mogherini

haradinaj-1.jpg
ent ela15:39 | 18/12/2018

Në një konferencë për shtyp pas mbledhjes së qeverisë kryeministri i Kosovës Ramush Haradinaj ka këmbëngulur në vendimet e marra nga qeveria e tij ndaj Serbisë. Kreu i ekzekutivit akuzoi shefen e diplomacisë së BE sep ërvec se ka devijuar dialogun me Serbinë, po shpërdoron investimin që Bashkimi Europian ka bërë për dialogun.

Kryeministri i Kosovës nuk ka ndryshuar aspak tonet për sa i përket përplasjeve me shefen e diplomacisë europiane Federika Mogerini. Haradinaj këmbënguli se taksa do të hiqet vetëm kur Serbia të njohë pavarësinë e Kosovës.gjithashtu ai theksoi se taksa e vendosur ndaj Serbisë nuk ka asnjë lidhje me mos liberalizimin e vizave.

Duke iu përgjigjur pyetjeve të gazetarëve Haradinaj mbrojti deklaratat e bëra për Mogerinin duke thënë se ajo po shpërdoron investimin e Bashkimit Europian për dialogun Prishtinë – Beograd.

Në fund të fjalës së tij ai bëri të qartë se për Kosovën do të flasë vetëm ai që do të ketë mbështetjen e qeverisë, parlamentit dhe të popullit, pavarësisht emrit që do të mund të jetë në pushtet. /abcnews.al

HARADINAJ-BRUKSEL-ABC-1280x720.jpg
ent ela16:20 | 17/12/2018

Kryeministri Haradinaj i ka thënë sërish “JO” kërkesës së BE për heqjen e taksave për produktet serbe. Në një takim me Federika Mogerinin dhe komisionerin Hahn në Bruksel, Haradinaj ka nënvizuar se me Serbinë nevojitet një marrëveshje gjithëpërfshirëse dhe jo një gjysmake që zgjidh vetëm çështje të caktuara.

Kryeministri i Kosovës, Ramush Haradinaj e ka sfiduar Bashkimin Europian edhe në Bruksel, gjatë takimit të asociim-stabilizimit Kosovë-BE. Në një letër zyrtare të Përfaqësueses së Lartë, Federica Mogherini dhe komisionerit Johannes Hahn, autoriteteve të Kosovës u kërkohej heqja e taksës për importin e mallrave nga Serbia dhe Bosnja në këmbim të heqjes së emërimit “UNMIK” dhe zëvendësimit të tij me “Kosova” në marrëveshjen e CEFTA-s. Por kryeministri Haradinaj i ka thënë sërish JO kërkesës zyrtare të Bashkimit Europian, përgjigje që ka shkaktuar edhe anulimin e konferencës për shtyp të parashikuar në godinën e Këshillit të Ministrave të Bashkimi Europian. Haradinaj ka folur i vetëm për mediat, duke i cilësuar legjitime kërkesat e Kosovës dhe duke nënvizuar se me Serbinë duhet të arrihet një marrëveshje gjithëpërfshirëse dhe jo e pjesshme, që nënkupton heqjen e taksave.

Haradinaj: “Kosova ka disa kërkesa legjitime, si heqja e vizave, pasi është e papranueshme të jetojmë në geto. Pastaj kërkojmë barazi mes palëve. Shtetësia e Kosovës është konfirmuar nga GJND dhe mes të tjerash kërkuam vazhdimin e dialogut. (Taksat) Jemi të angazhuar për një marrëveshje gjithëpërfshirëse mes Kosovës dhe Serbisë, kemi përgatitur një draft, por nuk ka kohë për të zgjidhur vetëm një pjesë (atë të taksave), por gjithë çështjen”.

Në deklaratën e tij, Bashkimi Europian ka insistuar në heqjen e këtyre tarifave duke thënë, se mbajtja në fuqi e tyre dëmton interesat ekonomike të Kosovës dhe popullit të saj, duke zvogëluar rrjedhën e tregtisë dhe duke ulur atraktivitetin e Kosovës si një vend për investime dhe biznes. Bashkimi Europian nënvizon gjithashtu rëndësinë e angazhimit të vazhdueshëm të Kosovës në dialogun e ndërmjetësuar nga BE-ja midis Prishtinës dhe Beogradit. Në deklaratë theksi vihet te përshpejtimi dhe intensifikimi i punës për një marrëveshje ligjërisht të detyrueshme për normalizimin gjithëpërfshirës midis Kosovës dhe Serbisë dhe zbatimin e marrëveshjeve të dakordësuara, në veçanti marrëveshjen e 2015 për Shoqatën e Komunave me Shumicë Serbe. /abcnews.al

MOGHERINI-HAHN-KOSOVA-1280x720.jpg
ent ela19:28 | 10/12/2018

Përfaqësuesja e lartë e Bashkimit Europian për politikë të jashtme, Federica Mogherini i ka bërë thirrje Qeverisë së Kosovës që ta revokojë taksën prej 100% ndaj produkteve me origjinë nga Serbia dhe Bosnje e Hercegovina. Duke folur për dialogun mes Kosovës dhe Serbisë, ajo tha se iu takon të dy vendeve të përcaktojnë marrëveshjen finale. Megjithatë Mogherini njoftoi se nuk do të pranohet ndryshimi i kufirit në linja etnike.

Në të njëjtën linjë me kryediplomaten e BE-së është shprehur edhe eurokomisioneri për zgjerim dhe fqinjësi të mirë, Johannes Hahn. Duke folur në Bruksel, ai tha se taksa e vendosur nga Kosova është kategorikisht kundër vlerave të tregtisë së lirë. Ai ripërsëriti se vonesa në marrjen e këtij vendimi është i papranueshëm për BE-në. “Bashkëpunimi rajonal mund të zhvillohet vetëm nëpërmjet tregtisë së lirë, lëvizjes së lirë të mallrave dhe lëvizjes së lirë të njerëzve”, nënvizoi Hahn.

Edhe pas apelit të Mogherinit dhe Hahan, qëndrimi i Qeverisë së Prishtinës nuk ka ndryshuar sa i përket taksës 100%. Zyra e Kryeministrit Ramush Haradinaj, e kontaktuar nga Klan Kosova, bëri me dije se taksa hiqet vetëm kur Serbia të njohë Kosovën. /abcnews.al

MOGERINI-TAKSA-1280x720.jpg
ent ela20:03 | 21/11/2018

Shefja e Politikës së Jashtme të Bashkimit Europian, Federika Mogerini i ka bërë thirrje qeverisë së Kosovës të anulojë vendimin për rritjen në 100 për qind të takses për produktet e importuara nga Serbia dhe Bosnja. Përmes një deklarate për shtyp, Mogerini është shprehur se lëvizja e Prishtinës zyrtare shkel parimet e marrëveshjes për tregtinë e lirë dhe shpirtin e Marrëveshjes së Stabilizim Asociimit.

Gjithashtu, ky vendim i qeverisë së Kosovës përkeqëson më shumë situatën e tensionuar pas vendosjes së taksës fillestare prej 10 për qind”, ka vijuar Mogerini. Në këto kushte, shefja e diplomacisë europiane, i kërkon qeverise në Prishtinë të tërheqë menjehere vendimin e saj. /abcnews.al

MOGHERINI-KUNDER-VUCIC-ABC-1280x720.jpg
ent ela16:52 | 09/11/2018

Përfaqësuesja e BE-së për politikë të jashtme, Federika Mogherini ka përgënjeshtruar deklaratën e presidentit serb, Vuçiç, i cili u shpreh se nuk do të vijojë dialogun me Prishtinën në Bruksel. Sipas Mogerinit, të dy presidentët janë dakordësuar për vijimin e takimeve.

Shefja e diplomacisë europiane, Federica Mogherini nuk ka akorduar deklaratat me Presidentin e Serbisë, Aleksandër Vuçiç pas përfundimit të raundit të radhës të dialogut të nivelit të lartë Prishtinë-Beograd që është zhviluar në Bruksel. Një ditë pas takimit, deklarata e Federica Mogherinit, e cila ndërmjetëson dialogun Prishtinë-Beograd është krejtësisht në kontradiktë me atë të presidentit serb, Aleksandër Vuçiç. Ky i fundit ka bërë të qartë pas takimit të djeshëm, se nuk do marrë më pjesë më në dialog përderisa masat e marra në kuadrin e CEFTA-s nga qeveria e Kosovës të jenë në fuqi. Ndërkohë, që sipas deklaratës së Federica Mogherinit, të përcjellur nga zëdhënësja Maja Koçijaniç, të dy presidentët janë angazhuar që të vazhdojnë dialogun:

Maja Koçijançiç, zëdhënëse e KE-së: “Përfaqësuesja e lartë e BE-së, Federica Mogherini dhe dy presidentët u takuan për dialogun e nivelit të lartë për normalizimin e marrëdhënieve midis Prishtinës dhe Beogradit dhe për arritjen e një marrëveshjeje ligjërisht të detyrueshme. Siç e kemi përcjellur edhe në deklaratën tonë të mbrëmshme, ne presim që Serbia dhe Kosova të arrijnë rezultate të shpejta nga angazhimet e marra në kuadrin e dialogut, veçanërisht për lidhjen direkte që ka normalizimi gjithpërfshirës midis dy palëve me aspiratat e tyre të integrimit në BE. Serbia dhe Kosova duhet të frenohen nga fjalë, aksione dhe masa, që janë në kundërshtim me normalizimin e marrëdhënieve dhe të krijojnë një klimë të favorshme dialogu.Dhe ju duhet të keni parë, që të dy presidentët ranë dakort që të rrijnë në kontakt konstant për të siguruar vazhdimin e vlerësimit të takimit të djeshëm dhe kontaktet në fakt do vijojnë”.

Kjo nuk është hera e parë që për të njëjtin takim, versioni europian është krejtësisht në kundërshtim me atë serb. Presidenti Aleksandër Vuçiç është shprehur se nuk do vijë në Bruksel nëse qeveria e Kosovës nuk ndryshon masat e marrë për rritje me 10% të taksave lidhur me importin e mallrave nga Serbia dhe Bosnjë-Hercegovina. Sipas Komisionit Europian, masat që synohen të aplikohen nga qeveria e Kosovës janë dhunim i marrëveshjes së tregtisë së lirë për Europën Qëndrore CEFTA dhe qeveria e Kosovës duhet të tërhiqet nga këto masa. /abcnews.al

BRUKSEL-TAKIMI-1280x720.jpg
ent ela21:26 | 08/11/2018

Takimi i radhës mes presidentëve Hashim Thaçi dhe Aleksandar Vuçiç ka përfunduar më shpejt nga sa mendohej. Sipas mediave kosovare, takimi i ndërmjetësuar nga shefja e Politikës së Jashtme Federika Mogerini është mbyllur pa një marrëveshje. I pari që ka dalë nga takimi ka qenë presidenti serb Vuçiç, i cili nuk është ndalur të flasë për mediat që e prisnin për një prononcim. Ndërsa presidenti Thaçi ka deklaruar se takimi dështoi për shkak të qëndrimit të homologut serb, i cili sipas tij ka qenë shumë arrogant. “Fjalimi i tij ishte agresiv dhe arrogant, ndërsa fokusi ynë ishte tek arritja e një marrëveshjeje të balancuar që do të nënkuptonte njohjen reciproke, anëtarësimin e Kosovës në OKB dhe zëvendësimin e rezolutës 12-44”, ka thënë Thaçi. Presidenti i Kosovës ka shtuar se shpreson që takimi i radhës të mbahet së shpejti dhe që Beogradi ta ndryshojë qasjen në mënyrë që të arrihet një marrëveshje. /abcnews.al

MBULIM-MOGERINI-SHKUP.mpg_snapshot_00.07-1280x597.jpg
G. P.11:22 | 13/09/2018

Përfaqësuesja e lartë e Bashkimit Europian për Politika të Jashtme dhe Siguri, Federica Mogherini dhe ndihmës sekretari amerikan për çështje evropiane dhe euro aziatike Mitchell vizitojnë Shkupin në mbështetje të referendumit për Marrëveshjen e Prespës.

Mogherini do të ketë takime me kryeministrin Zoran Zaev, me presidentin Ivanov, ndërkaq do të takohet edhe me liderin e opozitës, Mickovski. Mogherini dhe Zaev do ta vizitojnë Çarshinë e Vjetër të Shkupit, ku do të japin deklarata të shkurtra për mediat.

Ndihmës sekretari shtetëror amerikan për çështje evropiane dhe euro aziatike Mitchell, do të ketë takime me kryeministrin Zaev dhe me përfaqësues tjerë zyrtarë për mbështetje të Marrëveshjes së Prespës mes Maqedonisë dhe Greqisë dhe referendumit të ardhshëm më 30 shtator. Zaev dhe Mitchell pas takimit do të japin deklarata për mediat rreth orës 18:30./abcnews.al

MOGHERINI-MASS-PER-KOSOVEN-ABC-M4-T2.mpg_snapshot_00.26-1280x720.jpg
ent ela19:41 | 31/08/2018

Shefja e diplomacisë së BE, Federica Mogherini shprehet pro rishikimit të kufijve, duke mbështetur çdo pakt që bazohet në të drejtën ndërkombëtare. Ndërsa sipas ministrit të jashtëm gjerman edhe vetë diskutimet mbi ketë temë janë të gabuara.

Shefja e politikës së jashtme të Bashkimit Evropian, Federica Mogherini, tha se ajo do të mbështeste shkëmbimin e territoreve midis Kosovës dhe Serbisë nëse dy vendet shmangin çdo përpjekje për të krijuar shtete etnikisht homogjene.

“Cilido që të jetë rezultati i dakorduar në mënyrë reciproke, do ta ketë mbështetjen tonë, me kusht që ai të jetë në përputhje me të drejtën ndërkombëtare”, tha Mogherini.

Ajo i bëri këto komente në një konferencë për media në Vjenë, pas një takimi midis ministrave të jashtëm të Bashkimit Evropian dhe homologëve të tyre ballkanikë.

Deklaratat Mogherini i beri pak dite para raundit të radhës të dialogut mes presidentëve Vuçiç dhe Thaçi në Bruksel, që zhvillohet me ndërmjetësimin e BE.

Por në këtë takim në Vjenë, Gjermania e bëri të qartë përmes ministrit të Jashtëm, Heiko Mass se jo vetëm ideja e shkëmbimit, por edhe vetë diskutimet mbi ketë temë janë të gabuara.

“Ne besojmë se në këtë mënyrë mund të hapen shumë plagë të vjetra e kjo na bën skeptikë. Diskutimet për shkëmbim territoresh nuk çojnë në drejtimin e duhur”, tha Heiko Mass. /abcnews.al

MOGERINI-BALLKANI-1280x720.jpg
ent ela17:36 | 30/08/2018

Përfaqësuesja e Lartë e Unionit për Politikë të Jashtme, Federika Mogerini thotë se BE-ja dhe Ballkani kanë kaluar në fazën e dytë të marrëdhënive. Tashmë palët janë partnerë në mbrojtje dhe siguri, ndërsa më përpara ishte Brukseli që garantonte siguri në këtë rajon.

Shefja e diplomacisë evropiane, Federica Mogherini, në një takim të ministrave të mbrojtjes të Bashkimit Evropian në Vjenë, tha se roli i BE në Ballkan ka qenë prej kohësh për të krijuar sigurinë. “Tradicionalisht, ne shikojmë Ballkanin Perëndimor, si një rajon i jostabilitetit ku për shumë vite, madje edhe dekada BE kishte një rol të atij që ofron siguri. Ne tani kalojmë në një fazë ku jemi partnerë në një mbrojtje dhe siguri të përbashkët”, është shprehur.

Mogherini, e cila kryeson takimin joformal të ministrave të mbrojtjes të BE që nisi punimet të mërkurën në Vienë, tha se takimi filloi me një diskutim mbi bashkëpunimin me Ballkanin Perëndimor në çështje që lidhen me mbrojtjen dhe sigurinë.

“Kemi folur së bashku me NATO-n dhe OKB-në, partnerët tanë kryesorë në rajon me qëllim të përmirësimit të bashkëpunimit në fushën e mbrojtjes dhe sigurisë, si pjesë përbërëse e punës sonë me Ballkanin Perëndimor”, ka thënë kryediplomatja e BE-së. /abcnews.al

TAKIMI-THACI-VUCIC-MBULIM.mpg_snapshot_00.04-1280x703.jpg
G. P.15:45 | 25/08/2018

Dialogu i nivelit të lartë mes Kosovës dhe Serbisë, me ndërmjetësimin e BE, do të vijojë në 7 shtator në Bruksel. Në këtë datë do të takohen në kryeqendrën europiane presidentët e dy vendeve Hashim Thaçi dhe Aleksander Vuçiç, në praninë e Përfaqësueses së Lartë të Bashkimit Europian, Federica Mogherini. Ka qenë vetë zyra e zonjës Mogherini, që ka bërë të ditur lajmin për takimin Thaçi-Vuçiç, në kuadër të përpjekjeve për normalizimin e marrëdhënieve dypalëshe.

“Përfaqësuesja e Lartë do të vazhdojë diskutimet me dy presidentët rreth marrëveshjes së normalizimit në drejtim të arritjes së progresit konkret, duke marrë parasysh prioritetin e dialogut ndërmjet Beogradit e Prishtinës dhe perspektivën europiane të rajonit”, thuhet në deklaratën e zyrës së Mogherinit.

Një temë diskutimi në këtë takim mes dy presidentëve mund të jetë edhe ajo e rishikimit të kufirit të përbashkët, sipas një ideje të hedhur javët e fundit nga presidenti kosovar. Vetë Thaçi kishte deklaruar disa ditë më parë se e ka gati një plan për korrigjimin e kufirit që do t’ja prezantonte homologut të tij Vuçiç në shtator gjatë takimit në Bruksel./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono