LSI

vlcsnap-error284-1280x720.jpg
us er15:53 | 06/01/2018

Partia Socialiste mblodhi Asamblenë e saj, nga ku Kryeministri Rama ftoi edhe njëherë kryedemokratin Basha për të bashkëpunuar me qëllim hapjen e negociatave. Në këmbim, Rama premtoi se triumfin do ta ndante me opozitën. Sipas Kryeministrit, frika e opozitës nga reforma në drejtësi po kërcënon negociatat, ndërkohë që kjo frikë sipas tij, prishi edhe aleancën PS-LSI.

Në kampin e armiqve të reformës në drejtësi, përveç PD-së, Edi Rama shtoi edhe LSI-në. Për herë të parë, Kryeministri pranoi se ishte pikërisht kjo reformë që u bë shkas për prishjen e aleancës brenda të majtës.

Nga Asambleja e PS-së, Kryeministri tregoi si e lexon ai riafrimin e ish-aleatit qeveritar me demokratët.

Sipas kryesocialistit, frika e opozitës nga reforma në drejtësi po dëmton hapjen e negociatave me Brukselin. Qeveria dhe opozita kanë role të ndara në demokraci, pranoi Rama, por i rikujtoi kryedemokratit Basha se kanë edhe një detyrim të përbashkët.

Duke rikthyer vëmendjen mes socialistëve, kryebashkiakëve të PS-së që kërkojnë të rikandidojnë në 2019-ën, u bëri të qartë se nuk do të pranojë lojë me dy porta.

 

Njoftoi se së shpejti do të bëhen publikë edhe drejtorët e rinj të burgjeve të zgjedhur përmes konkursit, me focus te ushtarakët, njësoj siç bëri për Prefektët.

 

Ndryshe nga sa ishte përfolur sekretarët e PS-së nuk ndryshuan, por u shtua sekretari për Çështjet Zgjedhore, Bledi Çuçi, si dhe sekretarja për marrëdhëniet ndërkombëtare, Teuta Voda. Asambleja zgjodhi gjithashtu si anëtar të Kryesisë, Gramoz Ruçin, pas dorëheqjes së tij si sekretar i Përgjithshëm.

vlcsnap-error295-1-1280x720.jpg
us er14:00 | 23/12/2017

Këshilli bashkiak në Durrës ka miratuar me 26 vota pro buxhetin e vitit 2018, ndërkohë që për këtë numër votash është dashur edhe vota e 4 këshilltarëve të LSI-së dhe një e PR-së. Mbledhja që kishte në rendin e ditës projektbuxhetin si dhe pakëtën fiskale është bojkotuar nga këshilltarët e partisë demokratike si dhe shumica e këshilltarëve të LSI-së. Për votën pro të 4 këshilltarëve të LSI-së në këtë mbledhje ka reaguar Jeton Rexhmati, këshilltar i LSI-së dhe anëtar i komisionit të medias. Rexhamti tha se ne kemi pasur një vendim grupi për të mos marrë pjesë në mbledhje dhe nuk e kuptojmë se përse 4 këshilltarët në fjalë kanë marrë pjesë, duke paralajmëruar masë ndaj tyre. Vlera totale e buxhetit të vitit 2018 është parashikuar në rreth 4.8 miliard lekë të reja./abcnews.al

vlcsnap-error067-1280x721.jpg
us er19:10 | 14/12/2017

E enjtja parlamentare kishte në objektivin e sulmit të mazhorancës edhe një tjetër parti opozitare, Lëvizjes Socialiste për Integrim. Kreu i Komisionit të Ekonomisë, Erion Braçe, publikoi disa kontrata mes Ministrisë së Bujqësisë, kur kjo e fundit drejtohej nga Edmond Panariti dhe familjarëve të Klement Balilit, kur ky ishte shpallur në kërkim. Ndonëse socialistët e cilësuan LSI-në si partinë e Balilit, asnjë nga kjo forcë politike nuk reagoi, ndërsa mbrojtjen e morën përsipër demokratët.

Opozita nuk ishte në sallë në nisje të seancës, duke e cilësuar teatër interpelancën e thirrur nga kreu I Komisionit të Ekonomisë me ministrin e Bujqësisë. Por Erion Braçe shfrytëzoi rastin për të publikuar disa kontrata për tokë bujqësore, të lidhura në kohën kur ky dikaster drejtohej nga lësëisti Edmond Panariti, në favor të familjarëve të Klement Balilit.
Lidhja politike mes Balilit dhe LSI-së u qartësua nga kreu I grupit parlamentar Taulant Balla, pas një bisedë që zhvilloi me të Kryeministri Rama.
Kur opozita hyri në sallë, askush nga LSI nuk reagoi, ndërsa mbrojtjen e aleates opozitare, e morën përsipër demokratët.
Lidhjet mes krimit dhe politikës u prekën edhe nga Sali Berisha, i cili tregoi për një kusht të ri të ndërkombëtarëve në rrugën e integrimit europian të Shqipërisë.
Edhe Kryeministri foli me gojën e ndërkombëtarëve, ndonëse tregoi tjetër histori.
Rama ftoi edhe njëherë opozitës që të paktën për çështjen e integrimit të bëheshin bashkë në sytë e Europës./abcnews.al

 

 

 

vlcsnap-error278-1280x720.jpg
us er17:54 | 12/12/2017

Komisioni Qendror i Zgjedhjeve dënoi me 2 milionë lekë të reja gjobë PDIU-në dhe partinë Sfida për Shqipërinë pasi nuk kanë respektuar ligjin, duke mos depozituar asnjë raport pranë KQZ-së në lidhje me shpenzimet e tyre financiare gjatë fushatës elektorale. Ndërsa PS, PD, LSI, PSD dhe Aleanca Demokristiane, u gjobitën me 1 milion secila, për shkak të pasaktësive në raportin e depozituar prej tyre.

Pas një debati disaorësh, KQZ dënoi me gjobë prej dy milionë lekë të reja PDIU-në dhe Sfidën, pasi injoruan tërësisht ligjin duke mos dorëzuar raportin e shpentive të tyre financiare në fushatë. Një gjobë më të lehtë, prej 1 milionë lekësh të reja, morën PS, PD, LSI, PSD dhe Aleanca Demokristiane për shkak të pasaktësive të evidentuara në raportet e tyre.
Një prej mospërputhjeve kryesore të evidentuara nga KQZ-së kishte të bënte me kontratat e lobimit të PD-së, ndonëse administrata e këtij institucioni pranoi se në këtë rast, i referohej deklaratave publike të bëra në media, gjë që ndezi debatin në sallë.

Në p/vendimin fillestar të hartuar nga KQZ, ishte parashikuar që partive si PS, PD, dhe LSI t’u lihej 10 ditë kohë për të sqaruar pozicionin e tyre. Por kjo u cilësua nga n/kryetari Biba, si një favor i kryetarit Zguri ndaj Partisë Demokratike, për të futur brenda shinave të ligjshmërisë kontratat e lobimit në Amerikë.
Gjatë diskutimeve, N/kryetari Biba ishte ai që propozoi dënime më të ashpra për të gjitha partitë, duke filluar me nga 4 milionë gjobë për PDIU dhe Sfidën, si dhe 2 mln për partitë e tjera, ndërsa kishte edhe një shtesë rënduese për kontratat lobuese të PD-së. Propozimi i tij u rrëzua./abcnews.al

 

 

 

vlcsnap-error626-1280x720.jpg
us er16:47 | 07/12/2017

Pas tre orësh debat, Komisioni i Ligjeve ka miratuar procedurën për zëvendësimin e Prokurorit të Përgjithshëm me një prokuror të përkohshëm dhe zgjedhjen e këtij të fundit me shumicë të thjeshtë.
Opozita braktisi komisionin në momentin e votimit pas një debati të gjatë ku palët sqaruan me detaje pozicionet e kundërta.
Kryetari socialist i komisionit dhe deputetët socialistë kanë përcjellë qëndrimin e mazhorancës se mandati i Prokurorit të Përgjithshëm përfundon më 7 dhjetor, e sipas nenit tranzitor të ligjit për prokurorinë, vendimi për zëvendësimin me një prokuror të përkohshëm, në kushtet kur KLP, organi që e zgjedh, ende nuk është ngritur. Socialistët deklarojnë se zëvendësuesi i përkohshëm i Llallës do zgjidhet me shumicë të thjeshtë, bazuar edhe në memot rekomanduese të OPDAT e EURALIUS.
PD dhe LSI kanë qëndrim të kundërt. Sipas tyre, ligji më i lartë në Republikën e Shqipërisë është Kushtetuta, sipas të cilës, është KLP e jo Kuvendi ai që cakton mbarimin e mandatit të Llallës, si dhe propozon prokurorin e ri të përgjithshëm. Oerd Bylykbashi dhe antarët e PD e LSI në Komision kërkojnë referencë në Kushtetutë edhe për zgjedhjen e prokurorit, qoftë ky i përkohshëm./abcnews.al

vlcsnap-error276-1280x720.jpg
us er14:26 | 07/12/2017

Pas rreth 2 orësh e gjysëm debate në komisionin e ligjeve për zëvendësimin e prokurorit të përgjithshëm e zgjedhjen e një prokurori të përkohshëm, bazuar në dy memo propozuese të kuvendit, opozita ka braktisur mbledhjen. Sic pritej, palët janë të ndarë në qëndrimet e tyrë.

Kryetari socialist i komisionit dhe deputetët socialist kanë përcjellë qëndrimin e mazhorancës se mandati I prokurorit të përgjithshëm përfundon më 7 dhjetor e sipas nenit tranzitor të ligjit për prokurorinë, vendimi për zëvendësimin me një prokuror të përkohshëm, në kushtet kur KLP, organi që e zgjedh, ende nuk është ngritur. Socialistët deklarojnë se zëvendësuesi i përkohshëm i Llallës do zgjidhet me shumicë të thjeshtë, bazuar edhe në memot rekomanduese të OPDAT e EURALIUS.

PD dhe LSI kanë qëndrim të kundërt. Sipas tyre, ligji më i lartë në Republikën e Shqipërisë është Kushtetuta, sipas të cilës, është KLP e jo Kuvendi ai që cakton mbarimin e mandatit të Llallës, si dhe propozon prokurorin e ri të përgjithshëm. Oerd Bylykbashi dhe antarët e PD e LSI në Komision kërkojnë referencë në Kushtetutë edhe për zgjedhjen e prokurorit, qoftë ky i përkohshëm./abcnews.al

vlcsnap-error762-1280x720.jpg
us er16:04 | 20/11/2017

Taksa e pronës për biznesin nuk do të jetë 0.15% e vlerës, siç u propozua fillimisht, por 0.2%. Ndryshimi u miratua në Komisionin e Ekonomisë, ndërsa Ministri i Financave theksoi se taksa e pronës do të bëhet në bazë të vlerës së tregut.

Kjo pritet të jetë më e lartë, se çmimet-referencë, që qeveria nxjerr çdo vit.

Në votimin e ndryshimeve fiskale, mazhoranca hodhi poshtë propozimet e Lëvizjes Socialiste për Integrim, për të ruajtur pragun e xhiros pa TVSH për bizneset, në 5 milionë lekë në vit, dhe për të ulur TVSH-në për mallrat e shportës në 5%./abcnews.al

dfghgfh.jpg
us er18:09 | 08/11/2017

Për zbardhjen e Këshillit të Sigurisë të nëntorit 2016, tashmë ka një kërkesë zyrtare në tryezën e presidentit Ilir Meta. E firmosur nga opozita PD-LSI e Komisionit Parlamentar të Sigurisë Kombëtare, në të kërkohet deklasifikimi i mbledhjes së mbështetur në ligjin për informacionine klasifikuar sekret shtetëror. Më herët gjatë ditës, në selin blu Lulzim Basha priti në zyrë dhe krerët e LSI, Monika Kryemadhi dhe Petrit vasili.

Ajo që po flitet prej ditësh merr formën e një kërkesë zyrtare.
Demokratët dhe LSI i kërkuan presidentit, Ilir Meta deklasifikimin e mbledhjes së 11 nëntorit 2016 të Këshillit të Sigurisë Kombëtare, lidhur me problematikën e drogës dhe kanabisit.
“Në atë mbledhje ka pasur raportim nga Insituicionet e Sigurisë dhe Zbatimit të Ligjit në vend, mbi situatën e drogës. Është me interes publik të dimë sot të dhënat e asaj kohe dhe mbi të gjitha angazhimet e marra nga insitucionet dhe nga qeveria në atë mbledhje për luftën ndaj drogës dhe për të bërë ballafaqim me rezultatet e dhëna. Për këtë arsye, ne deputetët e opoziëts në Komisionin e Sigurisë Kombëtare, kërkojmë që të delasifikohet materaili i diskutuar në atë tryezë dhe të bëhet publike”.
Deputetët opozitarë të Komisionit të Sigurisë thonë se kërkesa e tyre vjen si ndjeshmëri për situatën e rëndë të krijuar me përfshirjen e zyrtarëve të lartë në trafikun e drogës dhe pas skandalit në media dhe hetimeve të prokurorisë së Katanias, se ish-ministri i Brendshëm, ka patur lidhje direkte me aktivitetin kriminal të bandës së Habilajve, siç thuhet në këtë shkresë, firmëtarët e së cilës e bazojnë në nenin 13 të ligjit për Informacionin e klasifikuar Sekret Shtetëror.
“Në rrethanat e sotme do t’i shërbente publikut dhe interesit kombëtar dhe komisionit të sigurisë në Kuvend qasja ndaj mbledhjessë 11 nëntorit 2016 për të kuptuar angazhimin e institucioneve në kohën kur kanabizimi i vendit ishte në kulmin e tij”.
I pari që bëri thirrje për publikimin e mbledhjes së Këshillit të Sigurisë Kombëtare ishte Bujar Nishani, në atë mbledhje president Republike. Thirrjen e ish-kreut të shtetit e mbështeti edhe ish-kryeministri, Sali Berisha ndërsa bëri thirrje që komisioni të kërkonte dhe raportin e shërbimit informativ të shtetit.
E ndërsa pritet se cili do të jetë reagimi zyrtar i presidentit Meta, ai paraprakisht gjatë një interviste të ditëve të fundit e konsideroi se kërkesën normale, por qëndrimi sipas tij, duhet të jetë mjaft i studiuar, sepse ka të bëjë me traditën e Institucionit dhe me vazhdimësinë e tij.
“Një gjë e tillë duhet të vlerësohet me shumë përgjegjshmëri dhe kujdes, pasi mund të kthehet në precedent për çdo mbledhje të Këshillit të Sigurisë Kombëtare dhe kjo më pas mund të dëmtonte seriozitetin e këtij këshilli për të ardhmen”.
ABC News e siguroi shkresën zyrtare të deputetëve të PD e LSI në komisionin e sigurisë, vetëm pak minuta pasi Monika Kryemadhi dhe Petrit Vasili shkuan në zyrën e kreut demokrat Lulzim Basha. Ky është takimi i tyre i tretë në selinë blu dhe i paraprin seancës plenare të së enjtes e cila pritet të dominohet me debatin kryesor të ditës, çështja Tahiri në kaudër të dosjes Habilaj dhe jehona e deklaratave për arrestim të të paprekshmëve, siç i quajtën italianët, apo të peshqve të mëdhenj siç i quajti ambasadori amerikan në shqip./abcnews.al

 

 

 

22894685_10212564873535774_1308764760_n.jpg
us er15:42 | 28/10/2017
Një operacion i ndërmarrë nga Policia në bashkëpunim me forcat RENEA beri te mundur arrestimin e disa personave, mes tyre edhe Samuel Ndoka, nipi i ish-deputetit të PS, Arben Ndoka. Ai akuzohet se gjatë ditës së zgjedhjeve në 25 qershor së bashku me kushërinjtë e tij plagosën Florian Dushkun, aktivist të LSI-së. Në një deklaratë për mediat, drejtori për Krimet në Policinë e Shtetit, Josif Shtëmbari, tha se 18 vjeçari Samuel Ndoka, banues në Lezhw, ishte kapur në flagrancë me armë pa leje. Ai ka qenë në kërkim pasi u dënua me arrest me burg për kanosje dhe plagosje për ngjarjen e 25 qershorit në Shëngjin.Bashkë me të, u arrestua edhe Paolo Marinaj, pasi iu kap me vetë një armë pistoletë, me 7 fishekë. Gjithashtu u arrestua edhe Altin Mikaj, pasi me automjetin tip ‘Audi’, ka transportuar dhe fshehur të dy personat e sipërcituar, duke i ndihmuar për t’ju shmangur forcave të Policisë. Ndaj tij u mor masa e arrestit në flagrancë për veprën penale “Përkrahje e autorit te krimit”.


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore.


Kontakt

Telefono