Mediat

edi-rama.jpg
ent ela17:02 | 15/02/2019

Kanë qenë të shumta reagimet në mediat greke pas deklaratave të kryeministrit Edi Rama në një intervistë televizive. Kreu i ekzekutivit shqiptar u shpreh se Tirana dhe Athina po diskutojnë ende për kufirin detar

Deklarata e kryeministrit Edi Rama se me Greqinë po diskutohet për kufirin detar, ka ngjallur reagime në vendin fqinj. Në fakt, mediat greke e kanë përcjellë në ligjëratë të drejtë, por paksa të cunguar  deklaratën e kryeministrit shqiptar.

Në kohën që Rama, në intervistën e tij u shpreh se “me Greqinë po diskutojmë kufirin detar”, kjo fjala e fundit është hequr nga citimet e mediave greke.

Portali i gazetës “Ta Nea” e cilëson si silurë”, deklaratën e kryeministrit shqiptar, ndërsa Kathimerini, konstaton se ajo shkakton pikëpyetje dhe e rendit Greqinë ndër vendet me të cilat Shqipëria ka probleme kufitare.

Ndaj deklaratës ka reaguar edhe partia më e madhe opozitare, Demokracia e Re. “Pretendimi i zotit Rama se po diskuton me Greqinë çështje kufijsh, përbën një problem madhor për stabilitetin dhe sigurinë në rajon”, thuhet në deklaratën e nënshkruar nga shefi i departamentit ndërkombëtar të Demokracisë së Re, deputeti Jorgos Koumoutsakos.

Partia më e madhe opozitare kërkon gjithashtu që qeveria Tsipras të përgjigjet qartë nëse po diskuton me Shqipërinë ripërcaktimin e kufijve. Dhe së dyti, çfarë qëndrimi ka Athina zyrtare ndaj mendimeve të zotit Rama për një ripërcaktim të kufijve në gjithë rajonin.

Burime nga qeveria greke, që folën në kushte anonimiteti për televizionin Klan, ishin të miriformuara. Ata thanë se Edi Rama e kishte fjalën për kufirin detar dhe negociatat që po zhvillohen prej vitesh midis të dy palëve.

Burimet shtuan se deklarata e kryeministrit shqiptar nuk përbën shqetësim, por nga ana tjetër thanë se nuk do të lejojnë që marrëdhëniet midis Greqisë e Shqipërisë të ndërlidhen me shkëmbime eventuale territoresh që mund të bëhen ndërmjet Kosovës e Serbisë.

Në korrik të vitit të kaluar, sa kryeministri grek, aq edhe komisioneri për zgjerimin Johannes Hahn, kishin shkaktuar pështjellim në Greqi, kur kishin deklaruar se Athina dhe Tirana po diskutojnë një ristrukturim të kufijve. Por pas reagimeve të fuqishme, të dy kishin sqaruar se e kishin fjalën për kufirin detar./abcnews.al

Tan2019-2-10_135858620_0_1000x0.jpg
ent ela17:03 | 10/02/2019

Presidenti i Serbisë, Aleksandar Vuçiç ka deklaruar se organizatorët e protestave të mbajtura kundër tij në Beograd ndodhen në Kosovë. “Mjafton të shohësh raportimet e mediave kosovare dhe e zbulon se kush qëndron mbrapa atyre protestave dhe kush e do rrëzimin tim”, ka deklaruar Vuçiç i cituar nga agjencia e lajmeve “Tanjug”. Presidenti serb ka akuzuar mediat shqiptare se kanë abuzuar me numrin e protestuesve dhe për të përforcuar hipotezën e tij ka nënvizuar se manifestimet ndodhin në një kohë kur Prishtina ka vendosur taksën për produktet serbe./abcnews.al

MEDIAT-THACI-1280x729.jpg
ent ela12:05 | 14/12/2018

Mediat ndërkombëtare i kanë dhënë një hapësirë të veçantë vizitës së djeshme të Presidentit të Kosovës Hashim Thaçi në kazermën Adem Jashari, ku ka inspektuar forcat e sigurisë. Ajo që ka rënë në sy ka qenë fakti se kreu i shtetit kosovar ka zgjedhur të veshë uniformë ushtarake në këtë rast, vetëm një ditë para krijimit të ushtrisë së vendit.

Agjencia e Lajmeve Spanjolle “EFE” publikoi një fotografi, ku shihet presidenti Thaçi, duke parakaluar para rreth 400 ushtarëve të FSK-së.

Edhe portali evropian “EurActiv”, ka publikuar një foto nga ky event i rëndësishëm, ndërsa media të tjera botërore kanë cituar pjesë të fjalimit të presidentit Thaçi. /abcnews.al

MBULIM-HETIMI-NE-FRANCE.mpg_snapshot_00.00-1280x720.jpg
G. P.21:03 | 09/12/2018

Shërbimet franceze të informacionit po hetojnë rolin e rrjeteve sociale të lidhura me vendet e huaja që mund të jenë përpjekur të përforcojnë mobilizimin e “Jelekëve të Verdhë”. Kjo është raportuar nga mediat franceze, që saktësojnë se hetimi po zhvillohet nga Sekretariati i Përgjithshëm i Mbrojtjes dhe Sigurisë Kombëtare. Në mënyrë të veçantë, hetohen llogaritë e krijuara rishtazi dhe aktivitetet e dyshimta të disa faqeve në rrjetet sociale që shumëfishojnë automatikisht informacionin dhe komentet. Ndërkohë, një sondazh I fundit sugjeroi një rënie në mbështetje të protestave, por që ende qëndronte në 66%./abcnews.al

MEDIAT-SERBE-VERI.mpg_snapshot_00.25-1280x720.jpg
G. P.18:09 | 28/11/2018

Sipas mediave serbe të cilat citojnë ato në Kosovë, shqiptarët po synojnë të marrin në drejtim të gjithë qytetin e Mitrovicës, i cili sipas tyre nuk duhet të jejtë më i ndarë në veriore dhe jugore.

Pas dorëheqjes së kryetarit të Mitrovicës veriore, Goran Rakiç, kryetari i Mitrovicës së Jugut Agim Bahtiri i ka dërguar një kërkesë qeverisë së Kosovës. Mediat serbe citojnë ato në Kosovë duke shkruar se Bahtiri propozon që të drejtojë një Mitrovicë të bashkuar. Në profilin e tij në Facebook, Najtiri konfirmon se i ka kërkuar qeverisë së Kosovës që të ndërmarrë veprime të menjëhershme ligjore për të anuluar ndarjen e Mitrovicës në dy bashki.

Bahtiri thekson se qyteti i Mitrovicës duhet të ketë një bashki të vetme ashtu si ka qenë gjithmonë, dhe se ai duhet të jetë kryetari i saj. Rakiç dhe tre serbë të tjerë në veri të Kosovës dhanë dorëheqjen duke deklaruar se ndërprisnin çdo komunikim me Prishtinën. Arsyeja e kësaj dorëheqjeje sipas tyre ishte rritja e taksave mbi produktet që vijnë nga Serbia me 100 për qind./abcnews.al

GRUEVSKI-ARRATIJA-MBULIM.mpg_snapshot_00.04-1280x826.jpg
G. P.20:59 | 17/11/2018

Pak ditë pasi dorëzoi kërkesë për azil në Budapest, ish-kryeministri i Maqedonisë Nikolla Gruevski është larguar nga Hungaria. Lajmin e bën të ditur agjencia bullgare “Fokus-Njuz”, që citon burime pranë partisë opozitare maqedonase VMRO-DPMNE. Sipas burimeve, destinacioni i ish-kryeministrit të dënuar me 2 vjet burg për korrupsion dhe shpërdorim detyre është Rusia ose Turqia.

Ndërkohë, mediat në Hungari shkruajnë se, Gruevski është larguar nga Budapesti që të mërkurën, me avionin e një biznesmeni të afërt me kryeministrin Viktor Orban. Pak ditë më parë, autoritetet hungareze deklaruan se për arsye sigurie kishin pranuar kërkesën e Gruevskit për azil dhe se do ta shqyrtonin atë në aspektin juridik, në përputhje me ligjet ndërkombëtare./abcnews.al

MEDIAT-GREKE-KACIFAS-1280x720.jpg
G. P.22:43 | 08/11/2018

Mediat greke dhe agjencitë e lajmeve online shkruajnë se kanë qenë me mijëra ata që përcollën për në banesën e fundit Kostandin Kaçifas. Në ceremoninë e varrimit nuk kanë munguar flamujt grekë si dhe këndimi i himnit në sheshin e fshatit.

Ta Nea, agjencia greke e lajmeve në titullin e saj kryesor zgjedh të shkruajë: Lamtumirë nga mijëra flamuj grekë. Në këtë mënyrë mediat greke kanë pasqyruar ceremoninë e varrimit të minoritarit grek Kostandin Kacifas në Bularat. Sipas Ta nea, më shumë se dy mijë persona u mblodhën në fshat dhe pasi kënduan himnin grek duke mbajtur në duar flamuj të shumtë të Greqisë, përcollën për në banesën e fundit Kacifas. Për një tjetër agjenci greke të lajmeve, Prototema, pjesëmarrësit në varrimin e Kaçifas ishin më shumë se tre mijë. Bularati pushtohet nga flamuj grek, ku me qindra shtetas grekë kanë mbërritur në Epirin e veriut për të përcjellë Kacifas. Më tej 35 vjeçari përshkruhet si një njeri që dha gjakun e tij për fshatin ku u lind, por gjithashtu ka marrë pjesë dhe në manifestime për çështjen e Maqedonisë në Athinë dhe Selanik.

Me flamuj grekë dhe nën himnin kombëtar, Kostandin Kaçifas përcillet për në banesën e fundit shkruan “Antena” në raportimin e saj. Një lumë personash të ardhur nga Greqia i janë bashkuar familjarëve të Kaçifas për ti dhënë lamtumirën e fundit, vijon më tej shkrimi i cili konfirmon se janë hedhur dhe parulla por pa specifikuar se cfarë përmbanin. Agjencia greke e lajmeve Skaj shkruan ndër të tjera se arkivoli i Kaçifas ishte mbështjellë me një flamur të madh grek dhe shumë njerëz që e shoqëronin hidhnin parulla: Kaçifas ti jeton dhe na frymëzon. Linja e përbashkët e këtyre raportimeve ishte ajo e një situate të nderë gjatë ceremonisë si dhe të frymës patriotike greke që e shoqëroi./abcnews.al

MBULIM-RUSI-OKB.mpg_snapshot_00.13-1280x733.jpg
G. P.11:41 | 06/11/2018

Sipas mediave maqedonase, ministria e Jashtme ruse ka konfirmuar se Rusia ka kërkuar një mbledhje urgjente jashtë rendit, të këshillit të sigurisë. Mbledhja pritet të mbahet brenda kësaj jave, me synimin që Rusia të vendosë “veton” për zbatimin e Marrëveshjes së Prespës mes Athinës e Shkupit, e cila i jep zgjidhje përplasjeve shumëvjeçare mes dy vendeve për çështjen e emrit. Presidenti i Maqedonisë Ivanov, pak kohë më parë, kritikonte ashpër këtë marrëveshje nga foltorja e OKB-së, duke thënë se ajo shkelte identitetin dhe historinë maqedonase./abcnews.al

MEDIAT-PER-MAQEDONINE-ABC-M5-T1.mpg_snapshot_00.59.jpg
G. P.12:55 | 20/10/2018

Mediat ndërkombëtare kanë pasqyruar gjerësisht votimin e mbrëmjes së të premtes ku 80 deputetë maqedonas i dhanë dritën jeshile ndryshimeve kushtetuese në kuadër të marrëveshjes me Greqinë për çështjen e emrit. Mesazhi i përbashkët ishte që vendi sapo ka bërë një hap para për anëtarësimin në NATO dhe Bashkim Europian.

Reagimet e mediave të huaja pas miratimit të ndryshimeve kushtetuese në Kuvendin e Republikës së Maqedonisë, kanë qenë të shumta. Reuters shkruan ndër të tjera se parlamenti maqedonas miratoi një propozimin për të ndryshuar emrin e vendit, me një mosmarrëveshje disa dekadëshe me Greqinë tani është shumë afër përfundimit. Kjo lëvizje mund të zhbllokojë ofertat për t’u bashkuar me NATO-n dhe Bashkimin Evropian, e bllokuar prej kohësh nga Greqia, e cila pretendon se emri “Maqedoni” i takon një krahine greke me të njëjtin emër. Por, pengesat mbeten vetëm deri në zbatimin e marrëveshjes së plotë.

Associated Press thekson se Kuvendi i Maqedonisë votoi një propozim të rëndësishëm për të ndryshuar kushtetutën, duke drejtuar vendin drejt ndryshimit të emrit dhe drejt e NATO-s. Seanca u shty për më shumë se 10 orë për shkak të debateve të nxehta. Qeveria Social Demokratike e kryeministrit Zoran Zaev arriti të sigurojë mbështetje nga anëtarët konservatorë të opozitës duke siguruar votat e nevojshme për të arritur shumicën prej 2/3 në Kuvend.

BBC raporton se kuvendi maqedonas votoi për ndryshimet kushtetuese në vend që ndryshon zyrtarisht emrin e vendit. Greqia duhet gjithashtu të mbështesë vendimin për ndryshimin e emrit nëse Maqedonia ndryshon zyrtarisht kushtetutën e saj.

The Nju York Times:
Qeveria e Maqedonisë arriti të sigurojë mbështetje të mjaftueshme për të mbajtur gjallë marrëveshjen për të ndryshuar emrin e vendit, një lëvizje që mund përmbyllë mosmarrëveshjen me Greqinë dhe të drejtojë vendin ballkanik në rrugën për në NATO. Kuvendi arriti të sigurojë votat e mjaftueshme për fillimin e ndryshimit të Kushtetutës për të riemërtuar vendin si Republika e Maqedonisë Veriore. Tani afati prej 30 ditëve për të përgatitur ndryshimet në Kushtetutë duhet të zbatohet.

Uashington Post:
Kuvendi i Maqedonisë miratuan një propozim të rëndësishëm për të ndryshuar kushtetutën, duke i hapur rrugën vendit të ndryshojë emrin e tij dhe të bashkohet me NATO-n. Seanca u shty për më shumë se 10 orë për shkak të debatit të nxehtë. Kuvendi përfundimisht arriti të votojë, duke mundësuar kështu zbatimin e plotë të marrëveshjes mes Maqedonisë dhe Greqisë që u arrit në qershor.

Al Jazeera:
Kuvendi i Maqedonisë miratoi ndryshimet kushtetuese për të lejuar që vendi ballkanik të ndryshojë emrin e saj për Republika e Maqedonisë Veriore, siç kishin rënë dakord me Greqinë. Në total prej 80 deputetësh në parlamentin me 120 vende votuan për të ndryshuar emrin. Vendimi mund të zhbllokojë vendin për t’u bashkuar me NATO dhe Bashkimin Evropian, të penguar një kohë të gjatë nga Greqia./abcnews.al

PUTIN-KOSOVE.mpg_snapshot_00.02-1280x737.jpg
G. P.18:23 | 19/10/2018

Krimea nuk është si Kosova, pasi populli në Krime vendosi me anë të një referendumi që të ishte pjesë e Rusisë. Ndërsa Kosova shpalli pavarësinë me anë të votës në parlament. Është kjo deklarata e presidentit rus Putin, e cila u pasqyrua menjëherë në mediat serbe.

Presidenti rus Vladimir Putin u shpreh se Krimea nuk është si Kosova, dhe ajo nuk u bë ruse sepse Rusia e rrëmbeu atë territor. Krimea është ruse sepse populli me anë të një referendum kërkoi që të ishte pjesë e Rusisë. Deklarata e kreut të Kremlinit është cituar nga mediat serbe. Agjencia serbe e lajmeve B92 shkruan se gjatë një takimi me një grup debati në Moskë, Putin u shpreh se në vendin e dtij drejton demokracia, dhe pushteti i popullit. Një fakt që sipas tij vërtetohet me anë të referendumeve, zgjedhjeve dhe kështu me rradhë.

Kreu i Kremlinit gjithashtu krahasoi këtë situatë me shpalljen e pavarësisë së Kosovës, ku ai thekson se vendimi u mor pa një referendum dhe bazuar në votimin e parlamentit në Prishtinë. Një vendim që u mbështet nga ata që ishin pro shpërbërjes së ish Jugosllavisë. Putin përfundoi fjalën e tij duke thënë se Kombet e Bashkuara mbrojnë të drejtën e vendeve për të vendosur vetë, dhe kjo e drejtë duhet të shihet në të njëjtin këndvështrim kudo./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono