kupa

penalltia.jpg
G. P.14:15 | 07/02/2019

Polemika dhe dyshime pas ndeshjeve të Kupës së Shqipërisë. Trajneri i Flamurtarit, Daja, akuzon arbitrin, ndërsa Kamza luajti me formacion të plotë ndaj Vllaznisë, ndryshe nga takimi me Partizanin.

Kësaj skuadre i ndodh shpesh, madje jo vetëm në Superligë. Flamurtari pati pretendime të mëdha ndaj gjykimit të Laver Allës në ndeshjen e Kupës së Shqipërisë ndaj Tiranës, duel që e fitoi, por pas të cilit u eleminua.

Vlonjatët u acaruan shumë për një penallti që menduan se duhej t’u jepej në minutën e tretë shtesë, por arbitri nuk sinjalizoi. Pamjet filmike të bëjnë të besosh se ishte me të vërtetë ndërhyrje e gabuar në zonë ndaj lojtarit vendas. Gjithsesi, trajneri Daja, nuk u mor shumë me këtë rast, por me arbitrimin në përgjithësi.

Nuk mbetën pas futbollistët e tij dhe ja reagimi në Instagram i Emiljano Mustës.

“Fluturo, fluturo Laver Alla”, – ishte postimi it tij, ndërsa pranë mesazhit ishte një tufë me dollarë. Trajneri i Tiranës, Ardian Mema, nuk e hodhi poshtë mundësinë që për vlonjatët mund të ishte dhënë penallti.

Gjithsesi, polemikat dhe dyshimet nuk ishin vetëm për sfidën e Vlorës. Kamza u kualifikua ndaj Vllaznisë me fitoren 1-0, duke luajtur me formacion të plotë, vetëm pak ditë pasi shumë lojtar bojkotuan ndeshjen e kampionatit ndaj Partizanit.

Kjo ndeshje u sulmua ashpër nga emri i njohur i futbollit shkodran dhe shqiptar, Edi Martini, në emisionin “Presing”, në Abc News. Të shtunën, Kamza u mund 0-1 nga Partizani, ndërsa lojtarët u shprehën se bojkotuan për shkak të vonesës së rrogave, me një rrogë që thuhet se u ndaj para takimit ndaj Vllaznisë./abcnews.al

skenderbeu.jpg
G. P.16:36 | 05/02/2019

Skënderbeu shpreson të lerë pas atë që ndodhi me Kastriotin, dhe të arrijë një kualifikim në Kupën e Shqipërisë. Trajneri Orges Shehi flet për problemet dhe gjendjen e skuadrës

Një stërvitje e fortë është mënyra më e mirë për të harruar. Skënderbeu i është rikthyer përgatitjeve në Korçë, pas humbjes dhe tensioneve në Fushë Krujë me Kastriotin, ndërsa vëmendja është për duelin e Kupës, ndaj Besëlidhjes. Trajneri Orges Shehi nuk flet për formacionin, por thotë sesi do të vendosë për ata që do të luajnë.

“Kemi marrë një rezultat pozitiv në ndeshjen e parë dhe nesër do ta vlerësojmë maksimalisht. Do fusim të gjithë lojtarët që mendojmë se do të jenë më të gatshëm për këtë takim”, tha Shehi.

Shehi pyetet për ultimatumin e presidentit Takaj për braktisje të mundshme të garës.

“Nuk mund të komentoj deklaratat e presidentit. Presidenti është shkalla më e lartë  e klubit. Ne do të përqëndrohemi te ndeshja nesër sepse po afron sepse nuk mund të qajmë atë që iku. Sepse duke qarë atë që iku fillojmë e humbim atë që vjen nesër. Përqëndrimi maksimal është te ndeshja nesër”, tha ai.

Largimi i Fidan Alitit ka sjellë pakësim të lojtarëve në mbrojtje, ku ka pak alternativa.

Është një largi që në kuadrin e organikës na dobëson, por është një largim që në kuadër të strategjisë të kklubit është një transferim që çdo lojtar i Skënderbeut ia uronim ta bënte”, tha trajneri Shehi.

Trajneri i lejon vetes të mendojë edhe përtej ndeshjes së radhës.

“Rezultatet s’kanë qenë ato që do dëshironim. Ne do bëjmë maksimumin që të rikthehemi që këtë javë te rezultatet. Ka pasur shumë faktorë. Një nga faktorët ka qenë se grupi nuk ka qenë asnjëherë i plotë. Ndeshja me Laçin, kontigjenti do jetë i plotë dhe shpresojmë të kthehemi aty ku duhet”, theksoi Shehi.

Skënderbeu e ka fituar ndeshjen e parë të Kupës, në Lezhë, ndaj Besëlidhjes me shifrat 2-1./abcnews.al

benzema.jpg
G. P.14:17 | 01/02/2019

Real Madrid kaloi në gjysmefinale të Kupës së Spanjës pas fitores 3-1 ndaj Gironas. Benzema ishte heroi i takimit për madrilenet me dy golat e shënuar.

Real Madrid kalon pa problem në gjysmëfinalet e Kupës së Spanjës. Madrilenët fituan në transfertën e Gironas me rezultatin 3-1 duke i dërguar shifrat e përgjithshme në 7-3.

Benzema hapi serinë e golave në minutën e 27. Francezi realizon një gol mjaft të bukur dhe tregon se po kalon një formë mjaft të mirë. Pak minuta më vonë, Marcelo pati mundësinë për të dyfishuar rezultatin, por gabon përballë portierit Moreno. Gjithsesi gabimin e tij e shlyn Benzema në fundin e pjesës së parë që realizon golin e dytë personal me një goditje të bukur brenda zonës.

Në fraksionin e dytë të lojës, Reali pati mundësinë për të dërguar shifrat në 3-0, por Vasquez godet shtyllën me portën e boshatisur. Vendasit nisen në kundërsulm dhe ngushtojnë diferencën me Pedro, i cili u tregua i saktë përballë portierit Kejlor Navas.

Gjithsesi fitoren e Realit e vulos Marcos Llorente me një goditje të fuqishme jashtë zonës. Real Madrid regjistron fitoren e radhës dhe lojtarët po tregojnë një formë të shkelqyer. Kupa është një nga objektivat e Realit të Madridit në këtë sezon në Spanjë pasi kampionati është thuajse i pamundur për shkak të diferencës së madhe të pikëve me Barcelonën kryesuese./abcnews.al

1081363030.jpg.0.jpg
ent ela16:24 | 13/01/2019

Milani e nisi me sukses vitin 2018, duke u kualifikuar në Kupën e Italisë, por ka problem për një sulmues. Gonzalo Higuain është në prag të largimit për tek Çelsi.

Detyra e shtëpisë në Kupë u krye. Milani kaloi në fushën e Sampdorias dhe u kualifikua në çerekfinale, ndonëse iu desh koha shtesë, ndërsa e ardhmja nuk duhet shumë e qartë.

Edhe në Gjenovë nuk është se shkëlqeu Gonzalo Higuain, i paracaktuari si sulmuesi kryesor, por Patrik Kutrone.

Sulmuesi i ri hyri në fushë vetëm në minutën e 90-të, dhe shënoi dy golat vendimtarë në kohën shtesë.

Çfarë do të ndodhë, ndërkaq, me Higuainin, lojtarin e dytë më të paguar në Serinë A me 9.5 milionë euro në sezon, dhe më të paguarin e Milanit?

Ai është I huazuar nga Juventusi, por duket se nuk e pëlqen këtë gjendje.

Trajneri Xhenaro Gatuzo, e thotë qartë për “La Gazeta delo Sportin”, se nuk mund të japë garanci për argjentinasin.

Vetë Higuain, sipas mediave britanike, ka kërkuar largimin për tek Çelsi, dhe Gatuzo pohon se kur një lojtar vendos për diçka, nuk është e lehtë t’i kthehet mendja.

Alternativa kryesore për Milanin është sulmuesi i Xhenoas, Kristof Piontek, shënuesi I dytë më I mirë në Serinë A, me një gol më pak se Kristiano Ronaldo.

E pohon edhe “La Gazeta delo Sport”, që komenton edhe ndeshjen: Kutrone bën Milanin të fluturojë! Kupa e Italisë, kuqezinjtë në çerekfinale!

Higuain tek Çelsi? E ardhmja është Piontek, më shumë se Morata!

Gjithsesi, Milani duhet të nxitojë dhe të bëjë një sakrificë financiare, pasi për polakun ka një derbi “El Klasiko” mes Realit dhe Barcelonës.

Milani ndërkaq, udhëtoi për në Xheda të Arabisë Saudite ku do të luajë finalen e Superkupës së Italisë ndaj Juventusit.

Ambiciet janë të mëdha, por vështirësia duket edhe më e madhe.

Juventusi, ashtu si Milani, u kualifikua për në çerekfinale të Kupës së Italisë pas fitores 2-0 në fushën e Bolonjës, madje duke e pasur Kristiano Ronaldon në stol.

Mjaftuan Bernardeski dhe Kin për suksesin. /abcnews.al

 

STRUGA-FITON-KUPEN-E-PAVARESISE-1280x720.jpg
ent ela16:04 | 28/11/2018

Struga u bë fituese e Kupës së Pavarësisë në futboll. Skuadra e shqiptarëve të Maqedonisë arriti suksesin e dytë radhazi, në ndeshjet e luajtura në Korçë.

Tjetër vit dhe tjetër stadium, por fituesi mbeti i njëjti. Struga bëri sërish të vetën Kupën e Pavarësisë, në ditën e festës së Flamurit.

Skuadra e shqiptarëve të Maqedonisë triumfoi 1-0 në finalen e luajtur në Korçë ndaj Otrantit të Ulqinit.

Siç është tashmë traditë, Kupa u diskutua mes katër skuadrave, Skënderbeut të Korçës që përfaqësoi Shqipërinë, 2 Korrikut të Prishtinës në emër të Kosovës, Strugës nga Maqedonia dhe Otrantit të Ulqinit, të Malit të Zi.

Në gjysmëfinale, Struga mundi 1-0 Skënderbeun vendas, me gol të shënuar nga Agon Hajredini, ndërsa ndeshja tjetër u vendos pas penalltive, ku Otranti fitoi 6-5 ndaj 2 Korrikut.

Në finale, ishte goli i Llogës që I dha triumfin Strugës, një ekipi të Kategorisë së Dytë të Maqedonisë.

Edhe lojtari më i mirë i Kupës ishte i Strugës dhe pikërisht Nijaz Lena, ish-futbollist i Flamurtarit apo Kukësit.

Me çmimin e Lojës së Ndershme u vlerësua 2 Korriku i Prishtinës.

Ky ishte edicioni i 10-të i zhvillimit të Kupës së Pavarësisë, dhe hera e parë që ai u diskutua në Korçë. /abcnews.al

BAJERNI-LEVANDOVSKI-SUPERKUPA-ABC-M4-T1.mpg_snapshot_00.04-1280x720.jpg
G. P.15:17 | 13/08/2018

Robert Levandovski vendosi një rekord golash në finalen e Superkupës së Gjermanisë. Sulmuesi polak ishte protagonisti kryesor në fitoren e Bajernit.

Bëri rokadë me skuadrat, por sërish ia doli mbanë. Niko Kovaç ishte përsëri trajner fitues, duke marrë trofeun e parë me Bajernin, Superkupën e Gjermanisë. Kroati mposhti 5-0 Ajntrahtin e Frankfurtit, pikërisht në stadiumin e tij “Komercbank Arena”, ndërsa në maj, në stolin e Frankfurtit fitoi Kupën e Gjermanisë luajtur në Berlin ndaj Bajernit. Bavarezët nuk patën vështirësinë më të vogël duke realizuar edhe një hakmarrje për disfatën e finales së Kupës, ndërsa Robert Levandovski vendosi një rekord.

Asnjëherë më parë nuk ishin shënuar 3 gola në finalen e Superkupës, dhe sulmuesi polak i Bajernit u bë i pari që ia arrin. Edhe pse mund të quhet i pakënaqur për shkak se do të donte të ishte tek Reali i Madridit, Levandovski luajti si profesionist i vërtetë, duke bërë detyrën. Ai ishte, madje autor i tre rrjetave të para të ndeshjes, duke qenë vendimtar për fitimin e Superkupës.

Përveç tij, realizuan edhe Kingsli Koman e Tiago Alkantara, me formacionin bavarez që u shfaq sërish si favorit i sezonit gjerman, për çdo konkurrim. Trajneri Kovaç fitoi trofeun e dytë personal në këtë profesion, ndërsa për Bajernin ishte Superkupa e 7-të kombëtare. Skuadra nga Mynihu ka tani 59 tituj në Gjermani, duke qenë rekordmen në çdo kategori, si dhe ka plot 80 suksese gjithsej, duke përfshirë edhe trofetë ndërkombëtarë./abcnews.al

trofeu.jpg
G. P.13:09 | 16/07/2018

Sot, ekipi i Didier Deschamps do të zbresë në aeroportin Charle de Gaulle rreth orës 15:55. Kampionët e rinj të botës pastaj do të shkojnë në Shamp-Élizé për të parakaluar para tifozëve së bashku me trofeun.

Parakalimi është parashikuar nga ora 17:30 deri në 18:30. Më pas ekipi kampion i botës do të pritet nga Presidenti i Republikës, Emmanuel Macron, në pallatin presidencial Elizee, deri në orën 20.00.

Disa stacione metroje në Paris do të mbyllen nga policisë këtë pasdite për shkak të festimeve për kthimin në Francë të ekipit kombëtar të futbollit.

Nderkohë mediat franceze bëjnë të ditur se trajnerët e të ashtuquajturve “gjelat francezë” si dhe lojtarët e ekipit kombëtar francez do të nderohen dhe titullin e lartë të Legjionit të Nderit./abcnews.al

kupa.jpg
G. P.14:34 | 27/05/2018

Do të përcaktohet sot fituesi i Kupës së Shqipërisë në futboll. Skënderbeu është favorit ndaj Laçit, në finalen që luhet në orën 19:00, në “Elbasan Arena”.

Me Superligën i dha fund, edhe pse nën presion e dyshime të mëdha.

Skënderbeu kaloi menjëherë në një objektiv tjetër, atë të fitimit të Kupës së Shqipërisë, me finalen që do ta luajë sot ndaj Laçit, në orën 19:00, në “Elbasan Arena”.

Skuadra e trajnerit Ilir Daja u përgatit në kompleksin “Tropikal” në plazhin e Durrësit, në kërkim të trofeut të vetëm që i mungon.

Daja thekson se finalja është e vështirë për faktin se dhe Laçi ka bërë të njëjtën rrugë në Kupë, ashtu si skuadra e tij, ndonëse shton se është i lumtur me gjendjen e lojtarëve.

Për fat të keq, ekipi aktual dhe trajneri duhet të përballojnë edhe shqetësimin nëse do të jenë në Champions apo jo sezonin e ardhshëm.

Vitin e kaluar, u përfol shumë se Skënderbeu toleroi në finalen ndaj Tiranës, duke pësuar edhe humbje.

A pritet të ketë dyshime edhe për sfidën e sotme?

Trajneri i Laçit, Gentian Mezani, thotë se skuadra e tij e ka arritur objektivin, pra Ligën e Europës nëpërmjet kampionatit.

Një hipotezë mund të jetë që Skënderbeut i duhet më shumë kupa, për ta fituar për herë të parë, dhe kurbinasve më pak, meqë edhe e kanë fituar në të kaluarën.

Mezani e di se Laçi nuk mund të quhet favorit për finalen, por sa shanse i jep ekipit të tij?

Gentian Mezani: “Kemi një përqindje pak më të lartë sepse mendoj se jemi në një nivel pak më të lartë se ata”.

Federata ka përzgjedhur për finalen vetëm gjyqtarë të FIFA-s, me kryesor Eldorian Hamitin./abcnews.al

KUPA-LACI-NE-FINALE-1280x720.jpg
ent ela18:42 | 18/04/2018

Laçi siguroi një tjetër finale të Kupës së Shqipërisë. Skuadra kurbinase do të synojë trofeun e tretë në historinë e saj, pas eleminimit të Kukësit kampion.

Nuk ka ekip më të mirë këto vitet e fundit.

Laçi mund të quhet pa frikë si skuadra eksperte e Kupës së Shqipërisë, pasi arriti përsëri finalen.

Edhe pse nuk ishte në rolin e favoritit, u kualifikua brenda në Kukës, falë golit në fushë kundërshtare, dhe fitoi të drejtën për të luajtur finalen e katërt në 6 sezonet e fundit.

Kurbinasit e trajnerit vlonjat Gentian Mezani dhe të presidentit Pashk Laska, do të ketë mundësinë të fitojnë trofeun e tretë në histori, diçka që nëse ndodh, i barazon me Teutën dhe I afron me Flamurtarin.

Në të vërtetë nisi shumë keq për miqtë në stadiumin “Zeqir Ymeri” që u ndëshkuan me penallti që në minutën e 19-të.

Njëmbëdhjetëmetërshin e fitoi sulmuesi kryesor, Sidrit Guri, dhe ishte po ai që kaloi Kukësin në epërsi.

Pavarësisht se Laçi është quajtur rival serioz kohët e fundit, u mendua se kampionët e drejtuar nga trajneri Peter Pakult do t’ia dilnin.

Jo më kot kishin shfaqur formë shumë të mirë gjatë gjithë këtyre javëve, duke forcuar pozitat në vend të dytë, duke qenë pranë një kualifikimi të mundshëm në Champions.

E tregoi edhe fitorja 4-0 ndaj Partizanit fundjavën e kaluar.

Të gjitha këto nuk vlejtën sidoqoftë, gjithnjë për atë që u shfaq në fushën e lojës.

Kurbinasit reaguan dhe barazuan me Rezhinaldon, lojtarin që pak ditë më parë pretendoi se presidenti i tij, Laska, e dhunoi fizikisht.

Për më tepër, miqtë patën mundësi edhe të shënonin golin e fitores, ndonëse u mjaftonte barazimi.

Kualifikim me gol në fushë kundërshtare, pas rezultatit 0-0 në Laç.

Si mund të emërtohet eleminimi i kampionëve?

Në futbollin shqiptar, gjithnjë të paragjykuar dhe me arsye, dyshimet janë për një kombinim tresh, me Kukësin në Champions, Partizanin në Ligën e Europës nga kampionati dhe Laçin po në Ligën e Europës nga Kupa.

Ndoshta, kombinimi mund të bëhet i plotë me kualifikimin në Europë edhe të Luftëtarit, edhe pse si gjithnjë këto janë vetëm supozime. /abcnews.al

vlcsnap-error329-1-1280x720.jpg
G. P.22:32 | 28/02/2018

Etrit Berisha nuk arriti të kualifikohej për në finalen e Kupës së Italisë. Portieri i kombëtares shqiptare u dorëzua në fund në fushën e Juventusit, edhe pse vetëm pas një penalltie.

Ky brez kampionësh nuk ngopet lehtë.

Xhanluixhi Bufon dhe gjithë yjet e tjerë të Juventusit realizuan një tjetër objektiv, edhe pse një finale dhe jo një trofe, atë të Kupës së Italisë.
Në një sezon më të vështirë se zakonisht, edhe suksesi nuk ishte plotësisht i lehtë ndaj Atalantës modeste si emër, por të fortë në fushë, që pati sërish në portë Etrit Berishën e kombëtares shqiptare.

Suksesi 1-0 në ndeshjen e parë falë golit të Gonzalo Higuainit nuk është se i dha shumë qetësi kampionëve të Italisë, pasi miqtë nga Bergamos ushtruan presion pa u trembur.

Gjithsesi, diferenca në cilësi ishte e madhe në stadiumin e Torinos, pavarësisht nga karakteri i ekipit të drejtuar nga trajneri Gasperini.
Juventusi e mori shpejt komandën, por u duk përsëri se nuk është në momentin më të mirë.

E pati shumë të vështirë të krijonte raste të pastër, diçka e paimagjinueshme për këtë formacion, të paktën në futbollin italian.

Besohet se me këtë formë, nuk do ta ketë të lehtë të arrijë kualifikimin për në çerekfinalet e Championsit, ndërsa shkon në fushën e Totenhemit pas barazimit 2-2 në Torino.

Skuadra e trajnerit Masimiliano Alegri pati madje fat që sfida nuk shkoi në shtesë, pasi vetëm shtylla e shpëtoi nga pësimi i golit, kur takimi ishte në 0-0.
Në fund, lehtësimi erdhi nga një penallti e fituar nga Matyidi.
Për fatin e juventinëve, përballë Etrit Berishës nuk u vendos Dibala, që nuk ishte fare në fushë, por Miralem Pjaniç dhe boshnjaku nuk gaboi.
Fitorja e dytë 1-0 dhe finalja e parë e sezonit për kampionët./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono