërthamore në Evropë brenda një kohe të shkurtër. Shefi i ushtrisë amerikane tha në NATO se Uashingtoni do të reagojë nëse Moksa nuk respekton kufizimet e traktatit.

“Amerika po shqyrton variantet e qëndrimit diplomatik dhe mbrojtës në bashkëpunim me aleatët, si gjithmonë. Situata aktuale me Rusinë në shkelje të hapur të këtij traktati, është e papranueshme.”

Rusia ka mohuar çdo shkelje dhe thotë se Shtetet e Bashkuara kanë pozicionuar sistemet e tyre të mbrojtjes nga raketat në kundërshtim me paktin. Shefi i Natos, Jens Stoltenberg, tha se Rusia kohët e fundit ka pranuar ekzistencën e një sistemi raketor që përbën rrezik për aleancën. Ai theksoi edhe shkeljet e tjera ndërkombëtare nga Rusia, siç janë përdorimi i forcës kundër fqinjëve të saj, përpjekjet për të ndikuar proceset elektorale dhe propagandën keqinformuese.

“Njoftimi nga qeveritë e Holandës dhe Britanisë ka ekspozuar fushatën pa dallim të sulmeve kibernetike ruse në mbarë botën.”

Holanda bëri të ditur se zbulimi ushtarak rus, i njohur me inicialet GRU, u përpoq të kryente një sulm kibernetik ndaj Organizatës për Ndalimin e Armëve Kimike që ndodhet në Hagë. Më herët, Britania e mbështetur nga shërbimet e zbulimit të vendeve aleate, Australi dhe Zelandë e Re, akuzuan GRU-në për ndërmarrjen e një fushate mbarëbotërore sulmesh kibernetike me qëllime keqdashëse. Ata paralajmëruan Rusinë se sjellja e saj “e papërgjegjshme” nuk do të tolerohet.

“Fushat e rastësishme ku po ndodhin këto gjëra, si dopingu në sport dhe fusha të interesit ekonomik, nuk janë të vetmet. Si komunitet ndërkombëtar, ne duhet ta bëjmë këtë tepër të qartë. Qeveria jonë po bën pikërisht këtë”, u shpreh kryeministri i Australisë Scott Morrison.

Departamenti amerikan i Drejtësisë njoftoi (të enjten) akuza kriminale ndaj shtatë agjentëve rusë, duke i akuzuar për hakerim, krime financiare, vjedhje identiteti dhe pastrim parash, si përpjekje për të larguar vëmendjen nga programi i dopingut i sponsorizuar nga Kremlini. Tre prej tyre përfshiheshin në një akt-akuzë në muajin korrik ku vihej gishti mbi Rusinë për hakerim të emailave të Partisë Demokrate para zgjedhjeve presidenciale amerikane të 2016-s./VOA

vucic-1.jpg
G. P.16:27 | 02/10/2018

Presidenti serb Aleksandar Vuçiç ndodhet në Moskë ku do të takohet me homologun rus Vladimir Putin. Kreu i shtetit serb u shpreh se ky është një nga takimet më të rëndësishme me Putin, në krahasim me takimet e mëparshme.

Vuçiç theksoi se situata në rajon është shumë komplekse dhe është e domosdoshme që të masë çdo fjalë dhe veprim politik.

“Në momentet kur po përparojmë ekonomikisht dhe mund të jemi të kënaqur me përparimin ekonomik, kemi probleme të rëndësishme politike në rajon. Nuk mund të parashikojmë se çfarë do të ndodhte nëse do të kishte çekuilibrim të paqes”, tha Vuçiç në një deklaratë për mediat serbe në Moskë./abcnews.al

KREMLINI-AKTIVISTI-1280x720.jpg
ent ela22:44 | 26/09/2018

Përdorimi i agjentëve kimikë për të eliminuar kritikët e Kremlinit është kthyer në një shqetësim serioz për faktorin ndërkombëtar. Pas rastit të spiunit Sergei Skripal dhe së bijës, objekt i një sulmi të ngjashëm ka qenë një aktivist rus i cili po mjekohet në Gjermani.

Pioter Verzilov, një aktivist i njohur rus që u helmua dy javë më parë teksa ecte në rrugët e Moskës, ka akuzuar shërbimet sekrete ruse se fshihen pas sulmit ndaj tij. Verzilov, i cili është gjithashtu botues i një portali lajmesh kritike kundër Kremlinit, aktualisht po kurohet në një spital të Gjermanisë, ku është marrë në mbrojtje nga policia vendase.

“Unë jam i bindur se prapa helmimit tim fshihen shërbimet sekrete ruse, ndoshta njësia GRU”, ka deklaruar Verzilov për gazetën gjermane “Bild”. Pak momente pas sulmit me agjent kimik, aktivisti humbi shikimin, dëgjimin dhe aftësitë fizike.

Mjekët në spitalin gjerman nuk kanë gjetur gjurmë helmi në trupin e tij, por duke parë simptomat e treguara janë të bindur se veç helmimit nuk ka shpjegim tjetër. Verzilov është i bindur se shërbimet sekrete kanë përdorur një miks të ri helmesh, të cilin e kanë testuar ndaj tij.

“Profesionalizmi me të cilën u krye sulmi nuk lë vend për hipoteza të tjera vec atyre të shërbimeve sekrete”, ka vijuar Verzilov. Aktivisti është një personazh i njohur edhe për afërsinë me anëtaret e grupit Pusi Rajot, i njohur për këngët kundër presidentit Vladimir Putin. Gjithashtu, ai tërhoqi vëmendjen me hyrjen pa leje në fushën e lojës në finalen e Botërorit Rusi 2018. Por kjo ngjarje sipas tij nuk është shkaku real i helmimit.

“Do të investigoja vrasjen e 3 gazetarëve rusë në Republikën e Afrikës Qendrore dhe mendoj se kjo ka qenë arsyeja përse donin të më helmonin”, ka vijuar Verzilov. Ai ka shtuar se gjendja e tij shëndetësore po përmirësohet dhe ka shprehur dëshirën të kthehet në Rusi sapo të lërë spitalin. /abcnews.al

 

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono