londra

CFARE-NDRYSHON-PAS-BREXIT-1280x720.jpg
G. P.16:09 | 26/11/2018

Nga turizmi, punësimi dhe qëndrimi: Ja çfarë do të ndryshojë pas daljes përfundimtare të Britanisë së Madhe nga Bashkimi Europian. Pavarësisht se shumë çështje janë sqaruar, mbeten ende disa paqartësi.

Kështu siç po shkojnë gjërat, Mbretëria e Bashkuar do të kalojë Krishtlindjet e fundit evropiane. Me 29 mars të 2019-s, sapo ora të shënojë 23:00, vendi do të jetë jashtë BE-së dhe për 3 milionë e gjysëm qytetarë evropianë në vend do të nisë një fazë e re, në të cilën mund të ndihen pak më shumë në tokë të huaj se sa janë ndjerë deri më tani. Edhe pse në praktikë nuk duhet të ndryshojë pothuajse asgjë për ta. “Do të mbrojmë të drejtat e qytetarëve evropianë që kanë ndërtuar jetën e tyre në Mbretërinë e Bashkuar, si dhe të britanikëve që jetojnë në vende të tjera në BE”, përsëriti kryeministrja Thereza May dhe kjo do të funksionojë jo vetëm për ata që kanë mbërritur para 29 marsit të 2019-s, por për të gjithë ata që e bëjnë këtë para përfundimit të periudhës së tranzicionit, e cila mund të zgjatet deri në vitin 2022. Përsa i përket së kaluarës, do të jetë e nevojshme të regjistrohen dhe të marrin një leje qëndrimi të përhershme, e cila mund të merret pas pesë vitesh taksa.

Por çfarë do të ndryshojë për qytetarët evropianë që duan të transferohen për të studiuar apo punuar në Britaninë e Madhe pas periudhës së tranzicionit? Sa i përket këtyre pikave nuk ka akoma qartësi. Edhe tema të shumta në tavolinë, nga shkola deri tek puna sa për të përmendur vetëm dy, do të jenë object i negociatave të tjera me Evropën. Sigurisht më e vështira do të jetë gjetja e punës: lejet, në fakt, do të lëshohen në bazë të nevojës së tregut anglez pa korsi preferenciale (siç ka ndodhur deri tani” për evropianët. Ka mundësi të vendosen edhe masa shtrënguese për sa i përket qëndrimit, përveç hipotezës së rritjes së taksave universitare (që aktualisht për shtetasit evropianë është mijëra euro më pak krahasuar me ata jo evropianë).

Por ka akoma më shumë. Teksti me 585 faqe për tërheqjen nga BE, ligjërisht i detyrueshëm, përfshin edhe detajet për shumën prej 42 miliardë euro që Britania duhet t’I paguajë Brukselit për të mbuluar buxhetin deri në vitin 2020 dhe për të nderuar shpenzimet për pensionet e funksionarët britanikë në BE, dhe zgjidhjen për shmangien e kufirit mes Irlandës dhe Irlandës së Veriut në pritje të negociatave për një marrëveshje të tregtisë së lirës mes Unionit dhe Londrës. Në deklaratën politike, tekst më i shkurtër dhe jo ligjërisht i detyrueshëm, flitet për të ardhmen e raporteve mes Britanisë së Madhe dhe bllokut evropian, duke theksuar se ato do të kenë “tregje të veçanta dhe sisteme të ndryshme ligjore” pas Brexit dhe se qasja britanike në tregjet evropiane do të varet nga përputhshmëria me standardet e konkurrencës, taksave, mjedisit, mbrojtjes sociale dhe punësimit.

Për shërbimet financiare, për të cilat deklarata i kushton vetëm tre paragrafë, të dyja palët do të kenë “një sistem të ekuivalencës” për të pranuar regjimin rregullator të njëri-tjetrit dhe se kjo duhet të jetë gati sa më shpejt të jetë e mundur, para Qershorit të 2020, për të zëvendësuar sistemin e “pasaportave” që aktualisht lejon një institucion të veprojë në të gjithë BE-në./abcnews.al

SPANJA-KUNDER-BREXIT.mpg_snapshot_00.00-1280x720.jpg
G. P.22:11 | 20/11/2018

Spanja kërcënon me bllokimin e marrëveshjes për BREXIT mes Britanisë dhe Bashkimit Evropian nëse nuk sqarohet çështja e Gjibraltarit. Madridi akoma vijon pretendimet territoriale mbi Gjibraltarin dhe kërkon të lëjë të hapur mundësinë e bisedimeve me Londrën.

Kryeministri Pedro Sánchez ka thënë se Spanja do të refuzojë marrëveshjen Brexit pa një sqarim të tekstit mbi bisedimet e ardhshme mbi statusin e Gjibraltarit. Spanja mban një pretendim për gadishullin, që i është dhënë kurorës britanike nën Traktatin e Utrehtit në vitin 1713. Ajo dëshiron të sigurojë që bisedimet e ardhshme të BE me Britaninë e Madhe nuk mbulojnë Gjibraltarin. “Nëse gjërat qëndrojnë siç janë sot dhe nuk ka ndryshime në lidhje me Gjibraltarin, Spanja do të votojë kundër për Brexit”, tha Sánchez.

Përmes negociatave për Brexit, Spanja – bashkë me Irlandën dhe Qipron – zhvilluan bisedime të ndara me Mbretërinë e Bashkuar lidhur me çështjen e kufirit. “Si shtet ne nuk mund të pretendojmë se çfarëdo që t ëndodhë në të ardhmen me Gjibraltarin do të negociohet nga Londra dhe Brukseli – por duhet të negociohet nga Spanja dhe Mbretëria e Bashkuar”, tha Sanchez.

Ndërkohë, zyra e kryeministres britanike Theresa May thotë se draft marrëveshja mbulon edhe çështjen e Gjibraltarit, e njohur si “territor tjetër jashtë shtetit dhe varësisë së kurorës”. “Ne do kemi marrëveshjen që do të funksionojë për të gjithë familjen e Mbretërisë së Bashkuar”, thotë zëdhënësi i qeverisë së Londrës. Pavarësisht se Spanja ka dorëzuar gadishullin me traktatin e vitit 1713, është përpjekur disa herë të marrë kontrollin mbi të. Një referendum i zhvilluar në 1967 tregoi se 99.6% e qytetarëve dëshironin të qëndronin britanikë. Gjithashtu në vitin 2002, një propozim për sovranitet të përbashkët është refuzuar nga qytetarët e Gjibraltarit./abcnews.al

brexiti.jpg
G. P.17:30 | 17/11/2018

Kryeministrja britanike Tereza Mej duket më se e bindur në rrugën e saj për të nxjerrë Britaninë e Madhe nga Bashkimi Europian. Dhe pse tashmë ka një pjesë të mirë të partisë së saj kundër, Mej ka theksuar se nuk do të ketë një referendum të dytë dhe se marrëveshja e arritur me Brukselin është në interes të vendit. Përveç një periudhe të gjatë tranzicioni gjatë së cilës do të vazhdojnë negociatat, ka dhe një marrëveshje për Irlandën e Veriut. E kjo e fundit mund të shkatërrojë çdo gjë.

Pas një viti e gjysmë negociatash, qeveria e Mbretërisë së Bashkuar dhe negociatorët e Bashkimit Europian kanë arritur një marrëveshje për Brexit. Për Bashkimin Europian është një fitore, sipas pjesës më të madhe të analistëve, ndërsa qeveria britanike, e cila në këto negociata ka pasur gjithnjë një pozicion të brishtë, meqenëse nuk mund të vendoste kushte u detyrua të heqë dorë nga shumë nga pikat që i konsideronte thelbësore. Politiko.eu shkruan se në mes të mjegullës politike është një marrëveshje e gjatë 585 faqe që mbron interesat ekonomike të Bashkimit Europian dhe i afrohet objektivave të tij politikë afatgjatë, duke lënë njëkohësisht Mbretërinë e Bashkuar të bllokuar në vijat e saj të kuqe.

Marrëveshja nuk është ende përfundimtare dhe për momentin është miratuar vetëm nga qeveria britanike. Për ta bërë zyrtare duhet dhe miratimi i 27 krerëve të shtetit dhe qeverive të vendeve anëtare, votimi në Parlamentin Europian dhe mbi të gjitha në atë britanik. Ky i fundit do të jetë dhe hapi më i vështirë, meqënëse poltikanët britanikë që kërkojnë një dalje pa kompromis, sidomos ata të Partisë Konservatore, kanë thënë tashmë se janë kundër një marrëveshjeje që jep shumë. Sipas mediave një e treta e ministrave britanikë kanë votuar kundër marrëveshjes, ndërsa brenda dy ditësh dy ministra, një nënsekretare dhe një figurë tjetër e rëndësishme politike dhanë dorëheqjen në formë proteste, kundër marrëveshjes.

Pika kryesore e marrëveshjes është vendimi për të vazhduar negociatat përtej momentit zyrtar të daljes së Mbretërisë së Bashkuar nga Bashkimi Europian. Gjë që do të ndodhë në 29 Mars të 2019-s. Gjatë kësaj periudhe tranzicioni në Mbretërinë e Bashkuar do të vijojnë të jenë në fuqi të gjitha rregullat europiane, edhe pse vendi nuk do të ketë më asnjë të drejtë për të modifikuar diçka. Kjo pasi nuk do të ketë më përfaqësues britanikë në institucionet europiane dhe vendi nuk do të jetë pjesë e BE-së.

Periudha e tranzicionit do të zgjasë deri në Dhjetor të 2020-s, një periudhë gjatë së cilës negociatorët do të vazhdojnë bisedimet e tyre për të zgjidhur çështjet e shumta që mbesin pezull, e sidomos ato në fushën tregtare. Nëse deri në Korrik të 2020-ës nuk do të jetë arritur një marrëveshje, afati mund të shtyhet edhe më shumë. Për momentin kohëzgjatja mund të jetë e përhershme pasi dhe në dokument është shkruar se afati përfundimtar është në 20XX, pra mund të jetë dhe deri në 2099. Por ndërmjetësuesit britanikë kanë premtuar se në versionin përfundimtar të marrëveshjes afati i fundit do të jetë deri në muajt e parë të vitit 2021.

Industrialistët britanikë janë të kënaqur me këtë marrëveshje, pasi do i japë atyre më shumë kohë për t’u përshtatur me situatën e re. Por marrëveshja u pëlqen shumë më pak autorëve më të ashpër të Brexit, sipas të cilëve kjo periudhë e gjatë tranzicioni është një një lloj poshtërimi që Bashkimi Europian i bën Britanisë së Madhe.

Por argumenti më kontrovers i gjithë marrëveshjes është ai që kërcënon dhe miratimin e saj: “backstop” – barrierë. Thënë ndryshe mekanizimi i emergjencës që duhet të aplikohet ndaj Irlandës së Veriut në rast se, në fund të periudhës së tranzicionit nuk do të gjendet një marrëveshje përfundimtare. Pika qendrore që bën të domosdoshëm ekzistencën e kësaj barriere, është fakti se askush nuk dëshiron krijimin e një kufiri  të ashpër, me kontrolle doganore mbi personat dhe mallrat, mes Irlandës së veriut dhe Republikës së Irlandës.

Është një problem ekonomik, të dy anët e këtij kufiri janë thellësit të integruar me një fluks të madh mallrash dhe njerëzish, por dhe politik. Irlanda e Veriut ka përjetuar një luftë të përgjakshme civile mes grupeve katolike që donin bashkimin me Republikën e Irlandës dhe grupeve të protestantëve që mbështesnin qëndrimin në Mbretërinë e Bashkuar. Një nga arsyet për të cilat u arrit paqja ishte pikërisht krijimi i një integrimi të fortë mes dy anëve të kufirit, një integrim që mund të zhduket nëse do të aplikohen rregulla të forta doganore.

Për të shmangur këtë situatë, negociatorët europianë këmbëngulën që të kenë në marrëveshje një mekanizëm barriere, që jep një zgjidhje urgjente në rast se marrëveshja nuk do të arrihej. Negociatat për natyrën e kësaj barriere janë ato që muajt e fundit mbajtën pezull dhe përpilimin e marrëveshjes mes Londrës dhe Brukselit. Por sot zgjidhja e gjetur ka lënë të pakënaqur shumë persona dhe kërcënon të hedhë në erë të gjithë marrëveshjen. Pasi ajo aktualja parashikon që në mungesë të një marrëveshjeje do të vendoset një union doganor mes Mbretërisë së Bashkuar dhe Bashkimit Europian. Kjo nënkupton që mes dy zonave nuk do të ketë tarifa, taksa apo pagesa ekstra.

Marrëveshja nuk mund të hyjë në fuqi nëse të dyja palët nuk bien dakord. Në këtë mënyrë, nga një anë lëvizja e mallrave do të jetë më e lehtë, nga ana tjetër Mbretëria e Bashkuar do të jetë e varur nga zona doganore europiane. Dhe pasoja e kësaj do të jetë kufizimi i pushtetit të qeverive britanike për të negociuar marrëveshje tregtare me vendet e treta joanëtare të Bashkimit Europian. Për shembull nëse Bashkimi europian aplikon tarifa ndaj një vendi të caktuar, Mbretëria e Bashkuar nuk mund të bëjë një marrëveshje që anulon këto tarifa. Kjo pasi duhet të respektojë rregullat e unionit doganor ku bën pjesë. Pikërisht kjo nuk u pëlqen aspak mbështetësve të ashpër të Brexit, të cilët kërcënojnë se do të rrëzojnë qeverinë dhe se do të votojnë kundër marrëveshjes në parlament.

Por ka një tjetër aspekt të kësaj barriere që rrezikon të bëjë situatën dhe më të komplikuar. Negociatorët britanikë kanë fituar marrëveshjen për zonën doganore të veçantë, të cilën europianët e kundërshtonin. Por në shkëmbim kanë pranuar kushte shumë të ashpra. Një nga kushtet është që Londra mund të tërhiqet nga kjo barrierë vetëm nëse bien dakord të dyja palët. Ndërsa kushti i dytë përbëhet nga një seri regullash specifike që do të aplikohen vetëm në Irlandën e Veriut. Në thelb, Irlanda e Veritu do të jetë edhe më e integruar në tregun e përbashkët europian, në krahasim me pjesën tjetër të vendit. Në fakt nuk do të ketë kontrolle doganore mes Irlandës së Veriut dhe Republikës së Irlandës, e cila është pjesë e Bashkimit Europian. Por do të ketë kontrolle mes Irlandës së Veriut dhe pjesës tjetër të Mbretërisë së Bahskuar. Pra, është njësoj sikur kjo barrierë të vendoste që, në rast se nuk do të ketë marrëveshke,për disa mallra kufiri do të spostohet nga kufiri tokësor mes Irlandës së Veriut dhe Republikës së Irlandës, në atë detar që ndan dy ishujt.

Ideja që Irlanda e Veriut të ketë një trajtim ndryshe nga pjesa tjetër e vendit ishte refuzuar më parë dhe nga partia nacionaliste e Irlandës së Veriut, e cila mbështet integrimin me Mbretërinë e Bashkuar. Një parti e vogël, por që për momentin i garanton mazhorancën qeverisë konservatore të Mej. Liderët e kësaj partie kanë kritikuar ashpër marrëveshjen por nuk është e qartë nëse do të votojnë kundër saj apo kundër qeverisë së kryeministres Mej. Por në secilën rrethanë, rezultati më i mundshëm do të ishte fundi i marrëveshjes aktuale dhe hapja e një skenari të paparashikueshëm.

Që marrëveshja të hyjë në fuqi janë tre hapat: marrëveshja duhet të ratifikohet nga vendet anëtare të Bashkimit Europian dhe kjo mund të ndodhë në 25 Nëntor gjatë samitit të jashtëzakonshëm europian. Marrëveshja do të konfirmohet dhe nga Parlamenti Europian, e më pas nga ai britanik. Votimi mund të ndodhë brenda muajit Dhjetor, por nuk është konfirmuar ende. Qeveria e Mejit mund të rrëzohet, duke ndryshuar totalisht situatën. Por mediat britanike lënë në lojë dhe mundësinë e një referendum të dytë për marrëveshjen e arritur.

Por marrëveshja e arritur e konfirmuar nga Brukseli dhe Londra, shkaktoi një tërmet të vërtetë në qeverinë konservatore të Tereza Mej dhe në skenën politike britanike. Dorëheqje, mocione votëbesimi, polemika, ankth, trazira në tregje si dhe rënien në pikiatë të stërlinës. Por ajo, kryeministrja, gruaja e dytë në Dauning Strit pas Margaret Theçer, vazhdon me këmbëngulje rrugën e saj.

“Linja ime është ajo e duhura. E ndjej në cdo qelizë të qënies sime, dhe për këtë arsye do të vazhdoj punën”, theksoi Mej.

Dita nisi me një seri dorëheqjes dhe më pas miratimin jo unanim të marrëveshjes nga ministrat e mbetur të ekzekutivit, pas një mbledhjeje të zgjatur më shumë se pesë orë.

Ata që u larguan në shenjë proteste, përveç dy nënsekretarëve dhe disa zyrtarë të tjerë, janë dhe dy ministra mbështetës të fortë të Breksit. Ester Mekvei, ministre e Punës dhe Pensioneve dhe Dominik Rab, njeriu i cili në këtë marrëveshje duhej të kishte vendosur firmën e tij si ministër për Breksit. Por dhe ai ndoqi rrugën e paraardhësit të tij Devid Devis, duke u larguar. Mekvei e konsideroi një tradhti të referendumit të 2016-s. Ndërsa Rab shpjegon se nuk mund të mbështesë me ndërgjegje një marrëveshje që rrezikon integritetin territorial të veneit. Kjo për shkak të mekanizmit të barrierës për një kohë të pacaktuar, në mbrojtje të një kufiri pa barrierë mes Irlandës së Veriut dhe Republikës së Irlandës.

Fjalë të rënda që duket se shenjojnë fatin e qeverisë, ndërsa stërlina shënon rënie  të lirë. Por asgjë nuk duket të zbusë kryeministren Mej e cila ka falenderuar personat e larguar, të cilët kanë çuar në 20 numrin e dorëheqjeve në këto dy vitet e fundit. Kryeministrja mbërriti në parlament për të mbrojtur marrëveshjen, në të njëjtin moment që u dorëzua dhe një mocion për votëbesimin e saj. Janë 48 firmat që do ta bënin të mundur, nga 318 deputetë të parlamentit.

Por Mej shprehet e gatshme për t’u përballur me këdo dhe me gjithçka. Mesazhi që dha fillimisht në parlament dhe më pas në një konferencë për shtyp, ishte i qartë: ajo nuk ka ndërmend të japë dorëheqjen. Por dhe Bruksel nuk janë shumë të bindur, me Donald Tusk, i cili vijon të përsërisë se mund të mos ketë marrëveshje dhe as Breksit. Hipoteza që kryeministrja britanike vazhdon t’i mohojë kategorikisht. Mej i thotë “jo” çdo ideje për një referendum të dytë para deputetëve eurofilë më të bindur: duke mbrojtur marrëveshjen e arritur si më të mirën përballë akuzës së liderit laburist Xheremi Korbin, i cili e konsideron si një dështim të madh. Por Mej është përballur dhe me anëtarë të partisë së saj të cilët e akuzojnë se ka sjellë në shtëpi një marrëveshje jo të kënaqshme.

Janë të shumtë ata që mbeten skeptikë, në një moment që në parlamentin britanik nuk ka një mazhorancë të qartë. Por kryeministrja është e vendosur duke konfirmuar se sfida e saj e radhës është ratifikimi i kësaj marrëveshjeje në parlament, ndoshta para krishtlindjeve, kur të gjitha letrat në tryezë të jenë të hapura. Sipas saj, lidershipi është të bësh gjërat e duhura në interesin kombëtar, e jo gjërat e lehta. “Unë kam bërë punën time, pres që parlamenti  të bëjë punën e tij,” theksoi ajo.

Por çfarë ndodh nëse nuk arrihet një marrëveshje, dhe pse Britania e Madhe rrezikon të dalë nga Bashkimi Europian pa një të tillë?

Londra fuqizoi në 29 Mars të 2017-s artikullin 50 të traktateve europiane, atë që vendos daljen e një vendi nga Bashkimi Europian. Në bazë të traktateve, dy vjet pas këtij momenti, një vend është automatikisht jashtë Bashkimit Europian, me apo pa marrëveshje. Kjo është arsyeja pse në 29 Mars të 2019-s Britania e Madhe do të jetë gjithsesi jashtë Bashkimit Europian. Nëse Britania e Madhe mbërrin në 29 Mars pa një marrëveshje me Brukselin, të miratuar nga të gjitha palët, do të bëhet një vend i tretë dhe do të përballet me Bashkimin Europian sipas rregullave të Organizatës Botërore të Tregtisë.

Cilat do të jenë pasojat? Të gjithë mallrat që hyjnë dhe dalin nga portet britanike, do u nënshtroheshin inspektimeve doganore. Aktualisht një kamion që mbërrin në Dover, shpenzon dy minuta për të kaluar; kontrolli i çdo ngarkese do të çonte në kolaps doganat madje as porti i Kales nuk do të ishte në gjendje të përballej me situatën. Shumë mallra do të mbeteshin të bllokuara në kufij.

Një problem tjetër do të lindte mes Irlandës së Veriut dhe Ulster, pasi ai do të bëhej kufiri i vetëm fizik mes Mbretërisë së Bashkuar dhe Bashkimit Europian. Aktualisht 30 mijë persona në ditë kalojnë nga ai kufi, që në fakt është i hapur. Rikthimi në një pikë kufitare të ashpër do të kishte pasoja, si dhe do të ndizte tensione politike. Jo rastësisht Europa këmbëngul në faktin se Brexit nuk duhet të përfshijë dhe rivendosjen e një barriere fizike në Irlandë, në mënyrë që të ruajë marrëveshjet për paqe të arritura 20 vjet më parë.

Dalja pa një marrëveshje do të nënkuptonte më pak të drejta për 3 milion europianë që jetojnë në Britaninë e Madhe. Londra premtoi se do të mbrojë të drejtat e tyre, por statusi i tyre do të ishte i paqartë. Europianët do të humbisnin të drejtën e rezidencës së përhershme dhe nuk do të kenë më akses automatik në sistemin shëndetësor britanik. Në kufij do të ketë radhë të gjata për kontrollet e madje mund të rihyjë në fuqi sistemi i vizave. Mund të hyjnë sërish në fuqi tarifat e roaming, që në Bashkimin Europian janë hequr, për telefonatat. Por qeveria britanike disa herë ka këmbëngulur se nuk do të deportohet askush që aktualisht është resident në Britaninë e Madhe.

Në Mbretërinë e Bashkuar pritet dhe një rritje e ndjeshme e çmimeve, edhe për shkak të zhvlerësimit prej 15 përqind të monedhës vendase, stërlinë. Tarifat për qumështin dhe djathin mund të shkojnë deri në 45 për qind, cmimi i mishit mund të rritet me 37 për qind, por dhe ato të veshjeve, këpucëve, pijeve dhe duhanit me 10 për qind. Britanisë së Madhe një gjë e tillë mund t’i kushtojë humbjen e 800 mijë vendeve të punës.

Por pas Marsit 2019, fluturimet mes Britanisë së Madhe dhe Europës mund të pezullohen në rast se nuk do të ketë marrëveshje. Trafiku ajror monitorohet nga Agjencia Europiane për Sigurinë Ajrore, por nuk ka rregulla të njëjta në bazën e Organizatës Botërore  të Tregtisë, të cilës do i binte dhe kjo përgjegëjsi në rast të një marrëveshjeje të munguar. Aktualisht flitet për marrëveshje emergjente të përkohshme, por nëse ky boshllëk juridik nuk mbushet në kohë, atëherë fluturimet mund të pezullohen. Shumë shpejt kompanitë ajrore mund të mos garantojnë më prenotime për pas muajit Mars të 2019-s.

Sipas mediave britanike ka shumë pak mundësi që marrëveshja aktuale të miratohet në parlamentin e vendit. Partia laburiste, skocezët e SNP-së, partia DUP e Irlandës së veriut, dhe më shumë se 50 deputetë konservatorë kanë bërë të qartë se do të votojnë kundër. Kryeministres britanike Mej i mungojnë rreth 100 vota. Nëse çdo gjë shkon sipas parashikimeve do të votohet në ditët e para të Dhjetorit. Pra kryeministrja ka pak javë kohë për të mbledhur votat që i duhen. Dhe nëse nuk do ia dilte, ka dy mundësi: të modifikojë marrëveshjen, ose ta tërheqë për të shmangur humbjen në parlament. Por në çdo rast Mej do të detyrohej të rihapte negociatat me Europën.

Por në rast se parlamenti britanik nuk e miraton marrëveshjen aktuale, pasojat janë të vështira për t’u parashikuar. Por mundësia më e madhe është se Mej do të jepte dorëheqjen. Pasardhësi i saj mund të përpiqet të negociojë një marrëveshje të re me Bashkimin Europian, duke shpresuar të bëjë më mirë dhe më pas ta miratojë në parlamentin e vendit. Por gjithsesi negociatat duhet të përfundojnë para 29 Marsit, datë zyrtare pas së cilës Mbretëria e Bashkuar do  të jetë zyrtarisht jashtë Bashkimit Europian. Nëse brenda kësaj date nuk do të ketë një marrëveshje që parashikon një periudhë tranzicioni, Mbretëria e Bashkuar do të përjetojë një Breksit të ashpër, pra një Mbretëri të Bashkuar të çoroditur, që mund t’i shkaktojë dëme të pallogaritshme vendit./abcnews.al

brexit.jpg
G. P.13:10 | 01/11/2018

Brukseli dhe Londra kanë arritur një marreveshje të rëndësishme sa i përket Breksit. Negociatorët kanë rënë dakord për një pakt financiar që i lejon Mbretërisë së Bashkuar të ketë qasje në tregun evropian edhe pas shkëputjes nga BE.

Britania dhe Bashkimi Evropian kanë arritur një marrëveshje mbi shërbimet financiare për të ruajtur qasjen britanike në tregun evropian pas Brexit. Kjo raportohet nga media “Times”.

“Negociatorët britanikë dhe evropianë kanë arritur në parim një marrëveshje mbi të gjitha aspektet e një partneriteti të ardhshëm në shërbime, si dhe shkëmbimin e të dhënave”, raporton gazeta britanike duke cituar burime qeveritare.

Sipas kësaj marrëveshje, “BE do t’u jepte kompanive britanike akses në tregjet evropiane për aq kohë sa rregullimi financiar i Mbretërisë së Bashkuar do të mbetet kryesisht i përafruar me atë evropian”.

Që nga fillimi i negociatave të Brexit, të nisur në Qershor 2017, shërbimet financiare kanë qenë një çështje vendimtare në negociata.

Londra kërkon një marrëveshje që lejon kompanitë e financave në Mbretërinë e Bashkuar të vazhdojnë të veprojnë në Evropë, veçanërisht për të mbrojtur qendrën financiare të qytetit. Brukseli ka kohë që ka refuzuar këtë opsion, të etur për të ruajtur “pandashmërinë” e lirive të tregut të vetëm, të cilat përfshijnë lëvizjen e lirë të shërbimeve dhe kapitalit si ai i njerëzve, të cilit qeveria britanike dëshiron t’i japë fund.

Ndërkohë, Mbretëria e Bashkuar do të largohet zyrtarisht nga Unioni në fund të Marsit të 2019-s. Megjithatë ende nuk është e qartë nëse kjo do të bëhet me marrëveshje finale apo jo./abcnews.al

BABALE-1280x720.jpg
ent ela17:36 | 27/09/2018

Mbërrin në Shqipëri akt-ekspertiza e kryer në Angli mbi audio-përgjimin mes Albert Veliut, të njohur si “Babalja” dhe një personi tjetër që pretendohet të jetë vëllai i ministrit të Brendshëm.

Burime jozyrtare konfirmuan se përgjigja e laboratorit britanik është përcjellë përmes letërporosive në Ministrinë e Drejtësisë e më tej në Prokuroriën e Përgjithshme. Sipas burimeve, ekspertët kanë shfaqur rezerva në lidhje me origjinalitetin e materialit të dërguar për ekspertim.

Pasi të përkthehet në Prokurorinë e Përgjithshme, përgjigja do t’i përcillet Krimeve të Rënda. Hetimi për “Babalen” nisi pas publikimit nga Partia Demokratike të një audio-përgjimi, që sipas Albert Veliut është zhvilluar në një lokal në qytetin e Vlorës, ku ai ka diskutuar me Geron Xhafën, vëllain e ministrit Fatmir Xhafa, për transportimin e një sasie droge jashtë vendit. /abcnews.al

BREXIT-TUSK-ABC-M5-T2.mpg_snapshot_00.02.jpg
ent ela08:35 | 21/09/2018

Brukseli ka refuzuar kushtet e Londrës për shkëputjen e Britanisë së Madhe nga Bashkimi Europian. Në përfundim të samitit të Salzburgut, kreu i Këshillit Europian Donald Tusk ka deklaruar se propozimi i fundit i kryeministres Thereza Mej nuk do të funksionojë në praktikë.

Presidenti i Këshillit Europian, Donald Tusk ka deklaruar se plani i kryeministres britanike për partneritetin me BE pas BREXIT nuk do të funksionojë. Në përfundim të samitit të Salzburgut, ku liderët e 27 vendeve anëtare diskutuan pikërisht daljen e Mbretërisë së Bashkuar, Tusk ka nënvizuar se plani i May rrezikon të dëmtojë tregun e përbashkët europian. Propozimi i kryeministres britanike parashikon që Londra të nënshkruajë me Brukselin një paketë të përbashkët rregullash për tregtinë e mallrave dhe një territor doganor dypalësh.

Për May, propozimet në fjalë janë e vetmja mënyrë e sigurtë për të shmangur një përplasje kufitare me Irlandën e Veriut. Por në konferencën e shtypit, Tusk ka thënë se një skemë e tillë, pavarësisht se ka disa elementë pozitivë në lidhje me marrëdhëniet e ardhshme të Mbretërisë me Unionin, në praktikë nuk do të funksionojë. Tusk ka vijuar se tetori do të jetë momenti i së vërtetës sa i takon marrëveshjes dhe ka shtuar se, në rast se do të ekzistojnë kushtet e duhura në nëntor do të mbahet një tjetër samit për formalizimin e saj. Në reagimin e saj, kancelarja Angela Merkel ka deklaruar se deri atëherë do të duhet shumë punë për të tejkaluar ndasitë.

Ndërsa presidenci francez, Emmanuel Macron ka thënë se, Brexit u propozua nga njerëz që kishin parashikuar një proces të thjeshtë. Mbretëria e Bashkuar pritet të braktisë zyrtarisht BE-në më 29 mars të vitit të ardhshëm, por kleçka që i pengon në arritjen e ujdisë është shmangia e kontrolleve në kufirin e Irlandës së Veriut./abcnews.al

vlcsnap-2018-09-16-15h19m54s493-1280x799.png
G. P.21:22 | 16/09/2018

Kryebashkiaku i Londrës kërkon zhvillimin e një referendumi të dytë lidhur me largimin e vendit nga Bashkimi Evropian. Sadiq Khan thotë se qeveria Britanike nuk është e përgatitur për situatën që mund të hasë vendi nëse arrin ose jo një marrëveshje me Brukselin për Breksit.

Kryebashkiaku i Londrës, Sadiq Khan, ka lëshuar një apel të përzemërt për një referendum të ri për “Brexit” që të përpiqet të përmbysë rezultatin e konsultimit të qershorit të vitit 2016. Qeveria konservatore e Theresa May nuk ka “mandat për të rrezikuar aq keq me ekonominë britanike dhe jetën e njerëzve”, tha eksponenti 47-vjeçar i Laburistëve i origjinës pakistaneze në një artikull i gazetës britanike “Observer”.

Ai tha se “koha po kalon me shpejtësi”, ndërsa qeveria e kryeministres Theresa May duket “e papërgatitur dhe e pakënaqur me situatën”. Dështimi për të arritur marrëveshje me Brukselin, qoftë dhe një marrëveshje e keqe, mund të rezultojë në humbjen e 500,000 vendeve të punës, me pasojë çrregullime civile, paralajmëroi Khan. Sipas tij, tashmë ka shumë pak kohë për të negociuar me Brukselin dhe mund të arrihen vetëm dy rezultate, një marrëveshje e keqe për Mbretërinë e Bashkuar ose asnjë marrëveshje, dy perspektiva shumë të rrezikshme.

Qytetari i parë i kryeqytetit të Mbretërisë së Bashkuar ka nënvizuar se mashtrimi nga fronti pro Largimit nga Unioni është tregues i qartë se qytetarët “nuk votuan për t’u larguar nga BE dhe të bëheshin më të varfër”. Prandaj ai propozon organizimin e një “vote publike” për çdo marrëveshje me BE-në apo mosmarrëveshjen, duke ofruar si alternativë “mundësinë për të qëndruar në BE”./abcnews.al

44605564_401.jpg
G. P.08:16 | 11/07/2018

I zhvilluar në mes të krizës qeveritare britanike, takimi i nivelit të lartë të Ballkanit Perëndimor në Londër dha pak impulse për procesin e bashkëpunimit rajonal dhe perspektivën për t’u pranuar në Bashkimin Evropian.

Takimi ishte grotesk. Në hapjen e samitit për Ballkanin Perëndimor në lindje të Londrës mungonte ai që priste miqtë. Boris Johnson nuk arriti të vinte. Ministri i Jashtëm britanik ishte disa kilometra më tutje i zënë me shkrimin e dorëheqjes së tij. Dorëheqja e Johnsonit e vendosi në hije takimin aq të rëndësishëm për rajonin e Ballkanit Perëndimor dhe nxorri në plan të parë Brexitin. Në vend të freskisë së pranimeve të reja në BE, takimi u sundua nga ajri i prishur i daljes nga BE. Si mund t’i prezantojë në mënyrë të besueshme një vend virtytet e Klubit evropian, prej të cilit ai vetë është duke u larguar?

Londra rrit ndihmat financiare

Britania e Madhe po largohet nga BE, por nuk do të shkëputet nga përgjegjësia që ka për Ballkanin, u mundua të thoshte kryeministrja britanike Theresa May. Ky pohim u shoqërua me premtime financiare: Mbas Brexitit Londra do të rrisë ndihmat financiare për vitet 2020 /2021 me 95 përqind duke dhënë 80 milionë pfund“.

Grobritannien London Pressekonferenz von Theresa May und Angela Merkel (Getty Images/S. Rousseau)

Me këto do të përkrahen projektet në rajon. Ka shumë punë për të bërë- administrata publike dhe drejtësia duhen reformuar, projektet ekonomike duhen vënë në vijë. Theresa May: „Në afat të gjatë mirëqënia është garancia më e mirë për sigurinë “. Me këtë fjali ajo kaloi në temën që i intereson më shumë.
Mbasi foli në takimet e mëparshme kryesisht për bashkëpunimin rajonal, këmbimin mes të rinjve dhe konektivitetin, Britania e Madhe e vendosi çështjen e sigurisë në qendër të bashkëpunimit: Në të ardhmen Bashkimi Evropian do të punojë ngushtë në këtë fushë me gjashtë vendet e perëndimit të Ballkanit. Synimi është pengimi i migracionit ilegal, radikalizimit dhe tregëtisë së armëve.

Siguria – emëruesi i vetëm i përbashkët

Ison e mori kancelarja gjermane, Angela Merkel duke thënë se “Siguria e Ballkanit Perëndimor është në interes të Gjermanisë dhe BE-së”. Tema e sigurisë është me sa duket emëruesi i vetëm i përbashkët, për gjithë pjesëmarrësit në të ashtuquajturin Procesi i Berlinit. Ballkani perëndimor duhet të ndihmojë në sigurimin e kufijve të BE-së në kuadër të Frontex-it, po ashtu si në luftën kundër terrorizmit dhe kriminalitetit të organizuar me ndihmën e Europolit.
Në kohërat kur diskutimet në BE sundohen prej frikërave për migracionin dhe humbjen e kontrollit,  afrimi i Ballkanit me BE mund të prezantohet tek populli votues, i lodhur prej zgjerimit, më së miri nëpërmjet kësaj teme.

Por jo vetëm brenda për brenda. Edhe tek vetë vendet që duan të pranohen, BE mbetet në akt balancimi. Shtetet e Ballkanit Perëndimor duhen mbajtur në vazhdë megjithëse është e qartë për të gjithë, se pranimi konkret në BE kërkon shumë sforcime. BE duhet ta forcojë ndikimin e vet në rajon me projekte të dukshme dhe konkrete. Sepse lojtarë të tjerë globalë ndodhen tek dera: Rusia, Kina, madje Turqia e kanë rritur prezencën e tyre në mënyrë të ndjeshme.

Prandaj kohët e fundit BE rriti presionin për zgjidhjen e konflikteve të vjetra: Marrëveshja midis Maqedonisë dhe Greqisë me të cilën u zgjidh grindja dhjetravjeçare për emrin, u arrit me ndërmjetësimin e BE dhe duhet të shërbejë si model për gjithë konfliktet bilaterale.

Großbritannien EU-Westbalkangipfel in London (picture-alliance/empics/L. Neal)

„Ne nxorrëm mësime nga shembulli i Kroacisë. Në të ardhmen asnjë vend nuk do të hyjë në BE, pa zgjidhur më parë problemet bilaterale“, tha Komisari për Zgjerimin Johannes Hahn, një një intervistë për DW. Që në mes të 2019 do të fillojnë bisedimet me Maqedoninë dhe Shqipërinë. Serbia dhe Mali i Zi janë duke i bërë bisedimet me zell dhe janë vendet më premtuese për pranim në BE, megjithë konfliktin e pazgjidhur me Kosovën.

Polonia vend mikpritës në 2019-n

Por lajmet e mira në procesin e pranimit shuhen rrugës për tek publiku i BE-së për shkak të frikërave për rreziqet e mundshme që vijnë nga vendet e Ballkanit. Një aspekt i rëndësishëm këtu është largimi i vazhdueshëm nga vendi, sidomos  të rinjve. Perspektiva të këqija ekonomike, pak besim tek politika janë shkaqet më të rëndësishme pse rinia largohet nga vendi i vet. „Rinia nuk është e bindur ende se ka të ardhme në vendin e vet, prandaj ne duhet të bëjmë të pamundurën në mënyrë që ata që kanë ikur të kthehen atje dhe të gjejnë vendin e tyre, dhe të qëndrojnë aty, sepse kanë të ardhme”, tha kancelarja Merkel në konferencën e shtypit të mbajtur në fundit të samitit.

Një postulat i bukur! Por çfarë u diskutua në këtë takim për këtë gjë dhe çfarë vendimesh u morrën, mbetet ende të shihet. Sepse komunikimi me shtypin, që kishte ardhur në numër të konsiderueshëm nga vendet e Ballkanit Perëndimor, arriti nivelin më të ulët të mundshëm në samitin e Londrës: Në konferencën e shtypit me Merkelin May-in dhe kryeministri polak Morawiecki, i cili do e zhvillojë këtë takim vitin tjetër në vendin e vet, nuk u lejua të bëhej asnjë pyetje për Ballkanin Perëndimor. Dhe asnjë pyetje nga një gazetar prej Ballkanit Perëndimor. Komunikimi i barabartë sy më sy nuk duket kështu! Turp, thanë edhe gazetarët britanikë. Ndërsa për Brexitin mund të bëheshin pyetje!

—————
Takimi në Londër u zhvillua në kuadër të Procesit të Berlinit, i cili u nis më 2014 nga kancelarja Merkel dhe që prej atëherë mblidhet vit për vit në një vend të ndryshëm të BE. Synimi kryesor i tij është integrimi i mëtejshëm i gjashtë vendeve të Ballkanit Perëndimor në Bashkimin Evropian./DW

samiti-londres.jpg
G. P.22:43 | 09/07/2018

Zhvillimi ekonomik, arsimi dhe siguria kanë qenë shtyllat e ditës së parë të samitit të ministrave të Jashtëm të BE-së dhe Ballkanit, mbajtur në Londër. Polonia, që merr presidencën e radhës së Unionit, por edhe Gjermania kanë nënvizuar rëndësinë që ka për bllokun integrimi i vendeve të Ballkanit. 

Dita e parë e samitit të pestë për Ballkanin Perëndimor në kuadrin e procesit të Berlinit është zhvilluar në një sfond jo tipik politik britanik. Dorëheqja e ministrit të Jashtëm britanik, Boris Johnson, ka bërë që në samitin e Londrës të merrte pjesë sekretari i Shtetit për Europën dhe Amerikën, Alain Duncan.

Por  kjo nuk ka penguar ministrat e jashtëm të Ballkanin Perëndimor që së bashku me disa homologë të Bashkimit Europian dhe përfaqësues të institucioneve europiane të diskutojnë mbi tre boshtet kryesore të takimit: Nxitja e rritjes ekonomike në Balkan përmes mbështetjes së tregut ekonomik rajonal dhe ndihmës për bizneset e vogle dhe të mesme, siguria ligjore dhe migracioni, si dhe mbështetja e shkollimit dhe punësimit të të rinjve në Ballkanin Perëndimor.

Britania e Madhe ka anonçuar një ndihmë të rëndësishme për dixhitalizimin e shkollave në Ballkan.

Alan Duncan, sekretar i shtetit  britanik për Europën dhe Amerikën: “Ne kemi shpenzuar gjithë ditën duke diskutuar se si ta transformojmë vizionin tonë për Ballkanin Perëndimor në një realitet. Ne kemi bërë të mundur pjesëmarrjen e shumë të rinjve nga rajoni, duke qenë se zëri i tyre dhe vizioni i tyre është thelbësor për të ardhmen e rajonit. Në përfundim të këtij takimi, Britania e Madhe ka kënaqësinë që të deklarojë se do të investojë 10 milionë paundë për trajnimin dixhital të nxënësve në 4.5 mijë shkolla në Ballkanin Perëndimor. Ky investim substancial do t’i ofrojë mundësinë 1 milion nxënësve që të marrin njohjen dhe aftësitë e duhura për të transformuar ekonomitë e tyre. Ne gjithashtu kemi njohur përpjekjet që vendet e rajonit kanë bërë për të trajtuar çështjet e të shkuarës dhe përshëndetëm marrëveshjen e emrit të arritur midis ministrave të jashtëm grekë dhe maqedonas”.

Ministri i Jashtëm gjerman ka theksuar, se integrimi i vendeve të Ballkanit Perëndimor përbën një përfitim dypalësh, për Bashkimin Europian dhe vetë rajonin.

Michael Roth, ministër i Jashtëm gjerman: “Ne ofrojmë një kulturë demokratike për vendet e rajonit duke u fokusuar te forcimi i shtetit ligjor, te drejtësia e pavarur dhe të drejtat themelore, liria e medias dhe minoriteteve, ndërkohë që ne mund të mësojmë nga pasuria multietnike dhe multifetare e vendeve të Ballkanit dhe eksperienca e zgjidhjes së konflikteve. Pra, integrimi i këtij rajoni është dydimensional”.

Polonia që merr presidencën e procesit të Berlinit, konsideron, se eksperienca polake për forcimin e kapacitetit administrativ dhe thithjen e fondeve europiane është e vlefshme për rajonin.

Jacek Czaputoëicz, ministri i Jashtëm polak: “Ne kemi përfituar eksperiencë lidhur me reformën administrative dhe thithjen e fondeve të Bashkimit Europian. Ne duam që ta transmetojmë këtë eksperiencë dhe praktikat tona të mira duke e përfshirë në axhendën gjatë presiddencës tonë të procesit të Berlinit. Ne duam që të përqëndrohemi në ndërlidhjen, sigurinë, biznesin dhe arsimin. Ne po konsiderojmë që të punojmë gjithashtu për qeverisjen lokale. Do konsultohemi për këto çështje me partnerët tanë të Ballkanit, në mënyrë që t’i përgjigjemi atyre sa më mirë pritshmërisë së tyre”.

Johannes Hahn, komisioner për Zgjerimin: “Nga ana tjetër, çështja nuk është vetëm të ngrihet pyetja, se çfarë Bashkimi Europian mund të bëjë për ju, por çfarë mund të bëni ju për vendin tuaj? Ka një shprehje shumë të goditur të John Kennedy: “Mos pyet çfarë vendi mund të bëjë për ty, por çfarë mund të bësh ti për vendin”. Kjo është një pikë mbi të cilën ju ftoj të reflektoni”.

Dita e dytë e samitit të Londrës do të mbledhë 6 kryetarët e shteteve dhe të qeverive të Ballkanit Perëndimor dhe zyrtarë të Bashkimit Europian./abcnews.al

harta-e-trafikut-1-933x445.jpg
ent ela21:48 | 25/06/2018

Alfred Vladi 33 vjeç dhe Elvis Vladi 38 vjeç janë dy kushërinjtë që janë shpallur në kërkim nga Policia e Shtetit si dy personat që kanë porositur automjetet “Toyota” nga Belgjika, brenda së cilave ishin fshehur 3.4 milionë Euro.

Alfred Vladi dhe Elvis Vladi janë djem xhaxhallarësh me njëri-tjetrin, me origjinë nga Peshkopia dhe banues në Tiranë.

Elvis Vladi rezulton të jetë i arrestuar në vitin 2015 në Londër të Britanisë së Madhe, si pjesë e një grupi kriminal që trafikonte kokainë. Në atë periudhë, grupi i tyre u kap në flagrancë me 16 kg kokainë. Nga gjykimi i çështjes, Elvis Vladi u shpall i pafajshëm nga ana e gjykatës angleze dhe u la i lirë.

SHTETET KU VEPRONTE ORGANIZATA KRIMINALE

Dyshohet se grupi kriminal, me të cilin në atë kohë u arrestua edhe Elvis Vladi, paratë që përfitonte nga shitja e kokainës i pastronte në Shqipëri. Pikërisht në këtë pistë janë fokusuar edhe hetimet e policisë shqiptare. Mësohet se grupi kriminal i shqiptarëve në Londër ushtronte veprimtarinë përveç Britanisë, edhe në Belgjikë e Holandë. Policia e Shtetit thotë se kontenieri me automjetet Toyota ishte nisur nga Belgjika. Më pas kishte mbërritur në portin e Durrësit tranzit nga porti i Barit në Itali.

SI FUNKSIONONTE PASTRIMI I PARAVE TË KOKAINËS DHE LIDHJA ME TOYOTA

Nga të dhëna të besueshme të tvklan.al rezulton se 33-vjeçari Alfred Vladi është administrator i “Tirana Rental Car”, firmë që jep automjete me qira. Kjo kompani është regjistruar për herë të parë më 16 Gusht 2017 me emër subjekti Alfred Vladi. Disa muaj më pas, më 7 Maj 2018 është ndryshuar emri i subjektit tregtar dhe është bërë “Tirana Rental Car”. Administrator sërish vijon të mbetet Alfred Vladi, ndërsa ortak është Flamur Vladi. Tvklan.al ka mësuar se Flamur Vladi është vëllai i Elvis Vladit, 38-vjeçarit të arrestuar para 3 vitesh në Londër dhe që më pas u shpall i pafajshëm. Për shkak të historisë që ka pasur në Londër, mendohet se për këtë arsye është regjistruar ortak i kompanisë Flamur Vladi, vëllai i Elvis Vladit.

Faksimile/ Ekstrakti i QKR i kompanisë Tirana Rental Car

Kompania “Tirana Rental Car”, në funksionin e saj thotë se jep makina me qira, të cilat janë kryesisht Toyota. Kjo firmë thotë gjithashtu se objekt i saj janë edhe shitblerje makinash, huadhënie, agjenci udhëtime, veprimtari për transfertë parash në emër dhe në llogari të një subjekti financiar jo bankë. Të gjitha shërbimet e pagesave dhe të transferimit të parave bëhen në emër dhe për llogari të një subjekti financiar jo bankë.

Ne foto Alfred Vladi

 

PISTA E HETIMIT

Burime konfidenciale nga policia thonë se ka dyshime të arsyeshme që paratë e pista mund të jenë sjellë në Shqipëri edhe përmes transferimit të tyre nga ana e “Tirana Rental Car”. Nuk dihet ende nëse shuma të tilla janë sjellë edhe herë të tjera në vendin tonë apo kjo ka qenë rruga e parë e këtij grupi kriminal. Eurot e përfituara nga shitja e kokainës në Angli transferoheshin më pas në Belgjikë apo dhe shtete të tjera ku kishte lidhje grupi i shqiptarëve të Londrës që drejtohej nga Gentian Cuka. Pas arrestimit të këtij të fundit në vitin 2015, drejtimin e grupit e morën njerëz të afërt me Cukën, thonë mediat angleze.

Pas mbërritjes së Eurove në Belgjikë, ato më pas silleshin në Shqipëri përmes transfertave nga ana e një subjekti financiar jo bankë apo përmes dërgesave me automjetet Toyota që porositeshin nga “Tirana Rental Car”. Kjo është pista ku janë fokusuar hetimet e agjentëve të Policisë së Shtetit.

Ne foto Edi Cani

Më pas shumat e parave pastroheshin duke u investuar në fusha të ndryshme. Ditën e djeshme, në Portin e Durrësit u gjetën 3.4 milionë Euro të fshehura në dy automjete Toyota. Zyrtarisht policia tha se ka arrestua katër persona; Agim Çeka 61 vjeç, Edi Lika (Cani) 41 vjeç, Klevi Lika 21 vjeç dhe Alban Mollaymeri 40 vjeç. Ky i fundit ishte personi që do të priste automjetet Toyota për llogari të kushërinjve Vladi.

Gjatë kontrollit të ushtruar në Portin e Durrësit, në automjetin tip ‘Bizark’ të drejtuar nga Agim Çeku dhe pronar Klevi Lika (Cani), në 2 automjete të ngarkuar në të, tip ‘Toyota’ janë gjetur një shumë e konsiderueshme eurosh dhe franga zviceriane, të padeklaruara. Gjithashtu janë ushtruar kontrolle në banesat dhe ambiente të tjera të personave të dyshuar. /tvklan.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono