LAC

ngjarja-Lac-1280x697.jpg
nev ila19:28 | 10/08/2019

Një i ri ka mbetur i plagosur me armë zjarri në hyrje të qytetit të Laçit. Sipas policisë, atentati i është bërë Edon Martinit i cili u dërgua në spitalin e traumës për ndihmë më të specializuar mjekësore.

Ngjarja ka ndodhur pranë rrugës nacionale Laç-Mamurras.

Forca të shuma të policisë dhe ato të Ndërhyrjes së Shpejtë kanë shkuar në vendngjarje për të bërë të mundur identifikimin dhe kapjen e personave të mundshëm të përfshirë në atentat.

Një nga pistat po heton grupi hetimor lidhet për një konflikt të çastit të Edon Martinit me disa persona të tjerë, ndërkohë që autorët janë larguar me një automjet nga vendngjarje./ABC News Albania 24/7

 

 

makinat.jpg
G. P.10:01 | 14/07/2019

Në Lezhë dhe në Laç ka nisur operacioni për bllokimin dhe sekuestrimin e makinave luksoze të cilat dyshohen se janë blerë me të ardhura që rrjedhin nga aktivitete kriminale.

Sipas njoftimit të policisë vendore, janë sekuestruar 4 automjete luksoze dhe po punohet për gjetjen dhe sekuestron edhe 4 automjeteve të tjera  luksoze. Këto automjete i përkasin një personi të ekstraduar në Itali për veprat penale “Falsifikim i dokumenteve” dhe “Grup i strukturuar kriminal”.

Operacioni u zhvillua në funksion të procedimit penal të vitit 2019, regjistruar për veprën penale  “Pastrimi i produkteve të veprës penale apo veprimtarisë kriminale”.

Policia në bashkëpunim  me Prokurorinë e Rrethit Gjyqësor Kurbin, po vijon punën për  dokumentimin e plotë të aktivitetit të paligjshëm të këtij shtetasi, si dhe identifikimin e personave të tjerë të përfshirë./ABC News Albania 24/7

aksidenti-ne-lac-1280x707.jpg
nev ila13:00 | 07/07/2019

Dy personat që u aksidentuan rëndë ditën e shtunë pranë Thumanës po shkonin me Fiat në drejtim të Kishës së Shna Ndout në Laç.

Ata ishin nisur nga Tirana në drejtim të Lacit por kohën kur u është dashur të marrin kthesën, për shkak të shpejtësisë drejtuesi ka humbur kontrollin dhe makina ka fluturuar në ajër.

Sipas policisë dy 50 vjeçarët që ndodheshin në këtë makinë kanë shpëtuar nga rripat e sigurimit, por gjendja e tyre vazhdon të jetë e rëndë. Ata po marrin ndihmë mjekësore në Spitalin e Traumës në Tiranë./ABC News Albania 24/7

vrasja-lac.jpg
nev ila11:38 | 16/06/2019

Gjykata e Laçit ka lënë në burg 30 vjeçarin që vrau për një vend parkimi në qytetin e Laçit.

Emanuel Koca tha se nuk kishte dashur ta vriste por ishte sulmuar më parë me thikë nga viktima.

Ngjarja ndodhi dy ditë më parë në Laç, pranë gjykatës së rrethit. Viktima Viktor Shkorreti 24 vjeç u konfliktua me Kocen kohën kur po parkonin makinat. Ishte një sherr i çastit por që çoi në përdorimin e armëve të zjarrit.

Pasi dy burrat janë zënë fizikisht, Koca nxori një automatik nga makina dhe qëlloi disa herë mbi të riun. Ai u largua menjëherë nga vendi i ngjarjes, por një ditë më pas policia e vendosi në pranga./ABC News Albania 24/7

lac-1280x705.jpg
G. P.21:26 | 13/06/2019

Policia ka arrestuar vrasësin e 24-vjeçarit Viktor Shkorreti, i cili  vra mbrëmjen e së mërkurës në Laç. Uniformat blu kanë njoftuar se 32-vjeçari E.K. banues në Tiranë u kap pas kontrolleve të vazhdueshme dhe falë bashkëpunimit me familjarët e tij.

Ai dyshohet se vrau 24-vjeçarin Shkorreti pas një konflikti banal. Ngjarja ndodhi pranë Gjykatës së Kurbinit. Sipas policisë midis autorit dhe viktimës ka patur fillimisht një konflikt fizik. Shkak është bërë një vend parkimi. Kur u duk se sherri u mbyll, autori hapi makinën dhe nga aty nxori armën e zjarrit.

Ai shtiu mbi 24 -vjeçarin disa herë dhe u largua me shpejtësi. Viktor Shkorreti, me origjinë nga Mirdita, jetonte prej disa vitesh në qytetin e Laçit, bashke me familjen e tij. Kurse autori 32 -vjeçar nga Tirana ndodhej në Laç për t’u takuar me disa shok të tij./ABC News Albania 24/7

lac-1280x705.jpg
G. P.08:15 | 13/06/2019

Policia e Laçit ka shpallur në kërkim një person nga Tirana për vrasjen e 24-vjeçarit Viktor Shkorreti. Paraprakisht dyshohet se vrasja ndodhi gjatë sherrit për një vend parkimi.

Sherri për një vend parkimi çoi në vrasjen e një të riu në Laç. Për ketë krim policia është duke kërkuar 32-vjeçarin E. K nga Tirana.

Krimi ndodhi mesnatën e së mërkurës, pranë Gjykatës së Kurbinit.

Viktima Viktor Shkorreti u qellua me kallashnikov dhe vdiq në vend.

Nga shoqërimet e personave në vendin e ngjarjes, policia zbuloi se midis autorit dhe të vrarit, pati fillimisht konflikt fizik.

Sebepi ishte një vend-parkim. Kur u duk se sherri u mbyll, autori hapi makinën dhe nga aty nxori armën e zjarrit.

Ai shtiu mbi 24 -vjeçarin disa herë dhe u largua me shpejtësi.

Viktor Shkorreti, me origjinë nga Mirdita, jetonte prej disa vitesh në qytetin e Laçit, bashke me familjen e tij.

Kurse autori 32 -vjeçar nga Tirana ndodhej në Laç për t’u takuar me disa shok të tij. Për kapjen e tij janë angazhuar edhe Forcat e Ndërhyrjes së Shpejte të metropolit. Patrullat kontrolluan lokalet e banesa gjatë natës dhe ditën e enjte, por pa marrë rezultat të menjëhershëm. /ABC News Albania 24/7

laci.jpg
G. P.14:08 | 03/05/2019

Frika nga hakmarrja ka bërë qe disa familje të fisit Bushi në Kurbin të ngujohen menjëherë pas vrasjes së dyfishtë të dielën e kaluar. Ata u janë nënshtruar rregullave zakonore deri kur palët të vendosin paqe midis tyre.

Një foto çoi në vrasje dy të rinj dhe në pranga tre të tjerë. Por pas kësaj, fisi Bushi në Kurbin është ngujuar. Nuk bëhet fjalë vetëm për familjet e Markel dhe Manuel Bushit, të Vinçens Bushit, por edhe kushërinjve të tyre të afërt.

Pavarësisht se tre të dyshuarit për vrasjen e Erjon dhe Kelvin Jushit janë në pranga, burrat dhe gratë e dy palëve i janë nënshtruar zakoneve të tyre pas ngjarjes.  Fillimisht sa u përhap lajmi u mbyllën brenda afro 20 shtëpi.

Por më pas sipas zakonit, të ngujuar qëndrojnë vetëm familjet e autorëve dhe ata më të ngushtët në rreth familjar nga rrënjët e babait.

Kurse fisi nga nëna ndihmon në zgjidhjen e problemeve. Për këtë arsye ishte daja, ai që negocioi me shefin e komisariatit te Kurbinit, ç’ka u pasua me vetëdorëzimin në polici të tre djemve Bushi.

ABC News ka mësuar se mes familjeve Bushi dhe Jushi akoma nuk është futur ndonjë pajtor, apo siç mund të quhet ndryshe njeriu që bën bisedimet për kushtet e një situate, ku familjet ndodhen në hasmëri me njëra-tjetrën.

Të shtunën në Laç, gjykata do të caktojë dhe masën e sigurisë për të arrestuarit, të cilët kanë thënë se e gjitha ndodhi në gjaknxehtësi e sipër, por nuk donin të vrisnin kushërinjtë Jushi.

Deri tani supozohet se një foto në rrjetet sociale nxiti fillimisht dhunën fizike dhe më pas shkrehjen e armëve natën e 28 Prillit, ku Erjon dhe Kelvin Jushi mbetën të vrarë./ABC News Albania 24/7

lac-vrasja.jpg
G. P.14:07 | 01/05/2019

Dy ditë pas vrasjes së dyfishtë në Laç, policia ka siguruar dëshminë e të arrestuarve të dyshuar si autorë. Ata kanë treguar se konflikti nisi pas publikimit të fotove në rrjetet sociale.

Fotografitë e publikuar në rrjete sociale u bënë shkak i konfliktit mes 5 të rinjve në Laç të Kurbinit.  Sherr që përfundoi me dy të vrarë, kushërinjtë Erjon dhe Kelvin Jushi, 36 dhe 30 vjeç, dhe plagosjen e dy të tjerëve.

Tre autorët që u vetëdorëzuan të martën në Komisariatin e Laçit u kanë treguar hetuesve detajet që çuan në masakrën e mbrëmjes së dielë. Referuar dëshmive,  viktimat dhe autorët njiheshin dhe mbrëmjen e ngjarjes ishin bashkë.

Fotot në Instagram u komentuan gjatë qëndrimit në lokal. Por pas një farë kohe komentet nuk ishin me miqësore. Aty nisi konflikti verbal mes kushërinjve Erjon e Kelvin Jushi dhe 28-vjeçarit Vinçens Bushi që u pasua me atë fizik jashtë lokalit.

Në ndihmë të Vinçensit shkuan edhe vëllezërit Markel dhe Manuel Bushi. Autorët pretendojnë se arma u përdor pasi edhe viktimat ishin të armatosur, por kjo nuk është vërtetuar nga hetuesit. Në vendngjarje u gjetën vetëm gëzhoja të qitura nga një armë e vetme.

Pistoleta  dyshohet se u përdor nga 25-vjeçari Markel Bushi, një person me precedentë të mëparshëm kriminal, pasi viktimat po dhunonin Vinçens Bushin.

Qitjet ishin në një largësi 4-5 metra nga njëra tjetra duke lënë të plagosur rëndë Erjon dhe Kelvin Jushin, të cilët ndërruan jetë në spital në Tiranë.

Autorët Manuel Bushi 23 vjeç, Markel Bushi 25 vjeç dhe Vinçens Bushi 28 vjeç, të tre banorë të Laçit u larguan menjëherë për t’u dorëzuar të martën pas negociatave të dajës së tyre me shefin e Komisariatit të Laçit.

/ABC News Albania 24/7

masakra-ne-lac.jpg
G. P.10:19 | 29/04/2019

Qyteti i Laçit u trondit mbrëmjen e së dielës pasi dy të rinj humbën jetën. Kelvin dhe Erjon Jushi, 30 dhe 36 vjeç, kushërinj me njëri tjetrin u qëlluan me armë zjarri në një lokal.

Ata ndërruan jetë në një spital privat në Tiranë, ku u dërguan të plagosur rëndë pas ngjarjes. Një nga banorët e zonës ku ndodhi ngjarja e rëndë ka treguar për kamerën e ABC News se autorët kanë dalë nga një lokal tjetër dhe pasi kanë kryer aktin janë larguar.

Banori: Se si ka ndodh se çfarë ka ndodh nuk di ç’me thënë. Me u ngatërru e me i than dikujt “ik andej” s’ka bërë vaki. Se ça ka ndodh se si ka ndodh…

Gazetari: Nga kanë ardhur ata (autorët e ngjarjes)?

Banori: Këta kanë qenë në lokal tjetër aty brenda e kanë dalë. Pastaj kanë ikur nuk e di unë tash.

Gazetari: Ngjarja ka ndodhur këtu?

Banori: Këtu. Në orën 12 të natës i thosha gruas nuk mund të ha bukë. Dhimbje koke se nuk kanë bërë fjalë. Nuk e di ç’është.

Tre të rinj janë shpallur në kërkim për masakrën mbrëmë në Laç. Sipas policisë ata janë dy vëllezërit M. B., 25 vjeç, M. B., 23 vjeç si dhe kushëriri i tyre V. B., 28 vjeç. Pas hetimeve të policisë ka rezultuar se ngjarja ka ndodhur për motive banale pas një konflikti të çastit./abcnews.al

hyrja-10.00_00_37_06.Still001-1280x720.jpg
G. P.08:52 | 29/04/2019

Policia ka shpallur në kërkim tre persona për masakrën e një nate më parë. Dyshohet se krimi ka ndodhur pas një sherri të momentit brenda në ambientet e një lokali në qytetin e Laçit.

Tre të rinj, dy prej tyre vëllezër, u shpallën në kërkim për përplasjen me armë, të ndodhur mbrëmjen e dielë në Laç. Sipas policisë, ata janë, Markel Bushi, 25 vjeç, i cili kishte qenë më herët person në kërkim pasi ishte dënuar me 12 vjet burg për grabitje dhe sulm ndaj policisë. Vëllai i tij M. Bushi, 23 vjeç dhe 28 vjeçari Viçens Bushi, kushëri i dy vëllezërve.

Paraprakisht thuhet se ngjarja ka ndodhur pas një konflikti mes viktimave dhe autorëve, por ende nuk janë sqaruar plotësisht rrethanat. Dy të rinjtë ndërruan jetë në një spital privat në Tiranë, ku u dërguan të plagosur rëndë pas ngjarjes.

Kushërinjtë Kelvin dhe Erjon Jushi, përkatësisht 30 dhe 36 vjeç, u qëlluan me armë zjarri në një lokal në lagjen nr. 1 të qytetit të Laçit. Dy persona të tjerë janë plagosur gjithashtu nga të shtënat e armëve në këtë ngjarje, njëri nga të cilët në gjendje të rëndë.

Viktimat ishin në një ambient me autorët.

Një debat mes tyre nisi brenda lokalit, por vazhdoi dhe jashtë. Kushërinjtë tentuan t’u shpëtojnë vrasësve, por ata i ndoqën dhe i qëlluan me armë në brendësi të një rrugice.

Shërbimet policore kanë ngritur pika kontrolli dhe kanë shoqëruar disa persona, që mund të kenë dijeni për rrethanat e ngjarjes.

Pas sulmit me armë janë shoqëruar disa persona që kanë qenë në vendin e ngjarjes. Shërbimet policore po bëjnë kërkime nëpër lokale dhe banesa, ndërsa  janë ngritur postblloqe në rrugët se lidhin Laçin me zonat e tjera./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono