maqedoni

maqedoni-1-1280x714.jpg
Sej rie19:30 | 20/05/2019

Reforma institucionale që do të ndërmarrë qeveria e Zaev në Maqedoni do të nisë në gjysmën e parë të qershorit. Në favor të këtij operacioni, që parashikon ndërrimin e zyrtarëve në të gjitha nivelet, është edhe kreu i BDI-së Ali Ahmeti, që ka deklaruar se nuk mund të ketë funksionarë të përjetshëm.

Kreu i BDI-së Ali Ahmeti, ende nuk ka biseduar me Zoran Zaevin për ndryshimet që pritet të ndodhin në ekzekutiv. Nuk është biseduar as në parti, por asnjë funksionar nuk është i përjetshëm thotë Ahmeti. Sipas tij, misionarët janë të përhershëm, e shumicën e bashkëpunëtorëve thotë se i ka misionarë.

Ali Ahmeti, kryetar i BDI-së: “Zoti Zaev ka pasur disa vizita jashtë vendi dhe akoma nuk kemi biseduar. Nuk mendoj unë se Sadulla Duraku thotë që mua nuk më intereson se çfarë thonë qytetarët. Mund të jetë nxjerrë nga konteksti sepse unë Sadulla Durakun e njoh tash e sa vite. Mund të jetë nxjerrë nga konteksti kjo punë. Asnjëri nuk është i përjetshëm, funksionet shkojnë e vijnë, misionet mbeten në jetë të jetëve dhe pjesa dërmuese e bashkëpunëtorëve të mi janë misionarë. Funksionarët janë të përkohshëm, misionarët të përhershëm”.

Qeverinë nuk e lëshon as RDK-ja. Vesel Memedi, thotë se partia e tij ka luajtur rrol të rëndësishëm në formimin e Qeverisë që bëri punë të mëdha. Kryeministri Zoran Zaev, paralajmëroi se me emra konkret do të dal në fillim të muajit të ardhshëm, pas mbylljes së raportit të Komisionit Evropian.

Zoran Zaev, kryeministër:  “Në fillim të qershorit edhe atë në pjesën e parë të qershorit, e kam ndërmend që të dal me zgjidhjet konkrete për ndryshimet, edhe atë në qeveri, në institucionet qeveritare, drejtori, borde drejtuese dhe mbikëqyrëse”.

Zaev tha se porosinë e ka marrë nga qytetarët në zgjedhjet e fundit, kurse edhe një herë paralajmëroi ndryshime edhe në parti por edhe në nivel lokal./ABC News Albania 24/7

hahn-1280x648.jpg
ent ela23:35 | 14/05/2019

Komisioneri i BE për Zgjerimin Johanes Hahn është shprehur optimist se Shqipëria dhe Maqedonia e Veriut do të marrin një rekomandim pozitiv për hapjen e negociatave të anëtarësimit. Në një intervistë, Hahn ka deklaruar se vendet anëtare do të vlerësojnë reformën në drejtësi të Shqipërisë dhe marrëveshjen e emrit të Maqedonisë.

Komisioneri europian për Zgjerimin dhe Fqinjësinë e mirë, Johanes Hahn ka deklaruar se ekzistojnë shanset që Shqipëria, por edhe Maqedonia e Veriut të marrin dritën jeshile për hapjen e negociatave të anëtarësimit në BE. Në një intervistë për Radion Europa e Lirë, Hahn ka nënvizuar se në cilësinë e komisionerit do të bëjë çmos që rekomandimi për hapjen e negociatave të jepet në qershor dhe jo në tetor, sikurse përflitet në Bruksel. Duke paralajmëruar publikimin e raportit vjetor pas dy javësh, Hahn është shprehur optimist se do të ketë një rekomandim pozitiv për të dyja vendet.

“Kur vjen fjala tek Maqedonia e Veriut mendoj se duhet të pranojmë progresin e madh që ky vend ka bërë në tejkalimin e konflikteve dypalëshe, që është një parakusht për anëtarësimet e ardhshme. Gjithashtu, reforma në drejtësi në Shqipëri është diçka që duhet vlerësuar dhe në këtë aspekt mendoj se do të vlerësohet pozitivisht nga vendet tona anëtare”.

I pyetur në lidhje me kërkesën e Parlamentit holandez për pezullimin e lëvizjes së lirë për shtetasit shqiptarë, Hahn ka theksuar se kjo është një çështje për të cilën pala shqiptare duhet të angazhohet në bisedime me palën holandeze, por ka shtuar se nuk ka të dhëna që një nismë e tillë të jetë promovuar edhe nga shtete të tjera anëtare të BE-së. /ABC News Albania 24/7

maqedonia-papa.jpg
G. P.22:18 | 07/05/2019

Gjatë vizitës në Maqedoninë e Veriut, Papa Françesku ka nderuar figurën e shenjtores shqiptare Nënë Tereza dhe veprimtarinë e saj në dobi të të varfërve dhe Zotit. Ndërsa në meshën e mbajtur në qendër të Shkupit, ati i shenjë ka përcjell një mesazh kundër urisë për pushtet.

Maqedonia e Veriut me nderime të larta ka pritur Papa Françeskun në vilën Presidenciale në Vodno, ku në fjalimin e tij Ati i Shenjtë e quajti vendin si shembull për bashkëjetesë dhe urë mes lindjes e perëndimit. Duke vizituar shtëpinë përkujtimore, Ati i Shenjtë disa herë ka përmendur veprën e shenjtores Nënë Terezës, duke thënë se dashuria ndaj të afërmve dhe Zotit janë të njëjtë.

“Uri për uri, uri për vëllazëri, uri për Zotin. Sa bukur këtë e dinte Nënë Tereza që deshi ta ndërtojë jetën e saj në dy shtylla. Krishtin e pranishëm tek falënderimet ndaj Zotit dhe Krishtin e pranishëm tek të varfrit”, tha Papa.

Sheshi i Shkupit ishte mbushur që në orët e para të mëngjesit me besimtarë vendas dhe të huaj. Përveç flamujve të Maqedonisë dhe atij të Vatikanit, valëviteshin edhe flamujt e Kroacisë, Sllovenisë dhe Shqipërisë. Në lutjen që e udhëhoqi, kreu i Kishës katolike deklaroi se ata që kanë besim në Zot kurrë nuk do të jenë as të uritur as të etur.

“U ushqyem me ëndrra të bukura dhe të mëdha dhe përfunduam me ngrënie të neverisë, mbylljes dhe vetmisë… si të burgosur të virtualitetit, e humbëm shijen dhe aromën e realitetit”, tha ai.

Vizita e parë historike e një Pape në Maqedoni, është mirënjohje e madhe për vendin që mori Republika e Maqedonisë së Veriut në unionin global të vendeve progresive ka thënë mes tjerash Kryeministri Zaev, kurse presidenti në largim i vendit Gjorge Ivanov duke u shprehur rreth situatës aktuale politike ka theksuar se Papa vjen në kohën kur shoqëria në Maqedoni është thellë e ndarë, kurse shteti i plagosur rëndë, për shkak të, siç tha, shkeljeve të premtimeve dhe pritjeve por edhe të besimit të luhatur në bashkësinë ndërkombëtare./ABC News Albania 24/7

MBULIM-PAPA-NE-SHKUP.mpg_snapshot_00.28-1280x720.jpg
ent ela10:41 | 07/05/2019

Kreu i Kishës Katolike të Romës, Papa Françesku ka mbërritur në orën 8 të mëngjesit në Shkup. Ati I Shenjtë u prit në Shkup nga presidenti Gjeorge Ivanov dhe kryeministri Zoran Zaev si dhe zyrtarë të tjerë të lartë shtetërorë.

Më pas Papa Francesku ka mbërritur në Vilën Vodno, për t’iu adresuar autoriteteve shtetërore, trupit diplomatik dhe përfaqësuesve të shoqërisë civile.

Më pas Ati i Shenjtë pati një takim edhe me liderët fetare në Shtëpinë përkujtimore të Nënë Terezës. Në sheshin “Maqedonia” kreu i Kishës Katolike të Romës po mban një Liturgji të Shenjtë, ku janë rreth 15 mijë pjesëmarrës vendas e të huaj.

Qëndrimi I Papës në Shkup vijon me një takim me të rinj dhe priftërinj e familjet e tyre. Për shkak të vizitës së Papës në Shkup, masat e sigurisë janë tejet të larta në qytetin e Shkupit, përfshi edhe komunikimin. /ABC News Albania 24/7

666-1280x725.jpg
Sej rie22:39 | 05/05/2019

Stevo Pendarovski do të jetë presidenti i ri i Maqedonisë së Veriut. Ai ka fituar në raudnin e dytë të zgjedhjeve presidenciale te zhvilluar të djelën në këtë vend. Pendarovski ka marrë rreth 16 mijë vota me shumë  se rivalja e tij Gordana Siliankovska. Pas  numërimit te 99 % të votave, Stevo Pendarovski ka marrë 51,72   % të votave, ndërsa kandidatja e opozitës Gordana Silianovska ka fituar 44,68  % të votave. Stevo Pendarovski u kandidua në këto zgjedhje nga koalicioni në pushtet, LSDM dhe BDI. Por duket se në raundin e dytë është mbështetur edhe nga elektorati i kandidatit shqiptar Blerim Reka, që mori 10 % te votave në raundin e pare ne 21 prill. Kështu duket se mbështetja e shqiptareve me vote për kandidatin pro-evropian ishte vendimtare në fitoren e tij përballë kandidates opozitare Silianovska. Zgjedhjet në raudnin e dytë sipas Komisionit Shtetëror të Zgjedhjeve në Maqedoninë e Veriut ne të gjitha vend votimet u kryen te rregullta, pa probleme teknike dhe pa ndonjë incident./ABC News Albania 24/7

 

kandidatet-1280x738.jpg
Sej rie19:39 | 05/05/2019

Kandidatët presidencial të opozitës dhe koalicionit qeveritar, Gordana Siljanovska dhe Stevo Pendarovski, në deklaratat e tyre, pasi kanë votuar në qendrat e votimit, me qëndrime të kundërta rreth epilogut të zgjedhjeve presidenciale në Maqedoninë e Veriut.

Gordana Siljanovska-kandidate e opozitës: “Dita filloi sikurse në dimër e ky është dimri politik në Maqedoni dhe mendoj se në fund do të përfundojë me diell”.

Stevo Pendarovski-kandidat i koalicionit qeveritar: “Shpresa ime është që shumica e votuesve do ta njohin konceptin e fushatës sime, dhe do ta përkrahin këtë koncept që do të thotë përparim”.

Nga ana tjetër, liderët e partive politike në prononcimet pas votimit, theksuan rëndësinë e mbarëvajtjes së këtyre zgjedhjeve për procesin euroatlantik të vendit.

Zgjedhjet sipas KSHZ-së dhe monitoruesve të vendit dhe të huaj janë zhvilluar në atmosferë të rregullt pa incidente, me disa parregullsi të natyrës teknike që nuk ndikojnë në procesin votues. Por, partia maqedonase në opozitë VMRO-DPMNE është ankuar për një varg parregullsish, duke adresuar kritika se pushteti ka  keqpërdorur policinë për qëllime politike dhe se bëhet presion i paligjshëm nga ana e organeve të policisë ndaj pjesëtareve të VMRO DPMNE-së./ABC News Albania 24/7

maqedoni.jpg
G. P.20:22 | 04/05/2019

Në mesnatën e së premtes në Maqedoninë e Veriut, përfundoi fushata zgjedhore për raundin e dytë të Zgjedhjeve presidenciale dhe për zgjedhjet e jashtëzakonshme lokale në Komunat Ohër dhe Novoselë. Të shtunën të drejtën e votës e kanë patur 1640 persona në shtëpitë përmirësuese-ndëshkuese dhe persona që janë në paraburgim, si dhe 4540 persona të sëmurë.

Procesi i votimit fillon në ora 07:00 dhe do të përfundojë në orën 19:00. Zgjedhjet Presidenciale do të zbatohen në 3480 vendvotime në 80 Komuna dhe Qytetin e Shkupit si dhe në 32 vendvotime jashtë vendit. Të drejtën e votës e kanë 1.808.131 qytetarë.

Zgjedhjet do t’i ndjekin 3381 vëzhgues të vendit dhe 520 të huaj, si dhe 289 përkthyes dhe 60 gazetarë të huaj të akredituar në Komisionin Shtetëror të Zgjedhjeve.

Numër më të madh të monitoruesve të vendit kanë organizatat “MOST”dhe “CIVIL”, Shoqata për Afirmimin e Vlerave Humane dhe Integrimit Rinor MAK-SONCE, Shoqata e Qytetarëve për Zhvillim dhe Promovim të Turizmit dhe të Drejtave të Njerit AKSIOS e të tjerë.

Prej monitoruesve të jashtëm, numër më të madh do të jenë ata të OSBE/ODIHR-it me 195 prej tyre, Kongresi Botëror Maqedonas, Ambasada e SHBA-së, Delegacioni I BE-së, Delegacioni i Asamblesë Parlamentare të Këshillit të Evropës e të tjerë.

Monitorues kanë akredituar edhe më shumë ambasada të vendeve të huaja, si Ambasadat e Federatës Ruse, Francës, Britanisë së Madhe, Suedisë, Hungarisë, Italisë, Shqipërisë e të tjerë./ABC News Albania 24/7

kzhz.jpg
G. P.17:45 | 04/05/2019

Komisioni shtetëror zgjedhor në Maqedoninë e Veriut publikoi përqindjen e daljes në votime për raundin e dytë të zgjedhjeve presidenciale, në rreth tridhjetë ambasada nëpër botë, si dhe për burgjet në vend dhe nëpër shtëpitë ku për votime janë paraqitur persona të sëmurë dhe votues në paraburgim shtëpiak.

Për diasporën e Australisë ka përfunduar votimi, në Amerikë, sapo ka filluar, kurse në vendet evropiane votimi vazhdon, në 32 përfaqësi konsulore-diplomatike. Por çka bëhet me ata që nuk janë të interesuar për jetën politike në vend, me vite janë jashtë vendit, kurse figurojnë në listën e vetme zgjedhore dhe ndikojnë në numrat me të cilat përcaktohet jehona, respektivisht censusi prej 40%. Derisa evidentohen si qytetarë të Maqedonisë, me adresë të paraqitur në vend, figurojnë në listën zgjedhore të vendit thonë nga KSHZ-ja.

Ljupka Gugutçevska: “Thuajse në të gjitha vendvotimet ka votues të tillë që sipas evidencës së MPB-së trajtohen si diasporë. Megjithatë, kjo është evidenca e vetme që e posedojmë, kurse nëse siç thamë, këto votues i plotësojnë parakushtet, pa marrë parasysh nëse me vite jetojnë jashtë vendit, do të regjistrohen në listën zgjedhore”.

Për shkak të paraqitjes së tepricës së fletëvotimeve, gjatë kohës së rrethit të parë të zgjedhjeve presidenciale, para dy javëve, janë shkarkuar 14 këshilla zgjedhore, respektivisht për votimin e 5 Majit janë emëruar këshilla të rinj, që kanë marrë edhe trajnimin e duhur-sigurojnë nga KSHZ-ja.

Ljupka Gugutçevska: “Në pjesën më të madhe bëhej fjalë për lëshime të këshillave zgjedhore, respektivisht kishin lejuar që një person të votojë, kurse ai nuk ka qenë i regjistruar në listën zgjedhore”.

Në këto vende nuk do të ketë rivotime për rrethin e parë, për shkak se, siç thonë nga KSHZ-ja, numri i votuesve nuk do të ndikojë në rezultatin e përgjithshëm. Jehona e rrethit të parë të zgjedhjeve presidenciale ishte diçka më shumë se 43%, respektivisht që të zgjidhet shefi i ri i shtetit, në zgjedhjet e gjashta presidenciale, duhet të dalin së paku 40% e votuesve me të drejtë vote./ABC News Albania 24/7

erion-veliaj-1.jpg
G. P.14:21 | 29/04/2019

Ndërkohë, kryetari i bashkise së Tiranës, Erion Veliaj, në një intervistë për Klan Maqedoninë, e përjashton mundësinë e një marrëveshje mes mazhorances dhe opozites. Veliaj e cilëson djegien e mandateve, marrëzi.

“Veliaj mund të mbjellë pemë sa të dojë, por një ditë në një pemë do të varet si shembull që në këtë parti grupet armiqësoredo të marrin goditjen e merituar”.

Pikëpyetje për marrëdhëniet mes kryebashkiakut të Tiranës, Erion Veliaj dhe kryeministrit Edi Rama ka ngjallur kjo deklaratë e shefit të qeverisë dhe përtej kufirit. Gazetari i Klan Maqedonisë ia sjell në vëmendje kryebashkiakut, ndërsa ky kthehet në kohë dhe tregon si e ka pritur.

“Edi Rama ka bërë një batutë shumë të hollë, shumë fine. Për të gjithë ata që kanë jetuar në Shqipëri, si unë, ka qenë një lojë me teoritë e konspiracionit, nëse dikush po bën një punë, partia duhet të marrë një masë se po rivalizon dike. Kemi qesh me lot sa njerëz e morën seriozisht”, tha Veliaj.

Djegien e mandateve të opozitës dhe deklaratat e saj për të mos marrë pjesë në zgjedhje pa largimin e kryeministrit Edi Rama dhe krijimin e një qeverie tranzitore që të garantojë procesin zgjedhor, kryetari i Bashkisë së Tiranës e quan marrëzi. Gjithashtu Veliaj përjashton mundësinë për një marrëveshje mes palëve.

“Po ndodh ajo që është vlerësuar nga të gjithë, një marrëzi e paprecedentë. Imagjinoni nëse kjo marrëzi shpërblehet në Shqipëri dhe partia që ka humbur zgjedhjet këtu të kthehet. Ne e provuam marrëveshjen në 2107-n ku ia dorëzuam qeverinë kundërshtari. Ata janë në ate situate ku familjet kanë ndryshuar shtetësinë, e se shohin vetën këtu. E kane pas ata Tiranën dhe Shqipërinë dhe kemi pas kuotat më të ulëta. I sugjeroj se duhet me gjet një program alternativ. Më jep një program dhe një kandidat”, tha Veliaj.

Veliaj thotë se 42 parti të tjera të regjistruara në KQZ për të marrë pjesë në vendoret e 30 Qershorit po plotësojnë vakumin e krijuar nga opozita. Ndërkohë ai shigjeton kryetarin e Partisë Demokratike dhe liderin historik të saj.

“PD se hoqi askush nga gara, nuk besoj se i është lut kush kundërshtarit të vet të hyjë në gra. Nëse sheh lidershipin e PD, krejt familjet e tyre i kanë me nënshtetësi holandeze dhe austriake. Vetë kanë dhënë mesazhin se nuk e shohin të ardhmen në Shqipëri. Një lider tjetër që SHBA si ka dhënë vizën ka vendos me e djeg të gjithë trashëgiminë”, tha Veliaj.

Ndërsa vetë Erion Veliaj në emër të socialisteve do të kërkojë një mandat të dytë për të qeverisur Tiranën, por a do të jetë kjo një garë e fortë ndërsa përballë mund të mos ketë një kandidat nga opozita?

“Edhe ata janë duke bërë llogaritë e tyre. Unë nuk bëj llogaritë e bastexhinjve. Unë bëj llogaritë e qytetit”, tha ai./abcnews.al

SILJANOVSKA-REAGIM_ABC-M4-T2.mpg_snapshot_00.03-1280x720.jpg
nev ila18:40 | 28/04/2019

Kandidatja për presidente të Maqedonisë, Gordana Siljanovska vazhdon të kërkojë votat e shqiptarëve dhe ka mohuar se përkrah saj qëndron një i dënuar për krime lufte. Ndërkohë, shenja flirtimi me shqiptarët ka shprehur edhe vetë kreu i VMRO-DMNE-së, i cili ka vlerësuar qëndrimin e opozitës shqiptare.

I kërkon votat e shqiptarëve, por përkrahet nga personi i vetëm që është i dënuar për krime lufte, edhe atë për krime të bëra ndaj shqiptarëve të Lubetenit. Madje, e mohon se Tarçullovski po e përkrah.

Si kërkoni vota nga shqiptarët kur Tarçullovski është me ju gjatë gjithë kohës? – Nuk është e vërtetë që qëndron afër meje”, ka thënë ajo.

Nga ana tjetër, kryetar i VMRO DPMNE-së, Hristijan Mickoski, pret që të arrihet pragu zgjedhor. Nuk sheh asgjë të keqe në qëndrimin e Aleancës për Shqiptarët. Mickoskit i pëlqen fakti që opozita shqiptare nuk dëshiron të përzihet në raundin e dytë, kurse deklaratën e kryetarit, Ziadin Sela e cilëson se është dhënë në drejtim të përmirësimit të kapaciteteve demokratike të shtetit. 

“Deklarata e tij ishte në drejtim të përmirësimit të demokracisë, në drejtim të esencës së demokracisë. Se qytetarët janë sovran i pakontestueshëm dhe se është e drejta e tyre nëse do të votojnë apo jo. Absolutisht nuk pajtohem me zërat se deklarata e tij ishte thirrje për bojkot. Përkundrazi, ishte një deklaratë që shkon në drejtim të përmirësimit dhe forcimit të kapaciteteve demokratike të shtetit”, ka deklaruar ai.

Pesë vite më parë, pasi BDI nuk arriti të merret vesh për kandidat të përbashkët me asnjë prej partive maqedonase, vendosi ti bojkotojë zgjedhjet, e Ivanov e fitoi Pendarovskin me mbi 120 mijë vota diferencë./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono