lufte tregtare

lufta.jpg
G. P.08:16 | 20/09/2018

Përballë manovrave kërcënuese të Trumpit me gjithnjë e më shumë dogana, Kina ka mundësi të ruajë qetësinë, mendon eksperti Shen Ling.

Deutsche Welle: Presidenti i SHBA, Trump vendosi me efekt 24 shtatorin dogana të reja ndëshkimore ndaj importeve kineze me vlerë 200 miliardë dollarë. Sa rëndë është e prekur Kina prej tyre? 

Shen Ling:  Masa e re nuk është e papritur e madhe, për të ka kohë që diskutohet. Trumpi, siç e njohim, do t’i imponojë me çdo kusht doganat ndëshkimore, megjithë rezistencën në popullin amerikan.

Në përgjithësi, doganat ndëshkimore me vlerë 200 miliardë dollarë nuk do të kenë ndonjë efekt shumë të madh te Kina. Në fund të fundit, tarifa e doganës në fillim është vetëm 10 përqind. Që kur në mars u bë e qartë se SHBA dhe Kina mund të zhvillonin një luftë tregtare, juani kinez përjetoi një zhvlerësim prej rreth dhjetë përqind. E parë thjesht teknikisht, dëmet nga doganat ndëshkimore kompensohen nga ky faktor.

Ajo që e ndikon më fort ekonominë kineze janë faktorët psikologjikë. Këtu Trumpi di si ta përdorë shumë mirë “artin e të bërit biznes”. Kërcënimet e përsëritura dhe deklaratat kanë efekt shumë më të madh ndaj ekonomisë se sa taksat faktike doganore. Kjo pasqyrohet para së gjithash në bursën kineze, këtu atmosfera pesimiste ka ushtruar që tani ndikim negativ.

Negocatat midis Pekinit dhe Uashingtonit janë ndërprerë. A do të kthehen të dyja palët në dialog?

Unë jam thellësisht i bindur se negociatat do të vazhdojnë. Trumpi ndjek një strategji, të cilën fillimisht nuk e kemi pritur. Ai ecën sipas motos: po të mos veproj me kërcënime masive kundër Kinës, mund të arrij rezultate shumë të kufizuara në negociata. Kjo do të thotë, gatishmëri të mirëfilltë për negociata ai ndoshta nuk ka treguar ende, por vetëm ka shtuar kërcënimet dhe tani pret që Kina të bëjë lëshime nga ana e saj.

A është i kuptueshëm reagimi i Trumpit me taksa ndëshkimore ndaj deficitit tregtar?

Është fakt i njohur që Kina ka një tepricë gjigande tregtare përballë SHBA. Kina eksporton në tërësi mallra me vlerë rreth 500 miliardë dollarë në SHBA, por importet, në dallim nga kjo, janë vetëm 230 miliardë dollarë. Nga pikëpamja ekonomike, doganat ndëshkimore kundër Kinës nuk janë automatikisht në dobi të SHBA. Për mallra konsumi nga Kina, në tregun e SHBA zor se gjen alternativa. Nuk ka vende të treta, të cilat mund ta zëvendësonin Kinën në këtë sektor. Nga taksat ndëshkimore do të vuajnë në radhë të parë konsumatorët amerikanë. Trumpi është fiksuar pas deficitit tregtar, por një bilanc negativ tregtar nuk duhet të ketë patjetër efekt negativ ndaj SHBA.

Çfarë përfundimi pritet në luftën tregtare midis Kinës dhe SHBA?

Unë besoj se do të zgjasë. Për momentin ekonomia amerikane është në gjendje relativisht të mirë, kështu që Trumpi mund të llogarisë mbështetje, pavarësisht nga ajo që bën. Ka më shumë se një vit që kur është zgjedhur President dhe që atëherë u është dashur të largohen disa këshilltarëve ekonomikë, që nuk qenë dakord me politikën ekonomike të Trumpit. Nga kjo mund të shohësh se Trumpi nuk do ta ndryshojë mendjen për deficitin tregtar dhe tema të tjera.

Por për Kinën, edhe taksa të tjera ndëshkimore prej 25 përqind nuk janë patjetër goditje e rëndë, sepse faktori vendimtar konsiston në faktin në se dhe sa alternativa ka për eksportet kineze. Për zgjidhjen duhet kohë. Ndoshta pas disa vitesh amerikanët do të kenë një president të ri, atëherë politika ekonomike do të bëhet krejt ndryshe. Qeveria kineze dhe investorët privatë do të kuptojnë me kalimin e kohës edhe ngadalë, se lufta tregtare nuk është fundi i botës. Shumë shokë të mi, që merren me biznes, më treguan se këtë vit kanë fituar mirë, për shkak të zhvlerësimit të juanit. Nervoziteti për shkak të shkallëzimit të luftës tregtare do të bjerë me kalimin e kohës./DW

 

alumini.jpg
G. P.14:46 | 16/06/2018

Tarifa prej 25 për qind për pjesën më të madhe të mallrave të importit  që vijnë nga Shtetet e Bashkuara të Amerikës. Në këtë mënyrë, Kina ka reaguar ndaj vendimit të administratës Trump për vendosjen e tarifave për mallrat kineze që importoheshin në vend.

Kina do të vendosë një tarifë shtesë prej 25 për qind për mallrat që vijnë nga Shtetet e Bashkuara të Amerikës, për një vlerë prej 50 miliardë dollarësh. Është pikërisht i njëjti impakt i masave të marra nga Trump për mallrat që vijnë nga Kina. Lajmi është konfirmuar nga një deklaratë për shtyp e Ministrisë kineze të Financave. Tarifat për rreth 34 miliardë euro për mallrat amerikane të importuara do të hyjnë në fuqi në 6 Korrik dhe përfshijnë produkte ushqimore, automjete dhe peshk. Por masat nuk do të ndalojnë këtu pasi do të ketë tarifa dhe për mjekime dhe produkte të tjera.

Lufta tregtare mes Shteteve të Bashkuara të Amerikës dhe Kinës, duket se ka përfunduar. Reagimi kinez vjen pasi Donald Trump deklaroi se do të vendoste tarifa prej 25 për qind, me një vlerë prej 50 miliardë dollarësh, për mallrat kineze që kanë përmbajtje teknologjike për të ndaluar në këtë mënyrë vjedhjen e teknologjisë amerikane si dhe për të riekuilibruar një defiçit prej 375 miliardë dollarësh. Një lëvizje kjo, që së bashku me tarifat e vendosura për aluminin dhe hekurin kundrejt disa vendeve të Bashkimit Europian, Kanadasë, Meksikës dhe vendeve të tjera mund të nisë një luftë tregtare planetare. Ministria kineze e Tregtisë shpjegoi me anë të një deklarate për shtyp se nuk dëshironte një luftë tregtare, por vetëm të mbrojë interesat e vendit./abcnews.al

lufta-tregtare.jpg
G. P.20:25 | 15/06/2018

Vendet e Bashkimit Europian kanë mbështetur në mënyrë unanime një plan për të vendosur tarifa ndaj importimit të produkteve amerikane për 2.8 miliardë euro.

Vendimi vjen në kundërpërgjigje ndaj tarifave të prezantuara nga Uashingtoni ndaj çelikut dhe aluminit të Unioni. Komisioni Europian ka propozuar të fiksojë një tarifë prej 25% për produktet amerikane më të njohura si Uiski dhe motoçikletat Harli Devidson e shumë të tjera.

Ekzekutivi europian do të mblidhet me 20 Qershor për të adoptuar masat që duhet të hyjnë në fuqi në fund të këtij muaji. Komisioni Europian ka filluar edhe një betejë ligjore kundër tarifave amerikane në Organizatën Botërore të Tregtisë./abcnews.al

lufta-1280x853.jpg
G. P.10:15 | 12/06/2018

Investitorët i druhen përshkallëzimit të një lufte shkatërruese tregtare pas komenteve të ministrit gjerman të Ekonomisë, i cili tha se nuk sheh zgjidhje të menjëhershme të mosmarrëveshjes tregtare me Shtetet e Bashkuara. Ministri Peter Altmayer i bëri thirrje vendeve evropiane të veprojnë me vendosmëri pas vendimit të Donald Trumpit për të vendosur tarifa për metalet. Por ekspertë të financave thonë se situata e krijuar nuk ka mbritur ende në kufijtë e një lufte tregtare.

Të dielën Presidenti amerikan Donald Trump i habiti aleatët me tërheqjen nga një komunikatë zyrtare e përbashkët, për të cilën udhëheqësit e Grupit të Shtatëshes patën rënë dakort në Kanada. Në dokument përmendej nevoja për “tregti të lirë, të ndershme dhe reciprokisht të dobishme” si dhe rëndësia e luftimit të politikave proteksioniste.

Por sipas ekspertit financiar ndërkombëtar Peter Dixon situata ende nuk mund të quhet një luftë tregtare.

“Problemi fillestar është thjesht paralajmërimi i mosmarrëveshjes. Kjo nuk do të thotë se do të çojë domosdoshmërisht në një luftë tregtare. Mendoj se shkojmë shumë larg po ta themi këtë. Por mendoj se marrëdhëniet kryesisht të Evropës qartësisht Kanadasë dhe Shteteve të Bashkuara, vazhdojnë të jenë të ndryshme. Kemi parë çështjen e tarifave, kemi parë Shtetet e Bashkuara të largohen nga marrëveshja e përbashkët bërthamore me Iranin pavarësisht nga fakti që BE-ja dëshiron të mbetet shumë e angazhuar në të dhe tani kemi debatin e G-7-s që mendoj se i ka sjellë të gjitha këto çështje për diskutim në tavolinë. Për momentin mendoj se kjo të jep përshtypjen, të paktën evropianëve, të një administrate amerikane që thjesht nuk duhet t’i besojnë”thotë Peter Dixon i Commerzbank.

Zoti Trump, i cili i tronditi aleatët duke i goditur me tarifa ndaj importeve të çelikut dhe aluminit, tha gjithashtu se mund t’i dyfishojë këto përpjekje duke goditur industrinë e automobilëve, një çështje veçanërisht e ndjeshme për Gjermaninë, industria e makinave e së cilës mbështetet shumë në tregun amerikan.

“Është me rëndësi që evropianët të veprojnë me vendosmëri”, tha ministri gjerman i ekonomisë Peter Altmaier për radion publike “Deutschlandfunk”. “Për momentin duket se nuk ka asnjë zgjidhje, të paktën jo brenda një kohe të shkurtër“, tha ai.

Zoti Altmaier tha se takimi i udhëheqësve të G 7-s kishte prodhuar “probleme”, duke shtuar se tarifat e mëtejshme nga administrata Trump jo vetëm që do të dëmtonin aleatët e saj, por edhe ekonominë amerikane.

“Problemi është se nëse do të vendosen tarifa për tregtinë, në një përpjekje për të bërë importet më të kushtueshme dhe për këtë arsye do të përpiqeni të pengoni importet dhe t’i bëni konsumatorët të zgjedhin mallra të prodhuara brenda vendit, ajo që do të ndodhë është të detyroni palët e prekura të vendosin tarifave të ngjashme dhe si pasojë edhe eksportet amerikane do të goditen”, thotë ekspertiPeter Dixon.

Të dielën kancelarja Angela Merkel e cilësoi tërheqjen e zotit Trump nga komunikata përfundimtare e takimit të Grupit të Shtatëshes një veprim “disi dëshpërues”. Ajo premtoi një përgjigje të BE-së ndaj tarifave të çelikut dhe aluminit në përputhje me rregullat e Organizatës Botërore të Tregtisë.

Por eksperti Peter Dixon sugjeron që evropianët dhe Kanadaja “ta gëlltisin situatën aktuale dhe të përpiqen t’i kthejnë SHBA përsëri në tryezën e bisedimeve”./Zëri i Amerikës

TRUMP-RUSIA-KINA-1280x720.jpg
ent ela21:51 | 16/04/2018

Kina dhe Rusia po sfidojnë influencën tregtare të Shteteve të Bashkuara. Presidenti Donald Trump ka akuzuar dy vendet për lojra financiare me qëllim dobësimin e pozitave të Amerikës.

Presidenti amerikan Donald Trump ka akuzuar Rusinë dhe Kinën se po bëjnë lojra financiare me qëllim dobësimin e valutës amerikane. Sipas Trump, dy vendet po e bëjnë këtë gjë duke zhvelrësuar valutat përkatëse, në një kohë kur normat e interesit në Shtetet e Bashkuara po ngrihen. “Rusia dhe Kina po bëjnë lojra valutash në një kohë kur Amerika po i mban të ngritura normat e interesit. Kjo është e papranueshme!”, ka thënë Trump në Tëitter. Postimi i kreut të shtetit i referohet atyre që ai i konsideron praktika tregtare të zhdrejta. Kjo, pasi nëse valuta e një vendi ulet në mënyrë artificiale, atëherë eksportet e tij bëhen më konkurruese në treg. Ndërsa normat e larta të interesit në Shtetet e Bashkuara në përgjithësi rrisin vlerën e dollarit, duke i bërë eksportet amerikane më të shtrenjta. Që kur Trump mori detyrën në janar të vitit 2017, dollari amerikan është dobësuar kundrejt shumë valutave të tjera, përfshirë jenin kinez dhe rublën ruse. Kundrejt jenit, dollari ka rënë me 8.6 për qind që prej 20 janarit 2017; ndërsa përballë rublës me 4.5 për qind. Por me vendosjen e sanksioneve më herët gjatë muajit, dollari ra më tej në 4 për qind ndaj monedhës ruse. /abcnews.al

trump-dhe-xi.jpg
G. P.12:08 | 06/04/2018

Presidenti amerikan, Donald Trump, ka kërcënuar përsëri Kinën me shtim të tarifave deri në 100 miliardë dollarë. Nga ana tjetër, Pekini shprehet i gatshëm të kundërpërgjigjet në të njëjtën mënyrë.

Presidenti amerikan, Donald Trump, ka urdhëruar zyrtarët e administratës së tij që të marrin në konsideratë vendosjen e 100 miliardë dollarëve tarifa kundër Kinës. Kjo vjen në një kohë kur marrëdhëniet mes dy vendeve janë përshkallëzuar ndjeshëm për shkak të luftës tregtare, që nisi me rritjen e tarifës nga SHBA për importin e çelikut dhe aluminit. Detyrimet e fundit do t’i shtohen programit të tarifave amerikane me vlerë 50 miliardë dollarë për qindra produkte të importuara nga Kina.

Propozimi nga Trump ka ardhur pasi Pekini kërcënoi me vendosje taksash për 106 produkte kryesore të SHBA-ve. Këto masa dhe kundërmasa kanë goditur dhe tregjet globale në javët e fundit.

E menjëhershme ishte dhe përgjigja e Kinës. Ministria e Tregtisë tha se do të marrë masa të reja nëse Shtetet e Bashkuara aprovojnë tarifat e paralajmëruar nga Trump. Gjithashtu nënvizon se nuk dëshiron të vijojë një luftë tregtare edhe pse nuk ka frikë nga një e tillë.

“Kina dhe SHBA, si dy fuqi botërore duhet të trajtojnë njëri-tjetrin në bazë të barazisë dhe respektit. Duke vendosur sanksione tregtare kundër Kinës, SHBA zgjidhi një shënjestër të gabuar”, tha ministri i Jashtëm i qeverisë së Pekinit, Wang Yi.

Ndërkohë, rritja e tarifave nga Trump erdhi fillimisht me arsyetimin e barazisë në marrëdhëniet tregtare. Megjithatë, vendimi i tij shkaktoi indinjimin e shumë vendeve, përfshirë Kanadanë dhe BE-në./abcnews.al

bruksel-1280x659.jpg
G. P.21:17 | 08/03/2018

Mes Bashkimit Europian dhe Britanisë së Madhe kanë nisur “shkëndijat” e para të një konflikti tregtar. Në një kohë kur marrëdhëniet janë acaruar për shkak të Brexit, Brukseli ka kërkuar nga Londra shlyerjen e një detyrimi doganor prej 2.7 miliardë euro.

Komisioni Europian i ka dërguar një shkresë qeverisë së Mbretërisë së Bashkuar, ku i bën të ditur se i detyrohet BE-së 2.7 miliardë euro taksa, për këpucët dhe materialet tekstile të importuara nga Kina. Britania akuzohet nga Brukseli se ka bërë fare pak për të parandaluar mashtrimet doganore, edhe pse ishte paralajmëruar për problemin nga autoriteti përkatës europian në vitin 2017.

Kjo situatë mund të çojë në nisjen e një procesi ligjor që mund të përfundojë në Gjykatën Europiane të Drejtësisë, shkruan BBC në edicionin online. Hetimi i vitit 2017 sugjeronte se Britania e Madhe ishte kthyer në parajsë për importuesit që donin t’u shpëtonin taksave dhe se grupe të krimit të organizuar përdornin fatura të falsifikuara për të ulur vlerën e mallrave që vinin nga Kina, të cilat kishin si destinacion tregjet e zeza në vendet e BE-së.

Në raportin hetimor thuhej gjithashtu se pala britanike ishte paralajmëruar disa herë për këtë dukuri. Por një zëdhënës në Londër ka deklaruar se qeveria britanike nuk e njeh vlerën e pretenduar nga Komisioni Europian dhe mohon shkeljet për të cilat akuzohet.

“Ne i trajtojmë krimet doganore shumë seriozisht dhe do të vazhdojmë t’i përgjigjemi çdo kërcënimi që shfaqet”, ka thënë zëdhënësi./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono