la liga

bilbao-barca.jpg
G. P.13:14 | 16/08/2019

Athletic Bilbao-Barcelona është sfida hapëse e kampionatit spanjoll për edicionin 2019-2020. Në radhët e të besuarve të trajnerit Valverde do të mungojë Lionel Messi i cili po vijon rikuperimin pas dëmtimit në pulpë.

La Liga spanjolle ngre siparin sonte në mbrëmje me sfidën hapëse Athletic Bilbao-Barcelona, e cila do të startojë në “San Mames” në orën 21:00. Barça e nis mbrojtjen e titullit kampion në derbin e katalonjës dhe me një mungesë të madhe si Lionel Messi.

31-vjeçari po vijon rikuperimin pas dëmtimit në pulpë dhe pritet të jetë gati për sfidën e dytë të La Ligas. Vëmendja do të përqendrohet tek Griezmann dhe De Jong, dy blerjet më të shtrenjta në këtë merkato verore për Barcelonën.

Katalanasit nuk njohin disfatë në ndeshjen startuese në sezonet e fundit dhe është favorite në mbrëmjen e sotme. Në radhët e Bilbaos ka mungesa të shumta ndërkohe që do të synojnë të ruajnë ecurinë pozitive ku nuk humbasin në 12 takimet e fundit në shtëpi.

Trajneri Valverde pritet të hedhë në fushë skuadrën me skemën 4-3-3. Në porte Ter Shtegen. Në mbrojtje Alba, Lenglet, Pike, Semedo. Në mesin e fushës Rakitiç, Buskets dhe De Jong ndërkohë që reparti ofensiv do të plotësohet nga Suarez, Dembele dhe Griezmann.

Barcelona synon titullin e radhës në La Liga, por konkurrenca është më e madhe se në sezonin e kaluar./ABC News Albania 24/7

eibar.jpg
G. P.08:05 | 07/04/2019

Karim Benzema shpëtoi Realin nga turpërimi brenda në Madrid. Sulmuesi francez shënoi të dy golat në përmbysjen e rezultatit ndaj Eibarit në stadiumin “Santiago Bernabeu”.

Sezon më pa motivim nuk mund të ketë. I tillë ky i tanishmi për Realin, që edhe me Zinedine Zidanin po paraqitet po aq i vakët sa me trajnerët e shkarkuar Lopetegi e Solari. Ia doli të fitonte, por vetëm pas një pjese të parë tepër të dobët, ku pësoi gol në minutën e 39-të nga një Eibar modest, dhe kur nuk gjuajti asnjëherë në portën kundërshtare.

Duhej të vinte minuta e 47-të, që madrilenët të kujtoheshin se po humbisnin e se po luanin në “Santiago Bernabeu”, me Luka Modriçin që goditi më në fund kuadratin e portierit Dmitroviç. U desh njeriu më i aftë për gola, që ka mbetur pas ikjes së Ronaldos, pra Karim Benzema.

Sulmuesi francezi ishte i vetmi ndoshta në lartësinë që kërkon fanella e Realit, duke shënuar të dyja rrjetat e përmbysjes. Tashmë, 31-vjeçari ka 218 gola me fanelën madrilene.

Reali fitoi një tjetër ndeshje në një kampionat që po luhet thuajse vetëm për statistike, duke mos pasur asnjë objektiv. Kampion nuk del dot, por edhe zonën Champions vështirë se e rrezikon, plot 14 pikë mbi vendin e pestë.

Tifozët e kanë të qartë se Zidane, nëse do të mundë të ndryshojë gjë, do ta bëjë edicionin e ardhshëm, pasi në verë të afrohen disa yje, e të largohen disa lojtarë që e kanë mbyllur ciklin në Madrid./abcnews.al

barceloma.jpg
G. P.22:18 | 09/03/2019

Barcelona arriti një tjetër fitore në ligën spanjolle, dhe ruajti diferencën me ndjekësin më të afërt, Atletikon. Gjithsesi, skuadra katalanase, sërish nuk bindi me lojën e saj.

Gerard Pike, Lionel Mesi dhe Luis Suarez.  “Senatorët” shënuan dhe Barcelona fitoi duke mbajtur ritmin në La Liga, edhe pse sërish nuk bindi. Rajo Vajekano e vendeve të fundit u tregua e rrezikshme në “Kamp Nou” dhe u përpoq të përfitonte përballë gjigandit katalanas jo në maksimum, por sërish nuk ia doli.

Nuk kemi ç’të themi, e tillë është Barça e trajnerit Ernesto Valverde, më pak e bukur dhe më shumë pragmatiste, siç e tregoi në dy ndeshjet ndaj Realit në “Santiago Bernabeu”.

Fitorja 3-1 bëri që të ruhej diferenca prej 7 pikësh me Atletikon e Madridit (që fitoi 1-0 ndaj Leganjesit) dhe të hidhej një tjetër hap drejt titullit të dytë radhazi në Spanjë. Raul de Tomas kaloi në avantazh miqtë në 24’, ndërsa katalanasit humbën raste të pastra me Kutinjon dhe Mesin.

Ishte pikërisht Mesi që shërbeu asistin për golin e Pikesë në 39’, ndërsa pas pushimit u aktivizua Dembele. Me të nisur pjesa e dytë, Semedo fitoi penallti dhe Mesi nuk gaboi këtë herë, ndërsa në 82’ Suarez përfundoi një kombinim me Dembelenë dhe Rakitiçin.

A mundet ky ekip, aspak spektakolar si dikur, të fitojë gjithçka këtë sezon?

Në Spanjë, thuajse gjithçka ka marrë fund, madje Murinjo mendon se katalanasit mund t’ia dalin edhe në Champions. Në La Liga, Barcelona ka 63 pikë ndaj 56 të Atletikos, ndërsa Reali është prapa, me vetëm 48, edhe pse ka një ndeshje më pak të luajtur./abcnews.al

real-madrid-1280x713.jpg
G. P.17:43 | 17/02/2019

Reali pësoi një katastrofë të vërtetë në ligën spanjolle, duke u mundur në Madrid nga Girona. Kritika të forta mediatike dhe dyshime të mëdha për sezonin.

Nxemja në “Bernabeu” u zhvillua në një atmosferë optimiste. Barcelona nuk kishte bindur një ditë më parë, dhe futbollistët e Realit kishin mundësi që jo vetëm të mbanin diferencën 6-pikëshe me kreun, por edhe të tregonin se ishin më lart se kampionët. Edhe fillimi i duelit të javës së 24-t ndaj Gironës u duk premtues, kur Casemiro kaloi vendasit në epërsi që në minutën e 25-të.

Gjithsesi, ajo që vazhdoi ishte më e rëndë edhe se ëndrra më e keqe e çdo tifozi. Një kundërshtar kaq shumë modest si Girona tronditi skuadrën më të madhe të historisë së futbollit në botë, duke i shënuar dy gola pas pushimit.

Kristian Stuani me penallti dhe Kristian Portu realizuan, në sytë e një publiku prej dhjetëra mijë tifozësh të shtangur, duke treguar se ky Real nuk është aspak aty ku duhet të jetë. Me shtatë humbje deri tani, me 20 gola më pak të shënuar se Barça, ndërsa diferenca 9-pikëshe mund të ishte shumë më e madhe nëse katalanasit të mos ishin bënin kaq shumë gabime.

“Marka”: Katastrofë totale në “Bernabeu”! Girona vrau Madridit në vetëm 10 minuta!

Gazeta komenton kartonin e kuq të Ramosit, dhe faktin që kapiteni nuk është aspak i qetë, ndërsa Reali mbeti 9 pikë prapa Barçës.

Ramos u përjashtua në fund, ndërsa është në krizë pas kartonit të verdhë të qëllimshëm të marrë në Champions, dhe mundësisë për dënimit nga UEFA me dy ndeshje pezullim.

Gazeta “AS” ka opinionin e analistit Alfredo Relanjo, që titullon se Girona e zbriti Realin nga treni i La Ligës!

Po ashtu jep komentet e trajnerit Solari, që ende beson se Madridi ka mundësi të luftojë për çdo trofe këtë sezon!

Çudia në Spanjë është se as Barcelona nuk po bind. Fitorja ndaj Vajadolidit u arrit vetëm me një penallti të Mesit në fund të pjesës së parë, por me një lojë të dobët të kampionëve. Vetë Mesi humbi edhe një 11-metërsh tjetër, ndërsa katalanasit u përpoqën të ruanin energji për Championsin.

Gazeta “El Mundo Deportivo” nuk u përmbajt: Triumf pa kënaqësi! Një gol me penallti i Mesit bën Barçën edhe më shumë lider, por pa bindur”

E gjitha kjo, ndërsa klubi shpërbleu trajnerin Valverde me rinovim kontrate, ndonëse hera-herës filozofia e lojës së tij nuk është aspak sipas traditës barceloniste.

Barcelona, u stërvit një ditë pas fitores, e qetë për diferencën e rritur me Realin, dhe e përqëndruar për duelin e Championsit ndaj Lionit, ndërsa besohet edhe vetë lojtarët nuk janë të kënaqur me atë që kanë dhënë deri tani./abcnews.al

BARCELONA-FITON-ME-GIRONEN-1280x720.jpg
ent ela19:48 | 27/01/2019

Barcelona u shkëput sërish në 5 pikë epërsi ndaj ndjekësve, në krye të ligës spanjolle. Lionel Mesi ishte sërish më i miri në fushë, duke shënuar edhe gol në fitoren ndaj Gironës.

Kjo ndeshje duhet të luhej 4 000 kilometra larg. Girona-Barcelona ishte planifikuar për në stadiumin “Hard Rok” të Majemit në Shtetet e Bashkuara, por në vend që të luhej përpara 65 000 spektatorëve, pati vetëm 14 500 tifozë për ta ndjekur.

Kjo u prishi shumë pak punë katalanasve, që triumfuan 2-0 dhe u shkëputën përsëri në 5 pikë epërsi ndaj ndjekësve, në krye të ligës spanjolle.

Lionel Mesi ishte përsëri frymëzimi i të besuarve të trajnerit Ernesto Valverde.

I lënë pushim në humbjen në kupë në fushën e Seviljes, argjentinasi pati energjitë e duhura për të mbyllur siç duhet ndeshjen e fituar 2-0.

Mbrojtësi Semedo shënoi golin e parë për kampionët, ndërsa Mesi ishte autor i të dytit, duke garantuar fitoren e 8-të radhazi në La Liga.

Barça u ndihmua edhe nga fakti që vendasit mbetën me 10 lojtarë, sepse Bernardo mori karton të kuq në pjesën e dytë.

Kushtet atmosferike ishin të vështirë, sidomos për një ekip teknik si Barcelona, por Mesi përballoi gjithçka.

Kapiteni ka 19 gola në 19 ndeshje të kampionatit, si dhe 26 rrjeta në 25 sfida të gjithë sezonit, në të njëjtin nivel si në vitet më të mira të karrierës.

Barça, ndërkaq, udhëheq renditjen me 49 pikë, ndaj 44 të Atletikos së Madridit, ndërsa ka diferencë të madhe në golat e shënuar, në krahasim me gjithë ekipet e tjerë të Spanjës. /abcnews.al

barca123.png
G. P.21:49 | 11/11/2018

Barcelona pësoi një humbje të papritur në kampionatin spanjoll, madje brenda në stadiumin “Kamp Nou”. Betisi e mundi 4-3, edhe pse katalanasit patën sërish në ekip, kapitenin e tyre.

Duhej të ishte mbrëmja e madhe e rikthimit të Mesit. Vërtet, duhej, pasi nuk ndodhi kështu dhe argjentinasi u prit me një humbje në shtëpi, ndërsa la pas dëmtimin. Festa u prish nga Betisi, skuadër e Seviljes që triumfoi 4-3 në “Kamp Nou” ndaj Barcelonës, kampione dhe kryesuese e La Ligës.

Një ndeshje që filloi dhe përfundoi e tensionuar për vendasit, të cilët ishin edhe të lodhur, por edhe disi të vetëkënaqur pasi kaluan me sukses provat me Interin në Champions. Zhunior Firpo e Hoakin shënuan dy golat e parë për miqtë në pjesën e parë. Pas pushimit, erdhi reagimi i katalanasve, por jo i mjaftueshëm. Mesi shënoi me 11-metërshin e fituar nga Zhordi Alba, por Barça është sot një ekip thuajse pa mbrojtje.

Argjentinasi Zhovani Lo Selso realizoi për 3-1 për Betisin, duke e bërë shumë të vështirë detyën e lojtarëve të trajnerit Valverde. Pati sërish shpresë në “Kamp Nou”, kur Mesi krijoi aksionin e golit të tretë, realizuar nga Arturo Vidal, veçse nuk qe e thënë që kampionët të merrnin të paktën një pikë. Betisi ndëshkoi sërish dobësinë difensive të katalanasve, duke bërë që goli i fundit, realizuar nga Mesi të ishte thjesht një kënaqësi personale.

Edhe pas kësaj humbjeje, Barcelona mbeti në krye të renditjes në La Liga, me 24 pikë, veçse me vetëm 1 pikë më shumë sesa Atletiko e Madridit apo Sevilja. Kampionët e Spanjës nuk po gjejnë dot stabilitet, duke kaluar nga ndeshje të mëdha si ndaj Realit e Interit, në paraqitje të dobëta si ndaj Leganjesit apo Betisit, dhe kjo ia rrezikon objektivin në kampionat dhe në Champions./abcnews.al

MESI-KTHEHET-NE-STERVITJE-ABC-M4-T2.mpg_snapshot_00.01-1280x764.jpg
G. P.22:10 | 31/10/2018

Lionel Mesi bën një kthim të papritur në stërvitje me Barcelonën. Ylli argjentinas pritej të mungonte disa javë, por ndoshta mund të jetë në fushë që të shtunën.

Pritej të mungonte të paktën tri javë, por me një yll të tillë nuk duhet të nxitohesh. Lionel Mesi bëri hapin e parë drejt riaftësimit të plotë pas dëmtimit, duke u kthyer në stërvitje për Barcelonën, në kompleksin e klubit. Argjentinasi zhvilloi seancë së bashku me shokët e skuadrës, një lajm shumë i mirë ky për tifozët dhe trajnerin Valverde, ndonëse pamjet filmike treguan se nuk e lëvizte shumë krahun e dëmtuar në ndeshjen ndaj Seviljes.

Gjithsesi, mediat flasin për një kthim të tij të mundshëm në fushë që këtë fundjavë, në ndeshjen e ligës spanjolle ndaj Rajos së Vajekanos. Valverde do të presë deri në fund dhe do të këshillohet me mjekët si dhe me vetë futbollistin përpara se të vendosë. Ekziston mundësia që ai të tregohet i kujdesshëm dhe që numri 10 të aktivizohet vetëm të martën e ardhshme, në ndeshjen e Championsit në fushën e Interit. Mesi ishte në formë të madhe përpara dëmtimit, duke shënuar 12 gola në 12 ndeshje të luajtura për Barcelonën, e duke e ndihmuar me vendin e parë në kampionat dhe me tri fitore në tri ndeshje në Ligën e Kampionëve./abcnews.al

messs.png
G. P.11:55 | 27/09/2018

Lionel Messi dhe Luka Modriç pësuan disfata të rënda në ndeshjet e fundit të ligës spanjolle. Barcelona dhe Reali u mundën papritur, ndërsa rrezikojnë të mos jenë rivalët e vetëm për titull

Nuk kishte ndodhur, besohet, ndonjëherë, që fituesi i Çmimit të FIFA-s dhe ai që quhet lojtari më i mirë i botës, të turpërohen në të njëjtën mbrëmje.

Kjo, madje pak ditë pas ceremonisë së FIFA-s në Londër. Luka Modriç, fituesi i Çmimit, dhe Lionel Mesi, i besuar gjerësisht si numëri 1 i futbollit botëror, pësuan humbje tronditëse në La Liga edhe pse luajnë me dy skuadrat më të mira.

Më herët e pësoi Messi, kur Barcelona në mënyrë të pabesueshme u mposht në stadiumin e Leganjesit modest, që e nisi javën në vendin e fundit. Filip Coutinho kaloi Barçën përpara, por për 68 sekonda në pjesën e dytë, vendasit përmbysën shifrat.

Nabil El Zhar barazoi në 52’, ndërsa goli i dytë u realizua nga Oskar Rodrigez, i huazuar tek Leganjes nga Reali i Madridit. Ky ishte rezultati i dytë radhazi negativ për Barcelonën, diçka që ngre dyshime për aftësinë e skuadrës së trajnerit Valverde për ta mbrojtur titullin e fituar vjet.

Vetë madrilenët ndoshta do të kishin pasur nevojë për të huazuarin Oskar Rodrigez në Sevilje, ku Luka Modriç kaloi një nga mbrëmjet më të këqija të karrierës.

Rezultati përfundimtar ishte një katastrofë 0-3, ndërsa lojtari më i mirë i sezonit në botë nuk arriti të jepte të zakonshmen e tij, mori karton të verdhë për protesta, dhe përfundimisht u zëvendësua nga trajneri Lopetegui.

Reali humbi një mundësi të madhe, ndërsa tre golat e pësuar në 90 minuta ishin një paralajmërim. Andre Silva shënoi dy herë për Seviljen, ndërsa një herë e bëri Ben Jeder.

Barcelona e Reali mbeten në krye të La Ligës me nga 13 pikë, por tashmë Atletiko e Madridit është vetëm 2 pikë larg, pra ndoshta mund të jetë viti I duhur për të besuarit e trajnerit Diego Pablo Simeone./abcnews.al

LA-LIGA-REALI-DHE-BARCELONA.mpg_snapshot_00.14-1280x720.jpg
ent ela21:01 | 16/09/2018

Portierët ishin vendimtarë këtë javë në ligën spanjolle. Ata bënë që Barcelona të fitonte ndeshjen, ndërsa Reali të bënte gabimin e parë në sezon.

Është vetëm fillimi dhe nuk ka asnjë problem nëse ke 10 pikë ndaj 12 të rivalit kryesor. Në këtë pozicion është Reali i Madridit pas barazimit 1-1 në fushën e Bilbaos, dhe fitores 2-1 të Barcelonës në stadiumin e Real Sociedadit. Madrilenët luajtën mjaft mirë, sidomos në sulm, e mbajtën shumë topin, por nuk ia dolën në Vendet Baske për dy arsye kryesore, së pari për shkak të karakterit të Atletikut vendas, dhe së dyti për meritë të portierit Unai Simon, që bëri të paktën 4 pritje shpëtimtare. Pritje bëri edhe Kurtua për Madridin, por më pak.

Muniain kaloi baskët në epërsi në 32’, Isko barazoi në 64’, dhe skuadra e trajnerit Hulen Lopetegi u detyrua të pranonte ndalesën e parë në këtë sezon në La Liga. Barcelona, për fat, portierin vendimtar e pati në portën e vet. Ter Shtegen bëri të paktën dy pritje të mëdha dhe katalanasit kaluan me fat gjithashtu në Vendet Baske, në San Sebastian. Fillimisht, Sociedadi kaloi përpara me rrjetën e shënuar nga Aritz Elustondo në 12’ dhe u desh shumë që të realizohej përmbysja. Trajneri Valverde futi pas pushimit në fushë Kutinjon, që u tregua një lojtar i madh, pikërisht atëherë kur duhej, me Mesin jo edhe aq në formë.

Suarez dhe Dembele realizuan për kampionët, por edhe me “bashkëpunimin” e portierit vendas, Ruji. Barça vazhdon të mos gabojë, duke fituar të katër ndeshjet, por gjithsesi, nuk është se po luan futbollin e dikurshëm me Guardiolën apo Luis Enriken./abcnews.al

real-getafe-1280x854.jpg
G. P.16:36 | 20/08/2018

Real Madrid fitoi me rezultatin 2–0 derbin e vogël me Getafe të dielën në hapjen e kampionatit. Nuk ishte ekipi i finales së Superkupës së Europës e humbur ndaj Atletico duke treguar më karakter në fushë.

Një zotërim i futbollistëve të Julen Lopetegui, të cilët qarkulluan topin në 78% të kohës. Skuadra duhet të funksionojë pa Cristiano Ronaldo dhe duket se liderin po e bën Gareth Bale, madje gazeta “Marca” hapet me titullin; “Bale merr komandën”.

Uellsiani shënoi një nga golat në këtë takim, ndërsa tjteri u realizua nga Dani Carvajal.

Julen Lopetegui, trajner i Real Madrid:Jemi të lumtur që nuk i dhamë mundësinë kundërshtarit dhe patëm shumë shanse shënimi. Duhet të vazhdojmë të punojmë dhe mbi të gjitha është ekipi pastaj talenti individual dhe kjo vlen edhe për Bale”.

Me fitore e nisi edhe Barcelona që me Lionel Messi kapiten triumfoi 3–0 me Alaves të premten. Messi realizoi 2 gola, njëri prej tyre ishte i 6000 për skuadrën katalanase në La Liga./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono