Londër

united-1280x961.jpg
G. P.09:20 | 14/01/2019

Manchester United fitoi në fushën e Tottenham-it, duke iu afruar zonës Champions. Londinezët  mbetën larg titullit.

Po vazhdon të kërkojë trajner, por ndoshta ka harruar se e ka një në stol. Ole Gunnar Solskjer sikur ia kujtoi drejtuesve të Mançester Junajtidit se ai është aty, ndërsa udhëhoqi skuadrën drejt fitores së gjashtë radhazi.

As edhe vetë trajneri legjendar, Sir Aleks Ferguson, nuk ia kishte dalë, dhe kishte mbetur deri në pesë. Suksesi ishte i madh, edhe pse me fat, 1-0 në fushën e Totenhemit, një skuadre që gjatë këtij sezoni ka qenë vazhdimisht pretendente për titull. Portieri David De Gea në një krah, dhe sulmuesi Marcus Rashford në krahun tjetër, ndihmuan United të vazhdojë “ringjalljen” pas shkarkimit të Josë Mourinhos. Fitorja bëri që “djajtë e kuq” të ngjitesh në kuotën e 41 pikëve, baraz me Arsenalin që mban vendin e pestë në Premier League.

Tottenham-i luajti mirë dhe pati mjaft mundësi për të shënuar, por u ndalua nga mbrojtja e fortë mike, por sidomos nga forma e portierit spanjoll, De Gea. Sulmuesi Harry Kane dhe shokët e tij, iu afruan golit për vendasit në stadiumin “Ëembley”, por pa mundur të shënonin. Tottenham-i mbeti 10 pikë larg Liverpool-it kryesues, duke pakësuar shanset për titullin, ndërsa Chelsea është vetëm 1 pikë larg.

Londinezët duket se do të vuajnë mungesën e përvojës, pavarësisht punës shumë të mirë të trajnerit Pocchetino. Që nga viti 2008, ata nuk kanë fituar asnjë trofe, dhe kjo bën që ta ndjejnë presionin sa herë që janë pretendentë. Manchester United, ndërkaq, mund të pretendojë realisht për një vend në zonën Champions./abcnews.al

emmanuel-macron.jpg
G. P.16:18 | 01/01/2019

Si çdo fundviti, liderët botërorë kanë mbajtur fjalimet tradicionale për popujt e tyre. Në Paris, Emmanuel Macron u ka dërguar një paralajmërim ekstremistëve që sipas tij keqpërdorin protestat e popullit. Ndërsa kancelarja Angela Merkel ka premtuar se gjatë 2019-s Gjermania do të luajë një rol më vendimtar për zgjidhjen e sfidave globale.

Ndërrimi i viteve u ka shërbyer liderëve botërorë të përcjellin mesazhet e tyre, secili sipas prioriteteve të veta. Presidenti francez Emmanuel Macron e përdori fjalimin vjetor për t’u dërguar një paralajmërim elementëve radikalë në protestat anti-qeveritare. Macron premtoi se kabineti i tij do të ruajë rendin pa bërë kompromise dhe i cilësoi protestuesit që propagandohen si përfaqësues të popullit përfaqësues të urrejtjes.

“Në fakt, ata janë zëdhënës të një turme të nxitur nga urrejtja, që sulmon politikanët e zgjedhur, forcat e sigurisë, gazetarët, hebrenjtë dhe të huajt”, tha Macron.

Në Berlin, kancelarja Angela Merkel deklaroi se gjatë 2019-s Gjermania do të luajë një rol më të rëndësishëm në arenën ndërkombëtare. Merkel tha se aleancat tradicionale të Europës ndodhen nën presion, ndaj dhe është e nevojshme që Gjermania të marrë përsipër më shumë përgjegjësi. Gjithashtu, gruaja e hekurt e Europës nënvizoi se sfidat ndërkombëtare si ndryshimet e klimës, emigracioni dhe terrorizmi nuk mund të zgjidhen individualisht.

“Këtyre sfidave do të mund t’iu dalim për zot vetëm nëse bashkohemi dhe bashkëpunojmë me aktorë të tjerë jashtë kufijve tanë”, tha Merkel.

Duke qenë se në 2019 dhe 2020 vendi i saj do të ketë një vend të përkohshëm në Këshillin e Sigurimit të OKB-së, Merkel shtoi se Gjermania do të luftojë për zgjidhje globale. Ndryshe nga vitet e tjera, kur ndiqej vetëm nga audienca e brendshme, fjalimi i Kim Jong Un këtë herë u ndoq edhe vëzhgues ndërkombëtarë jashtë Koresë së Veriut. Në fjalimin tradicional, Kim Jong Un paralajmëroi se Peniani do të rishikojë politikën e tij të armatimeve nëse Shtetet e Bashkuara nuk heqin dorë nga sanksionet.

 “Nëse Amerika nuk e mban premtimin e bërë në sy të gjithë botës dhe vazhdon me sanksionet ndaj republikës sonë, atëherë nuk do të na mbetet tjetër veçse të gjejmë një mënyrë të re për sigurinë e sovranitetit tonë”, tha Kim.

Por Macron, Merkel dhe Kim nuk ishin të vetmit që paralajmëruan ndryshime në politikat e tyre. Më herët, ndonëse jo përmes fjalimit tradicional, presidenti Donald Trump njoftoi se tërheqja e trupave amerikane nga Siria do të jetë e ngadaltë, ndryshe nga sa kishte thënë më parë. Ndërsa presidenti rus Putin, në përpjekje për të përmirësuar marrëdhëniet me Perëndimin, u dërgoi një letër kancelarive në Uashington dhe Londër, ku shprehej i hapur për dialog./abcnews.al

british-airlines-1280x667.jpg
G. P.23:02 | 21/12/2018

Prania e disa dronëve në perimetrin e aeroportit Gatwick, në Londër, futi në kaos për të paktën tre ditë trafikun ajror. Qindra fluturime u pezulluan dhe 120 mijë pasagjerë  mbeten. Për zgjidhjen e situatës, autoritetet angazhuan edhe forcat speciale ushtarake.

Një tjetër dron në horizont çakordoi për të tretën ditë rresht fluturimet në aeroportin e dytë më të madh të Londrës, Gatwick, ku shumë pasagjerë u detyruan të presin disa orë me radhë deri në rikthimin e normalitetit. Situata u zhbllokua rreth orës 19 të së premtes, kur një zëdhënëse e aeroportit deklaroi se fluturimet mund të rifillonin dhe se pezullimi i tyre ishte vetëm një masë paraprake. Problemet për Gatwick filluan që të mërkurën, kur në 21 e 30 me orën lokale u konstatua droni i parë që fluturonte në perimetrin e aeroportit.

Që prej atëherë, policia londineze u angazhua në një operacion kërkimi për operatorët e dronit që vijoi deri të premten, por pa sukses. Për zgjidhjen e situatës u angazhua edhe ushtria, snajperët e të cilës u vendosën në majat e godinës dhe u autorizuan të qëllonin mjetet fluturuese të komanduara në distancë.

Pas pezullimit të së mërkurës, i njëjti episod u përsërit disa herë të enjten e po ashtu edhe të premten, kur fluturimet u ndërprenë dy herë brenda ditës, një herë në mëngjes dhe më pas pasdite. Policia beson se në hapësirën ajrore të aeroportit kanë fluturuar më shumë se një dron dhe dyshon për angazhimin e shumë personave, por përjashtojnë që ngjarja të ketë lidhje me terrorizmin.

Problemet më të mëdha me trafikun ajror u verifikuan të enjten kur ishte planifikuar që 760 fluturime të niseshin dhe të mbërinin në Gatwick, por që qëndruan në tokë. Ndërsa të premten fluturimet e anuluara ishin 155. Shefi i operacioneve të aeroportit deklaroi se në tre ditë kaosi i krijuar la në tokë 120 mijë pasagjerë./abcnews.al

balla-2-1280x833.jpg
G. P.15:24 | 30/11/2018

Klasa politike shqiptare ka për detyrim që të garantojë votën e shqiptarëve që jetojnë jashtë territorit për zgjedhjet e vitit 2021, është shprehur Kryetari i Grupit Parlamentar Socialist Taulant Balla në një takim me emigrantët që jetojnë në Londër. Ai është shprehur besimplotë se paketa aktuale e Reformës Zgjedhore do të miratohet brenda Krishtlindjeve. Kreu i grupit parlamentar socialist prej dy ditësh po zhvillon një vizitë pune në kryeqytetin britanik ku ka zhvilluar një sërë takimesh të rëndësishme edhe në Parlamentin e Mbretërisë së Bashkuar.

Në takimet me deputetët Madeleine Moon, Presidente e Asamblesë Parlamentare të NATO-s, konservatorin Martin Vickers, John Groghan, i cili kryeson edhe Grupin për Shqipërinë në Parlamentin britanik, me Margaret Hodge si dhe me Drejtoreshën e Fondacionit Westminister, i cili pritet të hapë së shpejti një prezencë të vetën në Shqipëri, u diskutua edhe për nevojën e intensifikimit të shkëmbimeve tregtare dhe prezencës më të madhe të kompanive britanike në Shqipëri./abcnews.al

PERPLASJET-MES-KUNATAVE.mpg_snapshot_00.26-1280x720.jpg
G. P.08:56 | 26/11/2018

Një sherr mes Meghan Markle dhe çiftit William dhe Kate ka bërë që ish aktorja e hollivudit bashkë me princin Harry të largohen nga pallati mbretëror. Kështu shkruajnë mediat britanike që theksojnë se tashmë çifti i ri mbretëror do të jetojë në një shtëpi larg Londrës.

Princi Harry dhe bashkëshortja e tij Meghan do të largohen nga Kensington Palace dhe në fillim të vitit të ri, para lindjes së fëmijës së tyre të parë, ata do të lëvizin nga Londra, në Frogmore Cottage, në afërsi të Windsor Castle. Njoftimi erdhi nga vetë Kensington Palace, deri tani vendbanimi i tyre, dhe tani është e pashmangshme të mendohet se tensionet me fqinjët, Princin William dhe gruan e tij Kate nuk kanë ndikuar për transferimin. Ose thënë më mirë, ato mes dy kunatave.

Nusja e re përfundoi në në mesin e polemikave edhe për thashethemet për mënyrën se si sillet me njerëzit që e ndihmojnë atë dhe për një mosmarrëveshje me Mbretëreshën në prag të dasmës, lidhur me kurorën që do të vendoste. Raportimi në mënyrë eksplicite fillimisht erdhi nga Daily Mail që është gjithmonë shumë i mirëinformuar: “Harry dhe Meghan dëshirojnë të lëvizin dhe kanë nevojë për më shumë hapësirë, por nuk duan të jetojnë ngjitur me William dhe Kate” tha një burim.
Kensington Palace ka njoftuar se çifti do të shkojë në Frogmore Cottage, Windsor, në pronën e kështjellës që “është një vend shumë i veçantë për lartësitë mbretërore”: një vilë dykatëshe dhe 10 dhoma (ku përfshihet një palestër dhe një studio yoga, për të cilën Meghan është e fiksuar./abcnews.al

burg.jpg
G. P.14:51 | 21/11/2018

12 vite burg është masa e dënimit që ka kërkuar sot Prokuroria e Krimeve të Rënda për Saimir Çullhajn, i cili akuzohet për trafik armësh. Çullhaj tentoi të trafikonte armë me postë drejt Anglisë.

Prokuroria e Krimeve të Rënda ka dhënë pretencën për Saimir Cullhajn, duke kërkuar qëndrimin e tij me 12 vite në qeli. 32-vjeçari tentoi në fund të muajit Gusht të kalonte armë drejt Anglisë nëpërmjet aeroportit të Rinasit me anë të pakove postare.

Brenda pakove u gjetën tre armë zjarri automatik model 56, të çmontuara, ndërsa dërgesa kishte si destinacion Londrën. Përveç armëve luftarake, prokuroria e akuzon Cullhajn edhe për  trafikim të lëndëve narkotike, të cilët iu gjetën në automjet si edhe në banesën e tij. Hetimet për këtë çështje, organi i akuzës i ka zhvilluar në bashkëpunim me palën angleze, ndërkohë që bashkë me Çullhajn po hetohej edhe Neritan Faria, i cili është shpallur në kërkim nga autoritetet shqiptare.

Gjurmët e gishtave të 32-vjecarit nga Shijaku u gjetën në pakot kompanisë postare theksoi në Gusht policia, duke e koduar emrin e operacionit antitrafik “Dilivery”. Cullhaj ka mohuar përfshirjen e tij në rrjet, ndërsa në seancat gjyqësore ka pretenduar se nuk e dinte çfarë kishte brenda në pakot dhe, se, po ia dërgonte një mikut i tij në Angli me emrin Tani. Për prangosjen e Cullhajit, u angazhuan oficerët e Antiterrorit, agjentët e SHISH si edhe ekspertët anglezë të “Scotland Yard”./abcnews.al

TENIS-ZVEREV-FITON-NE-LONDER.mpg_snapshot_00.01-1280x766.jpg
G. P.09:21 | 20/11/2018

Aleksandër Zverev cilësohet si ylli i ri i madh i tenisit, pas suksesit në Londër. Gjermani 21-vjeçar mundi legjendat Federer e Gjokoviç, duke fituar titullin e fundit të vitit 2018.

Prej shumë vitesh pritej që të ndodhte, ndërsa ishte humbur shpresa. Brezi i ri i tenisit nuk dukej aspak i aftë që të shembte diktaturën e treshes së madhe të epokës, Federer-Nadal-Gjokoviç. Më në fund, ja ku erdhi sfida me emrin Aleksandër Zverev. Njëzetenjëvjeçari gjerman, me origjinë ruse, fillimisht theu Rozher Federerin në gjysmëfinalen e Turneut Final ATP në Londër, ndërsa kulmoi me triumfin ndaj mjeshtrit Novak Gjokoviç. Finalja në Arenën O2 në kryeqytetin britanik ishte më shumë si një paradë e Zverevit, që ia doli në vetëm dy sete, 6-4 e 6-3, madje në vetëm 79 minuta.

I bukur, i ri dhe i talentuar, ndonjëherë i nxituar, por edhe me ndjenjë humori, Aleksandri duket se ka gjithçka për të qenë ylli i ri i madh i këtij sporti. Për habi, ai u vërshëllye fort ndërsa mundi Federerin, por publiku i zgjedhur londinez thjesht ndoqi me habi klasin e 21-vjeçarit ndaj numrit 1 të botës dhe favoritit, Gjokoviç. Një tronditje e vërtetë, dhe thuajse e pabesueshme, nga një lojtar që nuk kishte shkëlqyer kurrë në turnetë e mëdhenj, por që duket se ka mësuar nga trajneri i tij i lavdishëm, Ivan Lendl. Miliona njerëz në të gjithë botën, që ndjekin tenisin, tani mund të jenë të qetë. Veteranët si Federer e Nadal, madje edhe vetë Gjokoviçi, duket se e kanë gjetur pasardhësin e tyre të denjë./abcnews.al

LONDER-NAZISTET.mpg_snapshot_00.12-1280x720.jpg
G. P.23:10 | 13/10/2018

Londra është bërë ditën e shtunë skenë e dhunës nacionaliste. Grupe huliganësh kanë dalë në rrugë dhe kanë bërë përshëndetjen naziste para forcave të policisë, e cila ka shmangur përplasjen e tyre me një grup rival, që po marshonte kundër racizmit. 

Skena dhune janë verifikuar të shtunën në qendër të Londrës, ku anëtarë të një grupi huliganësh kanë mbajtur një protestë me tone raciste dhe nacionaliste. Anëtarët e grupit Aleanca Demokratike e Djemve të Futbollit kanë bërë përshëndetje naziste dhe më pas janë përleshur me forcat e policisë, e cila është përpjekur të shmangë përplasjen mes tyre dhe një grupi rival. Organizatorët e manifestimit deklaruan se grupi doli të protestonte kundër kthimit të xhihadistëve, emigrantëve ilegalë, bandave të përdhunuesve dhe në mbështetje të veteranëve që trajtohen si tradhtarë.

Furgonët e policisë dhe vetë efektivët u detyruan të përhapeshin në pika të ndryshme të Londrës, për të parandaluar përplasjen mes fraksioneve që po avanconin drejt sheshit Trafalgar. Nacionalistët përdorën fyerje dhe ofendime të rënda ndaj rivalëve të shoqatës “Jo racizmit dhe fashizmit”, si dhe ndaj policisë, që u mohoi mbajtjen e fjalimeve në sheshin e njohur, ku ishte ngritur edhe një podium. Në pamundësi për t’u përplasur me rivalët, huliganët, shumë prej të cilëve me maska në fytyrë, u përleshën me forcat e policisë dhe njëri prej tyre kërcënoi agjentët me vrasje. Rreth orës 18:00, me orën tonë, në kryeqytetin anglez u kthye normaliteti. Skotland Jard ka bërë me dije se ka arrestuar një person lidhur me trazirat, ndërsa ka paralajmëruar se do të zbatojë masa më të rrepta ndaj personave që cënojnë rendin publik./abcnews.al

hugooo.jpg
G. P.17:22 | 24/08/2018

Kampioni i Botës me Francën, Hugo Lloris, kaloi shtatë orë të mira në qeli mëngjesin e të premtes. Shkak u bë testi i alkoolit që u detyrua të bënte rreth orës 2:30 të natës në Britani, çka rezultoi se portieri i njohur po i jepte makinës në gjendje të dehur.

Më pas, kapiteni i Tottenham-it u dërgua në stacionin e policisë Charin Cross dhe pasi i morën shenjat e gishtërinjve u dërgua në qeli. Francezi u lirua me kusht, por është i detyruar të paraqitet më 11 Shtator para gjykatës.

Ai nuk iu përgjigj pyetjeve të gazetarëve kur po kthehej në shtëpi në këmbë. Gjithashtu, ai nuk u stërvit me shokët e skuadrës të Premten.

Lloris ishte duke festuar me disa miq të tij në kombëtaren franceze, Giroud dhe Koscielny, në një restorant në Mayfair. Përpara se të largoheshin ata shkrepën edhe një fotografi së bashku.

/abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono