ministria

anila-denaj.jpg
G. P.16:16 | 11/07/2019

Pas deklaratës së kryetarit të Partisë Demokratike Lulzim Basha se taksa e karburantit do të rritet 200 lekë për litër, ka reaguar ministrja e financave Anila Denaj.

“Një tjetër produkt i një fantazie gjithnjë e më shumë për të ardhur keq! S’ka rritje taksash, s’ka taksa të reja!”, shkruan ministrja Denaj në Twitter sipas të cilës sajesa të tilla i bëjnë vetëm ata që kanë humbur debatin./ABC News Albania 24/7

zaev-2.jpg
G. P.15:35 | 24/06/2019

Pas paralajmërimeve të shumta, në fundjavë u konfirmuan ndryshimet në qeverinë e Maqedonisë së Veriut, me propozimet që u dorëzuan në parlamentin e vendit. Por cilët janë ministrat e rinj në një kohë që kryeministri Zaev është vetëpropozuar për postin e ministrit të Financave.

Kryeministri Zaev veten e ka propozuar Ministër të Financave, kurse ministri i deritashëm Dragan Tevdovski do të jetë këshilltar i tij. Në biografinë e Kryeministrit, krahas karrierës profesionale, shkruan se është rritur në një familje modeste, tradicionale dhe se që nga rinia e hershme është kycur në biznesin familjar të bujqësisë.

Për Goran Milevskin, liderin e Partisë Liberal-Demokrate, i cili do të jetë ministër i Pushtetit Lokal, shkruhet se para se të bëhet deputet, ka qenë profesor i lëndëve ekonomike në një shkollë të mesme të Manastirit, kurse lidhur me njohuritë përmenden MS Office dhe Internet, kurse flet edhe anglishten.

Hysni Ismaili, është propozimi i alternativës për Ministër të Kulturës. Ai me profesion është Doktor i Shkencave Mjekësore, kurse para se të bëhet docent në Universitetin e Tetovës, ka qenë profesor në shkollën e mesme të mjekësisë në Tetovë.

Krahas gjuhës shqipe, flet edhe gjuhët maqedonase, turke, angleze, e boshnjake. Lidhur me aktivitetet e kulturës, në biografi shkruhet se ka qenë redaktor i librit, organizator i panairit të parë të librit të botuesve privat shqiptar, redaktor i radio-dramave dhe të 90 radio-emisioneve nga fusha e kulturës, redaktor dhe udhëheqës i 80 programeve dokumentare televizive na gjuhën shqipe dhe njëri prej themeluesve të shtëpisë botuese “Logos A”. Në biografinë e tij përmenden edhe një numër i madh i punimeve shkencore nga fusha e mjekësisë.

Ministër i ri i Ambientit Jetësor do të jetë Naser Nuredini, i cili është shkolluar për Biznes Ndërkombëtar në Austri, Gjermani dhe Britaninë e Madhe. Në grafën për gjuhët, thuhet se flet shqipen, anglishten, gjermanishten dhe italishten, kurse flet edhe gjuhën maqedone dhe serbo-kroate.

Sadulla Duraku do ta udhëheq Ministrinë për sistem politik. Përveç funksioneve politike, në përvojën e punës përmenden edhe punësimet në dy shkolla të mesme në Kumanovë.

Në Ministrinë e Bujqësisë duhet të emërohet Trajan Dimkovski, i cili deri më tani ka qenë shef i kabinetit të paraardhësit të tij Lupço Nikolovski. Përveç punës në Ministri, ka përvojë edhe në Këshillat drejtuese dhe shoqata nga fusha e bujqësisë./ABC News Albania 24/7

MBULIM-SHOQATA-E-TRANSPORTIT.mpg_snapshot_00.06-1280x720.jpg
ent ela14:02 | 05/04/2019

Shoqata Kombëtare e Transportit Ndërqytetas i kërkon Ministrisë së Infrastrukturës që të shfuqizojë nenin që ka të bëjë me hipjen dhe zbritjen pa ndalesa të pasagjerëve.

Në një kërkesë dërguar këtë të enjte, Shoqata e Kombëtare e Transportit Ndërqytetas kërkon edhe anulimin e të gjitha masave administrative, deri në zgjidhjen e përbashkët të konfliktit mes Shoqatës së Transportit dhe Ministrisë.

Kjo shoqatë bën me dije se, nëse Ministria e Infrastrukturës dhe Energjisë i kalon në heshtje kërkesat e tyre deri më 15 Prill, do të pezullohet shërbimi i transportit të udhëtarëve në të gjithë vendin.

/abcnews.al

sander-lleshaj-1-1280x645.jpg
ent ela12:27 | 02/04/2019

Ditën e sotme në një aktivitet të mbajtur nga Ministria e Brendshme së bashku me përfaqësues të ambasadës amerikane, është prezantuar projekti më i ri i mundësuar kryesisht nga shteti amerikan.

Lleshaj ka theksuar se ky sistem do të jetë ndihmë dhe zgjidhje përfundimtare për konfliktet mes prokurorisë dhe policisë. Sipas Lleshajt, sistemi mundëson më shumë lehtësi dhe evidencë të plotë për cështjet, kështu policia dhe prokuroria nuk do të munden më, ti lënë dështimin njëra tjetrës.

“Janë investuar miliona dollarë për këtë projekt te madh, me këtë sistem standardizojmë procesin e punës. Çështjet do të menaxhohen në mënyrë rigoroze, çdo çështje që do të nis do jetë e pasqyruar më e plotë. Sistemi do të mundësojë krijimin e një tabloje të plotë. Sistemi do të mundësojë dhe ndihmojë analizën e punës, do të krijojë kujtesë, arkiv.

Ky sistem do të mundësojë riorientimin e punës së policisë, do të krijojë bashkëpunim të ri mes policisë dhe prokurorisë e do të garantojë bashkëpunimin mes të dyjave. Jo rrallë ndodh që Policia ka pamje tjetër, Prokuroria tjetër, të cilat jo domosdoshmërisht janë të njëjta. Sistemi tashmë e mundëson që të jenë shumë të vështira alibitë institucionale, sepse tentojnë t’ia bëjnë njëra-tjetrës me gisht.

Jam optimist se hapat e mëtejshëm midis policisë dhe Prokurorisë do kenë protokolle të qarta për menaxhimin e përbashkët të këtij sistemi për të arritur atë objektiv të përgjithshëm që të gjithë qytetarët presin më shumë rend, siguri. Nuk do të ketë më “dështimi është i yti apo i imi”. Nuk është destinacion përfundimtar, por një hap më tej modernizimit të policisë”, tha Lleshaj./abcnews.al

1553525154_NitinSandesara.jpg
ent ela16:15 | 25/03/2019

Ministria për Evropën dhe Punët e Jashtme ka ndërprerë mandatin e Konsullit të Nderit të Shqipërisë në Nigeri, i shpallur në kërkim ndërkombëtar për mashtrim. Nëpërmjet një njoftimi për shtyp Ministria e Jashtme sqaron se dhënia e nënshtetësisë shqiptare dhe pajisja me pasaportë shqiptare e shtetasit Sandesara nuk është procedurë që ka kaluar nëpërmjet kësaj ministrie, apo është në kompetencat e këtij institucioni. Ministria për Evropën dhe Punët e Jashtme, informon se, ka të gjitha të drejtat ligjore për ndërprerjen e mandatit të Konsullit të Nderit.
Reagimi i plotë i Ministrisë për Evropën dhe Punët e Jashtme

Ministria për Evropën dhe Punët e Jashtme informon sa më poshtë lidhur me rastin e Konsullit të Nderit të Shqipërisë në Nigeri, Nitin Sandesara:

Procedura e emërimit të z.Nitin Sandesara si Konsull Nderi i Republikës së Shqipërisë në Nigeri ka përfunduar në janar 2019. Në zbatimin e procedurës së emërimit janë marrë në konsideratë kriteret dhe kushtet e përcaktuara në Konventën e Vjenës për Marrëdhëniet Konsullore.

Dhënia e nënshtetësisë shqiptare dhe pajisja me pasaportë shqiptare e z. Sandesara nuk është procedurë, e cila ka kaluar nëpërmjet Ministrisë për Evropën dhe Punët e Jashtme, apo është në kompetencat e këtij institucioni.

Për më shumë, Ministria për Evropën dhe Punët e Jashtme, sqaron se, ndonëse ka të drejtën e pajisjes me pasaporta diplomatike dhe shërbimi, sipas VKM-së 335, dt. 2.9.1997, z. Sandesara nuk është pajisur, as me pasaportë diplomatike, as me pasaportë shërbimi.

Rasti i artikuluar së fundmi i z. Sandesara me nënshtetësi shqiptare, mund të cënojë imazhin dhe reputacionin e Institucionit të Konsullit të Nderit, por edhe atë të Ministrisë për Evropën dhe Punët e Jashtme dhe shtetit shqiptar në përgjithësi, pavarësisht faktit se veprimet e ndërmarra prej z. Sandesara janë në emrin e tij personal.

Ministria për Evropën dhe Punët e Jashtme, informon se, ka të gjitha të drejtat ligjore për ndërprerjen e mandatit të Konsullit të Nderit.

Ministria për Evropën dhe Punët e Jashtme ka ndërprerë mandatin si Konsull Nderi të Republikës së Shqipërisë në Nigeri për z.Nitin Sandesara me efekt të menjëhershëm./abcnews.al

belinda-balluku.jpg
G. P.17:10 | 22/03/2019

Gjithçka u kanë premtuar naftëtarëve do të realizohet shumë shpejt. Është ky premtimi i Ministres së Infrastrukturës dhe Energjisë, Belinda Balluku, gjatë takimit që zhvilloi në Fier me naftëtarë, ish-naftëtarë dhe përfaqësues të sindikatave të tyre.

Të mos shqetësohen naftëtarët se qeveria ia ka bërë gati projektligjin vetëm durim u kërkon ministrja e infrastrukturës dhe Energjisë, Belinda Balluku.

“Qeveria Rama e ka fokusin tek naftëtarët. Mos harroni që është bërë një projektligj, i cili ka dashur kohë dhe mund. Zbardhja e akteve nënligjore kërkon kohën e saj, rishikimi dhe reformimi i akteve ligjore kërkojnë gjithashtu kohën e tyre. Por ju duhet të vlerësoni vëmendjen e qeverisë që është totalisht tek ju dhe unë ju premtoj që gjithçka thamë sot ne do ta realizojmë shumë shpejt”.

Naftëtarët kanë ngritur shqetësimet e tyre që lidheshin kryesisht me shfuqizimin e ligjit 526, si pengesë për marrjen e vërtetimit nga sigurimet shoqërore, apo nisjen e kompensimit financiar.

Ndërsa përfaqësuesit e sindikatave kanë kërkuar rishikimin e lidhjes së Kontratës Kolektive të punonjësve të Rafinerisë së Ballshit, ngritjen e repartit për sëmundjet e rënda në spitalin rajonal të Fierit dhe ristrukturim të repartit zjarrfikës.

Për të gjitha këto, ministrja Balluku i ka siguruar se shqetësimet e tyre do të shqyrtohen me vëmendje të veçantë, për të gjetur zgjidhjen më të mirë në interes të naftëtarëve./abcnews.al

51939241_334069837210307_2167408675596009472_n-1280x853.jpg
ent ela13:31 | 10/02/2019

Bashkia e Tiranës dhe Ministria e Turizmit dhe Mjedisit organizuan Dajti n’Fest. Një ndër 210 festat lokale, të cilat sipas ministrit Blendi Klosi do të promovojnë traditën këtë vit. Në këtë aspekt Veliaj u shpreh për shtim të investimeve me qëllim rritjen e numrit të turistëve.

Dajti n’Fest është rikthyer edhe këtë vit me surpriza e aktivitete që promovojnë vlerat, traditat e produktet e zonës. Festës iu bashkuan dhe ministri i Turizmit dhe Mjedisit, Blendi Klosi dhe kryetari i Bashkisë së Tiranës, Erion Veliaj.

“Duam që me të gjitha bashkitë, me të gjithë ata që kanë mundësi të mbështesin organizime të tilla pranë pikave turistike, si kjo e Dajtit, pranë zonave të mbrojtura, pranë pikave që prodhojnë turizëm, pranë agroturizmit, pranë 100 fshatrave, të organizojmë festa si kjo, ku të kemi kombinim midis bukurisë së natyrës, ofrimit të shumë alternativave për t’u argëtuar si gjithë këta djem e vajza që shoqërojnë këtë festë, por në radhë të parë për të afruar ekonominë për prodhuesit vendas“.

Kjo festë sipas kryebashkiakut të Tiranes Erion Veliaj është një mundësi e mirë për të nxitur zhvillimin e turizmit malor dhe për të forcuar ekonominë vendase.

Për ta bërë zonën sa më tërheqëse Veliaj bëri të ditur se bashkia në bashkëpunim edhe me biznesin do të shtojnë investimet.

“Do të vazhdojmë investimet në Dajt: filluam me një park të aventurave, si Dajti Ekspres, dhe jam shumë i lumtur t’ju informoj se shumë shpejt edhe ish-kampi, por edhe gjithë kjo fusha, do të kthehen në terrene sportive që mund të përdoren jo vetëm nga ata të sporteve ekstreme, si aeronautika, që tani ka platformën e vet, por edhe nga ata që duan të merren me futboll, volejboll, me cross-country ski. Besoj se edhe për të huajt që do të vizitojnë Tiranën, ky është një lajm fantastik”.

Me qëllim promovimin e traditës pushteti vendor në bashkëpunim me atë qendror kanë planifikuar organizimin e 210 festave lokale në të gjithë vendin.  /abcnews.al

 

 

erion-veliaj-1280x853.jpg
G. P.14:38 | 01/02/2019

Kryetari i Bashkisë së Tiranës, Erion Veliaj e vlerësoi të shkëlqyer vendimin e marrë nga qeveria për t’u dhënë kohë qytetarëve për të rinovuar kartat e identitetit deri në 31 dhjetor 2019, duke ulur në këtë mënyrë edhe fluksin nëpër sportele. Në takimin e zhvilluar dje me anëtarë të Këshillit Konsultativ “Qeveri Qendrore-Vetqeverisje vendore”, kryebashkiaku kërkoi që t’u jepet përparësi të moshuarve dhe atyre që kanë nevojë për ta përdorur më shpesh kartën.

“Lajmi nga Ministria e Brendshme ishte i shkëlqyer, pra që kartat e identitetit do të vlejnë deri në fund të vitit 2019. T’u thuhet qytetarëve nuk ka asnjë nevojë të shtyhemi nëpër rradhë, sikur nesër do jetë qameti, përsa kohë që karta, pavarësisht kur e ka datën e skadimit, do vlejë deri në datën 31 dhjetor. Do të thotë t’u japim prioritet atyre që janë të moshuar”, theksoi Veliaj.

Teksa vlerësoi bashkëpunimin me  pushtetin qendror, Veliaj theksoi rëndësinë e kalimit të disa kompetencave që kanë të bëjnë me kontrollin e terrritorit nga qeveria tek pushteti vendor. “Kryetarët e bashkive ende nuk kanë disa kompetenca të qeverisë qendrore që, për mendimin tim janë rudimentare, për të adresuar një lokal që bën zhurmë; një bukëpjekës që bën tym; ose një gomisteri që e derdh në rrugë vajin që u ndërron makinave; ne duhet patjetër të lidhemi me ministrinë e linjës për një leje mjedisore që e ka dhënë një inspektor i X partie, i X kohe. Por që ka disa karakteristika që një inspektor e dallon nga një kryetar bashkie”, tha ai.

Kreu i Bashkisë e cilësoi pozitive reformën administrative, e cila krijoi mundësi për shpërndarjen e investimeve edhe në zonat rurale, që me ndarjen e vjetër do e kishin të pamundur financiarisht të përmirësonin kushtet e jetesës për komunitetin.

“Ne për eksperiencën tonë në Tiranë, filluam me 24 njësi vendore, me 24 kryetarë njësish, me 24 sekretarë, me 24 Këshilla të Njësive Administrative. Kur mendoj se sot kemi mundësi të ndërhyjmë në njësi, që me kushtet e tyre modeste në nivel taksimi, në nivel fuqie punëtore apo realizimi investimesh, do t’i kishin të pamundura, besoj që si socialist dhe progresist, kjo reformë është një histori suksesi”, tha ai, ndërsa e krahasoi gjendjen e mëparshme të njësive vendore me situatën që janë sot universitetet.

Me fokus në zgjedhjet e ardhshme, Veliaj kërkoi prej drejtuesve të njësive të tjera vendore që të respektojnë Kodin Zgjedhor, duke kufizuar përdorimin dhe afishimin e materialeve propagandistike zgjedhore që sjellin ndotje të ambienteve publike. “Ju e dini që jemi në situatë, ku me kodin e ri zgjdhor ka rënë volumi i ndotjes akustike, vizive, estetike në qytet dhe inkurajimi gjithmonë ka qenë, sidomos për kryetarët e bashkive është një dramë fushata, se shpërthejnë posterat, ndotja dhe grafiti, vandalizmi që ndodh prej pasionit militant, fatmirësisht për kodin e ri, edhe fushata është me e shkurtër, por edhe këto billbordet janë hequr. Në këtë sens të inkurajojmë të gjithë një fushatë më civile, më modeste, më me këmbë në tokë, edhe pa kallangjosje që i ndodh tipikisht qyteteve, ku gjithë Shqipëria bëhet për një pastrim masiv pas fushate”, tha ai.

Një tjetër kërkesë ishte edhe fillimi i punës për përgatitjen e infrastrukturës zgjedhore dhe evidentimin e ambienteve që mund të përdoren si qendra votimi. “Duke qenë se është një vit i rëndësishëm, dua që t’i bëj një thirrje të gjithë kryetarëve të bashkive, për përgatitjen e infrastrukturës zgjedhore, nuk ka asnjë arsye pse dikush që është sot kryetar bashkie, mos të identifikojë që tani qendrat e votimit dhe të mos kemi histori që përsëriten vit pas viti, ku qytetarët shkojnë dhe votojnë nëpër lokale. Sot vetëm numri i shkollave, kopshteve, çerdheve, bibliotekave që janë rregulluar falë kontributit të kësaj mazhorance, e bën të pafalshme që një kryetar bashkie të thotë që nuk gjeta vend tjetër, por shkoni te lokali i çunit të dajës. Kjo është pa sens”, deklaroi Veliaj./abcnews.al

marku.jpg
G. P.11:28 | 01/02/2019

Një grup pedagogësh nga Universiteti i Tiranës zhvilluan një takim me ministren e Arsimit Sportit dhe Rinisë, Besa Shahini këtë të premte. Takimi mes një përfaqësie të asamblesë së pedagogëve dhe drejtuesve të ministrisë së Arsimit nisi rreth orës 09:00 të paradites.

Pas takimit, pedagogu Mark Marku, njëkohësisht Përgjegjësi i Departamentit të Gazetarisë në Universitetin e Tiranës, theksoi se diskutimi ishte jo rezultativ.

Diskutuam për gjendjen në universitet dhe u qëndruam kërkesave që kemi bërë. Praktikisht nuk pati një qëndrim konkret nga ana e Ministres së Arsimit, nuk u shpreh të paktën gjatë takimit për asnjërën nga kërkesat. Në terma të përgjithshëm tentoi ta çojë diskutimin drejt një diskutimi jo rezultativ. Kështu që ne e konsiderojmë këtë si një mospërgjigje ndaj kërkesave, presim deri në darkë në ajo do ketë një përgjigje konkrete dhe pastaj do të mbledhim takimin e asambleve, asamblenë dhe do të marrim një qëndrim për këtë mosreagim të ministres ndaj kërkesave tona”, tha pedagogu Mark Marku

Gjithashtu pedagogët i kanë vendosur një afat qeverisë që përfundon sot në orën 16:00. Nëse nuk plotësohen kërkesat e pedagogëve, ata kanë paralajmëruar grevë pa afat. Mirëpo, Marku u shpreh se nuk është vendosur akoma mes pedagogëve nëse do të organizohet një grevë e përgjithshme.

“Në qoftë se kolegët bien dakord që ne të organizojmë një grevë të përgjithshme, kjo do jetë grevë e pedagogëve. Normalisht një nga pikat është edhe mbështetja e studentëve, por studentët kanë grevën e tyre, axhendën e tyre. Natyrisht është komplimentare, por jo detyrimisht është e njëjta gjë”, tha ai.

Pedagogët pjesëmarrës në takimin e sotëm ishin Mark Marku, Rezart Prifti, Jani Marka, Marinela Sala dhe Erika Bejko. Si kërkesë kryesore ata kanë hartimin e një ligji të ri për arsimin./abcnews.al

70853Bashkimi.jpg
G. P.19:27 | 08/01/2019

Një njësi e Ministrisë iraniane të Inteligjincës si dhe dy persona nga stafi i saj janë vendosur në listën e terrorizmit nga ana e Bashkimit Europian. Teherani zyratar reagoi se ky veprim synon të dëmtojë marrëdhëniet e vendit me Brukselin.

Bashkimi Europian ka vendosur një njësi të Ministrisë iraniane të Inteligjencës dhe dy persona nga stafi i saj në listën e terrorizmit të BE-së për tentativa vrasjesh në Europë. Lajmi është konfirmuar nga Ministria e Jashtme daneze dhe diplomatët e BE-së. Ky vendim, i cili ngrin brenda bllokut asetet financiare që i përkasin kësaj njësie dhe dy personave, vjen pasi një vit më parë, Danimarka deklaroi se dyshonte që një shërbim i inteligjencës së qeverisë iraniane kishte kryer një tentativë vrasjeje në tokën daneze. Nga ana e saj, Franca këmbëngul se nuk ka dyshim që Ministria iraniane e Inteligjencës qëndronte prapa një sulmi të dështuar në Paris. Por Irani mohon çdo përfshirje në këto komplote të supozuara, duke thënë se këto akuza kanë për qëllim të dëmtojnë marrëdhëniet BE-Iran.

“BE sapo ka rënë dakord që të vendosë sanksione kundër një Shërbimi iranian të Inteligjencës për shkak të komploteve të tij për vrasje në tokën europiane. Një sinjal i fuqishëm nga BE që nuk do ta pranojmë një sjellje të tillë në Europë” shkruan në Twitter, Ministri i Jashtëm i Danimarkës, Anders Samuelsen.

Vendimi u mor pa debat në një mbledhje, e cila nuk kishte lidhje me këtë gjë, të ministrave të Europës në Bruksel dhe ngrirja e aseteve hyn në fuqi të mërkurën, sipas zyrtarëve të BE-së. Ministria e Jashtme daneze i ka identifikuar dy punonjësit si zëvendësministri dhe Drejtori i Përgjithshëm i Inteligjencës, Saeid Hashemi Moghadam dhe Assadollah Asadi, një diplomat me bazë në Vienë. Emrat e tyre do të shfaqen zyrtarisht në Revistën Zyrtare të BE-së të mërkurën. Ky veprim është një vazhdim i përpjekjeve nga Danimarka dhe Franca për të krijuar një përgjigje nga e gjithë BE-ja ndaj akuzimeve të komploteve iraniane në Francë e Danimarkë nga fundi i vitit të shkuar./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono