Kupa e Botës

uefa.jpg
G. P.10:36 | 18/06/2019

Arrestohet në Francë ish presidenti i UEFA-s Michel Platini. Ish legjenda e futbollit francez akuzohet për korrupsion në rastin e zgjedhjes së Katarit si vend organizator për kampionatin botëror të futbollit në vitin 2022.

Policia franceze ka arrestuar ish presidentin e UEFA-s Michel Platini. Ai akuzohet për korrupsion në rastin e dhënies së Katarit të drejtën për të organizuar kampionatin botëror të futbollit 2022. Platini u zgjodh president i UEFA-s në vitin 2007 dhe mbajti postin deri në 2015-n. Mediat franceze bëjnë të ditur se ai është arrestuar mëngjesin e të martës.

Legjenda franceze e futbollit u largua nga posti i presidentit të UEFA pas vendimit të komitetit etik. Sipas të dhënave të para nga hetimet Platini akuzohet se ka marrë një shumë të konsiderueshme parash për ti dhënë Katarit të drejtën e organizimit të kampionatit botëror të futbollit në vitin 2022.

Në dhjetor të vitit 2010, Katari mes shumë kritikave u zgjodh si vendi organizator për 2022-shin.

Menjëherë pas këtij vendimi pati shumë akuza për mënyrën e zgjedhjes së vendit organizator, për faktin se Katar është në qendër të kritikave për sa i përket respektimit të të drejtave të njeriut dhe statusit të homoseksualitetit, i cili dënohet me ligj.

Në vitin 2014, Platini pranoi se kishte pasur një takim sekret me zyrtarin Mohamed Bin Hamam, pak para votës së tij për Katarin. Burime pranë ish-presidentit të UEFA-s konfirmuan për britaniken “Telegraf” në atë kohë se Platini ishte takuar me zyrtarë të Katar për një mëngjes pune në një hotel në Zvicër, disa ditë para vendimit kontrovers./ ABC News Albania 24/7

REALI-KUPA-E-BOTES-PER-KLUBET-1280x720.jpg
ent ela14:51 | 23/12/2018

Reali nuk i shmangu dot polemikat në fitoren e Kupës së Botës në Emiratet e Bashkuara Arabe. Tifozët vendas vërshëllyen kapitenin madrilen, Sergio Ramos.

Kampion i përjetshëm apo kampion pa rivalë?! Si mund të quhet fitorja e radhës e Realit në Kupën e Botës për Klubet, ndaj Al Ainit të Emirateve të Bashkuara Arabe?

Pak nga të dyja, ndonëse për momentin, në klubin më të madh të planetit është, me të drejtë, kohë për të festuar, por edhe për të reflektuar.

Ishte vërtet Botërori i tretë radhazi, por as ky sukses nuk i fsheh dot problemet e madrilenëve këtë sezon, dhe po ashtu nuk i bëri të heshtin vërshëllimat për kapitenin Sergio Ramos.

Tifozët në stadiumin e Emirateve të Bashkuara Arabe, nuk ia kishin harruar dëmtimin që i shkaktoi egjiptianit të Liverpulit, Mohamed Salah, në finalen e Championsit në maj.

Vetë Ramos, u përpoq të kundërsulmonte, ndërsa nuk i kishte mbetur gjë tjetër për të bërë.

“Vërshëllimat ndaj nesh janë të pakonceptueshme, – tha ai, duke shpjeguar mënyrën e festimit pas golit në finalen ndaj Al Ainit, – duhen respektuar figurat e futbollit. Pavarësisht nga vështirësitë, jemi në garë për çdo trofe këtë sezon. Ne fituam një trofe që duhej ta fitonim. Është një shpërblim prej Championsit dhe është Botërori i tretë radhazi”

Në kundërsulm edhe mediat në Spanjë, që patën diçka për të festuar.

Gazeta “Marka”: Reali nuk është i kësaj bote. Botërori i tretë radhazi!

Suksesi u arrit me shifrat 4-1, me golat e shënuar nga Luka Modriç, Markos Jorente e pikërisht Ramosi për kampionët e Europës.

Al Aini shkurtoi diferencën me rrjetën e Shiotanit, por më pas shkaktoi autogol nga Nader.

Ky ishte trofeu i parë i trajnerit të ri, Santiago Solari, dhe i 90-ti në historinë e klubit, por Reali ende mbetet prapa rivalit më të madh, Barcelonës, që ka 93 tituj në histori. /abcnews.al

kombetarja-e-femrave.jpg
G. P.14:47 | 05/09/2018

Kombëtarja e femrave në futboll e mbylli me humbje fushatën kualifikuese të Kupës së Botës 2019.

Vajzat e drejtuara nga Armir Grima u mundën nga Skocia me rezultatin 2–1 të martën në Shkodër. Golin për Shqipërinë e shënoi Megi Doçi.

Kombëtarja e femrave u rendit e parafundit në këtë edicion me 4 pikë të grumbullura, një paraqitje më pozitive se kualifikueset e mëparshme.

Skocia me fitoren e arritur ndaj Shqipërisë siguroi kreun e grupit dhe kualifikimin në finalet e Botërorit 2019./abcnews.al

lii.jpg
G. P.22:08 | 22/08/2018

Duke parë suksesin e përdorimit të VAR-it në Kupën e Botës, organizata më e lartë e futbollit në Europë, UEFA, po planifikon prezantimin e teknologjisë në kompeticionin më elitar të futbollit, Champions League.

Sipas një artikulli në The Times, stafi i UEFA-s ka qenë duke punuar për një strategji, në të cilën mendohet që VAR-i të përdoret në çerekfinalet e Ligës së Kampioneve.

Punimet mbi këtë strategji do të vazhdojnë javën e ardhshme në Monaco, ku do të mblidhet një komitet, i cili do të japë vendimin përfundimtar mbi çështjen në fund të muajit.

UEFA shpreson që me teknologjinë e re të ketë sa më pak gabime në ndeshjet më të rëndësishme të Ligës së Kampioneve. VAR pritet që të përdoret edhe në Euro 2020, mirëpo për këtë çështje nuk është marrë një vendim zyrtar ende./abcnews.al

katari.jpg
G. P.17:32 | 29/07/2018

Katari rrezikon të humbasë të drejtën e organizimit të kampionatit botëror të futbollit për në vitin 2022. FIFA do të hapë një hetim lidhur me akuzat e fundit. Sipas një gazette britanike, Katari ka paguar një kompani amerikane dhe ish agjentë CIA-s për të dëmtuar konkurrencën.

Trupi udhëheqës i botës së futbollit FIFA është nxitur të kryejë një “hetim të pavarur” në pretendimet se ekipi i ofertës së Katarit 2022 në Kupën e Botës zhvilloi një fushatë sekrete në 2010-n për të sabotuar ofertat konkurruese të organizimit të kampionatit botëror. Kryetari i Komisionit për zgjedhjen Dixhitale, Kulturore, Mediatike dhe Sportive Damian Collins tha se “akuzat serioze”, të botuara në median britanike Sunday Times, përbënjnë një shkelje të rregullave të FIFA-s nëse janë të vërteta.

“Kjo kërkon një hetim të duhur të pavarur dhe FIFA duhet të bëjë të qartë se kjo do të ndodhë”, tha ai.

“Nëse Katari ka thyer rregullat, duhet të hasin me sanksione”, shton ai.

Në një deklaratë, Komiteti Suprem i Katarit për Dorëzimin dhe Trashëgiminë tha se “kundërshton çdo akuzë të paraqitur nga Sunday Times”. Gazeta pretendon se ka parë dokumente të zbuluara që tregojnë se ekipi i ofertës së Katarit përdorte një firmë amerikane dhe ish-agjentët e CIA-s për të dëmtuar rivalët e saj, kryesisht SHBA-të dhe Australinë.

Qëllimi i supozuar ishte krijimi i propagandës për të dhënë përshtypjen se një Kupë e Botës nuk do të mbështetej në vend. Pavarësisht zbulimeve, organizatorët e turneut të Katarit mohojnë akuzat.

Nëse, në hetimin e radhës konfirmohen akuzat e fundit, Katari rrezikon që t’I hiqet e drejta për të organizuar Kupën e Botës. Në dhjetor të 2010, shteti në Lindjen e Mesme fitoi të drejtën e mbajtjes së kampionatit botëror të futbollit për vitin 2022, duke triumfuar me ofertat e tjera të bëra nga SHBA, Australi, Koreja e Jugut dhe Japonia. Më herët ekipi i Katarit u akuzua dhe për korrupsion, por një hetim i FIFA-s hodhi poshtë pretendimet për rryshfet./abcnews.al

franca-2.jpg
G. P.18:54 | 15/07/2018

Djemtë e Deschamps ia dolën.

Franca arriti të fitojë Kupën e Botës Rusi 2018, duke u bërë kështu dy herë fituese e trofeut të artë.

“Gjelat” mposhtën me rezultatin 4-2 Kroacinë.

Në një nga ndeshjet më të bukura të kësaj Kupe Bote për francezët shënuan Griezmann, Mbappe, Pogba dhe një autogol i Mandzukic. Ndërsa për kroatët shënuan Perisiç dhe Mandzukiç. Ky i fundit falë një gabimi të Hugo Lloris.

Për të arritur në finale, Franca doli e para në grupin C. Më pas në fazat me eleminim direkt, filimisht mposhtën Argjentinën. Në çerekfinale mundën pa shumë probleme Uruguajin, ndërsa në gjysmëfinale mposhtën Belgjikën./abcnews.al

kupa.jpg
G. P.15:39 | 15/07/2018

Kupa e Botës është projektuar nga skulptori italian Silvio Gazzaniga dhe aktualisht ajo vlen 10 milion dollar. Me një peshë prej 6 kilogramësh, ajo është e bërë me ar 18 karatësh.

Emocionalisht Kupa e Botës ka një çmim të paarritshëm, por nga ana monetare vlera e kupës së ëndërruar nga futbollistë, trajnerë e tifozë, e ka një kufi.

Këtë trofe e ka projektuar skulptori italian, Silvio Gazzaniga, në vitin 1971.

Kupa është 36 centimetra e gjatë, është bërë prej ari 18 karatësh, si dhe peshon 6 kilogramë. Baza e gjelbër e trofeut është bërë me një mineral gjysëm të çmuar të quajtur malakit. Malakiti u zgjodh sepse është gjetur në çdo kontinent dhe është i gjelbër, si shumica e fushave të futbollit.

Në atë kohë kupa vlerësohej me çmimin e 50.000 dollarëve, ndërsa tani ky trofe e ka vlerën e 10 milionë dollarëve./abcnews.al

rus.jpg
G. P.16:57 | 07/07/2018

Rusi-Kroaci do të jetë çerekfinalja e fundit e Kupës së Botës. Skuadra vendase synon mrekullinë e radhës, pas eleminimit të Spanjës, por ballkanasit jepen favoritë.

Rikuperim mendor dhe jo vetëm fizik. Këtë mendoi stafi teknik i Rusisë, kur lejoi futbollistët të kishin pranë familjet dhe njerëzit e dashur, në prag të çerekfinales.

Vendasit duan të bëjnë gjithçka për të kaluar Kroacinë dhe për të arritur për herë të parë mes katër më të mirëve të Botërorit. Pasi ia dolën ndaj Spanjës, gjithçka duket e mundshme edhe pse rusët nuk jepen favoritë.

Udhëtimi drejt Sochi-t, në jug ishte i qetë dhe me optimizëm. Problemi i vetëm për Rusinë është dëmtimi i Zhirkovit, gjithë të tjerët janë në dispozicion të trajnerit Çerçesov.

“Është e qartë se përgatitjet tona kanë qenë disi më të ndryshme, – pohoi Çerçesovi, – pasi Kroacia është skuadër e ndryshme nga Spanja. Nuk mund të flas me hollësi për taktikën apo formacionin, por mund të them se kemi bërë gjithçka që në ndeshjet t’i kemi gati të gjitha “armët” tona. Historia e Spanjës ishte e bukur, por ajo kaloi dhe ne duam të shkojmë përpara”.

Ballkanasit cilësohen si tepër të fortë dhe duan të barazojnë rekordin e Botërorit të vitit 1998. Kroacia nuk ka asnjë mungesë, qoftë për dëmtim apo pezullim, dhe formacioni pritet të ketë i njëjtë si ndaj Danimarkës.

“Ne nuk mund ta zgjedhim kundërshtarin, – tha Daliç, – nëse mund të jetë i zoti i shtëpisë apo dikush tjetër. Ne thjesht mundemi të luajmë siç dimë dhe të fitojmë. Sfida do të jetë shumë e fortë, dhe problem shtesë do të jetë mbështetja e tifozëve rusë, por unë besoj tek lojtarët e mi, që kanë përvojë në ndeshjet nën presion”.

Fitorja e Rusisë jepet me kuotën 4.25, barazimi në 3.1 dhe fitorja kroate shihet si shumë më tepër e mundshme, me koeficient 2.1./abcnews.al

mesi-e-ronaldo.jpg
ent ela12:47 | 01/07/2018

Mesi dhe Ronaldo pësuan një tjetër dështim në kupat e botës. Dy lojtarët më të mirë në botë kanë pasur fat të ngjashëm në karrierë, dhe mesa duket nuk do ta fitojnë kurrë një titull botëror.

U mundën në të njëjtën ditë, si të ishin vëllezër siamezë. Lionel Mesi e Kristiano Ronaldo dolën nga Botërori këtë të shtunë, dhe nuk dihet nëse do ta fitojnë ndonjë herë kupën e artë të FIFA-s.

Njëri 31 vjeç e tjetri 33 po i afrohen fundit të dy prej karrierave më të lavdishme në histori, me vetëm një njollë, pa titull botëror. Franca e Uruguaj sikur thanë se turneu rus është kaq i mirë, sa nuk ka nevojë as për më të mirët në rruzull.

Të dy superyjet që kanë dominuar dekadën, kanë pasur po ashtu fat të njëjtë, në botërorët e kaluar, gjithnjë të keq. Në 2006, Argjentina dhe Mesi u eleminuan me penallti nga Gjermania vendase, në çerekfinale.

Në 2010, ishte sërish Gjermania që mposhti kombëtaren e drejtuar nga Maradona, me Mesin yllin kryesor, këtë herë plot 4-0. Katër vjet më vonë, fatale për Mesin u bë edhe një herë Gjermania.

Gjithsesi, argjentinasit arritën deri në finale dhe ishin më pranë se kurrë me titullin, veçse gjermanët superiorë fituan në fund. Ronaldo po ashtu ka luajtur në 4 botërorë, ashtu si Mesi.

Në 2006, Portugalia shumë e mirë e Dekos, Luis Figos e Ronaldos, u mund 1-0 nga Franca e Zidanit. Në Botërorin e Afrikës së Jugut në 2010, rruga e Ronaldos u pre nga Spanja e madhe, që fitoi edhe titullin. David Vija përcaktoi ndeshjen e turit të dytë.

Së fundi, në 2014, portugezët ishin më të dobët, duke u eleminuar në grup, pas humbjes me Gjermaninë 0-4, barazimit 2-2 me SHBA-në, e pavarësisht fitores 2-1 ndaj Ganës. /abcnews.al

NDESHJET-E-ARGJENTINES-DHE-KROACISE-1280x720.jpg
ent ela22:33 | 26/06/2018

Lionel Mesi do të vazhdojë të jetë në Botëror. Argjentina u kualifikua pas fitores dramatike me Nigerinë, ndërsa në turin tjetër do të ndeshet me Francën.

U përcaktuan edhe dy çifte të tjera, ndërsa drama ishte sërish e madhe. Do të kemi Francë-Argjentinë e Kroaci-Danimarkë në të tetat e finaleve të Botërorit, një mbrëmje pasi Spanja e Portugalia e fituan llotarinë e tyre.

Ishte mbrëmja e Argjentinës dhe e Lionel Mesit, që e mbajti fjalën për të dhënë maksimumin e për ta mbajtur ekipin në Rusi. Jo vetëm sepse shënoi gol, por sidomos sepse luftoi deri në fund, në një sfidë dramatike ndaj Nigerisë në Shën Peterburg.

Superylli i Barcelonës u duk se nuk ishte mirë fizikisht, por nuk u dorëzua. Trajneri Sampaoli kishte bërë ndryshime, me Higuainin në vend të Agueros, dhe kjo u duk se dha rezultat, por vetëm deri në një farë mase.

Pas një pjese të parë të mirë, argjentinasit u shpërfytyruan në të dytën. Nigeria nuk ngurroi të barazonte, rezultat që e kualifikonte.

Jo vetëm kaq, por ishte pranë fitores, duke rrezikuar disa herë. Në një moment u duk se u penalizua nga gjyqtari që përdori VAR-in, por nuk dha penallti për prekje të topit me dorë në zonë nga argjentinasit.

Në fund, përvoja dhe fati ishin me ekipin e Mesit, edhe pse goli erdhi nga mbrojtësi Markos Roho. Sidoqoftë, heroizimi argjentinas mund të mos kishte pasur vlerë nëse Kroacia nuk do të kishte bërë detyrën.

Edhe pse me ndryshime në formacion, skuadra ballkanase ishte sërish e fortë duke mundur 2-1 Islandën. Badelj e Perishiç ishin autorët e golave, ndërsa për islandezët barazoi përkohësisht Sigurdson me penallti.

Islandës i duhej fitorja për t’u kualifikuar, por mbeti shumë larg saj. Kroacia mbylli grupin me 7 pikë, Argjentina me 4, Nigeria me 3 dhe Islanda me vetëm 1 pikë. /abcnews.al

 

 


Rreth Nesh

ABC NEWS është i pari televizion në Shqipëri që në ditën e parë të transmetimeve nis me lidhje direkte nga 7 studio lokale ne Shkodër, Durrës, Elbasan, Korcë, fier, Vlorë e Gjirokaster. Për të pasuruar gjeografinë e informacionit së shpejti do të mundesohet edhe studio nga Lezha me transmetime live në cdo kohë.
Në faqen zyrtare në internet, abcnews.al do të gjeni portalin më të pasur ballkanik me lidhje në rrjetet më të mëdha sociale facebook, twitter si dhe në një prej websiteve më të fuqishëm në kulturën e internetit YOUTUBE. Transmetimi i ABC news është live 24 ore. 
NUIS/NIPT K01711004F


Kontakt

Telefono