mirela Milori

tvklan.jpg
Autor E15:59 | 10/02/2020

Historia ime”, në Tv Klan solli ditën e sotme historinë e pazakontë të një nëne, e cila kërkon drejtesi, pasi i biri me probleme të shëndetit mendorë është bërë pre e një abuzimi seksual nga fqinji.

Në studio, Mira ka treguar se prej 33 vitesh ajo kujdeset për djalin e saj dhe ngjarja e cila ka ndodhur në Prill të vitit të kaluar ka shënjuar jetën e djalit, por edhe të gjithë familjes.

Gruaja rrëfen se i biri është abuzuar seksualisht nga një burrë 60 vjeç, i cili ka pasur poshtë shtepisë së tyre një bar kafe. Ajo e mori vesh ngjarjen nga rrjetet sociale, kur pa një video të publikuar, në të cilën i biri ishte abuzuar seksualisht prej fqinjit.

Nuk mundi ta shihte videon e plotë, madje edhe sot refuzon ta shohë atë. Gruaja ka bërë rrëfimin në polici, por personi është zhdukur që prej asaj dite që video u bë publike.

Mirela Milori: Çfarë ndodhi në Prill të vitit të kaluar?

Mira: Ne ishim në shtëpi, ishte ora 9 e mëngjesit, na marrin nga Italia në telefon, kishte ardhur çupa ime dhe po pinim kafe. Hape i thotë çupës Facebook-un tha. Po çfarë ka tha ajo? Po hapeni, hapeni! Kur e hapëm dhe pamë djalin, na u errësuan sytë, nuk pamë tjetër çfarë kishte. Ngelëm tani dhe nuk dinim ku të vinim. Na thotë shko dhe gjeje atë, shkoj unë tek lokali i tij me çupën.

Mirela Milori: Ta sqarojmë pak, në Facebook ishte hedhur një video?

Mira: Në fillim fotografi dhe ne në moment menduam mos ishte ndonjë, kanë bërë siç tallen ndonjë foto. Edhe po shikoheshim të dyja në sy, po ku të vinim, se na u errën sytë dhe nuk pamë kush ishte poshtë këtij. Kur më vonë na thanë, shkoni se është filani dhe është video. Neve videon nuk e kemi parë dhe as nuk do ta shikoj deri sa të vete pranë burrit atje, se nuk e shikoj dot. Ata që e kanë parë thonë që nuk shikohet. Unë se kam parë dhe nuk dua ta shikoj.

Mirela Milori: Video është e rëndë! Ne e kemi videon dhe padiskutim as na shkoi mendja për ta transmetuar, por për ta verifikuar rastin. Mund t’ju them që video është e rëndë. E njihnit personin?

Mira: E njihnim posi!

Mirela Milori: Kishte një lokal pranë shtëpisë suaj?

Mira: Po!

Mirela Milori: Djali ishte i pavetëdijshëm? Kishte pirë?

Mira: Nuk e di. E marr ndonjëherë dhe i them, se nuk dua t’ja kujtoj shumë!

Mirela Milori: Një burrë në moshë të madhe, duke përfituar nga gjendja e djalit ka bërë veprime të turpshme me të dhe ju shkoni në lokalin e këtij zotërisë?

Mira: Vajti çupa po bërtiste. Si s’të vjen turp? Të të vijë rëndë? Ti t’ja bësh djalit këtë? Ai ngeli! Ishte edhe e motra banakiere dhe i vëllai kamarier. Edhe doli ai tha, çfarë kini dhe gjoja i ra të fikët të vëllait, sikur nuk dinte gjë që i vëllai bënte këto gjëra. Na morën ne dhe dolëm përjashta, na erdhi keq se njerëz jemi. Jo do ta vras tha ime bijë. Në të njëjtën kohë që e morëm vesh ne, e mori vesh dhe policia. Policia vajti pastaj në spital mori diagnozën e djalit, më lajmëroi dhe mua, vajtëm në polici. Kur vajtëm ne, ai që në moment, prandaj e bënë atë zvarritje, dolën jashtë që ai të fshiheshe dhe është fshehur.

Mirela Milori: Ai ka ikur nga qyteti, nuk dihet se ku është?

Mira: Nuk e dimë, atje në qytet edhe e kanë parë, fshihet, del. Nuk e di?

Mirela Milori: Në polici çfarë të thanë? Çfarë mase arresti u vendos për të?

Mira: Është shpallur në kërkim thanë! Ai mbase e ka joshur dhe ai thotë siç e kam pyetur unë, çfarë i them të keqen mamaja. Ai ka vajtur mbi 3-4 herë. Më jepte cocacola dhe para se të dilte kishte një si dhomë dhe më thoshte mos dil këtej, por dil nga kjo dhoma këtej. Atje nuk e di se me çfarë e ka gënjyer.

Më tej Mira thotë se djali është i traumatizuar, nuk del asgjëkundi dhe rri vetëm me të.

Mira: S’del asgjëkundi vetëm me mua rri. Po të dalë deri aty kthehet prapë në shtëpi, ndonjëherë më thotë: Kot që rroj.

dadshamir-shehi-1.jpg
nev ila21:21 | 06/02/2020

Mënyra e re e komunikimit me qytetarët nga liderët politik shqiptarë ka tërhequr jo pak vëmendje. Gjatë pasdites së sotme kreu i Partisë Demokratike ka nisur një fushatë komunikimi me qytetarët. Për të folur në lidhje me këtë por jo vetëm, i ftuar në “Mbrëmje ABC” përballë gazetares Mirela Milori ishte i ftuar kreu i LZHK Dashamir Shehi.

Pjesë nga biseda në studio:

Mirela Milori: Si e shihni zgjedhjen e Z. Basha për të komunikuar me qytetarët live nga FB?

Dashamir Shehi:Është një metodë e re, është një nga mjetet që i ofron koha, teknologjia, bashkë me ndryshimin e teknologjisë ka ndryshuar edhe opinioni gjithsesi e gjykoj se ka bërë mirë. Është një armë më shumë në komunikimin me njerëzit, aq më tepër një opozitë si e jona që nuk është në parlament.

Mirela Milori: A mendoni se e djathta ka ardhur në një pikë që duhet të merret me substancën, pra që e djathta ka nevojë për një riorganizim të vetvetes, të bëjë disa bilance të saj?

Dashamir Shehi:Po patjetër, jo vetëm që ka ardhur por ky moment ka kaluar. Duhet të ishte një debat që duhej hapur me vite përpara. Ne nuk mund të bëjmë si Edi Rama që tregon vetëm histori suksesi, se çka bërë këto 7 vjet.

Ne duhet të shohim realitetin ku ndodhemi, në 30 vjet të ekzistencës së të djathtës shqiptare. E djathta shqiptare e para 30 vjetëve nuk ka asnjë lidhje me të djathtën aktuale.

Ne duhet të reflektojmë mbi këtë lloj situatë dhe të adaptojmë një të djathtë që është reale. 30 vjet politika shqiptare ka funksionuar sipas zgjedhjeve, votave, dhe nuk është pyetur kurrë është e majtë, apo është e djathtë, mjaftonte kush i sillte votat.

Mendoj që ne sot operojmë në dy rrafshe kryesore, në një opozitë të madhe që është kundër rilindjes dhe Edi ramës dhe e djathta shqiptare në dimensionin e vet natyral, që mund të jetë ndoshta më pak se votat që Partia Demokratike merr por në qoftë se duam të ndërtojmë esencën e një të djathte duhet të merremi me atë çfarë merret e djathta edhe në Evropë.

Mirela Milori: A mendoni se ka ardhur momenti të krijohet në grupin opozitar një koalicion apo një bashkim partish apo një qendër e djathtë?

Dashamir Shehi: Për situatën në të cilën ndodhemi unë maksimalisht do të ndërtoja opozitën më të madhe që është kundër Edi Ramës. Pra të gjithë ata që janë kundër Edi Ramës, grupit të tij dhe kundër këtij regjimi, gjykoj që është aleat potencial i kësaj opozite, i majtë apo i djathtë qoftë. Këta janë njerëzit tanë. Nuk duhet të bëjmë diference, nëse i themi “ky është me ne, ky s’është i yni” do të kemi tkurrje të bllokut opozitar. Kemi nevojë të mbarojmë këtë punë me ata që kemi kundërshtar dhe ti hapim rrugë një shteti të ri  ndryshe./abcnews.al

ylli-rakipi-abc-1280x585.jpg
nev ila21:10 | 23/01/2020

I ftuar mbrëmjen e sotme përballë gazetares Mirela Milori ishte gazetari Ylli Rakipi. Rakipi ndau opinionet e tij në lidhje me politikën e ndjekur nga kreu i Partisë Demokratike Lulzim Basha.

Sipas Rakipit, Lulzim Basha i detyrohet elektoratit të tij një shpjegim, se përse ndaloi aksionin e ndërmarrë në shkurt të vitit të kaluar.

Po ashtu Rakipi tha se, Basha duhet të jetë i sinqertë, të pranojë, dhe të deklarojë, që një zyrtarë i lartë amerikan, siç ishte Matthew Palmer, e detyroi të tërhiqej nga ky proces.

 

Pjesë nga biseda në studio:

Ylli Rakipi: Të gjitha pushtetet i ka në duar Edi Rama dhe kjo mazhorancë, me përjashtim të Presidentit të Republikës që e kanë kthyer në një noter të rëndomtë.

Mirela Milori: Megjithatë duket sikur janë qetësuar ujërat, kanë bërë një tryezë për reformën, do të hartojnë një draft, të cilin do ia përcjellin tryezës, dhe pas tryezës do të shkojnë në parlament, ky i fundit është zotuar që çfarëdo lloj drafti që të vijë, ne do e votojmë. Si iu duket kjo marrëveshje, çfarë mendoni?

Ylli Rakipi: Duket sikur jemi në një film serial, në një “deja vu”, ku është shtuar 1 element tjetër. Ne duhet të ndalemi dhe të analizojmë faktin kur opozita shqiptare 1 vit më parë iu largua institucioneve, dhe ekstremizoi aksionin e vet politik, deri tek mosmarrja pjesë e zgjedhjeve vendore.

I gjithë ky aksion u zhvillua me idenë që ky pushtet, ishte kthyer në një regjim që vidhte votat,  ngriti në këmbë një pjesë të mirë të shqiptarëve, i vuri përballë regjimit, dhe në verë, kryetari i opozitës e “kyçi” procesin që kishte ndërmarrë, dhe u rikthye përsëri në shtator.

U kthye në shtator, vazhdon të vërtitet pa thënë dhe pa bërë asgjë, pa u shpjeguar shqiptarëve se pse ajo që u nis nga Lulzim Basha, pra procesi, mbeti në mes.

Nuk shpjegoi se pse u largua nga parlamenti, dhe pse nuk hyri në zgjedhje. Duke e lënë procesin gjysmë, është njëlloj si të nxjerrësh shigjetën nga harku, ta lëshosh, dhe në mes të rrugës, shigjeta të të kthehet pas e të vetëasgjesohesh.

Pra opozita shqiptare kreu një akt kamikaz sepse procesin që nisi, e la në mes. Sot ajo pjesë e shqiptarëve, që mbështesin opozitën, nuk kanë asnjë shpjegim, janë të paqartë.

Lulzim Basha duhet tu japë një shpjegim, se pse u largua nga parlamenti, pse nuk hyri në zgjedhje, dhe pse u tërhoq, kush e detyroi të “zbythej” e të tërhiqej mbrapsht nga procesi i ndërmarrë. Zhgënjimi është i madh, dhe si rezultat kemi largim edhe më shumë të shqiptarëve.

Mirela Milori: Basha u largua nga parlamenti, ai atëherë deklaroi se; a) nuk mund të jemi pjesë e një parlamenti ku nuk dëgjohemi, etj. b) Nuk futem dhe nuk marr pjesë në zgjedhje se ky njeri e vjedh me Gjiknurin procesin, më tej deklaroi se; c) nuk i organizonte ai protestat dhe është një popull i tërë që do të rrëzojë Ramën. Si mendoni, mos ndoshta nuk ja del dot me forcë, dhe i duhet të ulet me patjetër me Ramën? Si i lexoni ju tentaviat e tij?

Ylli Rakipi: Nëse Basha tha se Rama kishte instaluar një regjim atëherë detyra e opozitës ishte ta rrëzonte. Që të vendosësh regjimin do të thotë të asgjësosh opozitën.

Shikoni se çfarë po bën Rama, po bën ligje për median (paketa anti-shpifje), ndan të mira materiale, besoj juve e patë përplasjen e fundit të Erion Velisë.

Si mendoni ju a e ka asgjësuar Rama opozitën? Basha duhet të jetë i sinqertë, e i ndershëm, dhe të deklarojë që një zyrtarë i lartë amerikan siç ishte Matthew Palmer, e detyroi të tërhiqej nga ky proces.

Unë e kam thënë edhe më parë, që opozita i shkon deri në fund qëndresës, bën edhe sakrifica. Nëse themi që Edi Rama nuk e ka blerë këtë opozitë atëherë e ka asgjësuar, si mund të ulesh në një tryezë, me një njeri që u kap në përgjime në dosjen 184.

Opozita që bën Lulzim Basha shkon në favor të Edi Ramës. Shqipëria ka nevojë për opozitë të fuqishme përballë një regjimi./abcnews.al

spartak-ngjela-mirela-milori.jpg
nev ila08:05 | 28/12/2019

I ftuar mbrëmjen e djeshme me gazetaren Mirela Milori, Avokati Spartak Ngjela tha se Prokurori i ri i Përgjithshëm Olsjan Çela është i aftë profesionalisht dhe se e ka nisur mbarë punën.

Sipas Ngjelës, Kryeprokurori në lidhje me ngjarjet e pas tërmetit, e ka kuptuar, dhe e ka të qartë, çfarë është bërë në këto zona. Gjithashtu Ngjela foli edhe në lidhje me diskutimin, dhe kundërshtimet e ndryshme ditët e fundit, për kreun e sapozgjedhur të SPAK Arben Kraja.

Sipas Ngjelës, Kraja nuk është i implikuar, dhe nuk ka lidhje me sigurimin e kohës së komunizmit. Ngjela theksoi se dokumentet që kanë dalë për Arben Krajën, nuk e fajësojnë Krajën, dhe se kreu i SPAK ka kaluar vettingun nga i cili ka rezultuar si i përshtatshëm.

Pjesë nga biseda në studio:

Mirela Milori: Prokurori i ri i Përgjithshëm e ka nisur hetimin dhe ka filluar me Durrësin, besoni se do arrihet kjo?

Spartak Ngjela: Po besoj, ka një rregull në karrierën e prokurorëve. Të gjithë prokurorët në perëndim, në vendet demokratike që janë përplasur me mafian kanë bërë karrierë politike. Kjo është ambicia e prokurorëve në perëndim, nuk është paraja. Prokurori i ri i Përgjithshëm është i aftë profesionalisht dhe kam përshtypjen që e ka të qartë çfarë është bërë dhe e kupton. Kam përshtypjen se kërkon të bëj karrierë, në kuptimin e mirë të fjalën duke i shërbyer shoqërisë së vet. Është i aftë dhe e ka filluar punën mbarë. Hapin e parë e ka nisur mbarë dhe profesionalisht është i aftë.

Mirela Milori: Ndërkohë është ngritur SPAK por me një drejtues të kontestuar. Ka qenë Z. Agron Tufa që ka nxjerrë një letër që e implikon Arben Krajën si hetues para viteve 90’, keni një opinion?

Spartak Ngjela: Nga ato që pashë nuk kanë të drejtë ta akuzojnë për diçka të tillë. Është hetues në vitin 1990, s’ka lidhje me sigurimin. Në 1989 ose 90’ është ndarë hetuesia e krimeve ordinere nga politika. Nuk kishte lidhje fare dhe me atë që thonë se paska dënuar 2 njerëz për shkelje kufiri pa leje, ajo është vepër penale edhe sot. Është në Itali, në Greqi, pra nga këto që kanë publikuar s’ka gjë që e implikon. Pastaj këta janë testuar nga ONM, ka kaluar vettingun.

Mirela Milori: Si e shihni ngritje e SPAK, e mendoni sinjal pozitiv të vendosjes së politikanëve përpara drejtësisë apo keni dyshime për këtë?

Spartak Ngjela: Akuza nuk do të thotë gjykim. Nuk e dimë çfarë do bëjnë prokurorët e SPAK dhe se si do strukturohen. Pozitive është që amerikanët kanë thënë se do dërgojnë 35 hetues, ajo që kuptoj unë është se do të kemi një lloj ONM-je, një suport ndërkombëtar profesional dhe mendoj se nuk do të ketë shkelje në hetim. Dua të them që korrupsioni këtu është i madh, dhe mos mendoni se hetimi dhe gjykimi i korrupsionit është i lehtë./abcnews.al

spartak-ngjela-mirela-1.jpg
nev ila21:12 | 27/12/2019

I ftuar mbrëmjen e sotme në ABC News me gazetaren Mirela Milori ishte avokati i njohur Spartak Ngjela.

Si ekspert i jurisprudencës Ngjela vuri theksin në disa çështje me rëndësi.

Sipas avokatit ajo që ka ndodhur në tërmetin e 26 nëntorit  i cili pasoi dëme të shumta të banesave dhe 51 viktima, është vrasje me dashje.

Cilësimi juridik i veprës penale nga ana e Prokurorisë, sipas Ngjelës është i saktë, dhe se hetimi duhet të tregoje se si ka ndodhur, dhe pse kanë ardhur pasoja të tilla nga ky tërmet.

Më tej avokati tha se ndërkohë Prokuroria, duhet të kishte ngritur akuzën edhe ndaj Kryeministrit dhe Qeverisë. Kjo akuzë, duhej ngritur për shkak se mungon fondi i emergjencës, për të cilën Kryeministri nuk ka deklaruar asnjëherë nëse ka një të tillë, dhe sa është ky fond.

Ky fond emergjence nuk preket dhe është një kriter strikt ligjor theksoi avokati.

Pjesë nga biseda në studio:

Spartak Ngjela: Problemi ishte që akuza penale ka qenë e sakte por hetimi duhet të vazhdojë dhe të tregojë si ka ndodhur. Nëse unë të akuzoj për vrasje do të thotë që faji është bërë me dashje. Qeveria Rama nuk kishte emergjence, nuk kishte fonde emergjence, është kërkesë kushtetuese. Është kërkesë e rreptë ligjore, por nuk ka akuzë, nuk ka prokurori. Në çdo vend të botës tani do të ishte nën akuzë.  Kryeministri dhe qeveria duhet të ishte nën akuzë tani për mungesën e fondeve të emergjencës dhe kjo është një kriter strikt ligjor. Pse nuk tregon sa e ka fondin e emergjencës? Një herë që isha duke e dëgjuar kryeministrin, ai iu drejtua përfaqësuesve të shoqërisë civile duke i thënë sillini këtu tek unë fondet. Dmth donte të merrte paratë e tyre dhe të tregonte se po i bënte ai vetë të gjitha sepse me sa duket s’ka fonde për emergjencat.

Mirela Milori: Ju mendoni se prokuroria duhet të kishte ngritur hetimet për kryeministrin dhe qeverinë sepse ka mungesë emergjencash?

Spartak Ngjela: Nuk e di, ai deri tani ka treguar se s’ka fond për emergjencën dhe sa e ka. Mbase e ka dhe e mban sekret por është i detyruar ta tregojë. Fakti që nuk e tregon unë mendoj se nuk ka, dhe nëse nuk ka kjo është vepër penale.

Mirela Milori: Si po menaxhon Rama si Kryeministër?

Spartak Ngjela: Rama nuk ka aftësi për ta menaxhuar, nuk është profesionit, çfarë do menaxhojë…faji është i shqiptarëve që nxjerrin kryeministra jo profesionit. Nuk e menaxhon dot, ka pamundësi absolute. Pse? Sepse ai nuk di ku mbaron ligji dhe ku fillon forca, nuk është në gjendje të konceptojë saktë se çfarë duhet tu thotë njerëzve, dhe çfarë duhet të kërkojë nga shoqëria, dhe pastaj është shumë i dobët në bisedime me të huajt, për ndihmat e huaja sepse prezumohet si qeveri e korruptuar. Do thoni ju ku e keni provën? E kam provën sepse BE solli 15 milion euro si ndihmë dhe tha se do i menaxhojë vetë, nuk ia la qeverisë në dorë sepse Shqipërinë e konsiderojnë një vend të korruptuar. Ecën si prifti me kusi, ai s’ka zyrë, gjithë kjo gjendje e rëndë ai s’ka zyrë. Ai shkon nga një ngjarje në një ngjarje, nga një varrim në një tjetër, merr edhe fëmijët me vete, janë nonsense që nuk lidhen me menaxhimin. Këto veprime fshehin diçka, ose shqetësimin e tij, ose fshehin shqetësimin se s’ka para të përballojë dëmet./abcnews.al

artan-hoxha-abc.jpg
nev ila22:26 | 10/12/2019

I ftuar në “Mbrëmje në Abc” me Mirela Milorin, gazetari investigativ Artan Hoxha u ndal edhe te një moment tjetër. Hoxha tha se nga ato që kemi parë nga puna e prokurorisë, kjo e fundit është akuzuar shpesh se është bërë palë me krimin.

Sipas Hoxhës, këtë gjë e ka theksuar edhe kryeministri Rama në datën 25 nëntor, ku njoftoi se me projektligjin e ashtuquajtur anti-KÇK “Kap çfarë të Kapim”, qeveria parashikonte ndryshime thelbësore sa i përket kontrollit dhe përgjimit të personave të dyshuar, si të përfshirë në akte kriminale apo terrorizëm.

Në shpjegimin e tij kryeministri, (në 25 nëntor) u ndal edhe në një rast konkret, ku gjykata bëri të mundur lirimin e një të akuzuari për krime të rënda. Sipas gazetarit  Artan Hoxha,  prokuroria po hesht për vrasësin e penduar që kishte treguar edhe format se si funksiononte krimi i organizuar në rastin që foli kryeministri.

“Ndodhemi përpara faktit që ne e kemi akuzuar prokurorinë duke parë çfarë ka bërë prokuroria. Pamë se si një prokuror përpara se të ndodhte tërmeti, sepse tërmeti na ka shfokusuar nga çdo ngjarje tjetër, pra një prokurori iu bë atentat, dhe u plagos bashkë me një eksponent të botës së krimit, dhe nuk e dimë çfarë është bërë me atë çështje. Një ditë përpara tërmetit, pra në datën 25 nëntor, Kryeministri i Shqipërisë ka dalë si një “show man” dhe ka shpjeguar ligjin e famshëm anti-KÇK, ku na tregoi se si do hartonte një ligj dhe një strukturë, e cila nuk do ta linte krimin të gjente “vrimë ku të futej”. Po atë ditë, kryeministri i vendit ka thënë një rast konkret.

Policia e shtetit dhe prokuroria kanë patur një person të penduar në mbrojtje, kanë marrë në mbrojtje dhe të gjithë familjen e tij.  Prokuroria dhe policia morën në mbrojtje familjen e personit, ky person është i akuzuar si vrasës me pagesë,  për vrasjen e babë e bir, Nezir dhe Gentjan Beqiri, në 15 gusht të vitit 2012, ndërsa këta të dy ndodheshin në arrest shtëpie, pra ishin në ruajtje nga policia.

Bëhet fjalë për konfliktin e famshëm në Elbasan, që nisi që nga viti 2005, pas ekzekutimit të Sokol Çapjas. Pastaj ishin të gjitha rastet, ku pjesëtarë të fisit Çapja po merrnin hak për atë që kishte ndodhur.

Por ku shkoi ajo histori?

Kryeministri tha:

Personi i cili, drejtonte apo ishte një nga njerëzit kryesor të strukturës që fajësohej për këtë ngjarje, shkoi me pranga dhe doli me duar në xhepa sepse pikërisht gjykatësi e liroi. Kjo ngjarje ndodhi 5 ditë përpara se të fliste kryeministri. Kryeministri e bëri të qartë kush ishte ky person.

Ky person, i cili është i arrestuar, Ervis Bardhi është në ruajtje, nën masa të rrepta sigurie, brenda institucioneve të burgjeve.

(ndërkohë i penduari që ndodhej në burg, që ishte kontaktuar nga prokuroria, përveç se ishte ekzekutor direkt në ngjarje, kishte treguar gjithë skemën, kishte treguar se kush ishin porositësit, si ishte bërë pagesa, pra kishte treguar edhe format se si funksiononte krimi i organizuar. Ky person ishte kapur disa muaj më vonë duke transportuar kanabisin e siguruar nga pagesa për punën e kryer)”, tha gazetari Hoxha./abcnews.al

bylykbashi-1280x863.png
nev ila23:22 | 25/11/2019

I ftuar në studion e Mirela Milorit, Ish-deputeti i PD dhe juristi Oerd Bylykbashi, tha se ligji që kërkon Edi Rama  të aplikojë, është një nga iniciativat më të rrezikshme që një qeveri ka ndërmarrë.

Sipas Bylykbashit krijimi i një ligji të tillë synon të kontrollojë organet e drejtësisë gjithashtu normat e tij bien ndesh me një sërë ligjesh por sidomos me ligjin anti-mafia.

Pjesë nga biseda në studio:

Mirela Milori: Abc News ka siguruar draftin për parandalimin, ndjekjen dhe marrjen e masave ndaj krimit të organizuar, terrorizmit dhe Krimeve të rënda. Si ju duket në pamje të parë një paketë e tillë?

Oerd Bylykbashi: Ata që kanë dy parë mend dhe janë profesionistë janë skandalizuar të gjithë. Është një nga iniciativat më të rrezikshme që mund të propozohet nga një qeveri. Në gjithë këtë katrahurë është një përsëritje e tentativës së Edi Ramës me Saimir Tahirin në krye, që më pas ju e dinin pse iku nga ministër dhe për çfarë u dënua. Saimir Tahiri nën hyqmin e Edi Ramës në vitin 2014 donte të fuste në ligjin e Policisë së shtetit Byronë Kombëtare të Hetimit. Të njëjtën gje po tentojnë të bëjnë edhe me këtë ligj. Kjo paketë shkel të drejtat e njeriut dhe publikon disa ligje të tjera. Një analizë shteruese më e plotë do ta kemi në ditët në vijim. Ne e kemi ligjin anti-mafia që pak a shumë vepron si ky ligj që kërkon të bëjë Edi Rama por me ndryshimin që ligji anti-mafia është në përputhje me Kushtetutën. Lufta kundër terrorizmit duhet të jetë pa ekuivok dhe i ashpër dhe ligji anti-mafia këtë e lejon. Për çfarë duhet një ligj tjetër i cili jo vetëm publikon çfarë kemi deri më sot por i nxjerr edhe nga loja. Shteti ka Kodin Penal, shtetasi ka Kodin e Procedurës Penale, me këtë ligj Kodi Procedurës Penale nuk ekziston më dhe kjo cenon shqiptarët.

Mirela Milori: Duke qenë se krimi ka ngritur kryet, ndoshta një ligj i tillë do të parandalojë krimin, si mendoni?

Oerd Bylykbashi: Kushtetuta nuk është VKM, aty thuhet mun dt kufizosh por deri në një farë kufiri. Pse erdhi kjo situatë kur në krye ishte Edi Rama? Edi Rama i dha mundësinë krimit të fuqizohet. I pari që duhet të jetë subjekt i ligjit anti-mafia duhet të jetë Edi Rama./abcnews.al

 

mirela-me-bylykbashin-1280x606.jpg
nev ila20:28 | 25/11/2019

I ftuar në studio me gazetaren Mirela Milori mbrëmjen e sotme ish-deputeti demokrat dhe juristi, Oerd Bylykbashi sqaroi se ka një pengesë që vështirëson zhvillimin e një referendumi ashtu si e kërkon Presidenti i Republikës.

Sipas Bylykbashit, Kodi Zgjedhor i vitit 2000, u hartua me qëllimin për ti hequr popullit të drejtën e referendumit, dhe se megjithë vullnetin e Partisë Demokratike për ta ndryshuar në 2008, PS refuzoi ndryshimin e Kodit Zgjedhor.

Gjithashtu Bylykbashi tha se nga ana procedurale është gati e pamundur zhvillimi i një referendumi për shkak të kohës së shkurtër.

“Për të zhvilluar referendumin kanë të drejtën ta kërkojnë 50 mijë shtetasve drejtuar presidentit të republikës, Qeveria ose Parlamenti, por gjithmonë është kompetencë e Presidentit të dekretojë datën për referendum.

Për fat të keq në vitin 2000’ mazhoranca socialiste miratoi me 3/5 e votave Kodin Zgjedhor i cili u hartua për të vrarë referendumin.

Ne nuk kemi ligj të veçantë për referendumin.  Ne e kemi të përfshirë në Kodin Zgjedhor. Kodi Zgjdhor i asaj kohe në mënyrë të veçantë rregullonte dhe referendumet. Këto dispozita u ripërsëritën pa ndryshuar asgjë. Në vitin 2008 kodi i 2003 u shfuqizua i tëri.

Partia socialiste në opozitë refuzoi që të rishikoheshin dispozitat për referendumet si një faktor bllokues i të drejtës së referendumit me arsyetimin se nuk kishim kohë etj etj..gjithsesi u la që të mbeteshin në kodin e shfuqizuar të vitit 2003, në mënyrë shumë anomalike, ka një nen në kodin e 2008-ës që mban në fuqi vetëm dispozitat e referendumit të Kodit të 2003-it.

Po çfarë ndodh?

Kushtetuta ja jep, ligji ja merr. Së pari një kërkesë për referendum duhet të paraqitet në periudhën nga 1 Janar deri në 30 nëntor të një viti të caktuar. Pa asnjë shpjegim, po ky ligj thotë se: Nëse procedura për referendumin nuk i ka kaluar të gjithë procedurat brenda datës 15 mars, referendumi shtyhet për vitin pasardhës. Ndaj dhe Edi Rama do ti shfrytëzojë të gjitha këto për tu hequr shqiptarëve të drejtën e referendumit.

Pra është një ligj i ndërtuar për ti vrarë shqiptarëve të drejtën e referendumit. Nga ana procedurale nuk mund të mbahet referendumi. Kodi i vdekur zgjedhor i vitit 2003 mbahet me një fije nga kodi i 2008-ës“, tha Bylykbashi./abcnews.al

 

 

auto_klejvis-celaj1574497480.jpeg
nev ila11:30 | 23/11/2019

Klevis Çela është i riu nga qyteti i Vlorës, i cili rreth një javë më parë u shpall kampion boksi i Shqipërisë, në kategorinë 52 kilogramë. Ai tregoi në media se sa të vështirë e kishte mbijetesën dhe se çdo ditë hante vetëm një mollë e një kokërr vezë për të mbajtur veten në këmbë.

Por si të mos mjaftonte kjo, Çela ka treguar se shpërblimi që ka marrë pasi u shpall kampion ishte qesharak. Dhe ka të drejtë. Ai mori vetëm 140 mijë lekë të vjetra.

Por më në fund ka ardhur një lajm i mirë edhe për të. Në emisionin “Historia ime”, drejtori i Departamentit të Sportit në Vlorë, Viron Toska u shpreh se bashkia e Vlorës ka marrë të gjitha masat, që në të ardhmen Klevisi të jetë pjesë e Flamurtarit.

Toska u shpreh:

“Deri tani ka qenë pjesë e Vllaznisë së Shkodrës. Duke u futur në buxhetin e ri do të jetë pjesë e Flamurtarit dhe do të marrë një pagë maksimale si të gjithë kampionët që janë në klub”.

I pyetur nga Mirela Milori sesa do të marrë saktësisht, ai u përgjigj 62 mijë e 500.

Pa i fshehur emocionet, Klevisi u shpreh se paratë e para që do të marrë, do t’i përdorë për të rregulluar shtëpinë e tij.

sali-berisha.jpg
ger ta18:09 | 14/11/2019

Ish-kryeministri Sali Berisha do të jetë këtë mbrëmje në studion e Abc News. Në orën 20.00, ish kryeministri do të jetë në studio me Mirela Milorin.

Fokus i bisedës do jetë aktualiteti politik, ku vëmendja e ditëve të fundit është ngërçi i krijuar me ngritjen e Gjykatës Kushtetuese, ku Presidenti është përplasur edhe njëherë me mazhorancën.

Për më shumë ndiqni intervistën me Mirela Milorin në ekranin e Abcnews.


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono