Lushnje

perime-te-mykura.jpg
G. P.13:30 | 21/05/2019

Në tregjet e Lushnjes ka shumë pika, ku tregtohen fruta dhe perime të mykura. Ndërsa mjekët thonë se prej tyre rrezikohen konsumatorë, AKU në këtë qytet është inekzistente.

Fruta dhe perime të mykura shiten në tregjet e pakicës në Lushnje. Këto pika tregtimi, janë jashtë vëmendjes së Autoritetit Kombëtar Ushqimor. Këtë fakt e pohojnë vetë tregtarët. Sipas tyre të paktën prej pesë vitesh, AKU nuk ka qenë asnjëherë e pranishme në stendat e tyre.

“Ku kanë ardhur ndonjëherë këtu ata moj… Ne nuk i njohim fare. Ne po shesim si ato lopët në fushë, pa kushte pa gjë”, tha një prej tyre.

“Nuk ka ardhur njeri fare”, tha një tregtare.

“Asnjëherë nuk kemi parë njeri këtu, fare. Shikoje si është malli, me hormone, ça të duash i ke të gjitha këtu”, tha një tregtar.

“Asnjëherë, s’mbaj mend unë të vijnë kontrolli këtu”, tha një tregtare.

Domatet, bizelet apo qepët po shiten në vlerat minimale, 10 lekë për kilogramë. Shkak nuk është cilësia e dobët, por fillimi i prishjes së produktit. Kjo tregtare, një ditë më parë është furnizuar me mollë të kalbura të ardhura nga Korça.

I ka nxjerrë në treg me idenë se njerëzit nuk kanë lekë të blejnë, ndaj edhe pse janë me myk, ato shiten. Më të rrezikuar janë konsumatorët, të cilët janë të detyruar të blejnë produktet e mykura dhe të kalbura që u ofron tregu.

“S’jam e sigurt. Si të gjithë të tjerët… marrim, blejmë”, tha një qytetarë.

“Duhet të ketë kontrolle nga shteti, jo nga mua”, tha një tjetër.

“Ishte speci, gjysmë jeshile, gjysmë i verdhë… pulla-pulla. Ça tregon kjo pulla nuk e dimë”, tha një qytetare tjetër.

Frutat dhe perimet e mykura kanë toksina. Më e pakta është helmimi ushqimor që shkaktohet nga konsumimi i tyre. Në këto kushte, asnjë kilogram i këtyre produkteve nuk duhet të dalë në treg, por mungesa e kontrolleve, nga institucionet ligjore, po vë në rrezik jetën e konsumatorëve./ABC News Albania 24/7

SERAT-ME-VRESHTA-LUSHNJE_ABC-M2-T1.mpg_snapshot_00.14-1280x720.jpg
ent ela13:39 | 19/05/2019

Fermerët në Lushnjë po mbjellin vreshtat e rrushit në sera. Ata u janë larguar prodhimit të perimeve me idenë që do kenë më shumë fitime. Por këto eksperimente janë të pastudiuara dhe po e ç’orientojnë bujqësinë.

Nuk bazohen në ndonjë studim, por thjesht po eksperimentojnë. Në sera diellore nuk ka më perime. Ato po zëvendësohen me vreshta. Kështu besojnë se do të kenë sukses.

Sokrat Lici në Krutje të Lushnjës këtë vit shpreson të fitojë me vreshtin, për të likujduar borxhet të cilat i mori për prodhimin e perimeve.

“Deri vjet, parvjet  e mbolla patëllxhanë, domate dhe zero fitim vinte deri atje sa unë dhe farën e mbillja me lekë, një vit e lashë pa mbjellë dhe vendosa ta mbjell vresht”.

Bujqësia po zhvillohet pa orientim. Dështimet dhe zhgënjimet e qindra fermerëve , po e çojnë këtë sektor jetik për familjet myzeqare në eksperimentime të ndryshme.

Andrea Muça, ndryshe nga Sokrati, ka vitin e 10 -të të prodhimit të rrushit në sera. Fillimisht i solli të ardhura të mira, sepse dilte i pari në treg. Sot përhapja masive e këtij prodhimi  pritet të sjellë destabilizim në çmime.

“Kjo punë është vështirësuar se në shumë sera është mbjellë vresht. Dhe kjo nuk është gjë  e mirë se shpesh fermerët e këpusin rrushin papjekur, dalin e treg dhe e shesin me çmime më të ulëta dhe se ai i fushës”.

Në asnjë rast, prodhuesit e vreshtit në sera nuk kanë marrë subvensione. Interesi për këtë mënyrë kultivimi është individual, ndaj nuk është përfshirë në skemat ndihmëse.

“Të gjitha të miat, s’ka vënë dorë shteti këtu, kam marrë borxh te banka dhe e kam bërë”.

Dy eksperienca të ndryshme të prodhimit të rrushit në sera, të sjella nga zona e Krutjes, janë tregues i qartë i ç’orientimit në sektorin bujqësor. Në një treg të pastudiuar dhe të pa bazuar në kërkesat e konsumatorit do të ketë dështime për t’ia lënë radhën eksperimentit të ardhshëm. /ABC news Albania 24/7

lushnje-fier-lojerat.jpg
ent ela11:40 | 09/05/2019

Një person ka rënë në pranga, ndërsa 3 të tjerë janë procedohet penalisht, pasi ushtronin aktivitetin e kundraligjshëm të lojrave të fatit. Operacioni policor i koduar “Gambling” ushtroi kontrole në Lushnjë dhe Fier, ku u arrestua në flagrancë 23 vjeçari me iniciale M.S, banues në Lushnje, ndërsa 44 vjeçari me iniciale, G.Ç, 44 vjeç nga Lushnje dhe dy 29 vjeçarë nga Fieri me iniciale V.Gj. dhe G.B . u proceduan penalisht.

Njoftimi i Policisë

Operacion për goditjen e veprimtarisë së kundraligjshme të lojrave të fatit.

Finalizohet operacioni policor i koduar “Gambling”.

Arrestohet në flagrancë 1 shtetas dhe 3 të tjerë procedohet penalisht pasi ushtronin aktivitetin e kundraligjshëm të lojrave të fatit.

Në vijim të kontrolleve të befasishme në të gjithë Qarkun Fier për evidentimin dhe ndëshkimin e atyre personve që vijojnë ende të ushtrojnë aktivitetin e kundraligjshëm të lojrave të fatit, policia goditi 2 raste në qytetin e Lushnjes dhe 2 raste në Fier.

Specialistët për Hetimin e Krimeve në Komisariatin e Policisë Lushnje në bashkëpunim me Specialistët për Hetimin e Krimit Ekonomik e Financiar në Drejtorinë Vendore të Policisë Fier, arrestuan në flagrancë shtetasin:

M.S, 23 vjeç, banues në Lushnje.

U sekuestruan në cilësinë e provave materiale 2 aparatura elektronike të lojrave të fatit, 6 valixhe të mbushura me çipsa, 1 tavolinë pokeri si edhe 150 euro të dyshuara të falsifikuara.

Arrestimi i këtij shtetasi u bë për veprat penale “Falsifikim i monedhave”, “Ruajtja ose depozitimi i mallrave kontrabandë”, “Fshehja e të ardhurave”, “Mospagim i taksave dhe tatimeve”, “Organizimi i llotarive sportive dhe “Vënia në dispozicion e lokaleve për lojra të palejuara” pasi në ambientin e lokalit të marë me qera prej tij, ushtronte aktivitetin e kundraligjshëm të lojrave të fatit.

Në kuadër të këtyre kontrolleve,  u procedua penalisht për veprat penale “Organizim i llotarive të pa lejuara” dhe “Vënia në dispozicion i lokaleve për lojra të pa lejuara” shtetasi:

G.Ç, 44 vjeç, banues në Lushnje.

Në lokalin në pronësi të këtij shtetasi u sekuestruan në cilësinë e provës materiale 2 tavolina pokeri, 12 pako letra bixhozi, 3 njësi kompjuterike, 1 printer, 2 monitor, 2 tableta dhe 1 laptop të cilat shërbenin për ushtrimin e aktivitetit të kundraligjshëm të lojrave të fatit.

Gjithashtu, u proceduan penalisht për “Fshehje të të ardhurave” dhe “Organizim të palejuar të lojrave të fatit” shtetasit:

V.Gj, 29 vjeç, banues në Fier.

G.B, 29 vjeç, banues në Fier.

Procedimi ndaj këtyre shtetasve filloi pasi organizonin lotari të palejuara nëpërmjet telefonit.

Policia e Shtetit fton cilindo të denoncojë falas në numrin 112 ose përmes aplikacionit “Komisariati Dixhital”, çdo veprimtari të tillë të kundraligjshme. /abcnews.al

TALASEMIKET-LUSHNJE_ABC-M2-T1.mpg_snapshot_00.12-1280x720.jpg
ent ela13:11 | 08/05/2019

Të sëmurët me talasemi në Lushnjë, që u duhet të marrin gjak çdo dy javë, varen nga dhurimet vullnetarë. Mjeket thonë për ABC News, se gjendja po përmiresohet, pavarësisht se gjetja e dhuruesve vullnetarë mbetet problem i përhershëm.

Prej 25 vjetësh ky prind nga Fieri, sjell vajzën e tij talasemike në spitalin e Lushnjës. Fatmirësisht sot do të marrë gjak, sepse dikush ka dhuruar.

Prind: “Vij nga Fieri një herë në dy javë, në spitalin e Lushnjës”.

Dhurues: “Asgjë, thjesht mu tipos dhe e bëra, është hera  e parë”.

Të sëmurët me talasemi, që trajtohen në spitalin e Lushnjës, u duhet të marrin gjak çdo dy javë. Sigurimi i tyre varet nga dhurimet vullnetare. Shkollat, kishat dhe xhamitë, janë institucionet ku mjekë e infermierë të spitalit kërkojnë ndihmë.

Ariana Zaka Mjeke Hematologe: “Problematika ekziston dhe gjithmonë do ekzistojë, se kjo arrihet nëpërmjet dhurimit dhe dhurimet janë të vështira”.

Problemi i gjetjes së vullnetarëve mbetet i përhershëm. Mjeku transfuziolog Endrit Susaj, i cili vjen çdo ditë nga Tirana në Lushnjë thotë se situata është përmirësuar.

Mjeku: “Mbetet problematikë për shkak të numrit të dhurimeve në Lushnje. Numri i dhurimeve për gjithë vitin 2019 me 450 dhurime vullnetare”.

Në qendrën e hemoglobinopative në Lushnjë trajtohen 140 pacientë talasemikë nga Fieri, Berati, Vlora dhe Elbasani. Nevojat për gjak janë të vazhdueshme dhe vetëm sot sipas mjekëve janë gjendje 45 qeska, të mjaftueshme për një ditë. /ABC News Albania 24/7

 

kompensimi-i-qumeshtit.jpg
nev ila14:51 | 03/05/2019

Në Lushnjë fermerët që dorëzojnë qumështin në fabrika janë në pritje të vlerës së kompensimit, sipas skemës së subvencionit 10 lekë për një litër. Pavarësisht se kanë dyshime për zbatimin e saj, ata çdo ditë plotësojnë formularët.

Protestuan dhe fituan njohjen e 10 lekëve si kompensim.

Të paktën kështu ka ndodhur nëpër letra për blegtorët.

Në Lushnjë, kanë nisur subvencionet e qumështit. Në ambientet e AZHBR- agjencia e zhvillimit të bujqësisë rurale- hyjnë e dalin  fermerë e blegtorë me dokumente nëpër duar.

Ata plotësojnë formularët e vet-deklarimit për prodhimin e dorëzuar në fabrika.

Na kanë thënë që do na subvencionojnë 100 lekë për litër ndaj dhe po bëjmë gati dokumentacionin”, u shprehën disa fermerë aplikues.

Dokumentacioni u është thjeshtuar, por jo problemi. Grumbulluesit u kanë ulur çmimin e qumështit, nga 48 lekë për litër që ishte një muaj më parë ka zbritur në 38 lekë.

Diferenca u është premtuar se do tu kompensohet. Shuma varet nga sasia e qumështit të shitur, por ka prej tyre që janë dyshues sepse të njëjtën gjë bënë edhe kur u premtua të shtonin krerët e gjedhëve dhe kompensimi nuk u dha kurrë.

“Jemi të zhgënjyer, i kemi mbyllur dhe herë të tjera dokumentet për shtimin e krerëve dhe nuk kemi marrë asgjë derisa u detyruam të shisnim lopët”, deklaruan disa aplikues të tjerë tyre.

Situata vjen e tillë pas tre protestave të mëdha organizuar një muaj më parë nga të gjithë blegtorët shqiptarë në Lushnje. Ministria e Bujqësisë dhe zhvillimit rural vendosi të subvencionojë 10 lekë për litër qumështi  dorëzuar në pikat e përpunimit, pavarësisht numrit të krerëve të bagëtive që ka çdo aplikues.

Vetëm në rrethin e Lushnjës numërohen rreth 26 mijë blegtorë që shesin qumështin, të cilët duhet të aplikojnë deri më 10 maj të këtij viti./ABC News Albania 24/7 

 

lushnjeeeee.jpg
Sej rie16:40 | 24/04/2019

Fermerët në Lushnje nuk po lëne tokat djerrë por po i punojnë duke shënuar borxhet në listë. Drejtuesit e mekanikës bujqësore thonë se çmimet janë rritur për shkak të çmimit të naftës.

E bën këtë punë që kur ishte 15 -vjeç.

Por sot 20 vjeçari nga Terbufi i Leshnjes nuk paguhet për të korrur jonxhën.

Në shtëpi ka një listë ku ka shënuar borxhet e fermerëve.

Çmimet për punimet e tokës janë rritur.

Një mije lekë me tepër për çdo dynym krahasuar me një vit më parë.

Përdoruesit e mekanikes bujqësore në rrethin e Leshnjes dhe të Divjakës  kanë rritur çmimet. Një dynym  tokë e pluguar sot kushton 13 mijë lekë të vjetra. Shkak për këtë rritje është bërë nafta.  Traktoristët e blejnë karburantin  me 180 lekë për litër, dhe ky çmim është i njëjte me përdoruesit e makinave private.  Ndaj shumë  fermerë nuk janë në gjendje të paguajnë, por shënohen emrat në listë.

Fermerët të cilët kanë shumë tokë për të punuar, janë vënë në vështirësi për likuidimin e pagesave.  Por megjithëse mekanika bujqësore po u kushton shtrenjtë, askush nuk i ka lënë tokat djerre. Ata shpresojnë se puna e bërë sot do të paguhet nesër, traktoristë dhe fermerë kanë gjetur gjuhën e mirëkuptimit./abcnews.al

LUSHNJE-FERMERET_ABC-M2-T1.mpg_snapshot_00.01-1280x720.jpg
ent ela13:49 | 19/04/2019

Fermerët në Stan Karbunarë të Lushnjës e kanë të vështirë të futen në pronat e tyre për të punuar. Kjo për shkak se rrugët bri tokave janë bllokuar nga mbetjet e kanaleve.

Këto grumbuj dherash janë kufiri i pakalueshëm drejt pronës së tyre. Situata është e tillë në Stan Karbunarë të Lushnjes prej katër muajsh.

“Bordi i Kullimit ka pastruar kanalet dhe baltën e ka hedh nga rruga. Rruga është bllokuar, s’kemi nga të vemi te tokat. Na ka ngelur jonxha pa korrur, po e çojmë në krah plehun te toka, 800 metra t’i nxjerrësh në krah”.

“Jemi bllokuar, as mbjellim as korrim më”.

Pas pastrimit te kanalit  bordi i kullimit, nuk ka kryer sheshimin e mbjetjeve.  Ato jane lene neper rruget e parcelave te mbjella me grure dhe jonxhe. Nga ky moment, edhe kalimi me traktor behet i veshtire, aq sa mund te rrezikosh edhe jeten.

“Presim që të korrim jonxhën po nuk kemi nga të kalojmë”.

Të paktën në rreth 40 ha tokë bujqësore që shtrihet përgjatë kanaleve, rruga u është bllokuar.

Më të penalizuar nga kjo gjë janë fermerët e Stan Karbunarës, pasi në zonat e tjera bordi kullues ka pastruar dhe sistemuar tokën. /abcnews.al

bredher-ne-lushnje.jpg
G. P.11:51 | 17/04/2019

Më shumë 100 hektarë plantacione me dru frutorë janë dëmtuar nga breshëri në Barbullinjë të Lushnjes. Për 20 minuta, i gjithë prodhimi ka përfunduar në tokë. Dëmet janë shkaktuar kryesisht në sipërfaqet e mbjella me pjeshkë dhe agrume. 

Pas dy javëve, këto fruta do hidheshin në treg. Por mjaftoi 20 minuta breshër që ato të dëmtohen. 100 hektarë plantacione me dru frutorë u prekën në Barbullinjë të Lushnjes. Një pjesë e prodhimit ka rënë në tokë.

Dëmet janë kryesisht në sipërfaqet e mbjella me pjeshkë dhe agrume. Fermerët thonë se për dy javë prodhimi do të dilte për t’u shitur.  Këto kokrrat në pemë, por të vrara do të kalben. Ato nuk shpëtohen nga asnjë lloj shërbimi.

Prodhimi i sezonit ishte i mbarë. Por fermerëve do t’u duhet një vit kohë të punojnë për riparimin e dëmeve. Ata kërkojnë që përfaqësues të Ministrisë së Bujqësisë të vlerësojnë dëmet.

Pemëtaria është sektori i vetëm i punësimit për familjet në Barbullinjë. /abcnews.al

ceka.jpg
G. P.13:42 | 16/04/2019

Kryetarja e Gjykatës së Lushnjës, Esmeralda Çeka, ka dalë sot para Komisionit të Pavarur të Kualifikimit, për Vettingun.

Nga deklarata në Inspektoriatin e Lartë të Deklarimit dhe Kontrollit të Pasurive e Konfliktit të Interesit dhe nga hetimet e KPK-së, rezulton se Çeka ka deklarim të saktë të pasurisë dhe në përputhje me ligjin.

Sipas KPK-së, ajo ka burime të ligjshme, nuk ka kryer fshehje të pasurisë dhe nuk gjendet në kushtet e konfliktit të interesit.  Në lidhje me një hua të marrë nga subjekti i rivlerësimit dhe bashkëshorti i saj, Komisioni kërkoi shpjegim nga kryegjyqtarja.

Ajo deklaroi se shtetasi që ka dhënë huanë, kishte mundësi ekonomike. Në lidhje me pastërtinë e figurës, Esmeralda Çeka ka plotësuar saktë formularin dhe është i përshtatshëm për vazhdimin e detyrës.

Ndërsa lidhur me kriterin e tretë, sipas KPK, kryegjyqtarja ka treguar aftësi profesionale, nivel të lartë etike dhe angazhim profesional. Vendimi për Çekën do jepet në 18 prill./abcnews.al

aksidenti-lushnje-933x445.jpg
ent ela22:18 | 04/04/2019

Në rrugën nacionale Lushnje-Berat ka ndodhur një aksident. Një motoçikletë u përplas me një makinë policie e si pasojë humbi jetën drejtuesi i motoçikletës, 45-vjeçari Ilir Lulja. E veja e tij dhe i afërmi i tyre, Ilmi Kapedani, tregojnë ngjarjen që erdhi ngaqë makina e policisë hyri kundravajtje.

Gazetari: Sot jemi në Rrethin e Lushnjes, në rrugën nacionale që të çon drejt qytetit të Beratit, ku do të trajtojmë rastin e një aksidenti ku viktima, i cili ka mbetur i vdekur si pasojë e një përplasjeje mes fugonit të policisë dhe motoçikletës së tij, ka dalë fajtor nga organet e drejtësisë.

Valbona Lulja: Aksidentin në fillim ma ka pohuar vajza, kur ka ardhur në shtëpi. Më tha, mami babin e kam marrë para 5 minutash dhe nuk më është përgjigjur. Edhe mua, i thashë, nuk më është përgjigjur në celular. Provuam i ramë prapë.

Dëshmitari 1 – Ishte një çun polic, që unë e njoh, po drejtonte trafikun ai, çun i ri ai, e i thashë:-Ej, po mirë e ça bëni ju?  – “Po mirë ore, ça të bëjmë ne”?-tha. “Ça të bëjmë”? Edhe po binte telefoni, ishte telefoni 1 metër larg meje, i thashë t’i përgjigjem në telefon ndonjë familjari, t’i lajmërojmë të paktën, se kështu është në të gjithë botën, që lajmërohet familjari.

Valbona Lulja: I ramë telefonit, na e ngriti një person, që i tha vajzës: “Jam shoku i babait tënd dhe babai ka bërë aksident, ndodhet në spital”. Mora një makinë, kam ikur bashkë me vajzën. Vetëm i vëllai i bashkëshortit më tha se është në gjendje të rëndë, tani u nis për në Tiranë. Atje ndërroi jetë, po atë ditë.

Ilmi Kapedani: I ndjeri vinte nga Kosova e Madhe e Lushnjes për në Lushnje.

Gazetari: Si ka ndodhur aksidenti? Zoti Lulja ishte i pozicionuar në motoçikletën e tij këtu, ndërsa fugoni i Policisë që transportonte të burgosurit drejt Vlorës nuk respekton tabelat e qarkullimit rrugor, të cilat tregojnë qartë që duhet të kthehesh djathtas dhe jo të vazhdosh drejtë.

Ilmi Kapedani: Shoferi i makinës së policisë nuk e ka marrë parasysh këtë tabelë dhe i ka rënë drejtpërdrejt duke marrë motorin para. I bie që shoferi i policisë ka qenë kundravajtje.

Ne do të analizojmë hap pas hapi të gjitha shkeljet e transportit rrugor që ka bërë fugoni i policisë, duke nisur që nga tabela që tregon që automjetet që vijnë nga rruga e vjetër e Lushnjës duhet të kthehen djathtas.

Çështja pas të gjitha procedurave, nga policia erdhi në Prokurorinë e Lushnjes, ku në bazë të shortit iu caktua prokurores së rrethit gjyqësor Lushnje, Natasha Prifti, e cila nisi procedurën në lidhje me shkaqet e këtij aksidenti, por ka lënë në mangësi hetimin dhe zbardhjen e këtij aksidenti. Pas disa kohësh, kjo prokurore doli me pushimin e çështjes, pikërisht në datën 16 Mars 2017, por në bazë të të dhënave që ka emisioni “Stop” nuk janë administruar 2 dëshmitë kryesore, të cilat zbardhin shkaqet kryesore të aksidentit.

Emisioni “Stop” administron dy dëshmi kryesore, të cilat mund të zbardhin aksidentin që i mori jetën 45-vjeçarit. Dëshmia e parë, vjen nga një i burgosur, i cili ka qenë prezent në fugonin e policisë.

Deklaratë: Unë i quajturi, Aranit Agim Arapi, i dënuar në burgun e Kosovës, për ngjarjen e datës 9 Tetor të 2016-ës, ku humbi jetën një shtetas në vendin e quajtur Kthesa e Kashbardhës, deklaroj se po në këtë datë rreth orës 13:00 shoferi që unë udhëtoja ishte fajtor për aksidentin e ndodhur, pasi personi që ngiste motorin ishte në krahun e tij të drejtimit, ndërsa shoferi i makinës që unë udhëtoja, në vend që të kthehej tek rotondo për t’u futur në rrugë të drejtë, futet në drejtimin e kundërt.

Dëshmia tjetër vjen nga një qytetar, i cili ka biznesin tek cepi i rrugës nacionale dhe ka parë të gjithë aksidentin.

Dëshmitari 2 – Unë qeshë i pari pas policit. Polici sa nuk qante. Erdhi, kam atë zetorin aty brenda, të zotit të zetorit i thashë, ik e merr ca rroba të pastra, se ja vura tek koka, se po e mbanim një çik keq, kështu i pastrova gjakrat, i pastrova gojën, hundën… Tjetër s’kisha çfarë t’ju thosha unë, e mora, erdhi ambulanca, e hipa lart, hipa dhe vetë në ambulancë . E çuam në spital. Atje u zura dhe me doktoreshën atje, se me tha:- ëëë… ky, që është përplasur me policinë! –Jo,- i thashë,- unë e parë e punës, kemi gjysmë ore që po ju presim,- thashë- dhe ky s’është përplasur me policinë, e ka përplas policia këtë. Ndaluan, biles ai ishte çun i ri, sa nuk qante, biles, kur i thashë unë – ti e ke ndalim-qarkuullimi, ja thashë në italisht unë atij, se kam qenë shumë vite në Itali ……o tha tani e pashë dhe i binte xhadesë me dorë ai, i binte me pëllëmbë, aq i dëshpëruar ishte, se e kuptoi gabimin. Unë që aty e pashë gjendjen, që ishte shumë e rëndë dhe s’kisha më, çfarë të bëja më shumë.

Drejtuesi i Emisionit “Stop” Saimir Kodra bën thirrje për rihapje të çështjes. “Shoferi nuk ka dashur, askush nuk do. Por, kur ke hyrë në kudravajtje, je ti fajtori i asaj gjësë. Ndaç nga alkooli, përgjegjësia, nuk e ke pasur vëmendjen, e ke marrë patentën me mik…është e gjitha përgjegjësia yte për sa kohë ke mbi shpatulla jetën e një njeriu. Pra, duke anashkaluar të gjithë këtë veprim, shmangu detyrimin që ka ky institucion, Policia e Shtetit t’i japë një dëmshpërblim familjes. Po ashtu, siguracioni që mbulon makinat e policisë, nëse kanë, t’i paguajë një detyrim kësaj familjeje për familjarin që humbën. Kam përshtypjen që kjo çështje duhet të rihapet edhe një herë. Nuk dua kurrsesi që drejtuesi i automjetit, apo dikush tjetër të burgoset, nuk është ky qëllimi. Zonja Prifti rishikojeni edhe një herë me këto dëshmitë, sepse kam përshtypjen se do të dalë ndryshe nga mbyllja e hetimit./tvklan.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono