liverpul

liverpuli.jpg
nev ila12:30 | 02/06/2019

Festë e madhe në Madrid pas fitores së Championsit nga Liverpuli. Trajneri Jurgen Klop kërkon që ky të jetë vetëm fillimi, ndërsa mediat evropiane i bënë jehonë kampionëve të rinj të Evropës.

Kur hynë në fushë presioni mbi ta ishte i jashtëzakonshëm.

Futbollistët e Liverpulit e dinin se një tjetër dështim në Evropë, mund të ishte fatal, ndaj ishin të vendosur për ta shmangur.

Ata ia dolën të fitonin trofeun për vete dhe për trajnerin e tyre, dhe madhështia e këtij misioni ishte kaq e jashtëzakonshme saqë askush nuk dëshironte të kujtonte që finalja nuk doli vërtet një finale.

Liverpuli fitoi për atë që bëri sezonet e fundit, dhe që Jurgen Klopit t’i hiqej damka aspak e merituar e humbësit të përjetshëm.

Kjo ishte nata më e mirë e jetëve tona profesionale”, a keni parë ndonjëherë një skuadër të tillë që luftoi deri në fund, edhe pse nuk i kishte mbetur më karburant? Merita është e gjitha e futbollistëve. Na u desh pak kohë për të mbërritur deri këtu, por fitorja është e rëndësishme për zhvillimin tonë, për t’u përmirësuar edhe më shumë. Ne kemi një portier që i bën gjërat e vështira të duken shumë të lehta. Shpresoj që ky të jetë vetëm fillimi i sukseseve tona”, u shpreh Klop.

Klopi kishte humbur 6 finale radhazi, që nga viti 2012, ndër të cilat dy në Champions, dhe një në Ligën e Evropës, ndaj emocionet e tij ishin të thella.

Tashmë, ai ka 6 trofe në karrierë, të parin me Liverpulin, pasi fitoi jo pak në Gjermani me Dortmundin.

Kapiteni Henderson i dha merita të mëdha gjermanit.

Pa një trajner të tillë nuk do t’ia kishim dalë kurrë, kemi pasur edhe vështirësi, por ajo që ka bërë ai është e pabesueshme. Ka një unitet të madh në skuadër, një atmosferë vërtetë e veçantë. Jam krenar që jam pjesë e kësaj skuadre, ndërsa tani duhet të vazhdojmë kështu” , tha ai.

Krenaria ishte e plotë edhe në krahun tjetër.

Totenhemi dha një paraqitje vërtet të madhe, ndoshta më të mirë sesa kampionët e rinj.

Liverpuli ia njohu meritën dhe i dha përgëzimin duke bërë roje nderi për londinezët.

Trajneri Maurisio Poçetino, përtej mërzisë së madhe, u shpreh pozitiv.

Ne duam që ta provojmë sërish këtë gjë, ta përsërisim, është ndeshja më e madhe në rruzull pas finales së Kupës së Botës, ndaj shpresoj që të jemi këtu përsëri, sa më shpejt që të jetë e mundur. Jam shumë krenar për atë që bëri skuadra ime. Ne nuk patëm fat, por luftuam dhe ishim shumë mirë, sidomos në pjesën e dytë. Në ndeshje të tilla, përvoja luan rol të madh, dhe ne ishim në pozicionin që ishte vjet Liverpuli. Jam shumë i lumtur që jam trajneri i kësaj skuadre, por gjithsesi duhet të përgëzoj Liverpulin për fitoren”, tha Poçetino.

Gazetat angleze ishin në këmbë për kampionët.

“Star Sport” titullon “Të pabesueshmit”, duke luajtur me shkronjat e fjalës “të kuq”, si ngjyrat e Liverpulit. Në kopertinë, Salah pas golit, dhe Klop me trofeun!

“Sandi Telegraf” titullon “Liverpuli triumfon në Madrid” dhe vendos foton e kopertinës me festimin e Salahut pas golit të parë

“Sandi Ekspres”: Liverpuli kurorëzohet mbret i Evropës!

Gazeta “Herald” e së dielës shkruan për Liverpulin: Në Ligën e tyre të Kampionëve! Futbollistët e lumtur të Liverpulit festojnë fitoren në Champions!

Ja edhe disa nga gazetat kryesore sportive në Evropë:

“L’Ekip” në Francë: Zoti shpëtoftë të kuqtë! Falë një penalltie të dyshimtë, dhe një goli në fund, të kuqtë e Liverpulit fitojnë një finale zhgënjyese 100 për qind angleze!

“La Gazeta delo Sport” në Itali: LiverBUM! Champions, këtu është e gjashta! Klopi është në majë, fiton kupën në tentativën e tretë!

“AS” në Spanjë: Liverpuli i përjetshëm! Championsi i gjashtë për të kuqtë, dhe fundi i mallkimit për Klopin! Shënuan Salah dhe Origi!

Kështu u mbyll ky Champions, me një fitore që u duk logjike, dhe me një trajner që cilësohej si më i miri në botë, por që vetëm tani e fitoi trofeun e madh./ABC News Albania 24/7

PRAG-FINALE-CHAMPIONSI-ABC-M5-T1.mpg_snapshot_01.41-1280x720.jpg
ent ela14:46 | 01/06/2019

Liverpuli dhe Totenhemi luajnë sonte finalen e Championsit në Madrid. Dy skuadrat angleze luftojnë për trofeun e madh, në duelin e orës 21:00

Udhëtim drejt parajsës apo ferrit? Dy skuadra angleze, Liverpuli dhe Totenhemi, fluturuan me shpresë dhe shqetësim drejt Madridit, ku do të luajnë finalen e Championsit, sonte në orën 21:00.

Të kuqtë e trajnerit Jurgen Klop po përsërisin rrugën e vjetshme, veçse më të shkurtër, dhe shpresojnë që kthimi të jetë bashkë me trofeun.

E kërkon tradita e klubit pesë herë kampion të Europës, nënkampion i kontinentit në fuqi.

E dëshiron nga thellësia më e madhe e zemrës vetë Klopi, trajneri i madh i futbollit spektakolar, specialist për të shkuar në finale, por deri tani një humbës serial në to.

“Unë nuk jam një humbës, – shprehet trajneri i Liverpulit, – mos mendoni vallë se e gjithë karriera ime ka qenë pa fat? Jo e gjitha ka qenë e tillë, dhe dështimet thjesht më shtyjnë që të arrij suksesin. Që nga viti 2012 e deri më sot, me përjashtim të 2012-ës, skuadrat e mia kanë qenë në finale. Jam rekordmeni botëror për fitoret e gjysmëfinaleve në 7 vitet e fundit, por nëse do të shkruaja një libër për to, nuk do të ma lexonte kush. Kemi mjaft përvojë tani dhe duam që të fitojmë”.

E vetmja mungesë për Liverpulin është ajo e mesfushorit Nabi Keita, pasi Roberto Firmino është 100 për qind I gatshëm, dhe pritet të luajë titullar.

Presioni mbi Totenhemin mund të cilësohet më I vogël, por paradoksalisht edhe më I madh.

Nëse londinezët nuk jepen favoritë dhe kanë thyer çdo rekord në historinë e klubit deri tani, kjo i lehtëson lojtarët vetëm pjesërisht.

Tensioni më i madh është nga mungesa totale e përvojës si klub, që nuk ka luajtur asnjë finale Championsi, ndryshe nga Liverpuli që do të luajë të 10-ën.

Eksperienca më së shumti ka qenë vendimtare.

Gjithsesi, lajmet janë të mira pasi sulmuesi kryesor Harri Kejn, si dhe Davidson Sançez janë gati, edhe nuk dihet nëse Kejn do të jetë në formacion.

Uanajama është në dyshim, ndërsa Ben Dejvis nuk luan.

Trajneri Maurisio Poçetino, gjithsesi, ka besim se gjithnjë ka një herë të parë.

“Ne duam të shkruajmë historinë, – tha argjentinasi, – ky është momenti ynë dhe duhet të mos e lëmë të shkojë kot. E dimë shumë mirë se çfarë duhet të bëjmë për të fituar. Ne nuk cilësohemi favoritë, por kjo nuk ka rëndësi, pasi do të fitojë ajo skuadër që do të luajë më mirë, jo ajo që do të parashikohet si më e mirë. Nuk e di nëse Kejn do të luajë apo jo, do të jetë një vendim i vështirë”.

Gazetat angleze komentojnë finalen angleze.

“Tajmsi” i Londrës titullon “Kush do të triumfojë në Madrid”, dhe I kushton 12 faqe në brendësi, finales së Ligës së Kampionëve.

“Deili Ekspres”: Ja ku jemi! Është momenti vendimtar pas një udhëtimi të pabesueshëm deri në finale!

“Star Sport”: Epshi i Uandës! Klopi i dëshpëruar të vendosë duart mjbi kupë! Spërsat duan të bëhen legjenda!

“The Gardian”: Finalja e Championsit! Ja ku jemi, tifozët e futbollit pushtojnë Madridin!

Klopi dhe Klopi janë ndeshur 9 herë mes tyre, dhe trajneri I Liverpulit ka epërsi me 4 fitore, 4 barazime dhe një humbje.

Parashikimet janë në favor të të kuqve, me koeficientin 1.95, ndaj 4.33 të Totenhemit.

Mbi 160 milionë shikues në të gjithë botën pritet të ndjekin finalen, duke e bërë ndeshjen më të ndjekur sportive në histori. /ABC News Albania 24/7

 

106850101_moura_origi.jpg
Sej rie11:20 | 09/05/2019

Totenhemi ishte mrekullia e dytë e Championsit, pas Liverpulit. Jehonë e madhe në të gjithë botën pas suksesit të skuadrës londineze ndaj Ajaksit dhe kualifikimit për në finale.

Nuk u desh të kalonte shumë kohë që këto skena të përsëriteshin.

Një tjetër mrekulli pritej të ndodhte në Ligën e Kampionëve, dhe strategu i saj u përmendi lojtarëve të tij pikërisht Liverpulin.

Totenhem Hotspuri në finalen angleze të Madridit do të thotë Championsi më i çmendur i të gjitha kohëve, me përmbysjet që nuk ishin parë kurrë.

Strategu i Totenhemit ishte pikërisht trajneri Maurisio Poçetino, që frymëzoi skuadrën për të fituar 3-2 në Amsterdam ndaj Ajaksit, edhe pasi humbi 0-1 ndeshjen e parë, edhe pasi humbi 0-2 pjesën e parë.

“Faleminderit futboll, – u shpreh ai në mes të emocioneve, – e kam të vështirë të flas, emocionet nuk po më lejojnë. Lojtarët e mi janë heronj, ndërsa Lukas Moura është superhero. Këtë e kam thënë që vjet. Është shumë e vështirë të konkurrosh në këtë nivel, dhe është fat i madh për mua që jam trajner i kësaj skuadre”.

Nëse Liverpulit I munguan Salah e Firmino, dhe kualifikimin ia dhanë Origi, Vajnaldum apo Shaqiri, Spërsat nuk kishin yllin kryesor, Harri Kejn, dhe triumfin e siguroi Lukas Moura.

Ai realizoi në minutat 55, 59 dhe 96, për fitoren 3-2.

Braziliani ishte pa asnjë dyshim, njeriu më i lumtur në stadium.

“Pa dyshim kjo është dita më e madhe e karrierës sime, – tha sulmuesi, – e pabesueshme të shënosh 3 gola në gjysmëfinale të Championsit. Një mbrëmje shumë emocionuese. Futbolli është i mrekullueshëm dhe të jep një moment kaq të veçantë sa ky”!

Gazetat në Angli, Holandë dhe gjithë Europën mbetën të mrekulluara.

“Deili Star”: Krejtësisht angleze! Moura ishte vendimtari, ndërsa Spërsat arritën finalen!

“Deili Meil”: Anglia mund të bëhet vendi I parë me të katër ekipet finaliste të kupave të Europës, nëse Arsenali dhe Çelsi kualifikohen!

Hidhërimi ishte I madh në Holandë pasi pesë herë kampionët e Europës dominuan pjesën e parë, duke shënuar me anë të kapitenit De Ligt dhe sulmuesit Zijeç.

Ata kishin fituar edhe në Londër me golin e De Bekut, por kjo nuk mjaftoi.

Gazeta “De Telegraf” thekson: Mallkimi I 8 majit godet përsëri Ajaksin! Në këtë datë ka humbur tituj apo është eleminuar në 1977, 1988, 1994, 2011, 2016 dhe 2019!

“L’Ekip” në Francë: Lukasi shekullor! Finalja e Championsit, pra, do të jetë 100 për qind angleze! Totenhemi u bashkua me Liverpulin pas një mrekullie të krahasueshme me atë të të kuqve!

“Marka” spanjolle perifrazon titullin e himnit britanik: Zot, ruaje Championsin! Një tjetër mbrëmje e pabesueshme tregoi se është një garë e papërsëritshme dhe e paprekshme!

“La Gazeta delo Sport” në Itali: Champions që nuk është parë kurrë! Totenhemi përmbys Ajaksin, finale me Liverpulin! Gol në minutën e 96-të!

“Bild” në Gjermani: Champions, mrekullia e radhës e gjysmëfinaleve! Dramë në minutat shtesë, Totenhemi përmbys Ajaksin me 3 gola!

Kënaqësi e madhe për argjentinasin Poçetino edhe nga Argjentina e tij.

Gazeta “Ole”: Poçetino në finale! Ata janë kampionët! Totenhemi rikuperoi 3 gola në 45 minuta, Europa do të jetë për anglezët!

Totenhemi arriti në finalen e parë të Championsit në histori, ndërsa do të ketë përballë një kundërshtar me shumë më tepër përvojë, si 9 herë finalisti Liverpul.

Gjithsesi, pas kësaj që ndodhi me Ajaksin, vetëm besimi që nuk mungon./ABC News Albania 24/7

liverpul-mancester.jpg
ent ela19:30 | 24/02/2019

Përfundon në barazim pa gola ndeshja kryesore e kampionatit anglez, mes Mançester Junajtidit dhe Liverpulit. Në stadiumin “Old Traford” pati pak emocione dhe shumë dëmtime

Pritej krejt tjetër gjë nga ky duel. Anglia, madje edhe gjithë Europa, mbajti frymën për të ndjekur kryendeshjen e Premier Ligës, mes Mançester Junajtidit e Liverpulit, por pa asnjë dyshim, më së shumti pati zhgënjim.

Asnjë gol në stadiumin “Old Traford” të mbiquajtur “Teatri i Ëndrrave”, që u kthye papritur në një infermieri gjigande.

Junajtid u detyrua të bënte të tre ndërrimet në pjesën e parë për shkak të dëmtimeve të Ander Herrerës, Huan Matës e Xhesi Lingardit, ndërsa miqtë nxorrën nga fusha Roberto Firminon, po të dëmtuar.

Mbizotëroi frika dhe loja taktike në atë që shpresohej të ishte një spektakël, me vetëm katër gjuajtje që arritën në kuadratin e të dyja portave.

Liverpuli e deshi më shumë fitoren, dhe e mbajti topin 65 për qind, po ashtu bëri më shumë pasime, si dhe ekzekutoi dyfishin e goditjeve nga këndi.

Gjithçka pa dobi, sepse as skuadra e trajnerit Klop nuk guxoi aq sa për të fituar, dhe as ajo e Solskjerit nuk hoqi dorë nga mbrojtja me shumë lojtarë prapa.

As aktivizimi I Xherdan Shaqirit nuk e ndryshoi gjendjen, me shqiptarin e Zvicrës që mori karton të verdhë.

Barazimi në “Old Traford”, gjithsesi, nuk mund të quhet rezultat i keq për Liverpulin që u ngjit në krye të renditjes me 66 pikë, një më shumë sesa Mançester Siti.

Shpresa është që edhe skuadra e Guardiolës të ndalet në derbin me Junajtidin, ndryshe gara për titull do të bëhet shumë e vështirë./abcnews.al

liverpool.jpg
ent ela17:23 | 31/01/2019

Skuadrat kryesore të Anglisë e patën sërish të vështirë në ndeshjet e Premier Ligës. Pas dështimit të dy ekipeve të Mançesterit, këtë e provuan edhe Liverpuli e Çelsi

U kuptua që në fillim se nuk ishte java e duhur për të fortët. Pasi dy skuadrat e Mançesterit provuan sesa e vështirë është Premier Liga, u erdhi radha edhe dy skuadrave të tjera të majës së tabelës.

Liverpuli dhe Çelsi dolën nga fusha krejtësisht të pakënaqur, ndonëse blutë e Londrës ishin të shkatërruar. Skuadra e trajnerit Jurgen Klop nuk arriti të përfitonte maksimalisht nga disfata e Mançester Sitit, pasi mori vetëm një barazim në stadiumin e vet, “Anfild”.

Leisteri, një rival serioz, i hapi punë dhe e mbylli ndeshjen 1-1, me Liverpulin që tani është 5 pikë larg Sitit, ndërsa shpresa ishte për të shkuar në +7. Sadio Mane kaloi vendasit në epërsi që në minutën e tretë, por mbrojtësi i kombëtares angleze, Harri Megajer barazoi në fund të pjesës së parë.

Të kuqtë kërkuan një penallti pas pushimit, dhe ajo mund të ishte dhënë, por përsa i përket lojës, Leisteri e meritoi barazimin. “Nuk duhet të shqetësohemi shumë nga ky rezultat, – theksoi Klopi pas ndeshjes, – natyrisht, nuk jam i lumtur sepse doja që të fitonim, por nuk ia dolëm dhe tani jemi edhe më shumë të shkëputur nga Siti”.

Liverpuli gjithsesi ka me vete historinë. Tetë herë në 9 sezonet e fundit, kampione ka dalë ajo skuadër që ka pasur një epërsi prej 5 pikësh ose më shumë në fund të muajit janar. E qartë që Çelsi doli nga mesjava shumë më keq se Liverpuli, pas katastrofës 0-4 në fushën e Bornmuthit.

Londinezët pësuan humbjen më të rëndë në 23 vitet e fundit, një sinjal i qartë se fundi i trajnerit Sarri mund të jetë i afërt, sidomos me një president si Roman Abramoviçi.

“Ndoshta është faji im që nuk arrij t’i motivoj këta lojtarë, – u shpreh italiani, – në fund të ndeshjes, i mbajta futbollistët për 50 minuta në dhomën e zhveshjes. Ne mund të humbasim, por jo në këtë mënyrë”. Analistët parashikuan se Sarri është në rrezik të madh, sidomos pasi kritikoi publikisht lojtarët e tij një javë më parë. Çelsi doli jashtë zonës Champions, me golaverazh më të dobët se Arsenali, ndërsa Mançester Junajtidi është shumë pranë. Liverpuli, ndërkaq, ka 61 pikë ndaj 56 të Sitit, ndërsa Totenhemi u afrua me dyshen e kreut pas suksesit ndaj Uatfordit./abcnews.al

SHORTI-I-CHAMPIONSIT.mpg_snapshot_00.31-1280x720.jpg
G. P.19:17 | 17/12/2018

Çifte të mëdha dolën nga shorti i turit të dytë të Ligës së Kampionëve. Gjithsesi, disa skuadra të mëdha si Reali, Barcelona apo Mançester Siti patën fat nga goglat.

Liverpool-Bayern, Atletico Madrid Juventus dhe Manchester United-PSG ishin sfidat më delikate që rezervoi edhe shorti për 1-16 e finaleve në UEFA Champions League. Skuadra potenciale e këtij edicioni për këtë trofe, Juventus do t’i duhet të kalojë një ferr të vështirë siç është fusha e “Vincente Calderon” ku Simeone do të kërkojë të ndalë furine e madhe juventine të deritanishme. Një tjetër përplasje klasike është ajo mes Liverpool-it dhe Bayern. Klopp do të rigjejë sërish përballë bavarezët këtë herë me një stil e profil tjetër kompeticioni dhe loje.

Mourinho me Manchester-in edhe ata me një shuplakë nga goglat pasi përballë do të kenë PSG. Do ti duhet të bëjnë shumë në takimin e parë në mënyrë që të kalojnë sa më lehtë të mundshëm sfidën në Paris. Goglat e shortit kanë përkëdhelur dukshëm Manchester City-n dhe Barcelonën. Guardiola do të ndeshet me Schalken dhe takimin e parë do e luajë në Gelsenkirchen, ku do të kërkojë të mbyllë gjithçka aty. Francezet e Lion do të luajnë përballë Barcelonës së Mesit në një sfidë në letër me të superfavorizuar skuadrën e Valverdes.

Ajaks-Real Madrid një tjetër përballje delikate, por me stekën e kualifikimit që anon për nga madrilenët që do të luajnë në fushën e tyre takimin e dytë. Po kështu një tjetër përballje shumë shumë interesante është edhe përplasja anglo-gjermane, Tottenham-Borusia Dortmund, ku të dyja skuadrat janë në ekuilibër të plotë të shanseve për kualifikim. Diçka më e thjeshtë për ekipin tjetër Italian të Romës që do të përballet me Porton, por që do ti duhet të mbyllë gjithcka në sfidën e parë në “Olimpico” në mënyrë që të mos ketë aspak surpriza në kthim./abcnews.al

liverpool-stervitje.jpeg
G. P.12:47 | 11/12/2018

Liverpool-Napoli është sfida kryesore e mbrëmjes në Ligën e Kampionëve. Një finale e vërtetë, në orën 21:00 në stadiumin “Anfield”, do të përcaktojë se kush do të kualifikohet nga grupet.

Katër trofe të tillë i ka fituar në karrierë. Carlo Ancelotti është një triumfues i vërtetë në Champions dhe nuk dëshiron të shkojë në shtëpi që tani. Pasi ia doli dy herë me Milanin dhe një herë me Realin, ambicia e tij është që t’ia dalë me Napolin.

Gjithsesi, sonte në orën 21:00, do të ketë një provë “të jesh a të mos jesh”, pra për kualifikim ose eleminim. Napolitanët u stërvitën në stadiumin “Anfield” të Liverpoolit, ku do të përballen me skuadrën vendase, në një finale të vërtetë. Italianët duhet të shmangin një humbje me dy gola diferencë që të kalojnë fazën e grupeve. Për fat, vetëm Verdi e Kirikesh janë mungesa.

“Jemi të ndërgjegjshëm se çfarë ndeshje na pret në “Anfield”. Ndaj Liverpoolit luhet një finale, dhe nuk duhet të gabojmë në hapin e fundit. Tortën e kemi, thjesht duhet të vendosim qershinë sipër saj. Nuk kemi ardhur këtu për t’u mbrojtur, por për të bërë lojën tonë. Ndeshja e parë, që fituam në shtëpi ndaj Liverpoolit, na ka dhënë besim dhe ne duhet të luajmë sërish ashtu”, tha Ancelotti.

Liverpooli është më i rrezikuar sesa Napoli. Skuadra e trajnerit Jurgen Klopp duhet të fitojë me dy gola diferencë që të sigurojë kualifikimin. Disfata e pësuar në Francë me Paris SG e ndërlikoi situatën, por të kuqtë kanë qenë gjithnjë tepër të fortë përpara tifozëve të tyre. Të kuqtë nuk do të kenë mbrojtësin e qendrës Gomez, të dëmtuar, ndërsa mbrojtësi tjetër, Lovren, është ende në dyshim. Klopp si gjithnjë, e mori ndeshjen me sportivitet.

“E di sesa e vështirë do të jetë ndaj Napolit, por, kjo nuk më bën që unë ta humbas buzëqeshjen. Është e vërtetë që nuk kemi bërë aq sa duhet në Champions, që të ishim të kualifikuar që tani, ndërsa kjo është mundësia jonë e fundit. Gjithsesi, unë jam i lumtur me formën e skuadrës këto javë, madje gjatë gjithë vitit. Në Champions do të luash me më të fortët dhe duhet të fitosh. Le të mos i përsërisim gabimet e së kaluarës”, tha Klopp.

Si janë shanset për kualifikim në grupin C?

Nëse Liverpooli fiton me dy gola diferencë, kualifikohet, ndërsa Napoli eleminohet nëse PSG fiton ose barazon në Beograd me Crvena Zvezdën. Nëse në “Anfield” përfundon barazim, Liverpooli eleminohet.

Nëse Liverpooli fiton me një gol diferencë dhe PSG fiton, sërish kualifikohet pasi ka shënuar më shumë gola se Napoli. Nëse Liverpooli fiton me një gol diferencë dhje PSG barazon, tre ekipet barazohen me nga 9 pikë, dhe gjithçka varet nga golaverazhi direkt, pra nga rezultati në “Anfield”./abcnews.al

city.jpg
G. P.21:52 | 25/11/2018

Mançester Siti dhe Liverpuli duken skuadrat e vetme pretendente për titull në Angli. Gjithsesi, trajneri i Sitit, Guardiola, nuk është ende i kënaqur nga lojtarët e tij.

Pritej të ishte një garë treshe, por duket se ka një reduktim. Mançester Siti e Liverpuli vazhduan me fitoret në Premier Ligë, duke u shkëputur nga rivali tjetër, Çelsi, që pësoi disfatë në derbin e Londrës. Skuadra e trajnerit Pep Guardiola konfirmoi sërish se është favorite për titullin kampion, me suksesin 4-0 në fushën e Uest Hemit. Të mbiquajturit “qytetarët” jo vetëm dinë të fitojnë, por edhe të japin spektakël duke shënuar shumë gola. David Stërling, Silva dhe Sane ishin autorët e tyre, Gjithsesi, Guardiola sërish nuk ishte plotësisht i kënaqur.

“Në pjesën e parë ishim nën nivelin e duhur, – tha trajneri katalanas, – lojtarët u vonuan shumë për të pasuar topin, por pas pushimit ishim më mirë. Ne nuk mund të kënaqemi me këtë që po bëjmë, pasi duam të mbrojmë titullin, diçka që nuk ka ndodhur kurrë tek Siti. Liverpuli po zhvillon sezonin më të mirë në histori, dhe kjo na motivon edhe më shumë”.

Liverpuli vërtet po luan edicionin më të mirë, edhe pse është një skuadër me shumë më tepër emër se Siti. Triumfi 3-0 në fushën e Uatfordit bëri të mundur që skuadra e Jurgen Klopit të mbetej në vend të dytë, vetëm dy pikë larg Sitit, ndonëse nuk është në gjendje të shënojë aq shumë sa ajo. Salah, Arnold dhe Firmino ishin protagonistët e rrjetave, ndërsa Shaqiri luajti si titullar për 74 minuta.

Po me Çelsin çfarë ndodhi?

Formacioni i trajnerit Mauricio Sarri humbi në mënyrë të merituar derbin me Totenhemin, në stadiumin “Uembli”. Blutë e Londrës u duk sikur po luanin një miqësore, dhe morën kritika të mëdha nga analistët, ndërsa Spërsat luajtën vërtet si në një derbi. Dele Ali, Kejn dhe koreanojugori Son shënuan për vendasit, që kaluan Çelsin në renditje, me 30 pikë ndaj 28. Sarri kritikoi ashpër lojtarët e tij, ndërsa blutë mbetën 7 pikë larg kreut, ndonëse ende në zonën Champions./abcnews.al

shaqja.jpeg
G. P.21:26 | 11/11/2018

Xherdan Shaqiri ishte sërish vendimtar për Liverpulin në Premier Ligën angleze. Shqiptari i Zvicrës shënoi gol në fitoren e radhës, duke lënë pas humbjen e pësuar në Beograd.

Nga një përforcim i mirë është kthyer në një lojtar thuajse të domosdoshëm. Xherdan Shaqiri ia mori “me dhunë” Jurgen Klopit vendin në formacion, dhe tashmë gjithçka që del nga këmbët e tij kthehet në “ar”. Mungesa e shqiptaro-zviceranit padyshim u ndje në Beograd, në humbjen 0-2 në Champions ndaj Crvena Zvezdës, por ja që “muzika” ndrysho sapo Liverpuli u kthye në Angli.

Fitore 2-0 ndaj Fulhamit në “Anfild”, me gola të Mohamed Salahut dhe pikërisht të Shaqirit, nga një në secilën pjesë loje. Miqtë nuk patën fat me gjykimin kur iu anulua një gol i sulmuesit serb, Mitroviç, që u duk i rregullt, dhe vetëm 14 sekonda më pas, Salah kaloi vendasit në epërsi.

Shaqiri luajti për 81 minuta dhe u vlerësua me një notë mjaft të lartë, 7.5, po aq sa Mohamed Salah, duke qenë dy nga më të mirët për ekipin e Klopit. Liverpuli luajti keq në pjesën e parë, duke e ndjerë goditjen e marrë në Serbi, por goli i egjiptianit bëri që gjërat të ndryshonin dhe fitorja të ishte jo me shumë mundim.

Të kuqtë u ngjitën në kuotën e 30 pikëve në Premier Ligë, me 3 gola të shënuar e vetëm 5 të pësuar, dhe misioni “titull” vazhdon të realizohet me sukses. Nëntë fitore, tre barazime e zero humbje, është bilanci në kampionat deri tani këtë sezon.

shaqiri.png
G. P.17:15 | 28/10/2018

Xherdan Shaqiri bëri një tjetër paraqitje të madhe për Liverpulin dhe meritoi lavdërimet e trajnerit Klop. Kjo, edhe pse shqiptari i Zvicrës u aktivizua vetëm për gjysmë ore në ndeshjen e Premier Ligës.

Vështirë të jetë gjithnjë titullar në një skuadër të tillë. Xherdan Shaqirit, megjithatë, nuk i prishi aspak punë që e nisi nga stoli ndeshjen e Premier Ligës ndaj Kardifit, përkundrazi, ndoshta i bëri mirë. I lodhur nga ngarkesa e madhe tek Liverpuli dhe Zvicra, 26-vjeçari ishte me energjitë e duhura për të bërë diferencën, dhe për të realizuar misionin për të cilin e hodhi në fushë trajneri Jurgen Klop. Shënoi një gol dhe krijoi një tjetër, rendiment i mrekullueshëm në vetëm gjysmë ore lojë. Po ashtu, konfirmimi i radhës, të cilin e theksoi edhe Klopi pas ndeshjes.

“Shaqiri luajti 4 ndeshje radhazi nga 90 minuta, me skuadrën tonë dhe kombëtaren, ndaj vendosa të mos e aktivizoj që në fillim, – tha Klopi, – Kur ai hyri në fushë, ishte strumbullar i dy golave të bukur. Ai luajti shumë mirë dhe për mua është gjithnjë e më e vështirë që ta lë në stol. Gjithsesi, ne kemi nevojë për 14 lojtarë për çdo ndeshje, dhe është gjë e madhe që kemi mundësi të hedhim në fushë një cilësi kaq të lartë”.

Natyrisht, Liverpuli nuk ishte vetëm Shaqiri në suksesin 4-1 ndaj Kardifit. Mbi 53 000 tifozë në “Anfild” u kënaqën nga loja e skuadrës së tyre, që pati epërsi të madhe, duke mbajtur topin 80 për qind, duke gjuajtur 19 herë ndaj 2 të kundërshtarit, e duke pasur 8-0 goditjet nga këndi. Liverpuli ka 26 pikë duke mbetur në krye të Premier Ligës, e duke qenë pretendent I madh për titull, së bashku me Mançester Sitin dhe Çelsin./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono