media

taulant-muka.jpg
G. P.20:34 | 18/12/2018

Ish-zv/ministri i Arsimit, Taulant Muka, është në qendër të vëmendjes së mediave kohët e fundit. Ai ka publikuar plagjiaturat e doktoraturave të kryetares së LSI-së, Monika Kryemadhi dhe disa ministrave dhe ish-ministrave në vend, ndërkohë disa media kanë publikuar shkrime se ai vetë ka doktoraturë plagjiaturë. I ftuar në emisionin “Provokacija”, Muka kishte marrë me vete edhe doktoraturën e tij, ku deklaroi se shkrimet kundër tij janë shkruar nga një ngelës. Ai bëri me dije se studimi i tij është publikuar në revistat shkencore më të mira të botës.

Taulant Muka: Njerëzit këtu janë bërë me hije sepse politika e 28 viteve e përbalt individin e aftë. Sot pashë në media, në faqe të parë të një gazete, një media që në 24 orë ka nxjerrë 5 fletërrufe që unë paskam doktoraturë plagjiaturë. Dhe dukej shkrimi që ishte shkrimi i një ngelësi.

Mustafa Nano: Pse nuk e thua emrin e gazetës?

Taulant Muka: Shqiptarja.com ose Report TV. Ja ku është doktoratura ime. E kam mbaruar në Ersamus në Holandë. 13 artikuj dhe nuk janë këto doktoraturat që janë thjeshtë shkrime historie, por janë 13 artikuj të publikuara në revistat shkencore më të mira të botës, ku Jama është një prej tyre ku çdo mjek do të ëndërronte  të publikonte. Këto fletërrufe unë nuk i kam frikë dhe e di pse nuk i kam frikë? Sepse çdo gjë e kam fituar me djersë. E kam fituar me aftësinë time. Kam pasur dy prindër të cilët kanë investuar te mua jashtëzakonisht. Dhe ata njësoj si unë çdo gjë e kanë fituar me djersë. Nuk kanë marrë asgjë, vetëm i kanë dhënë këtij shteti që nuk përgjigjet për asgjë.

Në protestën e së hënës, një grup studentësh iu kundërvunë Mukës duke e penguar që të flasë. Ish-zv/ministri u shpreh se personat që i dolën kundër janë militantë të LSI-së.

“Unë e tregova me foto. Ishin disa militantë të LSI-së sikurse isha në një studio tjetër dje, më janë vënë të gjithë militantët kundër. Pse? Sepse unë jam kundër sistemit, kundër të padiplomuarve. Unë nxorra dhe plagjiaturën e Monika Kryemadhit, nxorra plagjiaturat e ministrave majtas dhe djathtas dhe ata kanë frikë nga kjo. Rrjedhimisht do tentojnë gjithçka, por unë nuk trembem. Jam dhe do i vazhdoj asaj kauze që kam për arsimin. Prandaj jam atje me studentët, për t’i ndihmuar pasi luftën e kam filluar para tyre”, u shpreh Muka./abcnews.al

GAZETARET-VITI.mpg_snapshot_00.29-1280x720.jpg
G. P.20:00 | 18/12/2018

Janë 80 gazetarët e vrarë duke ushtruar detyrën e tyre në të gjithë botën gjatë vitit 2018. Reporterët pa kufij publikuan shifra duke dhënë alarmin për një dhunë të paprecedentë ndaj kësaj kategorie.

Viti 2018 ka qenë një vit i zi për gazetarët: janë vrarë 80 në të gjithë botën duke shënuar rritje pas tri vbitesh përmirësimi. Shifrat dalin nga bilanci vjetor i Reporterëve pa kufij. Një vit më parë humbën jetën 65 gazetarë, të cilët u vranë pasi ushtronin misionin e tyre të informacionit. Mes viktimave të këtij viti, janë 63 gazetarë profesionistë me një rritje prej 15 për qind, 13 gazetarë jo profesionistë, dhe katër bashkëpunëtorë të medias. Organizata jo qeveritare me seli në Paris denoncon një dhunë të paprecedentë ndaj kësaj kategorie. Në total sipas reporterëve pa kufij, më shumë se 700 gazetarë profesionistë janë vrarë dhjetë vitet e fundit.

Më shumë se gjysma e reporterëve janë marrë në shënjestër dhe kanë ekzekutuar si editorialisti saudit Jamal Khashoggi, i vrarë në 2 tetor brenda konsulatës së Riad në Stamboll. Apo si gazetari sllovak Jan Kusiak i ekzekutuar në banesën e tij në 21 shkurt të këtij viti. Sekretari i përgjithshëm i reporterëve pa kufij u shpreh se urrejtja ndaj gazetarëve e nxitur dhe e mbështetur dhe nga liderët politikë, fetarë apo biznesmenë të paskrupujt ka pasoja dramatike në terren.

Afganistani mbetet sërish ferri i reporterëve: në vitin 2018 aty kanë humbur jetën 15 gazetarë. Më pas Siria me 11 të varrë, Meksika me 9, India me 6 dhe 6 në Shtetet e Bashkuara të Amerikës. Në vitin 2018 është rritur dhe numri i gazetarëve të burgosur: 348. Më shumë se gjysma e gazetarëve në burg jjanë në pesë vende: Iran, Arabi Saudite, Egjipt, Turqi dhe Kinë./abcnews.al

MBULIM-NGJARJA-FRANCE-ABC-M5-T2-.mpg_snapshot_00.48-1280x720.jpg
G. P.22:17 | 11/12/2018

Një i vdekur dhe të paktën 6 të plagosur është bilanci i një sulmi me armë të ndodhur në qendër të Strasburgut në Francë. Sipas mediave franceze ngjarja ka ndodhur rreth orës 20:00, kur një person i armatosur me një automatik ka qëlluar drejt kalimtarëve të rastësishem. Autori i këtij sulmi ka arritur të largohet nga vendngjarja dhe po kërkohet nga policia franceze.

Sipas dëshmitarëve, sulmi ka ndodhur në një zonë ku ka patur mjaft qarkullim, pasi pranë ka qenë një treg krishtlindjesh. Ministri i Brendshëm është nisur direkt për në Strasburg. Ndërkohë ende nuk është e qartë nëse ky sulm ka prapavijë terroriste apo ka qenë ndonjë akt marrëzie tragjik që i kushtoi jetën 1 personi dhe la të plagosur 6 të tjerë./abcnews.al

serbia.jpg
G. P.14:47 | 11/12/2018

Sipas raportit më të fundit të organizatës jo qeveritare “Reporterët pa kufij”, liria e medias në Ballkan është në situatën më të keqe të mundshme. Ndërsa vendi ku ky fenomen është më i përhapur është Serbia, aq sa situate aktuale në vend krahasohet me kohën e Millosheviçit.

Ka qenë një protestë e opozitës serbe në Beograd, javën që lajmë pas, ajo që riaktualizoi problemin e medias, respektivisht kontrollin e saj nga regjimi i presidentit, Aleksandër Vuçiç. Mënyra se si u raportua nga ky tubim, thotë televizioni i pavarur serb “N1” ishte njësoj si në vitet ‘90 të shekullit të kaluar, atë botë televizioni i vetëm shtetëror kontrollohej nga Milosheviçi, ndërsa sot për shumicën e televizioneve thuhet se janë në shërbim të presidentit Aleksandër Vuçiç, të cilit, “Reporterët pa kufij”, ia përshkruajnë edhe përkeqësimin e gjendjes së medias prej se erdhi në postin e numrit një të shtetit. Është interesante se si në vitet e ‘90, ashtu edhe tani, zëri opozitar, apo edhe i lirisë së medias, tentohet të bëhet zap për shkak të Kosovës.

“Mitingu kaloi, kurse nga madhështia dhe jehona e tij në popull mbetën vetëm fjalët e mëdha. Opozita e bashkuar tregoi qartë se do të sakrifikonte edhe demokracinë e mirëfilltë edhe unitetin kushtetues të Serbisë, madje edhe integritetin territorial të saj. Në verbërinë dhe dëshirën e vet për të ardhur në pushtet, ajo do të sakrifikonte edhe Kosovën”, lexonte më 1990, Dushanka Kalanj, njëra ndër folëset më të mira të telelevizionit jugosllav.

Njëzetetetëvjet më vonë, i njëjti stil i të raportuarit.

“Protesta u organizua kundër dhunës, nën moton “Ndal këmishave të përgjakura” që është një hipokrizi e madhe për shkak se po ata njerëz, të cilët organizuan protestën bëjnë thirrje për vetëgjyqësi, përdhunime, dhunë, grusht-shtet dhe këtë e konsiderojmë si tejet, tejet, hipokrite sidomos në këtë situatë kur në shtetin tonë gjendja duhet të jetë e qetë dhe e qëndrueshme për shkak të gjithë asaj që ndodhë në Kosovë e Metohi”, raportoi më tetë Dhjetor gazetarja e tv “B92” për të cilin thuhet se është i kontrolluar nga regjimi i presidentit aktual serb.

Receta e pushtetit për keqpërdorim të medias në vitet e nëntëdhja të shekullit të kaluar  dhe kjo e tashmja është e njëjtë, tha për televizionin “N1” Lazar Laliç, një ish-punonjës i televizionit shtetëror të Serbisë, i cili ka bërë një serial televiziv me titull “Pamjet dhe fjalët e urrejtjes” që analizon raportimin gjatë dhjetëvjeçarit të fundit të shekullit XX.

“Këtë e patentoi Milosheviçi: të mbështetem në televizion si shtyllë e katërt e ruajtjes së pushtetit. Natyrisht, ky që doli nga kapota e Milosheviçit dhe Sheshelit këtë vetëm po e përsos”, krahason Laliç ndikimin dhe presionin e Milosheviçit dhe të Vuçiçit mbi median.

Në fakt, kohët e fundit në Beograd janë shtuar kritikat në adresë të presidentit dhe partisë së tij për intensifikim të përpjekjeve për të vënë nën kontroll median elektronike. Ditë më parë u bë një transaksion i dyshimtë i shitjes së një rrjeti kabllovik privat telekomit shtetëror serb dhe i shit-blerjes, po ashtu të dyshimtë të grupimit “Antena” me dy televizione me frekuenca kombëtare në Serbi e Mal të Zi. Organizata “Freedom House” tha se mungesa e transparencës nuk ushqen shpresën se qeveria e Serbisë dëshiron të respektojë lirinë e medias./abcnews.al

robert-rakipllari.jpg
G. P.21:15 | 30/11/2018

Gazetari Robert Rakipllari dhe drejtuesi i emisionit “Provokacija”, Mustafa Nano, u ndalën në një bisedë interesante në lidhje me situatën e shtypit ditët e sotme. Duke iu përgjigjur pyetjes provokatore të Nanos, Rakipllari tha se njerëzit po i kthehen leximit të gazetave pasi ka filluar një rritje e lehtë.

Mustafa Nano: Kur do ta shpallim vdekjen e shtypit të shkruar? Apo do e shpallim që sot?

Robert Rakipllari: Nuk e shpallim dot vdekjen e shtypit të shkruar. Shqipëria pavarësiht se është treg i vogël dhe vend i vogël, përfaqëson trendin e vendeve të tjera. Me informacionet e mia shtypi perëndimor ka filluar, ka ndalur trendi i rënies dhe ka filluar një lloj rritjeje e lehtë. Njerëzit janë kthyer te pjesa e seriozitetit të gjërave. Nuk e di se çfarë do ndodhë në Shqipëri.

Megjithatë, zhvillimi i teknologjisë ka sjellë edhe mediat online. Për këtë pjesë Rakipllari shprehet se nuk ka një ligj që të ndalojë të drejtën e autorit. Sipas tij ka portale që vetëm vjedhin lajme nga ato pak redaksi që ekzistojnë në Shqipëri.

“Pavarësisht se kryeministri flet për ligjin antishpifje ne sot nuk kemi një ligj ose nuk kemi një kuadër rregullator që të ndalojë të drejtën e autorit. Pra ne kemi redaksi që prodhojnë lajme dhe kemi portale me dy-tre vetë që rrinë me kufje në vesh dhe vjedhin nga këto. Fusin helmin dhe këndvështrimin e tyre dhe jetojnë me këto 4 redaksi që prodhojnë lajme. Nëse do kishim të drejtën e autorit do ishte ndryshe. Edhe shtypi i shkruar do ishte në një pozitë ndryshe”, tha ai./abcnews.al

MBULIM-MEDIAT-VUCIC.mpg_snapshot_00.00.jpg
G. P.18:29 | 31/10/2018

Presidenti i Serbisë, Aleksandër Vuçiç, deklaroi për mediat në vend se kishte marrë një mesazh nga ministri i Jashtëm rus, duke arritur në përfundimin se një marrëveshje përfundimtare me Kosovën është ende shumë larg.

Aleksandar Vuçiç, presidenti i Serbisë, mohoi se ministri i Jashtëm rus Sergei Lavrov dhe këshilltari për sigurinë kombëtare në Shtetet e Bashkuara të Amerikës, Xhon Bolton, kanë rënë dakord për një zgjidhje rreth Kosovës. Por kreu i shtetit serb konfirmoi se Lavrov dhe Bolton për herë të parë kanë diskutuar për Kosovën. Sipas tij çfarëdo marrëveshje që do të arrihet, Serbia duhet të jetë dakord gjithashtu. Ai shtoi se kishte marrë një mesazh nga ministri i Jashtëm rus. Mesazh sipas të cilit bëhej e qartë se një marrëveshje përfundimtare për Kosovën është ende shumë larg.

Për këtë arsye, Vuçiç u shpreh i shqetësuar për krijimin e ushtrisë së Kosovës, dhe përpjekjes së Prishtinës për t’u anëtarësuar në Interpol. Kjo pasi sipas tij këto dy ngjarje lidhen me njëra tjetrën dhe me transferimin e pushtetit. Gjë që Prishtina mund ta shfrytëzojë për të kufizuar dialogun me Beogradin. Vuçiç gjithashtu kritikoi mbrojtjen e vlerave dhe trashëgimisë së Ushtrisë Çlirimtare të Kosovës, pasi në këtë mënyrë çdo sserb që jeton në Kosovë duhet të bëjë të njëjtën gjë. Ai pranoi se është në një situatë që nuk di as se si të reagojë. Por nëse Beogradi do të vepronte si Prishtina, atëherë sipas presidentit serb, pasojat do të ishin katatrofike./abcnews.al

policiaa123.jpg
G. P.14:07 | 29/10/2018

Policia greke ka deklaruar zyrtarisht se minoritari Kostandinos Kaçifa nuk u vra për flamurin grek. Sipas policisë greke, nuk ka asnjë provë që ngjarja të jetë shkaktuar nga ndonjë provokim nga pala shqiptare.

Policia Greke ka rrëzuar të gjitha pretendimet që minoritari Kostandino Kaçifa të jetë vrarë për flamurin apo të jetë provokuar nga pala shqiptare. E përditshmja greke “Kathimerini”, por edhe media të tjera të Athinës, citojnë burime zyrtare të Policisë Greke, sipas të cilave autoritetet e vendit të tyre kanë qenë vazhdimisht në kontakt me palën shqiptare. Drejtori i Përgjithshëm i Policisë Greke, Aristeidis Andrikopoulos, ka kontaktuar me homologun e tij shqiptar dhe është mbajtur vazhdimisht i informuar për situatën që po ndodhte në Bularat të Gjirokastrës.

“Kathimerini” shkruan gjithashtu se burime zyrtare nga Policia e Athinës kanë thënë se nuk ka prova apo dëshmi që Kostandino Kaçifa të jetë vrarë për ngritjen e flamurit grek. Vetë policia helene e mohon që 35-vjeçari minoritar të jetë provokuar nga policia shqiptare apo faktorë të tjerë.

Ndërkohë, e përditshmja tjetër “I Efimerida” shkruan se policia greke ka shtuar masat e sigurisë në ambasadën shqiptare në Athinë, në Zyrën Konsullore shqiptare në Selanik, si dhe në biznese e dyqane që i përkasin komunitetit shqiptar në Greqi, për të shmangur çdo episod të dhunshëm nga ekstremistë. Në të njëjtën kohë ekziston frika edhe për të burgosurit shqiptarë në burgjet e paraburgimet e Greqisë./abcnews.al

 

 

 

kosta.png
G. P.18:48 | 28/10/2018

Mediat greke i kanë bërë jehonë ngjarjes që tronditi Gjirokastrën gjatë së dielës. Disa prej portaleve dhe gazetave kryesore të shtetit fqinj kanë pasqyruar gjerësisht ngjarjen duke iu referuar mediave shqiptare.

Megjithatë, ato nuk raportojnë faktin që shtetasi grek Kostandinos Kaçifas ka qëlluar në drejtim të policisë shqiptare. Disa prej tyre shkruajnë se ka qëlluar në ajër në momentin që forcat RENEA po hiqnin flamurin grek. “Vritet vorio-epirioti pas përplasjes me policinë shqiptare”, shkruan në titull Zougla.gr.

Ndërsa gazeta “Protothema” vijon: “Episod i rëndë me një ushtar grek në Gjirokastër: Ngriti flamurin grek, kapet nga policia dhe qëllohet”.

Dhe më tej nënvizon se “ushtari grek ngriti flamurin në varrezat e ushtarëve grekë në kudër të përkujtimit të festës kombëtare greke të 28 Tetorit”. I njëjti version përcillet edhe nga media si “Skai.gr”, “Ta Nea”, “Efimerida”, “Newsbomb.gr” e shumë të tjera. /abcnews.al

fatmir-xhafajj.png
G. P.12:31 | 27/10/2018

Mediat e huaja i kanë dhënë hapësirë të gjerë dorëheqjes së papritur të Minstrit të brendshëm shqiptar Fatmir Xhafaj. Duke u përqendruar të mënyra e publikimit të lajmit, duket se pjesa më e madhe e tyre njëzëri shtrojnë pyetjen: pse kjo dorëheqje?

Deutche Velle ashtu si dhe një pjesë e mirë e mediave të huaja më prestigjoze kanë pasqyruar lajmin për dorëheqjen e ministrit të Brendshëm shqiptar fatmir Xhafaj. Dorëheqja e ministrit të Brendshëm, Fatmir Xhafaj, u bë e ditur të shtunën (27.10) nga një njoftim i kryeministrit Edi Rama, në median sociale, që bën me dije, se ka pranuar dorëheqjen e ministrit të Xhafaj, nis analizën e saj Deutche Velle.

Nga postim i kryemnistrit të Shqipërisë, Edi Rama duket se arsye për dorëheqjen e ministrit të Brendshëm, Fatmir Xhafaj është kërkesa për  “shpejtësi, energji dhe rezultate të reja”, dhe pse një arsye e qartë nuk është dhënë ende nga tashmë ish ministri, vijon shkrimi.

Dorëheqja e Fatmir Xhafës nga posti i ministrit të Brendshëm vjen e papritur. Vetëm një javë më parë Policia e Shtetit, strukturë e Ministrisë së Brendshme, zhvilloi me sukses Mega-Operacionin e parë në Shqipëri për nga përmasat dhe rezultatet: në 12 qytete të Shqipërisë, në të njëjtën kohë, u arrestuan anëtarët e 4 grupeve kryesore kriminale të trafikut të drogës, që bashkëpunonin mes tyre si një organizatë kriminale. U shkatërrua laboratori i përpunimit të heroinës, në Has, të qarkut të Kukësit. U arrestuan dy ish-deputetë socialistë, Arben Ndoka dhe Arben Çako, për bashkëpunim me  krimin e organizuar të trafikut të drogës. Pse dha dorë heqjen Fatmir Xhafaj pas suksesit të fundit? Kjo mbetet ende e panjohur, vijon më tej analizaq. Vetë ish-ministri Xhafaj, në një pronocim për mediat, të shtunën (27.10) paradite nuk dha asnjë shkak për dorëheqjen e tij. “Sfidat kanë qënë tepër të mëdha, por jam krenar që në krye të një ekipi  me integritet dhe përkushtim në Ministrinë e Brendshme dhe Policinë e Shtetit, kemi arritur suksese shumë të rëndësishme në forcimin e rendit dhe sigurisë në vend, disa prej  të cilave, të konsideruara të pamundura për vite të tëra”, tha Fatmir Xhafaj.

Në Maj të këtij viti, Xhafaj hodhi poshtë kërkesën e opozitës për të dhënë dorëheqjen, që pretendonte se ai kishte fshehur dënimin e vëllait  të tij, Agron Xhafaj, në vitin 2002  në Itali për trafik droge dhe e kishte mbrojtur nga drejtësia në Shqipëri, ku i vëllai ishte ekstraduar nga autoritetet italiane.

Para marrjes së postit të Ministrit të Brendshëm në shtator 2017, në qeverinë Rama 2, Fatmir Xhafaj, si kryetar i komisionit të ligjeve ka qënë një nga arkitektët e reformës në drejtësi, kushtit kryesor të BE për hapjen e negociatave të pranimit me Shqipërinë. Ndërkohë Daily Mail, Nju Jork Tajms dhe Asocciated Press ndër të tjera shkruajnë se lajmi për dorëheqjen e tij u bë nga profili në Tuiter i kryeministrit Edi Rama, i cili shkruante se kishte pranuar dorëheqjen. Por deri tani nuk është dhënë asnjë shpjegim, ndaj pritet një reagim nga tashmë ish ministri i Brendshëm. Brenda pak minutash kryeministri Rama, ka emëruar Sandër Lleshin, një ish zyrtar ushtarak në postin e ministrit të Brendshëm shkruan Asociated Press. Emërimi i Lleshit duhet miratuar nga presidenti dhe më pas nga parlamenti, ndërsa kryeministri premtoi se ai do të sjellë një energji të re positive./abcnews.al

MIRELA-MILORI-1280x720.jpg
ent ela23:01 | 12/10/2018

“Më shqetëson fakti që televizioni po i ikën mendimit, sepse çdo gjë del nga moda përveç trurit kurrë”. Kështu është shprehur gazetarja e ABC News Mirela Milori në studion e Provokacijas, ndërsa ka folur për situatën ku ndodhet media sot në Shqipëri.

Sipas saj, sot kanë më shumë shikueshmëri show pa tru, siç e cilëson ajo, që gjeneron lekë, sesa komunikimet cilësore.

“Show shikohet, një lloj show që mua nuk më tërheq. Këto show pa tru dhe vetëm me xixa për të gjeneruar lekë nuk mundem. Komunikimi nuk do dalë kurrë nga moda do jetë pjesë e televizionit  si do të vijë puna”.

Por Milori ndjen më shumë keqardhje, për zgjedhejt e gabuara të gjeneratës së vjetër që e njeh profesionin.

“Më dhemb më shumë gjenerata e vjetër që e di zanatin dhe bën zgjedhje të gabuara te përfaqësuesit e gjeneratës së re”.

Duke pranuar arrogancën gjinore në media, Milori u shpreh se po krijoheshin mundësi të barabarta në përputhje me gjininë, atëherë do merrej produktiviteti i duhur nga gratë.

“Ka arrogancë në media por nuk është më e spikatur se ajo që kemi në shoqëri, kur përballë kemi një grua që është e zonja, dhe po qe pak e bukur në këtë moment bëhet arrogant personi përballë ka arrogancë maskile. Njeriu i zot qoftë burrë apo grua do dalë, do evidentohet, por shanset nuk i jepen të barabarta. Nëse do na krijonin mundësi të barabarta në përputhje me gjininë, atëherë ne do marrim produktivitetin e duhur nga gratë dhe diferenca në pagë është gjinore”.

Me një përvojë mbi 20 vjeçare në media dhe në një situatë të tillë ku ndodhet media shqiptare, Milori apelon që profesionistët të bëjnë të pamundurën për të dhënë modelin e duhur.

“Ne jemi pjesë e të tërës, mos prit një media si në Britani dhe SHBA. Intervistat më të mira që bëj unë,  kanë shikueshmëri më të vogël. Nëse hedh një foto artistike nga plazhi ka më shumë shikueshmëri se një intervistë e mirë, sepse media është në një situatë të tillë, ke gjithçka po nuk ke gjithçka, shfleton gjithçka po nuk lexon gjithcka. Mos të jepet modeli i gabuar. Ne si profesionistë duhet të bëjmë të pamundurën aq sa kemi në dorë, sepse balanca e forcave mban botën”– theksoi Milori.

Ajo rrëfeu gjithashtu edhe fillimet e para në media, ku përvojën në televionin Klan e konsideri si një ëndërr të jetuar, që punoi mes profesionistëve të kohës.

“Vitet e para vitet, më të bukura. Klani i parë ka qenë një ëndërr e jetuar, një organizim, frymë të mirë, një puën të mirë mbrapa, më ndihmonin, respektonin, më mësuan gjënë më të mirë të punës dhe kur shkova te Zëri i Amerikës isha gati. Asnjëhërë e lënduar, asnjëherë e anashkaluar, kam punuar me më të mirët si Baxhaku, Shkullaku, Balla, Peza, Demi”– rrëfeu ajo. /abcnews.al

.


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono