kutinjo

KUTINJO-STERVITJA-TEK-BAJERNI-M1T1.mpg_snapshot_00.08-1280x720.jpg
ent ela13:50 | 21/08/2019

Filip Kutinjo u ndoq nga qindra tifozë në stërvitjen e tij të parë me Bajernin. Ylli brazilian shkëlqeu që në fillim me skuadrën e trajnerit Niko Kovaç.

Interesimi për të ishte tepër i madh, por këtu jemi në Gjermani.

Plot 1 500 tifozë kishin mësyer kompleksin stërvitor të Bajernit për të ndjekur nga afër, yllin më të ri, dhe më të kërkuar, Filip Kutinjon.

Braziliani, që doli për herë të parë në stërvitje me skuadrën e tij të re, u udhëzua nga një zyrtar I klubit, që të afrohej tek tifozët së bashku me trajnerin Niko Kovaç dhe me përforcimin tjetër, Mikael Kuisons.

Megjithë motin e keq dhe me reshje, ata ishin të lumtur që u ndodhën aty, dhe nuk mbetën të zhgënjyer.

Kutinjo, i ardhur huazim nga Barcelona, shënoi 3 gola në minindeshjen përgatitore brenda skuadrës, duke treguar formë të mirë.

Shpresa është e madhe, por po ashtu ka edhe dyshime, sepse 27-vjeçari ishte i shkëlqyer tek Liverpuli, por zhgënjeu në “Kamp Nou”, pra nuk dihet sesi do të paraqitet në Gjermani.

Bajerni e mori huazim për rreth 8 milionë euro, me të drejtë transferimi përfundimtar prej 120 milionësh, vitin e ardhshëm.

Analistët në televizionin amerikan, ESPN, deklaruan se lëvizja e Bajernit u duk si një veprim në panik e sipër, nga frika se mos mbeteshin pa u forcuar.

Dyshues edhe ish-trajneri i Gjermanisë, Berti Fogts, i cili deklaroi për mediat se ndoshta braziliani nuk është një yll i vërtetë botëror.

Gjithsesi, tek Bajerni kanë besim, dhe mediat kanë nisur analizat sesi mund të luajë skuadra e trajnerit Kovaç.

“Deili Meil” thekson se Kutinjo do të jetë pas sulmuesit kryesor, Robert Levandovski, dhe jo në krahë, dhe se mund ta ndihmojë skuadrën bavareze për të fituar Championsin. /ABC News Albania 24/7

neymar-1-2-1280x720.jpg
ad min21:51 | 20/07/2019

Mbetet enigmë e ardhmja e yllit brazilian Neymar. Pavarësisht se ai u kthye tek Paris Sain Germain, Barcelona vazhdon përpjekjet për ta marrë

U kthye më në fund, por nuk është e sigurt nëse do të qëndrojë. Neymar për momentin mban të veshur fanellën e Paris SG, veçse ndryshimi është në ajër dhe secila palë po bën lëvizjet e saj, pra lojtari, klubi i tij dhe Barcelona që e kërkon.

Vetë futbollisti, i cili nuk ka dëshirë të vazhdojë një vit tjetër në Ligën e Parë të Francës, pavarësisht golave të shumtë të shënuar, dhe trofeve të fituar. Dëshirën e tij besohet se e ka shprehur në Paris, dhe trajneri Tomas Tuhel e pohon.

“E kam ditur që Neymar dëshiron të largohet, – u shpreh ai pak ditë më parë, – kjo është çështje e klubit dhe e lojtarit. Natyrisht, nuk jam i lumtur që ai erdhi vonë në grumbullim, kështu ndodh për çdo lojtar që vonohet, por siç e thashë i takon klubit të vendosë”.

Një sinjal tjetër sulmuesi e dha kur ishte ende në Brazil, dhe u shpreh se momenti më i bukur në karrierën e tij ishte kur fitoi me Barcelonën 6-1 ndaj Paris SG në Champions, duke e eliminuar skuadrën e tij të ardhshme.

Në atë ndeshje, numri 10 shënoi 3 gola duke qenë i papërmbajtshëm. Paris SG besohet se nuk do ta pengojë Neymarin të largohet, edhe sepse ka marrë mesazhin nga Kilian Mbape.

Kampioni i botës me Francën, deklaroi që në Maj se “kam ardhur në një moment të karrierës kur duhet të marr më shumë përgjegjësi, dhe kjo mund të ndodhë tek PSG-ja apo diku tjetër”.

I shpallur si lojtari më i mirë i Ligës franceze, ai dëshiron të jetë numri 1 i ekipit, por kjo do të jetë e vështirë me Neymarin aty. Destinacioni më i mundshëm i brazilianit mbetet Barcelona, edhe pse nuk mund të përjashtohen Reali i Madridit apo Juventusi.

Presidenti Bartomeu e ka rritur ndjeshëm ofertën, duke premtuar 100 milionë euro, plus duke i bërë një paketë prej 6 lojtarësh Paris SG, nga e cila francezët do të zgjedhin dy.

Në listë janë Filip Kutinjo, Usman Dembele, Ivan Rakitiç, Nelson Semedo apo Malkom, si dhe një tjetër emër që nuk bëhet i ditur. Katalanasit duhet të kenë kujdes me rregullat financiare të UEFA-s, që nuk lejojnë diferencë negative më të madhe se 100 milionë euro në shitje-blerje.

Barça ka 223 milionë euro borxhe, ndërsa nëse merr edhe Nejmarin mund të shkojë në mbi 400 milionë. Për këtë arsye, duhet të largojë lojtarë, madje për shuma të mëdha./ABC News Albania 24/7

messi.jpg
ad min16:53 | 25/02/2018

Lionel Mesi e vendosi veten edhe më shumë në historinë e ligës spanjolle, pas ndeshjes së fundit me Barcelonën. Argjentinasi mban tani, edhe rekordin e asisteve, edhe atë të golave.

Gjithmonë pritet me kërshëri ndeshja e tij e radhës.
Futbolli ka shumë yje, por Lionel Mesi sërish mbetet i veçanti, edhe më i veçantë sesa e mendonte veten Zhoze Murinjo kur mbërriti tek Çelsi.
Legjenda e gjallë e Barcelonës ia shtoi edhe më shumë famën vetes në sfidën në “Kamp Nou” ndaj Gironës.

Ishte mbrëmje e La Ligës, por një mbrëmje rekordesh.
Mesi u bë njeriu-asist numër 1 në historinë e kampionatit spanjoll, me topin e dhënë për Suarezin.
Miçell i Realit kishte arritur në 147 asiste, Leo ka tani 148.

Jo vetëm kaq, por ai vazhdon të thellojë rekordin e tij të golave.

Argjentinasi mbetet i shkëputur, tashmë me 371 rrjeta, të realizuara në vetëm 403 ndeshje.

Rekordet e Gerd Mylerit lihet pas ashtu siç lihet pas Kristiano Ronaldo, numri 2 në renditjen e golave në La Liga, me rrumbullak 300 të tillë, për të mos folur për ish-rekordmenin e shquar, Telmo Zarra, që ka mbetur shumë prapa në kuotën 251.

Duke pasur edhe rekordin e më shumë golave në një sezon, 50 në 2011-2012, legjenda e Mesit bëhet më e plotë.
Duke qenë në krye të renditjes së shënuesve edhe për këtë sezon, numri 10 pritet ta fitojë sërish Këpucën e Artë, për të 5-ën herë, dhe për të qenë fare pranë Telmo Zarrës, që ka 6 Këpucë të Arta.
Trajneri i Barcelonës, Ernesto Valverde, nuk e pati të lehtë të komentonte spektaklin e yllit të tij kryesor, në fund të ndeshjes së fituar 6-1 ndaj Gironës.

“Mesi i bën gjërat që të duken të lehta, – theksoi Valverde, – por, në të vërtetë nuk janë aspak të lehta. Është e vështirë të gjesh fjalët pas një paraqitjeje të tillë. Pikërisht, atëherë kur mendon se ke parë gjithçka që mund të bëjë, Leo të habit me diçka tjetër. Të gjithë presim të shikojmë se çfarë do t’i pjellë mendja në ndeshjen e radhës”.

Kënaqësia e trajnerit dhe e publikut, sidoqoftë, nuk ishte vetëm për argjentinasin.
Suksesi bëri që Barcelona të mbante ritmin në krye të kampionatit me 65 pikë, dhe pa asnjë humbje pas 25 javësh të luajtura.

Luis Suarez ishte autor i 3 golave, duke qenë edhe ai në garë për Këpucën e Artë, e duke lënë pas një fillim të vështirë të sezonit.
Lajmi tjetër shumë i rëndësishëm ishte që dy blerjet e shtrenjta, Kutinjo e Dembele, më në fund po integrohen në ekip.

Braziliani shënoi golin ndoshta më të bukur në ndeshjes, përveçse shërbeu asist për një nga golat e Suarezit.
Francezi nuk e gjeti dot rrugën e rrjetës, por sërish ndihmoi shokët dhe prova e tij ishte shumë pozitive.
Me këtë formë, katalanasit janë pranë titullit, në finalen e Kupës së Mbretit, por edhe në pretendime të mëdha për të fituar edhe Championsin./abcnews.al

vlcsnap-error293-1280x720.jpg
ad min19:05 | 08/01/2018

Filip Kutinjo është tepër i lumtur që është pjesë e Barcelonës. Braziliani premtoi spektakël e suksese, ndërsa u shpreh tepër i gëzuar që do të luajë në krah të Mesit apo Iniestës

Ishte vendosur në këtë hotel luksoz pas mbërritjes.

Në impiantin me 5 apo 7 yje, ishte Filip Kutinjo, lojtari i ri i Barcelonës dhe gjënë e parë që bëri ishte ndjekja e ndeshjes së La Ligës ndaj Levantes.
Braziliani, tashmë hapur tifoz i katalanasve, festoi për golat dhe u hidhërua për rastet e humbura, por përfundimisht gjithçka ishte e bukur.
Nuk mund të mos shijonte klasin e Lionel Mesit, të cilin tashmë nuk do ta ndjekë nga televizori apo si kundërshtar në fushë, por do ta ketë në krah.
Më pas udhëtimi i ëndrrave, sërish në luksin e një makine të shkëlqyer, drejt “Kamp Nout”.

Ishte mbrëmje vonë kur ish-ylli i Liverpulit, blerja e dytë më e shtrenjtë në botë, shkoi të prezantohej në selinë e klubit.
Më përpara fotografitë dhe filmimet përpara mediave, kamerave dhe fotoaparatëve.
Më pas në një ballkon, në tribunat e larta të stadiumit “Kamp Nou”, që do të jetë shtëpia e tij deri në vitin 2023.
Ja edhe intervista e parë, natyrisht për televizionin e klubit.

Filip Kutinjo: “Jam shumë i lumtur dhe gjithnjë kam thënë se është një ëndërr të jesh lojtar i Barcelonës. I kënaqur që do të kem mundësi të luaj futboll këtu dhe të luaj futboll duke buzëqeshur, të fitoj tituj dhe të bëj tifozët të lumtur. Këto janë objektivat e mia. Është vërtet e pabesueshme që unë do të jem pranë idhujve të mi, në krah të lojtarëve që kanë një histori kaq të madhe. Më pëlqejnë Mesi, Suarez, Iniesta, Pike, Buskets, të gjithë lojtarët e mëdhenj. Shpresoj që të mësoj prej tyre dhe të fitojmë së bashku”.

Vizita tjetër e detyrueshme ishte ajo në kabinetin e trofeve, në muzeumin e njërit prej klubeve më të mëdhenj të botës.
Aty kishte kupa nga më të shtrenjtat dhe të lavdishmet, momente historie si dhe qindra emra të shkëlqyer të Barcelonës ndër vite.
Në mes të firmave të dëgjuara, në bllokun e shënimeve do të ishin dhe fjalët si dhe nënshkrimi i Filip Kutinjos, 25-vjeçar, që lindi në 1992, pikërisht në vitin kur Barcelona fitoi Champions-in e parë.

Pjesë e përvojës së pakrahasueshme ishte edhe momenti kur vetë futbollisti stampoi emrin e tij në fanelat që do t’i veshë, por edhe që do të dalin në shitje për tifozët.
U desh të kalonte nata që mesfushori sulmues të prekte tapetin e “Kamp Nout” dhe të prezantohej tashmë me topin në këmbë.
Nuk pati 80 000 spektatorë në tribuna, siç ndodhi me Maradonën në Napoli apo Kristiano Ronaldon në Madrid, por gjithsesi askush nuk dyshon se Kutinjo do të jetë një sukses i madh.
Vështirë të jetë ndryshe një futbollist që kushtoi 160 milionë euro./abcnews.al

vlcsnap-error259-1-1280x720.jpg
ad min13:37 | 20/12/2017

Barcelona është gati të bëjë shpenzime të mëdha për t’u përforcuar në janar. Në listën e dëshirave janë braziliani Kutinjo dhe francezi Grizman

Dashuria e vjetër nuk harrohet.

Filip Kutinjo ishte objektivi i madh i Barcelonës gjatë verës, dhe duket se ai do të jetë sërish i tillë edhe në janar.

Ylli i Liverpulit, një nga lojtarët ofensivë më të mirë të botës, është dëshirë absolute e klubit katalanas, edhe pse do të duhet një shifër tepër e madhe, si dhe shumë fat, për ta marrë.

Mediat spanjolle dhe britanike njoftojnë se Barça është gati të paguajë 150 milionë euro për kartonin e brazilianit, një shifër që I afrohet asaj që u shpenzua për të marrë Usman Dembelenë nga Dortmundi, dhe që ishte gati 155 milionë.

Gjatë verës, katalanasit bënë tri oferta dhe trajneri liverpulas, Klop, I hodhi poshtë që të treja, edhe pse e fundit prej tyre vlente 135 milionë euro.

Barcelona dëshiron ta marrë Kutinjon sa më shpejt në janar, për të shmangur konkurrencën, ndërsa futbollisti nuk e ka fshehur dëshirën që të luajë në “Kamp Nou”.

Ai është cilësuar si një nga lojtarët më të talentuar të brezit të sotëm brazilian, brez që kërkon të arrijë me kombëtare suksese të mëdhenj, si në kohën e Pelesë.

Dëshira tjetër e madhe e Barçës është Antuan Grizman.

Sulmuesi i Atletikos së Madridit vlerësohet shumë nga trajneri Valverde, ndërsa është e sigurt se për ta marrë do të duhet të paguhen 100 milionë euro, aq sa është klauzola në kontratën e francezit.

Gjithsesi, për transferimin e mundshëm kanë dalë problemi, pasi Atletiko e Madridit e ka paditur klubin katalanas në FIFA, duke e akuzuar për bisedime me Grizmanin, në shkelje të rregullave.

Kjo mund të bëjë që Barcelona të dënohet dhe që sulmuesi të shkojë tek Mançester Junajtid.

Pavarësisht nga këto vështirësi, drejtuesit katalanas janë të vendosur të forcojnë skuadrën, sidomos në fazën ofensive.

Largimi i Nejmarit është ndjerë, pavarësisht nga fitoret, golat e shumtë të shënuar dhe kryesimi i tabelës së La Ligës.

Në fund të fundit, duket se ky ka qenë kushti i vendosur nga Lionel Mesi për rinovimin e kontratës, pra që Barcelona të ketë një skuadër aq të fortë sa ta mundë Realin në konkurencë për trofetë më të mëdhenj në Spanjë dhe në Europë./abcnews.al

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono