marreveshja

TALEBANET-REAGIMI-ABCM5T1.mpg_snapshot_00.00-1280x720.jpg
ent ela19:26 | 09/09/2019

Rebelët talebanë kanë paralajmëruar Shtetet e Bashkuara se pasojat e tërheqjes së papritur të presidentit Donald Trump nga marrëveshja e paqes do të bien mbi qytetarët amerikanë.

Vendimi i presidentit Donald Trump për të anuluar marrëveshjen e paqes do t’u kushtojë jetën më shumë amerikanëve. Me këto fjalë kanë reaguar guerrilasit talebanë, pas tërheqjes së Shteteve të Bashkuara nga negociatat që do t’i jepnin fund thuajse 20 viteve luftë në Afganistan. Grupi islamik publikoi një deklaratë pasi Trump në mënyrë të papritur anuloi takimin sekret të planifikuar të dielën me liderët kryesorë të talebanëve në Kemp Dejvid. Trump tha se do t’i ndërpriste bisedimet me rebelët pasi ata morën përsipër përgjegjësinë e një atentati ku mbetën të vrarë 1 ushtar amerikan dhe 11 persona të tjerë. Një zëdhënës i rebelëve kritikoi Trump për tërheqjen nga dialogu dhe deklaroi se, trupat amerikane ishin përgjegjëse për një seri sulmesh të ndodhura në Afganistan. “Kjo lëvizje do të çojë në humbjen e jetëve të amerikanëve. Besueshmëria e tyre do të bjerë dhe qasja e tyre kundër paqes do t’i ekspozohet mbarë botës”, deklaroi zëdhënësi. Ndërkohë, në Uashington, sekretari i Shtetit Majk Pompeo tha se Shtetet e Bashkuara nuk do ta reduktojnë mbështetjen e tyre ushtarake për trupat afgane derisa të binden se talebanët do të zbatojnë angazhimet që kanë marrë përsipër./ABC News Albania 24/7

trump-2-1280x854.jpg
G. P.11:15 | 08/09/2019

Presidenti Donald Trump ka anuluar papritur marrëveshjen e paqes me talebanët, duke hedhur poshtë një vit negociata të vështira me guerrilasit, të kontestuara pasi në to nuk ishte përfshirë qeveria e Kabulit.

Presidenti amerikan Donald Trump ka deklaruar se ka anuluar negociatat e paqes me talebanët, që do t’i jepnin fund luftës 18-vjeçare të Shteteve të Bashkuara në Afganistan.

Lajmin e bëri të ditur vetë kreu i Shtëpisë së Bardhë përmes një postimi në rrjetin social Twitter. Trump do të takohej me presidentin afgan Ashraf Ghani dhe disa liderë talebanë këtë të dielë në Kemp Dejvit, por ai e anuloi takimin sekret pasi militantët pranuan se ishin prapa një sulmi të ndodhur së fundmi që i mori jetën një ushtari amerikan.

Bisedimet do të mbaheshin pak ditë përpara përvjetorit të sulmeve të 11 Shtatorit 2001. Shtetet e Bashkuara pushtuan Afganistanin dhe rrëzuan regjimin taleban në vjeshtë të vitit 2001, për shkak se militantët u kishin dhënë strehë disa anëtarëve të Al Kaedës që ishin përgjegjës për sulmet.

Një burim nga zyra politike e talebanëve në Doha tha për BBC se grupi do të mbajë një takim urgjent për të diskutuar mbi vendimin e presidentit Trump. Ndërkohë, zyra e presidentit afgan Ashraf Ghani deklaroi se paqja e vërtetë do të jetë e mundur vetëm kur talebanët të bien dakord të ulin armët dhe të ulen në bisedime direkte me qeverinë afgane.

Një takim kokë më kokë me talebanët në Kemp Dejvit do të kishte qenë një lëvizje diplomatike e jashtëzakonshme nga presidenti amerikan, pasi do të ndodhte pak ditë përpara 18-vjetorit të 11 Shtatorit.

Por mesazhet e Trump duket se i dhanë fund një viti negociatash të vështira, në të cilat nuk ishte përfshirë qeveria e Kabulit, e konsideruar nga talebanët si qeveri kukull e amerikanëve./ABC News Albania 24/7

luigi-di-maio.jpg
G. P.22:45 | 03/09/2019

Lëvizja 5 Yjet dhe Partia Demokratike në Itali kanë zyrtarizuar të martën bashkëpunimin për formimin e qeverisë së re, që prioritet do të ketë buxhetin e vitit të ardhshëm. Për këtë bashkëpunim, 5 Yjet kanë marrë edhe konsensusin e elektoratit përmes një votimi të realizuar Online.

Lëvizja anti-sistem 5 Yjet dhe demokratët e qendrës së majtë në Itali publikuan të martën programin e përbashkët politik për formimin e qeverisë, duke vendosur në krye të axhendës një buxhet ekspansiv për vitin 2020.

Lëvizja 5 Yjet, e krijuar një dekadë më parë duke i bërë opozitë Partisë Demokratike, pranoi të formojë një administratë të re me ish-armiqtë e saj për të shmangur zgjedhjet e parakohshme, një opsion i përfolur pas prishjes së koalicionit me Ligën e Veriut.

Mbështetësit e 5 Yjeve mbajtën ndërkohë një votim online nëse duhet të mbështesnin koalicionin, që rezultoi me një fitore dërrmuese pro bashkëpunimit me PD. Duke reaguar, kryetari Luigi Di Maio u shpreh krenar për rezultatin dhe ftoi bashkëpunëtorët e tij që të nisin menjëherë nga puna.

Në të njëjtën linjë, kryetari i demokratëve Nikola Xingaretti bëri thirrje që palët të nisin punën për të ndryshuar Italinë. Ndërsa kryetari i ekstremistëve të djathtë, Mateo Salvini u shpreh i bindur se koalicioni i ri qeverisës do ta ketë jetën e shkurtër.

Në krye të axhendës së 5 Yjeve dhe Partisë Demokratike është angazhimi për ta përdorur buxhetin e vitit të ardhshëm për të ndihmuar rritjen e ekonomisë në ngërç, pa vënë në rrezik financat për shpenzimet publike.

Italia ka borxhin e dytë më të lartë në Bashkimin Europian pas Greqisë dhe pakti bën thirrje për më shumë fleksibilitet nga Brukseli, për të vepruar mbi rregullat “e ngurta” fiskale./ABC News Albania 24/7

FARC-kolumbi.jpg
nev ila12:39 | 30/08/2019

Pas vendimit të liderëve të FARC në Kolumbi, Ivan Markez dhe Jezus Santrik  për të rimarrë armët në dorë, digjen të gjitha marrëveshjet për paqe në vend.

Një video e publikuar në rrjetet sciale tregon se të dy liderët do të rifillojnë çdo gjë nga e para.

Markez ishte zhdukur prej disa kohësh, ndërsa Santrik rrezikon ekstradimin në SHBA pasi akuzohet për trafik droge.

Populli kolumbian nuk e priti mirë planin për paqe dhe amnistinë ndaj anëtareve të FARC, dhe me anë të një referendumi e kundërshtoi këtë marrëveshje.

Ndërsa ish- presidenti i vendit Huan Manuel Santos fitoi Nobelin për paqe pikërisht për arritjen e kësaj marrëveshjeje që tashmë nuk është më në fuqi./ABC News Albania 24/7

 

 

50121055_303.png
G. P.10:22 | 26/08/2019

Rajoni grek Halkidiki është një parajsë për pushuesit edhe për ata nga Maqedonia e Veriut. Megjithatë atmosfera mbetet e turbullt edhe pas zgjidhjes së konfliktit për emrin. Njerëzit mundohen ta shmangin këtë temë.

Për qytezën Neos Marmaras në rajonin verior turistik të Greqisë Halkidiki tani është piku i sezonit. Plazhi është përgjatë gjithë ditës i mbushur me pushues. Në mbrëmje pronarët e restoranteve dhe bareve gëzohen për frekuentimin e dendur prej klientëve. Tre gadishujt në veri të Egjeut ndodhen fare pranë kufirit me vendin fqinjë të Ballkanit. Ndaj krahas turistëve gjermanë, anglezë e francezë vijnë këtu edhe shumë pushues nga Bullgaria, Serbia, Shqipëria e Maqedonia e Veriut. Ndonëse grindja për emrin midis Shkupit e Athinës është zgjidhur tani me emërtimin e ri Maqedonia e Veriut, Marrëveshja e Prespës nuk ka mundur t’i zgjidhë të gjitha tensionet kulturore mes njerëzve. Pikërisht në rajonin verior të Greqisë, Makedonia, has në pakënaqësinë e banorëve, të cilët shprehin indinjatë dhe nuk kanë mirëkuptim, që është pranuar që vendi fqinjë të mbajë emrin e njëjtë me rajonin e tyre.

“Unë nuk dua të prezantohem me emër. As nuk kam për të thënë ndonjë gjë të mirë”, paralajmëron pronari i një restoranti. “A e sheh këtë fotografi?”, pyet ai dhe tregon një fotografi të vjetër të një burri në kostum tradicional maqedonas. “Unë e njoh historinë time dhe e kam të provuar atë me fakte,” shpjegon gastronomi. Ai e konsideron si një provokim kur njerëzit nga vendi fqinjë, Maqedonia e Veriut, vijnë në lokalin e tij e krenohen si maqedonas.

Marrëdhënie të vështira në rajon

Por ai në fakt nuk ka asgjë kundra njerëzve në Ballkan. Pikërisht me serbët, që përbëjnë një pjesë të madhe të turistëve në Neos Marmaras, ai ka raporte të mira. Por kjo pasqyrohet në historinë e të dy vendeve. Ndryshe nga Shkupi, Athinën e Beogradin e lidhin aleanca miqësie. Greqia nuk e ka njohur Kosovën dhe gjatë luftrave në ish-Jugosllavi ka qenë qartazi në anën e Serbisë. Këtë e vërtetojnë dokumenta e fotografi, madje edhe që grekët kanë marrë pjesë në masakrën e Srebrenicës. Mediet greke kanë raportuar gjerësisht për këtë.

Historia e rajonit është e vështirë. E pikërisht grindja për emrin prek një pikë delikate të botëkuptimit grek për historinë. “Unë kam punonjës nga Bullgaria e Shqipëria. Madje nëna e njërit prej të punësuarve tek unë vjen nga Shkupi”, shpjegon pronari i restorantit dhe i shmanget përdorimit të emrit Maqedonia e Veriut.

Në Maqedoninë e Veriut e ndaluar – Dielli i Verginës, simboli i Maqedonisë antike – një metodë, një lloj rezistence greke që shpreh moton, se Maqedonia jemi ne. Marrëveshja e Prespës duhej të zgjidhte tensionet mes dy vendeve. Në aspektin politik duket se është arritur kjo. Madje edhe kryeministri i ri i Greqisë, Kyriakos Mitsotakis pavarësisht fjalëve kërcënuese gjatë luftës elektorale, duket se do t’i përmbahet marrëveshjes.

Ghost Fishing Griechenland leere Netze Bergung (Reuters/C. Kuyvenhove)

Zbatimi i Marrëveshjes së Prespës

Maqedonia e Veriut ndërkohë duhet të kalojë në një radhë të ndërlikuar procesesh, për t’i përmbushur kushtet e kompromisit për emrin. Që prej disa javësh ky vend zyrtarisht nuk lejohet më të përdorë “Verginën-Diell”, diellin e verdhë në sfondin blu, që përdoret si flamur edhe në veri të Greqisë e varet nëpër ballkonet e shtëpive. Jo rrallë në shtëpi, ku banojnë nacionalistët. Greqia i sheh me dyshim përparimet. Shumë njerëz ndihen të ofenduar, kur shikojnë makina, në të cilat përdoret iniciali “MK”, që ende nuk është zëvendësuar me “NMK”.

Edhe për turistët që prej vitesh vijnë në Halkidiki nga Maqedonia e Veriut këto ndryshime lidhen me shumë telashe. Dokumente të reja identifikimi, patenta të reja shoferi, targa të reja makine. Një gazetare maqedonase,që kalon pushimet në Neos Marmaras, thotë se kryeministri Zoran Zaev i korrigjon kolegët e tij kur ata përdorin emrin e vjetër të Maqedonisë. Maqedonia duket se e ka marrë seriozisht marrëveshjen. Maqedonasit që kthehen në shtëpi me makina shohin në rrugët e Greqisë ende tabelat që japin drejtimin Shkup, por jo Maqedonia e Veriut.

Pragmatizëm dhe indinjatë e heshtur

Në Neos Marmaras në përgjithësi palët i shmangen n jera-tjetrës. “Ne diskriminohemi, por në fakt as nuk kemi kontakt me grekët”, thotë një pushuese, e cila ka vite që vjen në Halkidiki. Ajo i preferon plazhet këtu dhe ka qenë në vende të ndryshme të këtij rajoni. Ka ardhur këtu për të pushuar e jo për t’u konfrontuar për politikën. Të njëjtin qëndrim mbajnë edhe shumica e pronarëve të lokaleve dhe hoteleve. “Me klientët që paguajnë unë nuk flas për politikë”, thotë njeri prej tyre në një bar në plazh. Por as nuk dua të jap intervista me emër. “Unë kam mendimin tim, por nuk dua të më klasifikojnë në asnjë drejtim”, thotë një tjetër pronar lokali. Ai nuk do t’i shqetësojë klientët e tij. Njëkohësisht ai druan të pozicionohet, sepse mund të indonjojë të tjerë gastronomë, që janë nacionalistë të dekalruar.

Situata është e nderë. Frikë e Indinjatë e karakterizojnë klimën në Neos Marmaras, kur bëhet fjalë për turistët nga Maqedonia e Veriut. Jo të gjithë janë të distancuar. Shumë maqedonas thonë, se kanë pasur fërkime edhe me pushues grekë. Në një bar në plazh password-i për internet është: “Macedonia is Greek”. Një provokim i hapur.

Griechenland Sonnenuntergang Pefkochori, Halkidiki (picture-alliance/NurPhoto/N. Economou)

Maqedonasit sjellin para

“Të tilla raste nuk pasqyrojnë shumicën e sipërmarrësve në Halkidiki, të cilët i presin në mënyrë profesionale dhe me respekt klientët nga Maqedonia e Veriut ashtu si të gjithë të tjerët, i tha DW-së, Grigoris Tasiou nga shoqata rajonale e turizmit. Në muajt e verës nga qershori deri në shtator e vizitojnë rreth 150.000 pushues nga Maqedonia e Veriut Halkidikin. “Kjo do të thotë, që ky është për ne një treg i rëndësishëm.”

Por pikëtakime mes dy popujve nuk ka vetëm nëturizëm, shumë maqedonas studiojnë në Greqi. Tregtia midis dy vendeve është në bum. Qysh përpara Marrëveshejs së Prespës ka pasur sipërmarrje të mëdha greke të vendosura në Maqedoninë e Veriut. E ky biznes u sjell atyre para. Por pikërisht në Greqi nuk preferojnë të flasin lidhur me këto fakte. Ndërkohë që pikërisht ndërgjegjësimi për elementë të tillë mund të bënte që të dyja palët të përfitojnë nga njera-tjetra duke i dhënë një drejtim të ri grindjes së vazhdueshme për emrin./DW

 

zoran-zaev-1280x698.jpg
nev ila17:00 | 13/08/2019

Marrëveshja e Prespës e arritur mes Shkupit dhe Athinës parashikon mes të tjerash heqjen e Verginës. Bëhet fjalë për diellin me 16 rreze të Maqedonisë së Veriut, që në kuadër të marrëveshjes nuk do të jetë më simbol publik i këtij vendi. Ndërkohë, çështja është kthyer edhe në debat politik.

Me dimensione të vogla ose të mëdha, e gdhendur në sheshe, mure ose suvenire, e endur në qilima ose në flamurin shtetëror – Dielli nga Vergina ose nga Kutleshi, emri sllav për lokacionin në Greqinë e sotme veriore, gati tri dekada është një nga simbolet më të përdorura, për vetë-identifikim politik, etnik ose gjeografik. Pasi u zgjodh simbol i flamurit shtetëror, menjëherë pas pavarësimit të Maqedonisë në vitin 1991, ndërsa nën presionin e Greqisë u ndryshua në vitin 1995, si duket “Vergina” gradualisht do të fshihet nga institucionet shtetërore dhe hapësirat publike, ashtu siç urdhëron Marrëveshja e Prespës për përdorim me kompromis të emrit Maqedoni, dhe ndarje të historisë të rajonit gjeografik me emër të njejtë, i e cila hyri në fuqi më 12 shkurt të këtij viti.

Marrëveshja e Prespës“Pala e dytë nuk do t’a përdorë në çfarëdoqoftë mënyre ose në çfarëdoqoftë forme simbolin i cili më parë ishte në flamurin e saj të mëparshëm shtetëror. Në afat prej 6 muajsh pas hyrjes në fuqi të kësaj marrëveshje, pala e dytë do të mënjanojë simbolin-pjesë e flamurit të saj të mëparshëm shtetëror nga të gjitha hapësirat publike dhe nga përdorimi publik në tërë territorin e saj. Kjo dispozitë nuk i mbulon artefaktet arkeologjike”.

Por, jo të gjithë pajtohen me mënjanimin e diellit me 16 rreze. Opozitarja VMRO-DPMNE, udhëheqësit e së cilës e vlerësuan si të dëmshme Marrëveshjen e Prespës, dhe disa herë paralajmëruan ndryshimin e saj, në qoftë se partia kthehet në pushtet, fshirjen e Verginës e llogarisin si nënçmim të popullit maqedonas, sepse siç pohojnë simboli nuk është grek.

“Kur të fillojë të zbatohet kjo marrëveshje, tash me diellin nga Vergina, më tej edhe nenet tjera të Marrëveshjes së Prespës, do t’a shihni sa i nënçmuar është populli jonë maqedonas. I nënçmuar, dinjiteti ynë është i nënçmuar. Vetëm ne duhet të kemi kujdes, ata jo. Unë nuk mund t’ju kuptoj. Përse ata kanë të drejta ekskluzive, ai nuk është simbol grek, ata e kanë përvetësuar si simbol grek”, tha Bllagica Llasovska, VMRO-DPMNE.

Kryeministri Zoran Zaev është i bindur se  Marrëveshja e Prespës që u arrit me ish/kryeministrin grek Aleksis Cipras, të cilën më shpesh e quan hap historik, është e drejtë dhe e hap rrugën e Maqedonisë për anëtarësim në NATO dhe në BE, proces I cili më parë ishte I bllokuar me vite për shkak të vetos greke dhe mospajtimet me emrin kushtetues të vendit, por edhe me simbolet të cilat për Athinën janë pjesë e trashëgimisë kulturore greke.

“Greqia ishte vendi i parë që e nënshkroi protokollin për anëtarësim të Maqedonisë së Veriut për anëtarësim me të drejta të plota në NATO, qëllimi jonë strategjik. Këtyre ditëve miku im dhe i jonë Aleksis i bëri thirrje BE-së të fillojë negociatat për anëtarësim të vendit tonë”, tha Zaev.

Por, “fshirja” e Verginës si duket nuk do të jetë proces i lehtë, edhe pse para tri dekadave për pjesën më të madhe të qytetarëve ishte simbol tërësisht i panjohur. Para 10 ditësh dy grupe, të ardhur në manifestimin e festës kombëtare Ilinden në Krushevë, njëri me flamurin zyrtar shtetëror, tjetri me flamurin e mëparshëm – me Verginën, iu shmangën incidentit të ndërsjellë, për shkak të dallimeve në interpretimin e politikës, simboleve dhe ndryshimeve të emrit kushtetues në Maqedonia e Veriut, pas insistimeve greke./ABC News Albania 24/7

suad-1280x734.jpg
Sej rie21:00 | 03/08/2019

Pas muajsh të tërë dhunë, ditën e shtunë Sudani është përfshirë nga festimet, pasi autoritetet ushtarake dhe klasa politike kanë arritur një marrëveshje për kalimin e pushtetit tek një administratë civile.

Regjimi ushtarak në Sudan dhe koalicioni kryesor i opozitës së vendit kanë rënë dakord mbi një deklaratë kushtetuese, që do të hapë rrugën për kalimin e pushtetit tek civilët. Ndërmjetësi i Unionit Afrikan, Mohamed Hasan Lebat bëri të ditur lajmin në orët e para të së shtunës, pa dhënë detaje të tjera. Sudani ka qenë i përfshirë nga trazirat që kur ushtria rrëzoi presidentin Omar al Bashir në muajin prill dhe bisedimet për deklaratën janë shoqëruar me akte të shumta dhune.

Miratimi i dokumentit të shumëpritur solli festime në mbarë Sudanin, pas muajsh të tërë krize. Të dyja palët nënshkruan akordin për ndarjen e pushteteve në korrik dhe që prej atëherë demonstruesit kanë pritur publikimin e më shumë detajeve të saj.

Trazirat nisën në dhjetor, pasi qeveria e Omar al Bashir vendosi masa ekonomike emergjente. Më pas ai u rrëzua nga pushteti në prill, pas manifestimeve të gjata të mbajtura jashtë selisë së Ministrisë së Mbrojtjes në Kartum. Që prej atëherë demonstruesit kanë bërë thirrje për kalimin e autoritetit shtetëror tek një administratë civile. Dokumenti i ri i miratuar parashtron kushtet për një periudhë tranzicioni 3-vjeçare dhe parashikon që ndarja e pushtetit të bëhet mes 6 civilëve dhe 5 gjeneralëve të ushtrisë./ABC News Albania 24/7

Boris-Xhonson.jpg
ent ela15:00 | 27/07/2019

Nga Dorina Kurtaj- Bën kllounin por është shumë më i pjekur dhe dinak se sa dëshiron  të duket. Një portret ndryshe i kryeministrit të ri britanik. Një konservator pro Brexit i cili sigurisht do të jetë zbavitës.

Thjesht Boris. Xhonson është politikani i vetëm britanik icili shpesh thërritet me emrin e tij të pagëzimit, që nga koha e universitetit. Sepse Boris është një emër elegant që përfaqëson një simpati sipërfaqësore dhe karizëm ngjitës. Dhe Boris nuk është as emri i parë i kryeministrit britanik, dhe pse më vonë zgjodhi që të thërritej ashtu për tu dalluar. Emri u zgjodh nga babai i tij.

I lindur në Nju Jork në vitin 1964, ai studio në Eton dhe në Oksford, me pamje rebele, pesë fëmijë nga dy bashkëshorte, euroskeptik që nga fillimi, këto janë vetëm disa nga tiparet e kryeministrit të ri

Miqtë të cilët e njohin që kur ishte adoleshent, thonë se Boris Xhonson, e ka pasur gjithnjë zakonin që të mbante flokët në mënyrë të çrregullt. Madje kur shkonte në shkollë e bënte qëllimisht, para se të hynte në klasë, sepse ajo pamje indiferente e ndihmonte të fshihte me anë të ironisë, difektet e shumta.

Boxho, si e quajnë mbështetësit e tij, vijon qëllimisht që të jetë i parregullt me flokët e tij dhe sot në moshën 55 vjecare teksa kalon pragun e Dauning Strit, si kryeministri i ri i vendit. Ngjyrën e flokëve ai e ka trashëguar nga stërgjyshi i tij Ali Qemal, një gazetar turk, ministër në sulltanatin ottoman në vitet para rënies së perandorisë, i cili ishte martuar me një angleze. Nga gjyshi Uilfred, pilot i forcave ajrore të mbretërisë britanike, i cili humbi jetën pasi u përplas gjatë një fluturimi teksa përpiqej të surprizonte bashkëshorten e tij, duket se ka marrë ekzibicionizmin plateal. Ai i cili e frymëzoi që të hidhej me teleferik në Viktoria Park gjatë lojërave olimpike të 2012-ës, duke qëndruar varur për shkak të një difekti, me flamujt britanikë në duar.

Boris u përball me garën që në shtëpi, i inkurajuar nga ababi i tij që të ishte më i mirë se motra e tij Rakel, sot gazetare, dhe dy vëllezërit e tij Xho dhe Leo, i pari parlamentar konservator dhe i dyti prezantues radiofonik. Ambicia iu përforcua dhe më shumë në Eton, ku Boris përvetësoi theksin e “snob”, lekskun e privilegjuar, pasionin për klasikët latinë dhe humorin anglez.

Që nga koha e universitetit, Boris nuk pranonte të mësonte përmendësh Rikardi II, por ngjiste batutat në shtyllat e skenës, duke bërë që profesori I tij Martin Hamond ta përshkruajë si një person që donte të merrte cdo gjë që dëshironte pa e fituar atë.

Pas diplomimit për histori antike në universitetin e Oksford, Xhonson iu përkushtua gazetarisë. I punësuar nga Tajms, ai u pushua nga puna pasi kishte shpikur një deklaratë, të njerkut të tij, i cili hidhte dyshime për një marrëdhënie homoseksuale të Eduardit II. Më pas ai punësohet në “Telegraph” dhe në vitin 1989 në moshën 24 vjeçare bëhet korrespondent për çështjet europiane në Bruksel. Kolegët tregojnë se Boris shëtiste në qytetin ku kishte jetuar kur ishte fëmijë, në kohën që babai i tij një diplomat britanik, u transferua për punë. Boris kishte një makinë svishej me pantallona të grisura. Në konferencat për shtyp ai jepte spektakël duke shtrembëruar qëllimisht theksin e tij francez. Dëshira për tu tallur me Europën u transformua në një zakon për të prodhuar lajme të rreme, duke bërë që korrespondentët e tjerë ta konsideronin si një zhurmë madh.

Qëndrimi si euroskeptik I siguroi mbështetjen nga Margaret Thecër, dhe falë saj nisi një karrierë të shkëlqyer politike që e coin ë parlamentin e Uestminster dhe më pas në postin e kryebashkiakut të Londrës për dy mandate, si dhe në atë të ministrit të brendshëm në qeverinë e paraardhëses së tij, Tereza Mej. Dy martesa të dështuara, pesë fëmijë dhe një të fejuar të re në moshë, Xhonson tashmë është aty ku dëhsironte, në krye të konservatorëve dhe të qeverisë. Për të, ish ministrja e brendshme Amber Rud do të shprehej: “Është jeta dhe shpirti i partisë, por jo burri që do të dëshiroje të të shoqëronte në shtëpi pas mbrëmjes.”

Boris Johnson do të drejtojë Mbretërinë e Bashkuar në daljen e vështirë nga Bashkimi Europian dhe do të jetë ai që do të negociojë me BE, për të bërë çdo gjë gati për 31 tetorin 2019.

“Realizimi i BREXIT dhe bashkimi i vendit”: janë dy objektivët kryesorë të deklaruar nga Xhohnson pas marrjes së kryesisë së partisë. “Dalja e Mbretërisë nga Bashkimi Europian duhet të përfundojë brenda 31 tetorit” theksoi ai duke bërë të qartë se nuk mbështeste asnjë vonesë më shumë.

Për Brexit, Boris Xhonsin nuk e ka fshehur asnjëherë qëndrimin e tij: daljen në datën e caktuar,me apo pa marrëveshje. Nëse Tereza Mej dhe shumë anëtarë të partisë konservatore mendonin se dalja pa marrëveshje ishte një skenar që duhej shmangur me cdo kusht, Xhonson nuk është dakord.

Xhonson është optimist për sa I përket rinegociimit të marrëveshjes së Tereza Mej me BE-në. pak minuta pas zgjedhjes së tij, Mishel Barnier, kryenegociatori I Brexit për BE, shkruante në Tuiter: Jemi të paduruar për të punuar me Boris Johnson, për të lehtësuar ratifikimin e marrëveshjes në mënyrë që të jetë një Brexit të rregullt.

Marrëveshja e Brexit përbëhet nga dy pjesë: e para është pjesa juridike dhe përcakton termat e divorcit nga Bashkimi europian: të drejtat e qytetarëve, shuma që Londra duhet të dorëzojë në arkat e Brukselit, periudha e tranzicionit deri në dhjetorin e 2020, pikat e ndalimit, dhe pjesa që i përket Irlandës së Veriut

Pjesa e dytë është deklarata politike, e cila tregon të ardhmen e marrëdhënieve mes Mbretërisë së Bashkuar dhe Bashkimit Europian. Kjo deklaratë parashikon që Mbretëria e Bashkuar të qëndrojë Brenda një unioni doganor me Bashkimin Europian deri në gjetjen e një zgjidhjeje tjetër. Kjo pjesë, e cila nuk u pëlqen aspak mbështetësve të Brexit, mund të rinegociohet.

Por analistët mendojnë se janë pikërisht gafat, sekreti i suksesit të Xhonson.

Zhvlerësimi total i principit “politikisht korrekt” dhe deklaratat shpesh befasuese të kryeministrit të ri britanik kanë dhënë një kontribut të madh për popullaritetin e Boxho.

Triumfi i tij në krye të konservatorëve ishte i paralajmëruar. Një stil komunikimi aspak ortodoks ai i ish kryebashkiakut të Londrës, i përbërë nga gafat, batutat e rënda dhe zhvlerësim për sa i përket të folurës diplomatike. Nëse shumë editorialistë janë ende të befasuar nga mbërritja e tij në krye të qeverisë britanike, si një personazh i tepruar, Xhonson duket i vetëdijshëm që sekreti i suksesit të tij është dhe tek gafat që e kanë bërë të famshëm. Aq sa ka nga ata që mendojnë se gafat nuk janë të pavullnetshme por të studiuara mirë. Madje sipas një spndazhi të “Gardian” pjesa më e madhe e opinionit public është e bindur për këtë.

Janë pikërisht batutat e tij që e kanë ndihmuar të gjejë mbështetje dhe në shtresat e popullit të lodhur nga globalizimi dhe që votuan për daljen e vendit nga Bashkimi Europian. Ai duket si dikush që I thotë gjërat ashtu si janë, pra njëri nga ata, dhe pse vjen nga një familje e pasur dhe ka studiuar në shkollat më të mira.

Paralelizmat me Donald Trump, edhe ai një njeri I popullit, në këtë pikë janë të pashmangshme. Një identifikim mes liderit dhe bazës që është një pjesë shumë e rëndësishme e profilit të politikanëve të ashtuquajtur “populistë”.

Duke iu rikthyer jetës së tij personale Boris Johnson e Kerri Sajmnods janë çifti i parë i pamartuar që do të jetojnë në Dauning Strit. Me 24 vjet diferencë në moshë, pak kohë më parë ata ishin në qendër të vëmendjes për shkak të një zënke të dhunshme që kishte detyruar fqinjët të lajmëronin policinë.

Një vit më parë Boris la bashkëshorten e tij të dytë, për të fejuarën aktuale, duke i dhënë dhe më shumë material mediave që të vënë në dyshim karakterin e tij. Por Boris nuk e ka problem të pranojë se ka përdorur kokainë në rini, që ka pasur shumë marrëdhënie jashtë martesore, dhe të paktën një fëmijë të jashtëligjshëm të cilin e njohu pas një beteje ligjore e cila zgjati tre vjet. Por mediat britanike këmbëngulin se ai ka dhe një fëmijë tjetër të paligjshëm të cilin nuk pranon ta njohë.

Boris Xhonson në fjalimin e tij të parë si kryeministër në parlamentin britanik konfirmoi objektivin për të kompletuar Brexit deri në 31 tetor. Mes protestave të opozitës në sallë ai theksoi se do  të bënte Mbretërinë e Bashkuar vendin më të mirë në tokë për të jetuar. Një vend të gjelbër, të zhvilluar, besimplotë dhe ambicioz i cili mund të jetë ekonomia e parë në Europë shtoi ai duke ironizuar mbi negativitetin e opozitës dhe pesimistëve. Më pas Xhonson tha se Brukseli duhet të rishohë qëndrimin e tij dhe të pranojë ndryshimet në marrëveshje. Në rast të kundërt, paralajmëroi ai, Mbretëria e Bashkuar do të dalë nga Bashkimi Europian pa një marrëveshje. Vendi deklaroi ai, është më i përgatitur nga sa mendohet për këtë skenar. Mbretëria e bashkuar nuk do të emërojë, në ansjë rrethanë, një komisioner europian britanik, theksoi kryeministri Xhonson,

Madje ai e renditi si një prioritet të qeverisë së tij impenjimin për t’u përgatitur për një Brexit pa marrëveshje. Xhonson refuzoi në këtë mënyrë marrëveshjen e arritur nga Tereza Mej duke thënë se është rrëzuar tashmë tre herë nga parlamenti. Ai tha se dëshironte të negocionte një alternativë të mirë me Bashkimin europian duke u shprehur i bindur se pikat e ndalimit mund të zëvendësohen me zgjidhje të tjera për të garantuar kufirin e hapur irlandez pa u dashur që vendi të qëndrojë në unionin doganor dhe në tregun e përbashkët.

Xhonson theksoi se në rast se Brexit do të dështonte vendi do të përballej me një humbje totale të besimit të elektoratit ndaj politikës, duke shtuar se dhe sistemi i emigracionit ka nevojë për ndryshime.

Ndërkohë qeveria e re e Xhonson tashmë ka ekipin e saj të ministrave. Ndër emrat kryesorë figurojnë:

Saxhid Xhavid – Ministër Finance

Dominik Rab – Ministër i Jashtëm

Priti Patel – Ministër i Brendshëm

Robert Baklend – Ministër Drejtësie

Ben Uallas – Ministër Mbrojtjeje

Met Henkok – Ministër Shëndetësie.

Por ndërkohë babai i tij, 78 vjeçari Stenli, njeriu i cili ka pasur më shumë ndikim në jetën e Boris, është një europian i bindur. Në një intervistë për mediat ku flet për të birin e tij në rolin e kryeministrit ai shprehet: Ëndërroj që një ditë Boris të thotë: qëndrojmë në Europë”. /ABC News Albania 24/7

 

basha-marreveshja-teatri-1280x752.jpg
ent ela12:24 | 25/07/2019

Kryetari i Partisë Demokratike Lulzim Basha ka nënshkruar sot marrëveshjen për mbrojtjen e Teatrit Kombëtar. Kjo kontratë angazhon opozitën të mbështesë veprimet e Aleancës për të mbrotjur Teatrin Kombëtar.

Kontrata përmban 6 pika, në të cilat Aleanca angazhohet të vijojë pa ndërprerje mbrojtjen për Teatrin, ndërsa PD dhe opozita për të mbështetur këto aksione në mbrojtjej të ndërtesës dhe të pronës publike.

PD angazhohet gjithashtu, se në muajin e parë të qeverisë së saj, kompleksit Skanderbeg, ku bën pjesë Teatri, do t’i rikthehet statusi Ansambël Monument Kulture dhe do t’i nënshtrohet menjëherë ruajtjes dhe restaurimit.

Partia Demokratike dhe Opozita e Bashkuar, angazhohen të shfuqizojnë ligjin special antikushtetues “Rama-Fusha” që shemb Teatrin dhe të vendosë para përgjegjësisë penale çdo person të përfshirë në grabitjen kriminale të truallit të Teatrit Kombëtar.

Basha tha se PD angazhohet që, brenda vitit të parë kur opozita të jetë në drejtimin e vendit, të rrisë buxhetin për artin dhe kulturën.

Lidhur me Teatrin Kombëtar:

  1. “Aleanca për Mbrojtjen e Teatrit” shpreh vendosmërinë për të vijuar pa ndërprerje betejën për mbrojtjen e kompleksit shumëfish historik e kulturor, në të cilin funksionojnë aktualisht dy teatrot, ai Kombëtar dhe ai Eksperimental.
  2. Partia Demokratike dhe Opozita e Bashkuar angazhohet të mbështesë veprimet dhe aksionet e “Aleancës për Mbrojtjen e Teatrit” për mbrojtjen e ndërtesës historike të Teatrit Kombëtar dhe njëherësh për mbrojtjen e pronës publike të kërcënuar nga tjetërsimi i paligjshëm dhe korruptiv, duke përfshirë ndërmarrjen e çdo aksioni, të duhur e të nevojshëm, ligjor, politik e qytetar.
  3. Brenda 1 muaji nga momenti kur Partia Demokratike e Shqipërisë dhe Opozita e Bashkuar do të jetë shumicë politike qeverisëse, kompleksit të ish-Qarkut “Skanderbeg”, ku përfshihet edhe Teatri Kombëtar dhe zonat përreth tij, do t’i rikthehet me përparësi statusi “Ansambël Monument Kulture”, duke qenë pjesë e Qendrës Historike të Qytetit të Tiranës.
  4. Në momentin kur Partia Demokratike e Shqipërisë dhe Opozita e Bashkuar do të jetë shumicë politike qeverisëse, kompleksi i ish-Qarkut “Skanderbeg”, ku përfshihet edhe Teatri Kombëtar dhe zonat përreth tij, do t’i nënshtrohen ruajtjes dhe restaurimit të tyre, duke tërhequr në një sipërmarrje të tillë përvojën dhe ekspertizën e arkitektëve dhe ekspertëve të monumenteve të kulturës më të mirë në vend.
  5. Brenda 1 muaji nga momenti kur Partia Demokratike e Shqipërisë Opozita e Bashkuar do të jetë shumicë politike qeverisëse, do të shfuqizojë me përparësi si antikushtetues ligjin nr. 37/2018 “Për përcaktimin e procedurës së veçantë për vlerësimin, negocimin dhe lidhjen e kontratës me objekt “Projektimi dhe realizimi i projektit urban dhe i godinës së re të Teatrit Kombëtar”, si dhe çdo akt tjetër ligjor e nënligjor që buron prej tij dhe parashikon tjetërsimin e paligjshëm të pasurisë publike.
  6. Në momentin kur Partia Demokratike e Shqipërisë Opozita e Bashkuar do të jetë shumicë politike qeverisëse, do të ndërmarrë të gjitha masat e duhura ligjor për të garantuar vënien përpara përgjegjësisë penale dhe administrative të të gjithë vendimmarrësve publikë dhe subjekteve private, për përfshirjen në aferën e grabitjes kriminale të truallit të Teatrit Kombëtar, duke u ngarkuar atyre edhe detyrimin për kompensimin e çdo dëmi të shkaktuar.

Kontrata me artistët, opozita angazhohet për buxhetin më të lartë për artin në rajon:

Kontrata publike mes artistëve dhe opozitës në sallën kryesore të Teatrit Kombëtar përfshin angazhimin e PD jo vetëm në opozitë me mbështetjen e betejës së Aleancës në Mbrojtje të Teatrit, por edhe në qeveri me mbështetjen e artit dhe të kulturës. Partia Demokratike angazhohet që, brenda vitit të parë nga momenti kur opozita të jetë në drejtimin e vendit, të rrisë buxhetin për artin dhe kulturën në nivelet më të larta të rajonit. Gjithashtu, PD në qeveri angazhohet që, në konsultim më artistët, të reformojë sektorët e artit dhe të kulturës, nëpërmjet decentralizimit të institucioneve kulturore, reformimin e ligjeve për shpërblimin e drejtë financiarë të artistëve dhe garantimit të të drejtave të autorit.

  1. Lidhur me nevojën për një Reformë të vërtetë në art dhe kulturë:

Brenda 1 viti nga momenti kur Partia Demokratike e Shqipërisë dhe opozita e bashkuar do të jetë shumicë parlamentare, në konsultim me komunitetin e artistëve, do të nisë një proces të hapur dhe gjithëpërfshirës, për reformimin e sektorit të artit dhe kulturës në vend që synon:

  1. Decentralizimin e institucioneve kulturore në dakordësi me komunitetin artistik dhe shndërrimin e institucioneve buxhetore të artit e kulturës në institucione të pavarura publike;
  2. Reformimin e kuadrit ligjor për të garantuar statusin dhe të drejtat e profesionit të artistit, përfshi shpërblimin monetar të tyre;
  3. Garantimin e mbrojtjes efektive të të drejtave të autorit në Shqipëri;
  4. Rritjen e buxheteve për artin dhe kulturën në nivelet më të larta të rajonit. /abcnews.al

 

 

brazil-argentina.jpg
nev ila23:25 | 28/06/2019

Bashkimi Europian dhe Amerika e Jugut kanë arritur një marrëveshje historike tregtare pas disa dekadash negociata. Akordi do të stimulojë tregtinë e lirë mes dy kontinenteve dhe do të mbulojë rreth 800 milionë konsumatorë.

Bashkimi Europian dhe blloku ekonomik i Amerikës së Jugut, Merkosur, kanë arritur një marrëveshje tregtare pas 20 vjet negociata. Presidenti i Komisionit Europian, Zhan Klod Junker deklaroi se është marrëveshja më e madhe që Unioni ka arritur ndonjëherë, në një kohë kur tensionet tregtare janë më të larta se kurrë.

Ndërsa presidenti i Brazilit, Hair Bolsonaro tha se marrëveshja është historike dhe një nga më të rëndësishmet e të gjithë kohërave. Në bllokun Merkosur bëjnë pjesë Argjentina, Brazili, Uruguaji dhe Paraguaji dhe sipas zotit Junker, marrëveshja do të jetë në dobi të konsumatorëve të të dy palëve nënshkruese.

Në të njëjtën linjë, sekretari argjentinas për marrëdhëniet ndërkombëtare, Horasio Rejser tha se marrëveshja do të krijojë një treg të mirë për produktet dhe shërbimet, që do të mbulojë mbi 800 milionë konsumatorë.

Ndërsa në një komunikatë, qeveria e Brazilit saktësoi se marrëveshja parashikon eliminimin e tarifave për produkte si lëngu i portokallit, kafenë dhe frutat. Ndërsa prodhuesit e produkteve të tjera si mishi, sheqeri dhe etanoli do të kenë një akses më të madh në tregun europian.

Vitin e kaluar, Bashkimi Europian nënshkroi një marrëveshje për tregtinë e lirë me Japoninë, që mbulon rreth një të tretën e GDP-së së botës dhe 600 milionë konsumatorë./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono