liga e kombeve

medium_2019-06-08-883540c1d4.jpg
ent ela16:46 | 09/06/2019

Portugalia dhe Holanda ndeshen sonte në finalen e Ligës së Kombeve. Kristiano Ronaldo dhe shokët e tij jepen favoritë për suksesin në duelin që nis në orën 20:45.

Është një hero, dhe dëshiron ta provojë veten sërish.

Kristiano Ronaldo për momentin jep autografe dhe përgatitet, ndërsa në orën 20:45 do të zbresë në fushën e “Estadio do Dragaos” në Porto për të synuar një tjetër trofe të madh në karrierë.

Luhet finalja e Ligës së Kombeve, një titull më pak prestigjioz se Europiani apo Botërori, por sërish I rëndësishëm, ndaj edhe dueli ndaj Holandës pritet i fortë.

Problemi i vetëm për vendasit është dëmtimi i mbrojtësit të qendrës, Pepe, i cili mendohet të zëvendësohet nga Hoze Fonte.

Ronaldo është në formë të madhe, siç e tregoi me 3 golat e shënuar ndaj Zvicrës në gjysmëfinalen e luajtur po në Porto, ndërsa rikthimi në kombëtare për herë të parë pas Botërorit, është një shtysë e madhe për “luzitanët”.

“Mendoj se Kristiano mund të luajë edhe 3-4 vjet në nivelet më të larta, – tha trajneri portugez, Fernando Santos, – ai është në formë fizike të shkëlqyer, dhe stërvitet në skaj si gjithnjë. Ai është kapiteni ynë dhe një shpresë e madhe për fitoren, ndonëse për të mundur Holandën, do të duhet që gjithë ekipi të japë maksimumin”.

Holanda gjithashtu ka shpresë të madhe për fitoren.

Suksesi në gjysmëfinale ndaj Anglisë ishte prova se “tulipanët” po arrijnë pjekurinë e duhur, ndërsa yjet në skuadër janë të shumtë.

Me Van Dajkun, De Ligtin, De Jongun apo Van de Bekun, trajneri Ronald Kuman ka mjaft alternativa në sulm e në mbrojtje.

Holandezët nuk kanë shqetësime me dëmtimet, ndaj do të jenë në fushë me formacion të plotë.

“Ne duam kupën, – ishin fjalët e Kumanit, – e dimë se do të jetë e vështirë, pasi Portugalia është skuadër shumë e mirë dhe luan në fushën e saj. Po ashtu, përballë do të kemi Kristiano Ronaldon, por kundërshtari është më shumë se një lojtar i vetëm. Mendoj se ne jemi ekip i së ardhmes, por kjo nuk do të thotë se nuk do të luftojmë për trofeun”.

Dy skuadrat janë ndeshur 13 herë më parë, dhe Portugalia ka bilanc pozitiv me 7 fitore, 4 barazime e vetëm 2 humbje.

Edhe parashikimet japin portugezët si favoritë për të fituar ndeshjen dhe trofeun e Ligës së Kombeve. /ABC News Albania 24/7

anglia.jpg
G. P.14:20 | 06/06/2019

Holanda dhe Anglia do të luajnë sonte gjysmëfinalen e dytë të Ligës së Kombeve, me nisje në orën 20:45. Dy skuadrat pretendojnë suksesin, por anglezët pritet të kenë më shumë mungesa.

Detyrat me klubet përfunduan, por pushimet duhet të presin. Luhet gjysmëfinalja e Ligës së Kombeve dhe futbollistët e përzgjedhur të Anglisë e të Holandës, u paraqitën në bazat e tyre të grumbullimit, pak ditë më parë.

Nëse tek anglezët u takuan kundërshtarët e Liverpool-it e Tottenham-it, tek Holanda u pritën me brohoritje dy kampionët e rinj të Europës, Virgil Van Dijk dhe Georgino Wijnaldum. Tashmë, dy skuadrat janë në Portugali, ku do të luajnë gjysmëfinalen e Ligës së Kombeve, në orën 20:45 në stadiumin e Gimareshit.

A mund të ketë favoritë kjo përballje?

Vështirë të thuhet, ndërsa të dyja skuadrat janë në formë të mirë. Holanda shkaktoi të papritur në Ligën e Kombeve duke dalë e para në një grup të jashtëzakonshëm, bashkë me Francën dhe Gjermaninë.

Pavarësisht humbjes së fundit me gjermanët, në eleminatoret e Europianit, të mbiquajtur “tulipanët” janë tepër të fortë, me lojtarë të tillë si Van Dijk, De Ligt, Van De Beck apo De Jong.

“Ne jemi kthyer, – u shpreh trajneri Ronald Kuman, – vitet e krizës kanë kaluar dhe ne kemi sot lojtarë të shkëlqyer. Gjithsesi, dueli me Anglinë do të jetë I vështirë, pasi kundërshtari është I fortë, me potencial të madh. Mendoj se Anglia është pretendent i madh për Euro 2020-ën. Ne synojmë të fitojmë Ligën e Kombeve, por kjo nuk mund të krahasohet me Europianin apo Botërorin”.

Po Anglia, si duket në prag të sfidës?

Kapiteni Harry Kane ndoshta mund të mos luajë, po ashtu mund të jenë në stol edhe shumica e lojtarëve që ishin në finalen e Championsit.

Flitet për emra të njohur si Henderson, Dele Ali, Tripier apo Alexandre Arnold.

Gjithsesi, besimi është i madh se mund t’i dilet edhe me mungesa, ndonëse trajneri Gareth Southgate, vlerëson rivalin.

“Holanda ka ecur shumë përpara që nga ndeshja që luajtën ndaj nesh, – tha Southgate, – të dyja skuadrat kanë mjaft ngjashmëri, pasi kanë lojtarë të rinj dhe shumë të talentuar. Gjithnjë e kam admiruar Holandën e Gulitit, Van Bastenit e Rajkardit. Ne, gjithashtu, duam të krijojmë një skuadër spektakolare që të kënaqë tifozët, por po ashtu ne duam që të fitojmë”.

Tek Anglia pati një kaos lidhur me kapitenin për këtë ndeshje, pasi u publikua një deklaratë, sipas së cilës shiritin do ta mbante Rahim Sterling, dhe jo Kane apo Henderson.

Southgate nuk deshi ta komentonte këtë çështje, ashtu siç nuk dha asnjë informacion për lojtarët që do të hedhë në fushë si titullarë. Gjithçka duket gati dhe mirë për duelin e madh, por lajmet negative nuk munguan. Tre tifozë anglezë u ndaluan nga policia portugeze, që ndërhyri pasi plasën konflikte mes 20 000 tifozëve që kishin udhëtuar në Gimaresh për ndeshjen./ABC News Albania 24/7

ronaldo-1280x956.jpg
G. P.12:16 | 06/06/2019

Cristiano Ronaldo e rriti edhe më shumë legjendën e tij me 3 golat e shënuar ndaj Zvicrës në Ligën e Kombeve. Superylli portugez synon të fitojë një tjetër trofe të madh me kombëtaren.

Kombëtarja dhe Championsi janë “domenet” e tij.  Ashtu si fisnikët e vjetër, edhe Cristiano Ronaldo ka vënë “gardhin” tek ato që i quan tokat e vetat të paprekshme, dhe vazhdon të shënojë pa pushim.

Njeriu që dikur kritikohej se “zhdukej” në ndeshjet e mëdha, tani është mësuar t’i vendosë ato në favorin e ekipit të tij, siç bëri në gjysmëfinalen e Ligës së Kombeve ndaj Zvicrës, në “Estadio do Dragao” të Portos.

Një tjetër tregolësh i juventinit, dhe Portugalia kaloi në finale.  Nëse kurorëzohet gjithçka me sukses, CR7-ta do të ketë dy trofe në sezon, bashkë me titullin kampion në Itali.

Edhe pse nuk quhet një gjeni i futbollit, Ronaldo dëshiron me patjetër të hyjë në “Olimpin” e më  të mirëve, sidomos të mos mbetet prapa Mesit. Ai kaloi skuadrën e tij në epërsi në minutën e 25-të, por Zvicra e Shaqirit dhe Xhakës nuk u dorëzua, por luftoi fort, madje më mirë sesa vendasit.

Mbajti 55 për qind topin, dhe gjuajti 16 herë drejt portës, ndaj 10 të portugezëve.  Barazoi me penallti, me ndihmën e VAR-it, ku 11-metërshin e ktheu në gol Rodrigez në 57’.

Ishte një vendim që krijoi nerva dhe polemika, me vonesën e tij. Kjo, pasi portugezët prisnin penallti për ta, ndërsa arbitri gjerman Brih e dha për miqtë, për shkak të një aksioni të mëparshëm. Ndeshja po shkonte tek shtesat, por Ronaldo kishte mendim tjetër, duke mbyllur gjithçka me dy gola të shpejtë në fund, në minutat 88 dhe 90.

“Nuk kam preferenca për kundërshtarin në finale, – u shpreh Ronaldo pas ndeshjes, – këdo që të kemi përballë, do të jetë një betejë. Ishte një ndeshje e vështirë ndaj Zvicrës, që ka një seleksion të shkëlqyer. E dinim se nuk do të kishim shumë mundësi, ndaj duhej t’i shfrytëzonim siç duhej. Realizuam objektivin, dhe tani shpresoj që stadiumi të jetë plot dhe Portugalia të fitojë”.

Gazetat portugeze bënë garë kush e kush të gjente lavdërimin më të madh.

“A Bola” e quan Ronaldon qiellor: Kristo Mbret, që do të thotë “Krishti Mbret”!

“Rekord”: Ronaldo I paçmueshëm! Tregolëshin kalon seleksionin në finalen e Ligës së Kombeve! Duam shumë që ta fitojmë këtë kupë!

“O Zhogo”: I pakrahasueshëm! Tre gola të CR7-ës kalojnë Portugalinë në finalen e Ligës së Kombeve! Ronaldo: Tifozët na dhanë shumë forcë! Kapiteni ka 88 gola me kombëtaren!

Numri 7 tashmë ka lënë përfundimisht pas legjendën hungareze, Ferenc Pushkash, i cili ka 84 gola në kombëtare, ndaj 88 të portugezit. I vetmi që ia kalon ende është legjenda e Iranit, Ali Daei, që ka realizuar 109 rrjeta.

Në total, CR7-ta po arrin në 700 gola për klubet dhe kombëtaren, dhe shpejt do të hyjë në një klub vërtet të përzgjedhur. Ambicia e tij e jashtëzakonshme mund të bëjë që të fitojë trofeun e dytë të madh me Portugalinë pas Kampionatit Europian në 2016./ABC News Albania 24/7

LIGA-E-KOMBEVE-SHORTI-1280x720.jpg
ent ela13:48 | 04/12/2018

Holandë-Angli dhe Portugali-Zvicër është shorti i gjysmëfinaleve të Ligës së Kombeve. Duelet janë të forta, ndërsa zviceranët shpresojnë të dalin kampionë, nën drejtimin e yjeve me origjinë shqiptare si Granit Xhaka e Xherdan Shaqiri.

Njëri prej dueleve është vërtet i madh. Do të jetë Holandë-Angli gjysmëfinalja më klasike e Ligës së Kombeve në qershorin e vitit të ardhshëm.

Kjo doli nga përzgjedhja e goglave në shortin e hedhur nga UEFA, ndërsa sfida tjetër do të jetë Portugali-Zvicër. Holanda dhe Anglia janë dy prej skuadrave më të mëdha të botës, ndërsa kishin kohë pa u ndeshur në nivele kaq të larta.

Holandezët e trajnerit Ronald Kuman u kualifikuan në një grup jashtëzakonisht të vështirë duke eleminuar Francën, kampione të botës, dhe Gjermaninë.

Me yje të rinj dhe me lojë sërish offensive, kampionët e Europës të vitit 1988 janë sërish pretendentë për trofeun prestigjioz.

Anglia e trajnerit Sauthgejt, po ashtu, është rikthyer. Në grup, eleminoi gjithashtu rivalë të mëdhenj si Spanjën favorite dhe Kroacinë nënkampione të botës.

Shpikësit e futbollit konfirmuan atë që treguan në Kupën e Botës në Rusi, ndërsa Sauthgejt ka krijuar një ekip me shumë yje të rinj, që premtojnë sukses për një kohë të gjatë, nën udhëheqjen e kapitenit Harri Kejn.

Bilanci është në favor të anglezëve, por vitet e fundit më mirë kanë qenë holandezët. Gjysmëfinalja tjetër, është ajo Portugali-Zvicër.

Kampionët e Europës në fuqi mund të cilësohen favoritë, sidomos nëse në ekip kthehet edhe Kristiano Ronaldo.

Ata eleminuan në grup Italinë dhe Poloninë. Zvicra sot është më pak shqiptare nga numri I lojtarëve në fushë, por më shumë shqiptare nga ndikimi i tyre.

Granit Xhaka është kapiten me Xherdan Shaqirin si yll kryesor, dhe ata e treguan veten duke eleminuar Belgjikën e fortë dhe Islandën.

Portugali-Zvicër luhet në 5 qershor në stadiumin e Portos në Portugali, ndërsa Holandë-Angli, në 6 qershor në Gimaresh, me finalen po në Porto në 9 qershor. /abcnews.al

kosova-1.jpg
G. P.12:54 | 21/11/2018

Kosova arrin një triumf të madh futbolli, vetëm pak kohë pas pranimit në UEFA dhe FIFA. Sukses në Ligën e Europës dhe kalim në plej of-in për në Kampionatin Europian.

Tre vjet më parë festuan, por për vëllezërit përtej kufirit. Çmenduria në Prishtinë ishte për kualifikimin e kombëtares së Shqipërisë në Euro 2016, ndërsa mbrëmjen e fundit suksesi ishte në shtëpi. Shqiptarët e Kosovës, e ndoshta edhe etni të tjera të shtetit të ri europian, kremtuan kalimin e grupit nga ekipi i tyre përfaqësues. Suksesi 4-0 ndaj Azerbajxhanit e kaloi në gjysmëfinalen e Ligës së Kombeve, dhe pjesëmarrjen në plej ofin e Europianit 2020, një arritje thuajse e pabesueshme për një ekip të pranuar në futbollin ndërkombëtar vetëm tre vjet më parë.

Festimet në stadiumin “Fadil Vokrri” ishin krejtësisht të ligjshme, sidomos për mënyrën sesi u arrit ky triumf. Kosova, që pësoi thellë nga Kroacia në eleminatorete Botërorit, këtë herë pati 4 fitore, 2 barazime dhe asnjë humbje, ndonëse niveli i kundërshtarëve ishte më i ulët. Jo vetëm kaq, por shënoi më tepër se thuajse çdo ekip tjetër në Ligën e Kombeve. Arbër Zeneli ishte heroi kryesor me tre golat e tij, dhe sulmuesi i Herenvenit në Holandë konfirmoi sezonin shumë të mirë që po zhvillon. Mediat ndërkombëtare e patën jehonën e tyre. Televizioni amerikan lavdëron suksesin dhe Arbër Zenelin, autor të tre golave, që siguroi ngjitjen një kategori më lart, në nivelin C.

“Uashington Posti”: Debutuesja Kosovë siguron vendin në plej ofin e Europianit 2020”.

Mediat ndërkombëtare theksojnë se ky sukses u arrit vetëm 2 vjet pas pranimit të Kosovës në UEFA, ndërsa Arbër Zeneli shënoi një hatrik.

Gazetat serbe nuk i kushtuan shumë rëndësi fitores, por “Telegrafi” theksoi se “futbollistët shëruan plagët e shqiptarëve pas fiaskos së Interpolit. Kosova shkatërroi 4-0 azerët dhe zuri vendin e parë. Një humbje politike, por një fitore futbolli”.

Trajneri Bernar Shaland shpjegon sesi e përgatiti ekipin.

“Ishte një ndeshje shumë e rëndësishme sepse fituam dhe u kualifikuam për në gjysmëfinale. Jemi rritur shumë si skuadër, kemi më shumë cilësi dhe më shumë përvojë. Natyrisht, që e përgatitëm ndeshjen taktikisht dhe teknikisht, por edhe nga ana psikologjike. U thashë lojtarëve që të jenë si gladiatorë në fushë. Suksesi ishte i gjithë skuadrës, pasi mbrojtësit, mesfushorët e sulmuesit ndihmuan njëri-tjetrin”.

Kosova është vetëm dy hapa nga fitorja e një trofeu, edhe pse të nivelit të katërt europian, ndërsa në gjysmëfinale ka si rivalë të mundshëm, Gjeorgjinë, Bjellorusinë e Maqedoninë./abcnews.al

kristian-panuci.jpg
G. P.12:13 | 21/11/2018

Kristian Panuçi nuk dorëzohet dhe ndihet më I fortë pas fitores me Uellsin. Trajneri italian as nuk dëshiron të dëgjojë për dorëheqje, ndërsa shpreson ta ndryshojë kombëtaren.

Një fitore e vogël, por edhe kaq mjafton për të qenë më i qetë. I tillë u ndje trajneri i Shqipërisë, Kristian Panuçi, pas suksesit të diskutueshëm ndaj Uellsit, dhe kjo u duk në analizën që bëri. Një gol i vetëm dhe shumë vështirësi për të fituar një miqësore, që vlen shumë më pak se një duel zyrtar.

“Ishte fitore e rëndësishme sepse dhamë një sinjal pas një Lige të shëmtuar të Kombeve që zhvilluam. Ndryshova diçka me lojtarët, duke i dhënë ekipit më shumë ekuilibër. Jam i lumtur për lojtarët dhe për federatën, sepse që të gjithë vuajmë kur humbasim. Kjo nuk duhet të na bëjë të mendojmë se nuk kemi probleme, sepse kemi ende shumë probleme”, u shpreh trajneri i kombëtares.

Panuçi konfirmoi ndryshimin taktik dhe vlerësoi skuadrën, sidomos në pjesën e dytë.

“Kur ju thashë përpara ndeshjes se ishte faji im, kjo do të thotë se duhej të ndryshoja diçka. Mendoj se pas këtij ndryshimi, djemtë u ndjenë më mirë, ndonëse ishte thjesht një miqësore. Në pjesën e dytë ishte më e vështirë sepse hynë në fushë Bejl apo Ramsej, dhe atyre nuk u pëlqen të humbasin. Ne u treguam të zotët për t’i përballuar, duke qenë kompaktë, e duke dalë tri-katër herë në kundërsulm për të bërë golin e dytë”, tha Panuçi.

Trajneri këmbënguli fort në një fakt të rëndësishëm.

“E ardhmja ime? Është e vërtetë që fitoret krijojnë atmosferë të mirë, dhe është normale që pozicioni im vihet në diskutim. Lojtarët kanë punuar gjithnjë mirë. Nëse do të kisha menduar se lojtarët nuk ishin me mua, do të kisha shkuar tek presidenti për t’i kërkuar dorëheqjen”, tha ai.

Ja dhe një pyetje e drejtpërdrejtë, a do ta japë dorëheqjen pas dështimit në Ligën e Kombeve?

“Unë nuk jap kurrë dorëheqje, sepse më pëlqen të luftoj, nuk dorëzohem. Nuk e braktis varkën kur ajo është në vështirësi”, u përgjigj Panuçi./abcnews.al

kosova.jpg
G. P.15:19 | 20/11/2018

Kosova i ka të gjitha mundësitë që të kualifikohet dhe të ngjitet një kategori më lart në Ligën e Kombeve. Luan në orën 20:45, ndaj Azerbajxhanit në Prishtinë dhe i mjafton një barazim.

Edhe pse trajneri Shaland ende druhet, kjo skuadër po fluturon. Kosova i ka të gjitha gjasat që të sigurojë sonte kualifikimin për në gjysmëfinalet e Ligës së Kombeve dhe të ngjitet një kategori më lart. Fitorja 5-0 në fushën e Maltës e vendosi në pozita komanduese në grupin 3, pasi ndodhet në vendin e parë me 11 pikë, dy më shumë sesa Azerbajxhani i vendit të dytë.

Do të ketë përballë pikërisht Azerbajxhanin, në sfidën e orës 20:45 në stadiumin “Fadil Vokrri” në Prishtinë dhe i mjafton një barazim për të realizuar objektivin. Trajneri zviceran, Bernar Shaland, gjithsesi është përpjekur të ulë entuziazmin e një grupi lojtarësh pa përvojë.

“Nuk mund të gëzoheshim shumë pas Maltës, u shpreh ai, kjo, pasi finalen e kemi me Azerbajxhanin dhe nuk jemi ende të kualifikuar. Skuadra po luan shumë mirë, në sulm dhe në mbrojtje, por në futboll nuk mund ta mendosh suksesin të sigurt, përpara kohe”.

Ky është edicioni i parë i Kosovës në Ligën e Kombeve, menjëherë pasi mori pjesë për herë të parë në eleminatoret e Kupës së Botës. Federata e Futbollit e Kosovës u njoh nga UEFA dhe nga FIFA në vitin 2016, dhe ekipi përfaqësues në Ligën e Kombeve ka bërë një përparim shumë të madh, duke pasur një grup shumë të mirë lojtarësh, e duke qenë ambicioz në Europianin e ardhshëm./abcnews.al

virgil.jpg
G. P.11:50 | 20/11/2018

Holanda arriti një kualifikim dramatik për në gjysmëfinalen e Ligës së Kombeve. Barazimi 2-2 në Gjermani erdhi pas një lëvizjeje taktike të trajnerit Ronald Kuman.

Epoka e re e premtuar u duk se nuk do të vinte. Në stadiumin e Gelsenkirshenit, Holanda po humbiste ndaj Gjermanisë dhe po shkonte drejt një eleminimi të papritur nga Liga e Kombeve, kur papritur diçka ndodhi. Virgil Van Dajk, mbrojtësi kryesor i skuadrës, papritur doli në sulm dhe shënoi golin e barazimit në sekondat shtesë. “Portokallinjtë” morën barazimin që u duhej, eleminuan Francën kampione të botës, dhe shkuan në katërshen e më të mirëve të këtij garimi.

Nuk shkuan kot heroizmat e mëparshme në grup, me fitoret e bujshme 3-0 ndaj gjermanëve dhe 2-0 ndaj francezëve. Tifozët mund të mbeten me shpresë se kjo është një rilindje, një kthim në kohën e Krujfit apo Van Bastenit, pavarësisht se ekipi i tyre i bëri me zemër. Gjermania kryesoi 2-0 në “Feltins Arena”, duke shënuar shpejt në pjesën e parë, e duke dominuar lojën për gati 80 minuta.

Me të drejtë gazeta “Algemen Dagblad” thekson:

Portokallinjtë vazhdojnë përpara. Holanda barazon me cinizëm dhe eleminon Francën në Ligën e Kombeve.

Gazeta “De Telegraf” po ashtu vlerëson golin e Van Dajkut që, sipas saj, bëri drejtësi duke i dhënë kualifikimin Holandës.

Trajneri Ronald Kuman u vlerësua si njeriu që fitoi ndeshjen. Fotografët zbuluan një copë letër, që ishte plani taktik i tij në minutat e fundit, duke nxjerrë në sulm pikërisht qendërmbrojtësin e Liverpulit, Van Dajk, atë që shënoi golin e kualifikimit.

“Ishte një kualifikim i merituar nga ana jonë, – tha Kuman pas ndeshjes, – e vërtetë që Gjermania na vuri në vështirë, dhe unë e prisja këtë plotësisht, por ne kemi meritën që nuk u dorëzuam deri në fund. Ishim skuadra më e mirë e grupit”.

Holanda u bashkua me Anglinë, Portugalinë dhe Zvicrën në gjysmëfinalet e nivelit A të Ligës së Kombeve, me titullin kampion që do të vendoset në qershor./abcnews.al

KUALIFIKOHET-ANGLIA.mpg_snapshot_01.13-1280x720.jpg
ent ela20:46 | 18/11/2018

Anglia u kualifikua me meritë për në gjysmëfinalet e Ligës së Kombeve, pas fitores ndaj Kroacisë. Suksesi 2-1 u arrit me përmbysje dhe anglezët lanë prapa kroatët dhe spanjollët.

Nuk ishte favorite, por ia doli. Anglia, skuadra e cilësuar si shumë e talentuar, por me tepër pak përvojë, përballoi presionin dhe kundërshtarët më me emër për t’u kualifikuar për në gjysmëfinalen e Ligës së Kombeve. Triumfoi 2-1 me përmbysje ndaj Kroacisë në “Uembli” të Londrës, duke zënë vendin e parë në grupin 4 të nivelit A. Formacioni kroat, nënkampion i botës në fuqi, zbriti nga kategoria, ndërsa Spanja që u cilësua favorite pas ndeshjeve të para mbeti në vend të dytë.

Anglezët e trajnerit Garet Sauthgejt patën epërsi, dhe krijuan disa rastë në pjesën e parë, të cilën duhej ta kishin mbyllur në avantazh. Nuk ia dolën dhe u ndëshkuan kur ballkanasit realizuan gjuajtjen e parë në portë, duke shënuar me autor sulmuesin Andrej Kramariç. Sidoqoftë, vendasit treguan nerva të forta duke ruajtur qetësinë e duke arritur përmbysjen e rezultatit. Sauthgejt bëri lëvizjen që rezultoi fituese, hodhi në fushë si zëvendësues Lingardin e Sançon. Ishte pikërisht Lingard që barazoi rezultatin në minutën e 78-të, ndërsa kapiteni Harri Kejn shënoi 5 minuta para fundit.

A mund të thuhet se shpikësit e futbollit janë tani gati për një trofe të madh? Ata janë të bindur, ndonëse në gjysmëfinale padyshim që do të duhet të përballojnë sfida të tjera të forta. Kualifikimi ishte tërësisht i merituar, pasi Anglia mundi Spanjën në Spanjë, pasi dështoi në “Uembli”, si dhe luajti më mirë se Kroacia në barazimin pa gola në Zagreb./abcnews.al

FORMACIONI-SHQIPERIA.mpg_snapshot_00.26-1280x720.jpg
G. P.18:14 | 17/11/2018

Shqipëria do të zbresë në Loro Borici me formacion që ka në përbërje disa lojtarë sulmues por me mbrojtje të ngjeshur. Ndeshjen e fundit për Ligën e Kombeve, kuqezinjtë kërkojnë ta mbyllin me rezultat pozitiv.

Pas pak orësh, Shqipëria do të luajë ndeshjen e fundit për Ligën e kombeve. Në “Loro Borici”, ndaj Skocisë do të tentohet të bëhet maksimumi pasi është mundësia e fundit për të shpresuar në një kalim grupi, por edhe për çështje krenarie. Në ndeshjen e parë në Glasgow, kuqezinjtë humbën me lojë të shëmtuar madje. Për ndeshjen e mbrëmjes së sotme Christian Panucci ka ndërtuar një formacion ku i kushtohet më së shumti vëmendje repatit të mnbrojtjes dhe sulmit.

Me modulin 4-2-3-1, duket qartë se italiani kërkon të marrë rezultat. Strakosha në portë do të ketë përpara në mbrojtje veselin Gjimshitin mavrajn dhe Binakun. Para tyre Xhaka Kace ose Lilaj. Të avancuar në mesfushë do të Jenë Uzuni, Memushaj dhe Grezda. Dy lojtarët e krahut pritet të jenë të rrezikshëm para portës. Ndërsa bekiom Balaj është sulmuesi i vetëm i deklaruar. Skocezët kanë shumë mungesa për shkak dëmtimesh dhe pezullimesh dhe me gjendjen e tyre do të tentojnë një barazim në shkodër për të tentuar kalimin në një grup më lart në ndeshjen e kthimit në shtëpi me izraelin./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono