media

teatriiii.jpg
G. P.13:00 | 16/07/2018

Parlamenti shqiptar miratoi një ligj të veçantë për shembjen e teatrit kombëtar të ndërtuar në Tiranë në vitet ‘30. Kështu nis analizën “Il Fatto Quotidiano”, duke shtuar se në vend të tij do të jetë një projekt i arkitektëve danezë, projekt që kritikohet nga artistë, opozita dhe qytetarët. Akuza të rënda janë bërë nga politika për partneritetin publik–privat, (veçuar nga Fondi Monetar Ndërkombëtar e që hedh hije mbi negociatat me Bashkimin Europian) për të krijuar të ardhura të diskutueshme.

Zemra italiane e Tiranës rrezikon të fshihet me rruspa dhe ligje të veçanta, shkruhet ndër të tjera në analizën e “Il Fatto Quottidiano”, për atë që po ndodh me Teatrin Kombëtar në kryeqytetin tonë. Duhet hapësirë për ndërtime të reja, pikërisht në atë pak vend që ka mbetur nga qendra historike e kryeqytetit shqiptar. Por shembja e Teatrit Kombëtar i epokës fashiste, nuk është vetëm një çështje historie. Pasi në lojë është dhe anëtarësimi i Shqipërisë në Bashkimin Europian pas akuzave të forta për spekulime në sektorin e ndërtimit. Gjithçka brenda një kornize që ka tërhequr dhe vëmendjen e Fondit Monetar Ndërkombëtar.

Në 9 Korrik, parlamenti votoi një ligj të veçantë për të shënuar shembjen e teatrit, mes protestave të artistëve shqiptarë, të opozitës në parlament dhe një pjese të mirë të qytetarëve të Tiranës. Këta të fundit kanë më pak se tre javë kohë për të bindur Presidentin e Republikës, Ilir Meta, që të refuzojë firmosjen e këtij ligji.

Në fillim, kopshti i ulët i Xhulio Berte, i realizuar në 1935-n, u shkatërrua në 2011-n. Më pas stadiumi monument i projektuar nga Gerardo Bosio i ndërtuar në 1939-1941 u shkatërrua një vit më parë. E  tashmë është radha e Teatrit Kombëtar që konsiderohet si një nga dëshmitë më të rëndësishme arkitektonike të periudhës italiane. Çdo gjë po shembet. Historiani dhe gazetari i njohur iitalian Indro Montaneli shprehej në 1939-n: Tirana është një qytet ekzistencialisht modern, gati i shpikur. Koha e këtij qyteti ka vetëm dy masa: të tashmen dhe të ardhmen. E kaluara nuk ekziston.”

Në kryeqytetin shqiptar, Teatri Kombëtar do të zëvendësohet nga një teatër i ri dhe nga kulla që do të kenë një funksion tjetër, sipas projektit të BIG-BIG, Bjarke Ingels Group, një nga studiot më të njohura të arkitekturës modernE në botë. Një studio që ka ardhur nga Kopenhagen në Tiranë me kërkesë të qeverisë shqiptare.

Si për kryetarin e Bashkisë Tiranë, Erion Veliaj, ashtu dhe për kryeministrin Edi Rama, artist dhe ish-kryebashkiak i kryeqytetit, struktura aktuale e teatrit është e papërdorshme dhe çdo përpjekje restaurimi do të ishte e kotë. Por gjithsesi ky teatër, ashtu si u vlerësua dhe nga politekniku i Barit dhjetë vjet më parë, ka një vlerë të madhe historike dhe dokumentare qoftë dhe për teknikën e ndërtimit që është përdorur.

Në vend të këtij teatri, vijon shkrimi, nëse nuk do të ketë ndonjë hap prapa deri në fund të muajit, arkitektët e BIG parashikojnë një strukturë të re në formë papijoni, të ndarë në tre ambiente. Një auditor kryesor, një sallë koncertesh dhe një për spektaklet. Më pas një amfiteatër në çati, një prapaskenë që shihet në pjesën veriore, dhe vetrata xhami në pjesën jugore.

Gazetarët shqiptarë të BIRN Albania, citohen nga e përditshmja italiane Il Fatto Qutidiano (gjithashtu agjenci lajmesh online) për faktin se qeveria shqiptare pretendon se nuk ka paratë e duhura për të ndërtuar teatrin e ri që ka një koto të lartë. Dhe për këtë arsye do i japë terrenin publik, ku ndodhet teatri aktual një kompanie private me një çmim prej 470 eurosh metri katror.

Ndërkohë që në atë zonë mesatrja është 2 mijë euro për metër katror duke qenë se ndodhet në qendër të kryeqytetit. Projekti do të shtrihet në 9 mijë metra katrorë. Në shkëmbim të kësaj, shoqëria përveç teatrit do të ndërtojë katër kulla të tjera. Teatri nuk është vetëm një çështje e brendshme, akuza për shkelje të normave europiane për sa i përket konkurrencës rëndon, në një moment që në qendër të vëmendjes janë negociatat për anëtarësimin e Shqipërisë në Bashkimin Europian, përfundon shkrimi./abcnews.al

albana-vokshi.jpg
G. P.11:07 | 12/07/2018

Komisioni i Medias shtyn sërish mbledhjen e parashikuar për sot me kryeregjistruesin e Hipotekës, Valdrin Pjetri, lidhur me pronën e Teatrit Kombëtar. Mbledhja  u shty pasi kreu i Hipotekës nuk mundi të paraqitej për shkak të angazhimeve në aktivitete të tjera.

Pas shtyrjes së seancës dëgjimore dje në komisionin e medias me një ditë, Valdrin Pjetri mësohet të ketë kërkuar më shumë kohë për të përgatitur informacionin e këkuar nga komisioni.

Për këtë arsye mbledhja do të zhvillohet ditën e hënë më 16 Korrik. Pjetri pritet të japë në komision informacione dhe shpjegime lidhur me sipërfaqen aktuale të pronës, ku sot ndodhet Teatri Kombëtar, ndryshimet që ka pësuar në vite si dhe mënyrën e tjetërsimit të pronave rreth saj./abcnews.al

ama.jpg
G. P.15:52 | 11/06/2018

Projektligji i ri për mediat audiovizive pritet të rrisë pavarësinë ekonomike dhe editoriale të televizioneve në Shqipëri. Drafti u diskutua mes grupeve të interesit dhe kryetarit të Autoritetit të Mediave Audiovizive.

Përfaqësuesit e televizioneve kombëtare dhe informative u bënë bashkë tek Autoriteti i Mediave Audiovizive për të diskutuar rreth projektligjit për mediat audiovizive, i cili mundëson krijimin e fondit të transmetimeve.

Drafti parashikon që një pjesë të tarifës për përdorimin e aparateve t’u kalojë edhe televizioneve jopublike. Ndërkohë nuk preket, por përkundrazi shtohet fondi edhe për Televizonin Publik Shqiptar.

Projektligji synon edhe përmirësimin e pavarësisë së mediave në Shqipëri në kushtet e rritjes së kostove për shkak të ndryshimit të teknologjisë së prodhimit dhe transmetimit.

Aleksandër Frangaj: “Publiku shqiptar paguan tarifën për përdorimin e aparatit, tarifa shkon për televizioni publik ose shtetëror se publik nuk ka qenë ndonjëherë . E ndërkohë publiku që paguan për televizionin shtetëror çdo natë e çdo ditë sheh televizionet private. Pas fikjes së transmetimeve analoge në disa nga qarqet e Shqipërisë si Berat, Korçë dhe Fier, përqindja  e popullsisë që ka marrë aparat për të ndjekur transmetimet dixhitale është jashtëzakonisht e ulët, as 5 përqind. Parashikohet në këtë ligj që nëpërmjet tarifës së përdorimit të aparatit televiziv, një përqindje e saj të shkojë për pajisjen me dekodera falas për  të gjithë qytetarët e këtij vendi”.

Rritja e pavarësisë ekonomike të televizioneve, sipas drejtuesve të tyre shkon paralel me atë editoriale.

Ben Blushi: “Ky ligj rrit pavarësinë televizioneve private nga çdolloj qeverie. Se qeveria sipas ligjit nuk do ketë diskrecion për mënyrën e ndarjes së fondit”.

Me ndryshimet në ligjin për mediat audiovizive pritet të marrë fund faza kritike ku ndodhet informacioni.

Carlo Bollino: “Brenda ligjit është parashikuar një mbrojtje e veçantë për teleshikuesit që janë dëmtuar nga lajmet false që detyron median për ta përgenjështruar, për ta rregulluar krijimin e një bordi etike”.

Zgjidhje, sipas Kreut të Autoritetit të Mediave Audiovizive, pritet të marrë gjithashtu edhe çështja e reklamave dhe ajo e gazetarëve.

Gentian Sala: “Televizionet mundohen që të kalojnë atë afatin 12 minutësh të reklamave, televizionet informative të shfrytëzojnë në maksimum hapësirat që kanë për reklamat shpesh në kundërshtim me ligjin. Unë mendoj që ky draft do ndihmojë që kjo periudhë tranzitore do kalojë”.

Drafti që parashikon t’i japë fund fazës tranzitore, ku ndodhet televizioni në Shqipëri kërkon konsensusin e opozitës dhe mazhorancës në parlament.

Aleksandër Frangaj: “Urojmë ta gjejmë këtë radhë, meqë është e kundërta. Opozitë është partia që e propozoi në 2012-n dhe mazhorancë është ata që e refuzuan”.

Në vitin 2012, kur projektligj u dërgua në seancë plenare, konsensusi mes mazhorancës së djathtë dhe opozitës së majtë mungoi./abcnews.al

europa.jpg
G. P.14:45 | 01/06/2018

Bashkimi Europian dhe Gjermania kanë zbutur tonet dhe i kanë shtrirë dorën e bashkëpunimit qeverisë së re të Italisë. Ndërsa mediat ndërkombëtare e kanë pasqyruar daljen nga kriza politike me një ekzekutiv populist, si një zhvillim të rrezikshëm për Bashkimin Europian.

“Komisioni Europian ka besim të plotë në kapacitetet dhe në vullnetin e qeverisë së re për tu angazhuar në mënyrë konstriktive me partnerët dhe institucionet e BE-së për të ruajtur rolin kryesor të Italisë në Europë”.

Kështu është shprehur zëdhënësi i Presidentit Jean Claude-Juncker, i cili shton se ekziston angazhimi për të punuar me qeverinë italiane në përballimin e shumë sfidave, siç është dhe emigracioni.

Sa i përket Bashkimit Europian, një reagim për zhbllokimin e krizës politike në Itali ka ardhur dhe nga aleati i afërt, Gjermania. Kancelarja Angela Merkel është shprehur e hapur të bashkëpunojë me qeverinë e re të Romës. Këtë e ka thënë zëdhënësi i qeverisë gjermane, Steffen Seibert, duke folur në një konferencë për shtyp.

Ky reagim më i zbutur i tyre lidhet me faktin se ideologjia e dy partive me bazë euroskeptike të koalicionit Lega Nord dhe Lëvizja 5 Yjet, gjatë fushatës është bazuar në daljen e Italisë nga zona euro. Ndërkohë, zgjidhja e ngërçit politik është raportuar në të gjitha mediat ndërkombëtare me shumë vëmendje. Ajo që bie në sy është titulli pothuajse i njëjtë: “Italia formon qeveri populistësh”.

Ndërsa disa media ngrenë shqetësimin për përplasje të mundshme të ekzekutivit të ri me Bashkimin Europian.  Sa i përket bursës, tregjet në Itali i janë përgjigjur pozitivisht daljes nga kriza politike./abcnews.al

IMG_4618-1-1280x854.jpg
G. P.11:16 | 19/05/2018

Kryetarja e Komisionit të Medias, Albana Vokshi, ka denoncuar atë që e quan, shantazh të kryeministrit ndaj gazetarëve që e përballin me realitetin e bashkëqeverisjes me krimin. Deputetja demokrate iu referua komunikimit të tensionuar të Ramës, në konferencën me gazetarët një ditë më parë.

Albana Vokshi: “Agresioni i djeshëm ndaj medias ishte nevoja jetike e Edi Ramës për të mbuluar skandalin “Xhafaj” dhe nëpërmjet shantazhit e kërcënimit, të fshehë të vërtetën e dy vëllezërve: njëri, Agron Xhafaj, bos i drogës dhe i krimit të organizuar në Vlorë, tjetri, Fatmir Xhafaj, Ministër i Brendshëm, që ka vënë Policinë e Shtetit në shërbim të të vëllait trafikant. Sot, ju ndoshta prisni fjalinë e zakonshme se Partia Demokratike dënon shantazhet dhe kërcënimet e kryeministrit nga gazetarëve dhe medias! Por sot kjo është e tepërt! Nuk kanë kaluar 24 orë nga qëndrimi dinjitoz i Ambrozias përballë shantazhit të kryeministrit dhe video është bërë virale! Janë me mijëra e mijëra shqiptarët që e kanë shpërndarë videon në rrjetet sociale, duke përgëzuar gazetaren e re kurajoze. Ky është dënimi më i madh për Edi Ramën! Shumica e shqiptarëve të ndershëm nuk duan të qeverisen nga pakica e krimit, që është kthyër në pengesën kryesore për Shqipërinë Europiane! Tani, na duhet që secili prej nesh ta tregojë çdo ditë të njëjtën këmbëngulje dhe kurajo si Ambrozia! Vetëm kështu do t’ia dalim të kemi nje qeveri që punon për shqiptarët dhe jo për krimin! Të bashkohemi në protestë të shtunën, më 26 Maj, sepse tani është koha të mos e lëmë fatin e Shqipërisë Europiane në duart e qeverisë më antieuropiane”. /abcnews.al

saimir-tahiri1.jpg
G. P.15:37 | 03/05/2018

Mediat ndërkombëtare kanë pasqyruar gjerësisht dorëzimin e mandatit të deputetit nga Saimir Tahiri. Zëri i Amerikës nënvizon se emri i tij është dëgjuar disa herë të përmendej mes anëtarëve të një bande të trafikimit të drogës. Ndërsa Associated Press thekson se vendimi i tij është bërë për të mos penguar rrugën e Shqipërisë drejt BE-së.

Mediat ndërkombëtare kanë komentuar dhe pasqyruar dorëzimin e mandatit të deputetit nga Saimir Tahiri pas dyshimeve se ka lidhje me një grup kriminal që merrej me trafikimin e lëndëve narkotike. Duke risjellë në vëmendje deklaratën e fundit të Tahirit, Zëri i Amerikës shkruan se “ish-ministri i Brendshëm u vu nën akuzë Nëntorin e shkuar, për dyshimet se kishte lidhje me grupin e vëllezërve Habilaj, kushërinj të tij, të cilët ishin pjesë e një organizate italo-shqiptare, e cila trafikonte marijuanë nga Shqipëria drejt Italisë. Hetimet nisën pasi autoritetet italiane goditën këtë organizatë në Catania, ndërsa në përgjimet e kryera, emri i tij përmendet disa herë në bisedat mes trafikantëve”.

Gjithashtu kjo media raporton edhe për përplasjet mes qeverisë dhe opozitës për këtë çështje. Zëri i Amerikës nënvizon se “qëndrimi i shumicës dhe veçanërisht i kryeministrit Edi Rama, i cili kishte qenë një mbrojtës i flaktë i zotit Tahiri, edhe kur gjatë vitit 2016 fenomeni i kultivimit të marijuanës mori një përhapje masive, u pa gjerësisht si një mbrojtje që ju ofrua ish-ministrit”.

Ndërkohë, ky zhvillim ka gjetur pasqyrim edhe në agjencinë ndërkombëtare të lajmeve, Associated Press.

“Saimir Tahiri të enjten dorëzoi mandatin e tij në mënyrë që hetimi të mos qëndrojë në rrugën e integrimit të Shqipërisë në Bashkimin Europian”, nënvizon agjencia prestigjoze.

Gjithashtu Associated Press raporton se vazhdimisht Tahiri ka mohuar akuzat e ngritura kundër tij se ka lidhje me një grup kriminal të trafikut të drogës. Artikulli i Associated Press është publikuar dhe në mediat amerikane si Fox News, Uashington Post, Abc News dhe shumë të tjera./abcnews.al

meta-1280x725.jpg
G. P.14:41 | 03/05/2018

Në Ditën Ndërkombëtare të Lirisë së Shtypit, Presidenti Ilir Meta shpreh solidarizimin e tij të plotë me komunitetin e gazetarëve.

Në një deklaratë për shtyp, kreu i shtetit inkurajon, në veçanti, reporterët e terrenit, që të jenë gjithmonë aty ku lajmi ndodh, me guxim, pa u trembur dhe as shantazhuar nga askush.

“Koha kur gazetari dhunohet, kërcënohet e shantazhohet në kryerje të misionit të tij duhet të marrë fund. Dënoj me ashpërsi të gjitha sulmet dhe çdo akt dhune ndaj gazetarëve e apeloj që autorët e krimeve ndaj përfaqësuesve të medias të vihen menjëherë para drejtësisë”, thuhej në deklaratën për shtyp të Presidentit Meta.

Sipas tij, liria e shtypit është kusht i pazëvendësueshëm për respektimin e të drejtave të njeriut në një shoqëri demokratike./abcnews.al

realii.jpg
G. P.14:13 | 02/05/2018

Akuza dhe sharja për gjyqtarin pas eleminimit të Bajernit nga Liga e Kampionëve. Edhe mediat europiane ishin të ndara në vlerësimin e suksesit të Realit

Skenat ishin të njëjta si vjet.

Bajerni u mblodh sërish në një darkë, që dukej si e përzishme, pas eleminimit të dytë radhazi nga Reali në Champions, veçse bavarezët ishin edhe një herë krenarë.

Shefi ekzekutiv, legjenda Karl-Hajnc Rumenige, mburri skuadrën për “ndeshjen më të mirë që kam parë nga Bajerni në Ligën e Kampionëve, në 5 vitet e fundit”. “Ne ishim skuadra më e mirë ndaj një Reali që kryeson renditjen e UEFA-s, ne e nxorrëm Realin nga fusha e lojës”, – shtoi Rumenige.

Futbollistët e Bajernit dhe trajneri Hajnkes ishin padyshim të dëshpëruar, dhe padiskutim edhe të zemëruar me gjyqtarin turk, Çakir, ndaj të cilit pretenduan dy penallti.

Gjithsesi, më të tërbuar ishin dy nga lojtarët që nuk ishin në fushë, Arturo Vidal dhe Zherom Boateng.

Mesfushori kilen nuk u përmbajt duke sharë lojtarët e Realit, me fjalën “minj”, dhe duke akuzuar gjyqtarin me një fjalë të turpshme, “një tjetër penallti m…”.

Dyshimet janë të mëdha se arbitrat vazhdimisht favorizojnë Realin, pasi edhe sezonin e kaluar, madrilenët shënuan dy gola në pozicion jashtë loje ndaj Bajernit, dhe përfituan nga kartoni i kuq i padrejtë i Vidalit, dhe nga fakti se gjyqtari kurseu të kuqin ndaj Kasemiros.

Boateng ishte pak më i kulturuar në reagimin e tij.

“Kjo nuk është penallti? Po çfarë thoni?”, komentoi ai në rrjetet sociale.

Vetë njeriu që preku topin me dorë, Marselo, pranoi me ndershmëri çfarë ndodhi.

“Po, po, topi preku dorën time, – pohoi ai, – kjo është e vërteta, e preka me dorë, por kjo ndodhi dhe unë nuk kam ç’të them. Unë nuk i komentoj arbitrat që shpesh kanë gabuar edhe kundër nesh”.

Mediat ishin të ndara në jehonën për sfidën e Championsit.

Në Madrid, gazeta “Marka”: Le të fitojmë të 13-ën! Kampionët vuajnë dhe rezistojnë ndaj një Bajerni të admirueshëm!

Po në Madrid, gazeta “AS”: Bajerni shkaktoi vuajtje në “Bernabeu”! 22 gjuajtje në portë, 11 brenda kuadratit, 11 korne, 60 për qind mbajtje topi!

E përditshmja spanjolle, “ABC”: Reali i mbijeton rrethimit gjerman! Finalja e tretë radhazi në Champions!

“El Mundo”: Në kërkim të së 13-ës! Madridi eleminon Bajernin pas një ndeshje elektrifikuese dhe do të kërkojë Championsin e tretë radhazi!

Në Katalonjë mendojnë ndryshe.

Gazeta “Sport”: Kështu, kështu, kështu kualifikohet Madridi! Penallti e padhënë, dhuratë e Bajernit!

“El Mundo Deportivo”: Një klasike, Real-Bajern 2-2 në Champions. Madridi në finalen e tretë radhazi pasi eleminoi Bajernin në stilin e tij klasik!

Në Gjermani, “Bild” akuzon arbitrat për penalltinë e padhënë: Gjashtë sy dhe një dorë! Përse arbitrat nuk dalluan asgjë?

“Zydojçe Cajtung” e Mynihut: Krenarë për vdekjen heroike! Bajerni jashtë Championsit!

Së fundi, asnjanësja “L’Ekip” e Parisit: Reali ecën mbi ujë! Skuadra e Zinedin Zidanit arrin finalen e tretë radhazi në Champions!/abcnews.al

albana-vokshi.jpg
G. P.15:15 | 27/04/2018

Nga foltorja e selisë blu, kryetarja e komisionit të medias Albana Vokshi përshëndeti qëndrimin e organizatës Reporterët pa Kufij për raportimin lidhur megjendjen e medias në Shqipëri. Lidhja me pushtetin, censura ndaj gazetarëve dhe induktimi i gjuhës së urrejtjes ndaj tyre, e nxitur nga kryeministri, thekson Vokshi, janë pjesë edhe e rezolutës së inicuar nga grupi parlamentar demokratik kundër gjuhës së urrejtjes së shefit të ekzekutivit ndaj gazetarëve. Rezoluta pritet të kalojë në seancë plenare./abcnews.al

trump-3-1280x662.jpg
G. P.17:03 | 11/03/2018

Mediat serbe raportojnë se Shtetet e Bashkuara kanë përgatitur një paketë prej 4 pikash që do të zgjidhë çështjen mes Serbisë dhe Kosovës. Dokumenti do t’i dorëzohet presidentit Aleksandër Vuçiç.

Shtetet e Bashkuara të Amerikës kanë përgatitur një paketë prej katër pikash, e cila do t’i propozohet Serbisë për zgjidhjen përfundimtare të çështjes së Kosovës. Kjo është bërë e ditur nga gazeta serbe “Vecernje Novosti”, që shkruan se paketa do t’i prezantohet presidentit Aleksandër Vuçiç. Sipas burimeve të kësaj media, ky dokument i hartuar në Uashington, flet edhe për statusin e Kosovës dhe mund të përcaktojë strategjinë politike të së ardhmes për Serbinë.

Në këtë tekst për Kosovën, shkruan “Vecernje Novosti”, ka punuar administrata e Donald Trump, dhe pritet të sillet nga ndihmës-sekretari i shtetit amerikan, Wess Mitchell, që viziton Ballkanin. Sipas gazetës, ky dokument i jep kompetenca më të mëdha ekzekutive Asociacionit me Shumicë Serbe në Kosovës dhe shton gjithashtu kompetenca të tjera në fushën e shëndetësisë, edukimit dhe kulturës.

Asociacioni do të jetë i lidhur me zëvendës-kryeministrin e Kosovës, i cili do të jetë nga radhët e komunitetit serb, e i cili praktikisht do të jetë udhëheqës i Asociacionit, shkruan gazeta. Ndërsa nga Beogradi pritet që të mos pengojë Kosovën në anëtarësimin në organizatat ndërkombëtare. Sipas të përditshmes së Beogradit, nëse Serbia e pranon këtë paketë, ajo do të anëtarësohet në BE dhe SHBA-ja do t’i garantojë ndihmë më të madhe ekonomike dhe mbështetje diplomatike në arenën ndërkombëtare./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono