matteo salvini

matteo-salvini-lega.jpg
G. P.09:08 | 30/07/2018

Ministri i Brendshëm italian, Mateo Salvini, ka këshilluar kryeministren britanike Tereza Mej që të mos tregohet shumë e butë me Bashkimin Evropian lidhur me negociatat për Brexit. Sipas tij, nëse nuk imponon linjë të ashpër, Brukseli do ta mashtrojë atë.

“Përvoja ime në Parlamentin Europian më thotë se ju ose impononi ose ju mashtrojnë”.

Kështu zëvendëskryeministri italian dhe ministri i Punëve të Brendshme, Matteo Salvini, në një intervistë me Sunday Times, i bën thirrje Kryeministres britanike Theresa May të miratojë një linjë më të ashpër në negociatat me Bashkimin Evropian për Brexit. Për Salvinin, “për disa parime nuk ka nevojë të jesh fleksibël, dhe May nuk duhet të ndërmarrë hapa prapa”.

Sipas asaj që raporton Sunday Times, Salvini akuzon Bashkimin Evropian se kërkon të ndëshkojë Mbretërinë e Bashkuara pasi ka votuar në favor të Brexit.

“Nuk ka objektivitet apo mirëbesim në anën evropiane”, vëren zëvendëskryeministri italian.

Më tej, Salvini pohon se Italia është një mik i Londrës dhe dëshiron që May të dalë me një marrëveshje të mirë.

“Unë shpresoj se negociatat do të përfundojnë mirë në mënyrë që Mbretëria e Bashkuar të shërbejë si një shembull për ata që largohen nga Bashkimi Evropian.”

“Më kujtohet referendumi si një shembull i pjesëmarrjes dhe lirisë,- shton Salvini,– shpresoj që kjo të jetë një mundësi për britanikët”./abcnews.al

salvini3-1244560.jpg
G. P.12:53 | 23/07/2018

Deklaratat e ministrit të Brendshëm italian, Matteo Salvini, për aneksimin e Krimesë, të cilin e quajti të ligjshëm dhe për revolucionin e rremë të 2014-ës në Kiev, kanë shkaktuar reagime të ashpra në Ukrainë.

Nuk kanë kaluar pa u vënë re fjalët e Matteo Salvini përsa i përket aneksimit të Krimesë nga Rusia. Sipas ministrit të Brendshëm italian, ky aneksim ishte i ligjshëm pasi ndodhi pas referendumit të mbajtur në vend.

Në intervistën e tij të gjatë të së premtes për Uashington Post, zv/kryeministri italian nuk e fshehu aspak simpatinë politike dhe njerëzore për presidentin rus, Vladimir Putin. Pas deklaratës për ligjshmërinë e aneksimit të Krimesë, e vendosur nga një referendum, Ukraina ka kërkuar një takim urgjent me ambasadorin italian në Kiev për t’i dorëzuar një notë proteste formale për deklaratat e ministrit Salvini.

Autoritet ukrainase shkruajnë se dënojnë qëndrimin e politikanit italian të pabazuar në fakte reale dhe në kontraditkë me normat e ligjit ndërkombëtar. Por jo vetëm kaq, lideri i Legës ka shtuar se manifestimet massive në Kiev në 2014-n, të cilat çuan dhe në ndryshimin e pushtetit, ishin pjesë e një revolucioni të rremë./abcnews.al

s.jpg
G. P.09:43 | 21/07/2018

Ministri i Brendshëm i Italisë ka paditur gazetarin e njohur Roberto Saviano, që e akuzon si “ministër të botës së krimit”. Përplasja mes Salvinit dhe autorit të librit “Gomorra” ka kulmuar për shkak të mbytjes së një nëne dhe bebes së saj në Mesdhe.

Ministri i Brendshëm i Italisë, njëkohësisht kryetar i partisë së ekstremit të djathtë, Matteo Salvini ka paditur për shpifje shkrimtarin e njohur Roberto Saviano. Përmes një postimi në Twitter, gazetari akuzonte Salvinin për vdekjen e emigrantëve që përpiqen të arrijnë Italinë, duke e cilësuar “ministër të botës së krimit”.

Në reagimin e tij, Salvini ka deklaruar se i pranon të gjitha kritikat, por nuk lejon askënd ta akuzojë për bashkëpunim me mafien. Saviano është një kritik i ashpër i qeverisë së përbërë nga Liga e Veriut dhe Lëvizja 5 Yjet. Ai fitoi famë në vitin 2006 përmes librit “Gomorra”, ku denonconte aferat e krimit të organizuar napoletan.

Që prej atëherë, ai jeton nën mbrojtjen e policisë, por ministri i Brendshëm ka deklaruar disa herë se do t’ia heqë truprojat. Padia e fundit vjen pasi vjen pasi një grup spanjoll shpëtimi gjeti një grua dhe fëmijën e saj të vogël të mbytur në Mesdhe.

Saviano akuzoi rojën bregdetare libiane se braktisi emigrantët dhe fajësoi Italinë se e mbështet atë. Më pas gazetari postoi një video të trupave të pajetë dhe i shoqëroi me komentin: “Kush e di sa i kënaqur do të jetë ministri”.

Që kur qeveria populiste mori pushtetin në qershor, Salvini ka zgjedhur një linjë të ashpër ndaj emigracionit, duke refuzuar shumë anije me klandestinë që kërkonin akses në portet italiane dhe duke bërë thirrje për deportime në masë.

 

SALVINI-1280x720.jpg
G. P.13:23 | 20/07/2018

Në një intervistë për Washington Post, ministri i Brendshëm italian, Matteo Salvini, u shpreh se aneksimi i Krimesë nga Rusia është i ligjshëm dhe se për Afrikën duhet një plan Marshall.

Nga plani Marshall për Afrikën deri tek projekti i një fronti sovran europian, por dhe rreth legjitimitetit të aneksimit të Krimesë nga ana e Rusisë. Është një intervistë e gjatë ajo e zv/kryeministrit dhe ministrit të Brendshëm italian, Matteo Salvini për Washington Post, ku lideri i Legës shpalos dhe ambiciet e tij personale.

Emigracioni mbetet një pikë kryesore në vizionin politik të Salvinit, duke lënë disa herë në hije dhe kryeministrin Conte. Për këtë të fundit Salvini shprehet se punojnë në sintoni por duke përdorur tone të ndryshme. Zëvendëskryeministri shtoi se me kolegët e Lëvizjes Pesë Yjet çdo gjë shkon mirë deri në momentin që respektohen rregullat e qeverisë.

Përsa i përket krizës së emigrantëve, Salvini thekson se objektivi përfundimtar nuk është shpërndarja e tyre mes vendeve të ndryshme europiane, por ndalimi i tyre për të mbërritur në Europë. E për këtë arsye sipas tij, duhet ndërhyrë në Afrikë me një plan Marshall, për të përmirësuar kushtet e tyre të jetesës në vendet e origjinës.

Përsa i përket faktit që etiketohet si populist, Salvini thotë se e cilëson një kompliment pasi njerëzit si ai sjellin një vizion të një Europe ndryshe ku çdo vend është i lirë të vendosë politikën e tij ekonomike.

Në politikën e jashtme, Salvini vlerëson vendimet e marra nga presidenti amerikan Donald Trump për emigrantët, duke mbajtur fjalën që i ka dhënë zgjedhësve të tij. Njësoj si me njohjen e Jeruzalemit si kryeqytet i Izraelit, për të cilin ministri i Brendshëm italian është shumë dakord.

Por nuk mendon njësoj si Trump, përsa i përket marrëdhënieve me Rusinë duke filluar nga sanksionet që duhen hequr sipas tij. Kjo pasi jo vetëm nuk po funksionojnë por dëmtojnë eksportin.

Ndërsa për aneksimin e Krimesë nga ana e Rusisë, Salvini e gjykon si të ligjshëm pasi ndodhi pas një referendum. Ai tha se në Krime ka disa zona historikisht ruse e që i përkasin me ligj federatës ruse. Ndërsa për atë që thuhet se referendumi u koordinua nga ushtarët rusë, Salvini thotë se është një këndvështrim, por jo i tij./abcnews.al

conte-1.jpg
G. P.15:20 | 16/07/2018

Kryeministri i Italisë, Giuseppe Conte, deklaroi se tashmë solidariteti i Europës ndaj Italisë, për sa i përket situatës së emigrantëve është një realitet. Kjo pas vendimit të Francës, Maltës dhe Gjermanisë për të ndarë mes tyre, 150 emigrantët e fundit, që nuk u lanë të zbrisnin në brigjet italiane.

Pas 100 emigrantëve që u morën përsipër nga Franca dhe Malta mbrëmjen e së dielës tashmë dhe Gjermania ka rënë dakord të marrë 50 të tjerë. Sipas kryeministrit italian, Giuseppe Conte, ky është solidariteti dhe përgjegjësia që Italia ka kërkuar prej kohësh nga Europa. Dhe tashmë pas rezultateve të marra nga mbledhja e fundit e këshillit europian, po bëhen realitet.

Me anë të një postimi në profilin e tij në Facebook kryeministri italian Conte bën të ditur se qeveria e tij do të vazhdojë të punojë në këtë mënyrë për sa ipërket cështyjes së emigrantëve. Me këmbëngulje dhe duke respektuar të drejtat e njeriut.

Në të njëjtën linjë ka qenë dhe zëvendës kryeministri, njëkohësisht dhe ministër i Brendshëm italian, Mateo Salvini. Ky i fundit u shpreh se Italia nuk është më kampi i refugjatëve të botës. Sipas tij, më në fund ekziston një qeveri e cila merret me interesat e qytetarëbe të saj.

Salvini theksoi se tashmë të gjithë në Bashkimin Europian kanë kuptuar se nuk mund të jetë vetëm Italia, ajo që pret emigrantë. Gjithsesi prioritet dhe objektiv përfundimtar mbetet bllokimi i nisjeve të gomoneve me emigrantë dhe jo shëprndarja e tyre në nivel europian.

Aktualisht në Moskë, ku ndoqi dhe finalen e Botërorit Francë-Kroaci, Salvini deklaroi se Italia do të heqë sanksionet ndaj Rusisë pasi deri tani nuk kanë dhënë asnjë rezultat./abcnews.al

shba-2.jpg
G. P.12:55 | 10/07/2018

Qeveria italiane vijon me politikat kundër zbarkimeve të anijeve me emigrantë. Këtë herë, ministri i Brendshëm nuk lejoi ankorimin e një anije italiane që kishte shpëtuar 66 emigrantë në afërsi të brigjeve të Libisë. Megjithatë me ndërhyrjen e rojeve bregdetare, emigrantët zbarkuan në Itali.

Për herë të parë është regjistruar bllokimi nga Ministria e Brendshme e Romës të një anije italiane, e cila ka shpëtuar 66 emigrantë në afërsi të brigjeve të Libisë. Për Matteo Salvinin, remorkiatori “Vos Thalassa” i ka paraprirë ndërhyrjes së rojeve bregdetare të Libisë që ishte njoftuar më përpara dhe kështu që nuk mund të ankorohet në portet italiane. Emigrantët janë transferuar për në anijen “Diciotti” të autoriteteve, por qëndrimi i ministrisë nuk ndryshon.

Emigrantët do të zbarkojnë në Itali vetëm “për masat e nevojshme parandaluese dhe hetimet gjyqësore lidhur me sjelljen që rrezikuan jetën e ekuipazhit të Vos Thalassa”. Transportuesi komercial valvit flamurin italian. Në mes të Qershorit ishte protagonist i shpëtimit të 212 emigrantëve, të cilët më pas u besuan njësisë ushtarake italiane “Diciotti”.

Ndërkohë, vendimi i Salvinit vjen në sajë të politikave të qeverisë së tij kundër emigracionit dhe veçanërisht ndaj ankorimeve të anijeve me refugjatë në Itali. Ministri i Brendshëm më përpara ka bllokuar disa herë zbarkimin e emigrantëve, duke nisur përplasje të paprecedentë me Maltën, Spanjën dhe Francën./abcnews.al

salvini.jpg
G. P.12:10 | 07/07/2018

Mediat italiane konfirmojnë takimin mes presidentit Matarella dhe zv/kryeministrit Salvini, të hënën. Por presidenca ka bërë të qartë se në këtë takim nuk do të flitet për vendimin e Gjykatës italiane të Kasacionit për të sekuestruar fondet e partisë së Salvinit, Lega Nord.

Presidenti italian, Sergio Mattarella, do të presë zv/kryeministrin dhe ministrin e Brendshëm, Matteo Salvini, mesditën e të hënës. Por zyra për shtyp e presidencës ka sqaruar se nuk do të flitet për vendimin e Gjykatës italiane të Kasacionit për sekuestrimin e fondeve të Legas, rreth 49 milionë euro.

Lideri i Legës, Salvini, disa ditë më parë kishte kërkuar ndërhyrjen e presidentit pas vendimit të gjykatës. Sipas Salvinit, me këtë vendim është goditur demokracia pasi duan të nxjerrin jashtë loje partinë e parë në Itali, me një vendim që nuk ka precedent as në Itali, por as në Europë.

Zëra të ndryshëm nga Lega, këmbëngulin se pretendimet se këto para janë vjedhur janë gënjeshtra. Sipas tyre, dikujt nuk i pëlqen qeveria e re dhe mënyra si punon, por kjo nuk do të jetë një pengesë.  Këshilli i Lartë i Drejtësisë në Itali i ka cilësuar si të papranueshme këto deklarata dhe akuza./abcnews.al

foto-ilustruese.jpg
G. P.11:20 | 30/06/2018

Punëtori maroken kërcënohet nga punëdhënësi italian sepse kërkoi një ditë leje pasi nuk ndihej mirë. Ky i fundit i tha se tani që ka fituar Salvini mund dhe ta vriste.

“Të djeg të gjallë bastard islamik. Mund dhe të të vras tani që ka fituar Salvini”.

Këto janë kërcënimet dhe ofendimet ndaj një punëtori të ri nga Maroku, i punësuar në zonën e Trentos në Itali. Ai i kërkoi pronarit të tij një ditë pushimi pasi nuk ndihej mirë, por përgjigja ka qenë shokuese. Ka qenë vetë i riu që ka regjistruar bisedën me punëdhënësin e tij.

Një bisedë që i është dorëzuar si provë policisë. Por fjalët e përdorura janë dhe më të ashpra dhe më kërcënuese, ndërkohë që punëtori vetëm përsërit se nuk ndihej mirë.

Pas përfundimit të bisedës marokeni i ka kërkuar ndihmë policisë, e cila i ka sugjeruar që të japë dorëheqjen. Avokati i marokenit konfirmoi denoncimin, duke thënë se kjo ishte një histori absurde dhe në të njëjtën kohë shokuese./abcnews.al

salvini.jpg
G. P.09:35 | 11/06/2018

Ministri i Brendshëm italian, Matteo Salvini, ka kundërshtuar zbarkimin e 629 emigrantëve në brigjet italiane. Ai i ka dërguar një letër autoriteteve të Maltës që të presin anije me amigrantë, të cilët janë shpëtuar në mesdhe.

Ministri i Brendshëm italian, Matteo Salvini, ka dërguar një letër urgjente tek autoritetet e Maltës duke kërkuar që anija Aquarius me 629 emigrantë në bord të dërgohet atje.

“Ky është porti më i sigurt”, tha Salvini.

Në fakt, anija nuk ka marrë miratimin për të arritur në brigjet italiane. Të premten, autoritetet malteze kishin ndaluar hyrjen në portin e anijes Seefuchs, me 126 refugjatë në bord.

Mjeti lundrues, i një OJQ-je holandeze, ishte në vështirësi për shkak të kushteve të këqija të detit, por Malta kishte propozuar vetëm ndihmë në det, pa lejuar hyrjen në port. Rojet bregdetare italiane ndërhynë dhe anija më në fund zbriti të shtunën në mëngjes në Pozzallo.

Ishte episodi i fundit i një mosmarrëveshjeje të gjatë midis Italisë dhe Maltës, sjellja e të cilave u stigmatizua nga vetë Salvini ditën tjetër. Malta “nuk mund të thotë gjithmonë jo për çdo kërkese për ndërhyrje”, ishte shprehur ministri i Brendshëm. Më tej, Salvini përsëriti shumë i vendosur se Italia nuk do të kalojë një tjetër verë të mbushur me zbarkime emigrantësh.

“Më shumë se 750 të vdekur në Mesdhe në vitin 2018: shpëtimi i jetëve në det duhet të mbetet prioritet i lartë për çdo qeveri”.

Kërkesa vjen nga Carlotta Sami, zëdhënëse e UNCHR për refugjatët në Evropën Jugore. Reagimi erdhi pas letrës së ministrit Salvini për autoritetet malteze./abcnews.al

SALVINI-1280x720.jpg
G. P.16:40 | 03/06/2018

Ministri i Brendshëm italian, Matteo Salvini ka tentuar të zbusë qëndrimin e tij lidhur me emigracionin, por ai ka mbështetur përsëri qëndrimin e dëbimit të refugjatëve nga vendi. Ai thotë se emigrantët duhen ndaluar para nisjes në det për të shmangur tragjedi të mundshme.

“Lidhur me emigrantët nuk do të mbajmë një linjë të ashpër, por atë të mirëkuptimit”.

Këtë e ka thënë për mediat italiane ministri i ri i Brendshëm, Matteo Salvini, gjatë një tubimi në Katania.

“Siçilia nuk mund të jetë kampi i refugjatëve të Europës”, ka shtuar më tej lideri i Lega Nord. Më tej, Salvini ka siguruar se nuk do të rrijë pa bërë asgjë përballë zbarkimeve të emigrantëve në brigjet italiane.

Gjatë konferencës për shtyp ai u shpreh:  “Përsëri viktima në det. Mesdheu është kthyer në një varrezë. Ka vetëm një mënyrë për të shpëtuar këto jetë: më pak njerëz që nisen dhe më shumë riatdhesime. Jeta është e shenjtë dhe për ta shpëtuar atë, ne duhet ta parandalojmë udhëtimet e tyre me mjete lundruese në det. Si ministër do të bëj gjithçka, duke punuar me ato qeveri, për të shmangur largimet e atyre njerëzve të dëshpëruar që mendojnë se ka flori në Itali. Nuk ka punë për italianët, nuk ka asgjë të thjeshtë. Nuk ka as Batman as Robin në qeveri”.

Më tej, Salvini thotë se ka parë në fashikujt e ministrisë së Brendshme dhe ka zbuluar se në Itali, kostoja e asistencës për azilkërkuesit është më e larta në Europë ndërsa koha e lëshimit të autorizimeve është më e ngadalta. Ndërsa më tej ka nënvizuar se limitimi i zbarkimeve dhe rritja e dëbimeve do të thotë të shpëtosh jetë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono