maqedonia e veriut

albin-kurti-3.jpg
G. P.21:52 | 20/10/2019

Kandidati për kryeministër në Kosovës, Albin Kurti e cilëson padrejtësi vendimin e Këshillit Europian për të mos çelur negociatat me Shqipërinë dhe Maqedoninë e Veriut. Sipas Kurtit të dy vendet e kanë merituar, ndërkohë që ka apeluar që të bëhet kujdes me Shengenin ballkanik.

Kreu i Lëvizjes Vetëvendosja dhe kandidati kryesor për kryeministër në Kosovë, Albin Kurti e cilëson të padrejtë vendimin e Këshillit Europian për të mos çelur negociatat me Shqipërinë dhe Maqedoninë e Veriut. Nga Tirana ku takoi dhe falenderoi për angazhimin në zgjedhjet e 6 tetorit qendrën e Lëvizjes në Tiranë, Kurti bëri thirrje për një kujdes me Minishengenin Ballkanik.

Në Kosovë pritet të marrë jetë brenda pak ditësh qeveria e re e dalë nga zgjedhjet e parakohshme. Kurti e cilësoi të pashmangshëm koalicionin me LDK-në, ndërkohë që konfirmoi  se po formatohet kabineti i ri qeveritar dhe po harmonizohen programet.

Kurti do të presë të marrë zyrtarisht detyrën e kreut të qeverisë për të mbajtur edhe një takim me kryeministrin Rama, ndërkohë që për të është e rëndësishme që marrëdhëniet mes shqiptarëve të forcohen edhe më shumë./ABC News Albania

Gazment-Bardhi-1-1280x853.jpeg
G. P.20:59 | 20/10/2019

Partia Demokratike e lexon ndryshe nga mazhoranca mesazhin e përcjellë nga grupet parlamentare të CDU/CSU në Gjermani. Në një reagim për mediat, Sekretari i Përgjithshëm i PD, Gazment Bardhi falenderoi Bundestagun gjerman për mbështetjen ndërkohë që kujtoi se pa plotësuar kushtet, Shqipëria nuk do të mund të çele negociatat.

“Mesazhi është i qartë: Pa plotësuar kushtet e vëna nuk ka asnjë mundësi për Shqipërinë për të hapur negociatat. Koha e propagandës ka mbaruar! Shqipëria nuk mund të mbetet peng i qeverisjes së dështuar dhe të refuzuar të Edi Ramës”, thotë në reagimin e tij, numri dy i PD, Gazmend Bardhi.

Dy përfaqësuesit e lartë gjermanë kërkuan që Shqipëria dhe Maqedonia e Veriut të vijojnë me reformat, duke premtuar mbështetje për rrugëtimin drejt Bashkimit Europian./ABC News Albania 

takimi.jpg
G. P.20:13 | 20/10/2019

Në Shkup vazhdon që prej orës 17:00 takimi i presidentit Stevo Pendarovksi me liderët politikë, takim i thirrur nga kreu i shtetit, pas mos-marrjes së datës për nisjen e bisedimeve të anëtarësimit.

Përveç vendimit të Këshillit Europian që refuzoi hapjen e negociatave të anëtarësimit për Maqedoninë e Veriut, në takim liderët po bisedojnë edhe për zgjedhjet e parakohshme parlamentare, të cilat një ditë më parë i kërkoi kryeministri Zoran Zaev.

Gazetarja e ABC News në Maqedoninë e Veriut, Xhumadije Ibrahimi, raportoi se në orën 19:00 ka përfunduar pjesa e parë e takimit. Presidenti Pendarovski iu drejtua publikut dhe tha se gjatë asaj pjesë të mbledhjes u bisedua rreth negociatave me BE-në dhe integrimin e vendit në strukturat euroatlantike. Presidenti i ka kërkuar liderëve që të punojnë për të çuar përpara reformat.

Gazetarja raportoi se në pjesën e dytë të takimit pritet të bisedohet rreth zgjedhjeve të parakohshme, më konkretisht rreth caktimit të datës në të cilën ato do të mbahen. Pro mbajtjes se këtyre zgjedhjeve janë shprehur të gjitha partitë politike në vend.

Sipas Kushtetutës së Maqedonisë së Veriut, nëse arrihet një dakordësi për këto zgjedhje Presidenti i vendit shpërndan parlamentin dhe me dakordësi politike krijohet një qeveri tranzitore që çon vendin në zgjedhjet e parakohshme.

Në takim po marrin pjesë kryeministri dhe lideri i LSDM, Zoran Zaev, kreu i VMRO-DPMNE, Hristijan Mickoski, kreu i BDI, Ali Ahmeti, lideri i Aleancës për Shqiptarët Ziadin Sela, kreu i Lëvizjes BESA Bilall Kasami, ai i Alternativës Afrim Gashi dhe lideri i PDSH, Menduh Thaçi./abcnews.al

kyriakos.jpg
G. P.18:35 | 20/10/2019

Greqia do të vazhdojë të mbështesë Shqipërinë dhe Maqedoninë për anëtarësim në familjen europiane dhe në të njëjtën kohë fton vendet anëtare të bashkëpunojnë për të konkretizuar këtë perspektivë. Ministri i jashtëm grek Mitsotakis tha se mos-hapja e negociatave nuk është mirë as për stabilitetin e Ballkanit, por as për vetë Greqinë.

Ministria e Jashtme greke, thekson në një deklaratë për shtyp se mbështetja e vendeve të Ballkanit perëndimor është një nga akset e patjetërsueshme të politikës së jashtme të Athinës.

“Greqia do të vazhdojë të mbështesë përpjekjet e vendeve të rajonit për të realizuar reformat e kërkuara… Në të njëjtën kohë i fton vendet anëtare të Bashkimit Europian të bashkëpunojnë për konkretizimin e perspektivës europiane të Ballkanit Perëndimor në dobi të rajonit, por edhe të vetë Europës”, thuhet në deklaratën e Ministrisë së Jashtme greke.

Deklarata e Ministrisë së Jashtme greke vjen si një reagim ndaj mungesës së vendimit për Shqipërinë dhe Maqedoninë e Veriut, në samitin europian të së premtes. Vetë kryeministri grek, Kyriakos Mitsotakis, ka komentuar se ky nuk është një zhvillim i mirë për rajonin, por edhe për vetë Greqinë. Sipas zotit Mitsotakis, arma kryesore që ka Greqia për trajtimin e problemeve me të dy vendet, është perspektiva europiane e tyre.

“Konsideroj se nuk është një zhvillim i mirë, as në përgjithësi për stabilitetin e Ballkanit, por as për vetë Greqinë. Sepse arma kryesore që ka Greqia me qëllim që të trajtojë probleme që ka me këto dy vende, ka të bëjë me perspektivën europiane të tyre. Sa më afër një kursi europian të ndodhen këto dy vende, aq më shumë na jepet mundësia në kuadër të ndryshimeve që po bëjnë këto vende për të ardhur më pranë familjes europiane, të trajtojmë edhe probleme që ne kemi në planin dypalësh”, tha Mitsotakis./ABC News Albania

cakaj-1280x720.jpg
G. P.13:59 | 19/10/2019

Qeveria shqiptare nuk sheh asnjë të përbashkët mes përgjegjësisë së saj për dështimin me negociatat dhe vendimit të Zaev për ta çuar Maqedoninë në zgjedhje të parakohshme. Gent Cakaj tha sot se Edi Rama nuk ka dhënë asnjëherë garanci 100 % për hapjen e bisedimeve, ndryshe nga kryeministri Zaev.

Vendimi i kryeministrit maqedonas për të marrë përgjegjësi e për të shkuar në zgjedhje të parakohshme, nuk do të thotë asgjë për qeverinë shqiptare.

Mëkëmbësi i Ramës në Ministrinë e Jashtme, Gent Cakaj, i pyetur për këtë çështje nga ABC News, tha se situata e dy kryeministrave është e ndryshme, pasi Rama nuk ka dalë ndonjëherë garant se do t’i hapte patjetër negociatat, siç Zaev ka bërë.

Ministri i Jashtëm në Detyrë, thotë se në Maqedoni, zgjedhjet e parakohshme nuk lidhen vetëm me refuzimin e BE-së për të hapur negociatat. Gent Cakaj nënvizoi se përpjekjet e Shqipërisë do të vijojnë, dhe shansi tjetër është Maji 2020./ABC News Albania

Shkëndija.png
Igli Nikolli16:23 | 18/10/2019

Shkëndija ndodhet në krizë dhe ka harruar të fitojë. Ernest Gjoka e ka nisur me një disfatë në shtëpi aventurën me kampionët e Maqedonisë së Veriut. Një gol i Mario Maslac në minutat shtesë të pjesës së parë i ka dhuruar fitoren dhe kreun e renditjes ekipit të Akademija Pandev në Tetovë.

Shkëndija nuk ia doli të evitonte humbjen në përballjen e sotme, e pestë në këtë sezon. Kuqezinjtë mbeten në vend të gjashtë me 11 pikë, dhjetë më pak se kryesuesit e Akademija Pandev.

Një nisje dhe ecuri e dobët e ekipit shqiptar, që nuk po arrin të konfirmojë dominimin e sezoneve të fundit. Ndeshja e radhës luhet me datë 23 tetor dhe Shkëndija do të presë në shtëpi ekipin e Sileksit. /abcnews.al

Shkëndija – Akademija Pandev 0-1
(Maslac 45+3′)

Renditja provizore e kampionatit të Maqedonisë së Veriut
hahn.jpg
G. P.13:07 | 18/10/2019

Me anë të një postimi në rrjetet sociale, komisionari për zgjerimin Johannes Hahn ka thënë se liderët e Europës dështuan që të realizuar premtimin e tyre për të hapur negociatat me Maqedoninë e Veriut dhe Shqipërinë në BE.

“Liderët e Bashkimit Europian dështuan që të realizojnë premtimin e tyre për të çelur procesin e negociatave me Maqedoninë e Veriut dhe Shqipërinë. Kjo është shumë zhgënjyese. Shtetet anëtare të BE-së tashmë duhet të qartësojnë se sa seriozë janë me angazhimin e tyre për integrimin europian të Ballkanit Perëndimor. Falenderoj të gjithë ata që u investuan plotësisht mbrëmjen e djeshme për të arritur një vendim të një rëndësie strategjike për Bashkimin e Europian. Ata luftuan për të dhënë një sinjal shprese për qytetarët e Ballkanit Perëndimor”, shkruan Hahn në Twitter.

Hahn thekson se vendimi negativ mund të sjellë pasoja negative në lidhje me destabilizmin e Ballkanit Perëndimor.

“Siç u shpreha edhe në Luksemburg: Ky nuk është një moment lavdie për Bashkimin Europian. Refuzimi për të pranuar progresin e vërtetuar do të ketë pasoja negative, përfshi këtu edhe rrezikun e destabilizimit të Ballkanit Perëndimor me ndikim të madh edhe në Bashkimin Europian. Është përgjegjësia jonë që të qëndrojmë pranë vendeve, qytetarët e të cilëve janë me të drejtë shumë të zhgënjyer. Do të vazhdoj të bëj gjithçka që t’i mbështes. Integrimi i Ballkanit perëndimor në BE është dhe do të mbetet një politikë e rëndësishme strategjike, në interesin tonë të përbashkët”, thotë Hahn.

Reagon ashpër ish-kryeministri suedez: Bllokimi i negociatave, nuk është gjë e vogël

/abcnews.al

rutt.jpg
G. P.10:44 | 18/10/2019

Kryeministri holandez, Mark Rutte ka folur për mediat pas përfundimit të samitit të ditës së parë të liderëve europianë. Ai shprehet se akoma s’ka përfunduar asgjë në letër.

Ai theksoi se Holanda ka shprehur shqetësim për Shqipërinë, e cila ka shumë hapa për të ndërmarrë përpara. Ai tha se çështja për çeljen ose jo të negociatave është shtyrë për një takim tjetër.

“S’ka përfunduar asgjë në letër dhe çështja është shtyrë për një takim tjetër. Holanda kishte shqetësim të madh për Shqipërinë dhe s’është marrë vendimi për të hapur negociatat. Për Maqedoninë kemi më pak shqetësim, por ka shumë vende të tjera që konsiderojnë që duhet t’i trajtojmë të dy vendet bashkë.

Për Shqipërinë ka shumë shqetësim pavarësisht se vendi ka bërë hapa përpara. Është e arsyeshme të mos hapen negociatat  me Shqipërinë tani, por ndoshta në të ardhmen. Nuk jam takuar me Zaev dhe Ramën. Rama ka bërë hapa përpara, por ka shumë hapa për të ndërmarrë”, tha Rutte.

emmanuel-macron-1280x827.jpg
G. P.22:50 | 15/10/2019

Negociatat, Macron kundër Merkel: Mjaft me telenovelat e anëtarësimit

Presidenti Macron ka zgjedhur të dalë kundër kancelares Merkel sa i takon hapjes së negociatave. Sipas agjencisë së lajmeve “Reuters”, sërish në mbledhjen e ministrave të Jashtëm të vendeve anëtare ka qenë Franca ajo që ka kundërshtuar nisjen e procesit me Shqipërinë dhe Maqedoninë e Veriut.

Presidenti francez Emanuel Macron ka zgjedhur një kurs që bie ndesh me atë të kancelares gjermane Angela Merkel lidhur me procesin e zgjerimit të BE-së. Sërish të martën, në takimin e ministrave të Jashtëm të Unionit në Luksemburg që u mbyll pa një marrëveshje, ishte Franca që më shumë se të gjithë kundërshtoi hapjen e negociatave të anëtarësimit me Maqedoninë e Veriut.

Me të u bashkuan edhe Holanda e Danimarka, që kundërshtojnë ndërkohë hapjen e negociatave me Shqipërinë. Në takimin e zhvilluar, Franca injoroi tërësisht mbështetjen e pjesës dërrmuese të vendeve anëtare për dhënien e dritës jeshile për dy vendet e Ballkanit.

Sipas agjencisë së lajmeve “Reuters”, ministrja franceze për Çështjet Europiane, Ameli de Montshalë deklaroi se në asnjë mënyrë nuk mund të lejohet hapja e negociatave përpara se BE të reformojë mënyrën e pranimit të kandidatëve të rinj.

Ajo theksoi se i duhet dhënë fund asaj që e quajti “telenovela e anëtarësimeve”. Ndërkohë, në Paris, një zyrtar i presidencës franceze konfirmoi se qeveria Makron nuk do të lejojë nisjen e procesit.

“Këto vende do të jenë pjesë e BE-së një ditë, por është ende shumë herët për të nisur procesin e zgjerimit me to”, deklaroi zyrtari.

Franca pretendon se BE-ja po përballet me shumë sfida për t’i lejuar vetes anëtarësimin e dy shteteve nga Ballkani, një rajon që vuan ende nga plagët e luftërave të viteve ’90 e që është i kapluar nga krimi i organizuar dhe korrupsioni. Por qëndrimi i Francës ka ngritur shqetësime në radhët e BE-së, pasi në rast refuzimi vendet e Ballkanit mund të kultivojnë lidhje më të ngushta me Rusinë, Turqinë dhe Kinën.

/ABC News Albania

Shkëndija-Ballistat.jpg
Igli Nikolli16:58 | 05/10/2019

Dueli më i fortë i kampionatit të Maqedonisë së Veriut është mbyllur pa gola. Shkëndija nuk arriti të mposhtë Vardarin në shtëpi, edhe pse dominoi ndeshjen. Vendasit krijuan shumë raste, por nuk arritën të gjenin rrugën e rrjetës.

Ky barazim i mban 9 pikë larg kreut kuqezinjtë nga Tetova. Kampionët në fuqi kanë hasur probleme në këtë fillim sezoni dhe numërojnë vetëm 11 pikë pas nëntë javëve të para.

Pikë e mirë për Vardarin, që kryeson me 20 pikë, dy më shumë se Akademija Pandev. Këta të fundit mposhtën 2-0 në shtëpi Sileksin, ndërsa Shkupi mori një barazim në transfertë kundër Akademija Pandev.

Ekipi tjetër shqiptar, Struga Trim&Lum humbi një “finale” mbijetese kundër Borec në transfertë. Dygolëshi i Kirovskit nuk i mjaftoi ekipit strugan, që pësoi 3 gola nga vendasit e vendit të fundit. /abcnews.al

Shkëndija – Vardar 0-0
Makedonija GP – Shkupi 0-0
Borec – Struga Trim&Lum 3-2
(Dragarski 29’, Hristov 41’, Prelcec 57’ / Kirovski 5’, 42’)
Akademija Pandev – Sileks 2-0

Renditja e kampionatit të Maqedonisë së Veriut


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono