matthew palmer

Palmer-deklaratat-1280x739.jpg
ent ela11:40 | 03/09/2019

Në një intervistë për serben Tanjug, i ngarkuari për çështjet e Ballkanit perëndimor, Metju Palmer, u shpreh se njohja reciproke mes Kosovës dhe Serbisë mbetet pika qendrore e një marrëveshjeje të mundur mes palëve.

I ngarkuari i Shteteve të Bashkuara të Amerikës për Ballkanin Perëndimor, Metju Palmer u shpreh se zgjidhja e çështjes së Kosovës mbetet prioritet në axhendën e tij të punës. Në një intervistë për median serbe, Tanjug, Palmer deklaroi se Shtetet e Bashkuara të Amerikës presin që të ndodhë njohja e ndërsjelltë Kosovë-Serbi, si pikë qendrore e marrëveshjes.

Ai theksoi se synonte që të kthejë Beogradin dhe Prishtinën në tryezën e bisedimeve sa më shpejt të jetë e mundur dhe të sigurojë një marrëveshje.

“Ne kemi zgjedhje në Kosovë më 6 tetor, dhe ato do të mbahen në Serbi në pranverën e ardhshme. Ne do të kemi mundësinë që të vazhdojmë negociatat midis dy zgjedhjeve, të cilën duhet ta shfrytëzojmë. Shpresojmë që të dyja palët të shfrytëzojnë këtë mundësi”, është shprehur ai, duke shtuar se shpreson që Qeveria e re e Kosovës të pranojë të pezullojë tarifat ndaj produkteve serbe dhe Beogradi të ndalë lobimin tek shtetet e tjera për të tërhequr njohjen e Kosovës. /ABC News Albania 24/7

palmer.jpg
nev ila13:11 | 31/08/2019

 

Sekretari Amerikan i Shtetit ka emëruar Zëvendës Ndihmës Sekretarin Matthew Palmer Përfaqësues të tij të Posaçëm për Ballkanin Perëndimor.

Departamenti i Shtetit tha se Palmer do të udhëheqë përpjekjet e Shtëpisë së bardhë për të forcuar angazhimin diplomatik amerikan në mbështetje të paqes dhe stabilitetit në rajon; si  dhe për t’u përqëndruar në integrimin e vendeve të Ballkanit Perëndimor në institucionet perëndimore.

Në reagimin e tij të parë shefi i diplomacisë serbe, Ivica Daçiq, ka deklaruar se emërimi i zotit Palmer i dërguar i posaçëm për Ballkain Perendimor nuk është befasi dhe kjo dëshmon se Shtetet e Bashkuara të Amerikës  dëshirojnë në Ballkan të vendoset paqja dhe qëndrueshmeria rajonale.

Duke folur për programin e mëngjesit të Televizionit shtetëror serb, Daçiç la të kuptohet se zyrtari i lartë amerikan është njohës i mirë i rrethanave në Ballkan e sidomos në Serbi ku ka shërbyer si diplomat në vitet nëntëdhjetë.

“Është i martuar me një beogradase po nuk e di sesa është epërsi, sa është mangësi, në këtë rast, për shkak se do të jetë i detyruar të dëshmojë se nuk është subjektiv”– deklaroi të shtunën kryediplomati serb, duke nënvizuar se parakusht për zhbllokimin e dialogut Kosovë-Serbi dhe arritjen e një zgjidhjeje të shpejtë e të qëndrueshme, është heqja e tarifave doganore për mallrat serbe.

Megjithëse pranoi se administrata amerikane nuk vë në pikëpyetje pavarësinë e Kosovës, prapëseprapë në caktimin e Matthew Palmer-it Përfaqësues të Posaçëm për Ballkanin Perëndimor, Daçiq sheh një ndryshim në politikën amerikane.

‘Ky është konfirmim i gjithë asaj që kam folur edhe më herët. A kam thënë se administrata amerikane ka ndryshuar qëndrimin e vet; A kam folur se administrata amerikane nuk e ka ndryshuar qëndrimin për pavarësinë e Kosovës, por ka ndryshuar qëndrimin për atë se kjo çështje nuk është zgjidhur dhe duhet të zgjidhet. Përse do të emëronin Përfaqësues të Posasçëm nëse kjo punë është zgjidhur?’- pyeti ministri serb, duke bërë të ditur se me Matthew Palmerin do të ketë të martën në Bled takimin e parë.

Departamenti amerikan i Shtetit njoftoi se si Përfaqësues i Posaçëm, Matthew Palmer më një shtator do të shkojë në Slloveni për të marrë pjesë në Forumin Strategjik të Bledit.

Ai gjithashtu do të përfaqësojë Shtetet e Bashkuara në takimin e Drejtorëve të Quint-it për Ballkanin në Bruksel dhe do të marrë pjesë në takimet që do të mbahen në Vjenë dhe në Podgoricë, përkatësisht më 4 dhe 10 shtator./ABC News Albania 24/7

C54D908E-EF26-4E5B-9809-B83E4915BF33_w1023_r1_s.png
ent ela22:57 | 30/08/2019

Sekretari i Shtetit ka emëruar Zëvendës Ndihmës Sekretarin Matthew Palmer si Përfaqësuesin e tij të Posaçëm për Ballkanin Perëndimor.

“Në këtë rol, – tha Departamenti i Shtetit, – zoti Palmer do të udhëheqë përpjekjet tona për të forcuar angazhimin diplomatik amerikan në mbështetje të paqes, stabilitetit dhe begatisë në rajon dhe për t’u përqëndruar në integrimin e vendeve të Ballkanit Perëndimor në institucionet perëndimore.”

Departamenti amerikan i Shtetit njofton se si Përfaqësues i Posaçëm, zoti Palmer do të shkojë në Slloveni duke filluar nga 1 shtatori për të marrë pjesë në Forumin Strategjik të Bledit. Ai gjithashtu do të përfaqësojë Shtetet e Bashkuara në takimin e Drejtorëve të Quint-it për Ballkanin në Bruksel dhe do të marrë pjesë në takime në Vjenë dhe Podgoricë, nga 4 deri më 10 shtator.

Përveç shërbimit si Përfaqësues i Posaçëm i Sekretarit, zoti Palmer do të vazhdojë të jetë Zëvendës Ndihmës Sekretar në Zyrën e Çështjeve Evropiane dhe Euroaziatike, një post që ai mban që nga viti 2018. Më parë, ai ishte Drejtor i Zyrës për Evropën Jugore dhe Qendrore. /VOA

matthew-palmer-1280x720.jpg
nev ila19:07 | 28/06/2019

Zëvendës ndihmës sekretari amerikan i Shtetit për Europën, Matthew Palmer ka deklaruar se zgjedhjet lokale në Shqipëri duhet të zhvillohen më 30 qershor. Në një intervistë për VOA, ai u ka bërë thirrje liderëve të opozitës që të distancohen nga dhuna, ndërsa ka nënvizuar se përgjimet e publikuara në gjermanen “Bild” duhet të hetohen seriozisht.

Zëvendës ndihmës sekretari amerikan i Shtetit për Europën, Methju Palmer ka deklaruar se Shtetet e Bashkuara njohin 30 qershorin si datë legjitime për mbajtjen e zgjedhjeve vendore në Shqiperi. Në një intervistë për “Zërin e Amerikës”, Palmer ka theksuar se pas zgjedhjeve do të formohet Gjykata Kushtetuese dhe palët do të mund të adresojnë atje pakënaqësitë e tyre lidhur me procesin.

Ne presim që zgjedhjet të zhvillohen më 30 qershor. Shpresojmë që ato të zhvillohen në mënyrë të qetë e transparente. Pas zgjedhjeve do të formohet Gjykata Kushtetuese dhe shpresojmë që mosmarrëveshjet për kohën e zhvillimit të zgjedhjeve të zgjidhen përmes institucioneve të vendit”, tha Palmer.

Palmer ka theksuar se zgjedhjet do të konsiderohen legjitime nga faktori ndërkombëtar pavarësisht refuzimit të opozitës për të marrë pjesë në to.

“Është një situatë më pak se ideale, që zgjedhjet vendore të zhvillohen pa pjesmarrjen e opozitës, por kjo nuk do të thotë që zgjedhet në vetëvete nuk janë të vlefshme. Njerëzit do të kenë mundësi të dalin për të votuar, për të shprehur mendimin e tyre, askush nuk duhet t’i pengojë për këtë”, tha ai.

Në vijim Palmer ka shprehur shqetësimin e tij për verifikimin e akteve të dhunës gjatë ditës së zgjedhjeve dhe në emër të administratës amerikane i ka bërë thirrje opozitës që të distancohet nga akte të tilla.

“Absolutisht. Dhe u bëjmë thirrje udhëheqësve të opozitës t’ua bëjnë të qartë përkrahësve të tyre që më 30 qershor të mos ketë dhunë, që askush të mos pengojë të drejtën e atyre që dëshirojnë të marrin pjesë në zgjedhje” u shpreh zyrtari amerikan.

Sa u takon përgjimeve të publikuara në revistën gjermane “Bild”, zyrtari i Departamentit të Shtetit ka nënvizuar se ato duhet të hetohen me seriozitet nga institucionet shqiptare.

Këto janë akuza serioze që duhet të hetohen. Ne do të mbështesim një hetim nga institucionet dhe autoritetet shqiptare, një hetim që është profesional, transparent, që të çon drejt një përfundimi. Këto janë akuza shumë serioze, që kërkojnë hetime serioze”, deklaroi ai.

Matthew Palmer ka shtuar më tej se administrata amerikane shpreson që pas 1 korrikut situata në Shqipëri të ndryshojë. Ai ka theksuar se pret që qeveria dhe opozita të ulen në dialog për të realizuar reformën elektorale sipas rekomandimeve të ODIHR-it, gjë që sipas tij do të krijonte kushtet që në të ardhmen zgjedhjet të zhvillohen me mbështetjen e të gjitha palëve./ABC News Albania 24/7

presidenca-1-1280x533.jpg
nev ila18:42 | 27/06/2019

Presidenca i ka dhënë përgjigje indirekt qëndrimit të dhënë nga Zv.Ndimës Sekretari i SHBA-ve, Mathew Palmer, duke dhënë vlerësime vetëm për qëndrimin e Kryetarit të Komisionit të Politikës së Jashtme të Kongresit Amerikan, Eliot Engel.

Zëdhënësi i Presidentit, z.Tedi Blushi i pyetur nga mediat mbi deklaratat e bëra nga z.Palmer në VOA deklaroi se:

Presidenti i Republikës Sh.T.Z Ilir Meta vlerëson deklaratën e përgjegjshme, të vëmendshme e njëkohësisht shqetësuese të Kryetarit të Komisionit të Politikës së Jashtme të Kongresit Amerikan, Eliot Engel, këtij miku të sprovuar të Shqipërisë, Kosovës dhe shqiptarëve, mbi situatën e vështirë politike në Shqipëri dhe mbi rëndësinë imediate të rivendosjes së dialogut dhe shtetit të së drejtës.

Presidenti i Republikës siguron Kryetarin e Komisionit të Jashtëm të Kongresit Amerikan, z.Eliot Engel dhe të gjithë miqtë e vërtetë të Shqipërisë në Shtetet e Bashkuara të Amerikës, se po bën dhe do të bëjë të gjitha përpjekjet që Shqipëria të mund të organizojë zgjedhje vendore gjithëpërfshirëse, demokratike, me standarde, të lira dhe të ndershme, ashtu siç e meriton një vend i NATO-s dhe një vend që dëshiron të bëhet anëtar i Bashkimit Europian“, duke mos u shprehur për qëndrimin e Matthew Palmer./abcnews.al

 

palmer.jpg
nev ila18:33 | 27/06/2019

Zëvendësndihmës sekretari amerikan i Shtetit për Europën, Matthew Palmer ka deklaruar se zgjedhjet lokale në Shqipëri duhet të zhvillohen më 30 Qershor. Në një intervistë për VOA, ai ka theksuar se pakënaqësitë duhet të adresohen në institucionet e vendit pas procesit.

Zëvendësndihmës sekretari amerikan i Shtetit për Europën, Matthew Palmer ka deklaruar se Shtetet e Bashkuara njohin 30 Qershorin si datë legjitime për mbajtjen e zgjedhjeve vendore në Shqipëri.

Ne presim që zgjedhjet të mbahen më 30 qershor. Shpresojmë që procesi të shkojë mirë dhe të jetë transparent. Pas zgjedhjeve do të formohet Gjykata Kushtetuese dhe palët do të mund të adresojnë atje dhe në institucione të tjera të vendit pakënaqësitë e tyre lidhur me kohën e procesit”, tha Palmer.

Deklaratën e tij, Palmer e ka bërë në një intervistë për “Zërin e Amerikës”, duke konfirmuar linjën e njohur të administratës amerikane sa i takon zgjedhjeve lokale, të shprehur disa herë edhe nga diplomatë të tjerë të Shteteve të Bashkuara./ABC News Albania 24/7

palmer.jpg
G. P.08:14 | 17/06/2019

Diplomati amerikan, Matthew Palmer pohon se Rusia është duke bllokuar shumë procese në Ballkanin Perëndimor. Gjatë qëndrimit në Sarajevë ai foli edhe për çështjen e Kosovës.

Zëvendësi i ndihmësit të Sekretarit amerikan të Shtetit për Evropën, Matthew Palmer ka deklaruar se SHBA angazhohet për një raport shumë të ngushtë partneriteti mes NATO-s dhe Bosnjë-Hercegovinës. Gjatë qëndrimit në Sarajevë, ai tha se SHBA-ja e mbështet Bosnje-Hercegovinën në rrugën e saj të integrimeve euroatlantike.

“Programi kombëtar vjetor (të cilin do të duhej të hartonte Bosnje-Hercegovina) do të mundësonte forcimin e raporteve të B-H me NATO-n. Por këtë punë duhet ta bëjnë autoritetet e B-H e jo SHBA”, tha Palmer, duke shtuar, se vendi i tij e mbështet vendosjen e raporteve më të ngushta të mundshme mes NATO-s dhe B-H.

Palmer tha, se këtu bëhet fjalë për një çështje teknike dhe jo vendimin e anëtarësimit në NATO. “Kjo mundëson bashkëpunimin e NATO-s dhe B-H për forcimin e mekanizmave të mbrojtjes dhe sigurisë. Shpresoj se liderët e Bosnjes do të jenë në gjendje të arrijnë marrëveshje dhe të hartojnë programin e tyre të parë vjetor kombëtar”, tha diplomati amerikan.

Liderët e Bosnjes duhet të arrijnë marrëveshje edhe për krijimin dhe forcimin e autoriteteve federale. “Në të gjitha këto procese SHBA do të jetë partner dhe mik i popujve të B-H”, tha Palmer.

Milorad Dodik (Klix.ba)

Qëllimet e ndryshme të Moskës dhe Uashingtonit në Ballkan

Diplomati amerikan tha se SHBA dhe Rusia kanë qëllime të ndryshme në Ballkanin Perëndimor dhe në Bosnje-Hercegovinë. “Themeli i politikës amerikane në Ballkanin Perëndimor është mbështetja e integrimeve euroatlantike. Kjo do të thotë anëtarësim në BE dhe në NATO për të gjitha vendet e Ballkanit, që duan të anëtarësohen. Rusët kanë qëllime të tjera në Ballkan. Ata duan të shohin rajonin e ndarë me një nivel të lartë të tensioneve. Rusët në vitin 2016 kanë sponsorizuar përpjekjet për puç në Mal të Zi. Kanë punuar kundër Marrëveshjes së Prespës dhe kanë bllokuar rrugën euroatlantike të Maqedonisë së Veriut. Nuk ka dëshmi për të besuar se Rusia do të donte diçka tjetër në B-H”, tha Palmer.

Diplomati amerikan theksoi se vazhdojnë të mbeten në fuqi sanksionet kundër krerëve të serbëve në këtë vend Milorad Dodik dhe Nikola Shpiriq, sepse SHBA nuk ka parë kurrfarë ndryshimi në politikën e tyre. “Dodiku dhe Shpiriç janë nën sanksione, e ato janë rezultat  i vendimeve dhe qëndrimeve të tyre publike. Nëse duan heqjen e sanksioneve, ata e dinë se çfarë duhet të bëjnë”, tha Palmer duke shtuar se “SHBA mbetet një partner i fuqishëm në zbatimin e Marrëveshjes së Dejtonit, ndërsa B-H është një partner i fuqishëm në luftën kundër terrorizmit”.

Ahatoviq: “Dodiku dhe të tjerët janë satelitë rusë në Ballkan”

Nedzad Ahatovic Experte für Verteidigung Sarajevo (DW/S. Huseinovic)

Gjatë vizitës së Matthew Palmer në Banjalukë është mbajtur kongresi i partisë serbe SNSD, në të cilin Milorad Dodik është rizgjedhur kryetar i partisë. Dodik tha se Matthew Palmer është i mirëseardhur edhe në Banjalukë.

“Shpresoj se e ka kuptuar se ky është një qytet normal, me njerëz dhe institucione normale dhe se këtu nuk ka faktorë që përpiqen të dëmtojnë proceset”, tha Dodik. “E kuptoj pse boshnjakët dhe kroatët duan të futen në NATO, sepse në këtë aleancë janë edhe Kroacia dhe Turqia. Por edhe ata duhet të kuptojnë pse ne nuk duam të futemi në NATO”. Dodiku dhe Shpiriçi nuk do të hiqen nga lista e sanksioneve amerikane, përderisa vazhdojnë të punojnë kundër interesave amerikane, thotë analisti Nexhad Ahatoviç.

“Interesat amerikane në këtë rast janë të ngjashme me ato të B-H, e ato janë proceset euroatlantike. Ndaj Palmer ka fajësuar drejtpërdrejt Rusinë për frenimin e proceseve në Ballkan. Destabilizimi i B-H dhe rajonit përmes Dodikut dhe satelitëve tjerë rusë, i përgjigjet edhe interesave të presidentit të Rusisë, Vladimir Putin i cili në këtë mënyrë do të kundërshtojë interesat amerikane në këtë rajon, e nuk e do shtrirjen e NATO-s në këtë rajon. Konfliktet në Ballkan mund të destabilizojnë edhe BE-në dhe do të lehtësonin futjen e Rusisë në këtë rajon. Shikuar nga zhvillimet e deritanishme, Serbia është protagonisti kryesor i zbatimit të këtyre ideve”, thotë Ahatoviç për Deutsche Wellen.

Palmer për Kosovën.

Stellvertretender Abgeordneter im Außenministerium der USA, Matthew Palmer trifft sich mit dem Präsidenten des Kosovo Hashim Thaci (Büro des Kosovo-Präsidenten)

Diplomati amerikan për Evropën Matthew Palmer tha se përpjekjet për zgjidhjen e statusit të Kosovës nuk mund të ndërlidhen me Bosnje-Hercegovinën. “Normalizimi i raporteve mes Kosovës dhe Serbisë do të përmirësonte gjendjen e sigurisë në rajonin e Ballkanit Perëndimor, e kjo do të hapte edhe rrugën e Kosovës dhe Serbisë për anëtarësim në BE, që do të ishte shumë mirë edhe për B-H”, tha Palmer./DW

palmer-ne-serbi.jpg
G. P.17:53 | 10/06/2019

Zëvendës sekretari amerikan i Shtetit Matthew Palmer, gjatë qëndrimit të tij në Beograd theksoi mbështetjen e Shteteve të Bashkuara të Amerikës për vazhdimin e dialogut. Ndërsa presidenti i Serbisë Vuçiç ftoi homologun amerikan Trump të vizitojë vendin.

I dërguari amerikan, zëvendës ndihmës sekretari, Mathew Palmer, ka arritur për paqe në kryeqytetin serb. Njëzet vjet më parë Serbia vuri firmë mbi marrëveshjen e Kumanovës për të ndaluar bombardimet e NATO-së.

Palmer dy dekada më vonë i tha Serbisë të vazhdoj dialogun me Kosovën dhe Prishtinën porositi për ta hequr taksën. Me presidentin, Aleksandër Vuçiç, tha bisedimet nuk kanë alternativë.

“SHBA mbështesin dialogun e udhëhequr nga BE për normalizim të plotë në mes të Beogradit dhe Prishtinës. Ne mendojmë se kjo është rëndësishme. E shohim taksën si një pengesë dhe do të donim t’i shohim të hiqen apo të suspendohen që të mundësojnë uljen në bisedime, për të mbështetur dhe siguruar një të ardhme Evropianë për Serbinë dhe Kosovës, por edhe për tërë Ballkanin Perëndimor”, tha Palmer.

Dekadat kanë kaluar që nga lufta, por në paqe qëndrimet për marrëveshje nuk janë përafruar. Vuçiç u shpreh skeptik për dialogun pa hequr tarifën. Falenderoj Amerikën për partneritet pavarësisht se ndan mendime të ndryshme për bombardimet. Presidenti serb shprehi dyshime për takimin e Parisit, duke u përgjigjur me pyetje se kur nuk mund të importohen as biskotat si mund të flitet për paqe?

“Nuk e di nëse takimi në Paris do të ndodh pasi nuk e di se sa do të jenë të gjithë të gatshëm të dëgjojmë të njëjtën histori dhe pa u hequr taksat si të diskutojmë për dicka tjetër. Por, unë dua që të kemi një marrëveshje të kompromisit dhe kërkojmë të kuptohet edhe pozita jonë”, tha Vuçiç.

Palmer premtoi mbështetjen e SHBA për dialogun. Vuçiç ftoi Donald Trump të vizitojë Serbinë në vendin ku siç tha ka mbështetjen më të madhe./ABC News Albania 24/7

edi-rama-2-1280x750.jpg
G. P.16:18 | 08/06/2019

Pas thirrjes që i drejtoi opozitës zëvendësndihmës sekretari amerikan i Shtetit Matthew Palmer për të shmangur dhunën në protesta, ka reaguar kryeministri Edi Rama në Twitter.

“Prandaj është ajo që është Amerika se nuk e kupton lojën me Kushtetutën;nuk e pranon politikën në dëm të zgjedhjeve demokratike;nuk e toleron dhunën kundër institucioneve – e në këtë rast s’ka se si e fal kundërvënien ndaj Reformës nē Drejtësi! Vetëm përpara drejt 30qershorit”, shkruan kryeministri Rama./ABC News Albania 24/7

Palmer-deklaratat-1280x739.jpg
G. P.16:08 | 08/06/2019

Zyrtari i lartë amerikan Matthew Palmer jep paralajmërime të forta për kryetarin e opozitës Lulzim Basha dhe kryetaren e LSI Monika Kryemadhi. Palmer shprehet se nëse në protestën e sotme do të ketë dhunë, përgjegjëse do të jetë opozita. Zv/ndihmës Sekretari i Shtetit deklaron gjithashtu se me 30 Qershor, amerikanët do të monitorojnë procesin zgjedhor.

Zëvendësndihmës Sekretari i Shtetit në SHBA Matthew Palmer gjatë një interviste ka deklaruar se nëse në protestën e kësaj të shtune do të ketë dhunë, përgjegjëse është opozita.

“Dua të jem shumë i qartë me Z. Basha dhe Znj. Kryemadhi nëse në protestat e ardhshme ka akte dhune, për ne ata do të jenë përgjegjësit. Demonstratat e dhunshme po dëmtojnë përpjekjet e Shqipërisë për reforma demokratike si dhe perspektivën e vendit për të ecur përpara në rrugën drejt BE”.

Palmer jep edhe një mesazh për ata që do të tentojnë të pengojnë qytetarët të votojnë ne zgjedhjet e 30 Qershorit.

“Gjatë vizitës time në Prill, e nxita opozitën të merrte pjesë në zgjedhje. I kemi paralajmëruar drejtuesit e opozitës të mos pengojnë procesin zgjedhor, çka siç e vërejta, mund të përbënte shkak për të mos u kualifikuar për të hyrë në SHBA. Ditën e zgjedhjeve, ekipet tona të ambasadës do të vendosen në qendra votimi për monitorim zgjedhor. Kemi në plan të shqyrtojmë raportimet për monitorimin zgjedhor të ekipeve tona si dhe ato të ODIHR”.

Palmer thotë me tej se Shtetet e Bashkuara mbeten të përkushtuara për të punuar me partnerët shqiptarë dhe të BE për të siguruar integrimin me sukses të Shqipërisë, ndërsa shprehur mbështetje edhe për procesin e reformave gjyqësore legjitime dhe kushtetuese./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono