kupa

shenkolli-Tirana.jpg
Vladimir Prenga08:40 | 02/10/2019

Kupa e Shqipërisë sot do të njohë çiftet e turit të dytë. Prej orës 14:00 janë programuar ndeshjet e kthimit të turit të parë dhe pikëpyetjet janë të vogla. Nga ekipet e Superiores vetëm Flamurtari duhet të përmbysë humbjen e ndeshjes së parë. Vlonjatët janë thyer 3-2 nga Veleçiku në Shkodër.

Laçit dhe Tiranës gjithashtu u duhen fitore, pasi kanë barazuar pa gola me Elbasanin dhe Shënkollin në takimet e para. Bylisi, Skënderbeu dhe Teuta e kanë mbyllur çështjen e kualifikimit, sikurse edhe Vllaznia që nuk besohet ta vërë në diskutim. Më poshtë ju sjellim të gjitha përballjet e sotme.

GRUPI A
E mërkurë, më 2 tetor, ora 14:00

Teuta-Tërbuni (2-0)
Flamurtari- Veleçiku (2-3)
Tirana-Shënkolli (0-0)
Kastrioti- Iliria (1-2)
Vllaznia- Burreli (1-0)
Dinamo-Erzeni (0-3)
Besëlidhja- Korabi (1-2)

GRUPI B
E mërkurë, më 2 tetor, ora 14:00

Skënderbeu-Devolli (4-1)
Laçi-Elbasani (0-0)
*Kamza-Apolonia
Bylis- Pogradeci (4-0)
Besa- Egnatia (1-0)
Oriku- Lushnja (1-2)

*Kamza është përjashtuar nga Kupa, pasi nuk u paraqit ndeshjen e parë

/abcnews.al

u.jpg
ad min14:03 | 17/06/2019

Uruguai respektoi parashikimet në Kupën e Amerikës duke mundur 4-0 Ekuadorin. Gjithsesi, trajneri Tabarez paralajmëroi se ndeshjet e tjera do të jenë të vështira

Duhej gjetur një rival për Brazilin, dhe duket se ja ku është. Uruguai respektoi parashikimet në Kupën e Amerikës, edhe pse u ndihmua nga fati, duke e nisur garën me këmbën e mbarë, me fitore 4-0 ndaj Ekuadorit.

Një karton i kuq i minutës së 24-ët, marrë nga Kinteros, i dëmtoi keq ekuadorianët, por gjithsesi suksesi tregon se Uruguai do të jetë pretendent si përherë. Jo më kot, skuadra e shquar e ka fituar 15 herë këtë kompeticion, dhe mban rekordin përpara Argjentinës e Brazilit.

Gjithsesi, trajneri Oskar Tabarez paralajmëroi lojtarët e tij se ndeshjet e tjera pritet të jenë më të vështira.

“E ëmbla ka shije shumë të mirë, por të bën keq për dhëmbët, – tha gjysmë me shaka, e gjysmë seriozisht Tabarezi, – futbolli gjithnjë ka të papritura dhe duhet të jemi të përgatitur për to. Fitorja 4-0 na forcon vlerësimin për veten. Synimi ynë është të triumfojmë në çdo ndeshje, por duhet të kujdesemi për çdo detaj. Gjithnjë kam shpresë te kjo kombëtare, lojtarët kanë talent, por edhe dëshirë të madhe”.

Golat për uruguaianët u shënuan nga Nikolas Lodeiro, Edinson Kavani, Luis Suarez dhe një autogol i ekuadorianit Arturo Mina.

“Fitorja na jep qetësi për të vazhduar rrugën tonë, – deklaroi Kavani, – jam shumë i kënaqur për fitoren, pasi ishte një hap shumë i rëndësishëm. Është mirë që e nisëm turneun kështu, dhe duhet të vazhdojmë në këtë rrugë”.

Uruguai jepet favorit për të fituar grupin C, ku ndodhen edhe Kili me Japoninë, ndonëse cilësohet si pretendenti i tretë për të fituar trofeun, pas Brazilit dhe Argjentinës./ABC News Albania 24/7

BRAZILI-FITON-NDESHJEN-HAPESE_ABC-M1-T1.mpg_snapshot_00.06-1280x720.jpg
ent ela12:35 | 15/06/2019

Kombëtarja e Brazilit fitoi në ndeshjen hapëse të Kupës së Amerikës përballë Bolivisë me rezultatin 3-0. Dy golat e Kutinjos dhe një i Everton i dhanë tre pikët e para në grup vendit organizator.

Brazili përmbush pritshmëritë dhe e nis mbarë edicionin e 46 të Kupës së Amerikës. Vendi organizator fitoi ndeshjen hapëse ndaj Bolivise me rezultatin e pastër 3-0, sfidë e vlefshme për grupin A.. Mungesa e Neymar nuk ndikoi aspak në skuadrën e trajnerit Tite pasi Kutinjo mori përdore pesë herë kampionet e botës. Sfida ishte tepër e luftuar në pjesën e parë. Të dyja skuadrat amerikano-latine ia krijuan shumë raste shënimi, por mungoi konkretizimi. Në pjesën e dytë, Brazili ndërroi strategji dhe rezultoi efikase. Gjyqtari akordon 11 metërsh për vendasit që shndërrohet në gol nga ylli i Barcelones Kutinjo.

Nuk vonoi shumë goli i dytë me autor sërish Kutinjon. Firminjo asiston saktë për shtatshkurtin i cili i shpëton mbulimit të mbrojtjes së Bolivisë dhe shkund rrjetën për herë të dytë. Brazil 2, Bolivi 0.

Të besuarit e teknikut Tite kontrollojnë qetësisht lojën pasi avantazhi i dyfishtë ja lejon diçka të tillë. Bolivia duket e dorëzuar ndërkohë që vendasit shfrytëzojnë në maksimum rastet e krijuara. Pesë minuta para përfundimit të kohës së rregullt, në skenë shfaqet Everton i cili lë gjurmë në këtë takim. I sapofuturi në lojë realizon një gol mjaft të bukur në limitet e zonës së rreptësisë dhe vulos fitoren 3-0 të Brazilit. Edhe pse pa Neymar në fushë, Brazili shkëlqeu dhe mori tre pikeë me mjaft vlera në ndeshjen e parë në grup. /ABC News Albania 24/7

 

kupa.jpg
ad min13:20 | 03/06/2019

Kuksianët ndihen të lumtur pas fitores së Kupës së Shqipërisë. Trajneri Gjoka thotë se e filloi aty ku e la, ndërsa presidenti Gjici, vlerësoi suksesin e arritur në kushte të vështira

E dinë se nuk mund të quhen të suksesshëm, ndryshe. Vetëm trofetë i japin kuptim një sezoni te Kukësi, diçka që vitet e fundit është kthyer në standard nga presidenti Safet Gjici, por edhe nga trajnerët dhe lojtarët ambiciozë të ekipit.

Fitorja e Kupës së Shqipërisë ishte mbyllja më e mirë e sezonit, edhe pse ndaj Tiranës u bë shumë e vështirë në pjesën e dytë. Në stol ishte trajneri Gjoka, ai që mori titullin kampion.

“Është një gjë shumë e bukur që arritëm t’i sillnim Kukësit një trofe pas dy vitesh. Kështu aty ku e lamë, aty po e fillojmë prapë”, tha  Gjoka.

Presidenti Gjici duhej të shprehej i kënaqur, me trofeun e dytë për nga rëndësia, duke shpjeguar edhe pse.

“Patjetër që ne jemi të kënaqur me Kupën e Republikës. Objektivi ishte për trofeun e kampionatit. Meqenëse kemi lozur gjitha ndeshjet jashtë besoj se jemi të kënaqur që justifikohet i gjithë investimi që është bërë për ekipin e Kukësit. Ta gëzojmë tifozeria kuksiane”, tha Gjici.

Kjo ishte Kupa e dytë e Shqipërisë fituar nga Kukësi, që ka katër trofe kombëtarë në pak vjet, si dhe suksese në Europë./ABC News Albania 24/7

gol.jpg
ad min22:57 | 02/06/2019

Kukësi fitoi për herë të dytë në histori Kupën e Shqipërisë në futboll. Skuadra e trajnerit Ernest Gjoka mundi Tiranën 2-1, në finalen e luajtur në “Elbasan Arena”.

Ishte i fiksuar për të fituar një trofe, dhe ia doli. Kukësi i dha një kënaqësi të rëndësishme presidentit Safet Gjici, duke marrë Kupën e Shqipërisë në finalen e luajtur ndaj një rivali historik si Tirana.

Përfundoi 2-1 për veriorët në “Elbasan Arena”, sukses që i shton një tjetër titull klubit kuksian, dhe që besohet i garanton postin trajnerit Ernest Gjoka. Në një klub që ka kaq pak durim si Kukësi, vetëm trofetë mund ta shpëtojnë një trajner nga shkarkimi.

Skuadra e Gjokës luajti më mirë në pjesën e parë, duke gjetur edhe rrugën e rrjetës me anë të sulmuesit Vasil Shkurtaj, madje që në minutën e 4-ët. Veriorët, madje i patën mundësitë që të shkonin në pushimin e ndeshjes me avantazh edhe më të thellë.

Tirana reagoi në pjesën e dytë, besohet edhe pas motivimit dhe ndërhyrjeve të trajnerit Ardian Mema. Arriti edhe të barazonte me anë të sulmuesit anglez, Majkëll Ngo, por nuk mundi të fitonte, as ta dërgonte ndeshjen në shtesë.

Në të kundërt, pësoi golin e dytë kur duheshin edhe 11 minuta deri në përfundim, gol që vulosi edhe rezultatin final. A mund të quhet ky një sezon i mirë për Kukësin, dhe i dështuar për Tiranën?

Padyshim, pasi kuksianët morën një trofe dhe dolën në vend të dytë në Superligë, duke mos luajtur asnjë ndeshje në stadiumin e tyre, që ndodhet në rikonstruksion.  Tiranasit, ndërkohë, ishin një dështim në kampionat, por arritja në finalen e Kupës ishte e rëndësishme, duke pasur parasysh problemet që kishte skuadra.

Nuk dihet nëse kjo do të mjaftojë që trajneri Mema të vazhdojë detyrën, apo do të zëvendësohet. Sa për Kukësin, tashmë ka 4 tituj në traditën e tij të shkurtër, dhe do të përgatitet për pjesëmarrje në Ligën e Europës./ABC News Albania 24/7

atalanta.jpg
ad min22:55 | 15/05/2019

Lazio arriti të fitonte kupën e Italisë pasi mundi Atalantën me rezultatin 2-0. Golat për bardhekaltrit u shënuan nga serbi Milinkoviç-Saviç dhe nga Correa. Kjo është hera e shtatët që LAzio fiton këtë trofe.

Kjo ndeshje ishte edhe një duel edhe mes dy lojtarëve shqiptarëve, Berat Gjimshiti dhe Thomas Strakosha. Të dy ata luajtën për 90 minuta, ku gardiani shqiptar nuk lejoi për asnjë moment që topi të kalonte katërkëndëshin e mbrojtur nga ai.

Ndërkohë portieri tjetër shqiptar, Etrit Berisha e ndoqi finalen nga porta. Atalanta kaloi në finale pasi mposhti Fiorentinën, ndërsa skuadra e kryeqytetit skualifikoi Milanin.

Me fitoren e kupës së Italisë, ata siguruan kualifikimin direkt për në Europa League. Nga ana tjetër edhe pse u mposht, Atalanta është duke kaluar një prej sezoneve më të mira. Përveçse nënkampionë të kupës së Italisë, ata janë në garë për kualifikim në Champions League./abcnews.al

kukesi.jpg
ad min20:03 | 08/05/2019

Skuadra e Kukësit fitoi edhe takimin e dytë ndaj Skënderbeut në ndeshjen e kthimit të gjysmëfinales së Kupës së Shqipërisë. Verilindorët fituan me rezultatin 3-1. Shkëlqen edhe Tirana ndaj Luftëtarit pasi triumfuan me shifrat 5-3 duke siguruar finalen.

Kukësi shkatërron Skënderbeun në ndeshjen e kthimit të Kupës së Shqipërisë. Verilindorët fituan në transfertën e Korçës me shifrat 3-1 dhe kalon në finalen e Kupës së Shqipërisë, ku do të përballet me Tiranën. Kukësi kalon i pari në avantazh në minutën e 18 me Rexhinaldon. Sulmuesi asistohet në mënyrën perfekte nga Rrumbullaku dhe tregohet i sakte përballë portierit Dajsinani. Në fundin e pjesës së parë janë sërish miqtë që realizojnë. Rrumbullaku nga e majta kroson ne zonë për Rexhinaldon, i cili nuk e mbërrin në kohë topin që devijohet gabimisht nga Leonit Abazi dhe përfundon në rrjetë.

Pjesa e dytë nis mirë për Skënderbeun që ngushton diferencat me Dejvi Bregun. Në minutën e 47, Gripshi ndërmerr një aksion individual nga e djathta, futet në zonë dhe pason për Bregun që shënon lehtësisht. Gjithsesi vetëm pak minuta më pas, Kukësi shënon sërish, kësaj radhe me Valdet Ramën, i cili konkretizon pas një kundërsulmi. Minutat e mbetura nuk kanë ndryshim rezultati dhe Kukësi fiton edhe takimin e dytë ndaj Skënderbeut që e mbyll vitin pa asnjë trofe për herë të parë  pas shumë vitesh. Në takimin tjetër, Tirana mundi me shifrat e thella 5-3 skuadrën e Luftëtarit. Bardheblutë zhvilluan një ndeshje mjaft të mire dhe japin sinjale pozitive në prag të derbit me Partizanin./ABC News Albania 24/7

ardian-takaj-1280x715.jpg
ad min22:14 | 07/05/2019

Presidenti i skuadrës së Skënderbeut, Ardian Takaj ka premtuar një premio prej 70 mijë euro në rast se klubi fiton Kupën e Shqipërisë. Fituesja e Kupës kalifikohet direkt për në garat euopiane sezonin e ardhshëm.

Skënderbeu pret vendimin e CAS por për prestigj dhe për të dhënë shumë mesazhe kërkon që të nxjerrë jashtë Kukësin nga Kupa dhe të bëjë të vetën këtë trofe, dhe në një situatë të tillë. Dhe një diçka e tillë do të ishte shumë pozitive edhe për trajnerin Shehi.

Skuadra model e këtyre viteve në futbollin shqiptar tashmë në kampionat ka dështuar dhe i vetmi objektiv mbetet Kupa e Shqipërisë. Ndeshja e parë gjysmëfinale është humbur ndaj Kukësit me rezultatin 2-1, ndërsa shpresohet që në takimin e dytë “Ujqërit e Dëborës” të arrijnë të kualifikohen.

Dhe menjëherë ka ardhur edhe lëvizja inkurajuese e president Takajt, i cili kërkon të mos e mbyllë pa trofe këtë sezon dhe ka menduar që të motivojë futbollistët e tij me një premio të majme.

Sipas Panorama Sport bëhet me dije se drejtuesit korçarë kanë vendosur në dispozicion të skuadrës një premio prej 70 mijë eurosh në rast se fitojnë Kupën.  Pozitat e klubit kampion në fuqi nuk janë të mira, pasi e ardhmja e tyre varet nga vendimi i CAS-it, ata janë të dënuar për 10 vite që të mos marrin pjesë në Kupat e Europës.

Në rast se ky vendim mbetet në fuqi, drejtuesit do të rishikojnë pozitat e tyre, ndërsa në Korçë ka optimizëm se mund të fitojnë apelimin në CAS./ABC News Albania 24/7

bajerni-1280x710.jpg
ent ela12:50 | 25/04/2019

Milot Rashica ishte i shkëlqyer në gjysmëfinalen e Kupës së Gjermanisë, përballë Bajernit. Shqiptari i Kosovës u shpall lojtari më i mirë në fushë.

Dihej që ishte zbulimi i sezonit, dhe ndoshta nuk u habit kush. Milot Rashica shkëlqeu si askush tjetër në gjysmëfinalen e Kupës së Gjermanisë, mes Verderit të tij dhe Bajernit.

Bavarezët po udhëhiqnin 2-0, por lojtari i përfaqësueses së Kosovës, shërbeu pasimin për golin e parë të vendasve, dhe pastaj shënoi të dytin, me aksion individual. Rashica ishte më i miri në fushë.

Shqiptari i Kosovës mori notën tepër të lartë, 1.5, nga revista e specializuar sportive, “Kiker”.

Ai la pas yjet e Bajernit si Robert Levandovski apo Kingli Koman, që morën notën 2.

Bavarezët e nisën më mirë sfidën në “Vasershtadion” të Bremenit, duke goditur dy herë.

Fillimisht, me anë të Robert Levandovskit, dhe pastaj me golin me fat, por edhe me këmbëngulje nga Tomas Myler.

Momenti kulmor i ndeshjes ishte ai i akordimit të penalltisë për bavarezët, kur rezultati ishte 2-2.

Koman u rrëzua në zonë, ndoshta i shtyrë nga mbrojtësi, dhe arbitri sinjalizoi dënimin maksimal.

Polemikat ishin të ashpra, sidomos sepse gjyqtari Zibert nuk u konsultua me teknologjinë VAR, dhe as kjo e fundit nuk ndërhyri.

Agjencia e lajmeve “Dojçe Vele” bëri një sondazh për penalltinë dhënë Bajernit, dhe vetëm 20 për qind e tifozëve mendonin se ishte e drejtë, 13 për qind thanë “ndoshta”, dhe plot 67 për qind, pra shumica absolute, e quajtën gabim dhënien e saj.

Gjithsesi, Robert Levandovski nuk gaboi nga 11 metra larg, dhe Bajerni fitoi 3-2.

“Mendimi im është që nuk duhej dhënë penallti, – tha trajneri i Verderit, – u shpreh trajneri I Bremenit, Kolfelt, – kjo gjë ndodhi dhe nuk e kthejmë dot, por më vjen keq që humbëm në këtë mënyrë. Mund të kishim arritur një sukses historik ndaj Bajernit dhe të synonim Kupën”.

“Jemi në finale me meritë, pas një fitoreje të vështirë në një fushë tepër të vështirë, – u shpreh trajneri i Bajernit, Kovaç, – pavarësisht dyshimeve për penalltinë, mendoj se nuk vodhëm gjë. Duam që të fitojmë të dy trofetë në vend, dhe vitin tjetër të mendojmë për Championsin”.

Kampionët e Gjermanisë duan çdo titull, ndërsa Verderi do të duhet të luftojë për një vend në Ligën e Europës. /abcnews.al

shorti.jpg
ad min13:07 | 16/04/2019

Një klasike e futbollit shqiptar do të luhet në gjysmëfinalet e Kupës së Shqipërisë. Janë përcaktuar çiftet pas tërheqjes së goglave në selinë e Federatës.

Ishte shorti i fundit për këtë sezon. Kupa e Shqipërisë njohu çiftet gjysmëfinaliste dhe njëri prej tyre mund të quhet klasiku i këtyre viteve në futbollin shqiptar.

Pikërisht Kukësi-Skënderbeu, sfida e dy skuadrave që kanë pretenduar më shumë trofetë të paktën prej 5 vitesh. Ndeshja e parë, me shumë gjasa do të jetë në “Elbasan Arena”, dhe besohet se Skënderbeu mund të quhet i favorizuar nga ky short, por kuksianët nuk janë dakord.

“Besoj që çdo ekip që është në këtë fazë është me ambiciet e veta. Ndeshjen e parë do ta luajmë në fushën tonë dhe pretendojmë për të paktën një titull këtë sezon. Shpresojmë të bëjmë maksimumin dhe të fitojmë”, tha Nexhipi, drejtor teknik i Kukësit.

Skënderbeu, gjithashtu është tepër optimist.

“Ndeshje e fortë, e bukur. Do të ketë emocione për këtë pjesë, kjo është e sigurt. Ajo që është akoma më e sigurt është se Skënderbeu është koma në vendin e parë në Kupë, dhe kupa po këtë vit do jetë në Korçë”, tha Lulja, drejtues i Skënderbeut.

Çifti tjetër është Luftëtari-Tirana, një përballje që historikisht do të kishte pasur kryeqytetasit favoritë absolutë për finalen. Këtë herë mund të quhet ndryshe, dhe kështu besojnë edhe gjirokastritët.

“Më pëlqeu shorti që ra me Tiranën sepse me këto ekipit të kryeqytetit sikur ua kemi marrë dorën. Ëstë interesante sepse jemi të dyja ekipet për mbijetesë. Do jetë një gjysmëfinale e bukur. Të dyja kemi shpresë”, tha Artur Dadaj, drejtues i Luftëtarit.

Tirana dëshironte të shmangte Kukësin, dhe kjo dëshirë iu plotësua.

“Personalisht më pëlqeu duke qenë se me Luftëtarin do kemi të bëjmë dhe në kampionat, do ishte mirë të bënim edhe në kupë, kështu që besoj ishte një short i mirë. Objektiv është Europa, objektiv është Kupa, por duhet të shkëputemi nga zona e ftohtë”, tha Laçi, drejtor sportiv i Tiranës.

Ndeshjet do të luhen në 24 Prill e 8 Maj, dhe finalja në 2 Qershor, me stadiumin që mbetet për t’u përcaktuar./abcnews.al


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono