largim

angela-merkel-1-e1526466537940.jpg
G. P.11:34 | 29/10/2018

Angela Merkel ka njoftuar se do të tërhiqet nga postet politike pas  vitit 2021. Ajo tha se nuk do të rikandidojë për drejtimin e partisë dhe si kancelare. Vendimet u morën pas humbjes së votave në zgjedhjet rajonale.

Është fundi i një karriere të gjatë politike. Kancelarja gjermane, Angela Merkel, duke marrë parasysh rezultatet e marra në zgjedhjet rajonale, bëri dy njoftime shumë të rëndësishme sa i përket të ardhmes së saj. Pas 18 vitesh, ajo tha se do të largohet nga presidenca e Unionit Kristiandemokrat në Dhjetor, kur dhe mbahen zgjedhjet e reja brenda partisë. Vendimin e bëri të ditur në një konferencë për shtyp në Berlin, pas rezultatit zhgënjyes në zgjedhjet rajonale në Hessen, ku CDU e saj humbi 11% të votave në krahasim me zgjedhjet e 2013-s.

“Jam e gatshme të punoj si kancelare deri në fund të mandatit të 2021, por nuk do të rikandidoj përsëri për postin e kancelarit dhe nuk do të mbaj asnjë rol në  Evropë”, shpjegoi ajo.

Merkel pranoi se nuk mund të ecet përpara kështu.

Angela Merkel: “Ka ardhur koha për të hapur një kapitull të ri. Si kancelare dhe kryetare marr përgjegjësi për situatën. Është e qartë se kështu nuk mund të ecet përpara. Imazhi i qeverisë është i papranueshëm dhe kjo ka shkaqe më të thella se komunikimi”.

Merkel ka folur edhe për atë se çfarë do të ndodhë pas largimit të saj dhe nënvizoi se nuk do të përdorë pozitën e saj brenda CDU-së për të ndikuar lidhur me emrin e pasuesit të saj. Ndërkohë, mediat gjermane duke iu referuar burimeve të tyre kanë  bërë me dije se ish-shefi i grupit të Unionit, Friedrich Merz është i gatshëm të kandidojë për presidencën e CDU-së në kongre sin e ardhshëm. Përveç tij, edhe sekretari i përgjithshëm i kësaj partie Anngret Kramp-Karrenbauer ka njoftuar kandidimin.

Pas konfirmimit të vendimeve nga Merkel kanë ardhur edhe reagimet e para të koalicionit qeverisës. Lideri i Unionit Kristiansocial dhe njëkohësisht ministër i Brendshëm, Horst Seehofer tha se largimi i Merkel nga politika është një vendim për të ardhur keq./abcnews.al

lulzim-basha.jpg
G. P.09:39 | 27/10/2018

Lulzim Basha ka reaguar në Facebook pas dorëheqjes nga posti i ministrit të Brendshëm Fatmir Xhafaj. Kreu i opozitës e konsideron një hap të rëndësishëm në betejën për të pastruar politikën nga krimi.

“Largimi i Fatmir Xhafës, të vetmit ministër të Brendshëm në Europë me vëllain trafikant droge, është një hap i rëndësishëm në betejën tonë për të pastruar politikën nga krimi. Me Fatmir Xhafën krimi vuri nën kontroll të plotë policinë dhe prokurorinë. Por largimi i tij është vetëm fillimi i shkërmoqjes së bashkëqeverisjes së Edi Ramës me krimin. Beteja për çlirimin e politikës, ekonomisë dhe shoqërisë nga krimi do të vazhdojë deri në fitore. Shqiptarët meritojnë një qeveri që punon për njerëzit”, shkruan Basha.

Dorëheqjen e Fatmir Xhafajt e konfirmoi sot Edi Rama. Ai falenderoi Xhafajn për kontributin e tij në krye të këtij dikasteri si dhe tregoi edhe emrin e ri që do të mbajë këtë post. Ai është gjeneral Sandër Lleshi, i cili më parë mbante postin e këshilltarit për sigurinë kombëtare pranë kryeministrit.

/abcnews.al

skenderbej.png
G. P.17:30 | 20/10/2018

Agjencia e lajmeve Reuters raporton se sipas sondazheve më të fundit, më shumë se gjysma e popullsisë në Shqipëri dëshiron të largohet nga vendi. Objektivat kryesore janë jetesë dhe arsimim më i mirë.

Sipas një studimi, më shumë se gjysma e shqiptarëve do të dëshironte të shkonte në vende më të pasura me shkollim më të mirë. Studimi, i udhëhequr nga Russell King i Universitetit të Sussex dhe studiuesi shqiptar Ilir Gedeshi, zbuloi se potenciali i migrimit është rritur nga 44% në vitin 2007, në 52% këtë vit.

Lajmi është publikuar nga agjencia e lajmeve Reuters, e cila ndër të tjera shkruan se që kur Shqipëria rrëzoi komunizmin më 1991, më shumë se 1.4 milionë shqiptarë, gati gjysma e popullsisë aktuale e vendit ballkanik, ka emigruar kryesisht në Italinë fqinje dhe Greqi dhe më pak në Britani, Gjermani dhe Shtetet e Bashkuara të Amerikës.

Studimi tregoi se arsyet ekonomike janë akoma faktori kryesor dhe se tani preferohet Gjermania dhe SHBA. Rreth 65 mijë shqiptarë kërkuan azil në Gjermani në vitet 2015-16. Shumica e tyre u refuzuan pasi vendi filloi të mirëpriste sirianët që iknin nga lufta në vend.

Gjermania ka mirëpritur mjekët dhe infermieret, gati të gjithë të diplomuarit e rinj. Ndërsa kriza globale dhe ekonomike e vitit 2008 goditën ekonomitë e Italisë dhe të Greqisë, 133.544 emigrantë shqiptarë u kthyen në atdhe. Njerëzit duan të emigrojnë për një arsimim më të mirë.

Një pjesë dëshiron të largohet sepse nuk sheh asnjë të ardhme në Shqipëri. Duke pasur parasysh profilin në rritje të edukimit të migrantëve potencialë, studimi rekomandon që Shqipëria të kërkojë marrëveshje për migrimin e aftë të menaxhuar./abcnews.al

GUTERRES-UNMIK_ABC-M1-T1.mpg_snapshot_00.01.jpg
G. P.15:40 | 19/10/2018

Sipas mediave serbe, sekretari i përgjithshëm i Kombeve të Bashkuara Antonio Guterres po shqyrton kërkesën e ish ambasadores amerikane në OKB, Niki Hejli, për largimin e Unmik nga Kosova.
Sekretari i Përgjithshëm i OKB-së, Antonio Guterres, po merr në konsideratë kërkesën e Shteteve të Bashkuara të Amerikës për strategjinë e tërheqjes së misionit të OKB-së në Kosovë. Sipas agjencisë serbe të lajmeve Beta, kjo është konfirmuar nga selia e organizatës së Kombeve të Bashkuara me seli në Nju York.

Të pyetur nëse Sekretari i Përgjithshëm ka pranuar letrën e ish ambasadores amerikane në OKB, Nikki Haley, dhe cilat janë procedurat e mëtejshme që duhen ndërmarrë, zëdhënësi i zyrës së Guterres, u shpreh se mund të konfirmonte se sekretari i Përgjithshëm e ka parë letrën dhe është duke e analizuar. Në letrën e Hejli dërguar Guterres më 9 tetor, ambasadorja amerikane ka kërkuar hartimin e një strategjie për largimin e UNMIK-ut nga Kosova. Një kërkesë që në Beogard është cilësuar si një iniciativë për tërheqjen e UNMIK-ut nga Kosova./abcnews.al

modricccc-1280x720.jpg
G. P.16:14 | 04/08/2018

Reali nuk do të lejojë largimin e kroatit Luka Modriç për tek Interi. Klubi madrilen e cilëson të pazëvendësueshëm lojtarin më të mirë të Kupës së Botës në Rusi.

Italianët kanë shpresë të shtojnë edhe një kroat tjetër, por duket e vështirë. Luka Modriç, superylli kroat, nuk pritet ta ketë të lehtë të largohet nga Reali edhe pse dëshira e tij duket se është Interi.

Presidenti Florentino Perez dhe trajneri Julen Lopetegui kanë diskutuar mes tyre dhe kanë vendosur se regjisori 32-vjeçar është i pazëvendësueshëm për kampionët e Europës.

Lopetegui kërkon një lojë të shpejtë e vertikale, dhe për këtë janë të domosdoshëm lojtarë të mesfushës si Modriç, Kross apo Casemiro, baza e suksesit të deritanishëm.

Perez ka ritheksuar se do të duhen plot 750 milionë euro për ta lejuar kroatin që të largohet, ndryshe nga lëshimi që bëri për Cristiano Ronaldon, duke pranuar diçka më shumë se 100 milionë.

Serioziteti i Madridit duket nga fakti se Perez apo Lopetegui nuk kanë bërë asnjë përpjekje për të gjetur një zëvendësues për numrin 10. Modriç ka 6 vjet me Realin dhe ka fituar gjithçka, veçse mosha e tij gati 33-vjeçare nuk i ka stepur drejtuesit madrilenë.

Botërori e tregoi qartë se në rruzull, sot për sot, nuk ka asnjë të ngjashëm me të. Jo më kot, kapiteni i Kroacisë u shpall lojtari më i mirë i Kupës së Botës në Rusi, dhe arriti finalen./abcnews.al

ozil.jpg
G. P.11:20 | 23/07/2018

Mesfushori i Arsenalit me origjinë turke, Mesut Ozil, konfirmoi se nuk do të luajë më me kombëtaren gjermane pasi në Federatën Gjermane të Futbollit është përballur me racizëm dhe diskriminim.

Mesut Ozil konfirmoi tërheqjen e tij nga kombëtarja gjermane, si pasojë e polemikave pas takimit të tij me presidentin turk Erdogan në muajin Maj të këtij viti. Mesfushori i Arsenalit, që u eliminua me Gjermaninë në fazën e grupeve në botërorin Rusi 2018, ishte objekt kritikash për lojën e tij dhe për takimin me presidentin turk.

Lojtari, i cili ka origjinë turke mbrojti veten me anë të një letre të gjatë, ku nuk i kurseu kritikat për Federatën Gjermane të Futbollit. Ozil shpjegoi ndër të tjera se trajtimi që i ishte bërë nga federate gjermane dhe nga shumë të tjerë, e ndalonte atë që të vishte sërish fanellën e kombëtares gjermane. Ai theksoi se ndihej i padëshiruar dhe çdo gjë që ai dhuroi me debutimin në 2009-n ishte harruar.

Duke iu referuar në mënyrë të drejtpërdrejtë Reinhard Grindel, presidentit të federatës, mesfushori shtoi se personave me qëndrim racial dhe diskriminues nuk u duhet lejuar që të punojnë në federatën më të madhe të futbollit në botë. Kjo pasi sjellja e tyre nuk reflekton lojtarët që përfaqësojnë.

“Në sytë e Grindel dhe njerëzve të tij unë jam gjerman kur fitojmë, por jam emigrant kur humbasim. Me zemër të rënduar dhe pas një reflektimi të gjatë kam vendosur se nuk do të luaj më për Gjermaninë pas kësaj shfaqjeje racizmi dhe mungese respekti”, përfundon Ozil..abcnews.al

TRUMP-POPULLARITETI-1280x720.jpg
G. P.13:29 | 12/07/2018

Pas dokordësimit të vendeve anëtare të NATO për rritjen e shpenzimeve, Presidenti amerikan Donald Trump ka ndryshuar qëndrimin e tij për tërheqjen e SHBA nga Aleanca ushtarake. Në përfundim të takimit mes 29 liderëve të aleancës, Trump deklaroi  rritjen e shpenzimeve me 33 miliardë dollarë.

“Mund të largoheshim nga NATO, por nuk do ta bëj”.

Kështu Donald Trump tërheq kërcënimin për të lënë Aleancën Atlantike në rast se aleatët nuk do të rrisin shpenzimet ushtarake. Kthesa erdhi pas qëllimit të anëtarëve, të njoftuar nga vetë presidenti amerikan, për të “rritur kontributin e mbrojtjes me 33 miliardë dollarë”. Fjalët e kreut të Shtëpisë së Bardhë kishin bërë që NATO të thërriste një mbledhje të jashtëzakonshme.

“Besoj në NATO, të gjithë shtetet anëtare janë dakordësuar të rrisin shpenzimet për mbrojtjen në nivele që nuk janë parë ndonjëherë. Aleanca është shumë më e fortë se dje”, ka nënvizuar Trump.

“Vendeve u kisha bërë me dije – shton ai – se isha shumë i pakënaqur me shpenzimet në mbrojtje, pasi Shtetet e Bashkuara paguajnë 90% dhe kjo nuk është e drjetë. Por sot kemi një NATO më të fortë se dy ditë më parë pasi të gjithë janë të angazhuar në rritjen e kontributeve ushtarake”.

Numri një në Shtëpinë e Bardhë kishte shpresuar që vendet e Aleancës së Atlantikut të rrisnin investimet e tyre në mbrojtje në 4% të Prodhimit të Brendshëm Bruto. Gjatë fjalës së tij në sesionin e punës të dedikuar për marrëdhëniet midis NATO-s dhe Ukrainës, Trump përsëri sulmoi Gjermaninë dhe u drejtua nga partnerët e tjerë me tone më të ashpra sesa ato të përdorura të mërkurën. Duke folur në samit, presidenti amerikan kërkoi një përpjekje të menjëhershme që shpenzimet e tyre të mbulojnë 2% të prodhimit të brendshëm bruto, në respektim të objektivit të vendosur për vitin 2024.

“Nëse kjo nuk do të ndodhë, do të vazhdoj rrugën time”.

Ky ishte paralajmërimi i fortë, i bërë gjatë takimit të vendeve anëtare me presidentin e Ukrainës Petro Poroshenko, që shkaktoi “çështjen Trump”. Fraza u interpretua nga disa media gjermane dhe belge si një kërcënim nga SHBA për largim nga NATO.

TRUMP-MACRON-G7-1280x720.jpg
G. P.12:43 | 30/06/2018

Sipas Washington Post presidenti amerikan Donald Trump i ka kërkuar në mënyrë të qartë homoogut të tij francez Emanuel Macron që të largohet nga Bashkimi Europian. Në shkëmbim të kësaj i ka premtuar marrëveshje të leverdisshme tregtare mes dy vendeve.

Dalja nga Bashkimi Europian në shkëmbim të një marrëveshjeje të leverdisshme tregtare mes dy vendeve. Është ky propozimi i Donald Trump për Emmanuel Macron në fund të muajit Prill, kur presidenti francez vizitoi Shtëpinë e Bardhë. Lajmi është publikuar nga Washington Post që citon dy funksionarë europianë të cilët kanë zgjedhur të qëndrojnë anonimë.

Por në artikullin e prestigjozes nuk thuhet se si është përgjigjur Macron ndaj këtij propozimi që sugjeron një marrëveshje më të mirë se sa ajo mes Shteteve të Bashkuara të Amerikës dhe Bashkimit Europian. Edhe pse një ofertë e tillë është në linjë me qëndrimin e Trump ndaj organizatave mdërkombëtare, Post thekson se kreu i Shtëpisë së Bardhë nuk ishte informuar si duhet për qëndrimet politike të presidentit francez.

Se pse pikërisht në rimëkëmbjen e Europës dhe në rolin e Francës në Bashkimin Europian, Macron ka ndërtuar programin e tij elektoral që e nxori fitues. I pyetur për këtë shkrim të së përditshmes amerikane, Macron tha se të gjithë e dinë impenjimin e tij për Europën dhe në këtë mënyrë mund të merret me mend se si i është përgjigjur ai Trump.

Nga ana tjetër ka reaguar presidenti i Komisionit Europian, Juncker, i cili u shpreh se dyshonte shpesh që Trump dëshiron të përçajë Bashkimin Europian. Më pas Jean Cleaude Juncker konfirmoi se do të udhëtonte në Shtetet e Bashkuara të Amerikës për t’i prezantuar kreut të Shtëpisë së Bardhë këndvështrimin europian./abcnews.al

pd-1.jpg
G. P.16:28 | 06/06/2018

Deputetët demokratë, në vijim të strategjisë së pjesëmarrjes në komisione parlamentare për artikulimin e mesazhit të tyre politik, u mblodhën tek ai i medias ku përsëritën se me ministrin e Brendshëm, Fatmir Xhafaj, Shqipërisë nuk i hapen negociatat për antarësim në samitin e Qershorit.

Ishte mbledhja e grupit parlamentar në selinë blu rreth orës 12:30 minuta, ajo e cila rikonfirmoi vijimin e praktikës disa javore të demokratëve: pjesëmarrje e kushtëzuar në parlament, vetëm për denoncimin e çështjes “Xhafaj”, ashtu si moskonformimi me rendin e ditës edhe në seancë plenare. Në përfundim të takimit me deputetët e grupit të tij parlamentar, kreu i selisë blu, Lulzim Basha, nuk pati asnjë komunikim me mediat, larg te cilave qëndron prej mbi 1 jave.

“Në ikje e sipër është plani i kokainës. 2 miliardë e gjysëm euro thonë OKB, por krimi më i madh nuk është ky. 2.8 përqinde pupullsisë janë “addicted”, janë 80.000 shqiptarë që nuk e dinë a e kanë jetën të sigurtë nesër apo jo. Është e vështirë të dalin nga kjo rrugë pa një punë serioze nga të gjithë ne.”

Demokratët kishin paralajmëruar edhe pjesëmarrjen në një mbledhje mes antarëve të komisionit të ligje në orën 14:00, të parashikuar si takim me ekspertë. Por me njohjen e faktit se takimi do të mbahej pa praninë e mediave, demokratët bojkotuan pjesëmarrjen duke mos u paraqitur në ambientet e kryesisë së Kuvendit./abcnews.al

zidane.jpg
G. P.22:57 | 05/06/2018

Zinedine Zidane pati një arsye të fortë për t’u larguar nga Reali i Madridit. Mediat raportojnë se legjenda franceze pati mosmarrëveshje me presidentin Florentino Perez.

Kur u shfaq para mediave në krah të presidentit, askush nuk e priste.

Shtangia ishte e plotë, kur Zinedine Zidane tha fjalët tashmë të famshme se “vendosa të mos vazhdoj sezonin tjetër si trajner i Realit të Madridit”, ndërsa nxitoi të shtonte se “fola me presidentin për t’i shpjeguar atë që mendoja”.

Gjithsesi, askush nuk mbeti i bindur për ato që u dhanë si arsye të largimit të tij nga klubi më i madh i botës”.

Nuk kanë kaluar shumë ditë, dhe mediat raportojnë se ishte një mosmarrëveshje mes trajnerit, tashmë një ish, dhe presidentit të plotfuqishëm Florentino Perez, që solli vendimin që të gjithë e dimë.

Përse ky konflikt mes dy njerëzve që ngjanin si vëllezërit siamezë?

Gjithçka lidhur me planet për të ardhmen, për lojtarët që duhej të afroheshin në klub.

Zidan, mësohet se dëshironte me patjetër të merrte yllin e Çelsit, Eden Hazar, pavarësisht sesa mund të kushtonte ai, 100 apo 150 milionë euro.

Presidenti kishte ide të tjera, dhe dëshironte portierin e Mançester Junajtidit, dhe të Spanjës, David De Gean.

Duhej marrë ose njëri, ose tjetri, ndërsa ndoshta nuk ka pasur dakordësi as për brazilianin Nejmar.

Pasi Perez këmbënguli për De Gean, mediat shkruajnë se Zidan iu përgjigj: “Unë nuk vazhdoj më tej, merre ti drejtimin e skuadrës”.

Përpjekjet e mëvonshme të numrit 1 të klubit për ta bindur, mesa duket nuk patën vlerë, dhe gjërat precipituan shpejt.

Zidan u largua në kulmin e lavdisë, tri herë kampion i Europës, fitues i vjetshëm i La Ligës, fitues i dy Superkupave të Europës dhe dy Kupave të Botës për klubet.

Tashmë, Reali po kërkon ethshëm një pasardhës të francezit, por ende nuk po e gjen./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono