maqedoni

maqedoni-kuvendi.jpg
G. P.17:30 | 20/07/2019

Sipas projektligjit të ri për Prokurorinë Publike, në Maqedoninë e Veriut, për ndjekje të krimit të organizuar dhe korrupsionit të lartë, prokurorët e rinj do të mund të konkurrojnë për kreun e prokurorisë. Ministria e Drejtësisë e publikoi projektligjin, në një kohë që partitë politike shprehen të ndara në qëndrimet e tyre.

Me Ligjin për Prokurori Publike, për të cilin njoftoi dje Kryeministri Zoran Zaev, Prokuroria Speciale Publike do të kalojë në Prokurorinë Themelore Publike për ndjekjen e krimit të organizuar dhe korrupsionit dhe do riemërohet në Prokurori Themelore Publike për ndjekjen e krimit dhe korrupsionit të lartë. Javën e ardhshme në Kuvend do të propozohet tekst i ri i ligjit për Prokurorinë Publike,

Propozim-ligji parasheh:

· PSP-ja të kalojë në PTHP për ndjekjen e krimit dhe korrupsionit.

· Do të ketë kompetenca në tërë territorin e Republikës së Maqedonisë së Veriut.

· Do të ketë garanci që në mënyrë të mëvetësishme të përgjigjet dhe vendos për lëndët e PSP-së.

· Do të udhëhiqet nga Villma Ruskovska.

· Prokurorët aktual të PSP-së do të vazhdojnë të punojnë në PTHP për ndjekjen e krimit dhe korrupsionit të lartë.

· Mandati i tyre është deri më 15 shtator, por do të kenë mundësi për rizgjedhje.

· Përbërjen e Prokurorisë së re do ta zgjedhë Këshilli i Prokurorëve.

· Të gjithë rastet e PSP-së ajo do t’i vazhdojë dhe procesojë para gjykatave kompetente.

· Nga PSP-ja, në PTHP do të kalojë edhe Arkivi, mjetet dhe aparatura.

· Shefi i kësaj prokurorie do të mund të shkarkohet me 2/3 e votave të Këshillit të Prokurorëve.

· Ajo nuk mund të ndjekë krim pa aprovim nga prokurori publik.

· Ajo nuk ka të drejtë që ta urdhërojë ndonjë institucion tjetër të kryejë ndjekje të krimit për të cilin është përgjegjëse vetë ajo.

Nga Bashkimi Demokratik për Integrim propozim/ligjin e vlerësojnë si pozitiv duke theksuar se kjo do të jetë një zgjidhje e përhershme kundër krimit dhe korrupsionit.

“Propozimi është bazë e mirë dhe në përgjithësi kornizë në drejtim të duhur për një zgjidhje të përhershme për institucionalizimin e luftës kundër krimit dhe korrupsionit. Tani u mbetet partive politike dhe deputetëve të arrijnë koncensus mbi tekste të negociuar, por në kuadër të kësaj kornize”, thonë nga BDI.

Nga ASH njoftojnë se ngelen me qëndrimin që në krye të Prokurorisë Speciale të jetë prokuror nga Bashkimi Evropian. Nga Lëvizja Besa thonë se ende nuk e kanë shqyrtuar ligjin, e sa i përket emrit të prokurores Ruskoska thonë se nuk është me rendësi se kush do të udhëheqë.

“Ligjin e kemi marrë dje për ta shqyrtuar. Emri s’ka rëndësi aspak, me rëndësi është ndërtimi i institucionit që tash ka humbur kredibilitetin e vet”, thonë nga Lëvizja Besa.

Për parinë opozitare VMRO-DPMNE propozimi i kryeministrit Zaev konfirmon kontrollin e drejtpërdrejtë që LSDM ka në punën “Ruskoska prokurori”./ABC News Albania 24/7

cavusoglu-kuzey-makedonya-basbakani-zaev-12250144_amp.jpg
nev ila17:30 | 16/07/2019

Në prag të vizitës së Presidentit turk Rexhep Taip Erdogan në Maqedoninë e Veriut, Ministri i jashtëm i Turqisë Mevlut Çavushoglu ndodhej në Shkup nga ku pwrshwndeti anëtarësimin e ardhshëm të Maqedonisë së Veriut në NATO, ku edhe Ankaraja zyrtare ratifikoi protokollin. Ankaraja zyrtare pret “pastrimin” e pjesëtarëve të organizatës FETO në vend, që autoritetet turke i vlerësojnë si terroristë.

Ndjekja e pjesëtarëve të organizatës FETO për Turqinë edhe më tej është temë e agjendës së lartë në marrëdhëniety dypalëshe jo vetëm me Shkupin por edhe me 160 vende të botës, ku Ankaraja beson se janë të infiltruar ose të mbështetura nga qeveri ose shërbime të intelegjencës. Pastrimi i këtyre elementeve terroriste, sic do të shprehet Ministri i jashtëm turk Çavushoglu, nuk ka qenë kusht për ratifikimin e protokollit për anëtarësimin e Maqedonisë së Veriut në NATO.

“Kjo organizatë terroriste nuk është e vetme, merr përkrahje nga jashtë dhe ndaj Maqedonisë dhe vendeve tjera paraqet kërcënim. Tash disa vende kryejnë presione, por në të ardhmen kur Maqedonia dhe vendet tjera mike do të ballafaqohen me vështirësi, sërish Turqia do t`u vijë në ndihmë. Në këtë drejtim presim hapa konkrete”, tha Cavushoglu.

Shefi i diplomacisë Nikola Dimitrov sqaroi se janë ngritur procedura juridike, pa zbuluar emra të personave ose organizatave.

“Problemet e mikut tonë janë edhe probleme tonat, në kuptimin e vullnetit politik do të bëjmë gjithcka që të ndihmojmë. Kemi bashkëpunim të shkëlqyer mes shërbimeve të intelegjencës. Procedura për shumë persona të këtillë është në vazhdë e sipër në Gjykata dhe Prokuroritë publike”, tha Dimitrov.

Në pyetjen nëse Turqia druan nga sanksionet e BE-së dhe SHBA-ve për shkak të furnizimit me sistemin raketor rus S-400, Çavushoglu theksoi se nuk ka nevojë për tensione me NATO-n dhe se Turqia është shtet Sovran dhe se do të furnizohet me armë sipas planeve, vecanërisht për shkak të kërcënimeve rajonale të sigurisë. Presionet e Brukselit, pas të cilit ai e sheh Greqinë, do të ngrisin vetëm përgjigje më të ashpra.

“Nëse vazhdohet me marrjen e vendimeve të këtilla kundër Turqisë do ti rrisim aktivitetet tona. Edhe një herë them se atje kemi 3 anije dhe anija e katërt në Mesdheun Lindor do të dërgohet së shpejti, nuk mundet kështu me Turqinë. Ne vetë vendosim dhe derisa nuk i mbrojnë të drejtat e turqve në Qipron Veriore ne do të vazhdojmë ti rrisim aktivitetet tona”, deklaroi Cavushoglu.

Kur bëhet fjalë për BE-në dhe Ballkanin, Ministri Dimitrov ka theksuar se me vëmendje ka ndjekur vizitën e presidentit të Francës Makron në Serbi dhe se është duke vërrejtur zbutjen e qëndrimit të tij të fortë rreth zgjerimit të Bashkimit Evropian.

“Mes tjerash u paraqit edhe një formulim se nevoja për kohezion të brendshëm dhe reforma të brendshme në BE mund të zhvillohen paralelisht me evropeizimin dhe aderimin e rajonit në BE. Mendoj se kjo është shumë me rëndësi dhe një mesazh pozitiv. Kuptohet nuk duhet që kjo të na relaksojë, por sikur ka një hapje në këtë kuptim kurse fakt është që dy proceset janë shumë të rëndësishme“, deklaroi Dimitrov.

Lidhur me cështjen që ngriti Presidenti Makron në Beograd e që ka të bëjë me vazhdimin e dialogut mes Prishtinës e Beogradit, Cavushoglu ka theksuar se Ankaraja do të përkahte një zgjidhje që do të ishte si rezultat i marrëveshjes mes të dy palëve, por pa dhënë një përgjigje nëse do të mbështeste ose jo këmbimin eventual të territoreve./ABC News Albania 24/7           

kriza-politike.jpg
G. P.20:20 | 14/07/2019

Mazhoranca qeverisëse në Maqedoninë e Veriut është shprehur e gatshme që të takohet me liderët e opozitës për të diskutuar mbi çështjet prioritare të vendit. Por për krerët e VMRO-DPMNE, i vetmi prioritet për të cilin mund të diskutohet është mbajtja e zgjedhjeve të parakohshme.

Nga LSDM-ja thonë se janë të gatshëm të takohen me liderin e VMRO-DPMNE-së Hristijan Mickoskin ku do të bisedonin për shumë tema për zhbllokimin përfundimtar të negociatave mes grupeve të punës për PSP-në, për ndryshimet në Kodin Zgjedhor si dhe për regjistrimin e ardhshëm të popullsisë.

Kostandin Acevski, LSDM: Ne nuk ikim nga negociatat për çështje që janë me interes për shtetin dhe qytetarët. Ende nuk ka një marrëveshje konkrete për takim eventual dhe për temat, por i bëjmë thirrje VMRO-DPMNE-së që të mos i bllokojë proceset që janë në interes të vendit. Duhet të ndihmojnë që të miratohen ligje sistemore si për shembull Ligji për Prokurorinë Publike që është me interes për eurointegrimet.

Nga VMRO-DPMNE-ja me qëndrimin se nuk ka ambient në vend që të funksionojë dialogu politik mes pushtetit dhe opozitës. Opozita insiston në zgjedhje të parakohshme parlamentare.

Naum Stoilkovski, VMRO DPMNE: Duhet pjekuri politike tek Zaevi dhe pushteti që të ulen e të bisedojnë që sa më shpejt të organizohen zgjedhje të parakohshme parlamentare, për shkak se burimi i të gjitha problemeve qëndron në Qeveri. Dhe ata si burim i problemeve nuk mund të jenë pjesë e zgjidhjes.

Kryeministri Zoran Zaev qysh para një muaji paralajmëroi se do ta ftojë liderin e VMRO-DPMNE-së Mickoskin në një takim liderësh për të biseduar për tre temat që lidhen me miratimin e Ligjit për Prokurori Publike, ndryshimin e Kodit Zgjedhor ku do të vendosej votimi në një njësi zgjedhore, ashtu siç angazhohet LSDM-ja dhe disa parti të vogla, si dhe për Ligjin për Regjistrimin e popullsisë që do të zbatohej vitin e ardhshëm.

Mickoski, nga ana tjetër, ka theksuar se në kushte të ndjekjes politike, akuzave dhe aktgjykimeve me porosi, përveç për ligjin për Prokurori, në tavolinën e negociatave duhet të gjendet edhe tema e mbajtjes së zgjedhjeve të jashtëzakonshme parlamentare./ABC News Albania 24/7

gocevski.jpg
G. P.17:25 | 14/07/2019

Ish-ministri i Mbrojtjes së Maqedonisë, Trajan Gocevski ka deklaruar se vendi rrezikon të bjerë pre e akteve armiqësore për shkak të ambicieve për t’u anëtarësuar në NATO. Në një intervistë për “Klan Maqedonia”, Gocevski ka theksuar gjithashtu se shkëmbimi eventual i territoreve mes Serbisë dhe Kosovës do të ishte i dëmshëm për rajonin.

Sfidat rreth zgjerimit të NATO-s duhet të merren parasysh për shkak se jemi cak i disa destabilizimeve që të defokusohen ndryshimet kyçe dhe të pengohet ky proces. Kështu vlerëson Ministri i parë i Mbrojtjes dhe ish-Dekani i Fakultetit Filozofik në Shkup Trajan Gocevski. Sipas tij, Rusia po mbrohet nga NATO-ja, kurse Maqedonia e Veriut duhet t’i përforcojë mekanizmat e mbrojtjes. Lidhur me bisedat me komedianët rus, Gocevski thekson se kjo gjë nuk është naive.

Trajan Gocevski, ish-ministër i Mbrojtjes: Do të ketë kërcënime hibride dhe speciale që po zhvillohen në mënyrë permanente, por ndaj nesh tani do të përforcohen. Kjo me komedianët nuk është aspak naive. Nuk duhet kuptuar si argëtim. Kjo nuk mund të trajtohet në këtë mënyrë dhe se informacionet nuk dëshirojnë të shfrytëzohen nga shërbimet.

Ish-Ministri Gocevski e vlerëson të rrezikshme për stabilitetin e rajonit idenë e këmbimit eventual të territoreve mes Prishtinës dhe Beogradit. Gjithashtu sipas tij, shqetësuese paraqitet edhe gara e armatimit në rajon.

Trajan Gocevski, ish-ministër i Mbrojtjes: E dini çka më shqetëson tani? Të gjithë filluan të armatosen. Ja shihni Kroacia dëshiron të furnizohet me aviacion ushtarak, Serbia furnizohet me aviacion, Bullgaria mori vendim për 12 avionë ushtarak. Kjo do të thotë se vendet e rajonit fillojnë t`I tregojnë muskujt. Kosova është fqinji ynë, kurse indikacionet për ndryshim kufijsh janë gjithmonë të rrezikshme, sidomos në Ballkan. Duhet që të gjithë ta përkrahim Kosovën që të stabilizohet dhe është në interes të rajonit që Kosova të jetë një shtet stabël i së drejtës dhe me prosperitet ekonomik.

Ish-Ministri Gocevski vlerëson se tashmë gjasat janë shumë reale që në samitin e Londrës në Dhjetor Maqedonia e Veriut do të bëhet vendi i 30-të I NATO-s. Sipas tij, vazhdimësia dhe gatishmëria e vendit që të bëhet pjesë e Aleancës veriatlantike u konfirmua edhe me manovrën e paradokohshme ushtarake në poligonin Krivollak ku morën pjesë rreth 3000 ushtarë nga gjashtë vende të NATO-s./ABC News Albania 24/7

ushtriaaa.jpg
G. P.16:00 | 04/07/2019

Presidenti i Maqedonisë së Veriut Stevo Pendarovski firmosi vendimin për riemërimin e Armatës së Maqedonisë. Emri i ri do të jetë Armata e Maqedonisë së Veriut.

Armata e Maqedonisë së Veriut është emri i ri i ushtrisë së vendit. Presidenti Stevo Pendarovski ka njoftuar se dje ka nënshkruar vendimin për riemërim. Kjo do të thotë se në periudhën e ardhshme Armata duhet të furnizohet me uniforma që do të përmbajnë emrin e ri.

Ndryshe, rreth mos ndryshimit të shkurtesës ARM, muajin e kaluar në një takim të përfaqësuesve të Armatës së Maqedonisë dhe NATO-s kishte reaguar Greqia.

“Dje nënshkrova dekretin për mbishkrimet në uniformat e armatës. Tash e tutje do të jetë Armata e Maqedonisë së Veriut. Do të thotë, ka përfunduar edhe kjo pjesë teknike dhe në periudhën e ardhshme furnizimet do të bëhen me mbishkrimet e reja”.

Presidenti Stevo Pendarovski, gjatë vizitës në kufirin jugor dhe qendrës transitore për pranimin e emigrantëve, ka deklaruar se pjesëtarët e armatës nuk do të tërhiqen nga kufiri jugor.

Sipas tij, aktualisht nuk ka rrezik për valë emigrantësh, kurse vlerësimet e BE-së kanë treguar se Armata është e gatshme të përballet me sfida të këtilla eventuale./ABC News Albania 24/7 

f7c2ecb4-b82c-4e7a-8338-11b4b5557e0d.jpg
Sej rie11:20 | 27/06/2019

Ish-kryeministri i Maqedonisë së Veriut, Nikola Gruevski nuk do të ekstradohet. Vendimi është marrë nga gjykata hungareze. Gruevski do të lihet i lirë, ndërsa gjykatësja vendimin e arsyetoi duke thënë se “kushtet për ekstradim nuk janë të vlefshme”. Mëngjesin e sotëm gjykata lëshoi urdhër arresti për Gruevskin, i cili u soll në gjykatë nga dy persona.

Me kapelë bejzbolli, syze dielli “Maybach” dhe xhaketën mbi duart. Ish-Kryeministri Nikola Gruevski në mëngjes është dërguar në Gjykatën e Budapestit. Duhej të shqyrtohej kërkesa për ekstradimin e tij në Maqedoninë e Veriut.

Mediat hungareze që kanë raportuar nga Gjykata në Budapest ku është zhvilluar seanca për ekstradimin e Gruevskit, kanë njoftuar se gjykatësja kompetente ka refuzuar kërkesat e autoriteteve të Maqedonisë së Veriut, që për të dytën herë kërkojnë ekstradimin e ish-Kryeministrit, kësaj radhe për dhunën në Kuvend më 27 Prill të vitit 2017.

Kërkesa e parë ishte për shkak të vendimit të gjykatës për rastin “Tanku” të PSP-së. Siç njoftojnë mediat hungareze, gjykatësja Eva Varezhi ka vlerësuar se gjykatat e Hungarisë nuk mund të marrin aktgjykime për diçka që ka ndodhur në Maqedoni.

Siç ka thënë Varezhi, sipas ligjeve hungareze, personit që i është miratuar azili nuk mund të ekstradohet në vendin nga ku është arratisur.  Gjithashtu njoftohet se Maqedonia nuk mund ta ankimojë vendimin para gjykatave më të larta. Ish-Kryeministri i dënuar, Nikola Gruevski, u prononcua me një koment të shkurtër përmes Facebookut.

“Sot është zbatuar një procedurë standarde e institucioneve në Hungari prej se qeveria kriminale në Maqedoni dorëzoi kërkesë për ekstradim. Gjykata shqyrtoi kërkesën dhe vendosi që të mos e pranojë”, ka shkruar ai.

Çështja e ekstadrimit të ish-Kryeministrit u transferua dhe në seancën plenare të Kuvendit, ku po debatohet për rikonstruimin qeveritar. Nga LSDM-ja u bënë thirrje deputetëve të VMRO-DPMNE-së që të distancohen nga Gruevski.

“Derisa nuk distancoheni nga i arratisuri me pranga i cili ju jep urdhra se si të veproni dhe si të flisni, VMRO-DPMNE-ja nuk do të vijë në pushtet. Shikoni rreth vetes, jeni të mbuluar me krim. Keni një deputet që është i akuzuar për 27 Prillin dhe kjo flet gjithcka dhe për këtë shkak qytetarët nuk do të lejojnë të ktheheni në pushtet”, tha Kostandin Kostandinov

Ndryshe seanca gjyqësore është zhvilluar me dyer të mbyllura, për shkak se bëhet fjalë për procedurë në gjykatat civile që vendosin për ekstradimin. Zyra hungareze për Migrim dhe Azil fillimisht ia kishte miratuar azilin ish-Kryeministrit Gruevski më 20 Nëntor të vitit 2018, kurse më 5 Prill të vitit 2019 ka konfirmuar vendimin, që është përfundimtar.

Ministri i Jashtëm i Hungarisë Peter Sijarto para disa ditëve, gjatë qëndrimit në Shkup, kishte theksuar se autoritetet hungareze nga Gruevski marrin informacione të dorës së parë për situatën në Ballkanin Perëndimor. Agjenci lajmesh raportojnë se Gruevski në Hungari gëzon mbështetjen e Kryeministrit Viktor Orban, edhe pse sot në gjykatë ishte dërguar me pranga në duar./ABC News Albania 24/7

 

policia-3.jpg
ent ela16:31 | 25/06/2019

Në një aksion të policisë financiare, të mbështetur edhe nga njësi speciale për ndërhyrje të shpejtë, në fshatin Luboten, në Shkup, u sekuestrua një sasi e madhe duhani, e kontrabanduar nga vendet fqinje. Banorët vendorë akuzojnë policinë se shkatërron punën e tyre dhe pronat.

Në një aksion policor të organizuar nga policia financiare në bashkëpunim me MPB-në, forca të njësive speciale në fshatin Luboten të Shkupit është konfiskuar sasi e konsiderueshme duhani. Banorët e mbledhur në fshatin Luboten, 20 kilometra nga Shkupi, të shqetësuar nga prania e policisë reaguan ashpër. Kordoni i policisë i ka zgjuar që në pesë të mëngjesit.

Policia financiare aksion të ngjashëm sot ka zhvilluar edhe në fshatrat Haraçinë, Vizbeg dhe vende të tjera. Policia financiare aksionin e ka kryer në bazë të dyshimeve se banorët në shtëpitë e të cilëve  është kryer bastisja kanë bërë kontrabandë të mallrave të akcizës dhe kanë bërë mashtrime të doganave. /ABC news Albania 24/7

zoran-zaev.png
nev ila13:00 | 21/06/2019

Sërish ndryshime në qeverinë e Maqedoniësë së Veriut. Kryeministri Zoran Zaev dorëzon gjatë dirës në parlamentin e vendit propozimin e tij për ndryshime në qeveri. Sipas mediave në vend priten të paktën 8 zëvendësime ministrash.

Kryeministri i Maqedonisë së Veriut Zoran Zaev dorëzon sot në Kuvend propozimin për  ndryshimet në kabinetin e tij qeveritar.  Sipas  paralajmërimeve të tij do të të ketë gjithsej tetë ndërrime ministrash e  zv/ministrash dhe  të rreth 20 drejtuesve të ndërmarrjeve publike. TV Klan Macedonia mëson se në ekipin përfaqësues të BDI-së do të ketë dy ndryshime në rang ministror:

Ekonomisti me përvojë evropiane Naser Nuredini është emër i ri  në kabinetin qeveritar dhe do të drejtojë Ministrinë e Mjedisit e të Planifikimit Hapësinor, kurse Sadulla Duraku, që deri tash ishte bë ballë të këtij dikasteri, do të drejtojë Ministrinë e re për Sistem Politik.

Paralajmërohet se integristët do të propozojnë edhe emra të rinj  të drejtuesve të disa disa drejtorive të ndërmarrjeve publike. Ndërkohë, ende nuk është e qartë nëse Kryeministri ka rënë dakord për ‘rokadën’  me Rilindjen Demokratike Kombëtare që LDP-ja të marrë Ministrinë e Pushtetit Lokal kurse kësaj partie t’i jepet ndonjë dikaster tjetër.

Pas dorëheqjes së Asaf Ademit nga posti i ministrit të Kulturës, mësohet se në vend të tij, po nga Alternativa, do të vijë profesori universitar Hysni Ismaili./ABC News Albania 24/7

maqedonia.jpg
nev ila19:32 | 14/06/2019

Ka nisur të premten në Maqedoninë e Veriut testi i parë për regjistrimin e popullsisë. Procesi po realizohet në rrugë elektronike dhe krahas maqedonishtes është edhe në gjuhën shqipe.

Nga sot e deri më 30 qershor do të mbahet pilot regjistrimi i popullsisë, amviserive dhe banesave në të gjitha tetë rajonet planore të RMV-së, gjegjësisht nëpër katër rrethe dhe atë dy urbane dhe dy rurale, informojnë nga Enti Shtetër i Statistikës. Në rajonin e Pollogut pilot regjistrimi do të zhvillohet në komunën e Gostivarit dhe atë dy rrethe regjistrimi në qytet, një në fshatin Forinë dhe një tjetër në fshatin Vrutok, informon Arsim Nuredini, Instruktor në Entin Shtetëror të Statistikave.

“Në regjionin e Pollogut e kemi zgjedhur qytetin e Gostivarit ku do të kemi mbikqyrje në  Gostivar, Forinë dhe Vrutok. Ky pilot regjistrim do të vazhdojë prej sot deri më 30 qershor, sot e kemi vetëm mbikqyrjen e terrenit, prej nesër fillon regjistrimi nëpër familje”, tha Arsim Nuredini, instruktor në Entin Shtetëror të Statistikave.

Nuredini thekson se ky pilot regjistrim që ka për qëllim testimin e aplikacionit i cili do të bëhet me pajisje elektronike, nuk le hapësirë për manipulime, pasi që, siç shprehet ka kontroll nga instruktorët shtetërorë dhe të gjitha materialet që regjistrohen shkojnë direkt në bazën e Entit Shtetëror të Statistikave.

“Nuk besoj se do të ketë manipulime në këtë lloj regjistrimi, sepse kjo është vetëm një regjistrim testues, sepse provohet testimi i aplikacionit se si do të shkojë puna në terren që të jemi të gatshëm për regjistrimin e ardhshëm që do të mbahet në prill të vitit 2020. Secila punë që bëhet në terren ka kontroll edhe prej nesh, pra instruktorëve shtetëror, por ka edhe supervizorë dhe të gjitha materialet që regjistrohen shkojnë direkt në bazën e Entit Shtetëror të Statistikave”, theksoi Arsim Nuredini, instruktor në Entin Shtetëror të Statistikave.

Në këtë operacion do të marrin pjesë 16 instruktorë shtetërorë dhe 32 regjistrues. Pilot – regjistrimi do të zhvillohet në gjuhën maqedonase dhe në shqip, kurse të dhënat e mbledhura nga terreni nuk do të bëhen publike./ABC News Albania 24/7

antimafia-ne-shkup.jpg
nev ila23:06 | 12/06/2019

Ministria italiane e Drejtësisë po punon për hartimin e një baze të re të dhënash, që do të jetë operative në vendet e Ballkanit. Lajmin e ka bërë të ditur kryeprokurori i Antimafias, Federiko Kafiero de Raho, gjatë një vizite në Maqedoni, ku ka bërë thirrje për bashkëpunim ndërshtetëror kundër krimit.

Mbi 110 mijë lëndë gjatë vitit zhvillon Drejtorati Italian për ndjekjen e mafisë dhe terrorizmit, i cili disponon me një bazë të madhe të të dhënave, që lehtëson procesuimin e këtyre rasteve, kurse Ministria italiane e Drejtësisë për momentin është duke përpunuar një model të bazës së të dhënave, që do të jetë operativ në vendet e Ballkanit. Prokurori Kombëtar Publik për ndjekjen e mafias dhe terrorizmit Federiko Kafiero De Raho në Shkup ka theksuar se deri në fund të korrikut do të definohet ky model i të dhënave.

“Nuk guxojmë të harrojmë se krimi i organizuar më shumë se çdo organizatë tjetër e dëmton demokracinë. Krimi i organizuar është shumë i pasur dhe për këtë arsye mendoj se Maqedonia dhe vendet tjera nga Ballkani Perëndimor duhet të marrin pjesë më shumë se kurdoherë në iniciativat për bashkëpunim të ndërsjellë”, Federico Cafiero de Raho, kryeprokuror i Antimafias .

Ndërkohë, rreth rastit të keqpërdorimeve të IPA fondeve e ku ishte arrestuar një zyrtar shtetëror në Qeverinë e Maqedonisë së Veriut, në këtë konferencë është thënë se janë zbuluar dëshmi tjera gjatë bastisjeve në Itali. Sic u tha, zbulimit të keqpërdorimeve dhe arrestimeve, u ka paraprirë një bashkëpunim mes zyrtarëve të Shkupit dhe Romës.

Prokurori Italian De Raho nuk deshi ti komentojë hetimet rreth IPA Fondeve që janë duke u zhvilluar edhe nga Prokuroria e Milanos, por përmendi se Ministria italiane e Drejtësisë është duke përgatitur një bazë të të dhënave për prokuroritë e vendeve të Ballkanit që të mund të këmbejnë informacione për hetime të këtij karakteri./ABC News Albania 24/7


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono