matteo salvini

salvini.jpg
G. P.10:47 | 17/07/2019

Zëvendëskryeministri i Italisë, Matteo Salvini, hodhi poshtë pretendimet se partia e tij populiste është përpjekur të marrë financime të fshehta nga Rusia. Ai ndërkohë ka shtuar komentet në mbrojtje të asaj që e quan “kulturë e krishterë” si dhe për çështjen që e ka shpërblyer më shumë në zgjedhje, emigracionin.

Ndërsa prokurorët e Milanos pohojnë se partia e ekstremit të djathtë Lega ka kërkuar financime të fshehta ruse, zëvendëskryeministri italian ka shtuar komentet e tij anti-emigracion në tubimet dhe në faqet e tij të mediave sociale, duke e lidhur migracionin me krimin dhe papunësinë dhe duke paralajmëruar se kjo është kërcënim për kulturën tradicionale të Italisë.

Kritikët e zotit Salvini thonë se ai po përpiqet të largojë vëmendjen nga akuzat për Rusinë dhe nga problemet e ekonomisë së vendit, e cila vazhdon të jetë e zhytur në recesion.

Pretendimet për financime të fshehta ruse morën një shtysë të re javën e kaluar kur faqja e lajmeve në internet Buzzfeed publikoi audio të një takimi në një hotel të Moskës midis ish-zëdhënësit të shtypit të Salvinit, dhe disa rusëve të paidentifikuar duke diskutuar mbi mundësinë e devijimit të 65 milionë dollarëve drejt partisë Lega nëpërmjet transaksioneve të naftës ruse me çmim të ulur.

Prokurorët e Milanos kërkuan të marin në pyetje zotin Savoini, i cili organizoi një darkë shtetërore më 4 korrik në Romë për nder të Presidentit rus Vladimir Putin, por sipas agjencisë italiane të lajmeve Ansa, ish-gazetari ushtroi të drejtën e tij për të mos iu përgjigjur pyetjeve.

Zoti Salvini po ndjek një qëndrim të ngjashëm me mediat. Në një deklaratë të lëshuar javën e kaluar ai tha se nuk ka marrë “asnjë rubël, asnjë euro, asnjë dollar apo ndonjë litër vodka”. Ai shtoi se admirimi i tij për presidentin rus Vladimir Putin dhe kundërshtimi i tij ndaj sanksioneve evropiane të vendosura ndaj Rusisë për aneksimin e Krimesë në vitin 2014, janë veprime “falas”.

Të hënën ai u tha gazetarëve se: “nuk kam ndërmend të flas më për paratë që kurrë nuk i kam parë dhe që kurrë nuk i kam kërkuar”.

Deri më tani zoti Salvini u ka rezistuar thirrjeve në rritje për të dalë përpara parlamentit të vendit për t’iu përgjigjur pyetjeve në lidhje me pretendimet për takime të zëdhënësit të tij zotit Savoini me presidentin e një shoqërie biznesi italiano-ruse dhe një nga kontaktet kryesore të Lega-s, me Kremlinin.

Në vend të kësaj, Salvini ka përforcuar retorikën e tij kundër emigrantëve përballë kritikave të opozitës se ai po nxit urrejtjen racore. Duket se kjo strategji po sjell rezultate në sondazhet e opinionit. Partia e tij Lega ka gëzuar një rritje të pandërprerë të mbështetjes në kurriz të partnerit të saj në qeverinë e koalicionit, Lëvizja Pesë Yje.

Të martën, ai i dërgoi një letër prefektëve të Italisë duke u bërë thirrje atyre të përgatisin “një raport mbi praninë e vendbanimeve të komuniteteve rome, sinti dhe kaminanti” brenda territoreve të tyre, në mënyrë që të “përgatisin një plan pastrimi”të kampeve të paligjshme.

Zoti Salvini ka mbajtur një sërë tubimesh të stilit Trump në Italinë qëndrore, një rajon tradicionalisht i majtë, i njohur si “brezi i kuq” i vendit. Në një tubim të shtunën, pranë Bolonjës, zoti Salvini mburrej se do të ketë shumë më pak tregtarë të huaj në plazhet e Italisë këtë vit për shkak të operacioneve të policisë. Ai gjithashtu përshëndeti ekipin lokal të futbollit për mos rekrutimin e lojtarëve të huaj.

Turma e mbështetësve të tij brohoriste, duke mbajtuar flamuj blu dhe të bardhë me mbishkrimin “Prima l’Italia”, “Italia e para”, ndërsa zoti Salvini tallej me kapitenen gjermane të një anijeje shpëtimi të emigrantëve dhe me stillin e saj afrikan të flokëve. Kapitenja Carola Rackete, e cila sfidoi zotin Salvini duke zbarkuar 40 emigrantë në Siçili,

ka thënë tashmë se ka në plan të ngrejë padi ndaj zëvendëskryeministrit të Italisë për komentet fyese ndaj saj.

Një javë më parë në qytetin malor të Orvietos, zoti Salvinini bëri lidhje mes të huajve dhe krimin ndërsa organizatat bamirëse që i ndihmojnë të huajt, si faktorë që duan të shkatërrojnë kulturën tradicionale të krishterë.

Në faqen e tij në Facebook, zoti Salvini ka akuzuar organizatat bamirëse të mbështetura nga BE-ja për përpjekje për të shkatërruar qytetërimin evropian. “Këto nuk janë operacione shpëtimi. Ato janë operacione të planifikuara për të pushtuar Evropën, të sponsorizuara nga miliarderë, jo filantropë, nga spekulatorë miliarderë si Sorosi, që duan të anullojnë rrënjët, kulturën dhe traditën e njerëzve dhe duan skllevër të rinj”, shkruhej në faqen e tij të Facebook-ut.

Udhëheqësi nacionalist populist i Hungarisë Viktor Orban, gjithashtu ka përqendruar zemërimin e tij mbi filantropin amerikan George Soros, i lindur në Hungari, duke u bërë objekt i akuzave për antisemitizëm.

Pavarësisht kritikave nga partitë liberale të Vatikanit dhe Italisë, sondazhet tregojnës se retorika e zoti Salvini po i rrit atij mbështetjen, duke nxitur spekulime në rritje se ai së shpejti do të përpiqet të rrëzojë qeverinë e koalicionit për ta çuar vendin në zgjedhje të parakohshme. Ai shpreson se një veprim i tillë do t’i hapte rrugën për të qeverisur vendin i vetëm ose me mbështetjen e së djathtës ekstreme të Italisë. Mbështetja në nivel kombëtar për partinë Lega tani është në nivel 38 për qind, vetëm dy për qind më pak se pragu që do t’i jepte partisë shumicën në parlament.

Megjithatë prokurorët italianë mbeten një rrezik për Salvinin, thonë analistët. Ata mund ta godasin atë me ndihmën e partnerit në koalicion të Lega-s.

Ligjvënësit e Lëvizjes Pesë Yje tani kanë nisur të kërkojnë përgjigje për pretendimet e vazhdueshme se zoti Salvini ka kërkuar financime të fshehta ruse për partinë e tij. Zëvendëskryeministri dhe rivali politik Luigi Di Maio i Lëvizjes Pesë Yje ka bërë thirrje për një komision parlamentar për të hetuar financimin e partive politike të vendit.

I pyetur nga gazetarët të hënën nëse zoti Salvini duhet të paraqitet përpara parlamentit, Kryeministri i Italisë Giuseppe Conte, i cili u zgjodh në këtë post nga Lëvizja Pesë Yje, u përgjigj: “pse jo?!”

Ai shtoi se: “ne besojmë tek transparenca në çdo nivel, në parlament para së gjithash. Udhëzimet tona janë të qarta: transparencë absolute për qytetarët italianë dhe besnikëri absolute ndaj interesave kombëtare. Qeveria nuk do të lëvizë asnjë centimetër ndaj këtyre parimeve”.

Një ditë më parë Kryeministri Conte vuri në dukje se zoti Savoini u shtua në listën e mysafirëve për darkën e 4 korrikut me presidentin Putin me kërkesë të zyrës së zotit Salvini. Vetë Matteo Salvini kishte thënë më herët se nuk e dinte pse zoti Savoini kishte marrë pjesë në këtë darkë./VOA

emigrantet-1280x682.jpg
G. P.17:45 | 05/07/2019

Pavarësisht deklaratave të forta të ministrit të Brendshëm italian, një tjetër varkë me 54 emigrantë i është drejtuar Lampeduzës. Salvini tha në mënyrë të prerë se varka në pronësi të një organizate jo fitimprurëse nuk do të lejohet të ankorojë në portin italian.

Një tjetër organizatë jo fitimprurëse sfidon ministrin e Brendshëm Salvini. 54 emigrantë në një varkë me vela i janë drejtuar Lampeduzës, pavarësisht se zv/kryeministri italian deklaroi prerë se varka nuk mund të hyjë në port. Ndërkohë mbrëmjen e të enjtes mbërriti në ishull një varkë me në bord 14 emigrantë që i shtohen 55 të tjerëve të shpëtuar nga ushtarët italianë.

Mjeku në bordin e varkës shprehet se fillimisht emigrantët u gjetën në një gomone në kushte të mira. Problem ishte se ndodheshin në ujërat e Libisë, dhe autoritetet po vinin t’i merrnin. Për këtë arsye organizata i mori në varkën e tyre dhe u drejtuan për në Itali.

Të mërkurën 80 emigrantë u mbytën në det pranë brigjeve të Tunizisë. Vetëm katër prej tyre shpëtuan falë ndërhyrjes së marinarëve tunizianë. Tunizia nuk ka qendra pritjeje për emigrantët. Autoritetet tuniziane dhe disa varka me peshkatarë kontrolluan zonën për të gjetur kufomat por nuk zbuluan gjë./ABC News Albania 24/7

bashkimi-europian.jpg
G. P.23:34 | 28/05/2019

Bashkimi Europian mund të ndëshkojë me një gjobë miliardere Italinë për shkak të nivelit të lartë të borxhit dhe defiçitit. Duke reaguar ndaj lajmit, zëvendëskryeministri Mateo Salvini ka deklaruar se do të luftojë kundër rregullave fiskale të Europës së vjetër.

Komisioni Europian mund të gjobisë me 3 miliardë euro Italinë për shkelje të rregullave financiare të BE-së. Sipas agjencisë së lajmeve “Reuters”, Brukseli ka gjithashtu gjasa të nisë një procedurë disiplinore ndaj Italisë më 5 Qershor, për shkak të gjendjes së rëndë të financave publike.

Masat ndëshkuese do të pasqyrohen në një letër që Komisioni pritet t’i dërgojë Romës zyrtare këtë javë. Lajmi është konfirmuar edhe nga vetë zëvendës kryeministri i Italisë, Mateo Salvini, partia e të cilit triumfoi në zgjedhjet europiane të mbajtura ditën e diel.

“Le të shohim nëse kjo letër do të vijë”, ka thënë Salvini, duke shtuar se do të përdorë të gjitha energjitë e tij për të luftuar rregullat fiskale të BE-së, sipas tij të padrejta dhe të papërshtatshme me kohën.

Numri dy i qeverisë italiane ka theksuar se është anormale që në një kohë kur papunësia tek të rinjtë në disa rajone të Italisë është 50 për qind nga Brukseli të vijë 3 miliardë euro gjobë dhe të kërkohen 20 miliardë euro rritje taksash në shtator.

“Votimi i së dielës ishte një refuzim i Europës së vjetër të bazuar tek shkurtimet. Tani, nëse dëshirojnë, liderët europianë mund të ulen në tryezë dhe të kenë në fokus punësimin, kuotën e papunësisë dhe ekonominë reale”, ka shtuar Salvini./ABC News Albania 24/7

16216551_303.jpg
G. P.08:14 | 20/05/2019

Komisariati i OKB për Refugjatë ka kërkuar me ngulm nga Bashkimi Evropian që të ndalojë kthimin e refugjatëve nga Deti Mesdhe në Libi, me shpjegimin, se situata e tyre në këtë vend është tepër e rëndë. UNHCR mendon se duhet parandaluar me të gjitha mjetet që refugjatët të kthehen në Libi, në kampet e atjeshme. “Njerëzit që shpëtohen në Detin Mesdhe nga rojet bregdetare, nuk duhet të kthehen kurrsesi në Libi”, tha drejtori i UNHCR në Gjermani, Dominik Bartsch, për gazetën “Welt am Sonntag”. “Duhen ndërmarrë të gjitha masat e mundshme për të parandaluar një gjë të tillë, me qëllim që të evitohen vuajtjen e njerëzve në këto qendra në Libi.”

Gjendja e refugjatëve dhe migrantëve në Libi, sipas tij, është keqësuar edhe më shumë kohët e fundit. “Gjendja humanitare dhe situata e njerëzve në kampet e Libisë është e mjerueshme. Nuk ka ushqime dhe ujë, ndërkohë që shumë prej tyre kanë nevojë urgjente për ndihma mjekësore. Këtu duhet shtuar edhe fakti që në kryeqytetin Tripoli ka dhe shumë grupe të rrezikshme të armatosura.” UNHCR ka arritur që deri tani të shpëtojë rreth 800 persona nga këto kampe. Kapacitetet e tyre janë të limituara. “Edhe 3300 refugjatë kanë frikë për jetën në këto kampe”, tha përfaqësuesi i UNHCR.

Kërkesa ndaj BE

Bartsch i ka bërë thirrje qeverive të BE që të ndihmojnë, të mos keqpërdorin dhe kriminalizojnë këtë problem për qëllime të veta. “Kufizimet juridike dhe logjistike duhet të pezullohen, sepse dhjetëra mijëra njerëz janë të rrezikuar. Ata po mbijetojnë vetëm duke i falënderuar punës së organizatave joqeveritare.” Vendet e BE duhet të ndihmojnë urgjentisht, tha Bartsch.

Një anije e organizatës gjermane të ndihmës, Sea-Watch u konfiskua nga autoritetet italiane, që i morën 47 refugjatët nga bordi dhe i dërguan në ishullin Lampeduza. Zëdhënësi i organizatës, Ruben Neugebauer kishte thënë më parë, se gjendja në këtë anije ishte keqësuar dhe se kërcënonte “rreziku i vetëvrasjeve”. Në anije kishte fëmijë dhe të sëmurë.

Ministri djathtist i Brendshëm i Italisë Matteo Salvini kishte thënë se limanet e këtij vendi nuk do ta pranojnë anijen “Sea-Watch 3”./DW

macron.jpg
G. P.20:55 | 04/05/2019

Vetëm 3 javë nga zgjedhjet e Parlamentit Europian, në Francë gara elektorale me gjasë do të jetë një “Déjà vu” e presidencialeve të vitit 2017, ku fitues u shpall Emmanuel Macron.

Sot, 2 vjet më pas beteja do të jetë sërish mes partisë së presidentit francez “La République en Marche” dhe forcës së ekstremit të djathtë të Marine Le Pen, “Le Rassemblement National”.

Sondazhet në Francë flasin për një rënie të lehtë të Macron me 1.5% nga viti 2017. Megjithatë presidenti vijonë të kryesojë garën me 22.5%, ndërsa Le Pen e ndjek fare pranë me 21.5%.

Por një tjetër projektim e nxjerr forcën euro-skeptike të Le Pen në vend të parë me 24%, me një avantazh prej 3 pikësh përqindje ndaj Macron që arriti në 21%.

Marine Le Pen mbështet fuqishëm frontin populist të kryesuar nga zv/kryeministri italian Matteo Salvini, që bëson se rimëkëmbja e Europës nis kryesisht nga dëbimi i emigrantëve.

Emmanuel Macron nga ana tjetër propozoi një marrëveshje të re Shengen me më pak vende, një lëvizje që shihet nga analistët si politikë për të kënaqur valën euroskeptike që po rritet gjithnjë e më shumë në Europë.

TV Klan

aleksander-vucic.jpg
G. P.10:20 | 03/05/2019

Presidenti serb, Aleksandar Vuçiç, pritet të takohet në Tiranë javën e ardhshme me Përfaqësuesen e Lartë të BE-së, Federica Mogherini.

Sipas mediave kosovare, që citojnë agjencinë serbe të lajmeve Tanjug, Vuçiç, më 8 Maj do të udhëtojë në Romë, ku do të takohet me zëvendëskryeministrin e Italisë, Matteo Salvini.

Temë kryesore e diskutimit të tyre do të jetë Kosova. Pas këtij takimi, presidenti Vuçiç në mbrëmje udhëton për në Tiranë për t’u takuar me Përfaqësuesen e Lartë të BE-së, Federica Mogherini.

Si me zv/kryeministrin italian Salvinin edhe me Mogherinin, presidenti Vuçiç do të bisedojë për Kosovën. Ky takim do te zhvillohet në kuadër të procesit të samitit “Brdo-Brijuni”, i cili mbahet dy ditë radhazi në Tiranë.

Kjo do të jetë vizita e dytë e Aleksandër Vuçiç në Tiranë, por e para si president i Serbisë. Herën e parë, Vuçiç ishte në kryeqytetin shqiptar në vitin 2015, si kryeministër i Serbisë./ABC News Albania 24/7

salvini.jpg
G. P.08:19 | 02/05/2019

Kryeministri i Hungarisë Viktor Orbán dhe ministri i Brendshëm i Italisë Matteo Salvini vijnë nga dy kampe të ndryshme politike. Por në takimin e tyre të parë në verën e kaluar ata dukeshin si miq të kahershëm dhe përfaqësues të një rruge të përbashkët. Ata u përqafuan përzemërsisht dhe ishin shumë miqësorë mes tyre. Orbáni e quajti Salvinin një yll të politikës së djathtë evropiane, me të cilin mund të shkëmbejë ide dhe përvoja.

Takimi i gushtit të vitit 2018 u mbajt në fillim të fushatës së Orbánit për zgjedhjet evropiane dhe paraqet një gjest demonstrativ kundër kritikëve në Partitë Popullore Evropiane, të cilave u përket edhe partia e tij Fidesz.

Salvini në vizitën e parë në Hungari

Italians Innenminister Matteo Salvini trifft den ungarischen Premierminister Viktor Orban in Mailand (Reuters/M. Pinca)

Tani, pak javë para zgjedhjeve për Parlamentin Evropian, në kohën kur PPE e ka suspenduar anëtarësinë e Fidesz në këtë organizatë, Salvini këtë të enjte vjen në vizitën e tij të parë në Hungari. Zyrtarisht ai është ftuar nga homologu i tij hungarez, ministri i Brendshëm Sándor Pintér. Por më së shumti vëmendje zgjon takimi i tij me Orbánin.

Zëdhënësi i qeverisë hungareze nuk ka dashur të përgjigjet në kërkesën e Deutsche Welles, për të shpjeguar ecurinë e takimit të Salvinit me Orbánin. Ndërsa gazeta Magyar Nemzet, shkruan se Orbáni dhe Salvini do të këshillohen për mundësitë e bashkëpunimit në Parlamentin Evropian.

Kryeministri i Hungarisë është më i afërt me idetë e Salvinit sesa idetë e kristinademokratëve, të cilëve u përket zyrtarisht. Orbáni është duke përhapur teori konspirative, të cilat mund të lexohen edhe në pamfletet e terroristëve të djathtë si Brenton Tarrant dhe Anders Breivik.

Retorika e paqëndrueshme

Orbáni kritikon Komisionin e BE për “tendenca ndryshimi të strukturës së banorëve”, ku popullata shumicë e krishterë të zëvendësohet me “masat e një kulture dhe civilizimi tjetër islam”. Orbáni ka deklaruar disa herë javët e fundit se zgjedhjet e ardhshme do të vendosin për të ardhmen e civilizimit të krishterë evropian. Që tani, sipas tij, të krishterët po diskriminohen në Evropë, ndërsa myslimanëve po u jepet përparësi.

Është pikërisht kjo retorikë, e cila ka rezultuar së fundi me largimin e Fidesz-it nga PPE, për shkak të pakënaqësisë gjithnjë e më të madhe me politikën e Orbánit dhe tendencat jo demokratike në Hungari.

Orbán e ka shkaktuar qëllimisht këtë konflikt me PPE, por ai do të dëshironte të mbetej në gjirin e këtyre partive, me qëllim që t’i përfitojë ato për politikën e vet. Kjo me synimin që të forcojë influencën e vet tek krahu i djathtë politik. Kjo shihet edhe nga fakti që Fidesz-i ka refuzuar deri tani bashkëpunimin e drejtpërdrejtë me partitë djathtiste, ndër to edhe me Alternativën për Gjermani AfD. Orbáni nuk e ka mbështetur as idenë e Salvinit në prill të këtij viti për krijimin e një “Aleance të popujve dhe kombeve evropiane”.

Aleati i ri

Në rast dështimi total të raporteve me PPE, Orbán po përgatit terrenin për aleanca të reja. Ai ka raporte të ngushta me partinë polake PiS, të Jaroslaw Kaczynskit, ndonëse ai vet është më fleksibël se ideologu i papërmirësueshëm Kaczynski. Ndër aleatët e tij është edhe shefi i Partisë socialdemokrate në Rumani, Liviu Dragnea, i cili përdor retorikë të ngjashme si Orbáni. Këto parti sikur edhe Salvini, janë një lloj Plani B për kryeministrin e Hungarisë. Madje edhe më shumë, sepse Orbáni po punon me përkushtim për të krijuar imazhin e mbrojtësit dhe heroit të politikës së djathtë evropiane – dhe ate me sukses, që dëshmojnë sondazhet e fundit për politikanët në Evropë.

Kontaktet

Orbáni ka raporte të ngushta edhe me Geert Wilders. Bashkëshortja e Wildersit është hungareze me origjinë dhe kjo ka bërë që gjatë vizitave të shpeshta në Hungari të ketë kontakte private edhe me Orbánin. Raporti i tyre i ngushtë privat nuk është ndonjë sekret. Orbáni ka raporte të ngushta edhe me ish-këshilltarin e Trumpit Steve Bannon. Orbáni nuk ka frikë as nga kontaktet me ekstremistët më të mëdhenj djathtistë, sepse në verën e kaluar është fotografuar edhe në neonazistë belgë në Bad Tusnad.

Ai ka bërë të ditur se pas Salvinit do të takohet edhe me ish-kancelarin austriak, shefin e FPÖ, Heinz-Christian Strache. Gazeta javore “168 óra” e ka quajtur këtë takim si “Balloja e monstrave”./DW

SALVINI-MACRON_ABC-M1-T1.mpg_snapshot_00.52.jpg
G. P.16:57 | 23/04/2019

Ministri i Brendshëm italian, Matteo Salvini, reagoi në rrjetet sociale pas arrestimit të Bledar Ibrahimit në Elbasan. Ai përshëndeti operacionin dhe falënderoi autoritetet italiane, por edhe ato shqiptare.

“Në shtëpinë e tij në Milano u gjetën materiale kompjuterike, gjurmë kontaktesh me radikalë islamikë si dhe dokumente foto dhe video që lavdëronin Xhihadin. Faleminderit gjykatës sonë dhe hetuesve që nuk hoqën dorë kurrë dhe faleminderit edhe autoriteteve në Tiranë. Asnjë pushim ndaj kriminelëve dhe fanatikëve që sjellin luftën në shtëpinë tonë”, shkruan në Facebook ai.

Bledar Ibrahimi 28 vjeç dhe u arrestua në Elbasan këtë të martë për terrorizëm. Ai u kap nga agjentët e antiterrorit të Policisë së Shtetit.

Interpol Roma e kishte shpallur në kërkim ndërkombëtar në date 15.4. 2019 mbi bazën e vendimit të arrestit të lëshuar nga Prokuroria e Republikës italiane në mars 2019, për veprën penale “Pjesëmarrje në organizatë terroriste”.

Ky person më parë është deportuar nga Italia si person i rrezikshëm për rendin dhe sigurinë publike në Itali, pasi dyshohet të jetë i përfshirë me organizata terroriste në Itali dhe Egjipt. /abcnews.al

sherr-shqiptari.jpg
G. P.09:11 | 18/04/2019

Një emigrant shqiptar në Itali u përfshi në një sherr me thika me dy nigerianë ditën e mërkurë. Ngjarja ndodhi në një vend të populluar, në lagjen “Gad” të qytetit të Ferrara-s.

Mediat italiane shkruajnë se gjatë përleshjes, ata shkaktuan panik mes banorëve që gjendeshin aty. Për pasojë, dy prej tyre mbetën të plagosur dhe të shtrirë në tokë siç duket nga pamjet. Ata u dërguan menjëherë në spital për të marrë ndihmën e menjëhershme mjekësore.

Por ky rast tërhoqi edhe vëmendjen e ministrit të Brendshëm italian, Matteo Salvini. Në një postim në rrjetet sociale, ai bëri publike foto nga vendi i ngjarjes, që prej disa kohësh është kthyer në një bazë për kriminelët.

“Përleshje e madhe me thikë mes një shqiptari dhe 2 nigerianëve në lagjen Gad të Ferrara-s. Më 3 Maj do të jem në qytet dhe në orët në vijim do t’u kërkoj të gjithë prefektëve që të nxjerrin një plan për të larguar banditët në qytet. Atë që nuk e bëjnë dot kryebashkiakët, e bëjmë ne“”, shkruante ai në Twitter.


Lagja “Gad”, edhe pse një zonë shumë e populluar në zemër të provincës Ferrara, është një nga zonat më të degraduara të qytetit. Prej shumë vitesh aty kanë ardhur emigrantë, shumica e të cilëve nigerianë, të cilët merren me shpërndarje të lëndëve narkotike./abcnews.al

salvini.jpg
G. P.13:13 | 12/12/2018

Të gjithë ata që i gëzohen sulmit në Strasburg, duke mbështetur në rrjetet sociale autorin e vrasjeve do të arrestohen menjëherë. Është ky parlajmërimi i ministrit të Brendshëm italian Salvini, i cili i ofroi bashkëpunim autoriteteve franceze.

Ministri i Brendshëm italian, Matteo Salvini, duke komentuar atentatet në Strasburg, ka kërkuar arrestimin e menjëhershëm të kujtdo që mbështet këtë masakër në rrjetet sociale. Ai theksoi se policia postare italiane po monitoron aktivitetet online për të identifikuara ata që festojnë vdekjen e dikujt tjetër.

Zëvendëskryeministri italian tha se pas ngjarjes në Strasburg, në të gjithë territorin italian është vendosur alarmi për të identifikuar personat e radikalizuar, terroristët dhe ekstremistët që mund  të kthehen në vend. Sipas tij do të përdoret çdo mjet për të verifikuar ata që hyjnë e dalin nga vendi pasi kjo është një detyrë për mbrojtjen e vendit dhe të kufijve

Salvini u shpreh i lumtur për faktin se falë Zotit, forcat italiane të sigurisë dhe shërbimi i inteligjencës në vend janë nga më të mirët në botë. Minsitri italian shprehu gatishëmrinë për të bashkëpunuar me autoritetet franceze për shkëmbim informacioni apo dhe për ndërhyrje./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono