largim

juan-felipe.jpg
Vladimir Prenga13:20 | 08/11/2019

Shkëndija e mori në verë si një nga afrimet më të bujshme, por mesfushori brazilian. Juan Felipe, ka rezultuar një lëvizje e gabuar te kuqezinjtë e Tetovës. Pasi ishte paraqitur mirë te Vardari, 31-vjeçari nuk e gjeti veten te skuadra shqiptare në Maqedoninë e Veriut.

Ai luajti në 10 ndeshje, tetë si titullar dhe shënoi një gol, ndërkohë që sot ka ardhur zyrtarisht edhe ndërprerja e kontratës. Klubi i Shkëndijës ka dalë edhe me një njoftim zyrtar, teksa e cilëson këtë lëvizje si më të mirën për lojtarin dhe vetë klubin.

“Klubi i Futbollit Shkëndija komunikon ndërprerjen e bashkëpunimit me futbollistin brazilian, Juan Felipe. Kryesia e klubit dhe futbollisti, në takim të përbashkët kanë ardhur në përfundim se në këtë moment ndarja është në interes të të dyja palëve, kështu që është gjetur akordi për shkëputjen e parakohshme të kontratës.

KF Shkëndija falënderon Juan Felipen për kontributin e dhënë në fanellën kuqezi gjatë periudhës që ishte pjesë e jona, duke i dëshiruar suksese në të ardhmen”, thuhet në njoftimin e Shkëndijës së Tetovës, në sajtin zyrtar. /abcnews.al

njoftimi-i-shkollave.jpg
ad min13:41 | 09/09/2019

Kioskat që tregtojnë produkte ushqimore apo mallra të tjera pranë godinave arsimore do të hiqen. Vendimi është marrë nga Bashkia e Durrësit, e cila do të nisë aksionin për largimin e tyre nga shkollat. Shkak për këtë është bërë helmimi i fëmijëve nga konsumimi i këtyre produkteve.

Janë me dhjetëra kioskat e vendosura pranë godinave arsimore. Të konsideruara shpesh herë të rrezikshme për konsumatorët e vegjël, e ku në jo pak raste janë helmuar nga përdorimi i tyre, ka detyruar autoritet vendore të marrin masa. Në secilin prej tyre ka një njoftim që paralajmëron largimin prej aty.

Pas procedurave ligjore, do të organizohet një aksion për lirimin e këtyre hapësirave publike në këtë prag fillimi të vitit të ri shkollor. Shumë fëmijë janë helmuar për shkak të tregtimit të produkteve të skaduara apo mbajtjes së ushqimeve të shpejta në kushte  jo të përshtatshme.

Për të tilla aktivitete  është ngritur zëri disa herë, duke kërkuar kontrolle më të shpeshta ndaj këtyre subjekteve. Por deri më sot, masat kanë qenë sporadike, duke mos bërë asgjë për garantimin e sigurisë./ABC News Albania 24/7

basha-12.jpg
ad min16:15 | 02/08/2019

Kreu i Partisë Demokratike, Lulzim Basha akuzon kryeministrin Rama si njeriun përgjegjës për krizën e rëndë ekonomike që po kalon vendi. Në një takim me strukturat e PD në Peqin, kreu i opozitës, Lulzim Basha deklaroi se plani i Edi Ramës nga mëngjesi në mbrëmje është vetëm vjedhja.

“Nga mëngjesi deri në darkë plani i Edi Ramës është grabitja, vjedhja. Kjo është arsyeja se pse Shqipëria lëngon në krizën më të thellë ekonomike. Kjo është arsyeja pse shëndetësia, arsimi dhe gjithçka tjetër janë në kolaps. Kjo është arsyeja pse po përjetojmë emigracionin më gërryes dhe më të rrezikshëm se ai i fillim viteve ’90. Këta janë një grusht njerëzish të pamëshirshëm, biznesmenë parazitarë dhe grabitqarë, që nuk prodhojnë, nuk krijojnë por vetëm vjedhin dhe grabisin djersën, pronat e shqiptarëve, në bashkëpunim me Edi Ramën”, u shpreh Basha.

Duke iu referuar 30 Qershorit si një referendum popullor për ndryshim, kreu i opozitës u shpreh se ky ndryshim  do të vijë vetëm përmes largimit të Edi Ramës, duke i dhënë fund, bashkë me të, edhe bandës së oligarkëve dhe hajdutëve./ABC News Albania 24/7

diploma.jpg
ad min19:10 | 09/07/2019

Të rinjtë vijojnë të kërkojnë mundësi më të mira jashtë Shqipërisë. Vetëm në nëntë ditë, Abc Neës ka mësuar se 2200 persona kanë aplikuar për të legalizuar diplomën  e gjimnazit dhe për të nisur studimet e larta jashtë kufijve.

Këtë kohë oborrin e Qendrës së Shërbimeve Arsimore në Tiranë e gjen plot. Të rinjtë që kanë mbyllur shkollën e mesme aplikojnë për të legalizuar diplomën. Dokumenti iu duhet për të nisur studimet e larta jashtë vendit.

Emi është një prej tyre. Ka mbaruar gjimnazin në Elbasan me mesatare 9.5 dhe dëshiron të studiojë për financë ose informatikë në Gjermani.

Nga rreth 36 mijë të rinj që kanë mbyllur maturën shtetërore këtë, vit Abc News ka mësuar se vetëm në nëntë ditë 2200 vetë kanë aplikuar për të legalizuar diplomën. Një pjesë të nxitur nga familjarët, të tjerë shprehen se jashtë kufijve iu ofrohen më tepër mundësi.

Tirana, Durrësi, Elbasani renditen ndër qytetet me numër të lartë aplikimesh ndërsa degët e përzgjedhura për të studiuar jashtë këtë vit janë kryesisht ato të ekonomisë, mjekësisë e inxhinieritë.

Ndërsa vitin e shkuar pranë Qendrës së Shërbimeve Arsimore u kryen rreth 15 mijë legalizime diplomash, por specialistët e arsimit shpjegojnë se ka nga ata që kërkojnë më shumë se një legalizim pasi aplikojnë në universitete të ndryshme./ABC News Albania 24/7

silva-1280x720.jpg
ad min20:30 | 26/06/2019

David Silva ka zyrtarizuar vendimin e tij për t’u larguar nga Manchester City fundin e sezonit te ardhshme. 33-vjeçari aktivizohet me qytetarët që prej vitit 2010 dhe është shndërruar në një prej futbollistëve më të pëlqyer pë tifozërinë vendase. Gjatë aventurës me “qytetarët”, David Silva ka fituar të gjithë titujt e mundshëm në Angli.

Sezoni i ardhshëm do të jetë i fundit për mua me skuadrën e Manchester City. Pas 10 viteve mendoj se ka ardhur koha për një ndryshim. Drejtuesit e skuadrës më ofruan rinovimin e kontratës për dy vite të tjera, por vendosa të luaj vetëm për një sezon. Përfundon fjalën e tij David Silva.

Futbollisti spanjoll ka qenë një pikë kyçe edhe tek kombëtarja e “Furisë së kuqe” ku ka fituar një kupë bote dhe dy tituj europian.  Mbetet e paqartë e ardhmja e mesfushorit spanjoll nëse do të pensionohet nga futbolli pas përfundimit të aventurës me City-n ose do të vazhdojë të luajë në një kampionat tjetër./ABC News Albania 24/7

atanda.jpg
ad min19:39 | 26/06/2019

Pas largimit të mbrojtësit Atanda, një tjetër lojtar është me valixhet në duar. Bëhet fjalë për sulmuesin Jasir Asani për të cilin ka një interes nga kampionati hungarez.

Pas zyrtarizimeve të dy mbrojtësave të krahut, nga skuadra e Partizanit vjen largimi i parë në repartin difensiv. Atanda nuk do të jetë më pjesë e të kuqve për sezonin e ardhshëm.

Mbrojtësi nigerian ka gjetur akordin me skuadrën izraelite të Hapol Saba që është ngjitur këtë sezon në elitën e futbollit izraelit duke i dhënë fund aventurës tek kampionet në fuqi të Shqipërisë.

25-vjeçari aktivizohej prej 4 sezonesh me skuadrën e Partizanit dhe ishte një titullar i padiskutueshëm. Atanda ka luajtur më parë edhe me skuadrën e Apolonisë së Fierit kur ishte vetëm 19 vjeç dhe spikati me paraqitjet e tij duke bërë kapërcimin e madh tek skuadra e Partizanit.

Në Izrael, Atanda do të fitojë shifra të majme ku duke përfshirë edhe bonuset, fitimet mujore arrijnë shifrën e 8 mijë eurove. Mbetet për t’u parë nëse Partizani do të vendoset në kërkim të nje futbollisti për të plotësuar hapësirat e lëna bosh nga Atanda.

Të kuqtë janë në prag të ndeshjes kualifikuese të Champions League ndaj Karabak dhe skuadra nuk ka shumë kohë për t’u kompletuar. Pas Atandës, një tjetër yll është drejt largimit. Bëhet fjalë për 24-vjeçarin Jasir Asani i cili shkëlqeu sezonin e kaluar me skuadrën e Partizanit.

Asani arriti të shënonte 8 gola me të kuqtë dhe për shërbimet e tij interes ka shfaqur skuadra nënkampione e Hungarisë, Mol Vidi e cila ofron plot 550 mijë euro për kartonin e futbollistit. Oferta pritet të tundojë jo pak drejtuesit e Partizanit të cilët mund të lënë të lirë lojtarin./ABC News Albania 24/7

Lulzim-Basha-3.jpg
ad min21:41 | 25/05/2019

Gjatë fjalimit përmbyllës të protestës së të shtunës, kreu i demokratëve Lulzim Basha deklaroi se largimi i Ramës i hap rrugën zgjidhjes politike. Nga selia e Partisë Demokratike, Basha i quajti protestat e opozitës si bashkim kombëtar dhe të vendosur për ta çuar betëjën deri në fund. Sipas tij, Rama është i vetëm përballë këtij bashkimi.

“Kemi nisur qëndresën tonë dhe bashkimin tonë me 16 shkurt, i cili ka kulmuar sot në pjesëmarrjen më masive popullore në 29 vite. Mesazhi më i qartë i shpresës që ka lindur dhe që nuk do të fiket derisa beteja me të keqen të fitohet plotësisht. Çdo ditë e më shumë protestat tona bëhen më të mëdha. Çdo ditë e më shumë bashkimi shqiptarëve bëhet më i vendosur. Mesazhi i sotëm është mesazhi i qartë dhe i prerë ndaj miqve dhe aleatëve tanë dhe ndaj kundërshtarëve dhe armiqve të demokracisë se jemi gati të sakrifikojmë gjithçka për votën e lirë.

Ne sot japim këtë mesazh të qartë dhe të vendosur. Këtë betejë e nismë për Shqipërinë si gjithë Europa. Europa e dëgjoi zërin tonë dhe tani është koha për zgjidhjen politike, largimin e Edi Ramës qeveri tranzitore zgjedhje të lira dhe të ndershme, për të rikthyer Parlamentin te sovrani.

Ky bashkim i jashtëzakonshëm ka forcën dhe vendosmërinë për ta çuar këtë betejë deri në fund. Nuk do ta pranojmë më paligjshmërinë e një qeverie të dalë nga zgjedhje të faktuara ilegjitime, votime të manipuluara nga krimi, nuk do pranojmë më zgjedhën antikushtetuese kriminale, ndaj kësaj qeverie ilegjitime dhe këtij kryeministri të kapur në krim.

Ky kushtrim është dëgjuar dhe është mbështetur nga miqtë tanë strategjik, tani jemi bashkë dhe ai është i vetëm, i pashans përballë bashkimit tonë popullor, kombëtar dhe evropian. Ditën në vijim qofshin ditë të reflektimit të thellë për ata që mendojnë se mund ta marrin peng qeverisjen e vendit, për ata që i gënjen mendja se më 30 Qershor do ta mbysin demokracinë kjo nuk ka për të ndodhur. Forca jonë është qëndresa, forca jonë është përballja dhe përballje do të ketë deri në fitoren e kësaj beteje. Le të ndahemi me një mesazh të qartë dhe të prerë shprese dhe vendosmërie se ne jemi gati ta çojmë këtë betejë deri në fund, por po kështu paralajmërimi se kush mendon që me dhunën e paligjshmërisë do thyejë këtë vendosmëri gabohet rëndë dhe e pret vetëm përmbysja popullore.

Shkaktari do largohet, kjo i jep rrugë zgjidhjes politike. Këtë e dinë të gjithë, e di dhe Europa. Rama ik, hapi rrugë zgjidhjes politike. Beteja jonë po shkon drejt fundit që paracakton historia për kombëtar që nuk pranojnë të keqen. Beteja jonë po shkon drejt çlirimit të Shqipërisë ndaj krimit, kërkesa ime është të qëndrojmë në këmmë dhe gati për ta çuar misionin tonë deri në fund”, tha Basha.

Protesta e kësaj të shtune e opozitës zgjati rreth dy orë e gjysmë. Ajo nisi përpara Kryeministrisë dhe më pas u zhvendos përpara parlamentit. Përgjithësisht gjatë gjithë zhvillimit të saj nuk pati incidente, përveç një rasti përpara Kuvendit.

Aty u hodhën mjete piroteknike dhe flakadanë, çka solli dhe reagimin e policisë që hodhi ujë në drejtim të protestuesve. E gjithë situata zgjati pak minuta, pasi Basha u zhvendos shumë shpejt drejt selisë së Partisë Demokratike./abcnews.al

protesta-pd-basha.jpg
ad min00:19 | 12/05/2019

00:17 – Basha mbërrin në selinë e Partisë Demokratike dhe nis takimin urgjent me kryesinë e partisë, grupit parlamentar dhe Kolegjit të Kryetarëve.

23: 45– Edhe përpara Drejtorisë së Policisë së Tiranës ka pasur tensione mes policisë dhe protestueseve.  Protestuesit kanë hedhur fishekzjarrë dhe kapsolla, molotov si dhe u kanë vënë zjarrin koshave të plehrave. Nga ana tjetër policia ka bërë ndalimin dhe shoqërimin e disa militantëve. Në një moment ka ndërhyrë edhe ish-deputetja e PD-së, Albana Vokshi e cila përpiqej të ndalonte efektivët që të mos arrestonin protestuesit. Militantet e opozitës u drejtuan në Drejtorinë e Policisë së Tiranës pas shoqërimit dhe dhunës që Policia ushtroi ndaj Sait Dollapit, Sekretarit Organizativ të Partisë Demokratike.

22:45 – Kryetari i PD, Lulzim Basha dhe mbështetës të shumtë mbërritën pranë Drejtorisë së Policisë së Tiranë pas shoqërimit të sekretarit organizativ të PD, Sahit Dollapi. Në hyrje të drejtorisë së Policisë së kryeqytetet protestuesit hodhën tymuese.

Një situatë kaotike mbizotëron në zonë nga hedhja e mjeteve piroteknike dhe tymueseve. Policia ka afruar edhe një autobot uji dhe fillon hedhja e ujit drejt protestuesve. Policia shpërndan protestuesit me gaz lotsjellës. Në mes të rrugës është vendosur një kordon policor.

22:17 – Lulzim Basha i bën thirrje protestuesve që t’i drejtohen Drejtorisë së Policisë së Tiranës pas shoqërimit të sekretarit organizativ të PD-së, Sahit Dollapi.

“Është dhunuar në mënyrë të pashembullt, sekretari organizativ i PD, Sahit Dollapi, i cili gjatë gjithë protestës ka bërë gjithçka për të mbrojtur efektivët e policisë. Ka dalë para gurëve, para fishekzjarrëve, por me urdhër të Edi Ramës dhe Sandër Lleshajt është dhunuar në mënyrën më barbare të mundshme dhe është shoqëruar drejt Drejtorisë së Policisë së Tiranës. Në emër të opozitës i bëj thirre Ramës ta lirojë një orë e më parë, ndërkohë që ju bëj thirrje të gjithëve ju të më ndiqni një drejt Drejtorisë së Policisë së Tiranës”, tha ai.

22:05– Tension para Parlamentit, policia largon protestuesit me gaz lotsjellës.

21:48 – Forcat e Ndërhyrjes së Shpejtë dalin në rrugën para godinës së Kuvendit, duke ecur në drejtim të protestuesve të shoqëruar nga autobotë që hedhin ujë me presion. Protestuesit janë zhvendosur dhe situata është nën kontrollin e plotë të forcave të rendit. Në pamjet e ABC News shihet edhe momenti që policia shoqëron dhe dhunon sekretarin organizativ të PD-së, Sahit Dollapi.

21:30 – Sulmohet grupi i xhirimit të ABC News. Disa protestues dhunojnë operatorin dhe thyejnë kamerën.

21:12 – Protestuesit mbërrijnë para parlamentit. Hedhin molotov në drejtim të hyrjes.

20:50 – Flamur Noka u bën thirrje protestuesve t’i drejtohen parlamentit. Protestuesit marshojnë drejt saj.

20:30 – Skadon afati i lejes për protestë nga Policia e Tiranës, e cila kërkesës së opozitës i ishte përgjigjur duke i vënë afatet kohore 18:30 – 20:30.

20:20 – Protestuesit ndezën dritat e celularëve duke ndriçuar bulevardin “Dëshmorët e Kombit”.

19:45 – Pasi u shpërndanë për pak minuta, protestuesit bashkohen sërish dhe kryedemokrati Basha vazhdon fjalimin e tij. Ai theksoi se më 30 Qershor nuk do të ketë zgjedhje.

“2 javë më parë, Shqipëria e frikës, e territ, e arrogancës, korrupsioni mbizotëronte si një natë e zezë anembanë vendit. Shikoni çfarë keni arritur dhe jini krenarë. Bashkimi më i madh, më historik i qytetarëve shqiptarë në vetëm 12 javë.

Në vetëm 12 javë është zgjuar shpresa e një populli të tërë. Është kthyer besimi se ky vend mund të bëhet dhe do të bëhet. Se për të shkuar në Europë nuk mund të jetë më largimi nga vendi. Se Europën mund ta bëjmë këtu falë zgjedhjeve të lira dhe të ndershme. Jemi këtu jo për një betejë pushteti, por për një transformim të thellë politik. Një transformim politik, kushtetues, zgjedhor, të standardeve të Europës, Amerikës, ku kurrë më krimi mos të diktojë më zgjedhjet. Prandaj jemi të vendosur, zgjedhje me Edi Ramën nuk do ketë. Nuk do ketë zgjedhje me 30 Qershor, Rama ik”, tha Basha.

19:33 – Policia hedh gaz lotsjellës

19:32- Basha bën thirrje që protestuesit të mos cënojnë efektivët e policisë.

“Efektivët janë vëllezërit tanë, ata janë po aq të kërcënuar nga krimi sepse krimi është komandanti i vërtetë i Policisë së Shtetit. Mos cenoni efektivët e policisë. Beteja jonë është me krimin. Është me qeverinë e lidhur me krimin”, tha Basha.

19:30 – Ndërkohë që lideri demokrat mban fjalim, protestues të ndryshëm përleshen me policinë.

19:20 – Kryetari i Partisë Demokratike, Lulzim Basha, mban fjalimin e tij para Kryeministrisë.

Gjatë fjalës së tij në protestën kombëtare të opozitës përpara Kryeministrisë, kryetari i PD-së Lulzim Basha deklaroi se sot Shqipëria është në një udhëkryq, produkt i qeverisë Rama. Ndaj sipas tij, sot i jepet një mesazh kryeministrit, që protestuesit nuk do ta lenë të bllokojnë rrugën evropiane.

“Ne jemi sot përsëri në një udhëkryq të tmerrshëm, produkt i një njeriu që ka dhënë interesat e tij dhe klanit të tij mbi interesat e fëmijëve tuaj dhe gjithë Shqipërisë. Jemi për t’i dhënë një mesazh të qartë dhe të prerë. Nuk të lëmë më ta bllokosh rrugën tonë drejt Europës. Rama ik! Rama ik!

6 vite e gjysmë të sundimit kriminal të Edi Ramës dhe organizatës së tij kriminale e kanë lënë Shqipërinë jashtë Europës. Ora e lojës me popullin ka marrë fund. Tani ka një dhe vetëm një rrugë, të çlirojmë Shqipërinë nga qeveria e krimit. Të çlirojmë zgjedhjet nga krimi. Kjo është beteja për Europën. Nuk ka Europë pa demokraci. Nuk ka Europë pa dënuar Edi Ramën dhe politikanët që vodhën zgjedhjet”, tha Basha.

19:14 – Protestuesit përleshen me policinë dhe shkatërrojnë kordonin metalik. Ndërkohë drejt godinës së kryeministrisë janë lëshuar bomba molotov dhe flakadanë.

19:00 – Kryetari i Partisë Demokratike, Lulzim Basha, del nga selia blu dhe marshon drejt godinës së Kryeministrisë.

18:30 – Opozita shqiptare proteston këtë të shtunë për herë të katërt para Kryeministrisë. Ashtu siç ishte paralajmëruar, qytetarët marshuan drejt godinës së qeverisë në orën 18:30.

Bëhet me dije se kësaj proteste do t’i bashkohen edhe 300 studentë evropiane të partive popullore. Ndërsa për ruajtjen e rendit pritet të angazhohen rreth 1500 forca policore.

Kryedemokrati Basha ka bërë vazhdimisht thirre për pjesëmarrje masive, ndërsa mësohet se disa qindra persona janë nisur nga rrethe të ndryshme të vendit, drejt Tiranës.

Një ditë më parë Ambasada e Shteteve të Bashkuara të Amerikës u bëri thirrje qytetarëve të refuzojnë dhunën dhe të garantojnë një protestë paqësore dhe konstruktive./abcnews.al

coutinho-1280x720.jpg
ad min23:12 | 09/05/2019

Tifozët e Barcelonës kërkojnë largimin e Coutinho-s në merkaton verore. Inter interesohet për sulmuesin Sanchez.

Aleksis Sanchez po zhvillon një nga sezonet më të dobëta në karrierën e tij. Kiliani u transferua vitin e kaluar tek Manchester United dhe ka shënuar vetëm një gol në 20 takime. Për të ka shfaqur interes Interi në kampionatin italian, por paga është një problem për drejtuesit zikaltër. Ish-lojtari i Arsenal fiton plot 15 milionë euro në sezon që nuk mund të paguhet kurrsesi nga shoqëria zikaltër. Marrëveshja mund të arrihet në rast se futbollisti pranon reduktimin e pagës.

Tifozët e Barcelonës kërkojnë me çdo kusht largimin e mesfushorit Coutinho. Paraqitjet e brazilianit këtë sezon lënë për të deshiruar dhe nuk e ka justifikuar aspak shifrën e 120 mln euro që katalanasit shpënzuan për ish-lojtarin e Liverpool. Të paktë janë klubet që mund të pranojnë të paguajnë një shifër të tille për Coutinho-n, i cili ka humbur shkëlqimin që ka patur dikur në Angli.

Me paratë që do të përfitohen nga shitja e 26-vjeçarit, Barcelona do të investojë tek Griezman. Klauzola e francezit aktualisht është 200 milionë euro dhe do të ulet në 120 milionë në merkaton e verës. Mediat në Spanjë raportojnë se janë plot 9 futbollist që janë me valixhe në duar për t’i thënë lamtumirën kampionëve në fuqi të Spanjës. Dështimi në Champions për të katërtin sezon radhazi do të sjellë ndryshime rrënjësore në Camp Nou./ABC News Albania 24/7

arjola-shehu.jpg
ad min18:25 | 23/03/2019

E konsideron shumë të bukur programin “Kush vjen për drekë”, të cilën e drejtoi në TV Klan. Por pas largimit, arsyeja pse e bëri diçka të tillë ka qenë një nga pyetjet që e ka shoqëruar më së shumti.

E ftuar në emisionin “Thumb”, Arjola Shehu ka treguar se shkak i largimit nga TV Klan ka qenë se ka menduar që e ka mbyllur ciklin me emisionet e gatimit.

“Kjo është një pyetje që më shoqëroi pas momentit që unë u shkëputa. Unë bëra një program që e desha shumë, që ishte shumë i bukur, që më shëndoshi. Në fund të ditës unë mendoj që unë e mbylla ciklin tim me gatimin aty”.

“Ka qenë një propozim nga TV Klan. Nuk është se unë kam shkuar dhe kam thënë kam këtë projektin. E pranova sepse në atë pikë ku isha dhe në hapin që kisha hedhur më duhej diçka. Dhe kjo diçka nëse është Klani që është ndoshta televizioni më i ndjekur dhe ka goxha audiencë padyshim që nuk mund t’i thosha jo edhe pse ky projekt ishte i panjohur për mua. Jo i padëshiruar. Nuk është se unë mora një projekt dhe thashë “sikur s’më rri”. Unë nuk e dija sa do të qëndroja brenda këtij formati. E provova, e shijova dhe pastaj u largova”, tha Arjola.

Arjola ka treguar se ka pasur diskutime edhe për mundësi të tjera në TV Klan, por do të shikohet nëse ka projekte në të ardhmen.

“Kemi folur për hapësira të tjera. Të shohim në se ka projekte në të ardhmen, por për momentin sikurse unë e thashë e kam mbyllur ciklin me gatimin. Ka qenë një eksperiencë e bukur dhe që më ka vlejtur shumë. Përtej të gjithave ka qenë shumë e bukur”, tregoi Arjola, e cila gjithashtu u shpreh se ka pasur oferta edhe nga televizione të tjera të rëndësishme në vend, por në fund plani nuk u konkretizua./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono