monologu

mustafa-nano-papa-1280x705.jpg
nev ila21:10 | 12/11/2019

Eugenio Scalafari është një gazetar italian. Sot është 95 vjeç. Është gazetari më i famshëm, ndoshta edhe më i zoti në Italinë e sotme. Por e ka bërë edhe më të famshëm libri i tij i fundit me titullin “Zoti që është vetëm ligji dhe bota moderne” (Il Dio unico e la società moderna).

Në këtë libër ai përshkruan takimin që ka patur me Papa Françeskun dhe intervistat që i ka marrë atij, duket e çuditshme në fakt që Papa dhe Scalfari të takohen shpesh.

Ati i shenjtë dhe Scalfari një ateist, por ja që takohen. Është me sa duket kënaqësia intelektuale që i ka bërë bashkë dhe ideja e ballafaqimit të ideve që i kanë të kundërta.

Nuk ekziston ndonjë foto apo pamje filmike e takimeve të tyre, por është e lehtë të përfytyrohen të dy duke bërë “çu.. çu.. çu..”. Scalafari ka gjetur te Papa një interlokutor të veçantë në këtë muzg të jetës së vet.

Ndërsa Papa duhet të ketë gjetur te Scalfari, Priftin për tu rrëfyer, për ti thënë gjëra që s’mund t’ia thotë askujt, ndoshta edhe dyshimet që e kanë përndjekur gjithë jetën e vet prej besimtari.

Scalfari ndryshon disi nga Prifti, i nxjerr rrëfimet në pazar. Kështu ka bërë përpara disa kohësh kur tha se, Papa i kishte thënë që ferri nuk ekziston, dhe për rrjedhojë të liqtë dhe jobesimtarët nuk ka pse të kenë frikë.

Kështu ndodhi edhe tani, me librin e fundit, ku Scalfari pretendon që Papa ti ketë thënë se, ringjallja e Krishtit nuk është ashtu si e besojnë, domethënë edhe fizike. Ajo është vetëm shpirtërore.

Me këtë Papa hedh poshtë ungjijtë, hedh poshtë edhe 2000 vjet histori të krishtërimit. Është një nga bombat më të mëdha që ka nxjerrë nga goja e vet një Papë, qysh prej kohës së Shën Pjetrit.

Është një qëndrim që bën lëmsh dynjanë. Një Papë nuk mund ta thotë këtë. Papa Françesku nuk mund ta thotë këtë, madje as nuk mund ta mendojë. Ndryshe ç’u kuptua që është Papë?!

Një burrë plak mbi të 80-tat, edhe mund ta mendojë, s’ka gjë nëse është Papë. Mbi të gjitha është njeri. Për t’ia thënë dikujt apo gjithkujt nuk është e lehtë, sepse ai gjithsesi është një Papë, por për ta menduar mund ta mendojë.

Le të supozojmë se e mendon. Mund të imagjinohet se çfarë lufte e madhe zhvillohet brenda tij, midis Papa Françeskut dhe Jorge Belgolios, mund të imagjinohet se çfarë tundimi ka Bergolio për të sfiduar Françeskun.

I është dorëzuar këtij tundimi në bisedën me një njeri të vetëm, me Eugenio Scalfarin, dhe ka gjetur shëlbimin.

Nuk duhet të përjashtohet edhe rasti tjetër, të kuptohemi, ndoshta është kujtesa e Eugenio Scalfarit që funksionon me logjikën “Wishful thinking”, ose vetë Scalfarit i pëlqen të luajë apo të tallet në këtë fazë të jetës së vet me të vërteta të mëdha.

Me të vërtetat më të mëdha të botës, ndërkohë ai vetë nuk i ka besuar asnjëherë këto të vërteta, sepse ai është ateist.

Por atij me sa duket i pëlqen të luajë me të vërtetat e mëdha të njerëzimit. Është eksituese kjo lojë. Sidoqoftë mua më intrigon shumë biseda e tyre, bisedat e tyre.

Do kisha dashur të isha atje, si një vesh i jashtëm, për të marrë vesh nëse e gjitha kjo, ka qenë një bisedë mes dy njerëzish të urtë, apo mes dy pleqve të rrjedhur? Apo mes një të urti dhe një të rrjedhuri?

Sikur të ishte kjo e fundit, hajde ta marrësh vesh se cili është i urti, dhe cili është i rrjedhuri mes atyre të dyve./abcnews.al

PROVOKACIA-8-NENTOR-MONOLOG-YLLI-RAKIPI.mpg_snapshot_01.00-1280x720.jpg
ent ela21:16 | 08/11/2019

Reagime të çuditshme i ka konsideruar Mustafa Nano reagimet mbi monologun e tij të mëparshëm mbi tekstet e hip-hopit. Sipas tij këta që e akuzojnë si serbofil për shkak të termin Provokacija të emisionit, janë ata që e kanë dëmtuar më shumë në strukturë shqipen me forma e shprehi serbe.

Monologu i plotë

Kam ndjekur me vëmendje reagimet ndaj monologut tim të fundit mbi tekstet e hip-hopit kosovar. Dhe jam kapur në befasi. Kanë qenë reagime të çuditshme.

“Mos përça shqiptarët”, thoshin disa, që janë më vulgarë sesa tekstet që unë kritikoj. “Mos i përça shqiptarët!!!” Janë të njëjtët njerëz të cilët prej muajsh më quajnë renegat, tradhëtar, serbofil, serboman, e nuk lënë fjalë tjetër të ndyrë pa thënë në adresën time, ngaqë kam zgjedhur për titull të programit tim termin Provokacija. Përfytyroni se çfarë mund t’i quaj unë këta njerëz, nëse do të shtija në punë logjikën e tyre. Unë thjesht një term kam zgjedhur, ndërsa ata kanë bërë shumë më tepër. E shumë më keq. Gjithnjë, me logjikën e tyre. Ata e kanë dëmtuar në strukturë shqipen e tyre, e kanë përmbytur me forma e shprehi serbe. Shprehjet “një muj ditë, “kjo gjë nuk vihet në pyetje”, etj, janë struktura serbe. Ka pafundësisht të tilla. Përsëris, për mua nuk ka asnjë problem, por me metrin e tyre këta janë renegatë e tradhëtarë. Por në fakt nuk janë të tillë. Janë thjesht idiotë. E meqë ra fjala, duhet të punojnë pak me shqipen e tyre, s’ka gjë se janë idiotë. Duhet ta deserbizojnë shqipen që flasin. Në vend që të harxhojnë kohë duke më sharë mua, e të tjerë si unë, le të merren pak me derbizimin e shqipes së tyre. Dhe të kuptohemi, qëllimi në vetvete nuk është deserbizimi i gjuhës. Jo, është pastrimi i shqipes prej formash e shprehish të huaja, e sidomos prej huazimeve që kanë të bëjnë me strukturën e thelbin e gjuhës. Dhe të folmet vernakulare të Kosovës janë plot me huazime të tilla. Dhe janë këto të folme që përdoren në tekstet e këngëve të reperëve kosovarë.

Ka edhe një reagim të dytë: “Muzika kosovare është më e mira”, thoshin disa. Por në këtë pikë unë bie dakord. Kosovarët janë duke bërë me të vërtetë muzikë shumë të mirë. Më të mirën. Dhe ja një shembull: Kënga Jam ushtari i rrugës. Po ju ftoj që ta dëgjojmë së bashku. Sepse është një këngë që ia vlen të dëgjosh. Edhe shqipja është normale. Por edhe frazat janë të bukura, mendimet e shprehura janë të thella e mesazhet që përcillen janë pozitive, edukative e patriotike. /abcnews.al,

 

PROVOKACIA-5-NENTOR-MONOLOGU-PELLUMB-KULLA-PJ-1.mpg_snapshot_03.37-1280x720.jpg
ent ela21:09 | 05/11/2019

Tekste banale, çupa lakuriqe, meshkuj muskulozë e makina luksoze është ajo që përshfaqin videoklipet e këngëve më të ndjekura nga shqiptarët në Youtube. Monologu i sotëm i Mustafa Nanos ka marrë shkas nga një emision që transmetonte 100 këngët më të ndjekura nga shqiptarët në youtube. Sipas tij këto tekste të një banaliteti të pashoq janë një përdhunim i gjuhës gege.

Monologu i plotë:

Parmbrëmë në Top Channel po ndiqja Top Select ku transmetohen 100 këngët më të ndjekura nga shqiptarët në yotube

Ishin këngë të kompozuara mirë, unë u fokusova te tekstet. Tekstet ishin të një banalitei të pashoq, Kam veçuar 6 tekste dhe mesazhet që përcilleshin nga tekstet ishin seksise, raciste, me gjuhë rrugaçe, banale. Edhe videoklipet sado të ndryshme, ato nëse do përdorin kriter banalitetin ishin të gjitha njësoj, dominuar nga makina luksoze, shampanja që hapeshin, nga çupa lakuriqe dhe meshkuj muskulozë që përdorinin një gjuhë kam zgjedhur 6 pasazhe nga 6 këngët më të ndjekura.

Vargje të kësaj natyre ta shpifin. Ky është një përdhunim i gjuhës gege. Janë vargje që i kam marrë copy paste nga tesktet e këngëve.

Unë jam i shokuar, i fyer më mirë të më kishin rraf sesa të kisha lexuar tekste të tilla. Përsëris, ta shpifin! /abcnews.al

 

PROVOKACIA-MONOLOGU-ARTA-DADE-PJ-1.mpg_snapshot_03.45-1280x720.jpg
ent ela21:13 | 01/11/2019

Monologu i kësja të premteje i Mustafa Nanos u fokusua te industria  basteve dhe mbyllja e tyre. në këndvështrimin etij Nano shprehet se vazhdon t’i qëndrojë idesë së tij kundër mbylljes së tyre. Nano shpjegon tri arsyet pse  mbyllja e tyre ishte  gabuar, e padrejtë dhe e vështirë për t’u zbatuar. Ai i bën apel kryeministrit Rama që ta rikthejë këtë industri në mënyrë të disiplinuar.

Monologu i Mustafa Nanos:

Përpara disa kohësh kur morën vendimin për të ndalur industrinë e basteve në Shqiëpri pati një lloj entuziazmi në Shqipëri që ndoshta vazhdon akoma. Unë e kam treguar se kam qenë kundër këtij vendimi. Unë e di që qëndrimi im është kontrovers dhe i diskutueshëm, por vazhdoj t’i qëndroj atij mendimi që kam pasur. Vazhdoj t’i qëndroj edhe ca më shumë idesë që ai vendim ishte i padrejtë, i gabuar dhe i pamundur për t’u vënë në jetë dhe për t’u zbatuar.

I padrejtë– Se mendoj që shteti nuk ka të asnjë të drejtë të marrë rolin e gardianit moral, policit moral. Shteti nuk e ka këtë të drejtë, janë njerëzit vetë që janë përgjegjës për jetët e tyre dhe vendimet që marrin. Shteti mund të ndërrmarrë fushata sensibilizuese, të demonizojë aktivitete humane, por nuk ka të drejtë që t’i ndalojë këto gjëra. Kjo është në parim në princip për të gjithë ata që besojnë te principet liberale.

I gabuar – Se në atë moment ishte një industri e caktuar, që ishin të punësuar me mijëra vetë mbi 50 mijë vetë që paguanin taksa e sigurime shoqërore dhe që atëherë ne kemi mijëra të rinj që janë ende rrugëve, nëse nuk kanë marrë rrugë të tjera apo azil politik në Francë, në Francën e Makronit. U zhbë një lloj industrie e caktuar pa menduar impaktin ekonomik që do kishte ai vendim.

I pamundur për t’u zbatuar– Është provuar se bastet vazhdojnë dhe sot e kësaj dite se nuk mund të ndodhte ndryshe se aktivitete të tilla nuk bllokohen me  mjete policore. Kemi të njëjtën industri të bastit e bixhozit që funksionon në mënyrë ilegale. Kjo industri nuk paguan taksa e nuk ka të punësuar njerëz, vetëm se ka të njëjtën sasi parash që qarkullon në funksion të kësaj industrie.

Unë mendoj se kryeministri Rama duhet ta rishikojë këtë vendim. Ka pasur nevojë për disiplinim të kësaj industrie, por mendoj që duhet lënë të funksionjë normalisht, gjithmonë duke e disiplinuar. unë shpresoj që shumë shpejt bastet të rikthehen por në mënyrë të disiplinuar. /abcnews.al

mustafa-nanoo.jpg
ad min21:32 | 29/10/2019

Në monologun e kësaj të marte në emisionin “Provokacija”, gazetari Mustafa Nano u ndal tek nderimet që bëjnë grekët në varrezat e ushtarëve të tyre në Shqipëri. Sipas tij, që në momentin që u vendos që varrezat e ushtarëve grekë të ngrihen në vendin tonë, ato janë shndërruar në një yçkël më tepër në marrëdhëniet e brishta mes dy vendeve.

Mirëpo, Nano vë në dukje faktin që qytetarët grekë vijnë dhe festojnë çdo vit. Moderatori i “Provokacija” mendon që qytetarëtgrekë mund të bëjnë gjëra më të mençura se kaq. Ai u ndal edhe te përvjetori i Kostandinos Katsifas, që familjarët e tij tentuan ta fusnin në axhendën e festimeve.

Megjithatë, ky plan nuk u eci dhe kjo është jë gjë e mirë sipas Nanos.

Monologu i plotë:

Dje ishte data 28 Tetor. Që është përvjetori i fillimit të luftës italo-greke në vitin 1940. Dhe grekët e përkujtojnë këtë ditë. Ka vite që e përkujtojnë edhe në Shqipëri, që ka qenë territori ku u zhvilluan një pjesë e madhe e luftimeve. E ku një numër grekësh humbën jetën. Këta grekë meritojnë nderim e mirënjohje. Meritojnë nderim e mirënjohje edhe nga ne shqiptarët. Sepse luftuan dhe dhanë jetën kundër fashizmit, që në atë kohë ishte armiku i gjithë botës, dhe miku i ndonjë kolaboracionisti shqiptar që ka nënshkruar sulmin ndaj Greqisë nga pozicioni i kryeministrit.

Pas Luftës së Dytë Botërore, Shqipëria u bë komuniste. Pak më pas, u izolua krejt nga bota. Dhe kështu, për grekët që dhanë jetën në Shqipëri nuk u kujtua njeri. Por pas rënies së komunizmit, kjo çështje ridoli në skenë në trajta të çuditshme. Grekët kërkuan që të rënët e tyre të nderoheshin ashtu si e meritonin. Për këtë, nuk kërkuan që t’i merrnin eshtrat e të rënëve, e t’i nderonin në Greqi. Përkundrazi, kërkuan që të ngriheshin varreza në tokën shqiptare. Dhe autoritetet e këtushme nuk ua prishën. Varrezat u ngritën e po ngrihen. Dhe dihet tanimë se çfarë ka ndodhur. Eshtrat e të rënëve janë shndërruar në një yçkël më tepër në marrëdhëniet tona plot yçkla.

Dhe kështu ndodhi ajo që shumëkush priste të ndodhte. Varrezat u shndërruan në një vend pelegrinazhi për patriotët grekë. Këta të fundit vijnë çdo vit më 28 tetor për të përkujtuar një ngjarje të tyre në tokën shqiptare. Dje, fjala vjen, festuan me pompë 79 vjetorin. 79 VJETORIN. Keni dëgjuar ju të festohet 79 vjetori? Nuk besoj. Robi pret edhe një vit, dreqi ta hajë, që të festojë 80 vjetorin. Dhe pastaj pret edhe dhjetë vjet të tjera, që të festojë 90 vjetorin. Edhe 5 vjet në daçi për të festuar 85 vjetorin. Por jo 79 vjetorin. Mirëpo, duket se në Athinë e bëjnë me qejf këtë gjë. Madje, duket sikur u vjen inat që përvjetorët vijnë kaq rrallë, një herë në vit. Do kishin dashur që të vinin një herë në tri javë, apo njëherë në tre muaj. Dhe vijnë, siç e thashë, me një motivim nacionalist. Fjala e një zv.ministri grek, që kishte ardhur me këtë rast, e demonstronte këtë gjë. “Helenizmi është një dhe i pandarë; prandaj populli është munduar të luftojë për gjithçka që na bën helen”, tha ai. E kuptoni ju? Vjen i biri i botës të përkujtojë një ngjarje antifashiste, dhe flet për helenizmin që duhet mbajtur gjallë. E çuditshme. Mistrece. Bulliste.

Unë gjithnjë mendoj se soji grek është në gjendje të bëjë gjëra më elegante e më të mençura sesa kaq, duhet thënë. Dhe duhet thënë se një gjest e bënë edhe dje, që përveçse ishte 79 vjetori i luftës italo-greke, ishte dhe përvjetori i ekzekutimit të Kacifasit. Familjarët e këtij të fundit, ca nga dhembja, ca ngaqë kanë në kokë idenë fikse se grekët veç vuajnë në Shqipëri, kërkuan të fusnin në axhendën e festimeve edhe Kacifasin. Por askush nuk eci asaj ane. Madje, edhe thirrjeve që synonin heroizimin e Kacifasit nuk iu përgjigj kush. Kjo do të thotë se Athina, por edhe shumica e grekëve të Shqipërisë, nuk e sheh Kacifasin si një patriot grek. Dhe kjo është një gjë e mirë. Me gjithë empatinë që mund të kemi për familjarët e Kacifasit, kjo është një gjë e mirë. Dhe kjo nuk duhet marrë si një gjë që nuk kishte se si të ndodhte ndryshe. Nuk është kështu. Po të kishin mendje të keqe, mund të kapeshin pas hetimit mbi vrasjen e tij që po zvarriten. Por nuk e patën këtë mendje të keqe. Chapeau!   /abcnews.al

mustafa-nano-monologu-1280x714.jpg
nev ila22:29 | 18/10/2019

Hej Xhepo,

Do me lujt me jetët e mijra njerëzve ti? Boje, veç mos harro se unë jam ktu, e kam për t’bo atë që ta bona iherë. Të vjen n’men, a jo, kur ekonomia të iku për lesh brenda javës? Doje me majt n’burg pastorin Brunson ti. Unë t’thoja liroje. Jo, ti. Dhe e pe se ça t’gjeti. Po mos e kishe liru pastorin, më keq do ta bojsha. Dhe vrej ktu: ene ma keq do ta boj kët herë. Do ta shkatërroj krejt ekonominë. Nëse nuk do me i thirr trunit.

Do me hy në histori për mirë, apo do me u majt men për keq? E ke ti në dorë, vllajo. Kshilla ime osht: Bohu çun i mirë! Lene gangsterllikun! Mos u boj koqe kanari! Dakord Xhepo?

Hajt se folim prapë më vonë.

/abcnews.al

gjestii.jpg
ad min21:42 | 15/10/2019

Futbollistët duhet të merren me fushën e blertë dhe jo me politikën. Është ky mendimi i gazetarit Mustafa Nanos. Në monologun gjatë emisionit “Provokacija” në televizionin ABC News Nano renditi rastet ku sipas tij, sporti është përfshira nga gjeste politike.

Fillimisht, ai solli në kujtesë gjestin e Xhakës dhe Shaqirit, të cilët në një ndeshje ndaj Serbisë bënë me duar simbolin e shqiponjës. Më pas, kujtoi rastin e disa ditëve më parë në Breshia të Italisë, ku ndeshja u ndërpre pasi tifozët serbë mësynë në fushë pasi disa shqiptarë valëvisnin flamurin.

Në fund, vëmendjen e Nanos e kishte marrë gjesti i lojtarëve turq në nderim të ushtrisë, e cila po lufton në veri të vendit. Gjest, që sipas Nanos, e turpëron vendin.

Monologu i plotë:

Ju kujtohet gjesti i Xhakës dhe Shaqirit gjatë ndeshjes Serbi-Zvicër, ku ata pasi shënuan gol, bënë një gjest që tërhoqi vëmendjen e gjithë dynjasë. Gjesti është i famshëm, janë lojtarë të shkëlqyer, unë i admiroj, por gjesti i tyre ishte i gabuar. Unë e kam kritikuar qysh atëherë. E kritikova sepse nuk jam dakord me aq që bëhet nga ana e sportistëve për të përzierë sportin me politikën. Ai ishte një gjest i gabuar. Siç ishte i gabuar edhe një gjest i disa shqiptarëve në Breshia teksa po luhej një ndeshje miqësore mes Breshias, ku luan Balotelli dhe një skuadër serbe. Një apo dy shqiptarë kishin shkuar atje jo për të parë ndeshjen, por me kishin shkuar me qëllime politike. Kishin shkuar me flamur me vete dhe nisën t’i valëvisnin, duke tërhequr edhe vëmendjen e tifozëve serbë. Këta të fundit kaq duan në rrethana të tilla, morën zjarr, pushtuan fushën dhe ndeshja u prish, shqiptarët dhe serbët u bënë gazi i botës. Treguan që ata nuk druhen përpara ngasjes për të ngatërruar sportin me politikën dhe treguan që nuk e kanë për gjë që problemet e tyre, të lagjes së Ballkanit ti zhvendosin në vende të tjera të botës, në këtë rast në Itali.

Jemi përsëri te dukuria e përzierjes së sportit me politikën, e cila mori një përthyerje spektakolare dy tre ditë më parë me futbollistët turq të cilët me ndeshjen me Shqipërinë gjeti një minutë interesante për të festuar dhe për të gëzuar me tifozë. Ata u afruan tek ultrasit dhe nderuan në mënyrë militare. Ky ishte një homazh që u bëj ushtarëve turq që janë në një luftë. Nuk janë në luftë kundër pushtuesit se askush nuk i ka pushtuar turqit. Janë në një luftë në veri të Sirisë. Kjo ishte një shfaqje brutale që manifeston edhe njëherë përpjekjet e sportistëve të caktuar për të përzierë sportin me politikën. Unë prisja që këta të bënin mea culpa më pas sepse parashikoja një presion të madh nga ana e faktorit ndërkombëtar. Kjo trysni u bë, por nuk funksionoi. Mbrëmë ata kanë luajtur ndeshjen me Francës, arritën një barazim dhe në fund bënë të njëjtën gjë. Shkuan tek tifozët e tyre dhe nderuan në mënyrë militare.

Unë jam i sigurt që ata janë me idenë që duke bërë këtë gjë ata nderojnë kombin e tyre. Kam përshtypjen që në këtë mënyrë kombi turk, turpërohet. Gjeste të tilla e prishin imazhin ndërkombëtar të Turqisë. Zërat kundër janë shtuar. Një pjesë janë duke kërkuar penalizmin në terma sportivë të Turqisë dhe unë do isha shumë i lumtur që kjo do të ndodhte se do merrte dhe Shqipëria tre pikë. Nuk e meritonte në termat sportivë, por janë dënime që duhen dhënë. Shpresojmë që edhe në mungesë të një penaliteti, lojtarët turq ta kenë nxjerrë leksionin që politika nuk duhet të përzihet me sportin dhe ata janë vetëm futbollistë që duhet të luajnë në fushën e futbollit, asgjë më tepër./abcnews.al

PROVOKACIA-8-TETOR-MONOLOGU-VOLTANA-ADEMI-PJESA-1.mpg_snapshot_00.33-1280x720.jpg
ent ela10:07 | 09/10/2019

Zhvillimi i zgjedhjeve me standarde demokratike në Kosovë ishte në fokus të monologut të Mustafa Nanos këtë të martë në studion e Provokacijas në ABC News për shkak shkak të dallimit me procesin zgjedhor në Shqipëri.

Në këndvështrimin e tij Nano thotë se e gjitha ka të bëjë me klasën politike shqiptare të korruptuar, që e sheh pushtetin për të mbrojtur vetveten, pra më shumë se ves Nano e konsideron një nevojë të tyre.  Por Nano nuk di të na thotë një shpjegim për zhvillimin e zgjedhjeve me standarde në Kosovë, por i gëzohet faktit që shqiptarët dëshmuan të bëjnë zgjedhje spektakolare.

Pjesë nga monologu:

Zgjedhjet në Kosovë. Është një ngjarje jo tipikisht shqiptare. Në Kosovë pati zgjedhje dhe zgjedhjet shkuan normalisht gjë që nuk para ndodh. Ajo që dimë është që mbyllet procesi i votimit dhe fillon procesi i numërimit, është momenti kur fillon një proces kilometrik që zgjat me javë e muaj, pala humbëse nuk pajtohet me humbjen është një histori që nuk merr fund dhe në fund pritet që OSBE ODIHR të japë konkluzionet dhe jepen kritikat për atë që ndodh në terren dhe ankesat e zhurmën e madhe që bëhet nga partitë.

Në Kosovë nuk ndodhi asgjë e tillë, pala humbëse doli dhe pranoi humbjen. Një gjë fantastike për shqiptarët dhe në harkun e pak orëve u mor vesh rezultati dhe u shpall të nesërmen në mëngjes.

Pse në Tiranë ka ndodhur ajo që ka ndodhur?

Faktori më i rëndësishëm është ai që ka të bëjë me klasën politike të korruptuar. Klasa politike e korruptuar e sheh pushtetin si mjetin më të mirë për të mbrojtur vetveten. Kjo është arsyeja kryesore e vjedhjes së zgjedhjeve, kjo do të thotë që vjedhja nuk është ves, por nevojë, nuk është mani, por interes. Kjo do thotë se partitë i vjedhin zgjedhjet jo se duan, por se janë të interesuara.

Pse nuk ndodh kjo në Kosovë?

Nuk e di pse nuk ka ndodhur në Kosovë dhe nuk e kam një shpjegim. Asnjë shpjegim nuk më ka bindur dhe jam duke e vrarë mendjen që të gjej një shpjegim dhe deri sa ta gjej i gëzohem faktit që shqiptarët dinë të bëjnë zgjedhje dhe kjo u dëshmua në mënyrë spektakolare. /abcnews.al

 

 

mustafa-nano-1-1280x719.jpg
nev ila23:12 | 04/10/2019

Historia ka lidhje me një familje fantastike britanike. Bëhet fjalë për familjen Johnson, e cila është një familje shumë e komplikuar dhe shumë e sofistikuar.

Familja e Johnson është konservatore. Megjithatë në terma politik, familja Johnson është e përçarë sepse ata kanë votuar në mënyra të ndryshme për Brexit.

Boris Johnos është një nga nismëtarët për lëvizjen e Brexit. Rashela, motra e Johnson, ka votuar për qëndrimin e Britanisë në Bashkinë Europian.

Kjo gjë po diskutohet shumë në Britaninë e madhe. Boris Johnson mbajti një fjalim ku mes të tjerave tha:

“Unë e di që disa njerëz janë shumë të pasionuar pas përcarjes në familjen time lidhur me BE-në. Por unë e kam mbajtur një AS nën mëngë. Dhe AS-i im nën mëngë është: Nëna ime votoi kundër BE-së”  

Familja Johnson është një familje që nuk mund ta gjesh në Shqipëri.

Nuk mund të përfytyrohet një familje e ndarë në gjysmë. Gjithsesi Johnson nuk ka patur asnjë disavantazh nga kjo gjë dhe kjo ndodh sepse në Britaninë e madhe është individi që është qendra e shoqërisë.

Është individi që mban përgjegjësi për qëndrimet e veta, për përgjegjësitë e veta. Zgjedhjet që bën secili individ nuk lëndojnë harmoninë e kolektivit.

Në këtë rast është harmonia e familjes Johnson./abcnews.al

mustafa-nano-1280x720.jpg
ad min20:06 | 01/10/2019

Gazetari Mustafa Nano në monologun e kësaj puntate të emisionit “Provokacija” u ndal tek raporti paraprak i Komisionit të Venecias në lidhje me çëshjtjen e shkarkimit të Presidentit Ilir Meta.

Nano citon një fragment, ku thuhet se, “anulimi i zgjedhjeve, e shtyrja e tyre, kanë qenë veprime antikushtetuese; me këtë është cënuar e drejta e të zgjedhurve për të zgjedhur: bojkoti elektoral i partive, edhe nëse janë parti të mëdha, nuk mund të ndalojë zhvillimin e zgjedhjeve të rregullta; përndryshe, këto parti do të ishin në gjendje të pengonin, sa herë që ua jepte në kokë, çdo proces zgjedhor”.

Për gazetarin kot janë gjëra të thëna më parë nga aktorët lokalë që kur PD vendosi të bojkotonte zgjedhjet. Sipas Nanos, zgjedhjet u bënë si u bënë jo për faj të socialistëve, por për shkat të opozitës, e cila nuk u fut.

“Janë gjëra që po i dëgjoni për herë të parë? Jo, i keni dëgjuar me qindra herë, të thënë e stërthëna nga aktorë lokalë, para se të niste fushata elektorale e zgjedhjeve lokale, më saktë, që kur Partia Demokratike mori vendimin për të bojkotuar këto zgjedhje. Ashtu siç keni dëgjuar zëra të tjerë që thoshin se “zgjedhjet mund të bojkotohen në mënyrë që t’i tregohet botës se në Shqipëri është vendosur një diktaturë”, apo se “nevoja për të rrëzuar diktaturën putative është më e madhe se shqetësimi prej luftës civile që mund të plasë”, apo se “zgjedhjet pa opozitën janë një poshtërsi e madhe e socialistëve”, etj, etj. Mbetemi te fraza e fundit: Zgjedhjet pa opozitën ishin një poshtërsi e madhe e socialistëve. Kjo është një nonsens. Duhet ta themi copë: ato zgjedhje u bënë ashtu si u bënë, të shëmtuara, jo për faj të socialistëve. Socialistët kanë shumë mëkate në këtë vend, por faji për ato zgjedhje bie mbi opozitën. Faji nuk ishte i mazhorancës që këmbënguli që zgjedhjet të bëheshin. Ishte i opozitës, që në zgjedhje nuk u fut. Ta shohësh ndryshe këtë gjë, është si t’i shohësh gjërat me kokëposhtë”, tha Nano.

Më tej, Nano rendit arsyet pse mendon se zgjedhjet nuk mund të shtyheshin. Sipas tij, opinioni i Komisionit të Venecias i vuri vulën mendimit se zgjedhjet e 30 Qershorit ishin legjitime.

“Një, sepse nuk të lejon kushtetuta. Dhe kjo do të ishte mjaft si arsye. Dy, sepse opozita nuk kërkonte shtyrje zgjedhjesh. Ata kërkonin rënien e qeverisë. Tre, sepse nuk kish asnjë arsye madhore që zgjedhjet të shtyheshin. Çdo gjë ishte një kapriço. Katër, sepse nuk është ndonjë hatá nëse një parti nuk merr pjesë në zgjedhje. Në demokraci, pjesëmarrja në zgjedhje është një e drejtë, jo një detyrë. Është një mundësi, jo detyrim.

Dhe zgjedhjet, siç pritej, u bënë. Ishin, siç thashë, zgjedhje të shëmtuara. Por ishin legjitime. Dhe Opinioni i Komisionit të Venecias i ka vënë vulën këtij mendimi. Dhe unë shpresoj më në fund që ata që bënin thirrje të mos shkohej në zgjedhje, të jenë ndier keq më pas, sidomos tani, pas qëndrimit të Komisionit të Venecias. Nëse edhe Komisionin e Venecias nuk na i nxjerrin të korruptuar”, tha Nano.

Votimin më 30 Qershor, Mustafa Nano e konsideron si një nga veprimet më të mira publike që ka bërë ndonjëherë.

“Unë vetë shkova në zgjedhje. Votova. Nuk jam ndier mirë atë ditë. Kisha një lloj sikleti. Ishte si një ditë e shkretë. Ishte një festë e prishur. Ishte si një funeral. Kjo ishte ideja që më shoqëroi atë ditë të 30 Qershorit 2019. E megjithatë, mua më vjen mirë që shkova të votoja. Është një nga veprimet publike më të mira që kam bërë ndonjëherë. Ka shumë njerëz që nuk e kuptojnë, por nuk bëhem merak. Nuk bëhem merak, sepse e di se kush janë këta njerëz. Janë njerëz që në të vërtetë nuk kanë gjë kundër korrupsionit, apo kundër vjedhjes së votave, apo kundër sundimit të njëshit. Thjesht do donin që njëshi të mos quhej Rama, por të quhej Berisha, e që paratë publike e votat t’i vidhnin jo socialistët, por ata vetë”, tha moderatori i emisionit “Provokacija”./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono