maqedoni

Gavazaj.jpg
Veronik Istrefaj23:54 | 15/01/2020

Mesfushori kosovar, Alush Gavazaj, do të lëvizë sërish këtë merkato janarit. 24 vjeçari iu bashkua Vushtrrisë nga ekipi i Feronikelit në vetëm në fillim të këtij sezoni, por ka vendosur të lëvizë sërish, kësaj radhe për t’u transferuar te Renova në Maqedoni.

Gavazaj ka luajtur me disa skuadra edhe në Shqipëri, me Tiranën, Bylisin, Tërbunin dhe Korabin.

Në Kosovë, mesfushori ka luajtur për Lirinë, Feronikelin dhe Vushtrrinë, ndërsa tani do të vazhdojë një aventurë të re në Maqedoni./abcnews.al

maqedoni-parlamenti.jpg
nev ila22:29 | 10/01/2020

Partia opozitare maqedonase VMRO-DPMNE insiston që personat e amnistuar në vend të mos mund të merren me politikë. Zëdhënësi i partisë Dimçe Arsovski akuzoi deputetin e LSDM-së Aleksandar Kiracovski, se kërkon që përmes një propozim ligji për mos vjetërsimin e veprave penale, përpiqet të shpëtoj vetveten.

Arsoski theksoi se opozita kërkon që çdokush që do të merret me politikë dhe që ka për qëllim të merret me politikë, ti shqyrtohet prejardhja e pronës dhe personat e falur  dhe amnistuar të mos mund të merren më me politikë dhe normalisht të mos vjetërsohen të gjithë veprat penale të korrupsionit të niveleve të larta.

Zëdhënësi i LSDM-së, Kostadin Kostadinov, theksoi se për LSDM-në është i pranueshëm edhe propozimi i opozitës që të hetohet prona e gjykatësve dhe prokurorëve.

Ndërsa që tu ndalohet personave të amnistuar të mos mund të merren me politikë, kjo duhet të diskutohet në Kuvend.

Deputeti i LSDM-së Aleksandar Kiracovski, dorëzoi në Kuvend një propozim ligj me të cilin, kërkon që të shtohet me tre herë më shumë afati i vjetërsimit të veprave të rënda penale të politikanëve dhe personave të zgjedhur dhe emëruar.

Ai nënvizoi se nëse ka vullnet nga deputetët, ky propozim ligj mund të miratohet para shpërndarjes së Kuvendit./abcnews.al

Valon-Ahmedi.jpg
Veronik Istrefaj17:26 | 04/01/2020

Mesfushori Valon Ahmedi ka firmosur me Shkëndijën dhe është prezantuar si futbollisti më i ri i kuqezinjve nga Tetova. Ahmedi ka një karrierë të pasur dhe është një futbollist shumë cilësor. Afrimi i tij i ka përforcuar edhe më shumë kampionët. Pasi firmosi kontratën, mesfushori foli për faqen zyrtare të klubit, ku u shpreh: “Ndihem shumë i lumtur.

Në radhë të parë, dua të falënderoj të gjithë anëtarët e KF Shkëndija për pritjen e ngrohtë që më kanë bërë, për profesionalizmin e treguar, për besimin dhe për vlerësimin që më kanë bërë si futbollist.  Përveç faktit se është një kënaqësi e madhe, mund të them se është një privilegj shumë i madh për mua si futbollist, sepse të gjithë e dinë se Shkëndija ka qenë, është dhe do të mbetet historia e gjithë shqiptarëve këtu në vendin tonë.

Jam shumë i lumtur për marrëveshjen me Shkëndijën, sepse rikthehem në vendlindje, në veçanti pranë të familjes time që paraqet një energji dhe diçka që nuk përshkruhet me fjalë, për faktin se deri tani kam luajtur çdo herë jashtë. Mua më mbetet që vetëm me punë, angazhim, me djersë dhe me përkushtim maksimal, ta kthej besimin e Shkëndijës në fushë për gjithçka që kanë bërë deri tani. Të them të drejtën mezi pres të nis punën me grupin”, tha Ahmedi për faqen zyrtare të klubit./abcnews.al

kuvendi-maqednas.jpg
nev ila18:30 | 03/01/2020

Kuvendi i Republikës së Maqedonisë së Veriut votoi me 101 vota “pro”, asnjë “kundër” dhe asnjë “abstenim” qeverinë e re teknike të drejtuar nga ish-ministri i Brendshëm, Oliver Spasovski.

Po ashtu u zgjodhën edhe ministrat e rinj, dy nga të cilët vijnë nga radhët e VMRO-DMPNE-së, sipas Marrëveshjes së Përzhinos.

Ministrat e sapozgjedhur u betuan, dhe më pas Xhaferi i ftoi ata për një koktej solemn./abcnews.al

naqe-çulev-780x439.jpg
R D23:15 | 02/01/2020

Partia opozitare VMRO-DPMNE në Maqedoninë e Veriut ka propozuar Naqe Çulev për ministër të Brendshëm. Partia në pushtet e Zoran Zaev, LSDM e ka pranuar kandidaturën e tij duke deklaruar se nuk shkelet Kushtetuta, pasi kandidati i opozitës nuk është ushtarak dhe as person nën hetim.

Çulev është diplomuar në kriminalistikë dhe punon në Agjencinë për Zbulim. Ai ka marrë pjesë në një sërë trajnimesh në Britani të Madhe, Gjermani, Bullgari dhe në vende tjera të Europës.

Qeveria teknike, me Oliver Spasovskin në krye, duhet të votohet deri para mesnatës së sotme.

Para propozimit që Naqe Çulev të jetë ministër i brendshëm në Qeverinë teknike, VMRO-DPMNE tërhoqi kandidaturën e kolonelit Dragan Kovaçki, për këtë post.

/abcnews.al

Capture-16.jpg
nev ila19:37 | 19/12/2019

Presidenti maqedonas Stevo Pendarovski theksoi në fjalimin e fund-vitit para deputetëve se po angazhohet për të penguar ndarjet në vija etnike dhe partiake që po thellohen, sipas tij, në Maqedoninë e Veriut. Ai ftoi të gjithë politikanët që të kundërshtojnë paragjykimet dhe stereotipet në shoqëri.

Pendarovski paralajmëroi se deri në fund të këtij viti do të ftojë në takime përfaqësues të grupeve të tifozëve për të kapërcyer ndarjet që nxisin mes komuniteteve të ndryshme etnike.

Duke komentuar rekomandimet e Komisionit të Venecias lidhur me ligjin e gjuhëve, presidenti maqedonas tha se “asnjë shtet nuk është shkatërruar nga dhënia e më shumë të drejtave qytetarëve të saj në këtë fushë dhe se ligji nuk ka potencial për destabilizimin e vendit, por se duhet bërë korrigjime të nevojshme që ligjet të vihen në jetë”.

Pendarovski vuri në dukje gjendjen në gjyqësor pas rastit të njohur si “Zhvatja” që ka përfshirë ish-Kryeprokuroren e posaçme, duke thënë se që nga pavarësia e vendit, asnjë politikan i profilit të lartë apo biznesmen i pasururar brenda natës nuk ka pëfunduar prapa hekurave. “Për çdonjërin që nuk ka shpjegime logjike se si është bërë milioner me rrogë shteti, duhet të pasojë jo vetëm dorëheqja por dhe procedimi gjyqësor”, tha ai.

Presidenti i quajti procese të përfunduara që prej kohësh debatet mbi gjuhën dhe identitetin maqedonas që janë hapur së fundmi në Bullgari. Ndërsa lidhur me nismat rajonale, tha se ato nuk duhet kuptuar në asnjë mënyrë si alternativë e integrimeve europiane, por si instrument për integrimin e shpejtë në Evropë.

Presidenti theksoi gjithashtu se në pranverë duhet organizuar zgjedhje të ndershme dhe të drejta. VMRO-DPMNE në opozitë e quajti një retorikë boshe fjalimin e presidentit. Deputeti Ilija Dimovski tha se kishin dëgjuar shumë parashikime por asnjë zgjidhje. Deputeti opozitar tha se Pendarovskit i përshtatej më tepër roli i zëdhënësit të qeverisë dhe i Lidhjes Social Demokrate, sepse ai arsyeton politikat e këqija qeveritare./abcnews.al

shkendija.jpg
Veronik Istrefaj16:21 | 09/12/2019

Shkëndija nuk arriti të marrë më shumë se një pikë në transfertën kundër Vardar, sfidë që u mbyll me rezultatin 2-2. Sot, klubi nga Tetova ka reaguar për këtë ndeshje, duke thënë se do t’i drejtohen zyrave të Federatës së Futbollit të Maqedonisë, për të kërkuar llogari për arbitrimin. Gjithashtu, kuqezinjtë nga Tetova thanë se nuk do të ankohen për racizmin e përdorur kundrejt lojtarëve të tyre, pasi nuk është FFM ajo që ndëshkon raste të tilla.

Reagimi i KF Shkëndija:

KF Shkëndija përmes kësaj shkrese njofton opinionin, për reagimin zyrtar që është në përpilim dhe do të paraqitet para organeve të FFM-së për parregullsitë gjatë referimit të ndeshjes Vardar-Shkëndija.

Ky reagim nuk ka të bëjë me racizmin dhe nacionalizmin që vazhdimisht shprehet gjatë ndeshjeve me FK Vardar në fushën e tyre, gjëra që aspak nuk ndëshkohen nga organizatori kompeticionit FFM, dhe përgjegjësve të tyre të caktuar gjatë ndeshjes të së dielës (delegatë, arbitra etj.). Në fakt ne si klub përshëndesim prezencë sa më masive të shikuesve gjatë çdo ndeshje, përderisa në këto nuk tolerohet nacionalizmi, racizmi dhe në rast më të keq edhe dhuna, nga organizatori i kompeticionit – FFM.

Përkundrazi, ky reagim ka të bëjë me vetë lojën e ditës dielë në Shkup dhe ndikimin në të cilën patën ndarësit e drejtësisë (referet) në dëm të Shkëndijës pa diskutim, nga parregullsitë e shumta të referimit. Ankesa jonë për referimin tendencioz në këtë ndeshje, si dhe kërkesa për masa ndëshkuese ndaj ndarësve të drejtësisë, do përmbajë videomaterialet në vijim që dëshmojnë në shumë raste padrejtësitë gjatë referimit të vetë ndeshjes:

Seria e vendimeve në dëm të ekipit tonë filloi në minutën e 13-të kur harkimi i Alimit devijohet me dorë nga mbrojtësi i Vardarit, Mladenovski dhe në një situatë të qartë (arbitri pas portës kishte pamjen më të mirë) arbitri Stavrev tregon pozicion jashtë lojë. Në minutën e 28-të të ndeshjes Stavrev cilëson me penalti (nga e cila vendasit avansuan) intervenimin e futbollistit tonë Murati ndaj Cetanovskit të Vardarit, ndërsa është e qartë se mungonte edhe kontakti minimal.

Në minutën e 35-të në momentin që KF Shkëndija arriti të barazojë rezultatin, portieri vendas Gaçeski para syve të arbitrit Stavrev godet pa top futbollistin tonë Junior dhe gjithë kjo nuk sanksionohet as me karton të verdhë edhe pse rregullat e futbollit thonë se për startet e këtilla ndëshkimi është karton i kuq. Rasti i radhës vjen në minutën e 36-të kur B. Ibraimi ndalet me faull në zonë nga Serafimovi i Vardarit dhe ky start i qartë për arbitrat ishte i pastër dhe në vend të penaltisë vendosin të ndëshkojnë me të verdhë futbollistin tonë. Në minutën e 50-të KF Shkëndija shënon gol përmes A. Ibraimit dhe i njëjti anulohet për pozicion jashtë loje të cilën prova e video materialit e tregon si të gabuar.

Zakonisht mjafton një vendim i gabueshëm i arbitrave që të përcakton fatin e ndeshjes, mirëpo në ndeshjen e së dielës 5-shja e arbitrave më me përvojë, në krye me Stavrevin (të gjithë nga Shkupi???), duhesh te që të gabojnë pikërisht 5 herë që të nxjerrin epilogun përfundimtar të kësaj sfide në disfavor dhe dëm të KF Shkëndija.

Kjo nuk është hera e parë që gjatë këtij sezoni bëhen padrejtësi në referim ndaj kampionëve në fuqi KF Shkëndija, ndërsa neve si klub asnjëherë nuk e kemi pasur si pjesë të politikës së klubit që të merremi me ankesa dhe reagime të këtij lloji, me qëllim që të fokusohemi në kapacitetet sportive dhe rezultate që veçse një kohë i radhisim si në planin e klubit, po ashtu edhe të përfaqësimit të futbollit nacional në kompeticionet e UEFA-së për klube, apo atë të reprezentacionit tonë. Gjykojmë që nuk është fshehtësi që jemi klubi me më tepër investime në futbollin vendor.

Shpresojmë që kjo ankesë do të jetë motiv edhe për vetë arbitrat e përmendur për të tejkaluar veprimet e tyre në ndeshjen në fjalë dhe në vazhdim të kampionatit të dëshmojnë epitetin e tyre në bazë të vlerësimeve, për të kontribuar bashkërisht në avancimin e futbollit në drejtimin e dëshiruar evropian dhe për të mos lejuar që niveli të kthehet në nivelet e dikurshme të ulëta “alla Gaçevski”.

Gjithsesi nuk duam të keqkuptohemi në asnjë rast se jemi imun ndaj padrejtësive pikërisht në referim, ku shumë lehtë përcaktohet fati i fituesit të ndeshjes, si dhe kampionatit. Nëse përfaqësues të caktuar në FFM kanë agjendë për të dëmtuar KF Shkëndija në objektivat sportive në kampionatin vendor, atëherë kërkojmë që nëpërmjet ankesës dhe materialeve të paraqitura të investigohen pikërisht këto dhe fuqimisht kërkojmë që të penalizohen të njëjtit, së paku që mos përsëriten favorizimet dhe si gjithkund në sport të mundësohet me rregull të fiton më i miri”.

kaaaaaaaa.jpg
ad min09:08 | 08/12/2019

Një grup studentësh nga Tetova kanë organizuar një aksion për mbledhjen e ndihmave për të prekurit e tërmetit në Shqipëri.

Pasi kanë grumbulluar rroba, produkte ushqimore dhe sanitare si dhe para, ato tashmë i kanë dorëzuar këto para në Fondacionin Firdeus të Elvis Naçit, shkruan Albeu.com.

Fillimisht në ditët e para studentët kanë dërguar produktet ushqimore dhe veshmbathjet, ndërsa sot të njëjtit kanë takuar Elvis Naçin për ti dhuruar 8940 euro.

Studentët në fjalë thonë se kanë qenë të akuzuar padrejtjësisht për mostransparencë në lidhje me mjetet e mbedhura.

“Ne e bëmë një vepër të mirë, turpi i ngelet atyre që na akuzuan” ka deklaruar Abedin Kaliqi, njëri ndër organizatorët.

 

zaev.jpg
nev ila11:37 | 23/11/2019

Eksperienca shqiptare me vetting-un në drejtësi dhe problemet që ajo shfaqi kanë detyruar BE të pezullojë aplikimin e të njëjtës reformë në shtetin fqinj, Maqedoninë e Veriut.

Në një intervistë për A2, kryeministri Zoran Zaev pranon se ishte Brukseli që e frenoi në nisjen e këtij procesi.

“Unë e pata premtuar në zgjedhje, jo vetting, por atë që e cilësoj njohje e së drejtës për t’u rizgjedhur e gjyqtarëve dhe prokurorëve. Ishte pjesë e programit. Por, kur mora detyrën, BE nuk dha mundësi të nisja procesin. Pse? Sepse ndoshta duhet të ndiqnin si po shkonte në Shqipëri, si do të mbyllej. Ata na thanë se nuk keni njerëz, nuk keni si të plotësoni vendet që do të mbeten bosh” – tha Zaev.

Nuk e mohon se bashkimi në të ashtuquajturin Shengen Ballkanik synon shtimin e presionit ndaj Unionit Europian për të përshpejtuar procesin e integrimit.

Të bësh presion është mirë. Shpresoj, presion pozitiv. Por, ata do të shohin më shumë luftë ndaj korrupsionit. Do të shohin se vlerësojmë taksat e paguara nga qytetarët në Francë apo Gjermani, si ne ndërtojmë rrugë, autostrada, sepse ata kanë shpenzuar shumë para në rajon. Ata do të shohin se ne vlerësojmë. Ne shpresojmë që të ketë impakt pozitiv tek Bashkimi Europian, por më së pari ne e bëjmë këtë për qytetarët tanë”.

Zbulon se ideja e Shengenit Ballkanik lindi gjatë një takimi në Asamblenë e Kombeve të Bashkuara.

Ne u takuam aty, po pinim verë dhe nisëm të flisnim për këtë. Biseduam për procesin e Berlinit, për integrimin europian, Vuçiç na tha se do të zhgënjeheni, ndërsa ne besonim kaq shumë. Gjatë këtyre diskutimeve, folëm për krijimin e One Stop Shop me Maqedoninë dhe të përgatiteshim dhe me Shqipërinë. Dhe vlerësuam se nuk është mjaftueshëm. Disa e quajnë Mini Shengen, disa Mini Jugosllavi, disa të tjerë nuk e di se çfarë. Është përshpejtim i bashkëpunimit rajonal”.

Konfirmon se asnjëherë nuk e ka mbështetur idenë e ndarjes së Tiranës dhe Shkupit në rrugën drejt B.

“Ka patur shumë diskutime nga vendet anëtare. Kur më kanë pyetur, qëndrimi im ka qenë: mos e bëni këtë. Ne duhet të shkojmë bashkë. Pse të diskutojmë? Miqtë kujdesen për njëri-tjetrin”.

Mik konsideron dhe Edi Ramën dhe thotë se nuk kishte arsye për të dhënë dorëheqjen, njësoj siç veproi Zaev.

Ishte një situatë ndryshe. Edi ka më shumë shanse të fitojë në Shqipëri. Unë e di, e ndjek, sepse është fqinji im. Unë kam më pak shanse të fitoj në zgjedhje. Shqipëria ka reformat e saj, sukseset e saj. Është ndryshe”.

Zoran Zaev këmbëngul disa herë se është krenar që ka mbështetjen e shqiptarëve dhe shfaqet optimist se njësoj do të jetë edhe në zgjedhjet e ardhshme.

parlamenti-maqeconas-1280x717.jpg
nev ila15:44 | 05/11/2019

Parlamentarët në Maqedoninë e Veriut diskutojnë sot ndryshimin e modelit zgjedhor nga gjashtë në një njësi zgjedhore si dhe listat e hapura. Nisma është nxitur nga 12 deputetë të Kuvendit.

Parlamentarët në Maqedoninë e Veriut diskutojnë sot ndryshimin e modelit zgjedhor nga gjashtë në një njësi zgjedhore si dhe listat e hapura. Nisma për një njësi zgjedhore është nxitur nga 12 deputetë të Kuvendit.

Partitë më të mëdha politike në takimin e fundit të liderëve janë dakorduar që të mbahen zgjedhjet e parakohshme parlamentare më 12 prill 2020, por akoma mbetet çështja e hapur se këto zgjedhje do të zhvillohen sipas modelit të deritanishëm me 6 njësi zgjedhore apo do të ndryshohet kodi zgjedhor, për një njësi zgjedhore me lista të hapura.

Komisioni shtetëror i zgjedhjeve ka thënë se është e gatshëm të organizojë zgjedhje sipas cilido model që arrijnë marrëveshje partite politike. Parlamentarët në Maqedoninë e Veriut diskutojnë sot ndryshimin e modelit zgjedhor nga gjashtë në një njësi zgjedhore si dhe listat e hapura. Nisma për një njësi zgjedhore është nxitur nga 12 deputetë të Kuvendit.

Partitë opozitare dhe partitë e vogla të pozitës kanë kërkuar ndryshimin e kodit zgjedhor dhe njësive zgjedhore, për të pasur shanse më të mëdha dhe të barabarta me partitë më të mëdha. Katër partitë më të mëdha në vend kanë qëndrime dhe propozime të ndryshme.

LSDM kërkon aplikimin e një njësie zgjedhore me lista të hapura, VMRO-DPMNE kërkon model shumice me 120 njësi, Aleanca për Shqiptarët 8 njësi zgjedhore, ndërsa BDI përkrah modelin aktual./abcnews.al

 

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono