mancini

italy-ukraine.jpg
G. P.20:10 | 11/10/2018

Tifozët italianë sulmuan ashpër kombëtaren e tyre pas barazimit me Ukrainën. Katër herë kampionët e botës rrezikojnë eleminimin nga Liga e Kombeve, nëse nuk fitojnë të dielën në Poloni.

Fanelat janë tepër të famshme.

Në emër, Italia është katër herë kampione e botës, por në 10 ndeshjet e fundit ka arritur të fitojë vetëm një. Nuk ia doli as në miqësoren e luajtur në Gjenovë ndaj Ukrainës, për tronditjen e madhe të tifozëve.

Trajneri Roberto Mançini bëri të tjera eksperimente, ndërsa të kaltrit arritën të krijonin disa raste, por të shënonin vetëm një gol. Përballë ukrainasve të trajnerit Shevçenko, Italia pati në fushë disa lojtarë shumë të mirë si Donaruma, Bonuçi, Kielini, Verrati, Zhorzhinjo, Insinje apo Bernardeski, por jo një skuadër aq cilësore dhe aq të formuar sa të imponohej në fushë.

Ukraina barazoi me anë të Malinovskit, dhe u mbajt deri në fund, ndërsa tifozët shpërthyen në tallje dhe kritika në rrjetet sociale, me të përfunduar takimi.

“Itali-Ukraina 1-1, ish-trajneri Ventura: Atëherë nuk isha unë, ishin fanelat e verdha!”, komentonte njëri.

“Rrini të qetë, sot kishim mungesat e Pirlos, Kanavaros, Nestës Inzagit. Më vjen të qaj!”, ishin fjalët e një tjetri.

“Duke hequr Bernardeskin, më të mirin në fushë, Mançini shkatërroi çdo mundësi për të sulmuar. Gjashtë ndeshje si trajner, një fitore me Arabinë Saudite, sa keq!”, është ky koment i dëshpëruar.

Një tjetër tifoz: “Më duket se e kuptova se cili është misioni i Mançinit, të na bëjë që të na marrë malli për Venturën!”

Së fundi, një propozim: “Le t’i biem shkurt, të thërrasim përsëri Antonio Konten”.

Po Mançini çfarë tha pas zhgënjimit të fundit?

“Na ka ardhur në majë të hundës duke luajtur mirë, por duke mos fituar ndeshjet, – u shpreh ai, – ishte një miqësore, dhe shpresoj të nisim të fitojmë të dielën. Është e qartë që tifozët janë të shqetësuar, dhe ne duhet t’i durojmë kritikat dhe talljet. Gjithsesi, mendoj se e keqja është tek rezultati, jo tek loja”.

Italia luan të dielën në fushën e Polonisë për Ligën e Kombeve, ndërsa rrezikon eleminimin pas humbjes në Portugali dhe barazimit në fushën e saj me polakët./abcnews.al

mancini-1.jpg
G. P.12:14 | 15/05/2018

Roberto Mançini është trajneri i ri i Italisë. Ish-trajneri i Interit dhe Manchester City-t cilësohet si shpresa e fundit e të kaltërve për t’u kthyer në lavdinë e dikurshme.

I përzgjedhuri zbriti më në fund nga qielli.

Roberto Mançini vuri këmbë në aeroportin e Fiumiçinos në Romë, në rrugën e tij drejt selisë së Federatës Italiane të Futbollit.

Do të jetë ai trajneri i ri i Italisë, personaliteti i vetëm që i plotësonte kushtet pas refuzimeve të Ançelotit apo Kontes.

I sulmuar nga mediat nga të katër anët, ndërsa nxitonte drejt makinës, Mançini nuk pati dëshirë të fliste, në përpjekje për të lënë gjithçka për në konferencën e prezantimit.

“Jam i lumtur dhe krenar për këtë detyrë, – u mjaftua të thoshte ai, – pas këmbënguljes së gazetarëve, nuk dua të flas para kohe për të ardhmen, të shohim se çdo të ndodhë”.

Më pas, erdhi firma në kontratë, që besohet të jetë e vlefshme për një cikël eleminator, atë të Europianit, dhe prezantimi me fanelën e shpalosur të Italisë, në krah të komisarit të jashtëzakonshëm Fabriçini, dhe të Alesandro Kostakurtës.

Pesëdhjetetrevjeçari cilësohet si shpresa e fundit e të kaltërve për t’u kthyer sërish në nivelet e dikurshme, pas dështimit për t’u kualifikuar për në Kupën e Botës në Rusi.

Karriera e Manços nuk ka të sharë, pasi fitoi tre tituj me Interin, disa Kupa të Italisë po me Interin, me Fiorentinën apo Lazion, si dhe Superkupën e Italisë.

Në Angli, u bë kampion me Manchester City-n, të njëjtën skuadër me të cilën fitoi Kupën dhe Superkupën e Anglisë, ndërsa në Turqi fitoi Kupën me Gallatasarajin.

Këtë sezon ai ishte në stolin e Zenitit të Shën Peterburgut në Rusi, detyrë të cilën e la në mirëkuptim me klubin, për të marrë drejtimin e kombëtares së vendit të tij.

Italia pësoi një katastrofë të vërtetë nën drejtimin e Giampiero Venturës, duke u mundur nga Suedia në play off-in e Botërorit.

Më pas, të kaltrit u drejtuan në disa miqësore nga Luigi Di Biago, në pritje të një zgjidhjeje përfundimtare.

Ndeshja e parë e Mançinit si trajner i Italisë do të jetë në 28 Maj ndaj Arabisë Saudite në Zvicër, pastaj në Nicë ndaj Francës në 1 Qershor, dhe në 4 Qershor në Torino ndaj Holandës.

Synimi është që gjithçka të jetë gati që italianët të kualifikohen për në Europian, në një grup ku ndodhen Portugalia e Polonia./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono